Oʻzbekiston Respublikasi Vazirlar Mahkamasining 30.09.2019 y. 832-son "Oʻzbekiston Respublikasi Davlat byudjeti mablagʻlari hisobidan qoplanadigan tibbiy yordamning kafolatlangan hajmlari roʻyхatini shakllantirish tartibi toʻgʻrisidagi nizomni tasdiqlash haqida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
30.09.2019 y.
N 832
OʻZBEKISTON RESPUBLIKASI
DAVLAT BYuDJETI MABLAGʻLARI
HISOBIDAN QOPLANADIGAN TIBBIY
YoRDAMNING KAFOLATLANGAN HAJMLARI
ROʻYXATINI ShAKLLANTIRISh TARTIBI
TOʻGʻRISIDAGI NIZOMNI
TASDIQLASh HAQIDA
Oʻzbekiston Respublikasi Prezidentining "Oʻzbekiston Respublikasi sogʻliqni saqlash tizimini tubdan takomillashtirish boʻyicha kompleks chora-tadbirlar toʻgʻrisida" 2018 yil 7 dekabrdagi PF-5590-son Farmoni ijrosini ta’minlash maqsadida Vazirlar Mahkamasi QAROR QILADI:
1. Oʻzbekiston Respublikasi Davlat byudjeti mablagʻlari hisobidan qoplanadigan tibbiy yordamning kafolatlangan hajmlari roʻyхatini shakllantirish tartibi toʻgʻrisidagi nizom ilovaga muvofiq tasdiqlansin.
2. Belgilansinki, Oʻzbekiston Respublikasi Sogʻliqni saqlash vazirligi Oʻzbekiston Respublikasi Moliya vazirligi hamda Iqtisodiyot va sanoat vazirligi bilan kelishilgan holda, Oʻzbekiston Respublikasi Davlat byudjeti mablagʻlari hisobidan qoplanadigan tibbiy yordamning kafolatlangan hajmlari roʻyхatini (keyingi oʻrinlarda Roʻyхat deb ataladi) shakllantiruvchi vakolatli organ hisoblanadi.
Roʻyхatga muvofiq tibbiy yordamning kafolatlangan hajmlari Oʻzbekiston Respublikasi Davlat byudjetining tegishli moliya yili uchun "Sogʻliqni saqlash" moddasi boʻyicha ajratiladigan mablagʻlari doirasida moliyalashtirilishi belgilab qoʻyilsin.
3. Oʻzbekiston Respublikasi Sogʻliqni saqlash vazirligi:
2019 yil 20 dekabrgacha boʻlgan muddatda Roʻyхatni ishlab chiqsin va Sogʻliqni saqlash vazirligining rasmiy veb-saytida 31 dekabrgacha joylashtirsin hamda ularni kelgusi yillarda ham shu muddatlarda har yili yangilab borsin;
respublikaning barcha davlat tibbiyot muassasalarida Roʻyхatdan tegishli koʻchirmalar (davlat tilida va rus tilida) mazkur muassasalar faoliyati iхtisosligiga muvofiq har yili 31 dekabrgacha majburiy joylashtirilishini ta’minlasin;
manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduхakimov va Oʻzbekiston Respublikasi sogʻliqni saqlash vaziri A.K. Shadmanov zimmasiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2019 yil 30 sentyabr
"Oʻzbekiston Respublikasi qonun hujjatlari toʻplami",
2019 yil 7 oktyabr, 40-son, 747-modda