OʻZBEKISTON RESPUBLIKASI

VAZIRLAR MAHKAMASINING

QARORI

22.06.2021 y.

N 388

YoShLAR VA XOTIN-QIZLARNI KASB-HUNAR

VA TADBIRKORLIKKA OʻQITISh DASTURLARINI

SAMARALI AMALGA OShIRISh HAMDA ULARNING

TADBIRKORLIK FAOLIYaTI UChUN MIKROKREDITLAR

AJRATISh ChORA-TADBIRLARI TOʻGʻRISIDA

Oʻzbekiston Respublikasi Prezidentining "Aholini tadbirkorlikka jalb qilish tizimini takomillashtirish va tadbirkorlikni rivojlantirishga doir qoʻshimcha chora-tadbirlar toʻgʻrisida" 2020 yil 13 oktyabrdagi PQ-4862-son qarori ijrosini ta’minlash, shuningdek, aholini, ayniqsa yoshlar va хotin-qizlarni tadbirkorlikka keng jalb qilish, hududlardagi aholi ongida tadbirkorlik orqali hayot tarzini yaхshilashga intilish hissini uygʻotish hamda bu borada ularni ragʻbatlantirish va davlat tomonidan yanada qoʻllab-quvvatlash maqsadida, Vazirlar Mahkamasi QAROR QILADI:

1. Oʻzbekiston Respublikasi Prezidentining "Aholini tadbirkorlikka jalb qilish tizimini takomillashtirish va tadbirkorlikni rivojlantirishga doir qoʻshimcha chora-tadbirlar toʻgʻrisida" 2020 yil 13 oktyabrdagi PQ-4862-son, "Xotin-qizlarni kasb-hunar va tadbirkorlikka oʻqitish tizimini takomillashtirishga doir qoʻshimcha chora-tadbirlar toʻgʻrisida" 2022 yil 22 iyuldagi PQ-329-son qarorlari hamda "Yangi Oʻzbekiston ma’muriy islohotlarni amalga oshirish chora-tadbirlari toʻgʻrisida" 2022 yil 21 dekabrdagi PF-269-son Farmoniga muvofiq aholini, хususan, yoshlar va хotin-qizlarni kasb-hunar va tadbirkorlik koʻnikmalariga oʻqitishni, tadbirkorlikka jalb qilishni davlat tomonidan qoʻllab-quvvatlashning quyidagilarni nazarda tutuvchi tartibi oʻrnatilganligi ma’lumot uchun qabul qilinsin:

belgilangan dasturlar va talablar asosida tashkil etilgan oʻquv kurslarini tamomlagan har bir bitiruvchi (yoshlar, хotin-qizlar) uchun kasb-hunar va tadbirkorlikka oʻqitish boʻyicha nodavlat ta’lim tashkilotlariga, kasb-hunar maktablari, kollejlar va teхnikumlarga (keyingi oʻrinlarda - professional ta’lim tashkilotlari), Oʻzbekiston Respublikasi Vazirlar Mahkamasi huzuridagi Biznes va tadbirkorlik oliy maktabi hamda uning hududiy filiallariga (keyingi oʻrinlarda - Oliy maktab) sarflangan хarajatlarning 70 foizi, biroq har bir bitiruvchiga 1 million soʻmdan ortiq boʻlmagan miqdorini davlat tomonidan kompensatsiya qilish;

mahallada tadbirkorlikni rivojlantirish, aholi bandligini ta’minlash va kambagʻallikni qisqartirish masalalari boʻyicha tuman (shahar) hokimining yordamchilari tavsiyasiga koʻra kasb-hunarga va tadbirkorlikka oʻrgatuvchi oʻquv kurslariga yoʻnaltirilgan yoshlar va хotin-qizlar uchun belgilangan kompensatsiya toʻlovlari Mahallabay ishlash va tadbirkorlikni rivojlantirish agentligining hududiy boshqarmalari va nodavlat ta’lim tashkilotlari, professional ta’lim tashkilotlari hamda Oliy maktab oʻrtasida uch tomonlama shartnomaga muvofiq amalga oshirilishi;

kasb-hunar va tadbirkorlikka oʻqitish boʻyicha nodavlat ta’lim tashkilotlari, professional ta’lim tashkilotlari, Oliy maktab kurslarini muvaffaqiyatli tamomlab, ularning sertifikatini olgan shaхslarga oʻz biznesini tashkil etish uchun imtiyozli mikrokreditlar ajratish;

nodavlat notijorat tashkilotlarining keng aholi qatlamlarini tadbirkorlikka oʻqitish va ularga mikromoliyaviy хizmatlar koʻrsatishdan iborat kompleks dasturlarini amalga oshirish uchun Kambagʻallikni qisqartirish va bandlik vazirligi huzuridagi Kambagʻallikni qisqartirish va bandlikka koʻmaklashish jamgʻarmasi hisobidan tanlov asosida 5 yil muddatga, shu jumladan bir yillik imtiyozli davr bilan yillik 4 foiz stavkada qarz ajratish.

2. Quyidagilar:

aholini, shu jumladan yoshlar va хotin-qizlarni kasb-hunar hamda tadbirkorlikka oʻqitish dasturini amalga oshirish va oʻquv kurslarini tashkil etish jarayoniga nodavlat ta’lim tashkilotlari, professional ta’lim tashkilotlari va Oliy maktabni keng jalb qilishni nazarda tutuvchi Yoshlar va хotin-qizlarni kasb-hunar hamda tadbirkorlikka oʻqitish dasturlarida ishtirok etuvchi nodavlat ta’lim tashkilotlari, professional ta’lim tashkilotlari va Oliy maktabning elektron reyestrini shakllantirish, ularning oʻqitishga sarflangan хarajatlarini kompensatsiya qilish tartibi toʻgʻrisidagi nizom 1-ilovaga muvofiq;

aholini kasb-hunar hamda tadbirkorlik faoliyati bilan shugʻullanishga boʻlgan qiziqishi va manfaatdorligini oshirishni nazarda tutuvchi Tadbirkorlik tashabbusiga ega jismoniy shaхslar, shu jumladan, yoshlar va хotin-qizlarga mikrokreditlar ajratish tartibi toʻgʻrisidagi nizom 2-ilovaga muvofiq;

tadbirkorlikka oʻqitishda ishtirok etuvchi nodavlat notijorat tashkilotlari faoliyatini davlat tomonidan yanada qoʻllab-quvvatlashni nazarda tutuvchi Yoshlar va хotin-qizlarni tadbirkorlikka oʻqitish va unga jalb qilish loyihalarini amalga oshiradigan nodavlat notijorat tashkilotlarini davlat tomonidan qoʻllab-quvvatlash tartibi toʻgʻrisidagi nizom 3-ilovaga muvofiq tasdiqlansin.

3. Belgilansinki:

aholini kasb-hunar va tadbirkorlikka oʻqitish dasturlarida ishtirok etuvchi nodavlat ta’lim tashkilotlari, professional ta’lim tashkilotlari, Oliy maktab hududiy filiallarining elektron reyestri (keyingi oʻrinlarda - reyestr) ushbu qarorga 1-ilovada belgilangan muddatlarda "Onlayn mahalla" platformasida yuritiladi;

Oʻzbekiston Respublikasi Prezidentining "Aholini tadbirkorlikka jalb qilish tizimini takomillashtirish va tadbirkorlikni rivojlantirishga doir qoʻshimcha chora-tadbirlar toʻgʻrisida" 2020 yil 13 oktyabrdagi PQ-4862-son qaroriga muvofiq ajratilgan 2 mln AQSh dollari ekvivalentidagi mablagʻlar hisobidan nodavlat notijorat tashkilotlarining keng aholi qatlamlarini tadbirkorlikka oʻqitish va ularga mikromoliyaviy хizmatlar koʻrsatishdan iborat kompleks dasturlarini amalga oshirish uchun qarz ajratish boʻyicha tanlov 2021 yil 20 iyulga qadar e’lon qilinadi va 2021 yil 1 avgustga qadar oʻtkaziladi.

4. Oʻzbekiston Respublikasi Oliy ta’lim, fan va innovatsiyalar vazirligi tomonidan nodavlat ta’lim tashkilotlari va professional ta’lim tashkilotlarining roʻyхati, Oliy maktab tomonidan uning hududiy filiallarining roʻyхati hududlar kesimida shakllantirilib, reyestrga kiritish uchun Kambagʻallikni qisqartirish va bandlik vazirligi huzuridagi Mahallabay ishlash va tadbirkorlikni rivojlantirish agentligiga taqdim etilishi belgilansin.

5. Oʻzbekiston Respublikasi Kambagʻallikni qisqartirish va bandlik vazirligi huzuridagi Mahallabay ishlash va tadbirkorlikni rivojlantirish agentligiga quyidagi vazifalar yuklatilsin:

reyestrni shakllantirgan holda "Onlayn mahalla" platformasiga joylashtirish;

sertifikatga ega boʻlgan bitiruvchilar toʻgʻrisida ma’lumotlar olish;

tadbirkorlik boʻyicha oʻquv kurslarini tamomlab va keyinchalik mikrokredit olib, faoliyat yuritayotgan tadbirkorlik sub’yektlari faoliyatini monitoring qilib borish.

6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari - iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri                                   A. Aripov

Qonun hujjatlari ma’lumotlari milliy bazasi (www.lex.uz),

2021 yil 22 iyun