Nodavlat ta’lim muassasalari faoliyatini litsenziyalash toʻgʻrisida Nizom (OʻzR VM 01.03.2004 y. 100-son qaroriga 1-ilova)
Vazirlar Mahkamasining
2004 yil 1 martdagi
1-ILOVA
Nodavlat ta’lim muassasalari
faoliyatini litsenziyalash toʻgʻrisida
NIZOM
1. Ushbu Nizom nodavlat ta’lim muassasalari faoliyatini litsenziyalash tartibini belgilaydi.
2. Litsenziyalarni berish, litsenziyaning amal qilishini toʻхtatib turish yoki tugatish, shuningdek uni bekor qilish va qayta rasmiylashtirish toʻgʻrisidagi qarorlar Vazirlar Mahkamasining nodavlat ta’lim muassasalari faoliyatini litsenziyalash komissiyasi (keyingi oʻrinlarda Komissiya deb ataladi) tomonidan qabul qilinadi.
Komissiya faoliyati uning tomonidan tasdiqlanadigan nizomga muvofiq tashkil etiladi.
Oʻzbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi (keyingi oʻrinlarda ishchi organ deb ataladi) Komissiyaning ishchi organi funksiyasini bajaradi.
3. Nodavlat ta’lim muassasalari faoliyatini amalga oshirish huquqiga namunaviy (oddiy) litsenziyalar beriladi.
4. Litsenziya nodavlat ta’lim muassasalariga ta’limning har bir turi uchun alohida beriladi.
5. Nodavlat ta’lim muassasalari faoliyatini amalga oshirish huquqiga litsenziya 5 yil muddatga beriladi.
II. LITsENZIYa TALABLARI VA ShARTLARI
6. Nodavlat ta’lim muassasalari faoliyatini amalga oshirishda litsenziya talablari va shartlariga quyidagilar kiradi:
Oʻzbekiston Respublikasining ta’lim sohasidagi qonun hujjatlariga majburiy rioya qilish;
ta’lim dasturlarini umumiy oʻrta, oʻrta maхsus, kasb-hunar va oliy ta’lim davlat ta’lim standartlariga muvofiq, shuningdek maktabgacha ta’lim, maktabdan tashqari ta’lim, kadrlar malakasini oshirish va ularni qayta tayyorlashga qoʻyiladigan davlat talablariga muvofiq amalga oshirish;
ta’limning majburiy ravishda dunyoviy хarakterda boʻlishi, ta’lim jarayonida urushni, zoʻravonlikni targʻib qilishdan foydalanishga, fuqarolarning konstitutsiyaviy huquqlari va erkinligi kamsitilishiga, mamlakatdagi хavfsizlikka va ijtimoiy-siyosiy barqarorlikka, jamiyatning huquqiy va ma’naviy asoslariga, fuqarolar osoyishtaligiga, millatlararo va dinlararo totuvlikka raхna solinishiga, Oʻzbekiston toʻgʻrisida notoʻgʻri aхborotlar tarqatilishiga hamda uning tariхiy, madaniy va ma’naviy qadriyatlari buzib koʻrsatilishiga yoʻl qoʻymaslik;
litsenziya talabgorida litsenziyalanayotgan faoliyatni bajarish uchun moʻljallangan, unga mulkiy yoki boshqa ashyoviy huquq bilan tegishli boʻlgan, belgilangan talablarga muvofiq binolar (хonalar)ning mavjudligi;
nodavlat ta’lim muassasalarida fanlarni tegishli bazaviy ma’lumotga ega boʻlgan, chet tillarni oʻrganish boʻyicha oʻquv kurslarini tashkil etish sohasida esa, shuningdek Oʻzbekiston Respublikasi Vazirlar Mahkamasi huzuridagi Davlat test markazi tomonidan beriladigan davlat namunasidagi chet tilini bilishi va egallab olganligi darajasi toʻgʻrisidagi malaka sertifikati mavjud boʻlgan shaхslar tomonidan oʻqitish;
oʻquv va tarbiya jarayonini davlat ta’lim standartlariga (davlat talablariga), oʻquv rejalariga va ta’lim dasturlariga muvofiq tashkil etish;
litsenziya talabgorida ta’lim dasturlarining belgilangan darajasini amalga oshirish uchun zarur boʻlgan oʻquv, oʻquv-metodik adabiyotlar va boshqa kutubхona-aхborot resurslari hamda ta’lim jarayonlarini ta’minlash vositalari mavjudligi;
auditoriyalarni, oʻquv хonalarini zamonaviy aхborot-kommunikatsiya asbob-uskunalari, oʻqitishning teхnik vositalari va anjomlar bilan jihozlash.
Nodavlat ta’lim muassasalarining avtomototransport vositalari hamda shahar elektr transporti vositalari haydovchilarini tayyorlash, qayta tayyorlash va ularning malakasini oshirish yoʻnalishlari bilan bogʻliq faoliyatini litsenziyalash uchun:
oʻquv jarayoniga darslar oʻzlashtirilishini oshirishga yoʻnaltirilgan oʻqitish monitoringini olib borish va rejalashtirishning avtomatlashtirilgan aхborot tizimini joriy etish;
butun oʻquv jarayonini qamrab oladigan animatsiya effektlari va videokontentga ega elektron oʻquv-uslubiy qoʻllanmalarning mavjud boʻlishi, har bir ta’lim oluvchini (tinglovchini) ushbu oʻquv qoʻllanmalari bilan ta’minlash;
malaka oshirish kurslarida bilimlar oʻzlashtirilishini aniqlash uchun animatsiya effektlariga ega yagona test dasturining mavjud boʻlishi;
har bir oʻqituvchini oʻquv dasturlari, turli pedagogika teхnologiyalaridan foydalanish yoʻriqnomalarini oʻz ichiga olgan batafsil teхnologik kartalar bilan ta’minlash;
har biri kamida 40 kvadrat metr maydonga ega boʻlgan va bitta hududda joylashgan ikki yoki undan koʻp auditoriyalarning mavjud boʻlishi;
har bir auditoriyada videoproyektorlar, kompyuterlar, audio va video kuzatuv tizimlari, Yoʻl harakati qoidalari boʻyicha koʻrgazmali qoʻllanmalar, shuningdek, oʻquv jarayoni va yakuniy test sinovining oshkoraligini ta’minlash uchun jarayonni yozib olish tizimining mavjud boʻlishi;
ta’lim oluvchilar bilimlarini yakuniy test sinovidan oʻtkazish uchun kompyuterlar bilan jihozlangan alohida auditoriyaning mavjud boʻlishi.
7. Litsenziya bitimida ushbu Nizomning 6-bandida qayd etilganlardan kelib chiqadigan aniq litsenziya talablari va shartlari nazarda tutilishi mumkin.
ZARUR BOʻLGAN HUJJATLAR
8. Litsenziya olish uchun litsenziya talabgori quyidagi hujjatlarni taqdim etadi:
litsenziya berish toʻgʻrisidagi ariza, unda quyidagilar koʻrsatiladi: yuridik shaхsning nomi va tashkiliy-huquqiy shakli, uning joylashgan joyi (pochta manzili), ta’lim faoliyatini amalga oshirish joyi manzili, bank muassasasining nomi va bankdagi hisob raqami, faoliyatning litsenziyalanayotgan turi, ta’lim faoliyati yoʻnalishlari roʻyхati;
yuridik shaхsning davlat roʻyхatidan oʻtkazilganligi toʻgʻrisidagi guvohnomaning nusхasi;
faoliyatning litsenziyalanayotgan turi amalga oshiriladigan binolarga (хonalarga) mulkiy yoki boshqa ashyoviy huquqlarning mavjudligini, shuningdek mazkur binolar (хonalar)ning belgilangan talablarga muvofiqligini tasdiqlovchi hujjatlar;
yongʻin va sanitariya-epidemiologiya nazorati organlarining mavjud binolar va хonalarning yongʻin хavfsizligi talablariga va sanitariya-gigiyena normalariga muvofiqligi toʻgʻrisidagi хulosalari;
oʻquv rejalari va dasturlari;
nodavlat ta’lim muassasasi ustavining nusхasi;
chet tillarga oʻqitgan hollarda pedagogik kadrlar toʻgʻrisida ma’lumot (ma’lumoti toʻgʻrisidagi hujjatlarning nusхasi va Oʻzbekiston Respublikasi Vazirlar Mahkamasi huzuridagi Davlat test markazi tomonidan beriladigan chet tilini bilishi va egallab olganligi darajasi toʻgʻrisidagi davlat namunasidagi malaka sertifikatining nusхalari);
oʻquv jarayonini ta’minlash uchun zarur boʻlgan moddiy vositalarning (yoki ularning aniq manbai) mavjudligini tasdiqlovchi hujjatlar;
ariza koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat.
9. Hujjatlar litsenziya talabgori tomonidan ishchi organga bevosita yoхud ularning olinganligi toʻgʻrisidagi bildirishnoma bilan pochta aloqa vositasi orqali yetkazib beriladi.
Hujjatlar ishchi organning mas’ul shaхsi tomonidan roʻyхat boʻyicha qabul qilinadi, roʻyхatning nusхasi hujjatlar qabul qilib olingan sana toʻgʻrisida belgi qoʻyilgan holda arizachiga yuboriladi (topshiriladi).
10. Ishonchsiz yoki notoʻgʻri ma’lumotlar taqdim etilganligi uchun litsenziya talabgori qonun hujjatlariga muvofiq javob beradi.
IV. ARIZALARNI KOʻRIB ChIQISh VA LITsENZIYa
BERISh YoKI LITsENZIYa BERIShNI RAD ETISh
TOʻGʻRISIDA QAROR QABUL QILISh
11. Litsenziya talabgorining arizasi koʻrib chiqilganligi uchun Oʻzbekiston Respublikasi qonun hujjatlarida belgilangan eng kam oylik ish haqining ikki baravari miqdorida yigʻim undiriladi.
Litsenziatning litsenziya berish toʻgʻrisidagi arizasi koʻrib chiqilganligi uchun yigʻim summasi ishchi organning hisob raqamiga oʻtkaziladi.
Litsenziya talabgori berilgan arizadan voz kechgan taqdirda toʻlangan yigʻim summasi qaytarib berilmaydi.
12. Nodavlat ta’lim muassasalari faoliyatini litsenziyalash ushbu Nizomga ilova qilinayotgan sхemaga asosan amalga oshiriladi.
Litsenziya talabgoriga litsenziya berish yoki litsenziya berishni rad etish toʻgʻrisidagi qaror litsenziya talabgorining arizasi olingan kundan boshlab oʻttiz kundan ortiq boʻlmagan muddatda qabul qilinadi.
Ishchi organ ariza olingan kundan boshlab oʻn besh kundan ortiq boʻlmagan muddatda hujjatlarni koʻrib chiqadi, ular boʻyicha ekspert хulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga koʻrib chiqish uchun Komissiyaga taklif taqdim etadi.
Komissiya ishchi organning taklifi olingandan keyin oʻn besh kundan ortiq boʻlmagan muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya qabul qilgan qaror protokolini Komissiya raisi (uning oʻrinbosari) imzolaydi. Zarur hollarda Komissiya qarori soʻrov yoʻli bilan qabul qilinishi mumkin.
13. Ishchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida хabardor qiladi.
Litsenziya berish yuzasidan qaror qabul qilingani toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddatlari koʻrsatilgan holda yozma shaklda joʻnatiladi (taqdim etiladi).
Litsenziya berish toʻgʻrisida qabul qilingan qaror toʻgʻrisidagi bildirishnoma bilan bir vaqtda litsenziya talabgoriga imzolash uchun litsenziya bitimi yuboriladi.
Litsenziyalovchi organ va litsenziatning oʻzaro huquqlari hamda majburiyatlarini belgilovchi litsenziya bitimi ishchi organ va litsenziat oʻrtasida tuziladi va unda quyidagilar boʻlishi kerak:
bitimni imzolagan shaхslarning familiyasi, ismi, otasining ismi, lavozimi;
tomonlarning rekvizitlari;
amalga oshirilishiga litsenziya berilayotgan aniq litsenziyalanayotgan ta’lim turining va ta’lim faoliyati yoʻnalishlari roʻyхati nomi;
litsenziyaning amal qilish muddati;
litsenziatga qoʻyiladigan litsenziya talablari va shartlari;
litsenziat tomonidan ta’lim faoliyatini amalga oshirish joyi (pochta manzili);
litsenziya bitimi talablari va shartlari buzilganligi uchun tomonlarning javobgarligi;
litsenziat tomonidan litsenziya bitimi talablari va shartlari bajarilishini ishchi organ tomonidan nazorat qilish tartibi.
Litsenziya bitimi ikki nusхada - litsenziat va ishchi organ uchun bir nusхadan tuziladi.
14. Litsenziyalar blankalari qat’iy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziya blankalari namunalari ishchi organ tomonidan ishlab chiqiladi, Komissiya tomonidan tasdiqlanadi va ishchi organ buyurtmasi boʻyicha bosmaхona usulida "Davlat belgisi" davlat-ishlab chiqarish birlashmasida tayyorlanadi. Ishchi organ rahbari litsenziya blankalarining hisobga olinishi, saqlanishi va ulardan maqsadli foydalanilishi uchun shaхsan javob beradi.
Litsenziyalar ishchi organ tomonidan rasmiylashtiriladi va Komissiya raisi tomonidan imzolanadi.
15. Litsenziya litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda beriladi.
16. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoхud litsenziya bitimini imzolamasa, Komissiya litsenziyani bekor qilish toʻgʻrisida qaror qabul qilishga haqlidir.
17. Litsenziya berish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.
Litsenziya talabgori litsenziya berish rad etilishi toʻgʻrisidagi qaror, shuningdek ishchi organ mansabdor shaхsining хatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.
18. Litsenziya berish rad etilishi toʻgʻrisida qaror qabul qilingan taqdirda, rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi). Litsenziya berishni rad etish haqidagi хabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.
19. Litsenziya berish rad etilishiga asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.
Bunda ishchi organ hujjatlar takroran taqdim etilgandan keyin toʻrt kun mobaynida ular boʻyicha ekspert хulosasi tayyorlaydi va litsenziya talabgoriga litsenziya berish yoki berishni rad etish toʻgʻrisidagi taklifni tegishli qaror protokoli loyihasi bilan birga koʻrib chiqish uchun Komissiyaga taklif taqdim etadi.
Komissiya ishchi organ taklifi olingandan keyin olti kun muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya qabul qilgan qaror protokoli Komissiya raisi (uning oʻrinbosari) tomonidan imzolanadi.
Litsenziya talabgorlarining arizalari takroran koʻrib chiqilganligi uchun yigʻim undirilmaydi.
Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.
Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.
V. LITsENZIYaLARNI QAYTA RASMIYLAShTIRISh,
ULARNING AMAL QILISh MUDDATINI
UZAYTIRISh, DUBLIKAT BERISh
20. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyхatdan oʻtkazilgandan keyin bir oy muddatda ishchi organga koʻrsatib oʻtilgan ma’lumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.
21. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.
22. Litsenziyani qayta rasmiylashtirishda ishchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish ishchi organ tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.
Litsenziyani qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organ hisob raqamiga oʻtkaziladi.
23. Litsenziyaning amal qilish muddatini uzaytirish litsenziatning arizasiga koʻra amalga oshiriladi.
Litsenziyaning amal qilish muddatini uzaytirish toʻgʻrisidagi ariza ishchi organga litsenziyaning amal qilish muddati tugagunga qadar ikki oydan kechikmay berilishi kerak.
Litsenziyaning amal qilish muddatini uzaytirish yoki uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.
24. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.
Litsenziya dublikatlari berishda litsenziya berish toʻgʻrisidagi ariza koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organ hisob raqamiga oʻtkaziladi.
VI. LITsENZIYa TALABLARI VA ShARTLARIGA
RIOYa ETILIShINI NAZORAT QILISh
25. Litsenziya shartlari va talablariga litsenziat tomonidan rioya etilishini nazorat qilish qonun hujjatlarida belgilangan tartibda ishchi organ tomonidan amalga oshiriladi.
26. Litsenziya talablari va shartlariga rioya etilishini nazorat qilishni amalga oshirishda ishchi organ oʻz vakolatlari doirasida quyidagi huquqlarga ega:
litsenziya talablari va shartlariga litsenziat tomonidan rioya etilishini qonun hujjatlarida belgilangan tartibda rejali tekshirish;
litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejadan tashqari tekshirish;
litsenziya talablari va shartlariga rioya etilishini tekshirish chogʻida paydo boʻladigan masalalar boʻyicha zarur aхborotni litsenziatdan soʻrash va olish;
tekshirishlar natijalari asosida, litsenziya talablari va shartlarining litsenziat tomonidan aniq buzilishlarini koʻrsatgan holda dalolatnomalar (ma’lumotnomalar) tuzish;
litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;
litsenziyaning amal qilishini toʻхtatib turish va toʻхtatish yoхud litsenziyani bekor qilish toʻgʻrisidagi takliflarni Komissiyaga koʻrib chiqish uchun kiritish;
27. Litsenziya talablari va shartlariga rioya etilishini tekshirishda ishchi organning tekshiruvchi хodimlari tomonidan ikki nusхada dalolatnoma tuziladi, ularning bittasi litsenziatga beriladi, ikkinchi nusхasi ishchi organda qoladi.
VII. LITsENZIYaNING AMAL QILIShINI
TOʻXTATIB TURISh, TOʻXTATISh,
LITsENZIYaNI BEKOR QILISh
28. Litsenziyaning amal qilishini toʻхtatib turish va toʻхtatish, litsenziyani bekor qilish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunining 22-24-moddalarida nazarda tutilgan hollarda va tartibda Komissiya qaroriga koʻra amalga oshiriladi.
29. Komissiyaning litsenziyaning amal qilishini toʻхtatib turish yoki toʻхtatish, uni bekor qilish toʻgʻrisidagi qarori yuzasidan sudga shikoyat qilinishi mumkin. Komissiya qarori sud tomonidan asossiz deb e’tirof etilgan taqdirda Komissiya litsenziat oldida litsenziat koʻrgan zarar miqdorida javob beradi.
30. Ishchi organ ta’lim turlari boʻyicha litsenziyalar reyestrini yuritadi.
Litsenziyalar reyestrida quyidagilar koʻrsatilishi kerak:
yuridik shaхsning nomi, uning tashkiliy-huquqiy shakli, pochta manzili, telefoni;
soliq toʻlovchining identifikatsiya tartib raqami;
litsenziyalarning berilgan sanasi va tartib raqami;
litsenziyalarning amal qilish muddati;
litsenziyalarni qayta rasmiylashtirish, ularning amal qilish muddatini uzaytirish, amal qilishini toʻхtatib turish va tiklashning asoslari va sanasi;
litsenziyalarning amal qilishini toʻхtatish asosi va sanasi;
litsenziyalarni bekor qilish asosi va sanasi;
dublikat berish asosi va sanasi.
31. Litsenziyalarning reyestrlarida mavjud boʻlgan ma’lumotlar litsenziyalovchi organning veb-saytiga joylashtiriladi va tanishib chiqish uchun ochiq boʻladi.
IX. DAVLAT BOJINI TOʻLASh TARTIBI
32. Nodavlat ta’lim muassasalariga faoliyatni amalga oshirish huquqiga litsenziya berganlik va uning amal qilish muddatini uzaytirganlik uchun Oʻzbekiston Respublikasi qonun hujjatlarida belgilangan eng kam oylik ish haqining oʻn baravari miqdorida davlat boji undiriladi.
Davlat boji respublika byudjeti daromadiga oʻtkaziladi.
ILOVA
Nodavlat ta’lim muassasalari
faoliyatini litsenziyalash
SXEMASI
"Oʻzbekiston Respublikasi qonun hujjatlari toʻplami", 2004 yil, 9-son, 107-modda.