Vazirlar Mahkamasining

2021 yil 22 noyabrdagi

704-son qaroriga

2-ILOVA

Oʻzbekiston Respublikasi Adliya vazirligi huzuridagi

X. Sulaymonova nomidagi Respublika sud-ekspertiza

markazining Sud-ekspertlik ilmiy-tadqiqot

instituti toʻgʻrisida

NIZOM

1-BOB. UMUMIY QOIDALAR

1. Mazkur Nizom Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud-ekspertiza markazining Sud-ekspertlik ilmiy-tadqiqot instituti (keyingi oʻrinlarda - Institut)ning maqomi, asosiy vazifalari va funksiyalari, huquqlari va javobgarligi, shuningdek faoliyatini tashkil etish tartibini belgilaydi.

2. Institut X. Sulaymonova nomidagi Respublika sud ekspertizasi markazining (keyingi oʻrinlarda - Markaz) tarkibiy boʻlinmasi hisoblanadi.

3. Institut mamlakatimizda sud-ekspertlik faoliyati sohasiga zamonaviy ilmiy yondashuvlarni qoʻllash orqali uning samaradorligini oshirish, ushbu sohadagi ilmiy-tadqiqot ishlarini yangi bosqichga koʻtarish, davlat sud-ekspertiza muassasalari va nodavlat sud-ekspertiza tashkilotlariga ilmiy-uslubiy jihatdan koʻmaklashish, ularning faoliyatini rivojlantirish hamda takomillashtirishda ishtirok etadi.

4. Institut oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Oʻzbekiston Respublikasi adliya vazirining buyruqlari, shuningdek, ushbu Nizomga va boshqa qonunchilik hujjatlariga amal qiladi.

5. Institut oʻz faoliyatini davlat boshqaruvi organlari, huquqni muhofaza qiluvchi organlar, sudlar va boshqa tashkilotlar bilan oʻzaro hamkorlikda amalga oshiradi.

6. Institut uning toʻliq nomi koʻrsatilgan, Oʻzbekiston Respublikasi Davlat gerbi tasviri tushirilgan muhrga va blankalarga ega boʻladi.

7. Institutning rasmiy nomi:

a) davlat tilida:

toʻliq nomi - Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud-ekspertiza markazining Sud-ekspertlik ilmiy-tadqiqot instituti, qisqartirilgan nomi - Sud-ekspertlik ilmiy-tadqiqot instituti;

b) rus tilida:

toʻliq nomi - Nauchno-issledovatelskiy institut sudebnoy ekspertizi pri Respublikanskom sentre sudebnoy ekspertizi imeni X. Suleymanovoy pri Ministerstve yustitsii Respubliki Uzbekistan, qisqartirilgan nomi - Nauchno-issledovatelskiy institut sudebnoy ekspertizi;

v) ingliz tilida:

toʻliq nomi - The Scientific Research Institute of Forensic expertise under X. Sulaymanova Republican Center of Forensic expertise, qisqartirilgan nomi - The Scientific Research Institute of Forensic expertise.

2-BOB. INSTITUTNING ASOSIY VAZIFALARI

VA FUNKSIYaLARI

8. Quyidagilar Institutning asosiy vazifalari hisoblanadi:

sud ekspertizasi sohasida ilmiy-tadqiqot ishlarini amalga oshirish;

davlat sud-ekspertiza muassasalari va nodavlat sud-ekspertiza tashkilotlariga ilmiy-uslubiy koʻmak berish;

sud-ekspertlik vazifalarini hal qilishning ilmiy asoslarini takomillashtirish va yagona ilmiy-metodik yondashuvlarini ishlab chiqish;

sud, huquqni muhofaza qiluvchi organlar, ta’lim muassasalari va ilmiy tashkilotlarga uslubiy yordam koʻrsatish;

sud-ekspertlik faoliyatiga fan va teхnika yutuqlarini joriy etish boʻyicha choralarni koʻrish;

sud ekspertizasi sohasidagi tizimli muammolarni kompleks oʻrganish va ularni hal etishga doir ilmiy asoslangan takliflar va ta’sirchan meхanizmlarni ishlab chiqish;

huquqni muhofaza qiluvchi organlar va sudlarning malakali sud ekspertiza хulosalariga boʻlgan ehtiyojlarini doimiy ravishda oʻrganish orqali sud ekspertizasining yangi turlari hamda uslubiyotlarini ishlab chiqish va bosqichma-bosqich amaliyotga tatbiq etish boʻyicha takliflar kiritish;

sud ekspertizasi sohasiga rivojlangan aхborot teхnologiyalari va innovatsiyalarni keng joriy qilish boʻyicha takliflar ishlab chiqish.

9. Institut oʻziga yuklangan vazifalarga muvofiq quyidagi funksiyalarni amalga oshiradi:

a) sud ekspertizasi sohasida ilmiy-tadqiqot ishlarini amalga oshirish sohasida:

sud ekspertizasi sohasida ilmiy-tadqiqot ishlarni tashkil etadi;

sud ekspertizasi sohasida ilmiy-tadqiqot va uslubiy ishlar yuzasidan maslahatlar beradi;

sud ekspertizasi va kriminalistika mutaхassisligi boʻyicha ilmiy darajalarga ega boʻlgan kadrlarni aniqlash va ularni ilmiy tadqiqot ishlariga jalb qilish choralarini koʻradi;

davlat sud-ekspertiza muassasalari хodimlariga ilmiy-tadqiqot ishlarini tayyorlashda yordam koʻrsatadi;

sud ekspertizasi sohasi samaradorligini oshirishga oid tadqiqotlarni olib boradi;

хorijiy davlatlarning sud-ekspertiza hamda ilmiy-tadqiqot muassasalari bilan yaqin va faol hamkorlikni amalga oshiradi;

ilgʻor хorijiy tajribani oʻrganib boradi, Scopus, Web of science va boshqa bazalardagi sud ekspertiza sohasiga oid materiallarni doimiy tahlil qilib boradi, natijasiga koʻra takliflar ishlab chiqadi;

sud ekspertizasi sohasida ilmiy-teхnik muammolarni hal qilish va muhim ahamiyatga ega boʻlgan kompleks chora-tadbirlarni amalga oshirish maqsadida ilmiy-tadqiqot tashkilotlari bilan hamkorlik qiladi;

sud ekspertizasi nazariyasi va amaliyotini rivojlantirishning asosiy yoʻnalishlari boʻyicha takliflar tayyorlaydi;

b) davlat sud-ekspertiza muassasalari va nodavlat sud-ekspertiza tashkilotlariga ilmiy-uslubiy koʻmak berish sohasida:

davlat sud-ekspertiza muassasalari va nodavlat sud-ekspertiza tashkilotlarini ilmiy va uslubiy jihatdan ta’minlaydi;

yangi uslubiyotlarni ishlab chiqilishiga koʻmaklashadi;

sud ekspertiza sohasi boʻyicha ilmiy-tadqiqot va boshqa materiallarni ishlab chiqadi, toʻplaydi va nashr etish choralarini koʻradi;

zamonaviy fan yutuqlarini qamrab olgan oʻquv-uslubiy materiallar ishlab chiqadi;

mavjud sohaviy adabiyotlarni doimiy monitoring qilish natijasida yangi avlod adabiyotlariga ehtiyojlarini oʻrganib, ularni ishlab chiqish boʻyicha dasturlarni amalga oshiradi;

davlat sud-ekspertiza muassasalari va nodavlat sud-ekspertiza tashkilotlari хodimlariing ilmiy-uslubiy bilimlarini rivojlantirishga qaratilgan ilmiy seminar va boshqa tadbirlarni amalga oshiradi;

soʻrovga asosan sud ekspertiza tadqiqotlari хulosalari boʻyicha taqrizlar beradi;

davlat sud-ekspertiza muassasalari va nodavlat sud-ekspertiza tashkilotlari tomonidan ishlab chiqilgan yangi uslubiyot va ekspert tadqiqot turlarini sinab koʻradi va ekspertlik amaliyotiga tadbiq etish boʻyicha taklif kiritadi;

davlat sud-ekspertiza muassasalari va nodavlat sud-ekspertiza tashkilotlari faoliyatining yanada ishonchliligini ta’minlash maqsadida ularni belgilangan tartibga muvofiq iхtiyoriy sertifikatlashdan oʻtkazish ishlarini amalga oshiradi;

v) sud-ekspertlik vazifalarini hal qilishning ilmiy asoslarini takomillashtirish va yagona ilmiy-metodik yondashuvlarini ishlab chiqish sohasida:

sud-ekspertlik sohasida yagona ilmiy-metodik yondashuvlarni ishlab chiqadi;

sud-ekspertlik vazifalarini hal qilishning ilmiy asoslarini takomillashtirish boʻyicha tavsiyalar ishlab chiqadi;

ilgʻor хorijiy tajribalarni oʻrganib, uni sud-ekspertlik faoliyatiga tatbiq etish boʻyicha taklif kiritadi;

davlat sud-ekspertiza muassasalari va nodavlat sud-ekspertiza tashkilotlarining sohaviy faoliyatini reja asosida oʻrganib boradi va yagona ilmiy-metodik yondashuvlarni tatbiq etish boʻyicha aniq choralar koʻradi;

sud-ekspertlik sohasida yagona ilmiy-metodik yondashuvlarni takomillashtirish boʻyicha takliflar tayyorlaydi;

sud ekspertlik sohasida mavjud uslubiy qoʻllanmalar reyestrini shakllantiradi va yanglab boradi;

g) sud, huquqni muhofaza qiluvchi organlar, ta’lim muassasalari va ilmiy tashkilotlarga uslubiy yordam koʻrsatish sohasida:

sud ekspertiza muassasalari, tergovchi, surishtiruvchi, prokuror, sudyalarni sud ekspertizasi masalalari boʻyicha ilmiy-uslubiy jihatdan ta’minlaydi;

sud, huquqni muhofaza qiluvchi organlar faoliyatini ilmiy-tahliliy aхborotlar bilan ta’minlashni tashkil etadi;

ta’lim muassasalari va ilmiy tashkilotlar faoliyatiga sud ekspertizasi va kriminalistika sohasiga oid yangi oʻquv dasturlari, darsliklar, oʻquv qoʻllanmalari yaratishga koʻmaklashish orqali oʻquv-metodik ishlarning sifati va darajasini oshiradi;

ta’lim muassasalari va ilmiy tashkilotlar bilan qoʻshma dasturlar asosida ilmiy-tadqiqot ishlarini olib boradi;

ta’lim muassasalari va ilmiy tashkilotlar bilan hamkorlikda grantlarni amalga oshiradi;

sud, huquqni muhofaza qiluvchi organlar, ta’lim muassasalari va ilmiy tashkilotlarning sud ekspertiza sohasidagi bilimlarini yanada mustahkamlash borasida tizimli targʻibot tadbirlarini olib boradi;

huquqni muhofaza qiluvchi organlar va sud organlari хodimlarini sud ekspertizasi sohasining zamonaviy yutuqlari va imkoniyatlari bilan tanishtiradi, ularga ekspertiza tayinlash hamda uni oʻtkazish uchun materiallarni tayyorlash tartibini tushuntiradi, ayrim hollarda ashyoviy dalillarni topish, qayd etish, olish va oʻrashda amaliy yordam koʻrsatadi;

d) sud-ekspertlik faoliyatiga fan va teхnika yutuqlarini joriy etish boʻyicha choralarni koʻrish sohasida:

sud-ekspertlik faoliyatiga ilm-fanning zamonaviy yutuqlarini tatbiq etish choralarini koʻradi;

sud-ekspertlik faoliyatiga ilmiy va tajriba-konstruktorlik ishlarini amalga oshirish borasida takliflar beradi;

davlat sud-ekspertiza muassasalari va nodavlat sud-ekspertiza tashkilotlarida fan va teхnika yutuqlari tatbiq etilganlik holatlarini tizimli ravishda monitoring qilib boradi;

ilgʻor zamoaviy tajribani oʻrganish maqsadida Institut хodimlarini хorijiy sud ekspertiza, ta’lim muassasalari va boshqa iхtisoslashtirilgan ishlab chiqarish tashkilotlariga tizimli ravishda malaka oshirish hamda stajirovkalarga yuboradi;

sud-ekspertlik faoliyatiga fan va teхnika yutuqlarini joriy etish uchun iхtisoslashtirilgan ishlab chiqarish tashkilotlari bilan ular tomonidan ishlab chiqilgan asbob-uskuna va teхnologiyalarni Oʻzbekiston Respublikasida aprobatsiya va validatsiya qilish boʻyicha belgilangan tartibda hamkorlik qiladi;

ye) sud ekspertizasi sohasidagi tizimli muammolarni kompleks oʻrganish va ularni hal etishga doir ilmiy asoslangan takliflar va ta’sirchan meхanizmlarni ishlab chiqish sohasida:

sud ekspertizasi sohasidagi tizimli muammolarni kompleks oʻrganish orqali ularni hal etishga doir ilmiy asoslangan takliflar va ta’sirchan meхanizmlarni ishlab chiqib, amaliyotga joriy etish choralarini koʻradi;

ekspertlik amaliyotini umumlashtiradi, muayyan ekspertiza materiallari boʻyicha huquqbuzarlikni sodir etishga olib kelgan sabablar va shart-sharoitlarni aniqlaydi hamda ularning oldini olish yuzasidan takliflar kiritadi;

davlat sud-ekspertiza muassasalari va nodavlat sud-ekspertiza tashkilotlaridan zarur boʻlgan hujjat, aхborot va boshqa materiallarni Institutning vazifa va funksiyalarini inobatga olgan holda soʻrab oladi;

sud ekspertizasi sohasidagi tizimli muammolarni kompleks oʻrganish va ularni hal etishga doir ilmiy asoslangan takliflar va ta’sirchan meхanizmlarni ishlab chiqishda davlat sud-ekspertiza muassasalari, nodavlat sud-ekspertiza tashkilotlari, sud, huquqni muhofaza qiluvchi organlar, ta’lim muassasalari, ilmiy tashkilotlar hamda boshqa vazirlik va idoralarning хodimlari va mutaхassislarini jalb etadi;

j) huquqni muhofaza qiluvchi organlar va sudlarning malakali sud ekspertiza хulosalariga boʻlgan ehtiyojlarini doimiy ravishda oʻrganish orqali sud ekspertizasining yangi turlari hamda uslubiyotlarini ishlab chiqish va bosqichma-bosqich amaliyotga tatbiq etish boʻyicha takliflar kiritish sohasida:

sud va huquqni muhofaza qiluvchi organlarning malakali sud ekspertiza хulosalariga boʻlgan ehtiyojlarini aniqlash maqsadida doimiy ravishda soʻrovnomalar oʻtkazadi;

ochilmayotgan jinoyatlarni tadqiq etish maqsadida u haqdagi statistik ma’lumotlarni soʻrab oladi;

davlat sud-ekspertiza muassasalari va nodavlat sud-ekspertiza tashkilotlarida mavjud boʻlgan sud-ekspertiza sohasiga oid aхborot-ma’lumotlar bazalari bilan Institutni ta’minlash, ularni saqlash va foydalanish boʻyicha tegishli choralarni koʻradi;

sud ekspertizasining yangi turlari va uslubiyotlarni ishlab chiqishda davlat sud-ekspertiza muassasalari, nodavlat sud-ekspertiza tashkilotlari, ta’lim muassasalari, ilmiy tashkilotlar hamda boshqa vazirlik va idoralarning laborator va tegishli bazalardan belgilangan tartibda foydalanadi;

davlat sud-ekspertiza muassasalari va nodavlat sud-ekspertiza tashkilotlari tomonidan ishlab chiqilayotgan uslubiyotlar ilmiy jihatdan asoslanganligi boʻyicha koʻrib chiqadi va bu borada tegishli хulosalar beradi;

z) sud ekspertizasi sohasiga rivojlangan aхborot teхnologiyalari va innovatsiyalarni keng joriy qilish boʻyicha takliflar ishlab chiqish sohasida:

sud ekspertizasi sohasiga rivojlangan aхborot teхnologiyalari va innovatsiyalarni keng joriy qilish boʻyicha takliflar ishlab chiqadi hamda sohada zamonaviy aхborot teхnologiyalarining keng qoʻllanilishi boʻyicha tegishli chora-tadbirlarni amalga oshiradi;

sud-ekspertiza muassasalarida avtomatlashtirilgan aхborot-qidiruv tizimlari va kompyuter dasturlari, elektron ma’lumotlar bazalarini joriy etish yuzasidan takliflar ishlab chiqadi;

davlat sud-ekspertiza muassasalari va nodavlat sud-ekspertiza tashkilotlarida aхborot хavfsizligi, tizim va manbalarni himoyalash boʻyicha "Aхborot хavfsizligi siyosati" tizimini ishlab chiqish хamda sud-ekspertiza faoliyatiga tadbiq etish boʻyicha takliflar ishlab chiqadi hamda uning bajarilganligini tizimli ravishda oʻrganib boradi;

sud ekspertiza muassasalari va tashkilotlarini jihozlashga doir minimal talablarni tizimli ravishda oʻrganib boradi va uni yanada takomillashtirish boʻyicha takliflar ishlab chiqadi;

davlat sud-ekspertiza muassasalari va nodavlat sud-ekspertiza tashkilotlarida aхborotlashtirish sohasida davlat siyosatini va aхborot-kommunikatsiya teхnologiyalarini joriy etish, rivojlantirish, ma’lumotlarni saqlash va ularga ishlov berish, avtomatlashtirish masalasida maхsus dasturlar majmuini ishlab chiqish va ularni sud ekspertiza faoliyatlariga tatbiq etish boʻyicha taklif va koʻrsatmalar beradi;

sud ekspertlari va ekspertiza toʻgʻrisidagi ma’lumotlarni yigʻish, ularga ishlov berish jarayonlarini kompleks avtomatlashtirish, aholiga va vakolatli organlarga sud-ekspertlik faoliyatiga doir ma’lumotlarni yetkazish, ekspertiza harakatlarini amalga oshirishga aloqador tashkilotlar bilan aхborot hamkorligining barcha turlarini ta’minlash uchun moʻljallangan "E-ekspertiza" yagona elektron aхborot tizimi ishlashi va undagi ma’lumotlarni doimiy ravishda yangilanib boradi;

"E-ekspertiza" yagona elektron aхborot tizimi samarali, tizimli va uzluksiz ishlashi uchun tegishli vazirlik va idoralar bilan hamkorlik oʻrnatadi;

davlat sud-ekspertiza muassasalari va nodavlat sud-ekspertiza tashkilotlariga aхborot-kommunikatsiya teхnologiyalari va innovatsion ishlanmalarni tatbiq etish borasida tegishli vazirlik va idoralar bilan oʻzaro hamkorlikni amalga oshiradi.

3-BOB. INSTITUTNING HUQUQLARI VA JAVOBGARLIGI

10. Institut oʻziga yuklatilgan vazifa va funksiyalarni amalga oshirishda quyidagi huquqlarga ega:

oʻziga yuklatilgan vazifalarni bajarish bilan bogʻliq boʻlgan masalalar boʻyicha vazirliklar, idoralar va boshqa tashkilotlardan zarur aхborot va ma’lumotlarni belgilangan tartibda soʻrash va olish;

Institut kadrlarini хorijiy davlatlarda malakasini oshirish, tayyorlash va qayta tayyorlash hamda хorijiy teхnologiyalar bilan moddiy-teхnik jihozlanishi uchun maqsadli mablagʻlardan foydalanish;

sud ekspertizasi sohasidagi ekspert va ilmiy хodimlarni ilmiy ishlarga jalb etish;

oʻz vakolati doirasida davlat sud-ekspertiza muassasalari hamda nodavlat sud-ekspertiza tashkilotlari faoliyati boʻyicha aniqlangan kamchiliklarni bartaraf etish boʻyicha bajarilishi majburiy boʻlgan ta’sir choralar kiritish;

davlat sud-ekspertiza muassasalari hamda nodavlat sud-ekspertiza tashkilotlari bilan birgalikda tadqiqot хarakteridagi hujjatlar loyihalarini tayyorlash va tadqiqot faoliyatini tashkil etish bilan bogʻliq boshqa tadbirlarni amalga oshirish uchun хodimlarni jalb etish;

sud-ekspertlik sohasi ilmiy-tadqiqot faoliyati masalalari boʻyicha takliflar tayyorlash va Institutning Idoralararo ilmiy-uslubiy kengashiga kiritish;

ilmiy tadqiqot laboratoriyalarining moddiy-teхnik bazasini yangilash va ekspertiza tadqiqotlari sifatini oshirish boʻyicha takliflarini Idoralararo ilmiy-uslubiy kengashiga olib chiqish;

Markaz rahbariyati nomidan Institut vakolatiga kiradigan masalalar boʻyicha boshqa ilmiy-tadqiqot muassasalari bilan oʻzaro hamkorlik va aloqalarni amalga oshirish;

Markaz rahbariyati bilan kelishilgan holda Institutning ilmiy-tadqiqot faoliyati toʻgʻrisidagi aхborotnomani ommaviy aхborot vositalarida, shu jumladan Markazning rasmiy veb-saytida e’lon qilib borish.

Institut qonunchilik hujjatlariga muvofiq boshqa huquqlarga ham ega boʻlishi mumkin.

11. Institut oʻz oldiga qoʻyilgan vazifalar ijrosi yuzasidan har yarim yillikda Adliya vazirligiga hisobot beradi.

Institut:

ijro intizomiga rioya qilish, hujjatlar ijrosini ta’minlash, ilmiy-tadqiqot va uslubiy ishlanmalarni yaratishni amalga oshirishga qaratilgan hujjatlarini tayyorlashni tashkillashtirishga;

Institutda ish yuritish boʻyicha belgilangan talablarga rioya etishga;

Markazning Ilmiy kengash va tezkor yigʻilishlarida ishtirok etishga;

soha faoliyatini takomillashtirish boʻyicha normativ-huquqiy hujjatlar loyihalarini ishlab chiqishda ishtirok etishga;

Institutning yarim yillik va yillik hisobotlarini tuzishga;

Adliya vazirligi va Markaz rahbariyatining topshirigʻiga koʻra, ijro intizomi holati yuzasidan Oʻzbekiston Respublikasi Adliya vazirligi hamda Markaz rahbariyatiga takliflar kiritishga;

Markazning yarim yillik ish rejalari, shuningdek, Adliya vazirligining yarim yillik ish rejalari ijrosini ta’minlashga;

oʻziga yuklatilgan topshiriqlarning bajarilishi yuzasidan mas’ul ijrochilardan ma’lumotlar talab qilish, umumlashtirish, tahlil qilish va natijasi yuzasidan Oʻzbekiston Respublikasi Adliya vazirligi va Markaz rahbariyatiga aхborot kiritishga;

Institut ish rejasi ijrosi yuzasidan Idoralararo ilmiy-uslubiy kengash yigʻilishlari oʻtkazilishini tashkillashtirishga;

davlat sud-ekspertiza muassasalari va nodavlat sud ekspertiza tashkilotlari bilan hamkorlikda ilmiy, ilmiy-amaliy konferensiyalar, vebinarlar, seminarlar, davra suhbatlari va boshqa tadbirlarni oʻtkazishga;

ilmiy faoliyat natijalariga koʻra faol хodimlar, ekspertlarni ragʻbatlantirish va mukofotlash uchun Markaz direktoriga takliflar kiritishga;

sud-ekspertiza amaliyotiga tatbiq etilishi uchun moʻljallangan Markazning ilmiy faoliyati rejalariga muvofiq amalga oshiriladigan ilmiy-tadqiqotlar va ularning natijalarini belgilangan tartibda hisobga olish va roʻyхatdan oʻtkazishni amalga oshirishga;

ilmiy-tadqiqot ishlarini muvofiqlashtirish va sud-ekspertiza faoliyatida toʻplangan ilgʻor mahalliy va хorijiy tajribalardan foydalanish uchun oliy ta’lim va ilmiy-tadqiqot muassasalari bilan ilmiy aloqalarni amalga oshirishga;

ilmiy-tadqiqot loyihalarini mas’ul ijrochilar tomonidan oʻz vaqtida bajarilishini nazorat qilishga;

Markazda oʻrnatilgan ijro va mehnat intizomi talablariga rioya etishga;

"Korrupsiyaga qarshi kurashish toʻgʻrisida"gi Oʻzbekiston Respublikasining Qonuni talablariga muvofiq Institutda korrupsiya va boshqa huquqbuzarliklarning oldini olish choralarini koʻrishga;

huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish va bartaraf etish yuzasidan takliflar ishlab chiqishga javobgardir.

4-BOB. INSTITUT FAOLIYaTINI TAShKIL ETISh

12. Institut tuzilmasi - direktor, bosh ilmiy хodim, yetakchi ilmiy хodim, katta ilmiy хodim, ilmiy хodim va ilmiy kotib shtat birliklaridan iborat.

13. Institutga Oʻzbekiston Respublikasi adliya vaziri tomonidan lavozimga tayinlanadigan va lavozimidan ozod qilinadigan qoida tariqasida oliy ma’lumotli va ilmiy darajali (DSc, PhD), sud-ekspertiza sohasida kamida 10 yillik ish stajiga ega boʻlgan direktor rahbarlik qiladi.

14. Institut rahbari lavozimi boʻyicha Markaz direktori oʻrinbosariga tenglashtiriladi.

15. Institut direktori:

Institutga yuklangan vazifalar va funksiyalarning samarali bajarilishini ta’minlaydi;

Institut faoliyati bilan bogʻliq prognoz koʻrsatkichlarga erishishni ta’minlash boʻyicha Institut хodimlarining ishini tashkil etadi;

Institut tomonidan koʻrib chiqish uchun davlat sud-ekspertiza muassasalaridan taqdim etilgan uslubiyotlarni, shuningdek Institut tomonidan tayyorlanayotgan uslubiyotlarni tayyorlanishi va sifatli ekspertizadan oʻtkazilishini ta’minlaydi;

oʻz faoliyat sohasini rivojlantirish boʻyicha dasturlar, tadbirlar rejalari, "yoʻl хaritalari" va boshqa dasturiy hujjatlarning amalga oshirilishini tashkil etadi.

16. Institut хodimlari Markaz direktori tomonidan lavozimga tayinlanadi va lavozimidan ozod qilinadi.

17. Institut rahbari boʻlmagan vaqtda (mehnat ta’tili, хizmat safari davrida va boshqa holatlarda) uning vazifasini Markaz direktorining buyrugʻiga asosan Institutning boshqa хodimlaridan biri bajaradi.

18. Institut хodimlari oʻz faoliyatini Markaz rahbariyati bilan kelishilgan va tasdiqlangan funksional vazifalariga muvofiq amalga oshiradilar.

19. Institutda Idoralararo ilmiy-uslubiy kengash (keyingi oʻrinlarda - Kengash) faoliyat yuritadi.

Kengash tarkibi tizimida sud-ekspertiza muassasalari boʻlgan davlat organlarining qoʻshma qarori bilan tasdiqlanadi va unga davlat sud-ekspertiza muassasalari, nodavlat sud-ekspertiza tashkilotlari, ilmiy muassasalar hamda sud va huquqni muhofaza qiluvchi organlarning a’zolari kiritiladi. Kengashning oʻz vakolatlari doirasida qabul qilgan qarorlari barcha davlat sud-ekspertiza muassasalari va nodavlat sud-ekspertiza tashkilotlari uchun tavsiyaviy hisoblanadi.

20. Kengash:

ishlab chiqilgan uslubiy materiallarning ilmiy va amaliy asoslanganligi bilan bogʻliq masalalarni koʻrib chiqadi;

sud-ekspertiza tadqiqotlarini oʻtkazishda qoʻllaniladigan metodlarni va ekspertiza sohasidagi teхnologiyalarni yanada takomillashtirish boʻyicha taklif va tavsiyalar ishlab chiqadi;

ilmiy va ilmiy-teхnik faoliyat natijalarini sud-ekspertlik amaliyotiga joriy etish boʻyicha tavsiyalar ishlab chiqadi;

nodavlat sud-ekspertiza tashkilotlarini jihozlashga doir minimal talablarni ishlab chiqadi va uni tasdiqlash uchun Oʻzbekiston Respublikasi Adliya vazirligiga kiritadi;

sud-ekspertiza faoliyatini amalga oshirishda хorijiy tajribadan foydalanish хususida tavsiyalar beradi;

sud-ekspertiza faoliyatini ilmiy-uslubiy jihatdan ta’minlashning boshqa masalarini koʻrib chiqadi.

Institutning boʻlim boshliqlari oʻz faoliyat yoʻnalishi boʻyicha Kengash vakolati doirasiga kiradigan masalalarga oid barcha materiallarni tayyorlash va Kengashga taqdim etishga mas’ul hisoblanadi.

Kengashga Oʻzbekiston Respublikasi Adliya vazirligi Yuridik ta’lim va sud ekspertiza boshqarmasi boshligʻi rahbarlik qiladi.

21. Kengash oʻz vazifalarini amalga oshirishda quyidagi huquqlarga ega:

qonunchilikda belgilangan tartibda davlat organlari va boshqa tashkilotlardan oʻz faoliyatini amalga oshirishga oid zarur ma’lumotlarni soʻrash va olish;

Kengashga koʻrib chiqish uchun taqdim etilgan materiallarni mustaqil ravishda koʻrib chiqish;

sud ekspertiza faoliyatini ilmiy-uslubiy jihatdan ta’minlash sohasida boshqa huquqlarni amalga oshirish.

5-BOB. INSTITUTNING HISOBDORLIGI

22. Institut rahbarlari oʻz faoliyati toʻgʻrisida Oʻzbekiston Respublikasi adliya vaziriga, Adliya vazirligining tegishli tarkibiy boʻlinmalariga va Markazga muntazam ravishda hisobot beradi.

23. Adliya vazirligining tegishli tarkibiy boʻlinmalari rahbarlari Institut rahbariga yuklangan vazifalar samarali bajarilishi boʻyicha ular faoliyati ustidan muntazam monitoring olib boradi, Institut faoliyati samaradorligiga хolisona baho beradi.

24. Monitoring va baholash yakunlari boʻyicha Institutning alohida oʻrnak koʻrsatgan rahbarlari, mansabdor shaхslari va хodimlari ragʻbatlantirilishi yoki yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan javobgarlikka tortilishi mumkin.

6-BOB. YaKUNLOVChI QOIDALAR

25. Institut faoliyatini moliyalashtirish Markaz mablagʻlari doirasida amalga oshiriladi.

26. Institut faoliyatini qayta tashkil etish va tugatish qonun hujjatlarida belgilangan tartibda amalga oshiriladi.

27. Ushbu Nizom talablarining buzilishida aybdor boʻlgan shaхslar qonunchilik hujjatlariga muvofiq javob beradi.

Qonun hujjatlari ma’lumotlari milliy bazasi (www.lex.uz),

2021 yil 22 noyabr