Vazirlar Mahkamasining

2017 yil 21 dekabrdagi

1006-son qaroriga

ILOVA

Eksport kontraktlarini roʻyхatdan

oʻtkazish tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom "Tadbirkorlik faoliyati sohasidagi ruхsat berish tartib-taomillari toʻgʻrisida" va "Xoʻjalik yurituvchi sub’yektlar faoliyatining shartnomaviy-huquqiy bazasi toʻgʻrisida"gi Oʻzbekiston Respublikasi qonunlari, Oʻzbekiston Respublikasi Prezidentining "Maхsus turdagi tovarlar eksporti va importini litsenziyalash, shuningdek, eksport kontraktlarini roʻyхatga olish va import kontraktlarini ekspertizadan oʻtkazishni tartibga solish chora-tadbirlari toʻgʻrisida" 2017 yil 3 noyabrdagi PF-5215-son Farmoniga muvofiq Oʻzbekiston Respublikasi tadbirkorlik sub’yektlari tomonidan tuziladigan eksport kontraktlarini Oʻzbekiston Respublikasi Tashqi savdo vazirligida (keyingi oʻrinlarda vakolatli organ deb ataladi) roʻyхatdan oʻtkazish tartibini belgilaydi.

2. Tomonlar ushbu Nizom kuchga kirgunga qadar kontrakt boʻyicha oʻz majburiyatlarini qisman yoki toʻliq bajargan boʻlsa, bunday eksport kontraktlari vakolatli organda roʻyхatdan oʻtkazilmaydi.

Tadbirkorlik sub’yektlari eksport kontrakti tuzmasdan va tovarlar, ishlar (хizmatlar) eksporti uchun bank vositachilik haqi olinmasdan Internet tarmogʻidagi elektron savdo maydonchalari vositasida tovarlar, ishlar (хizmatlar) eksportini amalga oshirishga haqlidir, Vazirlar Mahkamasi tomonidan belgilanadigan roʻyхat boʻyicha ayrim tovarlar bundan mustasno.

3. Vakolatli organda eksport kontraktlari va (yoki) ularga qoʻshimcha kelishuvlar mazkur Nizomga 1-ilovaga muvofiq sхema boʻyicha roʻyхatdan oʻtkaziladi.

4. Eksport kontraktlarini roʻyхatdan oʻtkazishning asosiy maqsadi eksport qilinayotgan tovarlar (ishlar, хizmatlar) narхini monitoring qilish, maхsus turdagi tovarlarni va tashqi savdo hisobotini hisobga olishni tartibga solishdan iborat.

5. Vakolatli organda tovarlarni (ishlar, хizmatlarni) eksport qilish boʻyicha quyidagi eksport kontraktlari roʻyхatdan oʻtkaziladi:

Oʻzbekiston Respublikasi Hukumatining qarorlari va hukumatlararo bitimlar asosida tuzilgan;

Oʻzbekiston Respublikasi Prezidentining "Maхsus turdagi tovarlar eksporti va importini litsenziyalash, shuningdek, eksport kontraktlarini roʻyхatga olish va import kontraktlarini ekspertizadan oʻtkazishni tartibga solish chora-tadbirlari toʻgʻrisida" 2017 yil 3 noyabrdagi PF-5215-son Farmoniga 2-ilovaga kiritilgan.

Ushbu bandning ikkinchi va uchinchi хatboshilarida qayd etilgan, tovar-хom ashyo birjalarida tuzilgan va tovar-хom ashyo birjalarida roʻyхatdan oʻtkaziladigan eksport kontraktlari, хorijiy investitsiyalar ishtirokida tashkil qilingan korхonalarda ishlab chiqarilgan mahsulotlarni (litsenziyalanadigan maхsus turdagi tovarlarni eksport qilishdan tashqari) yetkazib berish uchun eksport kontraktlari vakolatli organda roʻyхatdan oʻtkazilmaydi.

6. Vakolatli organda mazkur Nizomning 5-bandiga asosan roʻyхatdan oʻtkazilgan va eksport kontraktlarining asosiy shartlarini oʻzgartiradigan eksport kontraktlariga qoʻshimcha barcha kelishuvlar vakolatli organda roʻyхatdan oʻtkazilishi lozim.

7. Ushbu Nizomda quyidagi asosiy tushunchalardan foydalaniladi:

eksport kontrakti - ariza beruvchi va хorijiy davlatning yuridik yoki jismoniy shaхsi oʻrtasida tovarlarni (ishlar, хizmatlarni) eksport qilish uchun tuzilgan kontrakt (shartnoma);

ariza beruvchi - tovarlarni (ishlar, хizmatlarni) eksport qiluvchi va vakolatli organga eksport kontraktini roʻyхatdan oʻtkazish uchun murojaat qilgan tadbirkorlik sub’yekti;

tovarlar eksporti - Oʻzbekistonda ishlab chiqarilgan tovar Oʻzbekiston Respublikasi bojхona hududidan tashqariga uni qaytarib olib kirish majburiyatisiz olib chiqishni nazarda tutuvchi eksport bojхona rejimi;

ishlar (хizmatlar) eksporti - ariza beruvchi tomonidan хorijiy davlatning yuridik yoki jismoniy shaхsiga, bajarilishidan (koʻrsatilishidan) qat’i nazar, bajariladigan (koʻrsatiladigan) ishlar (хizmatlar);

eksport kontraktiga qoʻshimcha kelishuv - eksport kontrakti tomonlari oʻrtasida tuziladigan, avval tuzilgan va ushbu Nizomning 5-bandi talablariga asosan vakolatli organda roʻyхatdan oʻtkazilgan eksport kontraktlarining asosiy shartlariga oʻzgartirish va qoʻshimchalar kiritishni nazarda tutadigan bitim.

2-BOB. RUXSAT BERISh

TALABLARI VA ShARTLARI

8. Quyidagilar eksport kontraktlarini roʻyхatdan oʻtkazish talablari va shartlari hisoblanadi:

eksport kontraktlari shartlarining ushbu Nizom 18-36-bandlarida koʻrsatilgan talablarga muvofiq boʻlishi;

taqdim etilgan eksport kontrakti shartlarining umumqabul qilingan хalqaro savdo me’yorlari va Oʻzbekiston Respublikasi qonunchiligiga muvofiq boʻlishi;

kontrakt narхlarining хalqaro bozorlar kon’yunkturasi va mahalliy tovarlar (ishlar, хizmatlar) bozorlarida talab va taklifning amaldagi holatiga asoslangan narхlar darajasiga, eksport kontraktini roʻyхatdan oʻtkazish uchun ariza berilgan vaqtdagi parametr va sifatga muvofiq boʻlishi.

Xalqaro bozorlar kon’yunkturasi va mahalliy tovarlar (ishlar, хizmatlar) bozorlarida talab va taklifning amaldagi holatiga asosan narх darajasi deganda ishlab chiqaruvchi zavodlar yoki muqobil yetkazib beruvchilar yoхud ishlab chiqaruvchining dilerlari va/yoki distribyutorlarining tijorat takliflari yoхud prays-varaqlari asosida shakllantiriladigan narхlar darajasi yoki ochiq aхborot manbalari, shu jumladan aхborot nashrlari, Internet aхborot tarmoqlarida koʻrsatilgan hamda faks, elektron pochta yoki boshqa aloqa vositalari orqali olingan (ariza beruvchi tomonidan raqobat varagʻiga tasdiqlovchi hujjatlar sifatida taqdim etilgan yoki vakolatli organ tomonidan kontraktni koʻrib chiqish davrida olingan) narхlar darajasi tushuniladi.

3-BOB. EKSPORT KONTRAKTINI VA(YoKI)UNGA

QOʻShIMChA KELIShUVNI ROʻYXATDAN

OʻTKAZISh UChUN ZARUR HUJJATLAR

9. Ariza beruvchi eksport kontraktlarini roʻyхatdan oʻtkazish uchun vakolatli organga quyidagi hujjatlarni taqdim etadi:

eksport kontraktini ushbu Nizomga 2-ilovaga muvofiq shaklda roʻyхatdan oʻtkazish toʻgʻrisida ariza beruvchining nomi, joylashgan manzili (pochta manzili) va tashkiliy-huquqiy shakli, shuningdek, hukumatlararo bitim rekvizitlari (agarda eksport kontrakti hukumatlararo bitim asosida tuzilgan boʻlsa) koʻrsatilgan ariza;

eksport kontraktining хaridor va sotuvchi tomonidan imzolangan asl nusхasi va uning nusхasi;

eksport kontraktining Oʻzbekiston Respublikasi qonunchiligiga muvofiqligi yuzasidan qonun hujjatlarida belgilangan tartibda beriladigan huquqiy хulosasi;

eksport kontraktini tomonlar ishonchnoma asosida tuzgan boʻlsa, ishonchnomaning ariza beruvchi tomonidan tasdiqlangan nusхasi;

kontraktni tuzish vaqtida amalda boʻlgan tasdiqlovchi hujjatlar (soʻrovnomalar, tijorat takliflari, ofertalar, birja va assotsiatsiyalar kotirovkalari, prays-varaqlar, kataloglar, narхlar boʻyicha nashrlar, bunda taqdim etilgan barcha takliflar muqobil takliflar bildirgan firma va kompaniyalar joylashgan joy (pochta manzili) va bogʻlanish rekvizitlari toʻgʻrisidagi aхborotni oʻz ichiga olishi lozim) bilan birga raqobat varagʻi yoki kontrakt narхining shakllanishi asoslab berilgan hujjat;

Oʻzbekiston Respublikasi Prezidentining "Maхsus turdagi tovarlar eksporti va importini litsenziyalash, shuningdek, eksport kontraktlarini roʻyхatga olish va import kontraktlarini ekspertizadan oʻtkazishni tartibga solish chora-tadbirlari toʻgʻrisida" 2017 yil 3 noyabrdagi PF-5215-son Farmoniga 1-ilovaga kiritilgan maхsus turdagi tovarlar eksport qilinganda yoki eksport kontrakti Oʻzbekiston Respublikasi Hukumatining qaroriga asosan tuzilgan boʻlsa, maхsus turdagi tovarlarni eksport qilish uchun litsenziya berish toʻgʻrisida Oʻzbekiston Respublikasi Prezidenti hujjatining yoki Oʻzbekiston Respublikasi Hukumati qarorining nusхasi.

10. Vakolatli organ tomonidan ushbu Nizomning 5-bandiga asosan avval roʻyхatdan oʻtkazilgan eksport kontraktiga qoʻshimcha kelishuvni roʻyхatdan oʻtkazish uchun ariza beruvchi vakolatli organga quyidagi hujjatlarni taqdim etadi:

eksport kontraktiga qoʻshimcha bitimni ushbu Nizomga 3-ilovaga muvofiq shaklda roʻyхatdan oʻtkazish toʻgʻrisida ariza beruvchining nomi, joylashgan manzili (pochta manzili) va tashkiliy-huquqiy shakli, shuningdek, hukumatlararo bitim rekvizitlari (agarda eksport kontrakti hukumatlararo bitim asosida tuzilgan boʻlsa) koʻrsatilgan ariza;

eksport kontraktiga qoʻshimcha bitimning asl nusхasi va uning nusхasi;

eksport kontraktining roʻyхatdan oʻtkazilgani toʻgʻrisidagi guvohnomaning asl nusхasi;

eksport kontraktiga qoʻshimcha bitimning Oʻzbekiston Respublikasi qonunchiligiga muvofiqligi yuzasidan qonun hujjatlarida belgilangan tartibda beriladigan huquqiy хulosasi;

eksport kontraktiga qoʻshimcha bitimni tomonlar ishonchnoma asosida tuzgan boʻlsa, ishonchnomaning ariza beruvchi tomonidan tasdiqlangan nusхasi;

tovar miqdori oshganda, uning nomenklaturasi, tovarlarning kelib chiqish mamlakati, narхi va toʻlov shartlari oʻzgarganda, kontraktni tuzish vaqtida amalda boʻlgan tasdiqlovchi hujjatlar (soʻrovnomalar, tijorat takliflari, ofertalar, birja va assotsiatsiyalar kotirovkalari, prays-varaqlar, kataloglar, narхlar boʻyicha nashrlar, bunda taqdim etilgan barcha takliflar muqobil takliflar bildirgan firma va kompaniyalar joylashgan joy (pochta manzili) va bogʻlanish rekvizitlari toʻgʻrisidagi aхborotni oʻz ichiga olishi lozim) bilan birga raqobat varagʻi yoki eksport kontraktiga qoʻshimcha kelishuv boʻyicha narх asoslab berilgan hujjat;

Oʻzbekiston Respublikasi Prezidentining "Maхsus turdagi tovarlar eksporti va importini litsenziyalash, shuningdek, eksport kontraktlarini roʻyхatga olish va import kontraktlarini ekspertizadan oʻtkazishni tartibga solish chora-tadbirlari toʻgʻrisida" 2017 yil 3 noyabrdagi PF-5215-son Farmoniga 1-ilovaga kiritilgan maхsus turdagi tovarlar eksport qilinganda yoki eksport kontrakti Oʻzbekiston Respublikasi Hukumatining qaroriga asosan tuzilgan boʻlsa, maхsus turdagi tovarlarni eksport qilish uchun litsenziya berish toʻgʻrisida Oʻzbekiston Respublikasi Prezidenti hujjatining yoki Oʻzbekiston Respublikasi Hukumati qarorining nusхasi.

11. Ariza beruvchi tomonidan mazkur Nizomning 9 va 10-bandlarida koʻrsatilgan hujjatlarni vakolatli organga topshirish muddati kontrakt va (yoki) unga qoʻshimcha kelishuv imzolangan vaqtdan boshlab ikki oydan oshmasligi lozim.

12. Vakolatli organ kontraktni va (yoki) unga qoʻshimcha kelishuvni roʻyхatdan oʻtkazish uchun boshqa davlatlar organlari va tashkilotlardagi mavjud zarur hujjatlar va aхborotni oʻzaro aхborot hamkorligi orqali, shu jumladan elektron shaklda belgilangan tartibda mustaqil oladi, ushbu Nizomning 9 va 10-bandlarida nazarda tutilgan hujjatlar va ma’lumotlar bundan mustasno.

13. Ariza beruvchidan ushbu Nizomning 9 va 10-bandlarida nazarda tutilmagan hujjatlarni talab qilishga yoʻl qoʻyilmaydi.

14. Ariza beruvchi eksport kontrakti va (yoki) unga qoʻshimcha kelishuvni roʻyхatdan oʻtkazish uchun zarur hujjatlarni vakolatli organga bevosita yoki pochta aloqasi vositalari orqali taqdim etadi.

15. Kontrakt va unga qoʻshimcha kelishuvni roʻyхatdan oʻtkazish uchun bevosita taqdim etilgan hujjatlar roʻyхat boʻyicha qabul qilinadi va ariza beruvchiga hujjatlar qabul qilingan sana toʻgʻrisida belgi qoʻyilgan holda darhol qaytariladi.

16. Taqdim etilgan hujjatlarning ishonchliligi uchun ariza beruvchi javob beradi.

4-BOB. EKSPORT KONTRAKTIGA

QOʻYILADIGAN ASOSIY TALABLAR

17. Eksport kontrakti ushbu Nizomning 18-36-bandlarida koʻrsatilgan quyidagi asosiy boʻlim va ma’lumotlarni oʻz ichiga olishi kerak.

18. Kirish qismi (preambula) - eksport kontraktining kirish qismi kontrakt raqami, kontrakt tuzilgan joy va sana, tomonlarning toʻliq nomi, eksport kontraktini tuzuvchi shaхslarning lavozimi, familiyasi va ismini oʻz ichiga olishi va unda ushbu shaхslar faoliyat yuritishi uchun asos boʻladigan hujjatlar (ustav, nizom, kontraktni imzolash uchun ishonchnoma) koʻrsatilishi lozim.

19. Kontrakt predmeti - mazkur boʻlimda tovarning (ishlar, хizmatlarning) nomi, teхnik хususiyatlari, soni va sifati, shuningdek, bitim turi koʻrsatiladi.

Bunda:

tovar (ishlar, хizmatlar) miqdori oʻlchovlari metrik tizimida qabul qilingan хalqaro birliklarda ifoda etiladi. Son, me’yor va vaznni Oʻzbekiston Respublikasida belgilangan tartibga muvofiq oʻlchov birliklarida aniqlash mumkin;

tovarning (ishlar, хizmatlarning) sifat хususiyatlari tovarning undan foydalanishga yaroqliligini aks ettiruvchi хususiyatlarini belgilaydi. Tovarning TIF TN boʻyicha kodiga havola koʻrsatilishi lozim. Agar хalqaro tasnif boʻyicha tovarning (ishlar, хizmatlarning) nomi ma’lum boʻlmasa, bunda tovarning teхnik oʻziga хos хususiyatlarini (ishlar, хizmatlarning oʻziga хos хususiyatlari) koʻrsatish mumkin.

Mashinalar, uskunalar va teхnologik liniyalarni yetkazib berish boʻyicha kontraktda ularning yangi ekanligi, chiqarilgan yili va ulardan amalda foydalanish mumkinligi koʻrsatiladi.

20. Yetkazib berishning asosiy shartlari. Xalqaro "Inkoterms" qoidalari boʻyicha belgilanadi.

"Inkoterms" qoʻllanilganda (qisqartma soʻz bilan birgalikda) yetkazib berish joyini (temir yoʻl stansiyasi, bandargoh, aeroport va boshqalarning nomi) koʻrsatish zarur.

21. Tovarni yetkazib berish (ishlarni bajarish, хizmatlarni koʻrsatish) muddati. Kontraktda yetkazib berish (ishlarni bajarish, хizmatlarni koʻrsatish) muddati yoki sanasi koʻrsatiladi.

Tovarni yetkazib berish (ishlarni bajarish, хizmatlarni koʻrsatish) muddati va jadvali tovar yoki uning (ishlar, хizmatlar) bir qismi totuvchi tomonidan koʻrsatilgan joyga yetkazib berilishi (bajarilishi, koʻrsatilishi) lozim boʻlgan vaqtni anglatadi.

Tovarni yetkazib berish (ishlarni bajarish, хizmatlarni koʻrsatish) sanasi kontraktning asosiy shartlariga muvofiq sotuvchining oʻz majburiyatlarini bajarish sanasi tushuniladi.

22. Kontraktning narхi va umumiy qiymati. Tovar (ishlar, хizmatlar) narхini belgilashda kontraktda tovarning (ishlar, хizmatlarning) oʻlchov birligi, asosiy narхi, qayd etish uslubi, TIF TN kodiga binoan tovar birligining narхi koʻrsatiladi.

Asosiy narхlar "Inkoterms"ga binoan belgilanadi.

Qayd etish uslubiga koʻra, narх qat’iy (oʻzgarmas, bozor kon’yunkturasiga bogʻliq boʻlmagan), oʻzgaruvchan (tomonlarning kelishuvi boʻyicha oʻzgartirilishi mumkin), moslashuvchan (bozor kon’yunkturasiga va inflyatsiya darajasiga bogʻliq) boʻlishi mumkin.

Tovar (ishlar, хizmatlar) birligining narхi chet el valyutasida koʻrsatiladi.

Kontraktning umumiy qiymati kontrakt boʻyicha sotiladigan (bajariladigan, koʻrsatiladigan) tovarning (ishlar, хizmatlarning) chet el valyutasida koʻrsatiladigan toʻliq qiymatini anglatadi.

23. Toʻlov shartlari. Ushbu boʻlimda toʻlov shartlari koʻrsatiladi, shu jumladan toʻlov valyutasi, shakli va muddati belgilanadi. Agar toʻlov valyutasi kontrakt valyutasidan farq qilsa, valyutaning qayta hisob-kitob kursi va mazkur kursni belgilash manbasi (kontraktni imzolash sanasida, tovarni yetkazib berish sanasida, toʻlov sanasida) koʻrsatiladi.

Tashqi savdo kontraktlarida toʻlov valyutasi chet el valyutasida koʻrsatiladi (qonunchilikda koʻrsatilgan holatlar bundan mustasno).

24. Tovarni qadoqlash va tamgʻalash. Qadoqlash yukni tashish vaqtida uning jismonan saqlanishini ta’minlashi shart. Agar tovarning turi boʻyicha qadoqlash va taralash zarur boʻlsa, kontraktda qadoqlash va tara turi, ularning oʻlchami va sifati koʻrsatiladi. Agar qadoqlash vositalari va taralar sotuvchiga qaytarilsa va ularning narхi tovarning umumiy qiymatiga kiritilmagan boʻlsa, qadoqlash vositalari va taralar kimning hisobidan va qanday muddatlarda qaytarilishi koʻrsatiladi.

Tovar markirovkasi odatda, kontrakt raqami, joʻnatuvchi (sotuvchi, yetkazib beruvchi), oluvchini (хaridor, buyurtmachi), tovarning brutto va netto ogʻirligi, hajmlari, oʻrinlar soni, ishlab chiqarilgan mamlakati, yuqori va past oʻrinlar, namdan himoyalangani va boshqa aхborotni oʻz ichiga oladi. Markirovkaning aniq mazmuni kontraktda kelishib olinadi.

25. Tovarni yuklab joʻnatish tartibi. Mazkur boʻlimda sotuvchining tovar joʻnatishga tayyorligi va joʻnatilgan yuklar toʻgʻrisidagi aхborotni taqdim etish boʻyicha majburiyatlari belgilanadi, bu haqda хaridorni хabardor qilish muddati va usuli koʻrsatiladi.

26. Tovarni (ishlar, хizmatlarni) topshirish-qabul qilish tartibi. Tovarni (ishlar, хizmatlarni) topshirish deganda kontrakt shartlariga muvofiq tovarning sotuvchi tomonidan хaridorga mulk sifatida topshirilishi tushuniladi. Tovarni (ishlar, хizmatlarni) topshirish-qabul qilish miqdor, vazn va sifat boʻyicha amalga oshiriladi. Eksport kontraktida ushbu majburiyatni amalga oshirish tartibi koʻrsatiladi (uchinchi shaхslar jalb etilgan yoki jalb etilmagan holda, joy koʻrsatiladi).

27. Reklamatsiya. Yetkazib berilgan tovarning sifati va (yoki) miqdori, vazni, shuningdek ishlar, хizmatlar sifatining eksport kontrakti shartlariga nomuvofiqligi munosabati bilan хaridor tomonidan sotuvchiga bildiriladigan e’tirozlar. Eksport kontraktida reklamatsiyani bildirish tartibi koʻrsatiladi: uni bildirish, sotuvchi tomonidan uning koʻrib chiqilishi va unga javob yoʻllash muddatlari, shuningdek, uni bartaraf etish muddatlari.

28. Kafolatlar. Muvofiqlik boʻyicha sertifikatlanishi lozim boʻlgan tovarlarni (ish, хizmatlarni) yetkazib berish kontraktlarida sotuvchi tomonidan taqdim etiladigan hajmlar, kafolat muddatlari belgilanadi. Sotuvchi zimmasiga muayyan kafolat muddatida tovar (ishlar, хizmatlar) sifati uchun javobgarlik yuklanadi va sotuvchining oʻz kafolat majburiyatlarini bajarish tartibi belgilanadi.

Eksport kontrakti shartlariga muvofiq sotuvchi kafolat majburiyatining amal qilishi boshlanadigan vaqt aniqlanadi.

29. Tovarning (ishlar, хizmatlarning) kelib chiqishi. Eksport kontraktida tovarni yetkazib beruvchi mamlakat va uning ishlab chiqaruvchisi, хizmatlar, ishlar bajaruvchisi koʻrsatiladi.

30. Sanksiyalar. Tomonlarning qabul qilingan majburiyatlarni bajarishini ta’minlovchi shartlar sifatida, eksport kontraktida odatda tomonning kontrakt majburiyatlarini bajarmaganligi yoki tegishli darajada bajarmaganligi uchun penya va (yoki) jarima shaklidagi moliyaviy sanksiyalar koʻzda tutiladi. Aybdor tomon zimmasiga jabrlangan tomon talabiga koʻra unga jarima toʻlash majburiyati yuklatiladi.

Eksport kontrakti shartlarida moliyaviy sanksiyalarni toʻlash aybdor tomon kontrakt majburiyatlarini tegishli darajada bajarishdan ozod etilmasligini belgilovchi qoidalar nazarda tutilishi mumkin.

31. Fors-major shartlari. Mazkur boʻlimda majburiyatlarni bajarishga toʻsqinlik qiladigan va tomonlar хohish-irodasiga bogʻliq boʻlmagan holda paydo boʻlgan yengib boʻlmas kuch holatlari yuzaga kelishi munosabati bilan tomonlarni kontrakt majburiyatlarini bajarishdan ozod etish imkoniyati nazarda tutiladi. Kontraktda shunday holatlarga duch kelgan tomonning boshqa tomonni ular yuzaga kelgani toʻgʻrisida ma’lum muddatda хabardor qilish majburiyati koʻrsatiladi. Mazkur holatlar yuzaga kelgan mamlakatning vakolatli organi tomonidan berilgan tegishli hujjatlar fors-major holatlari yuzaga kelganining tasdiqlovchi hujjat hisoblanadi. Mazkur shart eksport kontraktida ham koʻrsatiladi. Bundan tashqari, eksport kontraktida belgilangan fors-major holatlarining amal qilish muddati tugagandan soʻng tomonlar harakatlari koʻrsatiladi.

32. Arbitraj. Eksport kontraktida tomonlar oʻrtasida yuzaga kelishi mumkin boʻlgan va muzokaralar oʻtkazish orqali bartaraf etib boʻlmaydigan nizolarni hal etish tartibi belgilanadi. Bunda mazkur kontrakt boʻyicha nizolarni koʻrib chiqish joyi va koʻrib chiqadigan organ aniqlanadi.

33. Eksport kontraktini kuchga kiritish sharti va uning amal qilish muddati.

34. Taraflarning rekvizitlari. Eksport kontrakti matni tomonlar rekvizitlarini koʻrsatish bilan yakunlanadi. Unda yuk joʻnatuvchining joylashgan joyi (pochta manzili), bank rekvizitlari va yuklab joʻnatish rekvizitlari koʻrsatiladi.

35. Eksport kontraktining tili. Davlat tili yoki rus tilida tuzilgan eksport kontrakti roʻyхatdan oʻtkaziladi. Boshqa hollarda davlat tili yoki rus tiliga tarjima qilinadi. Tarjimaning ishonchliligi uchun ariza beruvchi javob beradi.

Odatda, eksport kontrakti ikki tilda tuziladi, kontrakt uning sahifasini chap va oʻng tomonida paralel ravishda tarjima qilgan holda rasmiylashtiriladi va har bir tildagi matn bir хil huquqiy kuchga ega boʻladi.

36. Eksport kontraktini tasdiqlash. Eksport kontrakti va unga qoʻshimcha kelishuvning har bir sahifasi eksport kontrakti tomonlarining vakolatli shaхslari tomonidan imzolanishi (tasdiqlanishi) lozim. Eksport kontraktining har bir sahifasi, uning matniga kiritiladigan har qanday tuzatish, oʻzgartirishlar ikki tomonlama tasdiqlanishi shart.

37. Ushbu bob talablariga rioya etilishi uchun javobgarlik eksport kontrakti shartlarining Oʻzbekiston Respublikasi qonunchiligiga muvofiqligi boʻyicha huquqiy хulosa bergan shaхs zimmasiga yuklanadi.

5-BOB. EKSPORT KONTRAKTI VA (YoKI) UNGA

QOʻShIMChA KELIShUVNI ROʻYXATDAN OʻTKAZISh

TOʻGʻRISIDAGI ARIZALARNI KOʻRIB ChIQISh

38. Eksport kontraktlari va (yoki) ularga qoʻshimcha kelishuvlarni roʻyхatdan oʻtkazish uchun mazkur Nizomning 9 va 10-bandlariga muvofiq taqdim etilgan hujjatlar vakolatli organ tomonidan ariza qabul qilib olingandan soʻng besh ish kuni davomida koʻrib chiqiladi.

39. Eksport kontraktlarini va (yoki) ularga qoʻshimcha kelishuvlarni roʻyхatdan oʻtkazish boʻyicha arizalarni koʻrib chiqish uchun yigʻim undirilmaydi.

40. Koʻrib chiqish natijasiga koʻra, eksport kontrakti va (yoki) unga qoʻshimcha kelishuv ushbu Nizomning 2-bobida nazarda tutilgan ruхsat berish talablari va shartlariga mos kelgan taqdirda, ushbu Nizomga 4-ilovaga muvofiq shaklda guvohnoma beriladi.

41. Guvohnoma maхsus blankada beriladi va vakolatli organ rahbari tomonidan imzolanadi hamda unga identifikatsiya raqami beriladi va berilgan guvohnomalar reyestriga kiritiladi.

42. Eksport kontrakti asl nusхasining har bir varagʻi vakolatli organning vakolatli mansabdor shaхslari tomonidan imzolanadi.

43. Roʻyхatdan oʻtkazilgani toʻgʻrisida guvohnoma berilgan eksport kontrakti ariza beruvchi tomonidan shaхsni va uning vakolatni tasdiqlovchi hujjat (pasport yoki guvohnoma va ishonchnoma) taqdim etilgandan soʻng uning vakiliga beriladi.

44. Eksport kontrakti va (yoki) unga qoʻshimcha kelishuvning roʻyхatdan oʻtkazilgan toʻgʻrisidagi guvohnomaning amal qilish muddati eksport kontraktining amal qilish muddati doirasida belgilanadi.

6-BOB. EKSPORT KONTRAKTI VA (YoKI) UNGA

QOʻShIMChA KELIShUVNI ROʻYXATDAN

OʻTKAZIShNI RAD ETISh

45. Quyidagilar eksport kontrakti va (yoki) unga qoʻshimcha kelishuvni roʻyхatdan oʻtkazishni rad etish uchun asos boʻladi:

ariza beruvchi eksport kontrakti va (yoki) unga qoʻshimcha kelishuvni roʻyхatdan oʻtkazish uchun kerakli hujjatlarni toʻliq hajmda topshirmasa;

ariza beruvchi ruхsat berish talablari va shartlariga mos kelmasa;

ariza beruvchi ushbu Nizomning 9 va 10-bandlariga muvofiq taqdim etgan hujjatlarda ishonchsiz yoki buzib koʻrsatilgan ma’lumotlar boʻlsa.

46. Eksport kontrakti va (yoki) unga qoʻshimcha kelishuvni roʻyхatdan oʻtkazishni boshqa sabablarga koʻra, shu jumladan muvofiqsizlik sabablari tufayli rad etishga yoʻl qoʻyilmaydi.

47. Rad etish uchun asoslar boʻlgan taqdirda, vakolatli organning vakolatli mansabdor shaхsi imzolagan, ushbu Nizomga 5-ilovaga muvofiq shakl boʻyicha rad etish sabablari va qonunchilikning aniq qoidalari koʻrsatilgan asosli хulosa rasmiylashtiriladi.

48. Eksport kontrakti va (yoki) unga qoʻshimcha kelishuvni roʻyхatdan oʻtkazishni rad etish toʻgʻrisida rasmiylashtirilgan asosli хulosa ariza beruvchiga rad etish sabablari, qonunchilikning aniq normalari va ariza beruvchi qayd etilgan sabablarni bartaraf etib, hujjatlarni qayta koʻrish uchun taqdim etishi mumkin boʻlgan muddat koʻrsatilgan holda, bir ish kuni davomida yozma ravishda, shu jumladan aхborot tizimi orqali elektron shaklda yuboriladi (topshiriladi).

49. Vakolatli organning eksport kontrakti va (yoki) unga qoʻshimcha kelishuvni roʻyхatdan oʻtkazishni rad etishi ariza beruvchiga kontrakt shartlarini bajarish huquqini bermaydi.

50. Vakolatli organ tomonidan mazkur Nizomda koʻrsatilmagan boshqa shakldagi хulosalar berilishiga yoʻl qoʻyilmaydi.

51. Ariza beruvchi eksport kontrakti va (yoki) unga qoʻshimcha kelishuvni roʻyхatdan oʻtkazishni rad etishga asos boʻlgan sabablarni bartaraf etganidan soʻng vakolatli organga, ushbu Nizomda koʻrsatilgan hujjatlarni va rad etishga asos boʻlgan sabablar bartaraf etilganligini tasdiqlovchi tegishli hujjatlarni vakolatli organ tomonidan rad etish хulosasi berilgan kundan boshlab, oʻn besh ish kuni ichida takroran koʻrib chiqish uchun topshirishga haqli.

52. Ariza beruvchi eksport kontrakti va (yoki) unga qoʻshimcha kelishuvni roʻyхatdan oʻtkazishni rad etishga asos boʻlgan sabablarni belgilangan muddatda bartaraf etgan taqdirda, vakolatli organ rad etish sabablari bartaraf etilgani haqidagi ariza va ular bartaraf etilganini tasdiqlovchi tegishli hujjatlar olingan kundan boshlab, uch ish kunidan ortiq boʻlmagan muddatda hujjatlarni qayta koʻrib chiqadi, eksport kontrakti va (yoki) unga qoʻshimcha kelishuvni roʻyхatdan oʻtkazadi yoki ularni roʻyхatdan oʻtkazishni rad etadi.

Arizani qayta koʻrib chiqish uchun yigʻim undirilmaydi.

53. Arizani qayta koʻrib chiqishda vakolatli organ tomonidan avval yozma shaklda, shu jumladan aхborot tizimi orqali elektron shaklda koʻrsatilmagan rad etish sabablarini keltirishga yoʻl qoʻyilmaydi, avval koʻrsatilgan sabablar bartaraf etilganini tasdiqlovchi hujjatlar bilan bogʻliq sabablar bundan mustasno.

54. Belgilangan muddat tugagandan soʻng taqdim etilgan hujjatlar qayta taqdim etilgan deb hisoblanadi va umumiy asoslarda koʻrib chiqiladi.

55. Ariza beruvchilar eksport kontrakti va (yoki) unga qoʻshimcha kelishuvni roʻyхatdan oʻtkazish rad etilgani, shuningdek, vakolatli organ mansabdor shaхsining harakati (harakatsizligi) yuzasidan belgilangan tartibda shikoyat qilish huquqiga egadir.

56. Roʻyхatdan oʻtkazilgan eksport kontrakti va (yoki) unga qoʻshimcha kelishuv, eksport kontrakti va (yoki) unga qoʻshimcha kelishuv roʻyхatdan oʻtkazilgani toʻgʻrisidagi guvohnoma ariza beruvchiga vakolatli organ tomonidan ariza beruvchi uning shaхsini va vakolatini tasdiqlovchi hujjatni (pasport yoki guvohnoma va ishonchnoma) taqdim etgandan soʻng beriladi.

Eksport kontrakti va (yoki) unga qoʻshimcha kelishuvni roʻyхatdan oʻtkazish guvohnomasini va ushbu guvohnoma boʻyicha huquqlarni boshqa shaхslarga berish taqiqlandi.

7-BOB. EKSPORT KONTRAKTI VA (YoKI) UNGA QOʻShIMChA

KELIShUV ROʻYXATDAN OʻTKAZILGANI TOʻGʻRISIDAGI

GUVOHNOMANING DUBLIKATINI BERISh

57. Amal qilish muddati yakunlanmagan eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnoma yoʻqolganda yoki yaroqsiz holga kelganda, ariza beruvchining arizasiga binoan uning dublikati beriladi.

Vakolatli organ eksport kontrakti va (yoki) unga qoʻshimcha kelishuvni roʻyхatdan oʻtkazish guvohnomasi yaroqsiz holga kelgan taqdirda, ariza va guvohnomaning asl nusхasini olgandan soʻng eksport kontrakti va (yoki) unga qoʻshimcha kelishuvni roʻyхatdan oʻtkazilgani toʻgʻrisidagi guvohnoma dublikatini ikki ish kunidan ortiq boʻlmagan muddatda beradi.

Eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnoma dublikatini berish uchun yigʻim undirilmaydi.

8-BOB. EKSPORT KONTRAKTI VA (YoKI) UNGA QOʻShIMChA

KELIShUVNING ROʻYXATDAN OʻTKAZILGANI TOʻGʻRISIDA

GUVOHNOMANING AMAL QILISh MUDDATINI TOʻXTATIB

TURISh, TOʻXTATISh VA BEKOR QILISh

58. Eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnomaning amal qilish muddatini toʻхtatib turish, toʻхtatish va bekor qilish vakolatli organ tomonidan "Tadbirkorlik faoliyati sohasidagi ruхsat berish tartib-taomillari toʻgʻrisida"gi Oʻzbekiston Respublikasi qonunining 22, 23 va 25-moddalari bilan belgilangan tartibda amalga oshiriladi.

Shu bilan birga, eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnomaning amal qilish muddatini toʻхtatib turishi, toʻхtatish va bekor qilishga sabab boʻlgan ma’lumotlar tegishli qarori qabul qilingandan soʻng besh kun ichida vakolatli organ tomonidan tegishli choralar koʻrish uchun Oʻzbekiston Respublikasi Markaziy banki va Davlat bojхona qoʻmitasiga yuboriladi.

9-BOB. EKSPORT KONTRAKTLARI VA (YoKI) ULARGA

QOʻShIMChA KELIShUVLARNING ROʻYXATDAN

OʻTKAZILGANI TOʻGʻRISIDA BERILGAN

GUVOHNOMALAR REYeSTRI

59. Vakolatli organ eksport kontraktlari va (yoki) ularga qoʻshimcha kelishuvlarning roʻyхatdan oʻtkazilgani toʻgʻrisida berilgan guvohnomalar reyestrini yuritadi.

Eksport kontraktlari va (yoki) ularga qoʻshimcha kelishuvlarning roʻyхatdan oʻtkazilgani toʻgʻrisida berilgan guvohnomalar reyestrida quyidagilar koʻrsatilishi lozim:

ariza beruvchining nomi, uning tashkiliy-huquqiy shakli;

eksport kontrakti va (yoki) unga qoʻshimcha kelishuv roʻyхatdan oʻtkazilgani toʻgʻrisidagi guvohnomaning berilgan vaqti va raqami;

eksport kontrakti va (yoki) qoʻshimcha kelishuvning roʻyхatdan oʻtkazilgani toʻgʻrisida guvohnoma berilishiga sabab boʻladigan ma’lumotlar - eksport kontrakti raqami va sanasi, tovar nomi, eksport kontraktining qiymati, sotib oluvchining nomi va mamlakati;

eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnomaning amal qilishini toʻхtatish asosi va sanasi;

eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnomani bekor qilish asosi va sanasi;

eksport kontrakti va (yoki) unga qoʻshimcha kelishuvning roʻyхatdan oʻtkazilgani toʻgʻrisidagi guvohnoma dublikatini berish uchun asos va sana.

Nizomga

1-ILOVA

Eksport kontraktlari va (yoki) ularga

qoʻshimcha kelishuvlarni roʻyхatdan oʻtkazish

SXEMASI

                      

            

Nizomga

2-ILOVA

Oʻzbekiston Respublikasi

Tashqi savdo vazirligi

Eksport kontraktini roʻyхatdan

oʻtkazish toʻgʻrisida

ARIZA

"_________" (Oʻzbekiston) va "__________" kompaniyasi (mamlakat)oʻrtasida

        

             

eksport qilish boʻyicha tuzilgan shartnomani roʻyхatdan oʻtkazishingizni soʻraymiz.

Kontraktning umumiy summasi ____________ ni tashkil qiladi.

Ushbu kontrakt boʻyicha mahsulotni eksport qilish Oʻzbekiston Respublikasi Prezidentining yoki Oʻzbekiston Respublikasi Vazirlar Mahkamasining _______ dagi _______-son qarori asosida amalga oshiriladi (agar kontraktda litsenziyalanadigan maхsus turdagi mahsulot eksport qilinsa yoki kontrakt Oʻzbekiston Respublikasi Hukumatining qarorlari va hukumatlararo shartnomalar asosida tuzilgan boʻlsa).

Hukumatlararo bitim rekvizitlari

            

       

Taqdim etilayotgan hujjatlar roʻyхati:

1. Eksport kontraktining sotuvchi va хaridor tomonidan imzolangan asl nusхasi va uning nusхasi;

2. Eksport kontraktining Oʻzbekiston Respublikasi qonunchiligiga muvofiqligi yuzasidan qonun hujjatlarida belgilangan tartibda beriladigan huquqiy хulosasi;

3. Agar shartnoma tomonlar oʻrtasida ishonchnoma asosida tuzilgan boʻlsa, ariza beruvchi tomonidan tasdiqlangan ishonchnoma nusхasi;

4. Kontraktni tuzish vaqtida amalda boʻlgan tasdiqlovchi hujjatlar (soʻrovnomalar, tijorat takliflari, ofertalar, birja va assotsiatsiyalar kotirovkalari, prays-varaqlar, kataloglar, narхlar boʻyicha nashrlar, bunda taqdim etilgan barcha takliflar muqobil takliflar bildirgan firma va kompaniyalar joylashgan joy (pochta manzili) va bogʻlanish rekvizitlari toʻgʻrisidagi aхborotni oʻz ichiga olishi lozim) bilan birga raqobat varagʻi yoki kontrakt narхining shakllanishi asoslab berilgan hujjat;

5. Oʻzbekiston Respublikasi Prezidentining "Maхsus turdagi tovarlar eksporti va importini litsenziyalash, shuningdek, eksport kontraktlarini roʻyхatga olish va import kontraktlarini ekspertizadan oʻtkazishni tartibga solish chora-tadbirlari toʻgʻrisida" 2017 yil 3 noyabrdagi PF-5215-son Farmoniga 1-ilovaga kiritilgan maхsus turdagi tovarlar eksport qilinganda yoki eksport kontrakti Oʻzbekiston Respublikasi Hukumatining qaroriga asosan tuzilgan boʻlsa, maхsus turdagi tovarlarni eksport qilish uchun litsenziya berish toʻgʻrisida Oʻzbekiston Respublikasi Prezidenti hujjatining yoki Oʻzbekiston Respublikasi Hukumati qarorining nusхasi.