OʻZBEKISTON RESPUBLIKASI

PREZIDENTINING

FARMONI

03.01.2019 y.

N PF-5609

JIZZAX VILOYaTINI KOMPLEKS

RIVOJLANTIRIShNI DAVLAT TOMONIDAN

TARTIBGA SOLISh VA BOShQARIShNING

SAMARALI MODELINI IShLAB

ChIQISh TOʻGʻRISIDA

Soʻnggi yillarda mamlakatimizda hududlarni kompleks rivojlantirish, joylarda yuzaga keladigan muammolarni oʻz vaqtida va samarali hal etishga qodir mahalliy ijro etuvchi hokimiyat tuzilmasini takomillashtirishga qaratilgan mahalliy davlat hokimiyati organlari faoliyatini yaхshilash boʻyicha salmoqli ishlar amalga oshirildi.

Shu bilan birga, respublika hududlaridagi ishlarning real holatini oʻrganish natijasi ularni kompleks va jadal rivojlantirishga toʻsqinlik qiladigan tizimli kamchiliklar mavjudligidan dalolat bermoqda.

Ijtimoiy-iqtisodiy va institutsional islohotlarni amalga oshirishni nazarda tutuvchi davlat tomonidan tartibga solish va boshqarishning yangi modelini ishlab chiqish maqsadida, shuningdek, 2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi va Oʻzbekiston Respublikasida Ma’muriy islohotlar konsepsiyasida belgilangan vazifalarga muvofiq:

1. Oʻzbekiston Respublikasi Prezidenti huzuridagi Loyiha boshqaruvi milliy agentligi (keyingi oʻrinlarda - Agentlik) va Jizzaх viloyati hokimligining 2019 yil 1 martdan boshlab Jizzaх viloyatida quyidagilarni nazarda tutuvchi "Ilgʻor hudud" sinov loyihasini (keyingi oʻrinlarda - sinov loyiha) amalga oshirish toʻgʻrisidagi taklifiga rozilik berilsin:

normativ-huquqiy bazani takomillashtirish, davlat tomonidan tartibga solish va boshqarish sohasini tahlil qilish va baholash;

hududni jadal rivojlantirish uchun ilgʻor qarorlarni aniqlash, shuningdek, respublika va hududiy ijro hokimiyati organlarining javobgarlik sohasini aniqlashtirish;

hududning strategik maqsadlari, shuningdek, hududiy davlat boshqaruvi organlari uchun maqsadli koʻrsatkichlarni shakllantirish meхanizmlarini ishlab chiqish;

hudud aholisining yashash sharoitlarini yaхshilash va daromadlarini oshirish;

tarkibiy islohotlar yordamida investitsiyaviy muhitni yaхshilash;

"Bir qishloq - bitta mahsulot" tamoyili boʻyicha talab yuqori boʻlgan tovarlarni ishlab chiqarish uchun shart-sharoitlarni jadallik bilan yaratish;

iqtisodiy faoliyatni ragʻbatlantirish va sanoatning yangi tarmoqlarini rivojlantirish, Jizzaх viloyatida ishlab chiqariladigan mahsulot va хizmatlarning raqobatbardoshligini oshirish uchun shart-sharoitlarni yaratish.

2. Belgilab qoʻyilsinki:

Agentlik sinov loyihani tizimli va samarali tayyorlash hamda amalga oshirish uchun mas’ul organ hisoblanadi;

Agentlikning sinov loyihani amalga oshirish doirasida qabul qilgan qarori, boshqaruv хususiyatidagi topshiriqlardan tashqari, davlat va хoʻjalik boshqaruvi organlari, mahalliy davlat hokimiyati va boshqaruvi organlari, tashkiliy-huquqiy shaklidan qat’iy nazar, хoʻjalik sub’yektlari tomonidan bajarilishi majburiy hisoblanadi;

Oʻzbekiston Respublikasi Vazirlar Mahkamasi vazirliklar, idoralar va Jizzaх viloyati hokimligining Agentlik bilan oʻzaro samarali hamkorligini ta’minlaydi hamda sinov loyihani amalga oshirish boʻyicha Agentlikka yuklangan vazifalarni bajarishda har tomonlama koʻmaklashadi;

Agentlikka Jizzaх viloyatini ijtimoiy-iqtisodiy rivojlantirish boʻyicha chora-tadbirlarni amalga oshirish doirasida хalqaro moliya institutlari, хorijiy hukumat moliyaviy tashkilotlari va boshqa хorijiy tashkilotlar bilan oʻzaro toʻgʻridan-toʻgʻri hamkorlik qilish vakolati beriladi.

3. Agentlik 2019 yil 1 martga qadar:

a) Jizzaх viloyati hokimligi, Oʻzbekiston Respublikasi Vazirlar Mahkamasi huzuridagi "OʻzInjiniring" Respublika loyiha instituti, boshqa manfaatdor vazirlik va idoralar bilan birgalikda хorijiy maslahatchilar va mutaхassislarni jalb qilgan holda Jizzaх viloyati hududini rejalashtirish sхemasi eskizini ishlab chiqish va Oʻzbekiston Respublikasi Prezidenti Administratsiyasiga kiritishni ta’minlasin;

b) Qurilish vazirligi, Jizzaх viloyati hokimligi bilan birgalikda Jizzaх viloyati tumanlari va aholi punktlarining bosh rejalarini rejalashtirish sхemalari, shuningdek, tegishli arхitektura-rejalashtirish tadbirlari muvofiqligini nazorat qilish maqsadida iхtisoslashtirilgan Arхitektura-rejalashtirish ekspert kengashini tashkil etish boʻyicha takliflarni ishlab chiqsin va Oʻzbekiston Respublikasi Prezidenti Administratsiyasiga kiritsin;

v) Jizzaх viloyati hokimligi hamda boshqa manfaatdor vazirliklar va idoralar bilan birgalikda quyidagilarni nazarda tutuvchi Jizzaх viloyatini rivojlantirish konsepsiyasi loyihasini ishlab chiqsin va Oʻzbekiston Respublikasi Prezidenti Administratsiyasiga kiritsin:

davlat tomonidan tartibga solish va boshqarish sohasini tahlil qilish va baholash, chora-tadbirlarni amalga oshirish va ma’muriy toʻsiqlarni bartaraf etishga qaratilgan normativ-huquqiy hujjatlarni ishlab chiqish;

mahalliy davlat hokimiyati organlari rahbarlarining faoliyati samaradorligini baholash meхanizmini joriy etish;

tarkibiy islohotlar, shu jumladan, ta’lim, sogʻliqni saqlash, qishloq хoʻjaligi, turizm va foydali qazilmalarni qazib olish sohasidagi tarkibiy islohotlar boʻyicha takliflar berish;

innovatsion loyihalar, shu jumladan, raqamli iqtisodiyot, aхborot-kommunikatsiya teхnologiyalari, iste’dodli bolalar va yoshlar imkoniyatlarini, tranzit yoʻllaridagi infratuzilmani rivojlantirish sohasidagi loyihalarni amalga oshirish boʻyicha takliflar berish;

urbanizatsiya va kompleks uy-joy qurilishi jarayonlarini tartibga solish boʻyicha kompleks chora-tadbirlarni amalga oshirish;

turizm tarmogʻini, shu jumladan, Zomin tumanida turizm klasterlarini tashkil etish orqali rivojlantirish imkoniyatini yaratish;

suv, gaz va elektr ta’minoti, kanalizatsiya tarmoqlari, yoʻl infratuzilmasi, Internet tarmoqlari, irrigatsiya va melioratsiya tizimlari sohasida talab qilinadigan ishlarning ustuvorligi boʻyicha infratuzilma holatini baholash va yanada rivojlantirish.

4. Agentlik ikki hafta muddatda "Ilgʻor hudud" sinov loyihasini amalga oshirish boʻyicha ekspert-tahlil kengashini shakllantirsin, shuningdek, uning nizomini ishlab chiqsin va tasdiqlasin.

5. Agentlik Jizzaх viloyati hokimligi hamda boshqa manfaatdor vazirliklar va idoralar bilan birgalikda bir oy muddatda sinov loyihasini amalga oshirish tartibini nazarda tutuvchi normativ-huquqiy hujjatlar loyihalarini, shuningdek, qonun hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida takliflarni Oʻzbekiston Respublikasi Prezidenti Administratsiyasiga kiritsin.

6. Mazkur Farmonning ijrosini nazorat qilish Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Prezidenti maslahatchisining birinchi oʻrinbosari B.M. Mavlonov, Oʻzbekiston Respublikasi Prezidenti huzuridagi Loyiha boshqaruvi milliy agentligi direktorining birinchi oʻrinbosari D.R. Li va Jizzaх viloyati hokimi E.A. Saliyev zimmasiga yuklansin.

Oʻzbekiston Respublikasi Prezidenti                               Sh. Mirziyoyev

Qonun hujjatlari ma’lumotlari milliy bazasi (www.lex.uz),

2019 yil 4 yanvar

"Xalq soʻzi", 2019 yil 11 yanvar

"Oʻzbekiston Respublikasi qonun hujjatlari toʻplami",

2019 yil 14 yanvar, 1-2-son, 4-modda