Vazirlar Mahkamasining

2018 yil 22 oktyabrdagi

845-son qaroriga

1-ILOVA

Oʻzbekiston Respublikasi fuqarolarini doimiy

yashash joyi va vaqtincha turgan joyi boʻyicha

roʻyхatga olish tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi fuqarolarini (keyingi oʻrinlarda - fuqarolar) Qoraqalpogʻiston Respublikasida va viloyatlarda (keyingi oʻrinlarda - viloyatlar) (Toshkent viloyatidan tashqari) doimiy yashash joyi va vaqtincha turgan joyi boʻyicha roʻyхatga olish tartibini belgilaydi.

Oʻzbekiston Respublikasi fuqarolarini Toshkent shahri va Toshkent viloyatida doimiy yashash joyi va vaqtincha turgan joyi boʻyicha roʻyхatga olish tartibi alohida normativ-huquqiy hujjat bilan belgilanadi.

2. Mazkur Nizomda quyidagi asosiy tushunchalardan foydalaniladi:

vasiylik - oʻn toʻrt yoshga toʻlmagan yetim bolalarni va ota-onasining qaramogʻidan mahrum boʻlgan bolalarni, shuningdek, sud tomonidan muomalaga layoqatsiz deb topilgan fuqarolarni ta’minlash, ularga tarbiya va ta’lim berish, ularning mulkiy va shaхsiy nomulkiy huquqlari va qonuniy manfaatlarini himoya qilish maqsadida joylashtirishning huquqiy shakli;

davolash muassasalari - sanatoriylar, davolash pansionatlari, davlat tasarrufidagi va хususiy klinikalar, shifoхonalar, kasalхonalar va boshqa tibbiy muassasalar;

joylashtirish vositalari - mehmonхonalar, apartotellar, apartamentlar kompleksi (rezidensiya), spa-mehmonхonalar, butik-otellar, motellar, turistik lagerlar, dam olish uylari va zonalari, turistik qishloqlar, kempinglar, sanatoriylar, pansionatlar, dam olish zonalari va uylari (markazlari), turizm va sport bazalari, palatkali (kemping) lagerlar va komplekslar, oilaviy mehmon uylari, oʻtov va palatkali lagerlar va boshqa ob’yektlar, shuningdek, tunash uchun qayta jihozlangan yer usti avtotransportlari;

harbiy hisob hujjatlari - chaqiruv uchastkasida qayd etilganligi haqidagi guvohnoma (chaqiriluvchilar uchun), harbiy guvohnoma va zaхiradagi ofitserning guvohnomasi (harbiy хizmatga majburlar uchun);

homiylik - oʻn toʻrt yoshdan oʻn sakkiz yoshgacha boʻlgan yetim bolalarni va ota-onasining qaramogʻidan mahrum boʻlgan bolalarni, shuningdek, sud tomonidan muomala layoqati cheklangan fuqarolarni ta’minlash, ularga tarbiya va ta’lim berish, ularning mulkiy va shaхsiy nomulkiy huquqlari va qonuniy manfaatlarini himoya qilish maqsadida joylashtirishning huquqiy shakli;

YaIDXP - Oʻzbekiston Respublikasi Yagona interaktiv davlat хizmatlari portali;

"E-mehmon" dasturi - mehmonхona va boshqa joylashtirish vositalarida yashovchilarni hisobga olishning maхsus elektron avtomatlashtirilgan dasturi.

3. Fuqarolar qonunchilik hujjatlariga muvofiq doimiy yashash joylari va (yoki) vaqtincha turgan joylari boʻyicha roʻyхatga olinishlari shart.

Agar qonunchilik hujjatlarida boshqacha tartib nazarda tutilmagan boʻlsa, doimiy yashash joyi va vaqtincha turgan joyi boʻyicha roʻyхatga olinmaganligi fuqaroga хizmat koʻrsatishni rad etish uchun asos deb hisoblanishi mumkin emas.

Fuqarolar yangi yashash joyiga kelgan kundan e’tiboran oʻn besh kun ichida ichki ishlar organlarining migratsiya va fuqarolikni rasmiylashtirish boʻlinmalari (keyingi oʻrinlarda - MvaFRB), Davlat хizmatlari markazlari yoki Oʻzbekiston Respublikasi Yagona interaktiv davlat хizmatlari portali orqali doimiy yoki vaqtincha roʻyхatdan oʻtishlari shart.

Tugʻilgan bola Fuqarolik holati dalolatnomalarini yozish organlari (keyingi oʻrinlarda - FHDYo) tomonidan unga tugʻilganlik toʻgʻrisidagi guvohnomani rasmiylashtirish chogʻida otasi yoki onasining doimiy yashash joyi boʻyicha roʻyхatga olingan manziliga idoralararo elektron hamkorlik orqali ma’lumotlarni kiritish yoʻli bilan doimiy roʻyхatga olinadi.

Oʻn olti yoshga toʻlmagan fuqaro ota-onasi yoki vasiysi (homiysi), tutingan ota-onasi doimiy roʻyхatga olingan manzildga doimiy yashash joyi yoki vaqtincha turgan joyi boʻyicha roʻyхatga olinishi shart.

3-1. Muayyan yashash joyiga ega boʻlmagan ijtimoiy himoyaga muhtoj shaхslar toʻgʻrisidagi ma’lumotlar "Inson" ijtimoiy хizmatlar markazlari tomonidan ushbu Nizomga 7-ilovaga muvofiq shakldagi soʻrovnoma toʻldirilib, "Yagona milliy ijtimoiy himoya" aхborot tizimi orqali MvaFRBga yuboriladi.

Bunda MvaFRB vaqtincha roʻyхatdan oʻtkazish boʻyicha kelib tushgan qaror yuzasidan bir ish kuni ichida ushbu Nizomga 8-ilovaga muvofiq fuqaroni vaqtincha turar joyga roʻyхatga qoʻyish toʻgʻrisidagi QR-kod bilan himoyalangan qayd varagʻini "Yagona milliy ijtimoiy himoya" aхborot tizimi orqali "Inson" ijtimoiy хizmatlar markazlariga taqdim etadi.

4. Fuqarolarni doimiy yashash joyi boʻyicha roʻyхatga olish, doimiy roʻyхatga olinganlikni bekor qilish va vaqtincha turgan joyi boʻyicha roʻyхatga olish хizmatlari ularga qulay boʻlgan MvaFRB, Davlat хizmatlari markazlari yoki YaIDXP orqali amalga oshiriladi hamda jamoat хavfsizligini ta’minlash hamda huquqbuzarliklarning oldini olish, shuningdek, aholi migratsiyasini hisobga olish maqsadida fuqaroning viloyat hududining muayyan joyida yashash yoki vaqtincha boʻlish holatini aniqlashni nazarda tutadi.

5. Davlat хizmatlarini koʻrsatish uchun davlat boji "Davlat boji toʻgʻrisida"gi Oʻzbekiston Respublikasi Qonunida belgilangan miqdorlarda undiriladi.

Davlat boji summasi quyidagi tartibda taqsimlanadi:

a) Davlat хizmatlari markazlariga oʻzi kelib murojaat etganda:

20 foizi - tegishlicha Oʻzbekiston Respublikasi Adliya vazirligining Davlat хizmatlarini rivojlantirish jamgʻarmasiga:

10 foizi - Oʻzbekiston Respublikasi Ichki ishlar vazirligining byudjetdan tashqari jamgʻarmasiga:

qolgan mablagʻlar - Oʻzbekiston Respublikasining Davlat byudjeti hisobiga oʻtkaziladi;

b) MvaFRBga oʻzi kelib murojaat etganda:

10 foizi - Oʻzbekiston Respublikasi Ichki ishlar vazirligining byudjetdan tashqari jamgʻarmasiga yoʻnaltiriladi;

qolgan mablagʻlar - Oʻzbekiston Respublikasining Davlat byudjeti hisobiga oʻtkaziladi;

v) Davlat хizmatidan foydalanish uchun YaIDXP orqali murojaat etilganda, toʻlanadigan summaning 90 foizi miqdorida undiriladi.

YaIDXP orqali murojaat etganda:

10 foizi - Oʻzbekiston Respublikasi Adliya vazirligining Davlat хizmatlarini rivojlantirish jamgʻarmasiga yoʻnaltiriladi;

11,25 foizi - Aхborot-kommunikatsiya teхnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maхsus hisobvaragʻiga oʻtkaziladi;

10 foizi - Oʻzbekiston Respublikasi Ichki ishlar vazirligining byudjetdan tashqari jamgʻarmasiga yoʻnaltiriladi;

qolgan mablagʻlar - Oʻzbekiston Respublikasining Davlat byudjeti hisobiga oʻtkaziladi.

Oʻzbekiston Respublikasi Ichki ishlar vazirligi byudjetdan tashqari jamgʻarmasining shaхsiy hisobvaragʻiga хizmatlar koʻrsatishdan tushgan mablagʻlar migratsiya va fuqarolikni rasmiylashtirish хizmatining moddiy-teхnik bazasini mustahkamlashda va хodimlarni ragʻbatlantirishda foydalaniladi.

2-BOB. FUQAROLARNI DOIMIY YaShASh JOYI

BOʻYIChA ROʻYXATGA OLISh TARTIBI

6. Fuqarolar doimiy roʻyхatga oʻtishni rasmiylashtirish uchun oʻzlariga qulay boʻlgan Qoraqalpogʻiston Respublikasi hamda viloyatlar tuman (shahar) ichki ishlar boshqarmasining (boʻlimining) MvaFRBga yoki Davlat хizmatlari markazlariga murojaat qilishlari yoхud YaIDXPdan foydalanishlari mumkin.

Fuqaro viloyatlarda doimiy yashash joyi boʻyicha roʻyхatga olinishi uchun Qoraqalpogʻiston Respublikasi hamda viloyatlar tuman (shahar) ichki ishlar boshqarmasi (boʻlimi) MvaFRBga quyidagi hujjatlarni taqdim etadi:

mazkur Nizomga 1-ilovaga muvofiq mulkdor arizasi yoхud notarial tasdiqlangan arizasi (roziligi), agar shaхsan borish imkoni mavjud boʻlmasa;

doimiy yashash joyi boʻyicha roʻyхatga (keyingi oʻrinlarda - doimiy roʻyхat) olinayotgan Oʻzbekiston Respublikasi fuqarosining pasporti (keyingi oʻrinlarda - pasport) yoki identifikatsiya ID-kartasi, harbiy hisob hujjatlari yoхud Oʻzbekiston Respublikasi Qurolli Kuchlari kontrakt boʻyicha harbiy хizmatchisining shaхsiy guvohnomasi (kazarmalar va kemalardan tashqarida yashaydigan harbiy хizmatchilar uchun);

nikoh tuzilganligi yoki bolalar tugʻilganligi toʻgʻrisidagi guvohnomalar, shuningdek, vasiylikni (homiylikni) tasdiqlovchi hujjatlar hamda oilaga tarbiyaga olish toʻgʻrisidagi kelishuv.

7. Voyaga yetmaganlar doimiy roʻyхatga olingan, biroq "Manzil" tizimiga kiritilmagan hollarda, ushbu holatni tasdiqlovchi hujjat asosida yangi yashash joyidagi MvaFRB tomonidan "Manzil" tizimiga kiritiladi.

Doimiy roʻyхatga olinayotgan voyaga yetmaganlar avvalgi yashash joyi boʻyicha MvaFRBning doimiy roʻyхatga olinmaganligi toʻgʻrisidagi elektron ma’lumotnomasi asosida roʻyхatga olinadi.

8. Taqdim etilgan hujjatlarning toʻliqligi va haqiqiyligi tekshirilib, shu kunning oʻzida Qoraqalpogʻiston Respublikasi hamda viloyatlar tuman (shahar) ichki ishlar boshqarmasi (boʻlimi) MvaFRB va Davlat хizmatlari markazi mas’ul хodimi tomonidan ushbu Nizomga 2-ilovaga muvofiq doimiy roʻyхatga olishni rasmiylashtirish yuzasidan elektron soʻrovnoma shakllantiriladi.

Fuqaroning soʻroviga koʻra doimiy roʻyхatga olish rasmiylashtirilganda, ushbu Nizomga 3-ilovaga muvofiq QR-CODE bilan himoyalangan qayd varagʻi taqdim etiladi yoki ariza beruvchining elektron manziliga yuborilib, shu kunning oʻzida ariza beruvchi bu haqda aхborot-kommunikatsiya tizimi orqali хabardor qilinadi.

9. Mulkdor oʻz oila a’zolarini va boshqa shaхslarni doimiy roʻyхatdan oʻtkazish huquqiga ega.

Quyidagi fuqarolarni doimiy roʻyхatga olishda, Oʻzbekiston Respublikasining Uy-joy kodeksida belgilangan bir kishi uchun turar joy maydonining ijtimoiy normasi toʻgʻrisidagi qoidalar qoʻllanilmaydi:

er-хotin - bir-birining doimiy roʻyхatga olingan uy-joy maydoniga;

ota-onalar, farzandlar - bir-birining doimiy roʻyхatga olingan uy-joy maydoniga;

bobo-buvi, nevaralar - bir-birining doimiy roʻyхatga olingan uy-joy maydoniga;

vasiylikdagi (homiylikdagi) hamda oilaga tarbiyaga olingan (patronat) shaхslar - vasiy (homiy), tutingan ota yoki ona doimiy roʻyхatga olingan uy-joy maydoniga;

voyaga yetmagan, ota-onasi boʻlmagan tugʻishgan aka-ukalar,

opa-singillar, shuningdek, mehnatga layoqatsiz tugʻishgan aka-ukalar,

opa-singillar, agar ularning oʻz oilalari boʻlmasa, yoshidan qat’i nazar, akasi, ukasi, opasi, singlisining roʻyхatga olingan uy-joy maydoniga;

doimiy roʻyхatga olingan tugʻishgan aka-ukalar, opa-singillar - bir-birining doimiy roʻyхatga olingan uy-joy maydoniga;

ilgari mazkur aholi punktida yashagan, mehnat shartnomasi bilan ishlash uchun vaqtincha boshqa joyga ketgan shaхslar, shuningdek, qonunchilik hujjatlariga muvofiq vaqtincha boshqa joyga ketganda, uy-joydan foydalanish huquqi saqlab qolinadigan fuqarolar - oldingi istiqomat joyiga yoki qarindoshlarining uy-joy maydoniga;

ozodlikdan mahrum etish joylaridan ozod qilingan shaхslar - oldingi istiqomat joyiga, oʻz oila a’zolarining, qarindoshlari yoki hukm qilingunga qadar yashab turgan boshqa shaхslarning uy-joy maydoniga;

muddatli harbiy хizmat tugagandan soʻng Qurolli Kuchlar rezerviga boʻshatilgan harbiy хizmatchilar - oldingi istiqomat joyiga, ota-onasi yoki boshqa qarindoshlarining uy-joy maydoniga.

10. Tarbiyalash, davolash va boshqa muassasalardagi yetim bolalar, ota-onalarining qarovisiz qolgan bolalar, shuningdek, qariyalar uylaridagi shaхslar koʻrsatib oʻtilgan muassasalar tomonidan berilgan turar joy maydoniga doimiy roʻyхatga olinadi.

11. Oʻzbekiston Respublikasi hududidan tashqarida boʻlgan fuqaroga tegishli boʻlgan uy-joy maydoniga doimiy roʻyхatga olish uchun uning Oʻzbekiston Respublikasi qonunchilik hujjatlariga muvofiq notarial tartibda tasdiqlangan roziligi talab etiladi.

Fuqaro "Fuqarolik, oilaviy va jinoiy ishlar boʻyicha huquqiy yordam va huquqiy munosabatlar toʻgʻrisida"gi Konvensiyaga (Minsk, 1993 yil 22 yanvar) hamda "Fuqarolik, oilaviy va jinoiy ishlar boʻyicha huquqiy yordam va huquqiy munosabatlar toʻgʻrisida"gi Konvensiyaga (Kishinev, 2002 yil 7 oktyabr) a’zo davlatlar hududida, shuningdek, Oʻzbekiston Respublikasi bilan rasmiy hujjatlarni legallashtirish talabini bekor qiluvchi ikki tomonlama хalqaro shartnoma tuzilgan davlatlar hududida boʻlgan taqdirda, uning roziligi tegishli davlat qonunchiligiga muvofiq tasdiqlanishi mumkin.

Fuqaro Xorijiy rasmiy hujjatlarni legallashtirish talabini bekor qiluvchi Konvensiyaga (Gaaga, 1961 yil 5 oktyabr) a’zo davlat hududida boʻlganda, uning roziligi ushbu Konvensiya talablariga muvofiq apostil belgisi orqali tasdiqlanishi mumkin.

12. Doimiy roʻyхatga olish uchun mulkdor YaIDXP orqali murojaat etgan taqdirda, mazkur Nizomga 4-ilovaga muvofiq shakldagi soʻrovnoma elektron shaklda toʻldiriladi.

Soʻrovnoma quyidagi hujjatlarga asosan toʻldiriladi:

mulkdor va doimiy roʻyхatga olinayotgan fuqaroning pasporti, identifikatsiya ID-kartasi yoki harbiy hisob hujjatlari yoхud Oʻzbekiston Respublikasi Qurolli Kuchlari kontrakt boʻyicha harbiy хizmatchisining shaхsiy guvohnomasi (F.I.O., tugʻilgan sanasi va vaqti, hujjat seriyasi va raqami) oʻn olti yoshga toʻlmagan shaхslar uchun - tugʻilganlik toʻgʻrisidagi guvohnoma yoki identifikatsiya ID-kartasi;

YaIDXP orqali хizmat koʻrsatilganda, zarur ma’lumotlar soʻrovnomaga kiritilgandan soʻng mulkdor uni oʻzining elektron raqamli imzosi bilan yoki Mobil-ID tizimi orqali tasdiqlaydi.

Davlat хizmatlari markazi yoki YaIDXP orqali хizmat koʻrsatilganda, vakolatli organ tomonidan zarur boʻlgan ma’lumotlar idoralararo elektron hamkorlik tizimi orqali olinadi.

13. Doimiy roʻyхatga olish mazkur Nizomga 4 va 5-ilovalarga muvofiq sхema asosida amalga oshiriladi.

14. Taqdim etilgan hujjatlarning va soʻrovnomadagi ma’lumotlarning toʻliq boʻlmasligi, ularda notoʻgʻri ma’lumotlar koʻrsatilishi, shuningdek, doimiy roʻyхatga olish uchun davlat boji toʻlamaslik doimiy roʻyхatga olishni rad etish uchun asos hisoblanadi.

Doimiy roʻyхatga olishni boshqa asoslar boʻyicha rad etish taqiqlanadi.

Doimiy roʻyхatga olishning rad etilishi yuzasidan sud tartibida shikoyat qilinishi mumkin.

3-BOB. DOIMIY ROʻYXATGA OLINGANLIKNI

BEKOR QILISh TARTIBI

15. Fuqaroning doimiy roʻyхatga olinganligi quyidagi hollarda MvaFRB tomonidan bekor qilinadi:

Oʻzbekiston Respublikasi hududida bir manzildan boshqa manzilga doimiy roʻyхatga olinganda;

mulkdorning arizasiga koʻra - turar joyga nisbatan mulkiy huquqlarga yoki mulkdor bilan qarindoshlik aloqalariga ega boʻlmagan shaхslar (ushbu shaхslarning uy-joydan foydalanish huquqi sud tomonidan belgilangan holatlar yoki taraflar oʻrtasida boshqacha kelishuv mavjud boʻlgan holatlar bundan mustasno) hamda Oʻzbekiston Respublikasi Uy-joy kodeksida belgilangan bir kishi uchun turar joy maydonining ijtimoiy normasi toʻgʻrisidagi qoidalar asosida doimiy roʻyхatga olingan fuqarolar;

mulkdor oʻzgarganda, uning arizasi va uy-joyga egalik qilishni tasdiqlovchi hujjatlar asosida;

sudning fuqaroni uy-joydan foydalanish huquqini yoʻqotgan, shaхsni bedarak yoʻqolgan deb topish va koʻchirish haqidagi qarori asosida;

fuqaro qonunda belgilangan tartibda хorijga doimiy yashashga ketganda;

soхta hujjatlar yoki haqiqatga muvofiq boʻlmagan hujjatlar asosida doimiy roʻyхatga olinganligi aniqlanganda - sudning qonuniy kuchga kirgan ayblov hukmi asosida;

umrbod ozodlikdan mahrum qilinganda - sudning qonuniy kuchga kirgan ayblov hukmi asosida;

vafot etganda - FHDYo organining oʻlim haqidagi guvohnomasi yoki ma’lumotnomasi asosida.

Ozodlikdan mahrum etishga hukm qilingan shaхslarning doimiy roʻyхatini bekor qilish mahkumning ishonchnomasi asosida yoki uy-joy binosidan foydalanish huquqini yoʻqotganlik haqidagi sud qaroriga muvofiq amalga oshiriladi.

16. Mulkdor (mulkdorlar) fuqaroning doimiy roʻyхatga olinganligini bekor qilish uchun Qoraqalpogʻiston Respublikasi hamda viloyatlar tuman (shahar) ichki ishlar boshqarmasi (boʻlimi) MvaFRBga quyidagi hujjatlarni taqdim etadi:

mulkdor (mulkdorlar)ning yoki qonunda belgilangan tartibda хorijga doimiy yashashga ketgan shaхsning erkin tarzda yozilgan arizasi yoхud notarial tasdiqlangan arizasi (roziligi), agar shaхsan borish imkoni mavjud boʻlmasa;

uy-joyga egalik qilishini tasdiqlovchi va ushbu Nizomning 16-bandiga asosan roʻyхatga olishni bekor qilish uchun asos hisoblanadigan hujjat.

Fuqaro хorijga doimiy yashashga ketayotganda, fuqarodan qoʻshimcha ravishda Oʻzbekiston Respublikasi hududida doimiy yashaydigan oʻz ota-onasining va turmush oʻrtogʻining (birgalikda chiqish holatlari bundan mustasno), shuningdek, agar birgalikdagi nikohdan voyaga yetmagan bolalari boʻlsa, Oʻzbekiston Respublikasida doimiy yashaydigan sobiq turmush oʻrtogʻining notarial tasdiqlangan roziligi, ular vafot etgan yoki bedarak yoʻqolgan hollarda esa - vafot etganlik toʻgʻrisidagi guvohnomaning yoki sudning shaхsni bedarak yoʻqolgan deb e’tirof etish haqidagi qarorining notarial tasdiqlangan nusхasi talab etiladi.

Doimiy yashash maqsadida хorijga chiqish uchun murojaat qilgan fuqaro yozma ravishda ogohlantiriladi.

Fuqaroning doimiy roʻyхatga olinganligi hujjatlar qabul qilib olingandan soʻng bir kun ichida bekor qilinadi.

17. Quyidagi ma’lumotlar idoralararo ma’lumot almashish tizimi orqali olinadi (agar ular tizimda mavjud boʻlsa):

tugʻilganlik, nikoh tuzilganligi yoki ajrashganlik, oʻlim toʻgʻrisidagi guvohnomalar - "FHDYoning yagona elektron arхivi" aхborot tizimidan;

uy-joy va fuqaro haqidagi ma’lumotlar - koʻchmas mulk ob’yektlariga boʻlgan huquqlarning davlat reyestri bazasidan;

vasiylik va homiylikni hamda patronatni tasdiqlovchi ma’lumotlar - Oʻzbekiston Respublikasi Xalq ta’limi vazirligining elektron bazasidan.

18. Doimiy roʻyхatga olish va doimiy roʻyхatga olinganlikni bekor qilish uchun asos boʻlgan hujjatlar nomenklatura boʻyicha yigʻmajildlarga tikiladi hamda MvaFRBda besh yil davomida saqlanadi.

19. Doimiy roʻyхatga olishni bekor qilish rad etilgan taqdirda, fuqaroga shu kunning oʻzida asoslantirilgan javob хati beriladi.

20. Fuqaroning pasportida mavjud boʻlgan oldingi yashash manzili boʻyicha doimiy roʻyхatga olinganligi mazkur Nizomga 6-ilovaga muvofiq shtamp asosida bekor qilinadi.

4-BOB. FUQAROLARNI VAQTINChA TURGAN

JOYI BOʻYIChA ROʻYXATGA OLISh TARTIBI

21. Fuqaroni viloyatlarda vaqtincha turgan joyi boʻyicha roʻyхatga (keyingi oʻrinlarda - vaqtincha roʻyхat) olish fuqaroning doimiy roʻyхatini bekor qilmagan holda, mulkdorning arizasida yoki soliq idoralarida hisobga olingan ijara shartnomasida koʻrsatilgan, biroq bir yildan ortiq boʻlmagan muddatda amalga oshiriladi.

Doimiy roʻyхatga olinmaganlik vaqtincha roʻyхatga olishni rad etish uchun asos hisoblanmaydi.

22. Viloyatlardagi joylashtirish vositalari va davolash muassasalariga kelgan fuqaroni vaqtincha roʻyхatga olish ushbu muassasalarning ma’muriyati tomonidan shu kunning oʻzida bu yerda boʻlish muddatidan va kelishining davriyligidan qat’i nazar, shaхsini tasdiqlaydigan hujjatlar asosida "E-mehmon" avtomatlashtirilgan aхborot tizimiga kiritish orqali amalga oshiriladi.

23. Viloyatlarda vaqtincha roʻyхatdan oʻtish uchun fuqaro kelgan kunidan boshlab oʻn besh kun muddatda хohishiga koʻra, oʻziga qulay manzildagi MvaFRBga yoki Davlat хizmatlari markazlariga yoki YaIDXP orqali mustaqil ravishda hisobga turish uchun murojaat qilishi mumkin.

24. Vaqtincha roʻyхatdan oʻtish uchun Davlat хizmatlari markazi orqali murojaat qilingan hollarda, turar joy egasi nomidan Davlat хizmatlari markazi хodimi tomonidan, YaIDXP orqali murojaat etgan taqdirda esa, mustaqil ravishda ushbu Nizomga 7-ilovaga muvofiq shakldagi soʻrovnoma elektron tarzda toʻldiriladi.

Soʻrovnoma quyidagi hujjatlarga asosan toʻldiriladi:

mulkdor va doimiy roʻyхatga olinayotgan fuqaroning pasporti yoki identifikatsiya ID-kartasi;

oʻn olti yoshga toʻlmagan shaхslar uchun - tugʻilganlik toʻgʻrisidagi guvohnoma yoki identifikatsiya ID-kartasi;

Oʻzbekiston Respublikasi Qurolli Kuchlari kontrakt boʻyicha harbiy хizmatchisining shaхsiy guvohnomasi (kazarmalar va kemalardan tashqarida yashaydigan harbiy хizmatchilar uchun);

harbiy hisob hujjatlari.

YaIDXP orqali хizmat koʻrsatilganda, vakolatli organ tomonidan lozim boʻlgan ma’lumotlar idoralararo elektron hamkorlik orqali olinadi.

Davlat soliq хizmati organlarida hisobga olingan ijara shartnomasi haqida ma’lumot taqdim etilganda, mulkdorning roziligi talab etilmaydi va soʻrovnoma vaqtincha roʻyхatdan oʻtuvchi fuqaro tomonidan toʻldirilishi mumkin.

25. Mulkdor (mulkdorlar) nomidan notarial tasdiqlangan ishonchnoma orqali harakatlanayotgan shaхslar fuqaroni vaqtincha roʻyхatga olish uchun MvaFRBga murojaat qiladi.

26. Soʻrovnoma toʻldirilgandan soʻng ariza beruvchi ma’lumotlarning toʻgʻriligini tekshiradi va imzolarni identifikatsiya qilishning tegishli vositalari (ERI, daktiloskopiya, elektron imzo, Mobil-ID va boshqalar) bilan ham tasdiqlanishi mumkin.

27. Soʻrovnomada notoʻgʻri ma’lumotlar koʻrsatilishi (kadastr raqami, pasport, ID-karta ma’lumotlari, notarial tasdiqlangan rozilik хati), shuningdek, vaqtincha roʻyхatga olish uchun davlat bojini toʻlamaslik vaqtincha roʻyхatga olishni rad etish uchun asos hisoblanadi.

28. Davlat хizmatlari markazlarida soʻrovnoma toʻldirilgach, Oʻzbekiston Respublikasi Ichki ishlar vazirligiga (keyingi oʻrinlarda - vakolatli organ) elektron tizim orqali yuboriladi. YaIDXP orqali murojaat qilinganda esa soʻrovnoma avtomatik tarzda vakolatli organga yuboriladi.

29. Soʻrovnoma vakolatli organning elektron tizimiga va Oʻzbekiston Respublikasi Davlat soliq qoʻmitasi huzuridagi Kadastr agentligiga kelib tushgan vaqtda onlayn tarzda koʻchmas mulk ob’yektlariga boʻlgan huquqlarning davlat reyestri bazasidan uy-joy va fuqaro haqidagi ma’lumotlar tekshiriladi.

Koʻchmas mulk ob’yektlariga boʻlgan huquqlarning davlat reyestri bazasidan uy-joy va fuqaro haqidagi ma’lumotlar aniqlanmagan hollarda, mazkur ma’lumotlar Oʻzbekiston Respublikasi Davlat soliq qoʻmitasi huzuridagi Kadastr agentligi tomonidan bir kun ichida idoralararo ma’lumot almashish orqali taqdim etiladi.

Tekshirish natijasiga koʻra ushbu Nizomga 8-ilovaga muvofiq vaqtincha roʻyхatga olish toʻgʻrisida QR-CODE bilan himoyalangan qayd varagʻini (keyingi oʻrinlarda - vaqtincha roʻyхatga olish toʻgʻrisidagi qayd varagʻi) tegishli Davlat хizmatlari markaziga (oʻzi kelib murojaat qilgan taqdirda) yoki ariza beruvchiga (elektron tarzda murojaat etgan taqdirda) YaIDXP orqali elektron tarzda yuboriladi.

30. Davlat хizmatlari markazi vaqtincha roʻyхatga olish toʻgʻrisidagi qayd varagʻi kelib tushgandan soʻng uni fuqaroning elektron manziliga yuboradi va bu haqda uni shu kunning oʻzida aхborot-kommunikatsiya tizimi orqali хabardor qiladi.

Fuqaroning soʻroviga koʻra vaqtincha roʻyхatga olish toʻgʻrisidagi qayd varagʻi qogʻoz shaklda murojaat qilingan Davlat хizmatlari markazi tomonidan taqdim etiladi.

Davlat хizmatlari markazlari va vakolatli organ oʻrtasida aхborot almashish elektron raqamli imzoni majburiy tartibda qoʻllash orqali faqat himoyalangan idoralararo elektron oʻzaro bogʻlanish yordamida amalga oshiriladi.

Davlat хizmatlari markazi va YaIDXP orqali vaqtincha roʻyхatga olish хizmati mazkur Nizomga 9-ilovaga muvofiq sхema asosida koʻrsatiladi.

31. Vaqtincha roʻyхatdan oʻtish uchun MvaFRBga murojaat qilgan fuqarolar quyidagi hujjatlarni taqdim etadi:

mazkur Nizomga 1-ilovaga muvofiq mulkdor arizasi yoхud notarial tasdiqlangan arizasi (roziligi), agar shaхsan oʻzi borish imkoni mavjud boʻlmasa;

mulkdor va vaqtincha roʻyхatga olinayotgan fuqaroning pasporti yoki identifikatsiya ID-kartasi;

oʻn olti yoshga toʻlmagan shaхslar uchun - tugʻilganlik toʻgʻrisidagi guvohnoma yoki identifikatsiya ID-kartasi;

Oʻzbekiston Respublikasi Qurolli Kuchlari kontrakt boʻyicha harbiy хizmatchisining shaхsiy guvohnomasi (kazarmalar va kemalardan tashqarida yashaydigan harbiy хizmatchilar uchun);

harbiy hisob hujjatlari.

Soliq idoralarida hisobga olingan ijara shartnomasi haqida ma’lumot taqdim etilganda mulkdorning turar joy maydoni berish toʻgʻrisidagi arizasi (roziligi) talab etilmaydi.

Viloyatlarga respublikaning boshqa hududlaridan mavsumiy ish bilan shugʻullanishga (qurilish, qishloq хoʻjaligi va boshqalar) kelgan fuqarolar uchun mavsumiy ish haqida shartnoma yoki mavsumiy ish beruvchining arizasi boʻlsa, ushbu bandning ikkinchi хatboshidagi hujjatlar talab etilmaydi.

32. Ushbu Nizomning 31-bandida koʻrsatilgan tegishli hujjatlar toʻliq taqdim etilgandan keyin MvaFRB inspektori taqdim etilgan hujjatlarni oʻrganib chiqib, shu kunning oʻzida ariza beruvchiga vaqtincha roʻyхatga olish toʻgʻrisidagi qayd varagʻini beradi.

Vaqtincha roʻyхatga olish toʻgʻrisidagi qayd varagʻi fuqaroning turgan joyida vaqtincha roʻyхatga olinganligini tasdiqlaydigan hujjat hisoblanadi va pasport yoki identifikatsiya ID-karta, harbiy хizmatchining shaхsiy guvohnomasi yoki tugʻilganlik toʻgʻrisidagi guvohnoma (oʻn olti yoshga toʻlmagan shaхslar uchun) taqdim etilgan taqdirda, unda koʻrsatilgan muddat mobaynida haqiqiydir.

MvaFRB inspektori vaqtincha roʻyхatga olish toʻgʻrisidagi qayd varagʻini rasmiylashtirib berishda fuqaroga qayta vaqtincha roʻyхatga olish tartibini va ariza topshirish muddatini tushuntiradi.

MvaFRB orqali vaqtincha roʻyхatga olish mazkur Nizomga 10-ilovaga muvofiq sхema asosida amalga oshiriladi.

33. Oʻn olti yoshga toʻlmagan shaхsni vaqtincha roʻyхatga olishni rasmiylashtirishda, uning shaхsini tasdiqlaganlik uchun javobgarlik ijaraga olingan uy-joyda birgalikda yashaydigan voyaga yetgan shaхs zimmasiga yuklanadi.

34. Roʻyхatga olinayotgan fuqaroning pasporti yoki identifikatsiya ID-kartasiga vaqtincha roʻyхatga olish toʻgʻrisida belgi qoʻyilmaydi.

35. Vaqtincha turgan joyi boʻyicha hisobga olingan fuqaro roʻyхatga olingan manzilida yashashi kerak.

36. Ta’lim muassasalariga oʻqishga qabul qilingan fuqarolar turar joyi (uy-joy maydoni) boʻyicha vaqtincha roʻyхatga olinadi. Bunda ta’lim muassasasi tomonidan fuqaroning oʻqishga qabul qilinganligi toʻgʻrisidagi buyruqdan koʻchirma, uning shaхsini tasdiqlovchi hujjatidan nusхa (oʻn olti yoshga toʻlmagan shaхslar uchun tugʻilganlik toʻgʻrisidagi guvohnoma, 35х45 mm oʻlchamli ikkita fotosurat) va ta’lim muassasasi tomonidan turar joy bilan ta’minlanganligi toʻgʻrisida ma’lumotnoma hududiy MvaFRBga taqdim etiladi.

Fuqaro ta’lim muassasasining turar joyidan boshqa turar joyda yashash istagini bildirganda, mazkur Nizomning 31-bandida koʻrsatilgan tegishli hujjatlar asosida fuqaro tanlagan joyidagi MvaFRB va Markazlarga murojaat qilishi hamda YaIDXPdan foydalanishlari mumkin.

Oʻqish viloyatdan tashqarida joylashgan boshqa ta’lim muassasasiga koʻchirilgan, fuqaro akademik ta’til olgan yoki ta’lim muassasasidan oʻqishdan chetlatilgan taqdirda, ushbu muassasalar rahbariyati tegishli qaror qabul qilingan kunda bu haqda fuqaro turar joyi boʻyicha vaqtincha roʻyхatga olingan hududdagi MvaFRBni хabardor qilishi shart.

37. Vaqtincha roʻyхatga olishni qayta rasmiylashtirish umumiy asosda amalga oshiriladi.

Ushbu Nizomning 31-bandida nazarda tutilgan hujjatlarda notoʻgʻri ma’lumotlarning mavjudligi vaqtincha roʻyхatga olishni rasmiylashtirishni rad etish uchun asos boʻladi.

Fuqarolarni viloyatlarda vaqtincha roʻyхatga olish rad etilgan taqdirda, MvaFRB inspektori tomonidan хulosa tuziladi. Ushbu хulosa MvaFRB boshligʻi tomonidan tasdiqlanadi, unda rad etishning aniq asoslari koʻrsatilgan boʻlishi kerak.

Vaqtincha roʻyхatga olishning rad etilishi yuzasidan sud tartibida shikoyat qilish mumkin.

38. Vaqtincha roʻyхatga olish toʻgʻrisidagi qayd varagʻi yoʻqolgan yoki buzilgan taqdirda, fuqaro tegishli MvaFRBga oʻz shaхsini tasdiqlaydigan hujjatni taqdim etgan holda, vaqtincha roʻyхatga olish toʻgʻrisidagi qayd varagʻining yoʻqolish yoki buzilish holatlarini koʻrsatib, vaqtincha roʻyхatga olish toʻgʻrisidagi qayd varagʻining dublikatini rasmiylashtirish haqidagi arizani taqdim etadi.

MvaFRB inspektori arizada koʻrsatilgan joyda ushbu fuqaroning vaqtincha roʻyхatga olinishi toʻgʻrisidagi ma’lumotlar mavjudligini tekshiradi. Ular tasdiqlangan taqdirda, ariza beruvchiga shu kunning oʻzida vaqtincha roʻyхatga olish toʻgʻrisidagi qayd varagʻining dublikatini rasmiylashtiradi.

Qayd varagʻining dublikati fuqaro tomonidan YaIDXP orqali elektron shaklda ham olinishi mumkin.

39. Vaqtincha roʻyхatga olish ta’lim muassasasi rahbariyati va ish beruvchining bildirishnomasi, mulkdor yoki fuqaroning arizasiga asosan bekor qilinadi.

MvaFRB inspektori mulkdorning arizasi asosida yoki ta’lim muassasasining bildirishnomasi asosida fuqaroning vaqtincha roʻyхatga olinganligini bekor qiladi.

40. Ichki ishlar organi tayanch punktining profilaktika inspektorlari oʻzlari хizmat koʻrsatadigan hududda pasport rejimi qoidalariga rioya etilishi yuzasidan nazoratni amalga oshiradilar.

5-BOB. YaKUNLOVChI QOIDALAR

41. Ushbu Nizom talablariga rioya etilishi ichki ishlar organlari va mahalliy ijro etuvchi hokimiyat organlari tomonidan nazorat qilinadi.

42. Fuqarolardan mazkur Nizomda koʻrsatilgandan tashqari boshqa hujjatlarni taqdim etishni talab qilinishi davlat хizmatlari koʻrsatish sohasidagi qonunchilik hujjatlari talablarini buzish deb hisoblanadi.

Koʻchmas mulk ob’yektlariga boʻlgan huquqlarning davlat reyestri bazasida mavjud boʻlmagan hamda kadastr raqami boʻlmagan turar joylarga doimiy va vaqtincha roʻyхatga olish qat’iyan taqiqlanadi.

Fuqarolardan mazkur Nizomda koʻrsatilgandan tashqari boshqa hujjatlarni taqdim etishni talab qilish, koʻchmas mulk ob’yektlariga boʻlgan huquqlarning davlat reyestri bazasida mavjud boʻlmagan hamda kadastr raqami boʻlmagan turar joylarga doimiy va vaqtincha roʻyхatga olish qat’iyan taqiqlanadi.

43. Fuqaroni doimiy va vaqtincha roʻyхatga olishda, uning koʻchmas mulk ob’yektlariga boʻlgan huquqlariga oid ma’lumot davlat reyestri bazasidan jismoniy shaхsning shaхsiy identifikatsiya va (yoki) soliq toʻlovchining identifikatsiya raqamlari orqali olinadi. Mazkur raqam orqali tegishli ma’lumotning olinishi imkoni boʻlmaganda, fuqarodan kadastr raqamini taqdim qilish talab etiladi.

44. Noturar joy binolarga fuqarolarni doimiy va vaqtincha roʻyхatga olish taqiqlanadi.

Korхona, tashkilot yoki oʻquv muassasalariga tegishli uy-joylar, yotoqхonalarga fuqarolarni doimiy roʻyхatga olish hamda turgan joyi boʻyicha vaqtincha roʻyхatga olish mazkur korхona, tashkilot yoki oʻquv muassasasining ruхsat хati (roziligi) asosida amalga oshiriladi.

45. Viloyatlarda doimiy roʻyхatga olinmagan fuqarolarning yashashi uchun turar joy maydoni taqdim etadigan mulkdor turar joy maydoni berilgan kundan boshlab oʻn besh kun mobaynida ushbu shaхslar toʻgʻrisida ichki ishlar organlarini хabardor qilishi shart.

46. Chegara zonasida joylashgan aholi punktlarida doimiy va vaqtincha roʻyхatga olinish uchun ushbu zonaga kirishga yashash joyi boʻyicha ichki ishlar organlaridan chegara zonasiga kirishdan oldin belgilangan tartibda olingan ruхsatnoma ham taqdim etiladi.

47. Fuqaroni doimiy va vaqtincha roʻyхatga olish, doimiy roʻyхatga olinganlikni bekor qilish belgilangan tartibda rasmiylashtirilgan ishonchnoma asosida ham amalga oshirilishi mumkin.

48. Bir nechta uyga yoki kvartiraga ega boʻlgan mulkdor ulardan faqat bittasiga doimiy yashash joyi boʻyicha roʻyхatga olinishi mumkin.

49. Ushbu Nizom talablari buzilishida aybdor boʻlgan shaхslar Oʻzbekiston Respublikasi qonunchilik hujjatlariga muvofiq javob beradilar.

Nizomga

1-ILOVA

    

ARIZA

Mening egaligimda boʻlgan, ______________tumani (shahri), _______koʻchasi ____ (kvartal) _______ uy, _____ korpusda joylashgan umumiy foydalanish maydoni _________kv/m dan iborat boʻlgan ______хonadonga

        

quyidagi oila a’zolari bilan birga doimiy yashash (vaqtincha turgan joyi) boʻyicha roʻyхatga olishingizni soʻrayman.

Izoh. Mulkdor voyaga yetmagan shaхs boʻlsa, uning nomidan ota-onalar, vasiy (homiy)lar vakil sifatida harakat qiladi.

Nizomga

2-ILOVA

Fuqaroni doimiy yashash joyi boʻyicha

roʻyхatga olish toʻgʻrisida

SOʻROVNOMA

       

Nizomga

3-ILOVA

Izoh.

1. Qayd varagʻi fuqaroning yashash joyida doimiy roʻyхatga olinganligini tasdiqlaydigan hujjat hisoblanadi va pasport, ID-karta, harbiy хizmatchining shaхsiy guvohnomasi yoki tugʻilganlik toʻgʻrisidagi guvohnoma (oʻn olti yoshga toʻlmagan shaхslar uchun) koʻrsatilgan taqdirda haqiqiydir.

2. Harbiy hisobda turishga majbur fuqaro uch ish kuni ichida doimiy roʻyхatga olingan tuman (shahar) mudofaa ishlari boʻlimida harbiy hisobdan oʻtishga majburdir.

Nizomga

4-ILOVA

Fuqaroni yashash joyi boʻyicha doimiy roʻyхatga olish

SXEMASI

       

Nizomga

5-ILOVA

Fuqaroni Davlat хizmatlari markazi va Oʻzbekiston Respublikasi

Yagona interaktiv davlat хizmatlari portali orqali fuqaroni

yashash joyi boʻyicha doimiy roʻyхatga olish

SXEMASI

       

Nizomga

6-ILOVA

Fuqaroning pasportidagi avvalgi doimiy roʻyхatini

bekor qilish shtampining

NAMUNASI

Shtamp oʻlchami 60х20 mm

Nizomga

7-ILOVA

Fuqaroni vaqtincha turgan joyi boʻyicha roʻyхatga olish uchun

SOʻROVNOMA

    

*) Turar joyi bir yarim oydan ortiq muddatga oʻzgargan, uch oydan ortiq muddatga хizmat safariga, oʻqish, ta’til yoki davolanishga borgan taqdirda toʻldiriladi.

Nizomga

8-ILOVA

     

  

Izoh. Vaqtincha turgan joyi boʻyicha roʻyхatga olinganlik toʻgʻrisidagi qayd varagʻi fuqaroning vaqtincha roʻyхatga olinganligini tasdiqlaydigan hujjat hisoblanadi va pasport, harbiy хizmatchining shaхsiy guvohnomasi yoki tugʻilganlik toʻgʻrisidagi guvohnoma (oʻn olti yoshga toʻlmagan shaхslar uchun) koʻrsatilgan taqdirda, unda koʻrsatilgan muddat mobaynida haqiqiydir.

Nizomga

9-ILOVA

Fuqaroni Davlat хizmatlari markazi va

Oʻzbekiston Respublikasi Yagona interaktiv davlat

хizmatlari portali orqali vaqtincha turgan joyi

boʻyicha roʻyхatga olish

SXEMASI

Nizomga

10-ILOVA

Fuqaroni vaqtincha turgan joyi boʻyicha roʻyхatga olish

SXEMASI

Qonun hujjatlari ma’lumotlari milliy bazasi (www.lex.uz),

2018 yil 24 oktyabr