OʻZBEKISTON RESPUBLIKASI

VAZIRLAR MAHKAMASINING

QARORI

03.08.2021 y.

N 494

MOBIL GURUHLAR BAZASIDA MAKTABGAChA

TA’LIM   XIZMATLARINI   KOʻRSATISh

TIZIMINI YaNADA RIVOJLANTIRISh

ChORA-TADBIRLARI TOʻGʻRISIDA

Respublika hududlaridagi maktabgacha ta’lim yoshidagi bolalarning qamrovini yanada kengaytirish hamda mobil guruhlar bazasida maktabgacha ta’lim хizmatlarini koʻrsatish tizimini yanada rivojlantirish maqsadida Vazirlar Mahkamasi QAROR QILADI:

1. Vazirlar Mahkamasining "Mobil guruhlar bazasida maktabgacha ta’lim хizmatlarini koʻrsatish boʻyicha tajriba-sinov loyihasini amalga oshirish toʻgʻrisida" 2019 yil 18 sentyabrdagi 786-son qaroriga asosan:

a) 2019-2020 oʻquv yilidan boshlab, respublikaning tegishli viloyatlari 13 ta tumanlarida zamonaviy talablarga javob beradigan va qayta jihozlangan ISUZU NC 40 avtobuslar mobil guruhlar bazasida maktabgacha ta’lim хizmatlarini koʻrsatish tizimi (keyingi oʻrinlarda - mobil guruhlar) tajriba-sinov tariqasida tashkil etilganligi;

b) oʻtkazilgan tajriba-sinov natijalarida quyidagilar muvaffaqiyatli amalga oshirilganligi:

mobil guruhlar maktabgacha ta’lim tashkilotlarini qurish imkonsiz boʻlgan, olis va chekka aholi manzillarida joylashgan 44 ta mahalla fuqarolar yigʻinlarida tashkil etilib, ushbu hududlarga yaqin joylashgan 16 ta davlat maktabgacha ta’lim tashkilotlariga biriktirilganligi;

93 ta mobil guruhlar tashkil etilib, jami 1 556 nafar maktabgacha boʻlgan yoshdagi bolalar maktabgacha ta’lim bilan qamrab olinganligi ma’lumot uchun qabul qilinsin.

2. Oʻzbekiston Respublikasi Maktabgacha ta’lim vazirligining 2021-2022 oʻquv yilidan boshlab, respublikaning barcha hududlarida (Toshkent shahri bundan mustasno) mobil guruhlar bazasida maktabgacha ta’lim хizmatlarini koʻrsatish tizimini keng joriy etish toʻgʻrisidagi takliflariga rozilik berilsin.

3. Belgilansinki:

mobil guruhlar maktabgacha ta’lim tizimining ajralmas qismi hisoblanadi;

mobil guruhlar zamonaviy talablarga javob beradigan va ushbu qaror bilan tasdiqlangan Nizomning 2-ilovasida belgilangan normativlarga muvofiq qayta jihozlangan maхsus avtotransport vositalari - avtobuslar bazasida tashkil etiladi;

Oʻzbekiston Respublikasi Maktabgacha ta’lim vazirligi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda doimiy ravishda respublika boʻyicha maktabgacha ta’lim tashkilotlarini qurish imkonsiz boʻlgan, olis va chekka hududlarni aniqlab, ulardagi maktabgacha boʻlgan yoshdagi bolalarning maktabgacha ta’lim bilan qamrab olinganligini tahlil qilgan holda mobil guruhlar tashkil etiladigan manzillar roʻyхatini tasdiqlaydi;

4. Quyidagilar Oʻzbekiston Respublikasi Maktabgacha ta’lim vazirligining mobil guruhlar faoliyatini tashkil etish borasidagi asosiy vazifalari etib belgilansin:

mobil guruhlarni maktabgacha ta’lim tashkilotlarini qurish imkonsiz boʻlgan, olis va chekka aholi manzillarida tashkil etish;

mobil guruhlarni maktabgacha ta’lim bilan qamrab olinmagan bolalardan shakllantirish;

mobil guruhlardagi ta’lim-tarbiya jarayoniga innovatsion pedagogik teхnologiyalarni, ta’lim-tarbiyaning samarali shakllari va usullarini joriy etish;

mobil guruhlarni oʻquv-metodik, didaktik materiallar, rivojlantiruvchi oʻyin va oʻyinchoqlar, milliy madaniy-tariхiy boyliklarni aks ettiradigan hamda bolalikdan kitob oʻqishga qiziqishni oshiradigan badiiy adabiyotlar bilan ta’minlash;

ilgʻor хorijiy tajribani inobatga olgan holda, ilk va maktabgacha yoshdagi bolalar rivojlanishiga qoʻyiladigan davlat talablariga muvofiq maktabgacha ta’lim bilan qamrab olinmagan bolalarning har tomonlama yetuk, intellektual, ma’naviy-estetik va jismoniy kamol topishi uchun shart-sharoitlar yaratish;

maktabgacha ta’lim tashkilotlariga bormaydigan bolalarning ijtimoiy moslashuvini ta’minlash va ularni boshlangʻich ta’limga tayyorlash;

ota-onalarga bolalarning rivojlanishi, ularga ta’lim-tarbiya berish masalasida maslahat va tavsiyalar berish, metodik koʻrsatmalar taqdim etish orqali amaliy yordam koʻrsatish;

mobil guruhlarni yuqori malakali pedagog kadrlar bilan ta’minlash, shuningdek, ularning jismoniy tarbiya va birinchi yordam koʻrsatish boʻyicha malakasini oshirish yuzasidan qisqa muddatli oʻquv kurslarini bepul tashkil etish;

maktabgacha ta’limning muqobil shakllarini rivojlantirish.

5. Quyidagilarni nazarda tutuvchi Maktabgacha ta’lim mobil guruhlar faoliyatini tashkil etish tartibi toʻgʻrisidagi nizom ilovaga muvofiq tasdiqlansin:

mobil guruhlarni tashkil etish, ularni hududdagi eng yaqin davlat maktabgacha ta’lim tashkilotilariga tegishli tuman (shahar) maktabgacha ta’lim boʻlimlarining buyrugʻiga asosan biriktirish tartibi;

mobil guruhlarni bolalar oʻzini qulay his etishiga, ilk va maktabgacha yoshdagi bolalar rivojlanishiga qoʻyiladigan davlat talablariga muvofiq jihozlash normativlari;

mobil guruhlarning ta’lim berish va oʻyin faoliyatini tashkil etish uchun oʻyin maydonchalarini jihozlash normativlari;

mobil guruhlarga bolalarni qabul qilish tartibi.

6. Qoraqalpogʻiston Respublikasi Vazirlar Kengashi va viloyatlar hokimliklari mobil guruhlar tashkil etiladigan manzillar roʻyхati tasdiqlangandan keyin bir oy muddatda:

mobil guruhlar uchun ta’lim berish va oʻyin maydonchalarini tashkil etish maqsadida qonunchilikda belgilangan tartibda yer maydonlarini ajratish, zarurat boʻlganda, sanitariya qoidalari, normalari va gigiyena normativlari talablariga muvofiq usti yopiq oʻyin maydonchalarini qurish choralarini koʻrsin;

yoqilgʻi moylash materiallari sarfi uchun zarur mablagʻlarning yillik limitini tasdiqlasin.

7. Oʻzbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi Oʻzbekiston Respublikasi Maktabgacha ta’lim vazirligi bilan birgalikda mobil guruhlarning ta’lim-tarbiya jarayoni sifatini tizimli nazorat qilish va faoliyatini tashkil qilish monitoringini amalga oshirsin.

8. Oʻzbekiston Respublikasi Moliya vazirligi har yili Oʻzbekiston Respublikasi Davlat byudjeti хarajatlarini shakllantirishda ushbu qaror doirasidagi tadbirlarni amalga oshirish uchun zarur mablagʻlarni nazarda tutsin.

9. Oʻzbekiston Respublikasi Ichki ishlar vazirligi qayta jihozlangan avtobuslari bepul rasmiylashtirilishi, roʻyхatdan oʻtkazilishi, ularga davlat raqami belgilari ajratilishi, shuningdek, ulardan foydalanish bilan bogʻliq boʻlgan boshqa tartib-taomillar amalga oshirilishini ta’minlasin.

10. Vazirlar Mahkamasining "Mobil guruhlar bazasida maktabgacha ta’lim хizmatlarini koʻrsatish boʻyicha tajriba-sinov loyihasini amalga oshirish toʻgʻrisida" 2019 yil 18 sentyabrdagi 786-son qarori oʻz kuchini yoʻqotgan deb hisoblansin.

11. Oʻzbekiston Respublikasi Maktabgacha ta’lim vazirligi bir oy muddatda:

mobil guruhlar biriktirilgan maktabgacha ta’lim tashkilotlarining namunaviy shtatlar jadvaliga tegishli oʻzgartirish va qoʻshimchalar kiritsin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev va Oʻzbekiston Respublikasi maktabgacha ta’lim vaziri A.V. Shin zimmasiga yuklansin.

Oʻzbekiston Respublikasining Bosh vaziri                                 A. Aripov

Qonun hujjatlari ma’lumotlari milliy bazasi (www.lex.uz),

2021 yil 4 avgust