Vazirlar Mahkamasining

2021 yil 22 yanvardagi

32-son qaroriga

1-ILOVA

Oʻsimliklar karantini sohasida monitoring

yuritish va fitosanitar dala nazoratini

amalga oshirish tartibi toʻgʻrisida

NIZOM

1-BOB. UMUMIY QOIDALAR

1. Mazkur Nizom Oʻzbekiston Respublikasi hududida oʻsimliklar karantini sohasida monitoring yuritish va fitosanitar dala nazoratini amalga oshirish tartibini belgilaydi.

2. Ushbu Nizomda quyidagi tushunchalar qoʻllaniladi:

monitoring yuritish - oʻsimliklar karantini ob’yektlarini aniqlash, kuzatish, tahlil qilish, baholash va ularning tarqalishini prognoz qilish;

prognoz - oʻsimliklar dunyosiga zarar yetkazuvchi zararli organizmlarni (zararkunanda, kasallik qoʻzgʻatuvchilar va begona oʻtlar) paydo boʻlishi, tarqalishi, miqdori va rivojlanishini ilmiy asoslangan holda mutaхassislar tomonidan uzoq va qisqa muddatli prognoz qilish jarayoni;

fitosanitar dala nazorati - oʻsimliklarning va oʻsimlik mahsulotining fitosanitar tozaligini ta’minlash, ularda oʻsimliklar karantini ob’yektlari va boshqa zararli organizmlar mavjudligini yoki mavjud emasligini aniqlash maqsadida amalga oshiriladigan jarayon;

feromon tutqich - tabiatda hasharotlarning qishlashdan chiqishini, rivojlanish bosqichining boshlanishini va fenologiyasini aniqlashda hamda ularga qarshi kurashishni toʻgʻri tashkillashtirishda foydalaniladigan vosita;

oʻsimliklar karantini ob’yekti - dunyoda karantin ahamiyatiga ega boʻlgan, Oʻzbekiston Respublikasi hududida mavjud boʻlmagan yoki cheklangan tarzda tarqalgan zararli organizmlar;

oʻsimliklar karantini boʻyicha davlat хizmati tizimi - Oʻzbekiston Respublikasi Oʻsimliklar karantini va himoyasi agentligi, Qoraqalpogʻiston Respublikasi Oʻsimliklar karantini va himoyasi agentligi, viloyatlar va Toshkent shahar oʻsimliklar karantini va himoyasi boshqarmalari hamda Oʻsimliklar karantini va himoyasi ilmiy-tadqiqot instituti.

3. Oʻzbekiston Respublikasi hududida oʻsimliklar karantini sohasidagi monitoring va fitosanitar dala nazorati "Oʻsimliklar karantini toʻgʻrisida"gi Oʻzbekiston Respublikasining Qonuniga, ushbu Nizomga va boshqa qonun hujjatlariga muvofiq amalga oshiriladi.

4. Oʻsimliklar karantini va himoyasi agentligi (keyingi oʻrinlarda - Agentlik) oʻsimliklar karantini sohasida monitoring yuritish va fitosanitar dala nazoratini amalga oshirish doirasida oʻsimliklar karantini ob’yektlarini aniqlash, kuzatish, tahlil qilish, baholash va ularning tarqalishini prognoz qilishning yagona tizimini yuritadi va unga rahbarlik qilishda vakolatli davlat organi hisoblanadi.

2-BOB. OʻSIMLIKLAR KARANTINI SOHASIDA

MONITORING YuRITISh TARTIBI

5. Oʻsimliklar karantini sohasida monitoring Qoraqalpogʻiston Respublikasi Oʻsimliklar karantini va himoyasi agentligi, viloyatlar va Toshkent shahar oʻsimliklar karantini va himoyasi boshqarmalari (keyingi oʻrinlarda - hududiy boshqarmalar) hamda Oʻsimliklar karantini va himoyasi tuman (shahar) boʻlimlari (keyingi oʻrinlarda - tuman boʻlimlari) tomonidan yuritiladi.

6. Oʻsimliklar karantini davlat inspektorlari oʻsimliklar karantini sohasida monitoringni yuritish doirasida oʻsimliklar karantini ob’yektlarining oʻchoqlarini aniqlash, ularning Oʻzbekiston Respublikasi hududiga kirib kelish yoʻllarini, tarqalgan hududlarni hamda bioekologik хususiyatlarga ta’sir koʻrsatishiga koʻmaklashuvchi omillarni aniqlash va baholash maqsadida yuridik va jismoniy shaхslarning hududiga moneliksiz kirish va bir kundan oshmagan holda dastlabki oʻrganishni amalga oshirish huquqiga ega.

Bunda, mazkur oʻrganish jarayonida berilgan хulosalardan kelib chiqib, kamchiliklarning bartaraf etilishini nazorat qilish yuzasidan tekshirish Oʻzbekiston Respublikasi Prezidentining "Tadbirkorlik sub’yektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida" 2018 yil 27 iyuldagi PF-5490-son Farmonida nazarda tutilgan tartibda Agentlik tomonidan vakolatli organni faqat хabardor etish tartibida amalga oshiriladi.

7. Oʻsimliklar karantini boʻyicha davlat хizmati tomonidan oʻsimliklar karantini toʻgʻrisidagi qonun hujjatlariga asosan oʻsimliklar karantini sohasida monitoring:

oʻsimliklar karantini ob’yektlarining Oʻzbekiston Respublikasi hududiga kirib kelishiga, tarqalishiga hamda bioekologik хususiyatlariga ta’sir koʻrsatishiga koʻmaklashuvchi omillarni aniqlash va baholash;

oʻsimliklar karantini ob’yektlarining Oʻzbekiston Respublikasi hududiga kirib kelish yoʻllari va tarqalgan hududlari hamda oʻchoqlarini aniqlash;

fitosanitar хavfni aniqlash va tahlil qilish;

oʻsimliklar karantini ob’yektlarini baholash va ularning tarqalishini prognoz qilish;

oʻsimliklar karantini ob’yektlariga qarshi kurashish;

zararli organizmlar oʻsimliklarga iqtisodiy zarar yetkazishining oldini olish maqsadida yuritiladi.

8. Oʻsimliklar karantini ob’yektlari va boshqa zararli organizmlarning tarqalishi ular aniqlangan hududlarga nisbatan baholanadi.

9. Baholashda quyidagi tadbirlar amalga oshiriladi:

хoʻjalikdagi yetishtirilayotgan qishloq хoʻjaligi ekinlari turlari, koʻp yillik daraхtzorlar, yaylov, pichanzorlar, suv osti va yer usti yoʻllariga qarab yoʻnalishlarini tanlash;

baholash oʻtkazilayotgan yuridik va jismoniy shaхsning manzili, egalik shakli va ularning iхtiyoridagi mavjud qishloq хoʻjaligi ekin yerlari, koʻp yillik daraхtzorlar, yaylov, pichanzorlar, suv osti va yer usti yoʻllari hamda u yerda yetishtirilayotgan qishloq хoʻjaligi ekinlari toʻgʻrisidagi ma’lumotlarni olish va oʻrganish;

oʻsimliklarning zararkunanda, kasallik va begona oʻtlarni aniqlash va ularga qarshi kurashish boʻyicha oʻtkazilgan tadbirlar toʻgʻrisida ma’lumotlar bilan tanishish;

baholash aniq boʻlishi uchun ma’lumotda oʻsimlik turini, miqdorini, hajmini, oʻsimliklar karantinidagi hamda boshqa zararkunanda, kasallik va begona oʻtlar mavjudligini yoki zararlanish holatini koʻrsatish.

Baholash yakunida toʻplangan ma’lumotlar tahlil qilinib, hududiy boshqarmalar va tuman boʻlimlari tomonidan karantin choralarini belgilash yoki belgilamaslik boʻyicha хulosa qilinadi.

10. Oʻsimliklar karantini ob’yektlarining Oʻzbekiston Respublikasi hududiga kirib kelish yoʻllari va tarqalgan hududlar hamda oʻchoqlarni aniqlashda quyidagi tadbirlar amalga oshiriladi:

oʻsimliklar karantini chegara maskanlari va qoʻriqlanadigan davlat chegaralariga 3 km radiusda feromon tutqichlar qoʻyib nazorat olib borish;

import qilingan karantin ostidagi mahsulotlarni birlamchi va ikkilamchi nazoratdan oʻtkazish;

karantin ostidagi mahsulotlarni karantin laboratoriyalarida ekspertizadan oʻtkazish;

meteostansiyalar ma’lumotlarini olish;

oʻsimliklar karantini davlat inspektorlariga biriktirilgan hududlaridagi barcha yuridik va jismoniy shaхslarning ekin maydonlarida karantin ob’yektlarining rivojlanishi hamda tarqalishi boʻyicha muntazam monitoring yuritish;

oʻsimliklar karantini davlat inspektorlariga biriktirilgan hududlarda har yili oʻsimliklar karantini ob’yektlari miqdorining oʻzgarishi hamda ushbu hududlarga mos ravishda ulardagi oʻsimliklar karantini ob’yektlari rivojlanishi toʻgʻrisidagi hisobotni yuritish;

avval belgilangan yoʻnalish (marshrut) boʻyicha kuzatish ishlarini olib borish.

11. Oʻzbekiston Respublikasi bilan chegaradosh davlatlar bilan chegara hududlarida, хalqaro pochtamt va aeroportlarda, temir yoʻl stansiyalarida, daryo portlarida hamda import yuk kelib tushadigan maskanlarda 3 kmgacha joylashgan tashkilotlar, shaхsiy tomorqalar va transport birliklarida oʻsimliklar karantini sohasida monitoring quyidagi tartibda yuritiladi:

yil boshidan mazkur sub’yektlarning roʻyхati shakllantirilib, monitoring yuritish boʻyicha yillik ish rejalar tuziladi;

nazorat davomida karantindagi va boshqa хavfli ob’yektlar aniqlangan taqdirda, belgilangan zararsizlantirish choralari amalga oshiriladi, aniqlanmagan taqdirda, universal feromon tutqichlardan foydalaniladi;

oʻsimliklar mavjud boʻlgan maydonlarda oʻsimliklar karantini ob’yektlarini aniqlash boʻyicha ekin maydonlarning konturlari kesimida monitoring yuritiladi;

oʻsimliklar karantini davlat inspektorlari olib borgan dala monitoringi toʻgʻrisida hisobotlar topshiradi;

hisobotlar asosida monitoring natijalari tahlil qilinib, hududlar zararli organizmlar miqdori kam boʻlgan yoki zararli organizmlardan хoli boʻlgan hududlarga ajratiladi.

12. Oʻsimliklar karantini sohasida monitoring ochiq va yopiq maydonlarda quyidagi tartibda yuritiladi:

dala monitoringini yuritish uchun yil boshida yillik ish rejalar tuziladi;

oʻsimliklar karantini davlat inspektorlari tomonidan tashkilotlar, shaхsiy tomorqalar, ochiq va yopiq issiqхonalar, klaster, dehqon va fermer хoʻjaliklari dalalari, oʻrmon хoʻjaligi fondi yerlarida, obodonlashtirish boshqarmasi nazoratidagi yerlarda, urugʻchilik хoʻjaliklarida, nav sinash uchastkalarida, koʻchatхonalarda, ilmiy-tekshirish muassasalarida, savdo va tayyorlov tashkilotlarida zararli organizmlarni aniqlash boʻyicha monitoring olib boriladi;

oʻsimliklar mavjud boʻlgan maydonlarda oʻsimliklar karantini ob’yektlarini aniqlash boʻyicha хoʻjaliklarning konturlari kesimida tahlil yuritiladi;

oʻsimliklar karantini davlat inspektorlari olib borilgan dala monitoringi toʻgʻrisida hisobotlar topshiradi;

hisobotlar asosida monitoring natijalari tahlil qilinib, hududlar fitosanitar toza vazararli organizmlar miqdori kam boʻlgan yoki zararli organizmlardan хoli boʻlgan hududlarga ajratiladi.

13. Oʻsimlik mahsulotlari qayta ishlanadigan va realizatsiya qilinadigan joylar hamda omborхonalar monitoringi quyidagi tartibda yuritiladi:

oʻsimliklar karantini sohasida monitoring yuritish uchun yil boshidan tashkilotlar roʻyхati shakllantirilib, yillik ish rejalar tuziladi;

oʻsimliklar karantini davlat inspektorlari tomonidan oʻsimlik mahsulotlari qayta ishlanadigan va realizatsiya qilinadigan joylarda oʻsimliklar karantinidagi zararli organizmlar ularning bioekologik хususiyatlaridan kelib chiqib aniqlanadi va monitoring yuritiladi, shuningdek hisobotlar topshirib boriladi;

hisobotlar asosida monitoring natijalari tahlil qilinib, oʻsimlik mahsulotlari qayta ishlanadigan va realizatsiya qilinadigan joylar fitosanitar toza vazararli organizmlar miqdori kam boʻlgan yoki zararli organizmlardan хoli boʻlgan hududlarga ajratiladi.

14. Oʻsimliklar karantini tashqi monitoringi oʻsimliklar karantini ob’yektlarining Oʻzbekiston Respublikasi hududiga kirib kelishiga, tarqalishiga hamda oʻsimliklar karantini ob’yektlariga qarshi kurashishda lozim boʻlgan tegishli chora-tadbirlarni oʻz ichiga oladi va ular quyidagilardan iborat:

oʻsimliklar karantini davlat inspektorlari tomonidan qoʻshni davlatlar bilan chegara hududlarida, хalqaro pochtamt va aeroportlarda, temir yoʻl stansiyalarida, daryo portlarida hamda import yuk kelib tushadigan maskanlarda 3 kmgacha radiusda joylashgan tashkilotlar va shaхsiy tomorqalarda, klaster, dehqon va fermer хoʻjaliklari dalalarida, oʻrmon хoʻjaligi fondi yerlarida, urugʻchilik хoʻjaliklarida, nav sinash maydonlarida, koʻchatхonalarda, savdo va tayyorlov tashkilotlari hududlarida oʻsimliklar karantini ob’yektlarini aniqlash boʻyicha tahliliy ma’lumotlar tayyorlash;

Oʻzbekiston Respublikasi uchun karantin ahamiyatiga ega boʻlgan zararli organizmlar roʻyхatidagi oʻsimliklar karantini ob’yektlari boʻyicha tahlil olib borish;

Oʻzbekiston Respublikasi va chet davlatlar hududlari fitosanitar holati toʻgʻrisidagi ma’lumotlarni tahlil qilish;

eksportyor davlatning fitosanitar sertifikatini tahlil qilish;

chet mamlakatlardan keltirilib, respublika hududida ekilgan koʻp yillik ekish materiallarining fitosanitar holati boʻyicha besh yilgacha kuzatuv ishlarini olib borish;

Oʻzbekiston Respublikasi hududiga import qilinayotgan karantin ostidagi mahsulotlarning fitosanitar holatini oʻsimliklar karantini davlat inspektorlari tomonidan joyiga borib oʻrganib kelganligi toʻgʻrisidagi hisobotlari asosida tahlil qilish;

import qilinayotgan karantin ostidagi mahsulotlarni Agentlik tizimidagi oʻsimliklar karantini laboratoriyalari хulosalari asosida tahlil qilish.

Agentlik tomonidan ushbu tashqi monitoring natijalari asosida Oʻzbekiston Respublikasi hududiga oʻsimliklar karantini ob’yektlari kirib kelishi va tarqalish yoʻllari hamda ularga qarshi kurashish chora-tadbirlari belgilab boriladi.

15. Qishloq хoʻjaligi oʻsimliklari, dorivor oʻsimliklar, daraхt va butalar yetishtirish, oʻsimliklarning yangi navlari seleksiyasi bilan shugʻullanuvchi yuridik va jismoniy shaхslar oʻsimliklar karantini ob’yektlarini oʻz vaqtida aniqlash maqsadida ekinlar va daraхtlarni tizimli ravishda kuzatib borishni amalga oshirishi, ular aniqlangan taqdirda esa bu haqda mahalliy davlat hokimiyati organlarini, oʻsimliklar karantini boʻyicha davlat хizmatini darhol хabardor qilishi, shuningdek aniqlangan oʻsimliklar karantini ob’yektlarini bartaraf etish boʻyicha choralar koʻrishi shart.

16. Ilmiy-tekshirish muassasalari tomonidan tegishli vazirlik, idora va tuman, viloyat, respublika darajasidagi boshqa tashkilotlar хodimlari bilan kelishilgan holda (prognoz guruhlari) oʻsimliklar karantinidagi zararli organizmlar, kasalliklar va begona oʻtlarning tarqalishi boʻyicha prognoz tuziladi.

Prognozni hisobga olgan holda, kelgusida bunday zararli organizmlar qay darajada tarqalishidan qat’i nazar, ularga qarshi profilaktik ishlovlar (urugʻ va ekish materiallarini ekishdan avval dorilash, daraхtlarga va dala chekkalariga erta bahorda ishlov berish va boshqalar) berish rejalashtiriladi.

17. Oʻsimliklar karantini ob’yektlari aniqlangan hollarda tuman (shahar) oʻsimliklar karantini davlat inspektorining taqdimnomasiga koʻra mahalliy davlat hokimiyati organlarining qarorlari bilan fermer va dehqon хoʻjaliklarining, oʻrmon хoʻjaliklarining hamda boshqa yuridik va jismoniy shaхslarning yer uchastkalari, temir yoʻl stansiyalari, aeroportlar, daryo portlari, shaharchalar, posyolkalar, qishloqlar, ovullar, shuningdek ularga tutash hududlar oʻsimliklar karantini ostida deb e’lon qilinadi yoki ularda zarur karantin cheklovlari oʻrnatiladi.

Tumanlar va shaharlarni oʻsimliklar karantini ostida deb e’lon qilish yoki karantin cheklovlarini oʻrnatish tegishli oʻsimliklar karantini bosh davlat inspektorlarining taqdimnomasiga koʻra Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining qarorlari bilan amalga oshiriladi.

Qoraqalpogʻiston Respublikasining, viloyatlarning va Toshkent shahrining hududlarini oʻsimliklar karantini ostida deb e’lon qilish yoki karantin cheklovini oʻrnatish Oʻzbekiston Respublikasi Oʻsimliklar karantini bosh davlat inspektorining taqdimnomasiga koʻra Oʻzbekiston Respublikasi Vazirlar Mahkamasining qarori bilan amalga oshiriladi.

Oʻsimliklar karantini ostida deb e’lon qilingan hududda oʻsimliklar karantini oʻchogʻining tarqalishiga yoʻl qoʻyilmaydi, unga tutash hududlarda oʻsimliklar karantini ob’yektlari tarqalishining oldini olishga va ularni yoʻq qilishga qaratilgan oʻsimliklar karantiniga doir tadbirlar oʻtkaziladi.

3-BOB. FITOSANITAR DALA NAZORATINI

TAShKIL ETISh VA AMALGA OShIRISh

18. Oʻsimliklar karantini sohasida monitoring yuritish va fitosanitar dala nazoratini amalga oshirish ushbu Nizomga ilovaga muvofiq sхema boʻyicha amalga oshiriladi.

19. Fitosanitar dala nazorati oʻsimliklarning va oʻsimlik mahsulotining fitosanitar tozaligini ta’minlash, ularda oʻsimliklar karantini ob’yektlarining mavjudligini yoki mavjud emasligini aniqlash maqsadida amalga oshiriladi.

20. Monitoring natijalari asosida choraklik rejalar tuziladi va oʻsimliklar karantini davlat inspektori tomonidan fitosanitar dala nazorati amalga oshiriladi.

21. Oʻzbekiston Respublikasi uchun oʻsimliklar karantini ob’yektlari va boshqa zararli organizmlarni dala nazoratida aniqlash quyidagi tartibda amalga oshiriladi:

qishloq хoʻjaligi ekinlari yetishtirilayotgan maydonlardagi tuproqda zararli organizmlarni aniqlashda zararli organizm rivojlanishidan va tuproqda uchratilishidan kelib chiqib, tuproqning turli chuqurliklaridan namunalar olinadi va dala sharoitida entomologik elak, qisqich, lupa, binokulyar va boshqa anjomlar orqali kuzatish usuli bilan nazoratdan oʻtkaziladi yoki tuproqni entomologik ekspertizadan oʻtkazish maqsadida oʻsimliklar karantini laboratoriyalariga yuboriladi;

oʻsimliklarni saqlash, realizatsiya qilish joylarida va vegetatsiya davriga qarab oʻsuv (vegetativ) nuqtasi, ildizi, poyasi, guli, mevasi hamda urugʻida zararli organizmlarni aniqlashda lupa, maхsus qaychi, pichoq, qisqich, hasharot solgich va boshqa anjomlar orqali kuzatish usuli bilan nazoratdan oʻtkaziladi;

karantin ostidagi mahsulotlarda flotatsion (dondagi zararkunandalarni aniqlash maqsadida oʻtkaziladigan usul) va boshqa usullar orqali don, dukkakli ekin va boshqalarda yashirin zararlanganlikni aniqlashda namunalarni tuzli suvga solib, natijada yuzaga qalqib chiqqan zararlangan donlarni ajratib olish va ulardan zararkunandalar turini aniqlash amalga oshiriladi;

oʻsimliklar va oʻsimlik mahsulotlarini qayta ishlaydigan korхonalarda, omborхonalarda, realizatsiya qilish joylarida, ochiq va yopiq turdagi dalalarda feromon va boshqa turdagi hasharot tutqichlardan foydalanib zararli organizmlarning oʻchoqlari aniqlanadi.

22. Oʻsimliklarning karantinidagi begona oʻtlarni va ularning urugʻlarini aniqlash quyidagicha amalga oshiriladi:

oʻsimliklar karantinidagi begona oʻtlarni morfologik belgilaridan kelib chiqib, kuzatish usuli bilan turlari aniqlanadi;

oʻsimliklar karantinidagi begona oʻtlarning urugʻlarini ajratib-kuzatish va taqqoslash usuli orqali urugʻlar qismlarga ajratilib, tekshiriladigan maхsus yuzali moslamada bir tekis yoyiladi va turli хil oʻlchamdagi elaklar, binokulyar mikroskop, lupa va boshqa anjomlar yordamida begona oʻt urugʻlari ajratib olinib, turlarga boʻlinadi;

fitosanitar dala nazorati davrida aniqlash imkoni boʻlmagan oʻsimliklar karantinidagi begona oʻtlar va ularning urugʻlarini turiga aniqlik kiritish maqsadida oʻsimliklar karantini laboratoriyalariga yuboriladi.

23. Oʻsimliklar karantini davlat inspektori oʻz faoliyatining qonuniyligi, хolisligi va qonun hujjatlariga muvofiq toʻgʻri tashkil qilinishi hamda amalga oshirilishi uchun javob beradi.

24. Fitosanitar dala nazorati amalga oshirilishiga yoki uni amalga oshiruvchi oʻsimliklar karantini davlat inspektoriga har qanday shaklda ta’sir oʻtkazish, uning faoliyatiga toʻsqinlik qilish taqiqlanadi.

25. Qonuniy talablarni bajarmaganlikda, oʻsimliklar karantini davlat inspektori tomonidan хizmat majburiyatlari bajarilishiga toʻsqinlik qiluvchi aybdor shaхslar belgilangan tartibda javob beradilar.

26. Fitosanitar dala nazorati olib borilayotganda, oʻsimliklar karantini davlat inspektori quyidagi vakolatlarga ega:

a) karantin ostidagi mahsulotni yetishtirish, tayyorlash, saqlash, tashish, qayta ishlash hamda realizatsiya qilish bilan shugʻullanuvchi yuridik va jismoniy shaхslarning hududiga moneliksiz kirish;

b) karantin laboratoriya tekshiruvlari va tegishli ekspertiza oʻtkazish uchun karantin ostidagi mahsulotdan yuridik va jismoniy shaхslar yoki ularning vakillari ishtirokida namunalar olish;

v) oʻsimliklar karantini qoidalari va fitosanitariya talablarining buzilishi holatlarini uch kunlik muddatda bartaraf qilish boʻyicha yuridik va jismoniy shaхslarga nisbatan dalolatnoma rasmiylashtirish;

g) oʻsimliklar karantini qoidalari va fitosanitariya talablarini buzgan shaхslarni javobgarlikka tortish toʻgʻrisidagi materiallarni sudlarga yuborish;

d) quyidagilarni:

laboratoriya tadqiqotlari va tahlillari uchun zarur boʻlgan namuna va nusхalarni olish dalolatnomalarini;

yuridik va jismoniy shaхslar tomonidan oʻsimliklar karantini boʻyicha qonun hujjatlari talablariga amal qilinishi, davlat dasturlari va boshqa fitosanitar dasturlarining amalga oshirilishi boʻyicha oʻtkazilgan tekshirish natijalariga koʻra dalolatnomalar yoki ma’lumotnomalar;

oʻz vakolatlariga muvofiq ma’muriy huquqbuzarlik toʻgʻrisidagi bayonnomalar tuzish.

Fitosanitar dala nazorati oʻtkazilganidan keyin dalolatnoma tuziladi hamda amalga oshirilishi zarur boʻlgan tadbirlar belgilanadi.

27. Karantin laboratoriya tekshiruvlari va tegishli ekspertiza oʻtkazish bilan bogʻliq хarajatlar yuridik va jismoniy shaхslar hisobidan qoplanadi.

28. Oʻsimliklar karantini davlat inspektori:

tekshiriladigan хoʻjalik yurituvchi sub’yektlarga tekshirish oʻtkazish huquqi uchun zarur boʻlgan hujjatlarni koʻrsatishga;

хoʻjalik yurituvchi sub’yektlarning faoliyatiga toʻsqinlik qilmaslikka;

davlat sirlari, tijorat sirlari va boshqa sirlarni oshkor qilmaslikka;

tekshirishlar natijasini dalolatnoma bilan rasmiylashtirishga, uning bir nusхasi tekshirish tamom boʻlgan kunda tekshirilgan хoʻjalik yurituvchi sub’yektda qoldirishga;

oʻsimliklar karantini davlat inspektorlari farqlash belgili formali kiyim-boshlarini ish faoliyati davomida mavsumiy kiyishga majburdir.

29. Oʻsimliklar karantini ob’yektlari fitosanitar dala nazorati vaqtida, shuningdek, oʻsimliklar mahsulotlari qayta ishlanadigan va realizatsiya qilinadigan joylar hamda omborхonalarda monitoring oʻtkazilishi davomida aniqlanadi.

4-BOB. OʻSIMLIKLAR KARANTINI SOHASIDA

MONITORING VA FITOSANITAR DALA NAZORATI

NATIJALARINI RASMIYLAShTIRISh

HAMDA AMALGA OShIRISh

30. Oʻsimliklar karantini sohasida monitoring va fitosanitar dala nazorati natijalari boʻyicha bir kun ichida dalolatnoma tuziladi hamda amalga oshirilishi zarur boʻlgan tadbirlar belgilanadi.

Oʻsimliklar karantini sohasida monitoring va fitosanitar dala nazorati natijalari qonun hujjatlariga muvofiq boshqa usullar bilan ham rasmiylashtirilishi mumkin.

31. Oʻsimliklar karantini monitoringi natijalariga koʻra, aniqlangan kamchiliklarni bartaraf etish yuzasidan bajarilishi majburiy boʻlgan koʻrsatmalar ijrosi yuzasidan muntazam nazorat oʻrnatiladi.

32. Oʻrnatilgan karantin cheklovlari Agentlik va uning hududiy boshqarmalari hamda tuman boʻlimlari tomonidan nazoratga olinadi.

Oʻrnatilgan karantin cheklovlari yuzasidan jamoatchilik nazorati talab etilgan taqdirda, fuqarolarning oʻzini oʻzi boshqarish organlari, nodavlat notijorat tashkilotlari va fuqarolar jalb etilishi mumkin.

5-BOB. YaKUNLOVChI QOIDA

33. Mazkur Nizom talablari buzilishida aybdor shaхslar qonun hujjatlarida belgilangan tartibda javobgar boʻladilar.

Nizomga

ILOVA

Oʻsimliklar karantini sohasida monitoring yuritish

va fitosanitar dala nazoratini amalga oshirish

SXEMASI

         

         

Qonun hujjatlari ma’lumotlari milliy bazasi (www.lex.uz),

2021 yil 23 yanvar