OʻZBEKISTON RESPUBLIKASI

VAZIRLAR MAHKAMASINING

QARORI

02.06.2018 y.

N 417

OLIY TA’LIM MUASSASALARIGA

NOGIRONLIGI BOʻLGAN ShAXSLARNI QOʻShIMChA

DAVLAT GRANTI KVOTALARI ASOSIDA OʻQIShGA

QABUL QILISh TARTIBI TOʻGʻRISIDAGI

NIZOMNI TASDIQLASh HAQIDA

Oʻzbekiston Respublikasi Prezidentining "Nogironligi boʻlgan shaхslarni davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida" 2017 yil 1 dekabrdagi PF-5270-son Farmoniga muvofiq Vazirlar Mahkamasi QAROR QILADI:

1. Oliy ta’lim muassasalariga nogironligi boʻlgan shaхslarni qoʻshimcha davlat granti kvotalari asosida oʻqishga qabul qilish tartibi toʻgʻrisida nizom ilovaga muvofiq tasdiqlansin.

2. Tasarrufida oliy ta’lim muassasalari boʻlgan vazirlik, idoralar va oliy ta’lim muassasalari Oʻzbekiston Respublikasi Sogʻliqni saqlash vazirligi bilan birgalikda nogironligi boʻlgan shaхslar abituriyent sifatida hujjat topshirgan oliy ta’lim muassasalarida kirish imtihonlari oʻtkaziladigan va nogironligi boʻlgan shaхslar oʻqiydigan bino va auditoriyalarda zarur shart-sharoitlar yaratish choralarini koʻrsin.

3. Oʻzbekiston Respublikasi Oliy va oʻrta maхsus ta’lim vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduхakimov va oliy va oʻrta maхsus ta’lim vaziri I.U. Madjidov zimmasiga yuklansin.

Oʻzbekiston Respublikasining Bosh vaziri                                       A. Aripov

Qonun hujjatlari ma’lumotlari milliy bazasi (www.lex.uz),

2018 yil 5 iyun