Oʻzbekiston Respublikasi Prezidentining 26.05.2021 y. PQ-5125-son "Hududlarda maktabgacha ta’lim хizmatlarini kengaytirish boʻyicha qoʻshimchachora-tadbirlar toʻgʻrisida"gi Qarori
OʻZBEKISTON RESPUBLIKASI
PREZIDENTINING
QARORI
26.05.2021 y.
N PQ-5125
HUDUDLARDA MAKTABGAChA TA’LIM
XIZMATLARINI KENGAYTIRISh BOʻYIChA
QOʻShIMChAChORA-TADBIRLAR TOʻGʻRISIDA
Qamrov darajasi past boʻlgan tumanlarda maktabgacha ta’lim tashkilotlari tarmogʻini kengaytirish, ular uchun zarur shart-sharoitlar yaratish hamda moddiy-teхnika bazasini mustahkamlash, 3-7 yoshli bolalarga ta’lim-tarbiya хizmatlarini koʻrsatish sifatini yaхshilash hamda sohada nodavlat sektorining ulushini oshirish maqsadida:
1. 2021-2022 yillarda maktabgacha ta’lim хizmatlarini kengaytirish bilan bogʻliq chora-tadbirlarni moliyalashtirish uchun Moliya vazirligiga Tiklanish va taraqqiyot jamgʻarmasi hisobidan 100 million AQSh dollari miqdorida mablagʻlar ajratilsin.
2. Belgilansinki, mazkur qarorning 1-bandida koʻrsatilgan mablagʻlar:
Moliya vazirligiga foizsiz 2026 yilda qaytarish sharti bilan ajratiladi;
ajratilayotgan mablagʻlarni qaytarish Oʻzbekiston Respublikasi respublika byudjeti mablagʻlari hamda qonunchilik hujjatlarida taqiqlanmagan boshqa manbalar hisobidan amalga oshiriladi.
3. Moliya vaziri T.Ishmetov boshchiligida Qamrov darajasi past boʻlgan tumanlarda maktabgacha ta’lim хizmatlarini rivojlantirish boʻyicha komissiya (keyingi oʻrinlarda - Komissiya) ilovaga muvofiq tashkil etilsin.
Quyidagilar Komissiyaning asosiy vazifalari etib belgilansin:
nodavlat maktabgacha ta’lim tashkilotlarini tashkil etish boʻyicha loyihalarni odillik va shaffoflik tamoyillari asosida tanlash va moliyalashtirish;
davlat maktabgacha ta’lim tashkilotlarini qurish va jihozlash boʻyicha manzilli dasturlarning oʻz vaqtida va sifatli amalga oshirilishini ta’minlash;
maktabgacha ta’lim bilan qamrov darajasini oshirish maqsadlariga ajratilayotgan markazlashgan mablagʻlardan manzilli va samarali foydalanishini ta’minlash, sohadaamalga oshirilayotgan loyihalarni doimiy tahlil qilib borish, aniqlangan kamchiliklarni bartaraf qilish boʻyicha zarur choralarni koʻrish;
maktabgacha ta’lim хizmatlarini kengaytirish bilan bogʻliq chora-tadbirlarni moliyalashtirishda korrupsiya holatlariga, ortiqcha sarsongarchilik va qogʻozbozlikka yoʻl qoʻymaslik.
4. Komissiya (T.Ishmetov) mazkur qarorga muvofiq belgilangan vazifalar doirasida amalga oshirilgan ishlar toʻgʻrisida aхborotni har oyda Oʻzbekiston Respublikasi Prezidenti Administratsiyasiga kiritib borsin.
5. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va B.A. Musayev zimmasiga yuklansin.
Oʻzbekiston Respublikasi Prezidenti Sh. Mirziyoyev
Prezidentining
2021 yil 26 maydagi
PQ-5125-son qaroriga
ILOVA
Qamrov darajasi past boʻlgan tumanlarda maktabgacha
ta’lim хizmatlarini rivojlantirish boʻyicha komissiya
TARKIBI
1. T.A. Ishmetov |
- |
moliya vaziri, Komissiya raisi |
2. A.V. Shin |
- |
maktabgacha ta’lim vaziri, Komissiya raisining oʻrinbosari |
3. B.O. Onorboyev |
- |
Vazirlar Mahkamasi kotibiyati mudiri |
4. A.M. Boboyev |
- |
iqtisodiy taraqqiyot va kambagʻallikni qisqartirish vazirining oʻrinbosari |
5. N.B. Xusanov |
- |
bandlik va mehnat munosabatlari vaziri |
6. B.I. Zokirov |
- |
qurilish vaziri |
7. A.A. Kamalov |
- |
Markaziy bank raisining oʻrinbosari |
8. Lavozimi boʻyicha |
- |
Qoraqalpogʻiston Respublikasi Vazirlar Kengashi Raisining birinchi oʻrinbosari, viloyatlar hokimlarining birinchi oʻrinbosari |
9. A.B. Eshchanov |
- |
Moliya vazirligi departament direktori, Komissiya mas’ul kotibi |
Izoh. Komissiya a’zolari boshqa ishga oʻtgan taqdirda uning tarkibiga mazkur lavozimlarga yangi tayinlangan yoki tegishli funksiyalarni bajarish zimmasiga yuklatilgan shaхslar kiritiladi.
Qonun hujjatlari ma’lumotlari milliy bazasi (www.lex.uz),
2021 yil 27 may