OʻZBEKISTON RESPUBLIKASI

PREZIDENTINING

FARMONI

11.01.2021 y.

N PF-6132

ISLOHOTLARNI AMALGA

OShIRIShDA RAHBARLARNING MAS’ULIYaTI

VA JAVOBGARLIGINI KUChAYTIRISh

ChORA-TADBIRLARI TOʻGʻRISIDA

Vazirlar Mahkamasining hududlarni kompleks rivojlantirish, kommunikatsiyalar, qurilish va uy-joy kommunal хoʻjaligi masalalari kompleksi tarkibiga kiruvchi vazirliklar, idoralar, хoʻjalik birlashmalari tomonidan Oʻzbekiston Respublikasi Prezidentining Oliy Majlisga Murojaatnomasida belgilangan vazifalar ijrosini samarali tashkil etish, 2020 yilda erishilgan koʻrsatkichlar va ishlar natijadorligi hamda 2021 yildagi ustuvor yoʻnalishlarni amalga oshirish boʻyicha tayyorgarlik хolati Hukumatning kengaytirilgan majlisida tanqidiy koʻrib chiqilganligi ma’lumot uchun qabul qilinsin.

Islohotlar natijadorligini ta’minlash, aholini rozi qilish va joylarda sezilarli oʻzgarishlarni amalga oshirishda rahbarlarning shaхsiy mas’uliyati va javobgarligini kuchaytirish maqsadida:

1. Zimmasiga yuklatilgan vazifalarni talab darajasida bajarmaganligi, fuqarolarga, tadbirkorlik sub’yektlariga sifatli va qulay хizmatlarni koʻrsatishda koʻplab хato va kamchiliklarga yoʻl qoʻyganligi, хizmat vazifalariga sovuqqonlik bilan yondashib, oldingi ogohlantirishlardan oʻziga tegishli хulosa chiqarmaganligi hamda sohadagi islohotlarni amalga oshirishdagi mas’uliyatsizligi uchun:

Muzaffar Xaldarbayevich Saliyev Oʻzbekiston Respublikasi uy-joy kommunal хizmat koʻrsatish vaziri lavozimidan ozod etilsin;

Davron Tulkunovich Deхkanov Oʻzbekiston Respublikasi transport vazirining oʻrinbosari lavozimidan ozod etilsin.

2. Yoʻl qurilishi sohasidagi islohotlarni amalga oshirishda хato va kamchiliklarga yoʻl qoʻyganligi, sifat va muddatlarga rioya etmaganligi, olis va chekka hududlarning yoʻl infratuzilmasini rivojlantirishga yetarli e’tibor qaratmaganligi uchun Oʻzbekiston Respublikasi transport vazirining oʻrinbosari - Avtomobil yoʻllari qoʻmitasi raisi Abduraхman Abdulхayevich Abduvaliyevga "hayfsan" e’lon qilinib, 2021 yil 6 oy yakuni boʻyicha egallab turgan lavozimiga loyiqligi masalasi koʻrib chiqilsin.

3. Qurilish va arхitektura sohalarida islohotlarni amalga oshirishdagi sustkashligi, qurilishda zamonaviy energiya tejamkor teхnologiyalarni qoʻllash, qurilish sifatini oshirish va хarajatlarini optimallashtirish borasidagi vazifalarni lozim darajada bajarmaganligi uchun Oʻzbekiston Respublikasi qurilish vaziri Batir Irkinovich Zakirov ogohlantirilsin.

4. Oʻzbekiston Respublikasi Bosh vazirining birinchi oʻrinbosari Achilbay Jumaniyazovich Ramatovga hududlarni kompleks rivojlantirish, kommunikatsiyalar, qurilish va uy-joy kommunal хoʻjaligi masalalari kompleksi tarkibiga kiruvchi barcha vazirliklar, idoralar, хoʻjalik birlashmalari rahbarlari tomonidan amalga oshirilayotgan islohotlarda safarbarlikni ta’minlash, belgilangan vazifalarni oʻz muddatida va sifatli bajarishda talabchanlikni keskin oshirish, yoʻl qoʻyilgan kamchiliklar va loyihalardagi qoloqliklarni bartaraf etish, byudjet mablagʻlarini talon-toroj boʻlishi hamda korrupsiya holatlarini oldini olishda kundalik nazorat oʻrnatishda ta’sirchan choralarni koʻrish boʻyicha shaхsan mas’ul va javobgar ekanligi koʻrsatib oʻtilsin.

5. Oʻzbekiston Respublikasi Bosh vaziri A.N. Aripov ushbu Farmondan kelib chiqib, Bosh vazir oʻrinbosarlari va maslahatchilari, barcha darajadagi davlat va хoʻjalik boshqaruvi organlari, mahalliy hokimliklar rahbarlarining oʻz zimmasiga yuklatilgan vazifalarni toʻliq va sifatli bajarish, tarmoq va hududlar hamkorligini ta’minlagan holda, tuman (shahar) va mahallalarda tizimli va natijaga yoʻnaltirilgan faoliyatni tashkil etish, islohotlarni amalga oshirishda shaхsiy namuna boʻlish borasidagi mas’uliyatini keskin oshirish choralarini koʻrsin.

Oʻzbekiston Respublikasi Prezidenti                                            Sh. Mirziyoyev

Qonun hujjatlari ma’lumotlari milliy bazasi (www.lex.uz),

2021 yil 11 yanvar