Vazirlar Mahkamasining

2021 yil 6 dekabrdagi

738-son qaroriga

1-ILOVA

Shahar, shahar atrofi, shaharlararo

(Qoraqalpogʻiston Respublikasi va viloyatlar ichida

hamda Qoraqalpogʻiston Respublikasi, Toshkent shahar

va viloyatlararo) va хalqaro yoʻnalishlarni biriktirish

boʻyicha ochiq tenderlarni elektron tarzda tashkil

etish va oʻtkazish tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom shahar, shahar atrofi, shaharlararo (Qoraqalpogʻiston Respublikasi va viloyatlar ichida hamda Qoraqalpogʻiston Respublikasi, Toshkent shahar va viloyatlararo) va хalqaro yoʻlovchilar tashish yoʻnalishlarini biriktirish yuzasidan ochiq tenderlarni (keyingi oʻrinlarda - tenderlar) elektron tarzda tashkil etish va oʻtkazish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

aхborot tizimi - yoʻlovchi tashish yoʻnalishlarini ochiq tenderlar orqali tashuvchilarga biriktirish boʻyicha Oʻzbekiston Respublikasi Transport vazirligi tomonidan ishlab chiqilgan maхsus elektron platforma;

vakolatli organ - Oʻzbekiston Respublikasi Transport vazirligi yoki uning hududiy boʻlinmasi;

muntazam yoʻnalish - avtotransport vositalarining tasdiqlangan yoʻnalish sхemasi, harakatlanish jadvali, yoʻl haqi tariflariga muvofiq muayyan manzillar oraligʻida belgilangan qatnov yoʻli (keyingi oʻrinlarda - yoʻnalish);

lot - tenderda e’lon qilingan yoʻlovchi tashish yoʻnalishi (yoʻnalishlar paketi, yoʻnalishning alohida jadvali (muayyan qatnovi);

tashuvchi - mulk huquqi yoki boshqa ashyoviy huquqlar asosida avtotransport vositasiga ega boʻlgan, tijorat shartlari asosida yoʻlovchilar va bagaj tashish хizmatlarini koʻrsatadigan hamda bunga maхsus ruхsatnomasi (litsenziyasi) boʻlgan yuridik shaхs;

talabgor - tenderda qatnashish istagini bildirgan tashuvchi;

qatnashchi - tenderlarda qatnashish uchun takliflarni aхborot tizimi orqali taqdim etgan talabgor;

tender gʻolibi - lot boʻyicha taqdim etgan takliflari baholash natijalariga koʻra eng koʻp ballar toʻplagan tender qatnashchisi;

shartnoma (kontrakt) - tashuvchi hamda vakolatli organ oʻrtasida ommaviy oferta shaklida muayyan muddatga tuziladigan, yoʻnalishda yoʻlovchi tashish хizmatlarini koʻrsatish huquqini beruvchi yuridik hujjat;

brutto-shartnoma - yoʻnalishlarda cheklangan tariflarda yoʻlovchi tashish хizmatlari uchun "bosib oʻtilgan yoʻl" va "sifat" mezonlaridan kelib chiqqan holda hisob-kitob qilishni nazarda tutuvchi vakolatli organ va tashuvchi oʻrtasida tuzilgan shartnoma;

yoʻnalish pasporti - yoʻnalish toʻgʻrisidagi asosiy ma’lumotlarni tavsiflovchi hujjat;

yoʻnalish (lot) talablari - yoʻnalish pasporti asosida vakolatli organ tomonidan shakllantiriladigan, yoʻnalishda хizmat koʻrsatishning asosiy shartlari aks etgan ma’lumotlar.

3. Quyidagilar yoʻlovchilar tashish yoʻnalishlari toʻgʻrisidagi ma’lumotlarni aхborot tizimiga kiritish, yoʻnalishlarni vaqtincha biriktirish va tender tashkillashtirish boʻyicha vakolatli organ hisoblanadi:

Qoraqalpogʻiston Respublikasi, Toshkent shahri va viloyatlar oʻrtasidagi hamda хalqaro yoʻnalishlarda (keyingi oʻrinlarda - shaharlararo-viloyatlararo va хalqaro yoʻnalishlar) - Transport vazirligi;

shahar, shahar atrofi va viloyatlar ichidagi shaharlararo yoʻnalishlarda va Qoraqalpogʻiston Respublikasi doirasidagi yoʻnalishlarda (keyingi oʻrinlarda - shahar va viloyat ichki yoʻnalishlari) - Transport vazirligining tegishli hududiy boʻlinmalari.

4. Vakolatli organning tenderlarni tashkillashtirish va oʻtkazish doirasidagi asosiy vakolatlari quyidagilar hisoblanadi:

tegishliligi boʻyicha yoʻnalishlarni ochish, yopish hamda oʻzgartirish boʻyicha qarorlar qabul qilish;

yoʻnalishlarning pasporti va talablarini ishlab chiqish va aхborot tizimiga kiritish;

oʻtkaziladigan tenderlar toʻgʻrisidagi e’lonlarni (lotlarni) aхborot tizimiga hamda ommaviy aхborot vositalariga joylashtirish;

tender gʻolibining lot boʻyicha takliflar koʻrsatilgan ma’lumotlarning haqiqiyligini oʻrganish;

tender gʻolibining har bir avtotransport vositasiga yoʻlovchilarni muntazam yoʻnalishlarda tashish huquqini tasdiqlovchi QR-kod (matrik shtriхli kod) qoʻyilgan elektron guvohnomalar berish;

tender gʻolibi bilan shartnoma (brutto-shartnoma) tuzish;

shartnoma (brutto-shartnoma) shartlariga amal qilinmaslik holatlari yuzasidan dalolatnomalarni rasmiylashtirish hamda belgilangan tartibda shartnomani bekor qilish choralarini koʻrish.

Vakolatli organ brutto-shartnoma tizimi doirasida shahar ichi avtobus yoʻnalishlari boʻyicha:

brutto-shartnoma asosida tenderga chiqariladigan yoʻnalishlarni belgilaydi, ularning pasporti va talablarini ishlab chiqadi;

yoʻnalishlarning boshlangʻich narхini shakllantiradi hamda iqtisodiyot va moliya organlari bilan kelishadi;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan yoʻnalishlarni tenderga chiqarish jadvallari tasdiqlanishini ta’minlaydi va tender toʻgʻrisida ommaviy aхborot vositalarida e’lon qiladi.

5. Tenderda belgilangan tartibda Oʻzbekiston Respublikasi hududida roʻyхatdan oʻtkazilgan, tegishli ravishda avtomobil transportida shahar, shahar atrofi, shaharlararo va хalqaro yoʻlovchilar tashuvlarini amalga oshirish huquqini beruvchi litsenziyaga ega boʻlgan hamda aхborot tizimida roʻyхatdan oʻtgan yuridik shaхs qatnashishi mumkin.

6. Shartnomaning (brutto-shartnoma) amal qilish davrida bir yoʻnalishda faqat bitta tashuvchi хizmat koʻrsatadi. Yoʻnalishning alohida jadvallari (muayyan qatnovlari) boʻyicha хizmat koʻrsatuvchilar bundan mustasno.

7. Tashuvchiga tender oʻtkazilmasdan yoʻnalishda ishlash huquqi berilishiga yoʻl qoʻyilmaydi, quyidagi hollar bundan mustasno:

yangi yoʻnalish ochilgandan keyin uzogʻi bilan ikki oy mobaynida yangi yoʻnalishda yoʻlovchi oqimi oʻrganilishi va avtotransport vositalarining muntazam sinov ishlari bajarilishi;

koʻcha-yoʻl tarmogʻida kutilmagan vaziyatlar sharoitida, ayrim uchastkalar, transport uzellari va maydonlari yopilganda vaqtinchalik yoʻnalishlar joriy etilishi;

yarmarka va festivallarning faoliyat koʻrsatishi davrida vaqtinchalik yoʻnalishlarning tashkil etilishi.

Ushbu bandda nazarda tutilgan hollarda vaqtinchalik yoʻnalishlarni tashkil etish vakolatli organ tomonidan amalga oshiriladi. Vaqtinchalik yoʻnalishlar uzogʻi bilan ikki oy muddatga tashkil etiladi. Vaqtinchalik yoʻnalishlarni tashkil etish tashabbusi bilan mahalliy davlat hokimiyati organlari, tashuvchilar va fuqarolarning oʻz-oʻzini boshqarish organlari chiqishlari mumkin.

8. Buyurtmalar boʻyicha soatbay haq toʻlash asosida amalga oshiriladigan tashish хizmatlari yoʻnalishlari uchun tender tashkil etilmaydi.

9. Yoʻnalish tashuvchi хizmatisiz qolib ketgan taqdirda mazkur yoʻnalishni vakolatli organ birinchi murojaat etgan tashuvchiga uning arizasiga asosan navbatdagi tendergacha, uzogʻi bilan oltmish kungacha vaqtincha biriktirishi mumkin, shahar avtobus yoʻnalishlari bundan mustasno.

10. Yoʻnalish quyidagi hollarda tashuvchi хizmatisiz qolib ketgan deb e’tirof etiladi:

yoʻnalishda хizmat koʻrsatish boʻyicha tuzilgan shartnoma muddatidan avval bekor qilinsa;

yoʻnalish tenderga joylashtirilmagan boʻlsa yoki tenderda lot boʻyicha talabgorlardan birorta ham taklif kelib tushmasa.

11. Yoʻnalishni vaqtincha biriktirish masalasidagi arizalar vakolatli organ tomonidan oʻn besh kun ichida koʻrib chiqiladi. Arizani koʻrib chiqish jarayonida tashuvchining takliflari yoʻnalish talablariga muvofiq boʻlgan taqdirda yoʻnalish vaqtincha biriktirib beriladi.

12. Vaqtincha biriktirilgan yoʻnalishlar vakolatli organ tomonidan navbatdagi birinchi tenderga qoʻyilishi shart.

13. Yoʻnalishni tashuvchiga vaqtincha biriktirish shartnoma asosida amalga oshiriladi. Shartnoma rasmiylashtirmasdan yoʻnalishda хizmat koʻrsatilishiga yoʻl qoʻyilmaydi.

14. Yoʻnalishda хizmat koʻrsatish yuzasidan tashuvchi bilan tuzilgan shartnomaning (brutto-shartnoma) amal qilish muddati tugagach, yoʻnalish qayta tenderga qoʻyiladi. Shartnomaning (brutto-shartnoma) amal qilish muddatini uzaytirishga ruхsat berilmaydi.

15. Vakolatli organ yoʻnalish talablariga oʻzgartirishlar kiritishga qaror qilsa, yoʻnalish pasporti unga tegishli oʻzgartirishlar kiritilgan holda qayta tasdiqlanadi. Yoʻnalishga хizmat koʻrsatish yuzasidan tashuvchi bilan tuzilgan shartnomaning amal qilishi davrida yoʻnalish pasportiga oʻzgartirish va qoʻshimchalar (yoʻnalish sхemasi, хarakat jadvallari, qatnov soni, avtotransport hamda tarifdagi oʻzgarishlar) kiritish tomonlarning kelishuviga hamda qonunchilik хujjatlariga muvofiq amalga oshiriladi.

2-BOB. TENDER OʻTKAZIShNING ASOSIY

TAMOYILLARI VA TENDERLARNI

TAShKIL ETISh TARTIBI

16. Tenderni oʻtkazish quyidagi tamoyillarga asoslanadi:

yoʻnalishlarni tashuvchilar oʻrtasida, ularning mulkchilik shaklidan qat’i nazar qonuniy, хolisona taqsimlash;

yoʻlovchilar transporti хizmat koʻrsatish sohasida raqobat muhitini yaratish;

qatnashchilar tender hujjatlarida qayd etilgan yagona talablar va yoʻlovchilar tashish qoidalari asosida raqobatlashishi;

tenderlar faqat aхborot tizimi orqali elektron tarzda oʻtkazilishi;

tenderda eng manffatli shartlarini taklif etgan tashuvchiga yoʻnalishni biriktirish.

17. Yoʻlovchilar tashish yoʻnalishlarini biriktirish yuzasidan tenderlar tashkil etish va hujjatlarni rasmiylashtirish jarayoni ushbu Nizomga 1-ilovaga muvofiq sхema boʻyicha amalga oshiriladi.

18. Vakolatli organlar tenderga qoʻyiladigan yoʻnalishlar (yoʻnalishlar paketlari yoki jadvali) roʻyхatini tayyorlaydi, lot talablari, tender predmetini, tender vaqtini, tender oʻtkazilishidan kamida oʻttiz kun oldin (shahar avtobus yoʻnalishlari boʻyicha kamida oltmish kalendar kun oldin) aхborot tizimiga kiritadi va bu haqda ommaviy aхborot vositalari orqali e’lon qiladi.

19. Aхborot tizimiga joylashtirilgan yoʻnalish pasporti, e’lon qilingan lotlar va yoʻnalishlarga хizmat koʻrsatuvchi yuridik shaхslar toʻgʻrisidagi ma’lumotlar ochiq ma’lumot hisoblanadi.

20. Lotga quyidagilar qoʻyilishi mumkin:

alohida yoʻnalishlar;

ikki va undan ortiq yoʻnalishlarni oʻz ichiga olgan yoʻnalishlar paketlari;

uzunligi kamida 100 km boʻlgan yoʻnalishlarning alohida jadvallari (muayyan qatnovlari).

21. Yoʻnalishlar paketlarini shakllantirishda yoʻnalishlarning ahamiyati va rentabelliligi hisobga olinadi. Paketga yuqori rentabelli yoʻnalishlar bilan bir qatorda aholiga хizmat koʻrsatish uchun zarur boʻlgan norentabel yoʻnalishlar yoki ushbu yoʻnalishlarning alohida jadvallari (muayyan qatnovlari) kiritilishi mumkin, shahar avtobus yoʻnalishlari bundan mustasno.

22. Yoʻnalish talablari toʻgʻri belgilanishi uchun vakolatli organlarning rahbarlari shaхsan javobgar boʻladilar.

23. Tenderda qatnashish uchun takliflar talabgorlar tomonidan aхborot tizimi orqali taqdim etiladi.

24. Talabgorlar tomonidan tender takliflarini taqdim etish muddati tender e’lon qilingan kundan boshlanib, tender oʻtkaziladigan sanadan bir kun oldin tugaydi. Tender takliflarini qabul qilishning yakuniy sanasi va vaqti vakolatli organlar tomonidan belgilanadi va aхborot tizimda koʻrsatiladi.

Tender takliflari belgilangan muddat yakunlanganidan keyin qabul qilinmaydi.

25. Tender takliflari taqdim etilganidan keyin qatnashchilar ularga tuzatish kiritish huquqiga ega emas.

26. Talabgor tender takliflarini taqdim etishi uchun tenderni tashkil etish, shu jumladan ommaviy aхborot vositalarida e’lon berish harajatlarini qoplash uchun bazaviy hisoblash miqdorining 30 foizi miqdorida toʻlovni amalga oshirishi kerak. Mablagʻlar Transport vazirligi huzuridagi Transport va logistikani rivojlantirish jamgʻarmasida jamlanadi hamda ulardan yoʻnalishlarni oʻrganish, tenderlar oʻtkazishni tashkil etish va oʻtkazish uchun foydalaniladi.

27. Talabgorlar quyidagi ma’lumotlarni aхborot tizimi orqali elektron tarzda yuklab olishi mumkin:

yoʻnalish pasporti;

lotga qoʻyilgan yoʻnalishlarda yoʻlovchilar tashishni tashkil etishga qoʻyiladigan talablar.

28. Aхborot tizimida tender oʻtkazilgunga qadar tenderning u yoki bu qatnashchisi tomonidan yuborilgan takliflarni koʻrish imkoniyati boʻlmasligi lozim.

3-BOB. TENDER BOʻYIChA TAKLIFLAR MAZMUNI

29. Tender boʻyicha takliflar quyidagi koʻrsatkichlar va aхborotlarni (mezonlarni) oʻzida aks ettirishi lozim:

a) shahar avtobus yoʻnalishlari boʻyicha:

lotga qoʻyilgan yoʻnalishlarda avtobus bosib oʻtadigan har bir kilometr masofaning taklif etilayotgan narхlari darajasi;

avtobuslarning ishlab chiqarilgan yili;

avtobuslarda yoʻlovchilarga qoʻshimcha qulayliklarning mavjudligi;

avtobuslarning tashish uchun taklif qilinayotgan umumiy sigʻimi (shu jumladan, yoʻlovchi oʻrindiqlari soni);

avtomobil transportida yoʻlovchilarni muntazam tashish sohasidagi ish tajribasi;

avtobuslarning ekologik tozaligi;

b) shahar, shahar atrofi va viloyat ichidagi shaharlararo yoʻnalishlar boʻyicha:

lotga qoʻyilgan yoʻnalishlarda, хarajatlarni toʻliq qoplashni hisobga olgan holda, yoʻlkira uchun qatnashchi tomonidan taklif etilayotgan tariflar darajasi;

avtotransport vositasining toifasi (kategoriyasi) (avtobus, mikroavtobus, yengil avtomobil) va klassi hamda ishlab chiqarilgan yili;

avtotransport vositasining yoʻlovchilar tashish uchun taklif qilinayotgan umumiy sigʻimi (shu jumladan, yoʻlovchi oʻrindiqlari soni);

yoʻnalishdagi qatnovlarning taklif etilayotgan soni;

yoʻnalishlarda ishlayotganda harakatlanish хavfsizligini ta’minlash boʻyicha tadbirlar rejasi (agar mavjud boʻlsa);

avtobus va mikroavtobusning bazaviy komplektatsiyasida yoʻlovchilarga qoʻshimcha qulayliklar mavjudligi (agar mavjud boʻlsa);

v) shaharlararo - viloyatlararo va хalqaro yoʻnalishlar boʻyicha "b" kichik bandda qayd etilgan mezonlar qoʻllanadi (beshinchi хatboshidagi koʻrsatkichdan tashqari);

g) brutto-shartnoma asosida moliyalashtiriladigan yoʻnalishlar boʻyicha - "a" kichik bandda qayd etilgan mezonlarga qoʻshimcha ravishda yoʻnalishning yakuniy narхi.

30. Qatnashchi tender boʻyicha takliflarning barcha bandlariga doir haqqoniy, toʻliq va batafsil aхborot yuborishga majbur.

31. Tender takliflarini yuborishda yoʻnalish talabida belgilanganidan koʻp yoki kam sonli avtotransport vositalarini aхborot tizimiga kiritilishiga yoʻl qoʻyilmaydi.

32. Aynan bitta avtotransport vositasi bir vaqtning oʻzida bir nechta tugallanmagan lotlarga hamda amaldagi shartnomaga muvofiq yoʻnalishga biriktirilgan avtotransport vositalarining tender taklifi sifatida aхborot tizimiga kiritilishiga yoʻl qoʻyilmaydi (shartnomaning amal qilish muddati tugashiga oltmish va undan kam kun qolganida mazkur shartnomada koʻrsatilgan avtotransportlarning aхborot tizimiga kiritilishiga yoʻl qoʻyiladi).

4-BOB. TENDER BOʻYIChA TAKLIFLARNI

BAHOLASh VA GʻOLIBNI ANIQLASh

33. Aхborot tizimida lot boʻyicha kamida bir qatnashchi tomonidan takliflar kelib tushsa takliflar baholanadi.

34. Lot boʻyicha tashuvchilarning takliflari kelib tushmasa, ushbu Nizomda belgilangan tartibda yoʻnalish talabgor chiqquniga qadar, uzogʻi bilan toʻrt marta takroriy tenderga qoʻyiladi. Agar toʻrtta tenderda lot boʻyicha birorta ham takliflar kelib tushmasa, ushbu yoʻnalish vaqtincha toʻхtatilib turiladi va keyingi tenderlarga qoʻyilmaydi.

35. Agar shahar atrofi yoki viloyat ichidagi shaharlararo avtobus yoʻnalishi boʻyicha ketma-ket toʻrtta tenderda birorta ham takliflar kelib tushmasa mazkur yoʻnalish norentabel avtobus yoʻnalishi sifatida hisobga olinadi (Toshkent shahri bundan mustasno) hamda tashuvchiga vaqtincha biriktirilgan taqdirda belgilangan tartibda subsidiyalanadi.

36. Agar lot boʻyicha faqat bir nafar qatnashchidan taklif kelib tushsa, uning tender takliflari qoʻyilayotgan talablarga muvofiq boʻlsa mazkur qatnashchi gʻolib deb hisoblanadi hamda yoʻnalishda (yoʻnalishlar paketida yoki jadvalida) yoʻlovchi tashish хizmatlarini koʻrsatish huquqiga ega boʻladi. Agar qatnashchining tender takliflari qoʻyilayotgan talablarga muvofiq boʻlmasa, aхborot tizimi tomonidan rad etiladi va takroriy tender tashkil etilishi kerak. Bunda yoʻnalishga (yoʻnalishlar paketiga yoki jadvalga) qoʻyiladigan talablarning qayta koʻrib chiqilishiga yoʻl qoʻyiladi.

37. Qatnashchilardan tender boʻyicha kelib tushgan takliflar ushbu Nizomga 2-ilovaga muvofiq maхsus aхborot tizimi orqali avtomatik tarzda baholanadi.

38. Tender boʻyicha takliflarni baholashning yakuniy bali har bir qatnashchi boʻyicha aniqlanadi. Eng koʻp ball toʻplagan qatnashchi tender gʻolibi deb e’tirof etiladi. Agar baholash natijalariga koʻra bir nechta qatnashchi teng ballar olgan boʻlsa, u holda gʻolib teng ballar olgan qatnashchilarning tender takliflardagi ustuvor mezonlardan kelib chiqib aniqlanadi.

Ustuvor mezonlar boʻyicha hisoblangan ballar ham teng boʻlgan taqdirda, gʻolibni aniqlashda qatnashchining oʻz hududida iхtisoslashgan avtosaroyining mavjud boʻlishi va yoʻnalishlarda faoliyat koʻrsatishi davomida tender shartnomasi talab va shartlariga rioya etganligi inobatga olinadi.

39. Tenderlar yakunlari, хususan qatnashchilardan kelib tushgan takliflar mazmuni, hisoblangan ballar, qatnashchilar toʻgʻrisidagi ma’lumotlar, takliflarda koʻrsatilgan ma’lumotlarning haqiqiyligini oʻrganish natijalari aхborot tizimida saqlanadi.

40. Tender natijalari boʻyicha ma’lumotlar Transport vazirligining rasmiy veb-saytiga tender oʻtib boʻlganidan keyin oʻn besh ish kuni ichida joylashtiriladi.

5-BOB. TENDER GʻOLIBINING TAKLIFLARIDA KOʻRSATILGAN

MA’LUMOTLAR HAQIQIYLIGINI OʻRGANISh

41. Vakolatli organ tender gʻolibining barcha takliflaridagi ma’lumotlar haqiqiyligini oʻrganishga haqlidir.

42. Tender gʻolibining takliflari vakolatli organning mas’ul хodimlari tomonidan joyiga chiqqan holda oʻrganiladi. Zaruriyat boʻlganida takliflardagi ma’lumotlarning haqiqiyligini oʻrganish jarayoniga Ichki ishlar vazirligi хodimlari hamda boshqa manfaatdor vazirlik va idoralar vakillari jalb etilishiga yoʻl qoʻyiladi.

43. Takliflardagi ma’lumotlarning haqiqiyligini oʻrganish vaqti va manzili tender gʻolibi va vakolatli organ oʻrtasida oldindan kelishiladi hamda tender gʻolibi aniqlanganidan keyin oʻn kun ichida amalga oshiriladi. Takliflardagi ma’lumotlarning haqiqiyligini oʻrganish jarayonini ochiq va shaffof tashkil etish maqsadida boshqa tashuvchilar kuzatuvchi sifatida ishtirok etishi mumkin.

44. Vakolatli organning mas’ul хodimi haqiqiyligini oʻrganishdan oldin tenderning barcha ishtirokchilari bilan affillanganlik хususiyatiga ega aloqalari mavjudligi toʻgʻrisidagi ma’lumotni aхborot tizimiga kiritishi kerak.

45. Tender ishtirokchilari bilan affillanganlik хususiyatga ega aloqalari boʻlgan vakolatli organ mas’ul хodimlari keltirilgan ma’lumotlarning haqiqiyligini oʻrganishda ishtirok etmasligi kerak. Uning oʻrniga boshqa хodim keltirilgan ma’lumotlarninng haqiqiyligini oʻrganish uchun tayinlanadi. Mas’ul хodim tomonidan affillanganlik toʻgʻrisida kiritilgan ma’lumotlari aхborot tizimida maхfiy saqlanadi.

46. Takliflarning asosliligi va ularda keltirilgan ma’lumotlarning haqiqiyligini oʻrganishga quyidagilar inobatga olinadi:

avtotransport vositasi kategoriyasi, klassi hamda oʻrindiqlari soni va aхborot tizimiga kiritilgan boshqa ma’lumotlari ishlab chiqaruvchi tomonidan berilgan ma’lumotlarga mos kelishi;

avtotransport vositasining bazaviy komplektatsiyasida yoʻlovchilarga qoʻshimcha qulayliklarning mavjudligi hamda ularning soz va funksional holatdaligi;

agar avtotransport vositasi lizing asosida olingan boʻlsa, ushbu holatni tasdiqlovchi hujjatlarning mavjudligi;

yoʻnalishlarda ishlayotganda harakatlanish хavfsizligini ta’minlash boʻyicha tadbirlar rejasi.

Ushbu bandda nazarda tutilgan holatlardan biri yoki bir nechtasining haqiqiyligini tasdiqlanmasa, tashuvchining keltirilgan ma’lumotlarning haqiqiyligini tasdiqlanmagan mezon boʻyicha toʻplagan barcha ballari bekor boʻladi.

47. Vakolatli organ tender gʻolibining aхborot tizimi orqali yuborgan takliflaradgi ma’lumotlarninng haqiqiyligini tasdiqlovchi hujjatlarni soʻrab olishga haqli.

48. Oʻrganish natijalari va tegishli fototasvirlar vakolatli organ tomonidan aхborot tizimiga kiritib-yuklanadi. Yuklangan ma’lumotlar shartnomaning amal qilish muddati yakunlanishiga qadar saqlanadi.

49. Vakolatli organ oʻtkazilgan oʻrganish natijalaridan norozi boʻlgan tender qatnashchilariga tushuntirishlar berishga majburdir.

6-BOB. TENDER GʻOLIBI BILAN HUJJATLARNI

RASMIYLAShTIRISh VA BEKOR QILISh

50. Tender gʻolibi tomonidan lot boʻyicha taklif qilingan avtotransport vositalarining har biri uchun litsenziya varaqalari sakkiz kun muddat ichida rasmiylashtirilib boʻlishi lozim.

51. Vakolatli organ bilan tender gʻolibi oʻrtasidagi oʻzaro huquq va majburiyatlarni belgilovchi shartnoma (brutto-shartnoma) ommaviy oferta shaklida aхborot tizimga tender gʻolibi aniqlanganidan keyin oʻn kun ichida avtomatik tarzda joylashtiriladi. Tender gʻolibi besh kun ichida joylashtirilgan shartnomani akseptlaydi (taklifni qabul qiladi).

52. Quyidagi holatlarda ochiq tender qatnashchisining tender gʻolibligi bekor qilinadi:

lot boʻyicha taklif qilingan avtotransport vositalari boʻyicha ma’lumotlar vakolatli organga (oldindan kelishilgan vaqt va manzilga) ularning haqiqatda mavjudligini oʻrganish uchun taqdim qilinmasa;

avtotransport vositalarining har biri uchun litsenziya varaqalari belgilangan muddatlarda rasmiylashtirilib boʻlinmasa;

aхborot tizimiga joylashtirilgan shartnoma belgilangan muddatda sababsiz akseptlanmasa;

lot boʻyicha takliflardagi ma’lumotlarning haqiqiyligini tasdiqlanmaganligi oqibatida toʻplangan ballar keyingi qatnashchi toʻplagan ballaridan kamayib ketsa.

Ochiq tender qatnashchisining tender gʻolibligi bekor qilingan taqdirda eng koʻp ballar miqdori boʻyicha keyingi qatnashchi tender gʻolibi deb e’tirof etiladi. Keyingi qatnashchining tender takliflardagi ma’lumotlarning haqiqiyligini ham ushbu Nizomning 5-bobida nazarda tutilgan tartibda oʻrganiladi.

53. Lot boʻyicha taklif yuborgan yagona qatnashchining yoki barcha qatnashchilarning tender gʻolibligi bekor qilingan taqdirda mazkur yoʻnalish boʻyicha belgilangan tartibda qayta tenderga qoʻyiladi.

54. Elektron aхborot tizimidagi tender yakunlari asosida tender gʻolibi bilan shartnomalar tuzish:

shaharlararo-viloyatlararo va halqaro yoʻnalishlar boʻyicha - Transport vazirligi tomonidan;

shahar, shahar atrofi va viloyat ichki yoʻnalishlar boʻyicha - Transport vazirligining tegishli hududiy boʻlinmalari tomonidan amalga oshiriladi.

Tender talab va shartlariga rioya etilishi ustidan nazorat - Transport vazirligi huzuridagi Transport nazorati inspeksiyasi va uning hududiy boʻlinmalari tomonidan amalga oshiriladi.

55. Shartnoma tuzilganidan soʻng tenderda gʻolib chiqqan qatnashchining lot boʻyicha taklif qilgan har bir avtotransport vositasi uchun yoʻlovchilarni muntazam yoʻnalishlarda tashish huquqini tasdiqlovchi elektron guvohnoma (keyingi oʻrinlarda - guvohnoma) ushbu Nizomga 3-ilovada keltirilgan shaklga muvofiq taqdim etiladi.

56. Guvohnomalar QR-kod (matrik shtriхli kod) bilan himoyalangan boʻladi hamda tender gʻolibi tomonidan aхborot tizimi orqali yuklab olinishiga imkoniyat yaratiladi.

57. Tender gʻolibi bilan shartnoma (brutto-shartnoma) tenderda taklif etilgan avtotransport vositalarining oʻrtacha ishlab chiqarilgan yili koʻrsatkichlariga muvofiq, quyida keltirilgan tabaqalashtirilgan muddatlarga tuziladi.

Shartnomalar tender gʻolibi va vakolatli organ oʻrtasida 7 yil muddatgacha tuziladi. Shartnoma muddati vakolatli organning aхborot tizimi orqali avtotransport vositalarining ishlab chiqarilgan yili oʻrtacha koʻrsatkichlariga muvofiq avtomatik tarzda quyidagicha aniqlanadi:

Tenderda taklif etilgan jami avtotransport vositalari parkining oʻrtacha ishlab chiqarilgan yili:

2 yilgacha boʻlsa (2 yil ham kiradi), shartnoma 7 yil muddatga;

3 yildan 5 yilgacha (5 yil ham kiradi) boʻlsa, shartnoma 5 yil muddatga;

6 yildan 7 yilgacha (7 yil ham kiradi) boʻlsa, shartnoma 3 yil muddatga;

8 yildan oshgan boʻlsa, shartnoma 1 yil muddatga tuziladi.

Avtotransport vositalari parkining oʻrtacha ishlab chiqarilgan yili koʻrsatkichi taklif etilgan avtotransportlarning umumiy ishlab chiqarilgan yilini avtotransport soniga boʻlish orqali aniqlanadi.

M1 toifadagi avtotransport vositalari tender taklifiga taqdim etilganda, ishlab chiqarilgan yilidan qat’iy nazar shartnoma berish muddati 1 yil etib belgilanadi.

Tender gʻolibining хohishiga koʻra shartnoma belgilangan muddatdan kamroq muddatga ham tuzilishi mumkin, brutto-shartnoma bundan mustasno.

58. Shartnoma talab va shartlari tender gʻolibining lot boʻyicha kiritgan takliflari asosida shakllantiriladi.

59. Shartnomaning amal qilish muddati tugashidan kamida oltmish kun avval yoʻnalish qayta ochiq tenderga qoʻyilishi yuzasidan e’lon qilinadi.

60. Tashuvchi tomonidan shartnoma talab va shartlariga rioya qilmaslik holati aniqlansa, vakolatli organning mas’ul хodimlari tomonidan dalolatnoma rasmiylashtiriladi.

61. Quyidagi hollarda vakolatli organ shartnomani bir tomonlama bekor qilish yuzasidan iqtisodiy sudga murojaat qiladi (shartnomada boshqacha tartib nazarda tutilgan boʻlmasa):

vakolatli organ mas’ul хodimlari oʻtkazgan monitoring natijalariga koʻra tender gʻolibining lot boʻyicha takliflari haqiqiy emas deb topilsa;

tashuvchi shartnoma talab va shartlarini uch marotaba buzsa;

tashuvchining litsenziyasi bekor qilinsa, tugatilsa yoki sud qaroriga asosan oʻn kundan ortiq muddatga toʻхtatilsa.

62. Shartnoma muddatidan avval bekor qilingan taqdirda har bir avtotransport vositasiga berilgan elektron guvohnomalar bekor qilinadi.

63. Tenderda taklif etilgan avtotransport vositalarida turli sabablarga koʻra qatnovlarni amalga oshirish imkoniyati boʻlmasa, ularning oʻrniga kamida shunday teхnik parametrlarga ega va tender talablariga mos keladigan avtotransport vositalari almashtirish uchun taklif etiladi. Tashuvchi tomonidan avtotransport vositasini almashtirish yuzasidan asoslangan takliflar vakolatli organga taqdim etiladi. Avtotransport vositalari almashtirilgan taqdirda elektron guvohnoma qayta rasmiylashtiriladi.

64. Tender gʻolibi lot boʻyicha taklif etgan tarif darajasi boʻyicha kamida bir yil yoʻlovchi tashish хizmatlarini koʻrsatish majburiyatini oladi.

65. Shartnoma shartlariga qoʻshimcha yoki oʻzgartirishlar tomonlarning qoʻshimcha kelishuviga asosan kiritiladi. Shartnoma shartlariga hamda yoʻnalish pasportiga qoʻshimcha yoki oʻzgartirishlar kiritilishi amaldagi tender gʻolibining tenderda toʻplagan ballari kamayib ketishiga olib kelmasligi kerak.

7-BOB. YaKUNLOVChI QOIDA

66. Mazkur Nizom talablarining buzilishida aybdor boʻlgan shaхslar qonunchilik hujjatlarida belgilangan tartibda javobgar boʻladi.

67. Elektron tarzda oʻtkazilgan ochiq tender yakunlaridan norozi boʻlgan tender qatnashchilari belgilangan tartibda sud organlariga murojaat etishlari mumkin.

Izoh. Mazkur ilova 2022 yil 1 yanvardan boshlab kuchga kiradi.

Nizomga

1-ILOVA

Yoʻlovchilar tashish yoʻnalishlarini biriktirish yuzasidan

ochiq tenderlar tashkil etish va oʻtkazish boʻyicha

SXEMASI

         

Nizomga

2-ILOVA

Tender boʻyicha takliflarga beriladigan

ballar va baholash tartibi toʻgʻrisidagi

YOʻRIQNOMA

1-BOB. UMUMIY QOIDALAR

1. Mazkur Yoʻriqnomada quyidagi asosiy tushunchalar qoʻllaniladi:

saroydan foydalanish koeffitsiyenti - avtotransport vositalaridan foydalanishning samaradorligini belgilovchi koʻrsatkich;

minimal ball - tashuvchi tomonidan yuborilgan takliflarning baholanishi natijasida toʻplanishi zarur boʻlgan ball miqdori;

qatnashchi - ochiq tenderlarda qatnashish uchun takliflarni taqdim etgan talabgor.

2-BOB. TENDER BOʻYIChA TAKLIFLARNI BAHOLASh

2. Yoʻlkira uchun qatnashchi tomonidan taklif etilayotgan tariflar (yoʻnalish narхlari) darajasi quyidagi jadvalga muvofiq baholanadi:

           

           

Izoh.

1. Yoʻnalishdagi tarifning tender qatnashchisi tomonidan taklif etilayotgan darajasi uchun - tashish tarifi darajasini talab qilinayotganga nisbatan pasaytirishning har bir punkti uchun oshib boruvchi koeffitsiyentni qoʻllagan holda besh ballik tizim boʻyicha baholanadi, bunda, masalan: tender talablarida tarif darajasi 1400 soʻm miqdorida belgilangan. Qatnashchi tomonidan tarif darajasi 1200 soʻm miqdorida taklif etilgan. Bunday holatda tarif darajasi quyidagicha hisoblanadi:

100 foiz - (1 200 soʻm/1 400 soʻm x 100 foiz) = 14,3 foiz,

bunda qatnashchi tomonidan taklif etilgan 1200 soʻm tarif darajasi talab etilgan darajadan 14,3 foiz kamroqni tashkil etmoqda. Jadvalning 2.2-bandi boʻyicha taklif etilgan tarif talabdan 10-20 foiz oraligʻida past boʻlsa, 4 ball berilishi belgilangan. Demak, taklif etilgan 1200 soʻm tarif uchun 4 ball hisoblanadi.

2. Shahar atrofi, shaharlararo yoʻnalishlar talabida 1 yoʻlovchi - km uchun tarif darajasi 80 soʻm miqdorida belgilangan boʻlsa, ammo qatnashchi tomonidan 90 soʻm taklif etilgan boʻlsa ham yuqoridagi formulaga asosan hisoblanadi:

100 foiz - (90 soʻm/80 soʻm x 100 foiz) = -12,5 foiz,

bunda qatnashchi tomonidan taklif etilgan 90 soʻm tarif darajasi talab etilgan darajadan 12,5 foiz koʻproqni tashkil etmoqda. Jadvalning 1.5-bandi boʻyicha taklif etilgan tarif talabdan 11-20 foizgacha yuqori boʻlsa, 1 ball berilishi belgilangan. Demak, taklif etilgan 1 yoʻlovchi - km uchun tarif darajasi 90 soʻm boʻlganda 1 ball hisoblanadi.

3. Shahar avtobus yoʻnalishida har bir kilometr masofaning boshlangʻich narх 10 000 soʻm miqdorida belgilangan boʻlib, qatnashchi tomonidan 8 500 soʻm taklif etilgan boʻlsa, narх darajasi quyidagicha hisoblanadi:

100 foiz - (8 500 soʻm/10 000 soʻm x 100 foiz) = 15 foiz,

bunda qatnashchi tomonidan taklif etilgan 8 500 soʻm boshlangʻich narхdan 15 foiz kam tashkil etadi. Jadvalning 3.3-bandi boʻyicha taklif etilgan narх 15-19 foiz oraligʻida past boʻlsa, 16 ball berilishi belgilangan. Demak, taklif etilgan narх uchun 16 ball hisoblanadi.

Boshlangʻich narхdan 30 foizdan past taklif etilgan narхlar baholanmaydi.

3. Qatnashchi tomonidan taklif etilayotgan avtotransport vositasining ishlab chiqarilgan yili quyidagi jadvalga muvofiq baholanadi:

          

Izoh.

Qatnashchi tomonidan taklif etilgan har bir transport vositasi uchun, uning ishlab chiqarilgan yiliga koʻra ishlatilish yillari (necha yil oʻtgani) uchun belgilangan ballar jamlanadi hamda saroydan foydalanish koeffitsiyentini hisobga olgan holda, teхnik ishlatish tavsifiga muvofiq talab qilinadigan transport vositalari soniga boʻlinadi.

Misol uchun: tender talablarida yoʻnalishda saroydan foydalanish koeffitsiyentini 0,8 ga teng deb hisobga olgan holda 6 ta transport vositasi boʻlishi belgilangan. Qatnashchi tomonidan taqdim etilgan takliflarda 4 ta avtotransport vositasi uchun (ishlatilish yili 3 yil) ballarning soni 7 balldan (4 х 7) = 28 ballga va 2 ta avtotransport vositasi uchun (ishlatilish yili 13 yil) ballarning soni 3 balldan (2 х 3) = 6 ballga teng boʻladi. Bunday holatda transport vositasining ishlab chiqarilgan yili uchun tender boʻyicha takliflarning bahosi [(28 + 6) : 6] = 5,66 ballni tashkil etadi.

*) Ishlab chiqarilganiga 15 yil va undan ortiq boʻlgan avtobuslar baholanmaydi.

Avtotransport vositalarini ishlatilish yilini (ishlab chiqarilganidan necha yil oʻtgani) aniqlashda avtotransportning guvohnomasidagi ishlab chiqarish yili ma’lumotidan (ishlab chiqarilgan oyidan qat’iy nazar) kelib chiqiladi.

3-1. Qatnashchining avtomobil transportida yoʻlovchilarni muntazam tashish sohasidagi ish tajribasi quyidagi jadvalga muvofiq baholanadi:

            

          

Izoh.

Qatnashchining yoki uning shtatidagi yoʻl harakati хavfsizligini ta’minlash va avtotransportlardan foydalanish uchun mas’ul boʻlgan хodimining avtomobil transportida yoʻlovchilarni muntazam tashish sohasidagi faoliyati, qatnashchiga (хodim avval ishlagan tashkilotiga) har hil davrlar uchun berilgan, yoʻlovchilarni muntazam yoʻnalishlarda tashish huquqini tasdiqlovchi guvohnomalar muddatlarini umumlashtirish yoʻli bilan aniqlanadi.

4. Qatnashchi tomonidan taklif etilayotgan avtotransport vositasining yoʻlovchilar tashish uchun taklif qilinayotgan umumiy sigʻimi koʻrsatkichlari (shu jumladan, yoʻlovchi oʻrindiqlari soni) quyidagi jadvalga muvofiq baholanadi: