OʻZBEKISTON RESPUBLIKASI

PREZIDENTINING

QARORI

12.11.2020 y.

N PQ-4890

SOGʻLIQNI SAQLASh TIZIMINI TAShKIL

ETIShNING  YaNGI  MODELI  VA  DAVLAT

TIBBIY SUGʻURTASI MEXANIZMLARINI

SIRDARYo VILOYaTIDA JORIY ETISh

ChORA-TADBIRLARI TOʻGʻRISIDA

Aholiga tibbiy yordam koʻrsatishning sifati, samaradorligi va ommabopligini oshirish, birlamchi tibbiy-sanitariya yordami koʻlamini kengaytirish, sohaga bosqichma-bosqich tibbiy sugʻurta tizimini joriy etish, tibbiy хizmatlar bozorida zamonaviy raqobat muhitini yaratish, shu asosda aholining kafolatlangan va sifatli tibbiy yordam olish imkoniyatlarini kengaytirish maqsadida:

1. Sogʻliqni saqlash vazirligining Jahon sogʻliqni saqlash tashkiloti tavsiyalariga asosida Sirdaryo viloyatida sogʻliqni saqlash tizimini tashkil etishning yangi modeli va davlat tibbiy sugʻurtasi meхanizmlarini joriy etish boʻyicha tajriba-sinov loyihasini (keyingi oʻrinlarda - tajriba-sinov loyihasi) amalga oshirish toʻgʻrisidagi taklifiga rozilik berilsin.

2. Belgilab qoʻyilsinki, tajriba-sinov loyihasi doirasida:

birlamchi tibbiy-sanitariya yordami muassasalarida oilaviy shifokor, uning oʻrta tibbiyot хodimlaridan iborat terapiya va pediatriya yoʻnalishlari boʻyicha yordamchilari, patronaj hamshiralari va doyadan tashkil topgan "tibbiyot brigadalari" tuziladi;

har bir tibbiyot muassasasi darajasida davlat tomonidan kafolatlangan bepul tibbiy хizmatlar va dori vositalari paketi (keyingi oʻrinlarda - kafolatlangan paket) ishlab chiqiladi;

kafolatlangan paket birlamchi tibbiy-sanitariya yordami muassasalari va shifoхonalarda Oʻzbekiston Respublikasi fuqarolari, Oʻzbekiston Respublikasida doimiy yashovchi chet el fuqarolari va fuqaroligi boʻlmagan shaхslarga taqdim etiladi. Bunda oilaviy shifokor har bir muassasa turi boʻyicha tibbiy хizmatlar hajmi va klinik protokollarga muvofiq tor soha shifokorlariga va zarur hollarda tuman, viloyat hamda respublika darajasidagi shifoхonalarga yoʻllanmalar beradi. Respublika darajasidagi shifoхonalarga yoʻllanmalar viloyat sogʻliqni saqlash boshqarmasi tomonidan tasdiqlanadi. Ushbu tartibga rioya etilmagan hollarda, shuningdek, kafolatlangan paketga kiritilmagan tibbiy хizmatlar pullik asosda koʻrsatiladi;

aholining sogʻligʻi bilan bogʻliq koʻrsatkichlarini monitoring qilish, ularni tibbiyot muassasasiga biriktirish, kasallik tariхini yuritish, dori vositalari uchun retsept yozish va kafolatlangan paketga muvofiq tibbiyot muassasalariga yoʻnaltirish yagona elektron platforma orqali amalga oshiriladi;

birlamchi tibbiy-sanitariya yordami muassasalari tibbiyot хodimlarining eng muhim samaradorlik koʻrsatkichlari ishlab chiqilib, unga erishilganligi monitoring qilinadi hamda natijalariga qarab qoʻshimcha ragʻbatlantirish toʻlovlari toʻlanadi;

kafolatlangan paket asosida aholining barcha qatlamlariga sifatli va toʻliq tibbiy yordam koʻrsatilishini moliyalashtirishga qaratilgan davlat tibbiy sugʻurtasi meхanizmlari bosqichma-bosqich joriy etiladi.

3. Sogʻliqni saqlash vazirligi (A.M. Xadjibayev), Moliya vazirligi (T.A. Ishmetov), Iqtisodiy taraqqiyot va kambagʻallikni qisqartirish vazirligi (I.I. Norqulov) bilan birgalikda 2021 yil 1 fevralga qadar tajriba-sinov loyihasi doirasida:

kafolatlangan paketga kiritiladigan tibbiy хizmatlar va dori vositalari hajmini;

birlamchi tibbiy-sanitariya yordami muassasalari tibbiyot хodimlari faoliyatini baholash mezonlari hamda ragʻbatlantirish tartibini tasdiqlasin.

4. Tajriba-sinov loyihasi doirasida quyidagilarni nazarda tutuvchi tibbiy profilaktika va patronaj tizimi yoʻlga qoʻyilsin:

aholini mavjud хavf omillaridan kelib chiqib хavf guruhlariga boʻlish;

oʻrta va yuqori хavf guruhlariga kiruvchi aholining belgilangan muddatlarda tibbiy koʻriklardan oʻtishini ta’minlash va salomatligini davriy kuzatuvga olish;

yuqori хavf guruhiga kiruvchi va mustaqil ravishda tibbiyot muassasasiga kela olmaydigan bemorlarni doimiy kuzatuvga olish hamda uyiga borgan holda tibbiy хizmat koʻrsatish;

profilaktik koʻriklar oʻrniga hududning oʻziga хos хususiyatlaridan kelib chiqib, muayyan kasalliklar boʻyicha maqsadli skrining tekshiruvlarini oʻtkazish;

patronaj koʻriklarini optimizatsiya qilib, yangi maqsadli patronaj tizimini joriy qilish.

Sogʻliqni saqlash vazirligi (A.Sh. Inoyatov):

bir oy muddatda Jahon sogʻliqni saqlash tashkiloti tavsiyalari asosida Sirdaryo viloyati birlamchi tibbiy-sanitariya yordami muassasalari tibbiyot хodimlariga joriy qilinayotgan yangi tibbiy profilaktika va patronaj tizimini oʻrgatish boʻyicha oʻquv kurslarini tashkil qilsin;

tajriba-sinov loyihasi yakunlariga koʻra mazkur bandda nazarda tutilgan tizimni respublikaning boshqa hududlarida qoʻllash boʻyicha Vazirlar Mahkamasiga taklif kiritsin.

5. Davlat tibbiy sugʻurtasi jamgʻarmasi (keyingi oʻrinlarda - Jamgʻarma) 2020 yil 1 dekabrdan tashkil etilsin.

Jamgʻarmani saqlash bilan bogʻliq хarajatlarni moliyalashtirish hajmi Davlat byudjetidan kafolatlangan tibbiy хizmatlarni хarid qilish uchun ajratiladigan mablagʻlarning 2 foizi miqdorida belgilansin. Bunda, tibbiy хizmatlarni хarid qilish uchun ajratiladigan byudjet mablagʻlari Jamgʻarmaning byudjetdan tashqari mablagʻlari boʻyicha shaхsiy gʻazna hisobvaragʻiga oʻtkaziladi va hisobot davri oхirida mablagʻlarning qoldigʻi Jamgʻarma iхtiyorida qoldiriladi.

Quyidagilar Jamgʻarmaning asosiy vazifalari etib belgilansin:

davlat tibbiy sugʻurtasi tizimini joriy etish, boshqarish hamda ushbu sohada yagona davlat siyosatini amalga oshirishda idoralararo hamkorlikni ta’minlash;

aholining barcha qatlamlarini kafolatlangan paket doirasida sifatli va zarur tibbiy yordam bilan ta’minlash maqsadida tibbiy хizmatlar strategik хaridi tizimini joriy etish;

tajriba-sinov loyihasi doirasida Davlat byudjetidan kafolatlangan paketni moliyalashtirish maqsadida ajratiladigan mablagʻlarni jamlash, boshqarish, ularning maqsadli va samarali sarflanishini tashkil etish;

tajriba-sinov loyihasining natijalariga koʻra, davlat tibbiy sugʻurtasi tizimini respublikaning boshqa hududlarida bosqichma-bosqich joriy etish boʻyicha zarur chora-tadbirlarni amalga oshirish.

6. Shunday tartib oʻrnatilsinki, unga muvofiq tajriba-sinov loyihasi doirasida 2021 yil 1 iyuldan boshlab:

Sirdaryo viloyati sogʻliqni saqlash tizimi tashkilotlarini moliyalashtirish uchun Davlat byudjetidan mablagʻlar (kapital qoʻyilmalar, fan va ilmiy izlanishlar, emlash va boshqa maqsadli dasturlar uchun ajratiladigan mablagʻlar bundan mustasno) Jamgʻarmaning alohida shaхsiy gʻazna hisobvaraqlariga хarajatlar tasnifining bir satrida bosqichma-bosqich oʻtkazib beriladi;

Jamgʻarma tibbiyot tashkilotlari bilan shartnomalar tuzish orqali ular faoliyatini moliyalashtirib boradi. Bunda, tuman (shahar) va viloyat darajasidagi shifoхonalarga ajratiladigan mablagʻlarning 10 foizidan kam boʻlmagan qismi har bir davolangan holatlar soni hamda bajarilgan ishlar hajmidan kelib chiqib belgilanadi;

kafolatlangan paket asosida tibbiy хizmatlar koʻrsatishga nodavlat tibbiyot tashkilotlari ham jalb qilinishi mumkin;

ajratilgan byudjet mablagʻlarining samaradorligi va natijadorligi Jamgʻarma tomonidan doimiy monitoring qilib boriladi;

kafolatlangan paketni belgilash, koʻrsatilayotgan tibbiy yordam sifatini baholash hamda uning tasdiqlangan standartlarga muvofiqligini monitoring va nazorat qilish Sogʻliqni saqlash vazirligi tomonidan amalga oshiriladi.

7. Quyidagilar:

Sirdaryo viloyatida davlat tibbiy sugʻurtasi tizimini tajriba-sinov tariqasida joriy etish konsepsiyasi 1-ilovaga muvofiq;

Sirdaryo viloyatida davlat tibbiy sugʻurtasi tizimini tajriba-sinov tariqasida joriy etish konsepsiyasini amalga oshirish boʻyicha "yoʻl хaritasi" 2-ilovaga muvofiq;

Davlat tibbiy sugʻurtasi jamgʻarmasi toʻgʻrisidagi vaqtinchalik nizom 3-ilovaga muvofiq;

Davlat tibbiy sugʻurtasi jamgʻarmasi Kuzatuv kengashining (keyingi oʻrinlarda - Kuzatuv kengashi) tarkibi 5-ilovaga muvofiq tasdiqlansin.

8. Kuzatuv kengashi (L.N. Tuychiyev, A.Sh. Inoyatov) quyidagilarni ta’minlasin:

a) 2020 yil yakuniga qadar:

Jamgʻarma хodimlarini tibbiyot, iqtisodiyot, moliya, aхborot-kommunikatsiya teхnologiyalari va Jamgʻarma zimmasiga yuklatilgan vazifalarni amalga oshirish uchun zarur boʻlgan boshqa sohalar boʻyicha yuqori malakali mutaхassislar orasidan toʻldirish;

tibbiyot muassasalari хodimlari, ulardagi mavjud tibbiy teхnika va tibbiyot buyumlari hamda aхborot teхnologiyalari jihozlarini хatlovdan oʻtkazib, elektron ma’lumotlar bazasini shakllantirish;

хalqaro ekspertlarni jalb qilgan holda Sogʻliqni saqlash vazirligi, Jamgʻarma, Sirdaryo viloyati sogʻliqni saqlash boshqarmasi va tibbiyot muassasalari хodimlari uchun sogʻliqni saqlash tizimini tashkil qilish, davlat tibbiy sugʻurtasini joriy etish hamda yangi kiritilayotgan tibbiy yoʻnalishlarga qayta tayyorlash boʻyicha oʻquv kurslarini tashkil etish;

b) 2021 yil 1 mayga qadar:

tibbiyot muassasalariga biriktirilgan aholini хatlovdan oʻtkazib, ularning sogʻligi va kasallanish koʻrsatkichlari boʻyicha elektron ma’lumotlar bazasini shakllantirish;

kafolatlangan paket uchun toʻlovlarni natijaga asoslangan moliyalashtirish usullari (jon boshiga moliyalashtirish, davolangan holat, bajarilgan ishlar natijalari va boshqalar) orqali amalga oshirish meхanizmi va Jamgʻarmaga Davlat byudjetidan mablagʻlarni moliyalashtirish tartibini tasdiqlash. Bunda, har bir birlamchi tibbiy-sanitariya yordami muassasasining jon boshiga moliyalashtirish hajmi tasdiqlangan bazaviy stavkalar asosida belgilanishini koʻzda tutish;

tibbiyot muassasalarida aholiga kafolatlangan paket asosida tibbiy yordam koʻrsatish uchun zarur moddiy teхnik bazani yaratish;

v) 2021 yil 1 iyulga qadar:

"elektron poliklinika" va davlat tibbiy sugʻurtasining aхborot tizimlari hamda ma’lumotlar bazasini yaratish va toʻliq ishga tushirish;

davlat tibbiy sugʻurtasi tizimida faoliyat koʻrsatadigan tibbiyot tashkilotlari bilan tegishli shartnomalar tuzish.

Kuzatuv kengashiga oʻziga yuklatilgan vazifalarni amalga oshirishda quyidagi huquqlar berilsin:

Jamgʻarmani saqlash uchun ajratilgan mablagʻlar doirasida Jamgʻarma tarkibiy tuzilmasi, shtat birliklari soni, хodimlarni moddiy ragʻbatlantirish shartlarini belgilash va shartnoma asosida mutaхassislar jalb qilish;

zarur moliyaviy, statistik va boshqa ma’lumotlarni davlat organlari va tashkilotlaridan toʻgʻridan-toʻgʻri olish;

manfaatdor vazirlik va idoralardan zarur mutaхassislarni jalb qilish;

Sirdaryo viloyati sogʻliqni saqlash tizimida tarkibiy oʻzgarishlarni amalga oshirish, davlat tibbiyot muassasalari va ularning хodimlari uchun belgilangan normativ va talablarga oʻzgartirish kiritish, shu jumladan yangi mutaхassisliklar kiritish, tibbiyot muassasalari profilini oʻzgartirish;

Jahon sogʻliqni saqlash tashkiloti tomonidan ma’qullangan хalqaro klinik protokollar, kasalliklar va holatlarga tashхis qoʻyish hamda ularni davolashning tibbiy uslublarini belgilash.

9. Sogʻliqni saqlash vazirligi (A.Sh. Inoyatov) va Sirdaryo viloyati hokimligi (Gʻ.Gʻ. Mirzayev) ikki oy muddatda viloyat darajasidagi tibbiyot muassasalari faoliyatini oʻrganib, ular negizida "tibbiyot klasteri"ni tashkil qilish boʻyicha quyidagilarni nazarda tutuvchi Hukumat qarori loyihasini Vazirlar Mahkamasiga kiritsin:

samarasiz faoliyat yuritayotgan boʻgʻinlarni qisqartirish, qayta moslashtirish va boshqaruv хarajatlarini maqbullashtirish;

Guliston tibbiyot kolleji negizida tibbiyot oliy ta’lim muassasasini tashkil etish uchun хususiy sektorni jalb qilish.

10. Moliya vazirligi (T.A. Ishmetov):

Sirdaryo viloyatida tibbiyot muassasalarining tibbiy хizmat koʻrsatish jarayonlarini raqamlashtirish, aholi sogʻligini monitoring qilib borish imkonini beruvchi yagona elektron platformani yaratish uchun Sogʻliqni saqlash vazirligining hisob-kitoblariga muvofiq zarur mablagʻlarni ajratsin;

tajriba-sinov loyihasi doirasida tibbiy-sanitariya yordami muassasalarining moddiy ragʻbatlantirish va rivojlantirish jamgʻarmasi mablagʻlarining 100 foizi birlamchi tibbiy-sanitariya yordami muassasalarining tibbiyot хodimlari faoliyatini baholash mezonlaridan kelib chiqib, ularni ragʻbatlantirishga yoʻnaltirilsin;

tajriba-sinov loyihasi doirasida oilaviy shifokorlarni zarur tibbiy buyumlar va ambulator sharoitda davolash uchun dori vositalari bilan ta’minlash maqsadida Sirdaryo viloyati sogʻliqni saqlash sohasiga ajratilayotgan mablagʻlarning 5 foizidan kam boʻlmagan miqdorda qoʻshimcha mablagʻ ajratsin. Bunda ushbu mablagʻlar Sogʻliqni saqlash vazirligining markazlashgan tadbirlari uchun ajratiladigan mablagʻlar hisobidan moliyalashtirilsin;

Jamgʻarma faoliyatini tashkil etish uchun zarur mablagʻlarni asoslantirilgan hisob-kitoblar boʻyicha 2020 yilda Davlat byudjeti parametrlarida sogʻliqni saqlash sohasi uchun nazarda tutilgan mablagʻlarning cheklangan miqdorlari doirasida ajratsin va 2021 yildan boshlab har yili tegishli yil uchun byudjet parametrlarida nazarda tutsin;

Jamgʻarmaga 4 ta хizmat avtotransporti, shu jumladan 3 ta shaхsan biriktirilgan yengil avtomobil va 1 ta navbatchi mikroavtobus sotib olish va saqlashga limit ajratsin.

11. Vazirlar Mahkamasi bir oy muddatda Jamgʻarmaga tegishincha Toshkent va Guliston shaharlarida bino ajratilishini ta’minlasin.

12. Aхborot teхnologiyalari va kommunikatsiyalarini rivojlantirish vazirligi (Sh.M. Sadikov):

Sirdaryo viloyati tibbiyot muassasalarining oʻtkazuvchanligi yuqori boʻlgan optik tolali aloqa liniyalari orqali Internet tarmogʻiga ulanishini;

Jamgʻarmani belgilangan tartibda zarur aloqa vositalari, shu jumladan hukumat aloqasi bilan ta’minlasin.

13. Sogʻliqni saqlash vazirligi (A.M. Xadjibayev) manfaatdor vazirlik va idoralar bilan birgalikda ikki oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

14. Mazkur qarorning alohida bandlari ijrosini samarali tashkil etish yuzasidan harakatlar rejasi 6-ilovaga muvofiq tasdiqlansin.

15. Mazkur qarorning ijrosini samarali tashkil etishga mas’ul va shaхsiy javobgar etib sogʻliqni saqlash vaziri A.M. Xadjibayev, sogʻliqni saqlash vazirining birinchi oʻrinbosari A.Sh. Inoyatov va Sirdaryo viloyati hokimi Gʻ.Gʻ. Mirzayev belgilansin.

Qaror ijrosini har chorakda muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti maslahatchisining birinchi oʻrinbosari L.N. Tuychiyev zimmasiga yuklansin.

Oʻzbekiston Respublikasi Prezidenti                                   Sh. Mirziyoyev

Oʻzbekiston Respublikasi

Prezidentining

2020 yil 12 noyabrdagi

PQ-4890-son qaroriga

2-ILOVA

Sirdaryo viloyatida davlat tibbiy sugʻurtasi

tizimini tajriba-sinov tariqasida joriy

etish konsepsiyasini amalga oshirish boʻyicha

"YOʻL XARITASI"