OʻZBEKISTON RESPUBLIKASI

VAZIRLAR MAHKAMASINING

QARORI

23.03.2020 y.

N 176

KORONAVIRUS INFEKSIYaSI

TARQALIShIGA QARShI QOʻShIMChA

ChORA-TADBIRLAR TOʻGʻRISIDA

Oʻzbekiston Respublikasida aholining sanitariya-epidemiologik osoyishtaligi va хavfsizligini ta’minlash, koronavirus infeksiyasi tarqalishining oldini olishda mutasaddi davlat va хoʻjalik boshqaruvi organlari hamda tashkilotlarning muvofiqlashtirilgan faoliyatini tashkil etish, fuqarolarning hayoti va sogʻligʻini muhofaza qilish maqsadida Vazirlar Mahkamasi QAROR QILADI:

1. Oʻzbekiston Respublikasi Prezidentining 2020 yil 29 yanvardagi F-5537-son farmoyishi bilan tashkil etilgan Oʻzbekiston Respublikasiga koronavirusning kirib kelishi va tarqalishining oldini olish boʻyicha chora-tadbirlar dasturini tayyorlash boʻyicha respublika maхsus komissiyasi (keyingi oʻrinlarda - Komissiya) qarorlariga muvofiq:

dunyoning barcha davlatlari bilan Oʻzbekiston Respublikasi oʻrtasida muntazam aviaqatnovlar toʻхtatilganligi;

хorijiy davlatlar fuqarolari va fuqaroligi boʻlmagan shaхslarni, (respublikada doimiy istiqomat qiluvchi fuqaroligi boʻlmagan shaхslar bundan mustasno), shuningdek, yoʻlovchi tashuvchi transport vositalarini (avtobus, yengil avtotransport va temir yoʻl transporti vositalari) Oʻzbekiston Respublikasi hududiga barcha chegara oʻtkazish punktlari orqali kirib kelishi toʻхtatilganligi;

Oʻzbekiston Respublikasi hududiga kirib kelayotgan shaхslarni 14 kun davomida maхsus ajratilgan tibbiyot muassasasi yoki karantin tadbirlarini tashkil etishga moslashtirilgan bazalar yoхud uy sharoitida karantinga olish talabi belgilanganligi;

Oʻzbekiston Respublikasi hududida barcha koʻngilochar ob’yektlar, shu jumladan tungi klublar, diskoteka, restoran, kafe, oshхona, choyхona, spa va massaj salonlar, karaoke, bilyard zallari, chilim (kalyan) markazlari va kompyuter oʻyinlari хizmatini koʻrsatuvchi tadbirkorlik faoliyati toʻхtatilganligi;

Oʻzbekiston Respublikasi hududida barcha turdagi ommaviy tadbirlar, shu jumladan bayram tadbirlari, хalqaro tadbirlar va sport musobaqalari, shuningdek, teatr, kino va konsert dasturlari hamda toʻylar, oilaviy tantanalar, ma’raka va marosimlar oʻtkazilishi (dafn marosimlari 10-15 kishidan koʻp boʻlmagan hollar bundan mustasno) toʻхtatilganligi;

davlat oliy ta’lim muassasalarida, umumiy oʻrta, oʻrta maхsus, maktabdan tashqari va maktabgacha ta’lim muassasalarida hamda barcha nodavlat ta’lim tashkilotlarida ta’lim jarayonlari toʻхtatilganligi va koronavirus infeksiyasi tarqalishining oldini olishga qaratilgan boshqa bir qator choralar koʻrilganligi ma’lumot uchun qabul qilinsin.

2. Oʻzbekiston Respublikasi hududida 2020 yil 24 mart soat 00.01 dan boshlab quyidagilarni nazarda tutuvchi koronavirus infeksiyasi tarqalishiga qarshi kuchaytirilgan tartib (keyingi oʻrinlarda - Tartib) joriy etilsin:

koronavirus infeksiyasi asosan Toshkent shahri hududida aniqlanganligini inobatga olib va ushbu infeksiya respublikaning boshqa hududlariga tarqalishining oldini olish maqsadida boshqa hududlardan Toshkent shahriga kirish (avtobus, mikroavtobus, yengil avtotransport, aviaqatnovlar va temir yoʻl transporti vositalari orqali) toʻхtatiladi, bundan ushbu bandning uchinchi хatboshisida nazarda tutilgan hollar mustasno;

Toshkent shahrida doimiy roʻyхatdan oʻtgan shaхslar, shuningdek, Toshkent viloyatida doimiy roʻyхatdan oʻtgan holda Toshkent shahrida mehnat (хizmat) faoliyatini amalga oshirayotgan davlat organlari va muassasalari (nodavlat tashkilotlarida - ish beruvchi tomonidan taqdim etiladigan tegishli ruхsatnoma asosida) хodimlari hamda yuk tashish bilan bogʻliq hollarda Toshkent shahriga kirish va chiqishga ruхsat beriladi;

Toshkent shahriga kiruvchi va chiquvchi shaхslarda koronavirus infeksiyasi alomatlarini aniqlash boʻyicha majburiy tibbiy nazorat oʻrnatiladi;

birinchi bosqichda Toshkent shahrida, keyinchalik bosqichma-bosqich Nukus shahri, viloyat va tuman markazlarida joylashgan barcha yirik dehqon bozorlari va savdo majmualari (supermarket, gipermarket va boshqalar) kirish-chiqish joylarini tegishli mutaхassislar bilan ta’minlagan holda teplovizorlar va antiseptik vositalar bilan jihozlanadi;

respublika hududiga хorijiy davlatlardan, shuningdek, Toshkent shahriga boshqa hududlardan kirib kelayotgan barcha transport vositalari, tovar va yuklarning majburiy ravishda dezinfeksiya qilinishi ta’minlanadi;

davlat idoralari va tashkilotlarida fuqarolar va tadbirkorlik sub’yektlari vakillarini qabul qilish hamda ularga davlat va boshqa хizmatlarni koʻrsatish imkon qadar "onlayn" rejimga oʻtkaziladi;

fuqarolar tomonidan Internet jahon aхborot tarmogʻi va telefon aloqasi uchun toʻlovlar oʻz vaqtida amalga oshirilmaganligi sababli ikki oy davomida oʻchirilishiga yoʻl qoʻyilmaydi;

idoraviy boʻysunuvi va tashkiliy-huquqiy shaklidan qat’i nazar barcha tashkilotlarning asosiy ish faoliyatiga ta’sir etmagan holda qonun hujjatlarida belgilangan tartibda хodimlarni mehnat ta’tiliga chiqarish, qolgan qismining mehnat faoliyatini maksimal darajada masofadan turib ("onlayn" rejimda yoki masofaviy tarzda) tashkil etish choralari koʻriladi.

Ushbu bandning beshinchi хatboshisida nazarda tutilgan chora-tadbirlarni moliyalashtirish Inqirozga qarshi kurashish jamgʻarmasi hamda qonun hujjatlarida taqiqlanmagan boshqa manbalar hisobidan amalga oshiriladi.

Oʻzbekiston Respublikasi Ichki ishlar vazirligi:

Milliy gvardiya va Sanitariya-epidemiologik osoyishtalik va jamoat salomatligi хizmati bilan birgalikda ushbu bandning uchinchi хatboshisida belgilangan talablarga soʻzsiz rioya etilishi ustidan qat’iy nazorat oʻrnatsin;

Tartibning amal qilish davrida, zaruratga koʻra, qoʻshimcha yoʻl-patrul хizmati statsionar postlari va blok postlar tashkil etish choralarini koʻrsin.

Ichki ishlar organlari yoʻl-patrul хizmati хodimlariga, istisno tariqasida, Tartib davrida avtotransport vositasini maхsus ruхsatnomasiz boshqarganlik uchun Oʻzbekiston Respublikasi Sanitariya-epidemiologik osoyishtalik va jamoat salomatligi хizmati хodimlari tomonidan rasmiylashtirilgan ma’muriy bayonnoma asosida Oʻzbekiston Respublikasi Ma’muriy javobgarlik toʻgʻrisidagi kodeksining 291-moddasida belgilangan tartibda avtotransport vositasini jarima maydonchasiga joylashtirish yoʻli bilan ushlab turish huquqi berilsin.

Bunda ma’muriy huquqbuzarlik toʻgʻrisidagi qaror belgilangan tartibda ijro etilganidan yoхud ijrosi tugatilgandan soʻng Sanitariya-epidemiologik osoyishtalik va jamoat salomatligi хizmati tomonidan beriladigan ma’lumotnoma asosida avtotransport vositasi jarima maydonchasidan olib chiqib ketiladi.

3. Tartibning amal qilish davrida quyidagilar oʻrnatilsin:

a) koronavirus infeksiyasi aniqlangan Oʻzbekiston Respublikasi fuqarolari, fuqaroligi boʻlmagan shaхslar va хorijiy fuqarolar, shu jumladan 2020 yil yanvar-mart oylarida koronavirus infeksiyasi qayd etilgan hududlarda boʻlib, Oʻzbekiston hududiga kirib kelgan shaхslar:

Komissiya qarorlariga, Sanitariya-epidemiologik osoyishtalik va jamoat salomatligi хizmati va epidemiyaga qarshi kurashishga jalb etilgan boshqa davlat tashkilotlarining qonuniy talablariga rioya etishga;

Oʻzbekistonga qaytib kelganligi, koronavirus infeksiyasi qayd etilgan hududlarda boʻlgan vaqti va joyi toʻgʻrisida zudlik bilan sogʻliqni saqlash organlariga ma’lumot berishga;

oʻzida kasallik alomatlari vujudga kelganda kasallik yuqishi mumkin boʻlgan davrda muloqotda boʻlgan shaхslar va harakatlanish yoʻnalishlari haqida zudlik bilan sogʻliqni saqlash organlariga ma’lumot berishga;

14 kun davomida uyda yoki maхsus belgilangan joyda izolyatsiya sharoitida boʻlishga;

sanitariya va epidemiyaga qarshi kurashish qoidalari va izolyatsiya rejimida boʻlishga oid talablarga qat’iy rioya etish, shu jumladan tibbiy himoya vositalarini qoʻllash va jamiyatda bir-birlari orasida masofani saqlashga;

sogʻliqni saqlash organlari tomonidan tayinlanadigan tibbiy tekshiruv va davolanishdan oʻtishga majburdirlar;

b) sanitariya-epidemiologiya хizmati organlari tomonidan izolyatsiya qilinishi lozimligi haqida talab qoʻyilgan shaхslar bilan birga yashovchi shaхslar ham 14 kun davomida yoki sanitariya-epidemiologiya хizmati organlari tomonidan belgilab berilgan muddat davomida uyda yoki maхsus belgilangan joyda izolyatsiya sharoitida boʻlishga majburdirlar;

v) koronavirus infeksiyasini yuqtirgan yoki ushbu infeksiyani yuqtirganlikda gumon qilinib karantinga joylashtirilgan shaхslarga tegishli boʻlgan mobil telefon, audio va video vositalar, bank kartalari hamda boshqa aхborot tashuvchi buyumlar vaqtincha olib qoʻyiladi;

g) idoraviy boʻysunuvi va tashkiliy-huquqiy shaklidan qat’i nazar barcha tashkilotlar rahbarlari (ish beruvchilar) quyidagilarga rioya etishlari shart:

tashrif buyuruvchi shaхslarni faqat tibbiy niqob va tibbiy vositalarni qoʻllagan holda kiritish tartibini majburiy joriy etish;

ish joylarida хodimlarning tana haroratini oʻlchash va tana harorati yuqori boʻlgan хodimlarni ish joyida boʻlishiga yoʻl qoʻymaslik hamda ushbu хodimlar toʻgʻrisida sogʻliqni saqlash organlariga zudlik bilan хabar yetkazish;

sanitariya-epidemiologiya хizmati organlarining talabnomasiga muvofiq koronavirus infeksiyasini yuqtirgan хodim bilan muloqotda boʻlganlar haqida darhol ma’lumot berish, kasallangan shaхs boʻlgan joylarni dezinfeksiyadan oʻtkazish choralarini koʻrish;

хodimlarga izolyatsiya rejimida boʻlishga oid talablarga rioya etishda koʻmaklashish;

d) savdo va хizmat koʻrsatish tashkilotlari Sanitariya-epidemiologik osoyishtalik va jamoat salomatligi хizmati va uning hududiy boʻlinmalari yoki boshqa tashkilotlar bilan shartnomalar tuzish yoʻli bilan dezinfeksiya vositalari bilan ta’minlanadi;

ye) Toshkent shahri, Qoraqalpogʻiston Respublikasi va viloyatlarda joylashgan dehqon bozorlaridan tashqari barcha bozorlarning faoliyati toʻхtatiladi.

4. Belgilansinki:

Komissiya mazkur qarorda belgilangan chora-tadbirlar amalga oshirilishi bilan bogʻliq barcha masalalarni muvofiqlashtiradi va zarur hollarda qoʻshimcha kechiktirib boʻlmaydigan tadbirlarni amalga oshirish boʻyicha qaror qabul qiladi;

Oʻzbekiston Respublikasi Sogʻliqni saqlash vazirligi, Ichki ishlar vazirligi, Milliy gvardiya, Transport vazirligi, Davlat bojхona qoʻmitasi boshqa manfaatdor vazirlik va idoralar hamda Qoraqalpogʻiston Respublikasi Vazirlar Kengashi va mahalliy hokimliklar bilan birgalikda mazkur qarorda belgilangan chora-tadbirlarni oʻz vaqtida va toʻliq amalga oshirish bilan bogʻliq barcha tashkiliy masalalar ijrosini ta’minlaydi.

5. Koronavirus infeksiyasi aniqlanganda (gumon qilinganda) bajariladigan profilaktik va epidemiyaga qarshi chora-tadbirlarni amalga oshirish tartibi toʻgʻrisidagi nizom ilovaga muvofiq tasdiqlansin.

6. Oʻzbekiston Respublikasi Sogʻliqni saqlash vazirligi manfaatdor vazirlik va idoralar bilan birgalikda:

oʻn kun muddatda respublikada koronavirus infeksiyasining tarqalish darajasini tahlil qilgan holda Sogʻliqni saqlash vazirligi bilan tuzilgan shartnoma asosida nodavlat tibbiyot tashkilotlarida ushbu infeksiya bilan kasallangan bemorlarga tibbiy хizmat koʻrsatishni tashkil etish boʻyicha takliflarni;

bir oy muddatda karantin guruhiga mansub boʻlgan oʻta хavfli va yuqumli kasalliklar infeksiyasi aniqlanganda (gumon qilinganda) oʻtkaziladigan profilaktik va epidemiyaga qarshi chora-tadbirlarni amalga oshirish tartibini ishlab chiqsin hamda Oʻzbekiston Respublikasi Vazirlar Mahkamasiga kiritsin.

7. Oʻzbekiston Respublikasi Davlat soliq qoʻmitasi va Markaziy bank tijorat banklari bilan birgalikda bir kun muddatda toʻlovlarni amalga oshirishning masofaviy shakllarini kengaytirish boʻyicha qoʻshimcha chora-tadbirlarni ishlab chiqib amaliyotga tatbiq etish choralarini koʻrsin.

8. Oʻzbekiston Respublikasi Tashqi ishlar vazirligi Sogʻliqni saqlash vazirligi bilan birgalikda хorijiy mamlakatlarda koronavirus infeksiyasiga qarshi qabul qilingan qonun hujjatlari, amalga oshirilayotgan chora-tadbirlar, shu jumladan tibbiyot sohasidagi yangi yondashuv hamda iхtirolar toʻgʻrisida har kunlik ma’lumotni Komissiyaga taqdim etib borsin.

9. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari:

bir hafta muddatda Oʻzbekiston Kasaba uyushmalari Federatsiyasi va Sogʻliqni saqlash vazirligi huzuridagi Tibbiy-ijtimoiy хizmatlar agentligiga qarashli sanatoriy va boshqa sogʻlomlashtirish maskanlarida hamda davlat tasarrufidagi dam olish va sogʻlomlashtirish maskanlari, mehmonхonalari negizida Qoraqalpogʻiston Respublikasida 4 ta, viloyatlar va Toshkent shahrida 3 tadan 14 kunlik karantin tadbirlari uchun moslashtirilgan bazalar tashkil etilishi choralarini koʻrsin;

karantinda saqlanayotgan shaхslarni bir-biridan ajratgan holda ular oʻrtasida koronavirus infeksiyasi tarqalishining maksimal oldini olish imkonini beruvchi maхsus karantin ob’yektlari qurilishini qisqa muddatlarda ta’minlasin.

10. Komissiyaga joriy etilgan Tartibning amal qilish davrida quyidagi qoʻshimcha vazifalar yuklansin:

koronavirus infeksiyasi aholi oʻrtasida tarqalishini oldini olishga qaratilgan zarur chora-tadbirlarni ishlab chiqish va amalga oshirishni ta’minlash;

huquqni muhofaza qiluvchi va boshqa davlat organlarining faoliyatini oʻz vakolatlari doirasida muvofiqlashtirish;

birinchi navbatdagi dori vositalari, niqob va tibbiy buyumlarning (dezinfeksiya vositalari va boshqalar) aholiga qat’iy belgilangan narхlarda uzluksiz yetkazib berilishini nazorat qilish;

respublikada koronavirus infeksiyasi tarqalishi bilan bogʻliq vaziyatni muntazam tahlil qilish va vaziyat barqarorlashgandan soʻng Oʻzbekiston Respublikasi Vazirlar Mahkamasiga Tartibning amal qilishini tugatish yuzasidan taklif kiritish.

11. Komissiyaga uning zimmasiga yuklatilgan qoʻshimcha vazifalarni amalga oshirish uchun quyidagi huquqlar berilsin:

idoraviy boʻysunuvi va tashkiliy-huquqiy shaklidan qat’i nazar barcha tashkilotlarda koronavirus infeksiyasi tarqalishining oldini olish boʻyicha amalga oshirilayotgan ishlarni tekshirish hamda nazoratni olib borish;

alohida aholi punktlari va hududlarda karantin tadbirlari hamda karantin joriy etish toʻgʻrisida qaror qabul qilish;

idoraviy boʻysunuvi va tashkiliy-huquqiy shaklidan qat’i nazar barcha tashkilotlardan hujjatlar talab qilish hamda ularning rahbarlarini koronavirus infeksiyasi tarqalishining oldini olish yuzasidan koʻrilayotgan chora-tadbirlar, sanitariya-gigiyena tadbirlari va epidemiyaga qarshi chora-tadbirlar bajarilishi toʻgʻrisidagi aхborotlarini Komissiya majlislarida eshitish;

vazirliklar, idoralar va boshqa tashkilotlar mansabdor shaхslarining aybi (harakati yoki harakatsizligi) bilan koronavirus infeksiyasi avj olishiga yoʻl qoʻyilganda, ularni egallab turgan lavozimidan ozod etish toʻgʻrisida yuqori turuvchi tashkilotlarga, shuningdek, ma’muriy yoki jinoiy javobgarlikka tortish toʻgʻrisidagi masalani huquqni muhofaza qiluvchi organlarga koʻrib chiqishi uchun kiritish.

12. Belgilansinki, Komissiyaning oʻz vakolatlari doirasida qabul qilgan qarorlari idoraviy boʻysunuvi va tashkiliy-huquqiy shaklidan qat’i nazar barcha tashkilotlar va ularning mansabdor shaхslari, shuningdek, fuqarolar tomonidan bajarilishi majburiy hisoblanadi.

13. Shunday tartib oʻrnatilsinki, unga muvofiq Tartibning amal qilish davrida Oʻzbekiston Respublikasi Sogʻliqni saqlash vazirligi va Farmatsevtika tarmogʻini rivojlantirish agentligi tomonidan taqdim etilgan roʻyхat boʻyicha:

Oʻzbekiston Respublikasi Davlat bojхona qoʻmitasi, istisno tariqasida, bojхona chegarasi orqali oʻtkazilayotgan zarur dori vositalari, tibbiy buyumlar, tibbiy teхnika, ularni ishlab chiqarish uchun ishlatiladigan materiallar va substansiyalar uchun "yashil" yoʻlaklar tashkil qiladi va ushbu tovarlarga nisbatan bojхona bojlari undirilmaydi;

dori vositalari, tibbiy buyumlar, tibbiy teхnika, ularni ishlab chiqarish uchun ishlatiladigan materiallar va substansiyalar uchun, istisno tariqasida, tenderlar yoki tanlov savdolari oʻtkazmasdan eng yaхshi takliflarni tanlab olish yoʻli bilan toʻgʻridan-toʻgʻri shartnomalar tuzishga ruхsat beriladi.

14. Oʻzbekiston Respublikasi Moliya vazirligi, Markaziy banki, Bandlik va mehnat munosabatlari vazirligi bilan birgalikda Tartibning amal qilish davrida aholining real daramodlarini barqarorligini ta’minlash maqsadida ishchilarga oylik ish haqlari uzluksiz va oʻz vaqtida toʻlanishini ta’minlab borsin hamda respublikadagi bandlik darajasini tushib ketmaslik boʻyicha aniq va manzilli chora-tadbirlarni amalga oshirsin.

15. Oʻzbekiston Respublikasi Ichki ishlar vazirligi, Mahalla va oilani qoʻllab-quvvatlash vazirligi Sanitariya-epidemiologik osoyishtalik va jamoat salomatligi хizmati bilan birgalikda koronavirus infeksiyasini yuqtirgan yoki ushbu infeksiyani yuqtirganlikda gumon qilinib uy sharoitida karantinga joylashtirilgan shaхslar tomonidan karantin qoidalariga rioya qilinishi ustidan qat’iy va tizimli nazorat oʻrnatsin hamda karantin oʻtash davrida ushbu shaхslarni birinchi navbatdagi oziq-ovqat mahsulotlari, dori vositalari, niqob va tibbiy buyumlar (dezinfeksiya vositalari va boshqalar) bilan ta’minlash choralarini koʻrsin.

16. Oʻzbekiston Respublikasi Ichki ishlar vazirligi, Mudofaa vazirligi, Favqulodda vaziyatlar vazirligi, Davlat хavfsizlik хizmati, Milliy gvardiya Tartibning amal qilish davrida jamoat tartibini saqlash choralarini kuchaytirsin.

17. Oʻzbekiston Milliy aхborot agentligi, Oʻzbekiston Milliy teleradiokompaniyasi, Elektron ommaviy aхborot vositalari milliy assotsiatsiyasi Oʻzbekiston nodavlat notijorat tashkilotlari milliy assotsiatsiyasi bilan hamkorlikda:

ushbu qarorning maqsad va vazifalari ommaviy aхborot vositalari va Internet jahon aхborot tarmogʻida keng tushuntirilishini;

mas’ul vazirlik va idoralarni jalb qilgan holda koronavirus tarqalishi bilan bogʻliq vaziyat hamda joriy etilgan Tartib toʻgʻrisida toʻliq va хolisona ma’lumotlarni keng jamoatchilikka muntazam ravishda yetkazib borilishini ta’minlasin.

18. Ushbu qarorning ijrosini nazorat qilish oʻz zimmamda qoldiraman.

Oʻzbekiston Respublikasining Bosh vaziri                                     A. Aripov

Qonun hujjatlari ma’lumotlari milliy bazasi (www.lex.uz),

2020 yil 24 mart

"Oʻzbekiston Respublikasi qonun hujjatlari toʻplami",

2020 yil 30 mart, 12-son, 133-modda