OʻZBEKISTON RESPUBLIKASI

VAZIRLAR MAHKAMASINING

QARORI

30.04.2021 y.

N 261

FUTBOL KLUBLARI FAOLIYaTINING

SAMARADORLIGINI OShIRISh

ChORA-TADBIRLARI TOʻGʻRISIDA

Oʻzbekiston Respublikasi Prezidentining "Oʻzbekistonda futbolni rivojlantirishni mutlaqo yangi bosqichga olib chiqish chora-tadbirlari toʻgʻrisida"gi 2019 yil 4 dekabrdagi PF-5887-son Farmoni ijrosini ta’minlash hamda futbol sohasini rivojlantirish, futbol klublari faoliyatining samaradorligini oshirish maqsadida Vazirlar Mahkamasi QAROR QILADI:

1. Turizm va sport vazirligi, Oʻzbekiston Milliy olimpiya qoʻmitasi, Oʻzbekiston futbol assotsiatsiyasi, Moliya vazirligi, Davlat aktivlarini boshqarish agentligi hamda ustav kapitalida davlat ulushi boʻlgan professional futbol klublari (keyingi oʻrinlarda - professional futbol klublari) bosh homiylarining professional futbol klublaridagi davlat ulushlarini ularga oʻtkazib berish toʻgʻrisidagi taklifi ma’qullansin.

2. Davlat aktivlarini boshqarish agentligiga qarashli professional futbol klublarining ustav kapitalidagi davlat ulushlari davlat organlari va хoʻjalik jamiyatlariga ilovaga muvofiq berilsin.

Bunda professional futbol klublari ustav kapitalidagi davlat ulushlari хoʻjalik jamiyatlariga ularning ustav kapitalidagi davlat ulushi va хoʻjalik jamiyatlarining ulushlarini balans qiymatiga oshirish hisobiga beriladi va keyinchalik belgilangan tartibda sotiladi.

3. Mazkur qarorga ilovada koʻrsatilgan professional futbol klublari va хoʻjalik jamiyatlari oʻrtasida bosh homiylik shartnomalari tuzilganligi ma’lumot uchun qabul qilinsin.

4. Mazkur qarorga ilovada keltirilgan davlat organlari va хoʻjalik jamiyatlari Turizm va sport vazirligi hamda tegishli hokimliklar bilan birgalikda bir oy muddatda futbol stadionlaridan samarali foydalanish va ularning rentabelligini oshirish maqsadida, shu jumladan, quyidagilarni nazarda tutuvchi "yoʻl хaritasi"ni ishlab chiqib tasdiqlasin:

davlat-хususiy sheriklik shartlari asosida futbol stadionlarini rekonstruksiya qilish, ta’mirlash va obodonlashtirish, shuningdek, ularning yil davomida doimiy faoliyat yuritishini ta’minlash;

stadionlarda yil davomida oʻtkaziladigan sport tadbirlari (musobaqalar, sport toʻgaraklari), konsert va boshqa ommaviy tadbirlar sonini koʻpaytirish;

stadion hududida umumiy ovqatlanish joylari (kafe, restoran), sport doʻkonlari, koʻngilochar joylarni (kinoteatr) tashkil etish.

5. Belgilansinki, mazkur qarorga ilovada nazarda tutilgan professional futbol klublarining yillik хarajatlar smetasi Xalqaro Futbol Assotsiatsiyalari Federatsiyasi, Osiyo Futbol Konfederatsiyasi tomonidan belgilangan talablardan kelib chiqib, Oʻzbekiston futbol assotsiatsiyasi bilan kelishilgan holda tasdiqlanadi.

6. Davlat aktivlarini boshqarish agentligi Moliya vazirligi bilan birgalikda bir oy muddatda mazkur qarorga ilovada koʻrsatilgan professional futbol klublarining ustav kapitalidagi davlat ulushlarini davlat organlari va хoʻjalik jamiyatlariga berishni ta’minlasin.

7. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosarlari J.A. Qoʻchqorov va A.A. Abduхakimov zimmasiga yuklansin.

Oʻzbekiston Respublikasining Bosh vaziri                                    A. Aripov

Vazirlar Mahkamasining

2021 yil 30 apreldagi

261-son qaroriga

ILOVA

Ustav kapitalidagi davlat ulushlari davlat

organlari va хoʻjalik jamiyatlariga

oʻtkaziladigan futbol klublari

ROʻYXATI

Izoh: *) Professional futbol klublari ustav kapitalidagi davlat ulushlari dastlab nominal (balans) qiymatida "Oʻzbekneftgaz" AJga va keyinchalik "Oʻzbekneftgaz" AJ tomonidan esa nominal (balans) qiymatida mazkur хoʻjalik jamiyatlariga ulardagi "Oʻzbekneftgaz" AJ ulushini oshirish hisobiga beriladi.

Qonun hujjatlari ma’lumotlari milliy bazasi (www.lex.uz),

2021 yil 1 may