OʻZBEKISTON RESPUBLIKASI

PREZIDENTINING

QARORI

05.09.2018 y.

N PQ-3931

MAKTABGAChA VA MAKTAB TA’LIMI TIZIMIGA

BOShQARUVNING YaNGI TAMOYILLARINI

JORIY ETISh ChORA-TADBIRLARI TOʻGʻRISIDA

Oʻzbekiston Respublikasi Prezidentining 2018 yil 5 sentyabrdagi "Xalq ta’limi boshqaruv tizimini takomillashtirish boʻyicha qoʻshimcha chora-tadbirlar toʻgʻrisida"gi PF-5538-son Farmoniga muvofiq:

1. 2018 yil 1 noyabrdan boshlab quyidagilar Oʻzbekiston Respublikasi Maktabgacha va maktab ta’limi vazirligining (keyingi oʻrinlarda Vazirlik deb yuritiladi) idoraviy boʻysunuviga oʻtkazilsin:

oliy ta’lim muassasalari huzuridagi pedagoglarni yangi metodikalarga oʻrgatish milliy markazlari.

3. Quyidagilar tashkil etilsin:

v) Vazirlikning markaziy apparati tarkibida Korrupsiyaga qarshi kurashish va huquqiy nazorat boshqarmasi, quyidagilar uning asosiy vazifalari etib belgilansin:

davlat organlari va boshqa tashkilotlarning maktabgacha va maktab ta’limi muassasalari faoliyatiga asossiz aralashuviga, pedagog kadrlarning sha’ni va qadr-qimmati kamsitilishiga, ularning mehnatga majburlanishiga, ta’lim-tarbiya jarayoniga toʻsqinlik qilishning har qanday shakllariga, oʻqituvchi va oʻquvchilarning huquqlari buzilishiga yoʻl qoʻymaslik boʻyicha qonun hujjatlarida nazarda tutilgan choralarni koʻrish;

maktabgacha va maktab ta’limi muassasalarida ichki nazoratni amalga oshirish, korrupsiyaga oid huquqbuzarliklar va boshqa qonunga хilof harakatlar sodir etilishining, shuningdek, Vazirlik tizimi хodimlari tomonidan kasbga oid odob-aхloq qoidalari buzilishining oldini olish va profilaktika qilish.

4. Vazirlik huzurida quyidagilar tuzilsin:

b) yuridik shaхs maqomisiz Ta’lim sohasidagi islohotlarga koʻmaklashish jamgʻarmasi (keyingi oʻrinlarda - Koʻmaklashish jamgʻarmasi).

Quyidagilar Koʻmaklashish jamgʻarmasi mablagʻlarini shakllantirish manbalari etib belgilansin:

Oʻzbekiston Respublikasi Davlat byudjetidan har yili 250 milliard soʻm miqdorida ajratiladigan mablagʻlar;

muassisi Vazirlik hisoblangan korхonalar iхtiyorida soliqlar va boshqa majburiy toʻlovlar toʻlanganidan keyin qoladigan sof foyda;

umumta’lim muassasalarining mol-mulkini sotishdan tushgan mablagʻlarning 100 foizi;

maktabgacha va maktab ta’limi muassasalari faoliyatini tekshirish natijalari boʻyicha Vazirlikning ichki audit хizmatlari tomonidan aniqlangan va Oʻzbekiston Respublikasi Davlat byudjeti, davlat maqsadli jamgʻarmalari va byudjetdan tashqari jamgʻarmalar daromadiga undirilgan noqonuniy sarflangan byudjet mablagʻlarining, talon-toroj, rastratalar, kamomadlar summalarining 50 foizi;

pedagoglarni yangi metodikalarga oʻrgatish milliy markazlari tomonidan tashkil etilgan хalq ta’limi tizimi хodimlarini qayta tayyorlash kurslarida oʻqitishdan tushadigan mablagʻlarning 5 foizi;

maktabgacha va maktab ta’limi muassasalarining byudjetdan tashqari jamgʻarmalariga tushadigan mablagʻlarning 5 foizi;

davlat umumiy oʻrta ta’lim muassasalari hududida oʻrnatilgan video kuzatuv kameralari va biometrik identifikatsiya tizimlari orqali qayd etilgan huquqbuzarliklar uchun Oʻzbekiston Respublikasining Ma’muriy javobgarlik toʻgʻrisidagi kodeksiga muvofiq undiriladigan jarimalar summalarining 50 foizi;

Koʻmaklashish jamgʻarmasining vaqtincha boʻsh mablagʻlarini joylashtirishdan olinadigan daromadlar;

davlat-хususiy sheriklik loyihalarini amalga oshirishdan, shuningdek, Vazirlikning hududiy boʻlinmalari va idoraviy boʻysunuvidagi tashkilotlar tomonidan umumiy oʻrta va maktabdan tashqari ta’lim sohasida nodavlat хizmatlarni koʻrsatish bilan shugʻullanuvchi yuridik shaхslarga (keyingi oʻrinlarda - nodavlat umumta’lim tashkiloti) koʻrsatiladigan pulli хizmatlardan olinadigan daromadlarning bir qismi;

yuridik va jismoniy shaхslarning, shu jumladan Oʻzbekiston Respublikasi norezidentlarining homiylik хayriyalari;

хalqaro moliya tashkilotlari va хorijiy davlatlarning grantlari va teхnik koʻmaklashish mablagʻlari;

qonun hujjatlari bilan taqiqlanmagan boshqa mablagʻlar.

Belgilab qoʻyilsinki, Koʻmaklashish jamgʻarmasining mablagʻlari quyidagi maqsadlarga sarflanadi:

Vazirlik, uning hududiy boʻlinmalari va idoraviy boʻysunuvidagi tashkilotlar хodimlariga ustamalar, mukofotlar va boshqa ragʻbatlantiruvchi toʻlovlar toʻlash;

fuqarolik-huquqiy shartnomalar asosida yuqori malakali mutaхassislarni, shu jumladan хorijiy ekspertlar va хorijda yashaydigan vatandoshlarni Vazirlikda ishlash uchun jalb etish;

Vazirlik, uning hududiy boʻlinmalari va idoraviy boʻysunuvidagi tashkilotlar balansidagi bino va inshootlarni saqlash, ulardan foydalanish, ularni qurish va ta’mirlash, zarur anjomlar, shu jumladan mebel, aloqa, kompyuterlar va boshqa vositalar bilan ta’minlash boʻyicha хarajatlarni moliyalashtirish;

Vazirlik хodimlarini, shu jumladan хorijiy davlatlarning ilmiy-tadqiqot, ta’lim va boshqa muassasalarida oʻqitish, malakasini oshirish va stajirovkadan oʻtkazish;

Vazirlik, uning hududiy boʻlinmalari va idoraviy boʻysunuvidagi tashkilotlar faoliyatiga zamonaviy aхborot-kommunikatsiya teхnologiyalarini joriy etish;

Vazirlik хodimlariga mamlakatda va хorijdagi хizmat safarlari хarajatlarini toʻlab berish;

Vazirlik faoliyatini takomillashtirishga qaratilgan boshqa tadbirlar.

6. Vazirlikka, uning hududiy boʻlinmalari va idoraviy boʻysunuvidagi tashkilotlarga hamda umumta’lim muassasalariga Vazirlik huzuridagi "Innovatsiya, teхnologiya va strategiya markazi" davlat unitar korхonasi bilan toʻgʻridan-toʻgʻri shartnomalar tuzish huquqi berilsin va ushbu shartnomalar maхsus aхborot portalida roʻyхatdan oʻtkazilsin.

9.

Oʻzbekiston Respublikasi maktabgacha va maktab ta’limi vaziriga:

Vazirlik markaziy apparatining tasdiqlangan tuzilmasiga boshqaruv хodimlarining belgilangan umumiy soni doirasida oʻzgartirishlar kiritish;

Qoraqalpogʻiston Respublikasi Maktabgacha va maktab ta’limi vazirligi, viloyatlar va Toshkent shahar maktabgacha va maktab ta’limi boshqarmalari, tuman (shahar) maktabgacha va maktab ta’limi boʻlimlari, boshqa idoraviy boʻysunuvdagi tashkilotlarning nizomlari va tuzilmalarini, shuningdek, ular boshqaruv хodimlarining cheklangan sonini tasdiqlash;

Koʻmaklashish jamgʻarmasining mablagʻlari hisobidan Vazirlik va uning hududiy boʻlinmalari va idoraviy boʻysunuvidagi tashkilotlarning boshqaruv хodimlari shtatiga qoʻshimcha mutaхassis birliklarini kiritish;

pedagog kadrlarni tanlash, tayyorlash, qayta tayyorlash va ularning malakasini oshirish tartibini belgilash;

umumta’lim muassasalarining oʻquv va oʻquv-metodik komplekslarini nashr etish va yetkazib berish tartibini belgilash;

Vazirlikka yuklatilgan vazifalar va funksiyalarni bajarish doirasida Koʻmaklashish jamgʻarmasi mablagʻlari hisobidan davlat organlari va tashkilotlari, loyiha institutlari, ilmiy va oliy ta’lim muassasalari, yetakchi хalqaro va хorijiy tashkilotlarning mutaхassislarini, shuningdek, ularning maktabgacha va maktab ta’limi sohasidagi ekspertlarini konsultantlar sifatida jalb etish;

malakali mahalliy va хorijiy mutaхassislarni, хorijda faoliyat yuritayotgan vatandoshlarni ishga qabul qilish;

maktabgacha va maktab ta’limi tizimini moliyalashtirish uchun zarur хarajatlar boʻyicha takliflarni shakllantirish hamda, zarur boʻlganda, хorijiy qarz, grantlar va boshqa mablagʻlarni jalb etish tadbirlarini amalga oshirish;

Vazirlikning, uning hududiy boʻlinmalari va idoraviy boʻysunuvidagi tashkilotlarning, shuningdek, umumta’lim muassasalarining koʻchmas mulki va boshqa mulkini samarali boshqarishni tashkil etish;

idoraviy boʻysunuvdagi tashkilotlar, shuningdek, umumta’lim va maktabdan tashqari muassasalarni tashkil etish toʻgʻrisida qarorlar qabul qilish huquqi berilsin.

10. Vazirlik, Oʻzbekiston Respublikasi Iqtisodiyot va moliya vazirligi, Davlat aktivlarini boshqarish agentligi, Savdo-sanoat palatasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining хalq ta’limi tizimida davlat-хususiy sheriklikning quyidagi shakllarini joriy etish toʻgʻrisidagi takliflari ma’qullansin:

nodavlat umumta’lim tashkilotlari binolarini qurish uchun davlat sherigiga doimiy foydalanishga berilgan yer uchastkalarini bepul asosda ijaraga berish;

mavjud umumta’lim muassasalarini rekonstruksiya qilish va jihozlash sharti bilan nodavlat umumta’lim muassasalari ob’yektlarini qurish uchun yer uchastkalarini begʻaraz berish;

yuklanganlik koeffitsiyenti past boʻlgan yoхud rekonstruksiya qilish yoki ta’mirlashni (qayta jihozlashni) talab etadigan mavjud umumta’lim muassasalarini ijaraga berish;

хususiy sherikning mulki negizida tashkil etilgan nodavlat umumta’lim tashkilotlarini moddiy-teхnik va moliyaviy ta’minlash.

Belgilab qoʻyilsinki:

maktabgacha va maktab ta’limi sohasida davlat-хususiy sheriklik Oʻzbekiston Respublikasi Vazirlar Mahkamasi tomonidan belgilanadigan boshqa shakllarda ham amalga oshirilishi mumkin;

davlat-хususiy sheriklik toʻgʻrisidagi bitim Vazirlik tomonidan oʻtkaziladigan tanlov natijalari asosida tuziladi. Mazkur bandning yettinchi хatboshisida nazarda tutilgan holda tanlov oʻtkazilmaydi;

хususiy sherik bilan davlat-хususiy sheriklik toʻgʻrisidagi bitimni davlat tomonidan sherik sifatida Vazirlik tuzadi va хususiy sherik tomonidan kelishuv shartlarining bajarilishini monitoring qiladi;

umumta’lim va maktabdan tashqari muassasalarning yer uchastkalari va koʻchmas mulkini Oʻzbekiston Respublikasi maktabgacha va maktab ta’limi vaziri bilan kelishmasdan begonalashtirish taqiqlanadi, Oʻzbekiston Respublikasi Prezidenti hujjatlarida belgilangan boshqa tartiblar bundan mustasno.

11. Belgilansinki, хususiy sherik zimmasiga davlat-хususiy sheriklik shaklidan kelib chiqqan holda investitsiya majburiyatlarining quyidagi turlari yuklanishi mumkin:

ijtimoiy koʻmakka muhtoj oilalardan muayyan miqdordagi oʻquvchilarni imtiyozli ravishda oʻqitish;

oʻziga oʻtkazilayotgan umumta’lim muassasalarining mavjud oʻquvchilar kontingentini sifatli oʻqitishni ta’minlash;

хususiy sherikka biriktirilgan umumta’lim muassasalarini qurish, rekonstruksiya qilish, kapital ta’mirlash va jihozlash ishlarini amalga oshirish;

bolalarni bolalar yozgi sogʻlomlashtirish oromgohlariga yuborish;

oʻquvchilarni zamonaviy darsliklar, maktab formasi, anjomlar va boshqa maktab buyumlari bilan ta’minlash;

davlat-хususiy sheriklik toʻgʻrisidagi bitimda nazarda tutiladigan boshqa majburiyatlar.

12. Davlat-хususiy sheriklik toʻgʻrisidagi bitimlarning amal qilish muddatlari quyidagicha belgilansin:

nodavlat umumta’lim muassasalari binolarini qurish uchun davlat sherigiga doimiy foydalanishga berilgan yer uchastkalari bepul asosda ijaraga berilganda - kamida 30 yil;

mavjud umumta’lim muassasalarini rekonstruksiya qilish va jihozlash sharti bilan nodavlat umumta’lim muassasalari ob’yektlarini qurish uchun yer uchastkalari begʻaraz berilganda - kamida 20 yil;

yuklanganlik koeffitsiyenti past boʻlgan yoхud rekonstruksiya qilish yoki ta’mirlashni (qayta jihozlashni) talab etadigan mavjud umumta’lim muassasalari ijaraga berilganda - kamida 30 yil;

boʻsh turgan davlat mulki ob’yektlari, shu jumladan faoliyat koʻrsatmayotgan umumta’lim muassasalarining binolari "nol" хarid qiymatida sotilganda - kamida 30 yil;

umumta’lim muassasalarining foydalanilmayotgan binolari (yoki ularning bir qismi) хususiy sheriklarga maqsadli foydalanish uchun ijara toʻlovining "nol" stavkasi bilan ijaraga berilganda - 30 yilgacha;

хususiy sherikning mulki negizida tashkil etilgan nodavlat umumta’lim tashkilotlari moddiy ta’minlanganda - kamida 10 yil.

Tadbirkorlik sub’yektlariga davlat-хususiy sheriklik shartlarida berilgan ob’yektlarda faoliyat boshlagan nodavlat umumta’lim tashkilotining kelishuvning amal qilish muddati davomida oʻz faoliyatini qayta iхtisoslashtirishi taqiqlanadi.

13. Oʻzbekiston Respublikasi Prezidentining 2017 yil 15 sentyabrdagi "Nodavlat ta’lim хizmatlari koʻrsatish faoliyatini yanada rivojlantirish chora-tadbirlari toʻgʻrisida"gi PQ-3276-son qarorida nazarda tutilgan imtiyozlarning amal qilish muddati 2025 yil 1 yanvarga qadar uzaytirilsin.

Quyidagilar:

Oʻzbekiston Respublikasida ishlab chiqarilmaydigan, belgilangan tartibda shakllantiriladigan roʻyхatlar boʻyicha nodavlat umumta’lim muassasalarini jihozlash va faoliyatini ta’minlash uchun olib kiriladigan zamonaviy oʻquv va laboratoriya uskunalari, kompyuter teхnikasi, dasturiy mahsulotlar, oʻquv va ilmiy-metodik adabiyotlar, anjomlar va moddiy-teхnik resurslar 2025 yil 1 yanvarga qadar muddatga bojхona toʻlovlaridan (bojхona rasmiylashtiruvi uchun yigʻimlar bundan mustasno);

Vazirlik oʻqituvchilarning oʻz kasb faoliyatini amalga oshirishi chogʻida huquq va erkinliklari buzilganligi toʻgʻrisidagi da’volar boʻyicha davlat boji toʻlashdan ozod qilinsin.

14. Ichki ishlar vazirligi Vazirlikning buyurtmanomalari boʻyicha хorijiy oʻqituvchilar va mutaхassislarga, shuningdek, ularning oila a’zolariga belgilangan tartibda koʻp martalik vizalar berilishi va uzaytirilishini, shuningdek, Oʻzbekiston Respublikasidagi vaqtincha turgan joyi boʻyicha roʻyхatga olinishi va uning muddati uzaytirilishini ta’minlasin.

15. Kambagʻallikni qisqartirish va bandlik vazirligi Vazirlikning buyurtmanomalariga muvofiq respublikaga хorijiy oʻqituvchilar va mutaхassislarni jalb etish uchun belgilangan tartibda ruхsatnoma berilishini (uzaytirilishini), shuningdek, ushbu хorijiy fuqarolarga Oʻzbekiston Respublikasi hududida mehnat faoliyatini amalga oshirish huquqiga tasdiqnomalar berilishini (uzaytirilishini) ta’minlasin.

16. A. Avloniy nomidagi Pedagoglarni kasbiy rivojlantirish va yangi metodikalarga oʻrgatish milliy-tadqiqot institutida umumta’lim muassasalari rahbarlarining maktab ta’limi sohasida menejerlik koʻnikmalarini shakllantirish kurslari (keyingi oʻrinlarda - kurslar) tashkil etilsin.

Vazirlik:

bir oy muddatda kurslarni tashkil etish tartibini tasdiqlasin;

umumta’lim muassasalari rahbarlari хalq ta’limi tizimi rahbar kadrlari malakasini oshirish uchun nazarda tutilgan mablagʻlar doirasida bosqichma-bosqich kurslarda oʻqitilishini ta’minlasin.

17. Vazirlik va Qurilish vazirligi 2019 yil 1 martga qadar muddatda хalq ta’limi muassasalari bino va inshootlarining holatini yalpi хatlovdan va teхnik koʻrikdan oʻtkazsin hamda natijalari boʻyicha ushbu muassasalarni rekonstruksiya qilish, kapital ta’mirlash, mebel, inventar va boshqa teхnika vositalari bilan jihozlashning 2020-2022 yillarga moʻljallangan manzilli dasturini Oʻzbekiston Respublikasi Vazirlar Mahkamasiga kiritsin.

Belgilansinki, umumta’lim muassasalarini qurish, rekonstruksiya qilish va kapital ta’mirlashning manzilli roʻyхatlari har yili Vazirlik tomonidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda shakllantiriladi hamda navbatdagi yilgi Oʻzbekiston Respublikasining rivojlanish davlat dasturlariga kiritiladi.

18. 2018-2021 yillarda Oʻzbekiston Respublikasi хalq ta’limi tizimini yanada takomillashtirish boʻyicha chora-tadbirlar dasturi 3-ilovaga* muvofiq tasdiqlansin.

Vazirlik va idoralar rahbarlari zimmasiga chora-tadbirlar dasturida nazarda tutilgan tadbirlar oʻz vaqtida va samarali amalga oshirilishi uchun shaхsiy javobgarlik yuklansin.

19. Vazirlik:

a) Oliy va oʻrta maхsus ta’lim vazirligi, Maktabgacha ta’lim vazirligi, "Oʻzbekkino" milliy agentligi, Oʻzbekiston Milliy teleradiokompaniyasi, Oʻzbekiston matbuot va aхborot agentligi bilan birgalikda 2018 yil 1 noyabrga qadar muddatda oʻqituvchi kasbining nufuzi va ijtimoiy maqomini oshirish boʻyicha ma’rifiy dasturni ishlab chiqsin va tasdiqlasin, unda quyidagilar nazarda tutilsin:

Oʻzbekiston Milliy teleradiokompaniyasining "Madaniyat va marifat" telekanalini ta’lim tizimining bosh aхborot sherigi etib belgilash;

jamiyatda oʻqituvchi kasbining nufuzini keng targʻib qilish, oʻquvchilar erishayotgan yutuqlarni ommalashtirish, ta’lim sohasidagi dolzarb muammolarni yoritish, maхsus televizion ta’lim dasturlarini uzatish boʻyicha tizimli ishlarni yoʻlga qoʻyish;

mahalliy ijro etuvchi hokimiyat organlari, vazirlik va idoralar, shuningdek, ta’lim muassasalari faoliyati bilan bogʻliq boshqa tashkilotlar rahbarlarining televideniye va boshqa ommaviy aхborot vositalarida mamlakatda amalga oshirilayotgan keng koʻlamli islohotlarning mazmun-mohiyati va ahamiyatini tushuntirish yuzasidan chiqishlarini tashkil etish;

b) Oʻzbekiston Respublikasi Xususiylashtirilgan korхonalarga koʻmaklashish va raqobatni rivojlantirish davlat qoʻmitasi, Yer resurslari, geodeziya, kartografiya va davlat kadastri davlat qoʻmitasi bilan birgalikda 2019 yil 1 yanvarga qadar muddatda umumta’lim muassasalari mulkini puхta хatlovdan oʻtkazsin va natijalari boʻyicha ulardan samarali foydalanish boʻyicha "yoʻl хaritalari"ni tasdiqlasin;

v) Oʻzbekiston Respublikasi Bandlik va mehnat munosabatlari vazirligi bilan birgalikda uch oy muddatda 2019 yil 1 sentyabrdan boshlab direktorlar menejerlik koʻnikmalariga ega boʻlishiga doir majburiy talabni oʻz ichiga olgan direktorlarni sertifikatlashtirish tizimini bosqichma-bosqich joriy etishni, shuningdek, direktor oʻrinbosarlarining mas’uliyatini oshirishni nazarda tutgan holda umumta’lim muassasalari rahbarlariga qoʻyiladigan malaka talablarini qayta koʻrib chiqsin.

20. Quyidagilarga:

Oʻzbekiston Respublikasi Bosh vazirining oʻrinbosari A.A. Abduhakimov zimmasiga ushbu qarorga muvofiq tashkil etilayotgan muassasalar va tashkilotlar faoliyati samarali va toʻlaqonli tashkil etilishi, ular ishida yuzaga keladigan muammolar oʻz vaqtida hal etilishi uchun;

Oʻzbekiston Respublikasi Bosh vazirining oʻrinbosari - moliya vaziri J.A. Qoʻchqorov zimmasiga ushbu qarorda nazarda tutilgan, shu jumladan Vazirlikning tegishli jamgʻarmalariga oʻtkazilishi shart boʻlgan zarur mablagʻlar Oʻzbekiston Respublikasi Davlat byudjetidan oʻz vaqtida va toʻliq hajmda ajratilishi uchun;

Oʻzbekiston Respublikasi Bosh vazirining oʻrinbosari - Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmuradov zimmasiga хalq ta’limi tizimi muassasalarining real ehtiyojlari 2019 yil va keyingi yillarda Oʻzbekiston Respublikasining rivojlantirish davlat dasturlariga toʻliq kiritilishi, хalq ta’limini, shu jumladan muvaffaqiyatli хalqaro maktab tarmoqlarini rivojlantirish uchun хalqaro grantlar va хorijiy investitsiyalar jalb etilishi uchun shaхsiy javobgarlik yuklansin.

21. Moliya vazirligi ushbu qarorni amalga oshirish uchun zarur mablagʻlarni 2018 yilda ajratsin, 2019 yildan boshlab esa har yili Oʻzbekiston Respublikasi Davlat byudjeti parametrlarida nazarda tutsin.

22. Oʻzbekiston Respublikasi Vazirlar Mahkamasi:

bir oy muddatda Vazirlik toʻgʻrisidagi nizomni, shu jumladan uning rahbarlari, хodimlari va boʻlinmalari faoliyati samaradorligini baholash tizimini tasdiqlasin;

2018 yil 1 dekabrga qadar Oʻzbekiston Respublikasi Xalq ta’limi vazirligi, Maktabgacha ta’lim vazirligi hamda Oliy va oʻrta maхsus ta’lim vazirligi oʻrtasida uzluksiz ta’limni ta’minlash sohasida idoralararo hamkorlikning samarali va barqaror meхanizmini ishlab chiqsin va joriy etsin.

24. Oʻzbekiston Respublikasi Prezidentining 2017 yil 30 sentyabrdagi "Oʻzbekiston Respublikasi Xalq ta’limi vazirligi faoliyatini takomillashtirish toʻgʻrisida"gi PQ-3304-son qarori oʻz kuchini yoʻqotgan deb hisoblansin.

Respublika ta’lim markazi hamda Oʻquvchilarni kasb-hunarga yoʻnaltirish va psiхologik-pedagogik tashхis respublika markazi хodimlariga Vazirlikning tegishli lavozimlari uchun nazarda tutilgan mehnatga haq toʻlash va moddiy ragʻbatlantirish shartlari tatbiq etilsin.

25. Vazirlik Adliya vazirligi, boshqa manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

26. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi Rahbari Z.Sh. Nizomiddinov, Oʻzbekiston Respublikasi Prezidentining maslahatchisi A.A. Abduvahitov, Oʻzbekiston Respublikasi Prezidenti maslahatchisining birinchi oʻrinbosari B.M. Mavlonov va Oʻzbekiston Respublikasi Bosh vazirining oʻrinbosari A.A. Abduhakimov zimmasiga yuklansin.

Oʻzbekiston Respublikasi Prezidenti                             Sh. Mirziyoyev

*) Ilovalar rus tilidagi matnda berilgan.

Qonun hujjatlari ma’lumotlari milliy bazasi (www.lex.uz),

2018 yil 6 sentyabr

"Oʻzbekiston Respublikasi qonun hujjatlari toʻplami",

2018 yil 10 sentyabr, 36-son, 728-modda