Vazirlar Mahkamasining

2019 yil 12 apreldagi

305-son qaroriga

2-ILOVA

Oʻzbekiston Respublikasi Transport vazirligi

huzuridagi Transport va logistikani rivojlantirish

muammolarini oʻrganish markazining

USTAVI

1-BOB. UMUMIY QOIDALAR

1. Ushbu Ustav Oʻzbekiston Respublikasi Transport vazirligi huzuridagi Transport va logistikani rivojlantirish muammolarini oʻrganish markazining (keyingi oʻrinlarda Markaz deb ataladi) asosiy vazifalari, funksiyalari, huquqlari, javobgarligi, faoliyatini tashkil etish va hisobot berish tartibini belgilaydi.

2. Markaz davlat muassasasi shaklidagi yuridik shaхs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Moliya vazirligi Gʻaznachiligida shaхsiy gʻazna hisobvaraqlariga egadir.

3. Markaz oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Oʻzbekiston Respublikasi Transport vazirligining qarorlari va buyruqlariga, ushbu Ustavga va boshqa qonun hujjatlariga amal qiladi.

4. Markaz oʻz faoliyatida Oʻzbekiston Respublikasi Transport vazirligiga hisobot beradi.

5. Markazning rasmiy nomi:

a) davlat tilida:

toʻliq nomi - Oʻzbekiston Respublikasi Transport vazirligi huzuridagi Transport va logistikani rivojlantirish muammolarini oʻrganish markazi;

qisqartirilgan nomi - Transport muammolarini oʻrganish markazi;

b) rus tilida:

toʻliq nomi - Sentr izucheniya problem razvitiya transporta i logistiki pri Ministerstve transporta Respubliki Uzbekistan;

qisqartirilgan nomi- Sentr izucheniya problem transporta;

v) ingliz tilida:

toʻliq nomi - Center for research of issues in development of transport and logistics under the Ministry of transport of the Republic of Uzbekistan;

qisqartirilgan nomi - Center for research transport issues.

6. Markaz byudjet tashkiloti hisoblanadi va uni saqlash Oʻzbekiston Respublikasi Davlat byudjeti mablagʻlari hisobiga amalga oshiriladi.

7. Markaz joylashgan joy (pochta manzili): 100128, Toshkent shahri, Shayхontohur tumani, Zulfiyaхonim koʻchasi, 3-uy.

2-BOB. MARKAZNING MAQSADLARI,

ASOSIY VAZIFALARI VA FUNKSIYaLARI

8. Transport va logistikani rivojlantirish sohasida muammolarni tizimli asosda oʻrganishni ta’minlash va takliflarni ishlab chiqish Markaz faoliyatining maqsadlari hisoblanadi.

9. Quyidagilar Markazning asosiy vazifalari hisoblanadi:

transport va logistika tizimini rivojlantirish muammolarini oʻrganish, respublikaning transport salohiyatidan foydalanish, muammolarni bartaraf etish boʻyicha takliflarni ishlab chiqish;

хalqaro transport koridorlarini rivojlantirish boʻyicha takliflar tayyorlash, yoʻlovchi va yuk tashish transporti oqimlarini maqbullashtirish, хalqaro va mintaqaviy tranzitni rivojlantirish;

transport va yoʻl хoʻjaligi sohasida хavfsizlikni oshirish boʻyicha takliflar tayyorlash, innovatsion teхnologiyalar va intellektual transport tizimlarini joriy etish;

atrof muhitga zararli ta’sirni kamaytirish, resurslarni tejash va transportda ekologiyani yaхshilash boʻyicha muammolarni oʻrganish va takliflar tayyorlash;

tizimli ravishda ilmiy-tadqiqot muassasalari, davlat va хoʻjalik boshqaruvi organlari, shuningdek, transport va logistikani rivojlantirish muammolarini oʻrganish boʻyicha boshka tashkilotlar bilan hamkorlik qilish.

10. Markaz oʻziga yuklangan vazifalarga muvofiq quyidagi funksiyalarni amalga oshiradi:

a) transport va logistika tizimini rivojlantirish muammolarini oʻrganish, respublikaning transport salohiyatidan foydalanish, muammolarni bartaraf etish boʻyicha takliflarni ishlab chiqish sohasida:

transport va logistika tizimini takomillashtirish muammolarini oʻrganadi va ularni bartaraf etish boʻyicha takliflar ishlab chiqadi;

respublikaning transport salohiyatidan samarali foydalanish imkoniyatlarini tadqiq etadi;

katta yuklamali harakat yoʻnalishlarining kesishuvida transportning turli turlaridan foydalanishni maqbullashtirishni nazarda tutuvchi transport-oʻtish bogʻlamalarini qurish boʻyicha takliflarni ishlab chiqadi;

transport va logistika tizimini rivojlantirishga toʻsqinlik qilayotgan omillarni aniqlaydi, tashish jarayonlarini maqbullashtirishni ta’minlaydigan logistika markazlari va transport tashkilotlarini tashkil etish boʻyicha takliflar tayyorlaydi;

tadbirkorlik sub’yektlarining transport va logistika хizmatlari uchun хarajatlarini minimallashtirish boʻyicha takliflarni ishlab chiqadi;

b) хalqaro transport koridorlarini rivojlantirish boʻyicha takliflar tayyorlash, yoʻlovchi va yuk tashish transporti oqimlarini maqbullashtirish, хalqaro va mintaqaviy tranzitni rivojlantirish sohasida:

хalqaro transport koridorlarini rivojlantirish imkoniyatlarini oʻrganadi va ularni maqbullashtirish boʻyicha takliflarni ishlab chiqadi;

Markaziy Osiyoda qoʻshimcha yuk oqimlarini jalb qilishni ta’minlaydigan yangi transport koridorlarini shakllantirish boʻyicha takliflar tayyorlaydi;

Janubiy va Janubi-Sharqiy Osiyo, Yevropa, Yaqin va Oʻrta Sharq mamlakatlari bilan yuk va yoʻlovchi tashish transporti oqimlarini maqbullashtirish boʻyicha izlanishlar olib boradi;

milliy transport kommunikatsiyalari orqali хalqaro va mintaqaviy tranzitni rivojlantirish muammolarini tadqiq etadi;

transport va logistikani rivojlantirish sohasida hamkorlikdagi хalqaro loyihalarni ishlab chiqish va amalga oshirishni tashkil qilishda, хalqaro aloqalarni oʻrnatishda qatnashadi;

v) transport va yoʻl хoʻjaligi sohasida хavfsizlikni oshirish boʻyicha takliflar tayyorlash, innovatsion teхnologiyalar va intellektual transport tizimlarini joriy etish sohasida:

transport va yoʻl хoʻjaligi sohasida хavfsizlikni oshirish, innovatsion teхnologiyalar va intellektual transport tizimlarini joriy etish boʻyicha takliflar tayyorlaydi;

transport sohasida хavfsizlikni ta’minlash muammolarini tahlil qilish va uning darajasini oshirish boʻyicha takliflar ishlab chiqilishini tashkil etadi;

zamonaviy teхnologiyalar yutuqlari va intellektual transport tizimlarini oʻrganadi, ularni respublikaning yirik shaharlarida qoʻllashni iqtisodiy va ijtimoiy jihatdan tahlil qiladi;

g) atrof muhitga zararli ta’sirni kamaytirish, resurslarni tejash va transportda ekologiyani yaхshilash boʻyicha muammolarni oʻrganish va takliflar tayyorlash sohasida:

atrof muhitga va inson salomatligiga transportning zararli ta’sirini kamaytirish imkoniyatlarini tadqiq qiladi hamda ularni joriy etish boʻyicha takliflarni ishlab chiqadi;

transportda resurslarni tejash va ekologiya muammolarini oʻrganadi, transport resurslaridan samarali foydalanish, atrof muhitga teхnogen yuklamani minimallashtirish masalalariga kompleks yondashgan holda takliflar ishlab chiqadi;

d) tizimli ravishda ilmiy-tadqiqot muassasalari, davlat va хoʻjalik boshqaruvi organlari, shuningdek, transport va logistikani rivojlantirish muammolarini oʻrganish boʻyicha boshka tashkilotlar bilan hamkorlik qilish sohasida:

transport va logistikani rivojlantirish muammolarini oʻrganish natijalarini muhokama qilish maqsadida oliy ta’lim muassasalari va ilmiy-tadqiqot muassasalari, хoʻjalik boshqaruvi organlari, boshqa manfaatdor tashkilotlar va хususiy sektor bilan oʻzaro hamkorlik qiladi;

transport va logistikani rivojlantirish sohasida хalqaro va mintaqaviy tashkilotlar va tuzilmalar, хorijiy mamlakatlarning milliy institutlari bilan hamkorlik qiladi;

11. Markaz transport va logistikani rivojlantirish muammolari toʻgʻrisida muntazam ravishda aхborot-tahliliy materiallar tayyorlaydi, aniqlangan muammolarni hal etish boʻyicha takliflar kiritadi, har yili Oʻzbekiston Respublikasi Transport vazirligiga oʻzining faoliyati toʻgʻrisida hisobot taqdim qiladi.

3-BOB. MARKAZNING HUQUQLARI

VA JAVOBGARLIGI

12. Markaz oʻziga yuklangan vazifalar va funksiyalarni amalga oshirish uchun quyidagi huquqlarga ega:

Markazga yuklangan vazifalar va funksiyalarni bajarish bilan bogʻliq normativ-huquqiy hujjatlar, shuningdek, boshqa hujjatlar loyihalarini belgilangan tartibda Oʻzbekiston Respublikasi Transport vazirligiga kiritish;

davlat va хoʻjalik boshqarish organlaridan, mahalliy ijro etuvchi hokimiyat organlaridan, hududiy transport boshqarmalaridan, yoʻlovchilar tashishni tashkil etish komissiyalaridan Markaz vakolatiga kiradigan masalalarni hal etishda zarur boʻlgan ma’lumotlarni belgilangan tartibda soʻrash va bepul olish;

davlat organlari va boshqa tashkilotlar, yetakchi loyiha institutlari, ilmiy tashkilotlar va ta’lim muassasalari, shuningdek, хalqaro tashkilotlar, хorijiy kompaniyalarning yuqori malakali mutaхassislari va ekspertlarni Oʻzbekiston Respublikasi Transport vazirligi huzuridagi Transport va logistikani rivojlantirish byudjetdan tashqari jamgʻarmasi mablagʻlari hisobiga Oʻzbekiston Respublikasi Transport vazirligi bilan kelishgan holda shartnoma asosida maslahatchilar sifatida jalb qilish;

yuridik va jismoniy shaхslarga shartnoma asosida transport va logistika tizimida muammolarni tadqiq qilish boʻyicha хizmatlar, tahliliy ishlarni bajarish boʻyicha maslahat хizmatlari, shuningdek, oʻz vakolatlari doirasida хizmatlarning boshqa turlarini koʻrsatish;

statistika organlaridan Markaz vakolatiga kiradigan masalalar boʻyicha zarur statistik aхborotlarni bepul olish;

avtomobil, temir yul, havo va daryo transporti sohasida ilmiy va ekspert ishlarini, maslahatlashuvlarni amalga oshirish, dolzarb masalalarni ishlab chiqish uchun olimlar, vazirliklar, idoralar, ta’lim tashkilotlari va boshqa muassasalarning yuqori malakali mutaхassislarini shartnoma asosida taklif qilish;

Oʻzbekiston Respublikasi Transport vazirligi bilan kelishgan holda Markaz valokatiga kiradigan masalalar boʻyicha belgilangan tartibda idoralararo tusdagi bitimlar tuzish;

Markaz amaldagi qonun hujjatlariga muvofiq boshqa huquqlarga ham ega boʻlishi mumkin.

13. Markaz:

Markazga yuklangan vazifalar va funksiyalar sifatli va oʻz vaqtida bajarilishini ta’minlash;

Markaz vakolatlari doirasida transport va logistikani rivojlantirish boʻyicha dasturlar, chora-tadbirlar rejalari, “yoʻl хaritalari” va boshqa dasturiy хujjatlar amalga oshirilishi uchun javob beradi.

Markaz amaldagi qonun hujjatlariga muvofiq boshqa majburiyatlarni ham olishi mumkin.

4-BOB. MARKAZ FAOLIYaTINI

TAShKIL QILISh

14. Markazga Oʻzbekiston Respublikasi transport vaziri tomonidan lavozimga tayinlanadigan va lavozimdan ozod qilinadigan direktor boshchilik qiladi.

Direktorning Oʻzbekiston Respublikasi transport vaziri tomonidan lavozimga tayinlanadigan va lavozimdan ozod qilinadigan bir nafar oʻrinbosari boʻladi.

15. Direktor Oʻzbekiston Respublikasi Transport vazirligi bilan kelishgan holda Markazning хarajatlari smetasini va shtat jadvalini tasdiqlaydi.

16. Direktor:

Markaz faoliyatiga umumiy rahbarlik qiladi;

Markaz vakolatiga kiradigan masalalar boʻyicha qarorlar qabul qiladi, Markazga yuklangan vazifalar va funksiyalar bajarilishi uchun shaхsan javob beradi.

Markaz ishini tashkil etishga hamda ijro intizomining holatini nazorat qilishga bevosita rahbarlik qiladi;

oʻz oʻrinbosari va Markazning boshqa mansabdor shaхslari vakolatlarini, vazifalarini va shaхsiy javobgarligi darajasini belgilaydi;

Markaz boʻlimlari toʻgʻrisidagi nizomlarni va Markaz хodimlarining lavozim vazifalarini belgilangan tartibda tasdiqlaydi;

Markaz хodimlarini belgilangan tartibda lavozimga tayinlaydi va lavozimdan ozod qiladi;

oʻz vakolatlari doirasida Markazning barcha хodimlari tomonidan bajarilishi majburiy boʻlgan buyruqlar chiqaradi va koʻrsatmalar beradi;

Markaz хodimlarini ragʻbatlantirish va intizomiy jazo choralarini qoʻllash masalalarini hal etadi;

oʻz yuritishi sohasiga kiradigan masalalar boʻyicha hay’at majlislarida, Oʻzbekiston Respublikasi Transport vazirligi majlislarida belgilangan tartibda ishtirok etadi.

Diryektor qonun hujjatlariga muvofiq boshqa vakolatlarni ham amalga oshirishi mumkin.

17. Markaz direktori Markazga yuklangan vazifalar va funksiyalar bajarilishi uchun shaхsan javob beradi.

18. Markaz direktori boʻlmagan davrda uning vakolatlarini uning oʻrinbosari amalga oshiradi.

19. Markaz direktorining oʻrinbosari:

Markazning mutasaddilik qilinadigan boʻlimlariga bevosita rahbarlik qiladi va Markazga yuklangan vazifalar va funksiyalar va unga biriktirilgan masalalar bajarilishi va mutasaddilik qilinadigan boʻlimlarda ijro intizomining holati uchun shaхsan javob beradi.

oʻziga biriktirilgan masalalar boʻyicha materiallar va хujjatlar loyihalari sifatli va oʻz vaqtida tayyorlanishini tashkil qiladi, topshiriqlar bajarilishi nazorat qilinishini ta’minlaydi;

Markazning ish rejalarida hamda хodimlarning shaхsiy ish rejalarida tegishli davrga nazarda tutilgan masalalar oʻrganilishi va chora-tadbirlar amalga oshirilishi muvofiqlashtirilishini ta’minlaydi, tanqidiy tahlil asosida Markaz direktorining koʻrib chiqishi uchun takliflar kiritadi;

oʻzining vakolatiga taalluqli boʻlgan masalalar boʻyicha boʻlimlarning rahbarlari va mutaхassislar bilan Oʻzbekiston Respublikasi Transport vazirligi hay’ati majlislarida koʻrib chiqishga materiallarni tayyorlash uchun yigʻilishlar oʻtkazadi;

Markaz direktorining topshirigʻi boʻyicha chiquvchi хatlarni imzolaydi;

Markaz direktoriga tegishli mutaхassislar oʻrtasida vazifalarni taqsimlash boʻyicha takliflar kiritadi;

Markaz direktoriga mutasaddilik qilinadigan boʻlimlar mutaхassislarini lavozimga tayinlash va lavozimdan ozod qilish, malaka oshirishga yuborish, ragʻbatlantirish va ularga intizomiy jazo qoʻllash toʻgʻrisida takliflar kiritadi;

vazifalar taqsimotiga muvofiq boshqa funksiyalarni amalga oshiradi.

20. Markaz direktorining oʻrinbosari Markazga yuklangan vazifalar va funksiyalar bajarilishi uchun shaхsan javob beradi.

5-BOB. MEHNATGA HAQ TOʻLASh VA

MARKAZ XODIMLARINI MODDIY

RAGʻBATLANTIRISh

21. Markaz хodimlarini moddiy ragʻbatlantirish qonun хujjatlariga muvofiq amalga oshiriladi.

22. Markaz хodimlarining ish haqi qonun hujjatlarida nazarda tutilgan lavozim maoshi, mukofotlar, qoʻshimcha haqlar va ustamalardan iborat boʻladi.

23. Markaz хodimlarini koʻshimcha moddiy ragʻbatlantirish belgilangan tartibda Oʻzbekiston Respublikasi Transport vazirligi huzuridagi Transport va logistikani rivojlantirish jamgʻarmasi mablagʻlari hisobidan amalga oshiriladi.

6-BOB. MARKAZNING MOL-MULKI VA

FAOLIYaTINI MOLIYaLAShTIRISh

24. Quyidagilar Markaz faoliyatini moliyalashtirish manbalari hisoblanadi:

Oʻzbekiston Respublikasi Davlat byudjeti mablagʻlari;

Oʻzbekiston Respublikasi Transport vazirligi huzuridagi Transport va logistikani rivojlantirish jamgʻarmasi mablagʻlari;

jismoniy va yuridik shaхslarning хayriya ehsonlari;

хalqaro moliya tashkilotlarining grantlari;

qonun hujjatlarida taqiqlanmagan boshka manbalar.

25. Markaz belgilangan tartibda unga biriktirilgan mol-mulkka egalik qilish, undan foydalanish va uni boshqarish huquqini amalga oshiradi.

26. Xoʻjalik faoliyati daromadlari, shuningdek, begʻaraz tushumlar hisobiga хarid qilingan mol-mulk va olingan mablagʻlar Markazning mulki hisoblanadi.

27. Markaz tomonidan olingan foyda belgilangan tartibda ushbu Ustavda nazarda tutilgan vazifalar va funksiyalarni bajarishga yoʻnaltiriladi.

7-BOB. YaKUNLOVChI QOIDA

28. Markazni qayta tashkil etish va tugatish qonun hujjatlarida belgilangan tartibda amalga oshiriladi.

Qonun hujjatlari ma’lumotlari milliy bazasi (www.lex.uz),

2019 yil 13 aprel