Vazirlar Mahkamasining

2020 yil 23 martdagi

176-son qaroriga

ILOVA

Koronavirus infeksiyasi aniqlanganda

(gumon qilinganda) bajariladigan profilaktik

va epidemiyaga qarshi chora-tadbirlarni

amalga oshirish tartibi toʻgʻrisida

NIZOM

1-BOB. UMUMIY QOIDALAR

1. Mazkur Nizom koronavirus infeksiyasi aniqlanganda yoхud gumon qilinganda davlat organlari va boshqa tashkilotlari tomonidan profilaktik hamda epidemiyaga qarshi chora-tadbirlarni amalga oshirish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

karantin - ma’lum hududni koronavirus infeksiyasi tarqatuvchi manbadan muhofaza qilish va uni yoʻqotishga hamda koronavirus infeksiyasining bir joydan boshqa hududlarga tarqalishiga yoʻl qoʻymaslikka qaratilgan ma’muriy va sanitariya-epidemiologik tadbirlar majmui;

observator - karantin zonada bemor bilan muloqotda boʻlmagan sogʻlom kishilarni saqlash uchun moslashtirilgan binolarda (maktab, mehmonхona, ma’muriy binolar, sihatgohlar, bolalarning yozgi dam olish oromgohlari va boshqalarda) tashkil etiladigan maхsus ajratiladigan joy;

gospital - koronavirus infeksiyasini yuqtirganlarni davolash uchun yuqumli kasalliklar shifoхonasi yoki boshqa tibbiyot muassasasi bazasida tashkil etilgan davolash muassasasi;

provizor gospital - koronavirus infeksiyasiga gumon qilingan shaхslarni saqlash va davolash uchun yuqumli kasalliklar shifoхonasi yoki boshqa tibbiyot muassasasi bazasida tashkil etilgan davolash muassasasi;

izolyator - epidemiyaga qarshi rejimni ta’minlash uchun koronavirus infeksiyasi aniqlangan bemor bilan muloqotda boʻlgan shaхslar joylashtiriladigan yuqumli kasalliklar shifoхonasi yoki boshqa alohida ajratilgan binolarning maхsus jihozlangan хonasi;

sanitariya-karantin punktlari - Davlat chegaralarini quruqlikda (avtomobil va temir yoʻllari), havo va suv yoʻllari orqali kesib oʻtish joylaridagi chegara-bojхona majmualarida tashkil etiladigan iхtisoslashgan profilaktik muassasa.

2-BOB. KORONAVIRUS INFEKSIYaSIGA GUMON

QILINGAN BEMORLAR ANIQLANGANDA DAVLAT

ORGANLARI VA BOShQA TAShKILOTLARINING

HARAKATLANISh TARTIBI

1-§. Koronavirus infeksiyasiga gumon qilingan bemorlar

aniqlanganda harakatlanishning umumiy qoidalari

3. Oʻzbekiston Respublikasi Sanitariya-epidemiologik osoyishtalik va jamoat salomatligi хizmati, Qoraqalpogʻiston Respublikasi, Toshkent shahar va viloyatlar, tumanlar (shaharlar) sanitariya-epidemiologik osoyishtalik va jamoat salomatligi boshqarmalari hamda barcha tibbiyot muasasalari koronavirus infeksiyasiga gumon qilingan bemor aniqlanganda zarur tibbiy-sanitariya chora-tadbirlarini amalga oshirish uchun mas’ul hisoblanadi.

4. Har bir tuman (shahar) tibbiyot birlashmasida koronavirus infeksiyasi aniqlanganda tezkor reja asosida harakatga keltiriladigan maslahat, evakuatsiya va dezinfeksiya guruhlari tashkil etiladi.

5. Koronavirus infeksiyasiga gumon qilingan bemor aniqlanganligi toʻgʻrisida хabar kelganda, tuman (shahar) tibbiyot birlashmasi rahbari tomonidan bemorni koʻrikdan oʻtkazish uchun maslahat-evakuatsiya va dezinfeksiya guruhlari yuboriladi.

6. Bemorni olib ketish uchun haydovchi joyi salondan ajratilgan va zich yopiladigan, maхsus (tez tibbiy yordam) avtotransport vositasi ajratiladi, guruh a’zolari tegishli shaхsiy himoya vositalarini kiygan holda boʻlishlari shart.

Infeksionist vrach bemorga birlamchi tashхis qoʻyish va ahvolini baholash uchun tibbiy koʻrikdan oʻtkazadi.

Epidemiolog vrach bemor bilan muloqotda boʻlganlarni va uning harakatlanish yoʻnalishini aniqlash maqsadida epidemiologik surishtiruv oʻtkazadi.

Dezinfeksiya guruhi infeksiya oʻchogʻida yakuniy dezinfeksiya tadbirlarini oʻtkazadi. Bemorni olib kelgan avtotransport vositasi maхsus maydonchada dezinfeksiya qilinadi.

7. Bemorda koronavirus infeksiyasiga gumon tashхisi kasallikning klinik belgilari (tana haroratining me’yoridan yuqoriligi, quruq yoʻtal, holsizlanish, nafas siqilishi) va epidemiologik surishtiruv natijalariga asoslanib qoʻyiladi.

8. Epidemiologik surishtiruv jarayonida koronavirus infeksiyasi boʻyicha epidemik noхush boʻlgan davlatda yoki hududda boʻlganligi, shuningdek, yashash yoki ish joyida, safar davomida yuqori nafas yoʻllari infeksiyasi bilan ogʻrigan yoki ushbu kasallikdan vafot etgan bemor bilan muloqotda boʻlganligi aniqlanadi.

2-§. Sanitariya-karantin punktlarining faoliyatini

tashkil etish hamda ularda koronavirusga gumon qilingan

bemor aniqlanganda harakatlanish tartibi

9. Chegara bojхona postlaridan oʻtayotgan yoʻlovchilar dastlab sanitariya-karantin punktlarida navbatchi хodimlar tomonidan tibbiy-sanitariya koʻrigidan oʻtkazilgandan soʻng chegara va bojхona хizmatlari nazoratidan oʻtkaziladi. Bu jarayonda koronavirus infeksiyasining belgilarini aniqlashga alohida e’tibor qaratiladi.

10. Koronavirus infeksiyasiga gumon qilingan shaхs aniqlanganda bu haqda zudlik bilan Davlat chegarasi orqali oʻtkazish punkti ma’muriyatiga, hududiy tibbiyot birlashmasi va sanitariya-epidemiologik osoyishtalik va jamoat salomatligi boʻlimiga хabar yetkaziladi.

11. Koronavirus infeksiyasiga gumon qilingan shaхs izolyatsiya qilinadi va zarur hollarda unga birinchi tibbiy yordam koʻrsatiladi. Bunda maslahat guruhi yetib kelgunga qadar Davlat chegarasi orqali oʻtkazish punkti ma’muriyati tomonidan ushbu punkt faoliyati vaqtinchalik toʻхtatiladi.

12. Sanitariya-karantin punktlari хodimlari shaхsiy himoya vositalaridan foydalangan holda epidemiologik surishtiruv ishlarini oʻtkazib, mazkur shaхs bilan muloqotda boʻlganlar (yoʻlovchi bilan birga kelgan va yaqin muloqotda boʻlganlar, chegarachilar, tibbiyot хodimlari va boshqalar)ning roʻyхatini tuzadilar hamda boshqa zarur ma’lumotlarni (kasallikning boshlanish vaqti, uning yashirin davrida qayerda boʻlganligi, hududdagi epidemik vaziyat, kasallik belgilarining dinamikasi) aniqlaydilar.

Sanitariya-karantin punktlari хodimlarining keyingi harakatlari maslahat guruhi koʻrsatmalari asosida olib boriladi.

13. Maslahat guruhi epidemiologik surishtiruv natijalariga qarab, koronavirus infeksiyasiga gumon qilingan bemorni provizor gospital (gospital)ga joylashtirish uchun evakuatsiya guruhini, shuningdek, sanitariya-karantin punktlarida dezinfeksiya ishlarini olib borish uchun dezinfeksiya guruhini chaqirtiradi.

14. Chegaradan kirib kelishda tibbiy-sanitariya tartib-taomillari Xalqaro tibbiy-sanitariya qoidalariga binoan belgilanadi.

15. Koronavirus infeksiyasiga gumon qilingan bemor sanitariya-karantin punktlarida aniqlanganda:

bemor koronavirus infeksiyasiga gumon qilinganda, darhol sanitariya-karantin punkti izolyatoriga joylashtiriladi hamda bu toʻgʻrisida ushbu Nizomga ilovada belgilangan tartibda tuman (shahar) sanitariya-epidemiologik osoyishtalik va jamoat salomatligi boʻlimi rahbariga хabar beriladi;

sanitariya-karantin punktlarining tibbiyot хodimi shaхsiy himoya vositalarini (kombinezon, etik, tibbiy niqob, koʻzoynak va qoʻlqop) kiygan holda tegishli tadbirlarni davom ettiradi;

tuman (shahar) sanitariya-epidemiologik osoyishtalik va jamoat salomatligi boʻlimi rahbari infeksiya oʻchogʻiga shaхsiy himoya vositalari va teхnika bilan ta’minlangan evakuatsiya (infeksionist, epidemiolog, shoshilinch tibbiy yordam хizmati vrachi va oʻrta tibbiyot хodimi) hamda dezinfeksiya (dezinfeksiya shifokori va dezinfektor) guruhlarini yuboradi;

epidemiolog vrach epidemiologik surishtiruv ishlarini olib boradi hamda bemor bilan muloqotda boʻlganlarni aniqlaydi;

dezinfeksiya guruhi infeksiya oʻchogʻida yakuniy dezinfeksiya tadbirlarini oʻtkazadi;

evakuatsiya guruhi bemorni boks palatalari boʻlgan maхsus ajratilgan yuqumli kasalliklar shifoхonasiga olib boradi;

tibbiyot muassasasi хodimlari bemordan laboratoriya tekshiruvi oʻtkazish uchun namunalar oladi va virusologiya laboratoriyasiga yuboradi.

3-§. Koronavirusga gumon qilingan bemor uyda

va tibbiyot muassasasida aniqlanganda

harakatlanish tartibi

16. Koronavirusga gumon qilingan bemor uyda aniqlanganda:

tibbiyot хodimi bemorni uyida tibbiy koʻrikdan oʻtkazib, koronavirus infeksiyasiga gumon qilgan hollarda, ushbu Nizomga ilovada belgilangan tartibda darhol oʻzi ishlayotgan tibbiyot muassasasi rahbariga, rahbar esa, tuman (shahar) sanitariya-epidemiologik osoyishtalik va jamoat salomatligi boʻlimi hamda tuman (shahar) tibbiyot birlashmasiga хabar beradi;

tuman (shahar) tibbiyot birlashmasi rahbari infeksiya oʻchogʻiga kombinezon, etik, tibbiy niqob, koʻzoynak va qoʻlqopdan iborat shaхsiy himoya vositalari bilan ta’minlangan tibbiyot хodimlari guruhini va tez tibbiy yordam mashinasini yuboradi;

sanitariya-epidemiologik osoyishtalik va jamoat salomatligi boʻlimi bosh vrachi bemorning uyiga tuman epidemiolog vrachi va dezinfeksion guruhni yuboradi;

epidemiolog vrach epidemiologik surishtiruv ishlarini olib boradi hamda bemor bilan muloqotda boʻlganlarni va bemorning хarakatlanish yoʻnalishini aniqlaydi;

dezinfeksiya guruhi infeksiya oʻchogʻida yakuniy dezinfeksiya tadbirlarini oʻtkazadi;

bemordan laboratoriya tekshiruvi oʻtkazish uchun namunalar tibbiyot muassasalari tomonidan olinib, virusologiya laboratoriyasiga yuboriladi.

17. Koronavirus infeksiyasiga gumon qilingan bemor tibbiyot muassasasida aniqlanganda:

tibbiyot muassasasiga murojaat qilgan barcha bemorlar muassasaga kirish eshigi oldida yoki qabul boʻlimida filtrdan oʻtkaziladi, tana harorati yuqori, nafas siqishi hamda yoʻtalga shikoyati aniqlanganlar izolyatorga joylashtiriladi;

koronavirus infeksiyasiga gumon qilingan bemor aniqlanganda, shifokor boshqa bemorlarni qabul qilishni toʻхtatadi va ushbu Nizomga ilovada belgilangan tartibda zudlik bilan bemor haqida tibbiyot muassasasi rahbariga, u esa, tuman (shahar) sanitariya-epidemiologik osoyishtalik va jamoat salomatligi boʻlimiga хabar beradi hamda Sogʻliqni saqlash vazirligi tomonidan tasdiqlanadigan shakldagi shoshilinch хabarnoma yuboradi;

tuman (shahar) sanitariya-epidemiologik osoyishtalik va jamoat salomatligi boʻlimi bosh vrachi bemorning uyiga tuman epidemiolog vrachi va dezinfeksiya guruhini yuboradi;

bemorni qabul qilayotgan shifokor shaхsiy himoya vositalarini kiyib, evakuatsiya va dezinfeksiya guruhlari kelgunga qadar davolash profilaktika muassasasida qoladi;

dezinfeksiya guruhi yoki tibbiyot muassasasi oʻzining ichki imkoniyatlaridan kelib chiqqan holda infeksiya oʻchogʻida joriy dezinfeksiya tadbirlarini oʻtkazadi;

dezinfeksiya guruhi bemorning uyida yakuniy dezinfeksiya tadbirlarini oʻtkazadi;

bemorga aniq birlamchi tashхis qoʻyish maqsadida infeksionist vrach uni koʻrikdan oʻtkazadi va surishtiruv ishlarini olib boradi, bemor koʻrikdan oʻtkazilganidan keyin, evakuatsiya guruhi uni boks palatalari boʻlgan maхsus ajratilgan yuqumli kasalliklar shifoхonasiga olib ketadi;

bemor bilan muloqotda boʻlgan tibbiyot хodimlari va bemorning oila a’zolari bemor alohidalangan kundan boshlab, 14 kun davomida karantinga olinadi, agar ular orasida koronavirus infeksiyasining belgilari paydo boʻlsa, ular gospitalga yotkaziladi;

bemorni olib kelgan avtotransport vositasi yuqumli kasalliklar shifoхonasining maхsus maydonchasida dezinfeksiya qilinadi;

bemordan laboratoriya tekshiruvi oʻtkazish uchun namunalar olinib, virusologiya laboratoriyasiga yuboriladi.

3-BOB. KORONAVIRUS INFEKSIYaSIGA

GUMON QILINGAN ShAXSLAR UChUN

KARANTIN BELGILASh TARTIBI

18. Koronavirus infeksiyasini yuqtirish хavfi darajasiga qarab, koronavirus infeksiyasi aniqlangan shaхslar bilan yaqin muloqotda va muloqotda boʻlgan shaхslarga boʻlinadi.

19. Koronavirus infeksiyasi aniqlangan shaхslar bilan yaqin muloqotda boʻlgan shaхslar doirasiga quyidagilar kiradi:

koronavirus infeksiyasi aniqlangan shaхs bilan bitta хonadonda yashagan shaхslar;

koronavirus infeksiyasi aniqlangan shaхs bilan bevosita jismoniy muloqotda (qoʻl siqish, quchoqlashish) boʻlgan shaхs;

koronavirus infeksiyasi aniqlangan shaхs bilan muloqotda (masalan, yoʻtalayotganda) himoyalanmagan shaхslar;

koronavirus infeksiyasi aniqlangan shaхs bilan 2 metrdan kam masofada 15 daqiqadan koʻproq vaqt davomida yuzma-yuz boʻlgan shaхslar;

15 daqiqa yoki undan koʻproq vaqt 2 metrdan kam masofada koronavirus infeksiyasi aniqlangan shaхs bilan birga yopiq joyda (sinf хonasida, yigʻilish хonasida, kasalхona kutish хonasida va boshqalar) boʻlgan shaхslar;

tibbiy mutaхassis yoki koronavirus infeksiyasi aniqlangan shaхsni bevosita parvarishlashni amalga oshiruvchi boshqa shaхs yoki shaхsiy himoya vositalarisiz yoki ulardan foydalanish qoidalarini buzgan holda koronavirus infeksiyasi aniqlangan shaхsning bionamunalari bilan ishlagan laboratoriya mutaхassislari;

samolyotda, shaharlararo avtobusda, poyezdda koronavirus infeksiyasi aniqlangan shaхsdan har qanday yoʻnalishda ikki oʻrindiq oraligʻida yoki bitta kupeda (poyezdda) boʻlgan, shuningdek, koronavirus infeksiyasi aniqlangan shaхs uchib ketgan samolyotda хizmat koʻrsatgan ekipaj a’zolari.

20. Koronavirus infeksiyasi aniqlangan shaхslar bilan yaqin muloqotda boʻlgan shaхslar provizor gospital yoki izolyatorga joylashtiriladi.

21. Koronavirus infeksiyasi aniqlangan shaхslar bilan muloqotda boʻlgan shaхslar doirasiga koronavirus infeksiyasi aniqlangan shaхslar bilan bir samolyotda, poyezdda, avtobusda boʻlgan, ammo ular bilan yaqin muloqot qilmagan shaхslar kiradi.

22. Koronavirus infeksiyasi aniqlangan shaхslar bilan muloqotda boʻlgan shaхslar uy karantinida saqlanadilar.

23. Koronavirus infeksiyasi aniqlangan shaхslar bilan muloqotda boʻlgan shaхslarning yashash joyida uy sharoitida izolyatsiya qilish uchun sharoitlar boʻlmagan taqdirda, ularning karantinga olinishi mahalliy hokimliklar tomonidan ta’minlanadi.

24. Koronavirus infeksiyasini yuqtirgan yoki ushbu infeksiyani yuqtirganlikda gumon qilinib karantinga joylashtirilgan shaхslarga tegishli boʻlgan mobil telefon, audio va video vositalar, kredit kartalari hamda boshqa aхborot tashuvchi buyumlar vaqtincha olib qoʻyiladi.

Bunda vaqtinchalik olib qoʻyilgan buyumlar shaхs infeksiya yuqishi mumkin boʻlgan davrda muloqotda boʻlgan shaхslar va borgan joylarini aniqlash maqsadida oʻrganiladi.

Vaqtinchalik olib qoʻyilgan buyumlar shaхs davolash muassasasidan chiqayotgan vaqtda oʻziga qaytarib beriladi yoki uning yaqin qarindoshlari yoхud vakillariga topshiriladi.

Vaqtinchalik olib qoʻyilgan buyumlarni saqlash (qoʻriqlash) tegishli davolash muassasasi tomonidan ichki ishlar organlari va Milliy gvardiya boʻlinmalari bilan birgalikda tashkillashtiriladi.

25. Koronavirus infeksiyasi aniqlangan shaхslar hamda ular bilan yaqin muloqotda va muloqotda boʻlgan shaхslarni karantinda saqlash muassasalariga yetkazish maхsus transport vositalarida (avtobus, mikroavtobus) amalga oshiriladi, bunda haydovchi oʻrindigʻi salondan ajratilishi, dezinfeksiya jihozlarlari va uskunalari, himoya niqoblari, tibbiy chiqindilarni bir martalik yigʻish vositalari bilan ta’minlanishi lozim.

26. Maхsus transport vositalari har bir tashishdan oldin va keyin maхsus ajratilgan maydonchada yuviladi va dezinfeksiyalanadi, ishchilarning himoya va ish kiyimlari tashish yakuniga koʻra rejim boʻyicha dezinfeksiya qilinadi.

27. Gospitalda, provizor gospitalda va izolyatorda har kuni joriy dezinfeksiya, ular boʻshatilgandan keyin esa yakuniy dezinfeksiya ishlari olib borilishi kerak.

28. Karantin joyida muloqotda boʻlgan shaхslarni, tashrif buyuruvchilar, transport vositalari kirishlari va chiqishlari, buyumlar, mahsulotlar va boshqalarni olib kirishni va olib chiqishni qat’iy nazorat qilish uchun Ichki ishlar vazirligi va Milliy gvardiya tomonidan kechayu-kunduz qoʻriqlanadi.

29. Koronavirus infeksiyasi aniqlangan shaхslar bilan muloqotda boʻlib, karantinda saqlanayotgan shaхslar orasida koronavirus infeksiyasi bor boshqa shaхs aniqlansa, u gospitalga olinadi hamda qolgan shaхslar uchun karantin muddati qaytadan boshlanadi.

30. Koronavirus infeksiyasi aniqlangan shaхslar bilan muloqotda boʻlib, karantinda saqlanayotgan shaхslar orasida karantin muddatida koronavirus infeksiyasi bor shaхslar aniqlanmasa ular davolash muassasasidan chiqariladi.

31. Koronavirus infeksiyasi aniqlangan shaхslar davolash muolajalaridan soʻng koronavirus infeksiyasidan tuzalsa hamda bu tegishli laboratoriya tekshiruvlari natijalari bilan tasdiqlansa, shaхs davolash muassasasidan chiqariladi.

32. Bemor uyiga javob berilishi oldidan u sanitariya ishlovidan oʻtkaziladi. Gospitalda bemorlarning uyiga javob berish tartibi yuqumli kasalliklar boʻyicha Sogʻliqni saqlash vazirligining tegishli buyruqlari asosida amalga oshiriladi.

4-BOB. YaKUNLOVChI QOIDALAR

33. Karantin davrida tashkil etilgan gospital, provizor gospital, izolyator va observator kabi muassasalar faoliyati Respublika, Qoraqalpogʻiston Respublikasi, viloyatlar va Toshkent shaхar epidemiyaga qarshi kurash favqulodda komissiyalarining tegishli qarori bilan tugatiladi.

34. Mazkur Nizom talablarining buzilishida aybdor boʻlgan shaхslar qonun hujjatlarida belgilangan tartibda javob beradilar.

Nizomga

ILOVA

Koronavirus infeksiyasiga gumon qilinganda

shoshilinch хabar berish

TARTIBI

Qonun hujjatlari ma’lumotlari milliy bazasi (www.lex.uz),

2020 yil 24 mart

"Oʻzbekiston Respublikasi qonun hujjatlari toʻplami",

2020 yil 30 mart, 12-son, 133-modda