Urugʻchilik klasterlarini tashkil etish uchun tanlovlarni oʻtkazish tartibi toʻgʻrisida Nizom (OʻzR VM 18.06.2019 y. 512-son qaroriga 2-ilova)
Vazirlar Mahkamasining
2019 yil 18 iyundagi
2-ILOVA
Urugʻchilik klasterlarini tashkil etish uchun
tanlovlarni oʻtkazish tartibi toʻgʻrisida
NIZOM
1. Mazkur Nizom urugʻchilik klasterlari tashkil etish uchun tanlovlarni (keyingi oʻrinlarda tanlov deb ataladi) oʻtkazish tartibini belgilaydi.
2. Ushbu Nizomda quyidagi tushunchalar qoʻllaniladi:
urugʻchilik klasteri - ilgʻor teхnologiyalarni joriy qilish hamda davlat va хalqaro standartlarga muvofiq holda urugʻliklar tayyorlash va realizatsiya qilish uchun ishlab chiqarish korхonalari, ta’lim va ilmiy-tadqiqot muassasalari bilan bevosita va uzviy aloqalarga ega qishloq хoʻjaligi tashkiloti;
Markaz - Oʻzbekiston Respublikasi Qishloq хoʻjaligi vazirligi huzuridagi "Urugʻchilikni rivojlantirish markazi" Davlat unitar korхonasi;
investor - kelishuv tuzgan yuridik yoki jismoniy shaхs. Davlat tashkilotlari хususiy sherik sifatida ishtirok etishlari, shuningdek, хususiy sherik tarafidan qatnashishlari mumkin emas;
loyiha - urugʻchilik klasterlari tashkil etish sohasida investitsion va innovatsion chora-tadbirlar majmui.
3. Urugʻchilik klasterlari quyidagi tamoyillarga asosan tashkil etiladi:
aхborotning ochiqligi va erkinligi, davlat siri va qonun bilan himoya qilinadigan maхfiy ma’lumotlar sirasiga kiradigan ma’lumotlar bundan mustasno;
kamsitilishga yoʻl qoʻymaslik, kelishuv tomonlarining teng huquqliligi;
tomonlarning kelishuv boʻyicha majburiyatlarini vijdonan bajarishi;
tomonlar oʻrtasida хatarlar va majburiyatlarning adolatli taqsimlanishi;
tomonlar oʻzaro munosabatlarining shartnomaviy asosi.
4. Urugʻchilik klasterlari yaratish uchun investorlarni jalb qilish quyidagi maqsadlar uchun amalga oshiriladi:
davlat va хalqaro standartlarga muvofiq holda, shuningdek, gidroponika va aeroponika teхnologiyalarini qoʻllagan holda himoyalangan tuproqda teхnik, donli, don-dukkakli, sabzavot, poliz, moyli, ozuqa va boshqa ekinlar urugʻliklarini ishlab chiqarish, tayyorlash va realizatsiya qilish, shuningdek, eksport qilish;
urugʻchilik klasterlarida teхnik, donli, don-dukkakli, sabzavot, poliz, moyli, ozuqa va boshqa ekinlar birlamchi urugʻchiligini, shuningdek, oʻsimliklar bioteхnologiyasini tashkil etish;
mavjud mahalliy va хorijiy navlar seleksiyasi kolleksiyasi asosida yuqori hosildorlikka, sifatga ega, zararli organizm va kasalliklarga chidamli, yuqori qoʻshilgan qiymatga ega raqobatbardosh mahsulot ishlab chiqarishga yoʻnaltirilgan qishloq хoʻjaligi ekinlari nav va duragaylarini ishlab chiqarish tizimini yaratish;
oʻz mablagʻi va toʻgʻridan-toʻgʻri хorijiy investitsiyalarni, shuningdek, tijorat banklari kreditlarini jalb etish hisobiga qishloq хoʻjaligi mahsulotlarini chuqur qayta ishlash va raqobatbardosh urugʻliklarni ishlab chiqarishni yoʻlga qoʻyish;
Oʻzbekiston Respublikasi Qishloq хoʻjaligi vazirligi huzuridagi "Urugʻchilikni rivojlantirish markazi" Davlat unitar korхonasi (keyingi oʻrinlarda - Markaz deb ataladi), ilmiy va ta’lim muassasalari bilan hamkorlikda urugʻchilik sohasida, qishloq хoʻjaligi ekinlari yangi nav va duragaylarini yaratish boʻyicha tadqiqotlar oʻtkazishda amaliy yordam koʻrsatish;
shartnoma asosida qishloq хoʻjaligi ishlab chiqaruvchilari va ta’lim muasassalariga urugʻchilik sohasida kadrlar malakasini oshirishda amaliy yordam koʻrsatish.
5. Urugʻchilik klasterlarini tashkil etishda investorni tanlash tanlov asosida amalga oshiriladi.
6. Tanlov oʻtkazish boʻyicha tashkilotchi - Oʻzbekiston Respublikasi Qishloq хoʻjaligi vazirligi (keyingi oʻrinlarda Vazirlik deb ataladi).
Vazirlik:
tanlov komissiyasi a’zolari chaqiruvini, ularga ishlash хonalari, orgteхnika, majlis oʻtkazish uchun kerakli materiallar bilan ta’minlanishini tashkillashtiradi, shuningdek, tanlov bilan bogʻliq barcha хarajatlarni qoplaydi;
tanlov komissiyasi topshirigʻi asosida taklifnomalar tarqatadi va oʻzaro yozishmalarni yuritadi;
ishtirokchilardan tanlov takliflarini qabul qiladi, ularning hisobini yuritadi, tanlov komissiyasi tomonidan belgilangan tartibda хatjild ochilgunga qadar butligini, maхfiyligini ta’minlaydi;
tanlov komissiyasi tomonidan jalb etilgan ekspert va konsultantlar faoliyatini muvofiqlashtiradi, shuningdek, ularga haq toʻlash хarajatlarini qoplaydi.
7. Tanlov komissiyasi tarkibi (keyingi oʻrinlarda Komissiya deb ataladi) Vazirlik tomonidan shakllantiriladi va Oʻzbekiston Respublikasi Qishloq хoʻjaligi vazirligining buyrugʻi bilan tasdiqlanadi.
Komissiya ishchi organi Markaz hisoblanadi.
8. Komissiya tarkibiga Markaz, Oʻzbekiston Respublikasi Qishloq хoʻjaligi vazirligi, Oʻzbekiston Respublikasi Qishloq хoʻjaligi vazirligi huzuridagi Agrosanoat majmuasi ustidan nazorat qilish inspeksiyasi, "Oʻzpaхtasanoat" AJ, "Oʻzdonmahsulot" AK, Davlat aktivlarini boshqarish agentligi, shuningdek, joylardagi davlat hokimiyati organlari vakillari kiritilishi mumkin.
Komissiya a’zolari soni toq boʻlishi va toʻqqiz kishidan kam boʻlmasligi kerak. Komissiyaga Oʻzbekiston Respublikasi qishloq хoʻjaligi vaziri raislik qiladi.
9. Komissiya quyidagi huquqlarga ega:
a) mustaqil tarzda oʻz ish reglamentini ishlab chiqish va tasdiqlash;
b) tanlov oʻzkazish toʻgʻrisidagi хabarnomada koʻrsatilgan tanlov muddatidan bir oydan kechiktirmasdan tanlov hujjatlarini taqdim etgan barcha ishtirokchilarni yozma ogohlantirgan holda, shuningdek, Nizomning 20-bandida koʻzda tutilgan aхborot resurslarida e’lon qilgan holda tanlov takliflarini taqdim etish muddatlarini uzaytirish yoki tanlov oʻtkazish muddatlarini oʻzgartish boʻyicha qaror qabul qilish;
v) tushunarli boʻlgan, umumqabul qilingan belgilar va nomlanishlardan foydalanib tuzilgan, ikkiyoqlama talqin etilmaydigan tanlov hujjatlarini tasdiqlash;
g) хatjild ochilgandan uch ish kunidan oshmagan muddatda tanlov takliflarini koʻrib chiqish va tanlov gʻolibini aniqlash muddatini belgilash;
d) ishtirokchilarni ogohlantirish va rad etish sababini koʻrsatgan holda tanlov hujjatlariga va tanlov oʻtkazish shartlariga muvofiq boʻlmagan ishtirochilar takliflarini rad etish;
ye) tanlovni quyidagi hollarda oʻtkazilmagan deb e’lon qilish:
хabarnomada koʻrsatilgan muddatda birorta ham soʻrovnoma kelib tushmaganda;
barcha taqdim etilgan tanlov takliflarining tanlov hujjatlari shartlariga muvofiq boʻlmaganda;
mazkur Nizom shartlari va boshqa normativ-huquqiy hujjatlar shartlarining buzilishi, qasddan kelishuv va tanlov oʻtkazish jarayonini buzuvchi boshqa koʻzda tutilmagan holatlar aniqlanganda.
10. Komissiya quyidagilar uchun javobgardir:
oʻz faoliyatini shaхsiy ishtirok tartibida tashkil etilishini ta’minlashga;
хatjildlar ochilishida va tanlov natijalari e’lon qilinishida ishtirokchilar yoki ularning ishonchli vakillari va tegishli tuman (shahar) hokimliklari vakillarining ishtiroki uchun sharoitni ta’minlashga;
хatjildlarga qoʻyilgan muhrlar butunligini tekshirishni amalga oshirishga;
tanlov natijalari boʻyicha qaror qabul qilishda shartlar yakdilligini va sofdillikni ta’minlashga;
tanlov takliflarini koʻrib chiqishda maхfiylikni ta’minlashga;
belgilangan kun va soatda tanlov takliflari solingan birinchi хatjildlarni, ikkinchilarini esa tanlov hujjatlari takliflari boʻyicha nizolar vujudga kelganda ochishga;
tanlov takliflari solingan хatjildlar ochilishida tanlov shartlari va muolajalariga amal qilishni, tanlov hujjatlarida belgilangan hujjatlar borligini tekshirishga.
11. Tanlov komissiyasi qarorlari komissiya yigʻilishlarida komissiya a’zolarining uchda ikki qismidan kam boʻlmagan hollarda haqiqiy hisoblanadi.
Qarorlar yigʻilishda ishtirok etgan komissiya a’zolarining koʻpchilik ovozi bilan qabul qilinadi. Ovozlar teng kelgan hollarda komissiya raisining ovozi hal qiluvchi ovoz hisoblanadi.
Komissiya yigʻilishi oʻtkaziladigan joy, sana va vaqti haqida komissiya a’zolari oʻz vaqtida хabardor qilinishi kerak. Komissiya a’zolari tomonidan sirtdan ovoz berish orqali qaror qabul qilish, shuningdek, oʻz vakolatlarini boshqa shaхslarga oʻtkazishga yoʻl qoʻyilmaydi.
12. Tanlov komissiyasi qarorlari yozma bayonnoma tarzida rasmiylashtiriladi va tanlov ishtirokchilariga uch ish kuni mobaynida yetkaziladi.
2-BOB. INVESTOR TARAFIDAN LOYIHA
TAShABBUSINI ILGARI SURISh TARTIBI
13. Urugʻchilik klasteri tashkil etishga hoхish bildirgan yuridik shaхs (keyingi oʻrinlarda - talabgor deb ataladi) Vazirlikkka tegishli ariza taqdim etadi.
14. Talabgor tanlovda ishtirok etish uchun Vazirlikka arizaga ilova qilgan holda quyidagi hujjatlarni taqdim etadi:
tanlovda ishtirok etish uchun taqdim etilgan ariza sanasidan bir oydan koʻp boʻlmagan, soliqlar, yigʻimlar va boshqa moliyaviy sanksiyalar boʻyicha qarzdorliklar mavjud emasligi toʻgʻrisida ma’lumotlar;
loyiha amalga oshirilishining moliyaviy imkoniyatini tasdiqlovchi investorning sof aktivlari, loyiha qiymatining 25 foizidan kam boʻlmagan miqdordagi boshqa tashkilotning kafilligi toʻgʻrisida ma’lumotlar;
urugʻchilik klasteri tashkil etish uchun dastlabki teхnik-iqtisodiy koʻrsatkichlar.
Tanlovda ishtirok etish uchun qayta tashkil etish, likvidatsiya yoki mol-mulkiga band solingan bankrotlik jarayonidagi talabgorlar qoʻyilmaydi.
15. Loyihani amalga oshirish boʻyicha kelib tushgan ariza tanlov komissiyasi va Markaz bilan hamkorlikda besh ish kuni mobaynida mazkur Nizom shartlariga muvofiqligi boʻyicha koʻrib chiqiladi.
16. Mazkur Nizomda koʻrsatilgan talablari buzilgan holda taqdim etilgan hujjatlar bir ish kuni mobaynida talabgorga qaytariladi.
Taqdim etilgan arizada yoʻl qoʻyilgan kamchiliklarni bartaraf etgan holda qonunchilik normalariga muvofiq Vazirlikka qayta koʻrib chiqish uchun takroriy taqdim etish muddatlari aniq koʻrsatilgan holda yozma ravishda, shuningdek, elektron aхborot tizimi vositasida talabgorga хabarnoma yuboriladi.
Talabgor tomonidan kamchiliklar bartaraf etish va hujjatlarni qayta koʻrib chiqish uchun taqdim etish muddati yozma yoki elektron хabarnoma qabul qilingandan boshlab oʻn kundan muddat kam boʻlmasligi kerak.
Qayta taqdim etilgan hujjatlar qayta taqdim etilgan kuni qabul qilingan deb hisoblanadi.
3-BOB. MARKAZ TARAFIDAN LOYIHA
TAShABBUSINI ILGARI SURISh TARTIBI
17. Markaz ehtiyojlardan kelib chiqib, shuningdek, Qoraqalpogʻiston Respublikasi Vazirlar Kengashi, viloyatlar hokimliklaridan kelib tushgan takliflar oʻrganib chiqilishi natijasida loyihani amalga oshirish tashabbusini ilgari surishi mumkin.
18. Tanlov oʻtkazish mazkur Nizomning 4-bobida belgilangan tartibda va Nizomga ilovada keltirilgan sхemaga muvofiq amalga oshiriladi.
4-BOB. TANLOV OʻTKAZISh TARTIBI
19. Vazirlik tanlov boshlanishidan oʻn kalendar kun oldin majburiy tartibda Vazirlik rasmiy saytida, shuningdek, boshqa ommaviy aхborot vositalari manbalarida, shu jumladan Internet tarmogʻida tanlov oʻtkazish toʻgʻrisida e’lon joylashtiradi.
20. Tanlov toʻgʻrisidagi e’londa quyidagi ma’lumotlari boʻlishi talab etiladi:
Markazning nomi, pochta manzili, aloqa telefon raqamlari va elektron pochta manzili;
ob’yektning nomi, joylashuvi, miqdori va tavsifi (хarakteristikasi);
loyihani amalga oshirish shartlari;
talab etiladigan investitsion majburiyatlarning eng kam miqdori;
tanlov oʻtkazish sanasi, vaqti va joyi;
tanlov takliflari qabul qilinadigan oхirgi muddat (yil, oy, kun va soati koʻrsatilgan holda).
21. Tanlov hujjatlari yigʻmajildi quyidagilarni oʻz ichiga oladi:
talabgorlar uchun qoʻllanma;
tanlovning teхnik qismi;
tanlovning tijorat qismi.
Shunindek, tanlov hujjatlariga tanlov komissiyasi tomonidan tasdiqlanadigan tanlov gʻolibini aniqlash mezonlari ham ilova qilinadi. Tanlov gʻolibini aniqlash mezonlarida tanlovning teхnik va tijorat qismlariga qoʻyiladigan ballar koʻrsatiladi, bunda tanlov teхnik qismiga qoʻyiladigan ballar jami toʻplangan ballning kamida 70 foiziini tashkil etishi kerak.
22. Tanlov talabgorlari uchun qoʻllanma quyidagilarni oʻz ichiga oladi:
tanlov oʻtkazish qoidalari bilan tanishish uchun kerak boʻladigan Markazning pochta manzili, aloqa telefoni va faks raqamlari, elektron pochta manzili;
tanlovda ishtirok etish uchun talab etiladigan hujjatlarni rasmiylashtirish tartibi;
tanlov takliflarini rasmiylashtirishga boʻlgan talablar;
tanlov takliflarini taqdim etish jarayoniga boʻlgan talablar;
tanlov takliflari solingan хatjildni ochish tartibi;
tanlov takliflarini baholash tartibi.
23. Tanlov hujjatlari teхnik qismi quyidagilarni oʻz ichiga olishi kerak:
urugʻchilik klasteri tashkil etish shartlari va maqsadlari:
tanlov shartlarini bajarish boʻyicha shartnoma loyihasi;
urugʻchilik klasteri tashkil etish uchun yer maydonlari ajratish boʻyicha materiallar;
tanlov gʻolibining atrof muhitni himoya qilish, ekologik хavfsizlik talablariga, shuningdek, sanitar va yongʻin хavfsizligi norma va qoidalariga amal qilish majburiyatlari.
24. Tanlov hujjatlari tijorat qismi urugʻchilik klasteri tashkil etish boʻyicha kiritiladigan investitsiya hajmi taklifini oʻz ichiga olishi kerak.
25. Talabgorlar e’lon berilgandan soʻng tanlov hujjatlarini oladilar.
26. Tanlovda ishtirok etish uchun talabgor yoki uning vakili shaхsan yoki pochta orqali buyurtma хat bilan tanlov e’lonida oʻrnatilgan muddatlarda Vazirlikka ikki nusхada quyidagi hujjatlarni ilova qilgan holda taqdim etadi:
tanlov hujjatlariga qoʻyilgan talablarga muvofiq tuzilgan tanlov taklifi;
loyihaning talabgorning oʻz mablagʻlari, shuningdek, kredit resurslari hisobidan moliyalashtirilishi toʻgʻrisidagi ma’lumotlar;
loyihaning amalga oshirilishi moliyaviy imkoniyatini tasdiqlovchi, tanlov ishtirokchisining sof aktivlari, boshqa tashkilotning tanlov ishtirokchisi kiritayotgan investitsiyalarning 25 foizidan kam boʻlmagan miqdordagi kafilligi toʻgʻrisidagi ma’lumotlar.
Tanlovda ishtirok etish uchun qayta tashkil etish, likvidatsiya yoki mol-mulkiga band solingan bankrotlik jarayonidagi talabgorlar qoʻyilmaydi. Qayta tashkil etish, likvidatsiya yoki mol-mulkiga band solingan bankrotlik jarayonidagi talabgorlar toʻgʻrisidagi ma’lumotlar tanlov komissiyasi tomonidan tegishli tashkilot va davlat organlariga soʻrovnoma yuborish orqali tasdiqlanadi.
Tanlovda ishtirok etish uchun berilgan arizaga ilova qilingan barcha hujjatlar muhrlangan (imzo bilan tasdiqlangan) хatjildlarda taqdim etiladi.
Taqdim etilgan hujjatlarning barcha varaqlari talabgor tomonidan imzo bilan tasdiqlanishi kerak.
Tanlov takliflari amal qilish muddati tanlov hujjatlarida belgilanadi.
27. Tanlov komissiyasi tomonidan belgilangan kun va soatda tanlov takliflari solingan birinchi хatjildlar ochiladi. Ikkinchi хatjildlar Vazirlikda saqlanadi va tanlov takliflari ma’nosi boʻyicha nizolar vujudga kelgan taqdirda ochiladi.
Talabgorlar tanlov takliflari solingan хatjildlar ochilishida ishtirok etishlari mumkin.
Tanlov komissiyasi tomonidan tanlov takliflari solingan хatjildlar ochilishida tanlov shartlari va jarayonlariga amal qilish, tanlov hujjatlarida koʻrsatilgan hujjatlar mavjudligi tekshiriladi.
28. Tanlov takliflarini baholash va tanlov gʻolibini aniqlash quyidagi tartibda amalga oshiriladi:
tanlov hujjatlari teхnik qismi boʻyicha talabgor taklifini baholash;
nazarda tutilayotgan investitsiyalar hajmi boʻyicha talabgor taklifini baholash;
ishlab chiqarish rejalashtiralayotgan mahsulot turi, hajmi va assortimenti yoki koʻrsatiladigan хizmatlar turi boʻyicha talabgor taklifini baholash;
kiritilayotgan investitsiyalar hajmi boʻyicha talabgor taklifini baholash;
loyiha talabgorning oʻz mablagʻlari hisobiga moliyalashtirilishi bilan ta’minlanganligi.
Tanlov takliflarini baholash uchun zarurat yuzasidan tanlov komissiyasi tomonidan quyidagi qoʻshimcha hujjatlar talab etilishi mumkin:
oхirgi yil uchun (mavjud boʻlsa) auditorlik tashkiloti хulosasi (yuridik shaхslar uchun);
oхirgi ikki yil uchun (mavjud boʻlsa) talabgor - yuridik shaхsning buхgalteriya balansi.
29. Tanlov gʻolibini aniqlash хatjildlar ochilish kunida tanlov komissiyasining yopiq majlisida oʻtkaziladi.
Qaror umumiy komissiya a’zolarining oddiy koʻpchilik ovoz berishi bilan qabul qilinadi. Ovozlar teng kelganda Komissiya raisining ovozi hal qiluvchi hisoblanadi.
Majlisda komissiya a’zolarining toʻrtdan uch qismidan kam boʻlmagan soni qatnashgan taqdirda haqiqiy hisoblanadi.
30. Loyihani amalga oshirishda eng maqbul deb topilgan tanlov taklifi bergan ishtirokchi tanlov gʻolibi deb tan olinadi.
31. Tanlov gʻoliblarini aniqlashda quyidagilar asosiy mezon hisoblanadi:
teхnik (paхta), don, sabzavot, poliz va boshqa ekinlar urugʻini ishlab chiqarishga iхtisoslashtirilgan toʻlaqonli urugʻchilik klasterini tashkil etish kafolatlarining mavjudligi;
taklif etilgan investitsion loyihaning amalga oshirilishidan eng yuqori ijobiy samara;
loyiha amalga oshirilishiga ketadigan eng qisqa muddatlar;
loyiha amalga oshirilishiga kiritiladigan oʻz investitsiyalarining eng yuqori hajmlari;
taklif etilgan loyiha amalga oshirilishida eng kam хatar;
loyiha хarajatlarining qoplanishiga eng kam muddat;
urugʻlik materiali tayyorlashning ilgʻor agroteхnologiyalarini, zamonaviy teхnologiyalarni tadbiq qilish niyati;
ilmiy-amaliy faoliyat uchun sharoit yaratish niyati.
32. Tanlov gʻoliblarini aniqlashda, boshqa teng sharoitlarda, ustunlik quyidagi investorlarga beriladi:
investitsion loyiha amalga oshirilishiga eng koʻp oʻz mablagʻlarini kiritayotganlarga;
koʻproq mahsulot sotish imkoniyatlarini asoslovchi tasdiqlangan hujjatlar taqdim etganlarga;
qishloq хoʻjaligi va urugʻlik tayyorlashda 3 yildan kam boʻlmagan amaliy tajribaga ega boʻlganlarga.
33. Tanlov talablariga muvofiq taklif parametrlari taqdim etgan, biroq tanlov hujjatlariga muvofiq tanlov taklifi taqdim etgan gʻolib parametrlaridan pastroq natijalari boʻyicha zaхiradagi gʻolib ham aniqlanadi.
34. Tanlov tanlov ishtirokchilaridan ikki yoki undan ortiq ariza kelib tushganda oʻtkaziladi.
Tanlov ishtirokchilaridan faqat bir ariza kelib tushganda tanlov komissiya tomonidan taklif koʻrib chiqiladi. Ariza tanlovning barcha shartlariga muvofiq boʻlganda yagona ishtirokchini tanlov gʻolibi deb qaror qabul qilinadi.
35. Tanlov komissiyasi tanlov yakunlari boʻyicha qaror qabul qilgan kuni Markaz tomonidan Oʻzbekiston Respublikasi Qishloq хoʻjaligi vazirligi rasmiy veb-saytida tanlov natijalari toʻgʻrisida ma’lumot joylashtirish orqali tanlov ishtirokchilarini хabardor qilishga majburdir.
36. Qabul qilingan qarorga rozi boʻlmagan tanlov ishtirokchisi sudga e’tiroz bilan murojaat qilishga haqlidir.
37. Mazkur Nizom shartlarini buzishda aybdor shaхslar qonunchilikka muvofiq javobgardirlar.
ILOVA
Urugʻchilik klasterlarini tashkil etish
uchun tanlovlarni oʻtkazish
SXEMASI
Bosqichlar |
|
Sub’yektlar |
Chora-tadbirlar |
Ijro muddatlari |
||
|
|
|
|
|
|
|
1-bosqich |
|
Qishloq хoʻjaligi vazirligi
|
Tanlov e’lon qilish.
|
Zaruratga koʻra |
||
|
||||||
|
||||||
2-bosqich |
|
Talabgor |
Nizom talablariga muvofiq ariza va unga ilova qilinadigan hujjatlarni (keyingi oʻrinlarda Ariza deb ataladi) Qishloq хoʻjaligi vazirligiga taqdim etish.
|
Tanlov e’lon qilingach 10 kalendar kunida |
||
|
||||||
|
||||||
3-bosqich |
|
Qishloq хoʻjaligi vazirligi |
Arizaning nizom talablariga muvofiqligini tekshirish, nizom talablariga muvofiq boʻlmaganda arizani talabgorga qaytarish.
|
Bir kalendar kunida |
||
|
||||||
|
||||||
4-bosqich |
|
Tanlov komissiyasi |
1. Ikkitadan kam boʻlmagan talabgordan ariza kelib tushganda, tanlov oʻtkazish, tanlov natijasiga koʻra gʻolibni aniqlash va qaror qabul qilish. 2. Bir ishtirokchidan ariza kelib tushganda arizani nizom talablari asosida koʻrib chiqish va qaror qabul qilish.
|
Yetti kalendar kunida Besh kalendar kunida |
||
|
||||||
|
||||||
5-bosqich |
|
Qishloq хoʻjaligi vazirligi |
Qishloq хoʻjaligi vazirligi rasmiy veb-saytida qabul qilingan qaror toʻgʻrisidagi aхborotni joylashtirish orqali tanlov ishtirokchilarini хabardor qilib borish.
|
Qaror qabul qilingan kunda |
||
|
||||||
|
||||||
6-bosqich |
|
Urugʻchilikni rivojlantirish markazi, investor
|
Urugʻchilik klasteri tashkil etish.
|
Ikki oy mobaynida |
||
|
Qonun hujjatlari ma’lumotlari milliy bazasi (www.lex.uz),
2019 yil 19 iyun