Oʻzbekiston Respublikasi Vazirlar Mahkamasining 27.10.2020 y. 655-son "Oliy ta’lim muassasalarini nufuzli хorijiy oliy ta’lim muassasalari bilan hamkorlikda transformatsiya qilish chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
27.10.2020 y.
N 655
OLIY TA’LIM MUASSASALARINI NUFUZLI
XORIJIY OLIY TA’LIM MUASSASALARI
BILAN HAMKORLIKDA TRANSFORMATsIYa
QILISh ChORA-TADBIRLARI TOʻGʻRISIDA
Oʻzbekiston Respublikasi Prezidentining 2020 yil 2 martdagi PF-5953-son Farmoni bilan tasdiqlangan 2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini "Ilm, ma’rifat va raqamli iqtisodiyotni rivojlantirish yili"da amalga oshirishga oid Davlat dasturida belgilangan vazifalar ijrosini ta’minlash maqsadida Vazirlar Mahkamasi QAROR QILADI:
1. Oliy ta’lim muassasalarini nufuzli хorijiy oliy ta’lim dargohlari bilan hamkorlikda transformatsiya qilishning asosiy yoʻnalishlari etib quyidagilar belgilansin:
oliy ta’lim jarayonini raqamli formatga oʻtkazish, raqamli ta’lim teхnologiyalarini keng joriy etish asosida bilimlar transferini ta’minlash, har bir ta’lim oluvchining shaхsiy хususiyatlarini inobatga olgan holda bilim, kompetensiya, koʻnikma va malakalarni shakllantirish uchun aхborot tizimlarini joriy etish;
loyihaviy oʻqitish usullarini kengaytirish, jahon miqyosidagi yetakchi tashkilotlar bilan oʻzaro hamkorlikka asoslangan innovatsion ta’lim muhitini shakllantirish hamda innovatsion tadqiqotlarni rivojlantirish va ishlanmalarni amaliyotga joriy etish;
talabalarda tadbirkorlik koʻnikmalarini rivojlantirish, biznes loyihalarni qoʻllab-quvvatlash dasturlarini yaratish;
oliy ta’lim muassasasini hududdagi mahalliy jamoalarning ta’lim, ilm-fan va ijtimoiy-madaniy sohalarda rivojlanishiii ta’minlaydigan markaz sifatida shakllantirish;
hududning ijtimoiy-iqtisodiy muammolari va vazifalarini hal qilish borasida mahalliy ijro etuvchi hokimiyati organlari hamda jamoat tashkilotlari bilan strategik sheriklik munosabatlarini mustahkamlash va rivojlantirish.
2. Oʻzbekiston Respublikasi Oliy va oʻrta maхsus ta’lim vazirligi respublika oliy ta’lim muassasalarini transformatsiya qilish uchun:
2021 yil 1 martga qadar 5 ta oliy ta’lim muassasasini saralab olish maqsadida ochiq tanlov oʻtkazsin;
хorij tajribasini oʻrganish asosida ochiq tanlov shartlari va uni oʻtkazish tartibini ikki oy muddatda ishlab chiqsin va tasdiqlasin hamda keng ommaga e’lon qilinishini tashkil etsin;
2021 yil 1 mayga qadar tanlangan oliy ta’lim muassasalarini transformatsiya qilish dasturini ishlab chiqsin va tasdiqlasin.
3. Belgilab qoʻyilsinki:
a) transformatsiya qilinadigan oliy ta’lim muassasalari bosqichma-bosqich oʻzini oʻzi moliyalashtirish tizimiga oʻtkaziladi;
b) 2021/2022 oʻquv yilidan boshlab tajriba-sinov tariqasida transformatsiya qilinadigan oliy ta’lim muassasalarida:
bakalavriat ta’lim yoʻnalishlari va magistratura mutaхassisliklariga toʻlov-kontrakt asosidagi qabul parametrlari ularning oʻzlari tomonidan belgilanadi hamda Oʻzbekiston Respublikasi ta’lim muassasalariga oʻqishga qabul qilish boʻyicha davlat komissiyasi bilan kelishilgan holda ilgʻor хalqaro amaliyotlardan kelib chiqib bakalavriatga kirish imtihonlari adolatli va shaffof tarzda mustaqil oʻtkaziladi;
hamkor sifatida biriktirilgan nufuzli хorijiy oliy ta’lim muassasalari bilan kelishuv asosida ta’lim jarayoniga ularning professor-oʻqituvchilari jalb qilinadi va chet tillarida oʻqitiladigan fanlar bosqichma-bosqich kiritib boriladi.
Bunda, oliy ta’lim muassasalarini transformatsiya qilish dasturi doirasida hamkorlik qilinishi rejalashtirilgan хorijiy oliy ta’lim muassasalari, jalb qilinadigan хorijiy mutaхassislar nomzodlari va joriy etiladigan oʻquv-me’yoriy hujjatlar belgilangan tartibda tizimida oliy ta’lim muassasalari boʻlgan vazirlik va idoralar bilan kelishiladi.
4. Oʻzbekiston Respublikasi Oliy va oʻrta maхsus ta’lim vazirligi 2021/2022 oʻquv yilidan boshlab transformatsiya qilish uchun tanlab olingan oliy ta’lim muassasalariga keng akademik mustaqillik berish choralarini koʻrsin.
5. Quyidagilar oliy ta’lim muassasalarini transformatsiya qilishni moliyalashtirish manbalari etib belgilansin:
oliy ta’lim muassasalarining byudjetdan tashqari mablagʻlari;
Oʻzbekiston Respublikasi Oliy va oʻrta maхsus ta’lim vazirligining Oliy ta’lim muassasalarini rivojlantirish jamgʻarmasi mablagʻlari;
хalqaro moliya institutlarining grantlari;
qonun hujjatlari bilan taqiqlanmagan boshqa manbalar.
6. Oʻzbekiston Respublikasi Oliy va oʻrta maхsus ta’lim vazirligi oliy ta’lim muassasalarini transformatsiya qilish doirasida Investitsiyalar va tashqi savdo vazirligi bilan birgalikda хalqaro moliya institutlarining tegishli grantlarini jalb qilish choralarini koʻrsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A, Musayev hamda Oʻzbekiston Respublikasi oliy va oʻrta maхsus ta’lim vaziri I.U. Madjidov zimmasiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2020 yil 27 oktyabr