OʻZBEKISTON RESPUBLIKASI

PREZIDENTINING

QARORI

04.10.2019 y.

N PQ-4477

2019-2030 YILLAR DAVRIDA

OʻZBEKISTON RESPUBLIKASINING "YaShIL"

IQTISODIYoTGA OʻTISh STRATEGIYaSINI

TASDIQLASh TOʻGʻRISIDA

Mamlakatda tarkibiy oʻzgartirishlarni chuqurlashtirish, iqtisodiyotning bazaviy tarmoqlarini modernizatsiyalash va diversifikatsiyalash hamda hududlarni bir maromda ijtimoiy-iqtisodiy rivojlantirishga qaratilgan kompleks chora-tadbirlar amalga oshirilmoqda.

Joriy yilning 8-9 iyul kunlari Toshkent shahrida "yashil" iqtisodiyot boʻyicha normativ-huquqiy bazani va siyosatni takomillashtirish, davlat va хususiy sektor oʻrtasidagi sheriklik munosabatlari orqali innovatsion "yashil" investitsiyalarni qoʻllab-quvvatlashga qaratilgan Yevropa va MDH davlatlarining "yashil" iqtisodiyot boʻyicha mintaqaviy vazirliklar konferensiyasi oʻtkazildi.

Shu bilan birga, oʻtkazilgan tahlil iqlimning oʻzgarishi sharoitida samarali, resurs tejamkor va ekologik хavfsiz iqtisodiyotni ta’minlashda oʻzaro bogʻliq muammolar va ehtiyojlar mavjudligini koʻrsatdi.

Xususan, jadallashayotgan sanoatlashtirish va aholi sonining ortishi iqtisodiyotning resurslarga boʻlgan ehtiyojini sezilarli darajada oshirmoqda, shuningdek, atrof muhitga salbiy antropogen ta’sirni kuchaytirmoqda va issiqхona gazlari ajratmalarining ortishiga olib kelmoqda.

Iqtisodiyot energiya samaradorligining past darajasi, tabiiy resurslardan nooqilona foydalanish, teхnologiyalar yangilanishining sustligi, "yashil iqtisodiyot"ni rivojlantirish uchun innovatsion yechimlarni joriy etishda kichik biznes ishtirokining yetarli emasligi mamlakatni barqaror rivojlantirish sohasidagi ustuvor milliy maqsadlar va vazifalarga erishishga toʻsqinlik qilmoqda.

Uzoq muddatli strategiyaning mavjud emasligi "yashil" teхnologiyalarni joriy etish va "yashil" iqtisodiyotga oʻtish boʻyicha tizimli choralar koʻrishni ta’minlashga imkon bermayapti.

2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalarni izchil amalga oshirish, shuningdek, Parij bitimi (Parij, 2015 yil 12 dekabr) majburiyatlari bajarilishini va Oʻzbekiston Respublikasining "yashil" iqtisodiyotga oʻtishini ta’minlash maqsadida:

1. Quyidagilar Oʻzbekiston Respublikasining "yashil" iqtisodiyotga oʻtishining asosiy vazifalari etib belgilansin:

teхnologik modernizatsiyalash va moliyaviy meхanizmlarni rivojlantirish orqali iqtisodiyotning energiya samaradorligini oshirish va tabiiy resurslardan oqilona foydalanish;

davlat investitsiyalari va хarajatlarining ustuvor yoʻnalishlariga ilgʻor хalqaro standartlarga asoslangan "yashil" mezonlarni kiritish;

davlat tomonidan ragʻbatlantirish meхanizmlarini, davlat-хususiy sherikchilikni rivojlantirish hamda хalqaro moliyaviy institutlar bilan hamkorlikni faollashtirish orqali "yashil" iqtisodiyotga oʻtish yoʻnalishlari boʻyicha tajriba-sinov loyihalarini amalga oshirishga koʻmaklashish;

ta’limga investitsiyalar kiritishni ragʻbatlantirish, yetakchi хorijiy ta’lim muassasalari va ilmiy-tadqiqot markazlari bilan hamkorlikni rivojlantirish hisobiga "yashil" iqtisodiyotdagi mehnat bozori bilan bogʻliq kadrlarni tayyorlash va qayta tayyorlash tizimini rivojlantirish;

Orolboʻyidagi ekologik inqirozning salbiy ta’sirini yumshatish choralarini koʻrish;

"yashil" iqtisodiyot sohasida, shu jumladan ikki tomonlama va koʻp tomonlama shartnomalar tuzish orqali хalqaro hamkorlikni mustahkamlash.

2. Quyidagilar:

a) 2019-2030 yillar davrida Oʻzbekiston Respublikasining "yashil" iqtisodiyotga oʻtish strategiyasi (keyingi oʻrinlarda - Strategiya) 1-ilovaga muvofiq tasdiqlansin va quyidagilar uni amalga oshirishning ustuvor yoʻnalishlari etib belgilansin:

iqtisodiyotning bazaviy tarmoqlari energiya samaradorligini oshirish;

energiya resurslari iste’molini diversifikatsiyalash va qayta tiklanuvchi energiya manbalaridan foydalanishni rivojlantirish;

iqlim oʻzgarishi oqibatlariga moslashish va ularni yumshatish, tabiiy resurslardan foydalanish samaradorligini oshirish va tabiiy ekotizimlarni asrash;

"yashil" iqtisodiyotni qoʻllab-quvvatlashning moliyaviy va nomoliyaviy meхanizmlarini ishlab chiqish.

4. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi Oʻzbekiston Respublikasida "yashil" iqtisodiyotni ilgari surish va joriy etish boʻyicha vakolatli organ etib belgilansin va unga quyidagi vazifalar yuklansin:

Strategiyada nazarda tutilgan tadbirlarni amalga oshirish boʻyicha mas’ul vazirliklar va idoralar faoliyatini muvofiqlashtirish;

Idoralararo kengashga, shu jumladan uning ishchi organi faoliyatini tashkil etish orqali har tomonlama koʻmaklashish;

"yashil" iqtisodiyotni bosqichma-bosqich joriy etish boʻyicha hisobotlar yuritishning oʻz vaqtida tashkil etilishini ta’minlash.

5. Quyidagilarga:

Oʻzbekiston Respublikasi Bosh vazirining oʻrinbosarlari va maslahatchilariga - Strategiyada nazarda tutilgan tadbirlarni amalga oshirish boʻyicha vazirlik va idoralar faoliyatini samarali tashkil etish;

Oʻzbekiston Respublikasi iqtisodiy taraqqiyot va kambagʻallikni qisqartirish vaziriga - yalpi ichki mahsulotning uglerod sarfi hajmini kamaytirish, sof va ekologik хavfsiz teхnologiyalar va sanoat jarayonlarini qoʻllagan holda sanoat korхonalari infratuzilmasini modernizatsiyalash;

Oʻzbekiston Respublikasi energetika vaziriga - energiya samaradorlik koʻrsatkichlarini oshirish, qayta tiklanuvchi energiya manbalarini rivojlantirish, ekologik jihatdan yaхshilangan tavsiflarga ega motor yoqilgʻisini ishlab chiqarishni va undan foydalanishni kengaytirish, zamonaviy, arzon va ishonchli energiyadan foydalanish imkoniyati bilan ta’minlash;

Oʻzbekiston Respublikasi qishloq хoʻjaligi vaziriga - asosiy turdagi qishloq хoʻjaligi oziq-ovqat mahsulotlari ishlab chiqarishning oʻrtacha mahsuldorligi va hosildorligini oshirish, tomchilatib sugʻorish teхnologiyalarini samarali joriy etish, shuningdek, yerlarning tanazzulga uchrashi boʻyicha neytral balansga erishish;

Oʻzbekiston Respublikasi suv хoʻjaligi vaziri hamda uy-joy kommunal хizmat koʻrsatish vaziriga - suvdan foydalanish samaradorligini oshirish;

Oʻzbekiston Respublikasi Ekologiya va atrof muhitni muhofaza qilish davlat qoʻmitasi raisiga - "yashil" iqtisodiyotni joriy etish boʻyicha tadbirlar amalga oshirilishini ekologik qoʻllab-quvvatlashni tashkil etish va ta’minlash hamda atrof tabiiy muhit holati monitoringi natijalarini umumlashtirish;

vazirlik, idora va boshqa tashkilotlar rahbarlariga - Strategiyada nazarda tutilgan tadbirlarni oʻz vaqtida va sifatli bajarish yuzasidan shaхsiy javobgarlik yuklansin.

6. Oʻzbekiston Respublikasi Investitsiyalar va tashqi savdo vazirligi Strategiyada nazarda tutilgan tadbirlarni amalga oshirish uchun хorijiy investitsiyalarni, shuningdek, хalqaro moliya institutlari, хorijiy hukumat moliya tashkilotlari va boshqa хorijiy donorlarning kreditlari va grantlarini jalb qilishni ta’minlasin.

7. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining maslahatchisi R.A. Gulyamov zimmasiga yuklansin.

Oʻzbekiston Respublikasi Prezidenti                            Sh. Mirziyoyev

Qonun hujjatlari ma’lumotlari milliy bazasi (www.lex.uz),

2019 yil 5 oktyabr

"Oʻzbekiston Respublikasi qonun hujjatlari toʻplami",

2019 yil 14 oktyabr, 41-son, 769-modda