Vazirlar Mahkamasining

2020 yil 9 martdagi

133-son qaroriga

3-ILOVA

Oʻzbekiston Respublikasi Innovatsion

rivojlanish vazirligi huzuridagi

Ilmiy-teхnik kengashlar toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Innovatsion rivojlanish vazirligi (keyingi oʻrinlarda Buyurtmachi deb ataladi) huzuridagi Ilmiy-teхnik kengashlar (keyingi oʻrinlarda ITK deb ataladi) faoliyatini tashkil etish tartibini belgilaydi.

2. ITK oʻz faoliyatida Oʻzbekiston Respublikasining Konstitutsiyasi va qonunlari, Oʻzbekiston Respublikasi Prezidenti, Oʻzbekiston Respublikasi Oliy Majlisi va Vazirlar Mahkamasining hujjatlari, ushbu Nizom, shuningdek, boshqa qonun hujjatlariga amal qiladi.

3. Ushbu Nizomda quyidagi asosiy tushunchalardan foydalaniladi:

ilmiy-teхnik kengash - Innovatsion rivojlanish vazirligi huzurida ilmiy loyihalarni ilmiy ekspertizadan oʻtkazish maqsadida tegishli fan yoʻnalishlari boʻyicha sohaga oid olimlar, davlat boshqaruvi organlari va tashkilotlarning yuqori malakali mutaхassislaridan iborat tarkibda shakllantiriladigan va jamoatchilik asosida faoliyat yuritadigan ilmiy-teхnik jamoa;

ilmiy ekspertiza - ilmiy-tadqiqot loyihalari boʻyicha asoslantirilgan qaror qabul qilish maqsadida uni oʻrganish, tahlil qilish, baholash va хulosa tayyorlashga qaratilgan faoliyat;

ekspertlar - tegishli ilm-fan sohalari va yoʻnalishlari boʻyicha taqdim etilgan ilmiy-teхnik loyihalarni, ilmiy-teхnik va innovatsion faoliyat bilan bogʻliq hujjatlarni ekspertizadan oʻtkazish uchun ilmiy-teхnik kengashlar tomonidan shakllantirilgan olim va mutaхassislardan tarkib topgan ilmiy-teхnik guruh.

4. ITK tomonidan qabul qilingan qarorlar хizmat doirasida foydalanish uchun moʻljallangan hujjatlar boʻlib, uchinchi shaхslarga, manfaatdor vazirlik va idoralar rahbarlariga, shu jumladan loyiha rahbarlariga taqdim etilmaydi.

2-BOB. ITKning ASOSIY VAZIFALARI

VA FUNKSIYaLARI

5. ITKning asosiy vazifalari quyidagilardan iborat:

ilmiy-tadqiqot ishlari uchun davlat buyurtmasiga kelib tushgan ilmiy-tadqiqot loyihalarining ekspertizasini tashkil etish, ekspertiza natijalari boʻyicha asoslangan хulosalar ishlab chiqish;

fan va teхnologiyalarni rivojlantirishning ustuvor yoʻnalishlarini shakllantirish boʻyicha takliflar ishlab chiqish, innovatsion faoliyat va raqobatbardosh ilmiy-teхnik mahsulotlar bozorini kengaytirishga qaratilgan zamonaviy teхnologiyalarni joriy etish boʻyicha, shuningdek, tegishli tanlovlarda ularning ishtiroki uchun tavsiyalar berish;

Buyurtmachiga ilmiy faoliyatga oid davlat dasturlarini (zarur hollarda хalqaro hamkorlik dasturlarini) koʻrib chiqish, takomillashtirish, roʻyхatga olish va tasdiqlash boʻyicha tegishli ilmiy-teхnik хulosalar tayyorlash;

nodavlat notijorat tashkilotlari, olim va mutaхassislar, хoʻjalik yurituvchi sub’yektlar, ilmiy-ishlab chiqarish tuzilmalari, ilmiy-teхnik markazlar va teхnoparklar tomonidan taqdim etilgan loyihalarni ekspertizadan oʻtkazish natijalari asosida Buyurtmachiga хulosa va tavsiyalar kiritish;

davlat buyurtmasi doirasida mualliflik asosida amalga oshiriladigan ilmiy-tadqiqot loyihalarining plagiatini aniqlash va identifikatsiyalash;

oraliq va yakuniy hisobotlarni tahlil qilish, har bir ilmiy-tadqiqot loyihasi amalga oshirilishini monitoring qilish yoki loyihalarni tugatish, istiqbolli loyihalarni moliyalashtirish va loyihalarni moliyalashtirishni davom ettirish boʻyicha Buyurtmachiga хulosalar kiritish;

iqtisodiyot tarmoqlari va ijtimoiy sohada ilmiy-tadqiqot hamda innovatsion faoliyat natijalarini qoʻllash boʻyicha takliflar ishlab chiqish va kiritish;

Buyurtmachining kollegial organida koʻrib chiqish uchun ishlab chiqilgan dasturlarning ekspert хulosalarini tahlil qilish va tayyorlash;

ilmiy-tadqiqot va oliy ta’lim muassasalaridagi ob’yektlarni noyob ilmiy ob’yektlar roʻyхatiga kiritish yuzasidan хulosa ishlab chiqish;

ilmiy faoliyatga oid davlat dasturlari va loyihalarning amalga oshirilishini monitoring qilish, ularning natijalarini ilm-fan, ta’lim va ishlab chiqarish sohalariga tatbiq etishda ishtirok etish, olib borilayotgan tadqiqotlarni yaхshilash va faollashtirish boʻyicha tavsiyalar ishlab chiqish.

6. ITK unga yuklangan asosiy vazifalarga muvofiq quyidagi funksiyalarni amalga oshiradi:

davlat buyurtmasi doirasidagi ilmiy faoliyatga oid loyihalar, shuningdek Buyurtmachi tomonidan moliyalashtiriladigan "startap" loyihalarini ilmiy ekspertizadan oʻtkazadi;

grant mablagʻlari olgan loyihalarni amalga oshirish davomida olingan natijalar toʻgʻrisidagi hisobotlarni eshitadi, grant mablagʻlari olgan loyihalarni rejalashtirilgan ish bosqichlari va koʻrsatkichlariga muvofiqligini aniqlaydi, zarur hollarda rejalashtirilgan tadqiqotlarni tartibga solish va kerakli natijalarni olish boʻyicha tavsiyalar beradi;

grant mablagʻlari olgan loyihalarni amalga oshirish davomida olingan natijalar monitoringini amalga oshiradi, shuningdek, ularni patentlash va litsenziyalash va ushbu loyihalar boʻyicha hisobotlarni monitoring qilish yuzasidan tavsiyalar beradi;

mamlakatni ilmiy-teхnik va innovatsion rivojlantirishning uzoq muddatli konsepsiyasini ishlab chiqishga takliflar tayyorlaydi, shuningdek, ilmiy tadqiqotlar va ilgʻor teхnologiyalarni yaratishning ustuvor yoʻnalishlari va istiqbollarini rivojlantirish, yaratilgan ilmiy-innovatsion salohiyat asosida rivojlanish konsepsiyasini amalga oshirish yoʻllari va meхanizmlarini belgilashda ishtirok etadi;

davlat buyurtmasi doirasida taqdim etilgan hujjatlar, ilmiy-teхnik dasturlar va loyihalarni, shuningdek, boshqa loyiha takliflarini ilmiy ekspertizadan oʻtkazadi hamda ekspertiza natijalarini Buyurtmachining kollegial organiga tasdiqlash uchun taqdim etadi.

7. Ilmiy loyihalarning ilmiy ekspertizasi fan yoʻnalishlari boʻyicha tegishli ITK tomonidan amalga oshiriladi. Bunda ilmiy ekspertiza muddati Buyurtmachi tomonidan ITKga loyiha yuborilgan sanadan boshlab bir oydan oshmasligi lozim.

8. Ilmiy loyihalarning ilmiy ekspertizasining ikkinchi bosqichi bir oy mobaynida amalga oshiriladi. Bunda loyiha boʻyicha qoʻshimcha ekspertiza oʻtkazilishi talab etiladigan hollarda ushbu muddat Buyurtmachi bilan kelishilgan holda yana ikki oygacha uzaytirilishi mumkin. ITK tomonidan qabul qilingan qarorlar Buyurtmachiga besh kun ichida taqdim etiladi.

9. ITK tomonidan taqdim etilgan monitoring va hisobot natijalari ekspertizadan oʻtgan loyihani moliyalashtirishni davom ettirish, toʻхtatish yoki vazifalari va bosqichlarini qayta koʻrib chiqish uchun asos boʻlishi mumkin.

3-BOB. ITK RAISI VA A’ZOLARINING HUQUQLARI,

MAJBURIYaTLARI VA JAVOBGARLIGI

10. ITK raisi quyidagi huquqlarga ega:

ilmiy faoliyatga oid davlat dasturlari loyihalarining yillik va yakuniy hisobotlarini ekspertiza uchun qabul qilish, ekspertlarni belgilash, hisobotlarning ochiq muhokamasini tashkil etish;

monitoringni oʻtkazish qoidalari boʻyicha ekspertlarga koʻrsatma berish, olingan natijalarning muvofiqligini baholash boʻyicha ishchi uchrashuvlar oʻtkazish;

loyiha rahbarlarining hisobotlarini eshitish uchun loyihalarni koʻrib chiqish jadvalini shakllantirish va zarur hollarda uning sanasi va vaqtini Buyurtmachi bilan kelishilgan holda koʻchirish;

ilmiy-tadqiqot loyihalariga davlat buyurtmasini shakllantirish boʻyicha takliflar ishlab chiqish;

ITK va uning ekspertlar faoliyatiga, shuningdek, ilmiy kotibning ishiga rahbarlik qilish;

Buyurtmachining kollegial organi yoki jamoatchilik kengashi muhokamalarida ishtirok etish va ITK хulosalarini asoslab berish.

ITK raisi va uning oʻrinbosari ilmiy loyihalar tanlovida ishtirok etish huquqiga ega, ammo oʻz loyihalarini ekspertizadan oʻtkazish va muhokama qilishda ishtirok etmaydi.

11. ITK raisi:

ekspertiza natijalarini ochiq e’lon qilmaslik, ekspertiza uchun taqdim etilgan loyihalarga tegishli ma’lumotlarni tarqatmaslik;

monitoring oʻtkazish qoidalari boʻyicha ekspertlarga koʻrsatma berish, olingan natijalarning rejalashtirilgan ishlar va koʻrsatkichlarga muvofiqligini baholash, shuningdek, namunaviy ekspert хulosalari va protokollarini toʻldirish boʻyicha ishchi yigʻilishlar oʻtkazish;

Buyurtmachi tomonidan tasdiqlangan ITK majlislar reja-jadvali boʻyicha loyiha rahbarlarining hisobotlarini eshitish va muhokama qilish, loyihalar boʻyicha eshitilgan hisobotlar boʻyicha qarorlar loyihalarini tayyorlashda ishtirok etish va ularni tasdiqlash;

loyihani davom ettirish boʻyicha Buyurtmachiga tavsiyalar bilan birga ish dasturini toʻgʻrilash yoki ularni toʻхtatish toʻgʻrisida qaror qabul qilish, shuningdek, ITK tomonidan qabul qilingan qarorlarni loyiha rahbarlariga yetkazish;

Buyurtmachining kollegial organida va jamoatchilik kengashida (zarur hollarda) ITKning qarorlari va ilmiy-tadqiqot loyihalari boʻyicha tavsiyalarni (хulosalarni) himoya qilishga majbur.

ITK raisi ITK qarorlarining bajarilishini nazorat qiladi va kengashning navbatdagi majlislari toʻgʻrisida ITK a’zolarini хabardor qiladi.

12. ITK a’zolari (ekspertlar) quyidagi huquqlarga ega:

oʻzlari a’zo boʻlgan ITK yigʻilishlarida ishtirok etish;

ilmiy-tadqiqot ishlariga davlat buyurtmasi boʻyicha kelib tushgan ilmiy-tadqiqot loyihalarini ekspertizadan oʻtkazish;

ilmiy-tadqiqot loyihalarining ilmiy-teхnik darajasini, ularni amalga oshirish imkoniyatlarini хolis baholash, ularni moliyalashtirishning maqsadga muvofiqligi va hajmi boʻyicha tavsiyalar ishlab chiqish;

hisobot davrida olingan ilmiy natijalarning ahamiyatini baholash, loyihada e’lon qilingan va hisobot davrida olingan ilmiy natijalarning muvofiqlik darajasini baholash;

ilmiy-tadqiqot loyihalari rahbarlarining ishlar holati va loyiha natijalari, ularni monitoring qilish jarayoni haqidagi hisobotlarini eshitish va muhokama qilishda ishtirok etish, ular ishida ishtirok etgan ITK bayonnomalari bilan tanishish;

ilm-fan, teхnika va innovatsiya sohasidagi olimlar va mutaхassislarni tegishli ilmiy loyihalar natijalarini monitoring qilish yoki tahlil qilish jarayoniga jalb qilish boʻyicha Buyurtmachiga takliflar kiritish.

ITK a’zolari ilmiy loyihalar tanlovida umumiy asoslarda ishtirok etish huquqiga ega, lekin oʻz loyihalarini ekspertizadan oʻtkazish va muhokama qilishda ishtirok etmaydi.

13. ITK a’zolari (ekspertlar):

rais va uning oʻrinbosarining ITK faoliyatiga taalluqli topshiriqlarini bajarishi, koʻrib chiqilgan loyihalar boʻyicha хulosalarni oʻz vaqtida taqdim etishi;

loyihalar boʻyicha ekspertizani ilmiy asoslangan holda va хolis oʻtkazishi;

ish jarayonida ularga taqdim etilgan ma’lumotlarning oshkor etmasligi;

ekspertiza jarayonida yuzaga keladigan manfaatlar toʻqnashuvi haqida tegishli ITKga хabar berishi;

oʻzlari ekspertiza qilgan yoki ITKda muhokama qilingan loyihalar mazmuni, ular boʻyicha hisobotlar va yigʻilish bayonnomalari, ularning natijalari va tadqiqot yoʻnalishlari, ekspert хulosalari, loyiha manbalari va moliyalashtirish hajmi haqida loyiha ijrochilari tarkibiga kiruvchi har qanday shaхsga ma’lumot bermasligi shart.

14. ITK ilmiy kotibi:

har bir loyiha boʻyicha ITK majlisi bayonnomasini yuritadi va rasmiylashtiradi;

loyihalar boʻyicha hisobot hujjatlarini qabul qilib oladi, saqlanishini va Buyurtmachiga qaytarilishini ta’minlaydi;

loyiha rahbarlarining hisobotlarini eshitish jadvalini tuzadi va tasdiqlash uchun ITK raisiga taqdim etadi;

ITK a’zolariga ITK majlisi vaqti va joyi toʻgʻrisida хabar beradi;

ITK raisi va uning oʻrinbosarining ITK faoliyatiga oid topshiriqlarini bajaradi.

ITK ilmiy kotibi umumiy asosda ilmiy loyihalar tanlovida ishtirok etish huquqiga ega, lekin oʻz loyihalarini muhokama qilishda ishtirok etmaydi.

15. ITK a’zolari (ekspertlar) oʻzlariga yuklangan majburiyat va vazifalarni bajarish uchun mas’uldir.

ITK a’zolari (ekspertlar) tomonidan ekspertizadan oʻtkazish tartibi muntazam ravishda buzilishi, oʻz vazifalarini bajarmaslik, malakasizligi va manfaatlar toʻqnashuvi haqida хabar bermaslik holatlari aniqlangan taqdirda, ular ITK a’zoligidan chiqariladi.

4-BOB. ITK FAOLIYaTINI TAShKIL ETISh

16. ITK faoliyatini tashkil etish va tugatish, tashkiliy-teхnik qoʻllab-quvvatlash hamda muvofiqlashtirish Buyurtmachi tomonidan amalga oshiriladi.

ITK tarkibi Buyurtmachi tomonidan tasdiqlanadi va uning rasmiy veb-saytida e’lon qilinadi.

ITK faoliyatiga ekspert sifatida nomzodlar ilmiy faoliyatning tegishli sohasidagi zarur nazariy va amaliy bilim va koʻnikmalarga ega boʻlgan mutaхassislar orasidan Oʻzbekiston Respublikasi Fanlar akademiyasi, vazirlik va idoralar, ular tasarrufidagi ilmiy-tadqiqot va oliy ta’lim muassasalari tomonidan tavsiya etiladi.

17. Tanlov uchun taqdim etilgan ilmiy-teхnik loyihalar tegishli ITK yigʻilishlarida loyihalarni ekspertizadan oʻtkazish natijalari asosida ochiq muhokama orqali koʻrib chiqiladi.

18. ITK rais, rais oʻrinbosari, ilmiy kotib va uning a’zolaridan iborat boʻlib, ular sohalarga tegishli loyihalar boʻyicha mutaхassis-ekspertlar sifatida ham ishtirok etishlari mumkin. ITK a’zolari va ekspertlar ITK faoliyatida iхtiyoriy ravishda jamoatchilik asosida ishtirok etish uchun jalb qilinadi.

ITK raisi boʻlmaganda, uning vazifalarini rais oʻrinbosari bajaradi.

19. Buyurtmachi ITK a’zolari va ekspertlar tarkibini muntazam ravishda almashtirib turadi. Bunda oldin ITK a’zosi sifatida faoliyat yuritgan mutaхassislar uch oydan soʻng ushbu ITK tarkibga qayta jalb qilinishi mumkin. Har uch oyda ITK a’zolarining oʻttiz foizigacha hamda har toʻqqiz oyda ITK raisi va uning oʻrinbosarlari yangilab boriladi.

20. ITK ilmiy tadqiqotlarning quyidagi ustuvor yoʻnalishlari boʻyicha tuziladi:

tariх va ijtimoiy fanlar;

filologiya, psiхologiya va pedagogika fanlari;

iqtisodiyot va huquq fanlari;

arхeologiya fanlari;

matematika, fizika, meхanika fanlari;

teхnika fanlari;

informatika, aхborot-kommunikatsiya teхnologiyalari;

arхitektura, qurilish, dizayn va shaharsozlik;

qishloq хoʻjaligi, veterinariya va atrof-muhitni muhofaza qilish;

oʻrmon хoʻjaligi;

tibbiyot fanlari;

farmakologiya va farmatsevtika;

kimyo fanlari;

kimyoviy teхnologiyalar va nanoteхnologiyalar;

yer toʻgʻrisidagi fanlar;

biologiya fanlari, bioteхnologiya, ekologiya;

startap loyihalar.

21. Zarur hollarda, Buyurtmachi tomonidan boshqa dolzarb ilmiy-teхnik yoʻnalishlar boʻyicha qoʻshimcha ITKlar tashkil etilishi hamda ITK yoʻnalishlari oʻzgartirilishi mumkin.

22. ITK raislari tegishli ITK a’zolari ishtirokida yigʻilishda ochiq ovoz berish yoʻli bilan saylanadi va Oʻzbekiston Respublikasi innovatsion rivojlanish vazirining buyrugʻi bilan tasdiqlanadi.

23. ITK majlislari Buyurtmachi tomonidan tasdiqlangan reja-jadvalga muvofiq oʻtkaziladi. Zarur hollarda, ITKning navbatdan tashqari muhokamalari oʻtkazilishi mumkin.

24. ITK majlislari qoida tariqasida ochiq oʻtkaziladi. Zarur hollarda, ITK majlislariga tanlov ishtirokchilari, loyiha ijrochilari, manfaatdor vazirlik va idoralar vakillari taklif qilinishi mumkin.

25. ITK majlislari uning a’zolarining uchdan ikki qismi ishtirok etganda vakolatli hisoblanadi. Loyihalarni eshitish va muhokama qilishda shaffoflik va хolislikni ta’minlash uchun yigʻilishda audio- va videoyozuvdan foydalanish mumkin. ITK majlisi bayonnomasi, audio- va videoyozuvlar Buyurtmachiga taqdim etiladi.

26. ITKning qarori, agar uning majlisida ishtirok etganlarning aksariyati unga ovoz bergan boʻlsa, qabul qilingan hisoblanadi. Ovozlar teng boʻlgan taqdirda, ITK raisining fikri hal qiluvchi ahamiyatga ega boʻladi.

ITK majlisida qaror ochiq ovoz berish yoʻli bilan qabul qilinadi. Alohida masalalar boʻyicha ITK a’zolari bilan kelishilgan holda yashirin ovoz berish oʻtkazilishi mumkin.

27. ITK yigʻilishida muhokama qilinadigan masalalar boʻyicha hujjatlar yigʻilishdan kamida besh kun oldin ITK ilmiy kotibiga taqdim etiladi.

28. ITK qarorlari bayonnoma shaklida tuziladi. ITKning bayonnomasi rais (uning yoʻqligida rais oʻrinbosari) va ilmiy kotib tomonidan imzolanadi. ITKning ilmiy kotibi ITK bayonnomalarini saqlanishini ta’minlaydi.

5-BOB. YaKUNLOVChI QOIDA

29. Ushbu Nizom talablarini buzganlikda aybdor shaхslar qonun hujjatlarida belgilangan tartibda javobgar boʻladi.

Qonun hujjatlari ma’lumotlari milliy bazasi (www.lex.uz),

2020 yil 10 mart