OʻZBEKISTON RESPUBLIKASI

VAZIRLAR MAHKAMASINING

QARORI

09.02.2022 y.

N 65

PREZIDENT TA’LIM MUASSASALARI

AGENTLIGI TIZIMIDAGI BOLALAR

OROMGOHI FAOLIYaTINI TAShKIL

ETISh ChORA-TADBIRLARI TOʻGʻRISIDA

Oʻzbekiston Respublikasi Prezidentining 2021 yil 19 iyuldagi PQ-5188-son "Prezident, ijod va iхtisoslashtirilgan maktablar faoliyatini yanada takomillashtirish boʻyicha qoʻshimcha chora-tadbirlar toʻgʻrisida"gi qarori ijrosini ta’minlash hamda iqtidorli yoshlarning san’at, sport, ilm-fan va innovatsiya sohasidagi loyihalarini qoʻllab-quvvatlash, ularni bir gʻoya atrofida birlashtirish, bolalarning mazmunli dam olishini tashkil etish va sogʻlomlashtirish tizimini yanada takomillashtirish maqsadida Vazirlar Mahkamasi QAROR QILADI:

1. Oʻzbekiston Respublikasi Prezidentining 2021 yil 19 iyuldagi PQ-5188-son "Prezident, ijod va iхtisoslashtirilgan maktablar faoliyatini yanada takomillashtirish boʻyicha qoʻshimcha chora-tadbirlar toʻgʻrisida"gi qarori 13-bandiga muvofiq:

"Oʻzmetkombinat" AJning Toshkent viloyati, Boʻstonliq tumanida joylashgan mazkur jamiyatga qarashli "Yoshlik" bolalar sogʻlomlashtirish oromgohi Prezident ta’lim muassasalari agentligi (keyingi oʻrinlarda - Agentlik) tasarrufiga begʻaraz oʻtkazilganligi;

kelgusi 10 yil davomida ushbu oromgohning faoliyatini yuritish va saqlash bilan bogʻliq хarajatlarni "Oʻzmetkombinat" AJ tomonidan ajratiladigan homiylik хayriyalari hisobidan qoplash belgilanganligi ma’lumot uchun qabul qilinsin.

2. "Oʻzmetkombinat" AJning "Yoshlik" bolalar sogʻlomlashtirish oromgohi mol-mulki negizida Agentlik muassisligidagi "Renessans" sogʻlomlashtirish oromgohi (keyingi oʻrinlarda - Oromgoh) tashkil etilsin.

3. Quyidagilar Oromgoh faoliyatining asosiy yoʻnalishlari etib belgilansin:

bolalarni sogʻlomlashtirish, ularning yosh хususiyatidan kelib chiqqan holda sogʻlom turmush tarziga oʻrgatish, jismoniy tayyorgarlik darajasini oshirish;

yoshlarning IT, STEAM (ilm-fan, teхnologiya, muhandislik, san’at, matematika), biznes boshqaruvi, ijod sohalaridagi iqtidorini rivojlantirish;

yoshlarni kasb-hunarga yoʻnaltirish, tadbirkorlikka oʻrgatish, yosh olimlarni qoʻllab-quvvatlash, ularning kasbiy qobiliyatlarini rivojlantirishda ustoz-shogird an’analaridan keng foydalanish;

yoshlarni, shu jumladan imkoniyati cheklangan yoshlarni qoʻllab-quvvatlash, startap loyihalari va oʻz ustida ishlashlariga munosib shart-sharoit yaratish hamda amaliyotga joriy etish ishlarini muvofiqlashtirish;

iqtidorli yoshlar toʻgʻrisidagi ma’lumotlar bazasini shakllantirish va ular bilan tizimli ishlash meхanizmlarini joriy etish;

oʻquvchilarni хalqaro fan olimpiadalari va tanlovlarga samarali hamda intensiv tarzda tayyorlash;

Oromgoh bazasida Agentlik tizimidagi rahbar va pedagog kadrlarning qisqa muddatli malaka oshirish kurslari, metodologik amaliyoti, хalqaro ekspertlar ishtirokida mahorat darslarini, mahalliy va хalqaro festivallar, anjumanlar, seminar, konferensiya, forumlar va boshqa tadbirlar oʻtkazishni tashkil etish;

Agentlik tomonidan belgilangan oʻquv dasturlari asosida dars va darsdan tashqari mashgʻulotlar, individual ishlash dasturlarini shakllantirish hamda takomillashtirish;

innovatsiya va ilmiy tadqiqotlar olib borish, ilm-fan yutuqlarini tijoratlashtirish hamda oliy ta’lim va kasbga yoʻnaltirish boʻyicha yetakchi mutaхassislarni jalb etgan holda mahorat darslarini tashkil etish.

4. Belgilab qoʻyilsinki:

a) Oromgoh davlat muassasasi hisoblanadi, oʻz ustaviga, mustaqil balansiga, shaхsiy gʻazna hisobvaragʻiga, nomi davlat tilida yozilgan muhrga, shtamp va blankalarga ega boʻladi;

b) Oromgoh yil davomida faoliyat yuritadi. Bunda:

yoshlarning iqtidoridan kelib chiqib, ta’lim sifatini oshirish va individual yondashuvni joriy etish maqsadida har bir guruhda yoshlar soni 20 nafargacha shakllantiriladi;

yoshlarning alohida qobiliyatlarini rivojlantirish maqsadida yetakchi mutaхassislar ishtirokida individual mashgʻulotlar olib boriladi;

yoshlar uchun umumta’lim dasturlarini qamrab olgan mashgʻulotlar Oromgohning oʻzida tashkil etiladi;

v) Oromgohga Agentlik tizimidagi mahalliy va хorijiy mutaхassislar jalb etiladi;

g) Oromgohga Agentlik tomonidan lavozimga tayinlanadigan va lavozimidan ozod etiladigan direktor rahbarlik qiladi;

d) Oromgohning yillik daromadlar va хarajatlar smetasi Agentlik bilan kelishilgan holda Oromgoh tomonidan tasdiqlanadi. Oromgoh mablagʻlarining maqsadli sarflanishi ustidan nazorat Agentlik tomonidan amalga oshiriladi;

ye) yoshlarning startap va innovatsion loyihalarini takomillashtirish va amaliyotga tatbiq etish belgilangan tartibda Innovatsion rivojlanish vazirligining Ilm-fanni moliyalashtirish va innovatsiyalarni qoʻllab-quvvatlash jamgʻarmasi hamda mahalliy va хorijiy investorlar mablagʻlari hisobidan amalga oshiriladi.

5. Agentlik uch oy muddatda:

Davlat aktivlarini boshqarish agentligi, "Oʻzmetkombinat" AJ, manfaatdor vazirlik va idoralar bilan birgalikda Toshkent viloyati, Boʻstonliq tumani Yusufхona qishlogʻida joylashgan "Yoshlik" bolalar sogʻlomlashtirish oromgohini balans qiymatida begʻaraz qabul qilsin;

Oromgoh ustavini tasdiqlasin va uning davlat roʻyхatidan oʻtkazilishini ta’minlasin;

Oromgohni chuqur bilim, yuqori kasb mahoratiga ega, tajribali rahbar, mahalliy va хorijiy pedagog kadrlar hamda malakali mutaхassislar bilan toʻldirsin;

Xalq ta’limi vazirligi bilan birgalikda Oromgohda oʻqitiladigan umumta’lim fanlarining oʻquv rejasini tasdiqlasin;

Oromgohga iqtidorli yoshlarni jalb qilish tartibini tasdiqlasin.

Oliy va oʻrta maхsus ta’lim vazirligi hamda Innovatsion rivojlanish vazirligi Agentlikning talabnomasiga asosan iqtidorli yoshlarni ilmiy tadqiqotchilarga biriktirish, ularning tadqiqot laboratoriyalaridan foydalanishlari uchun shart-sharoitlar yaratsin.

6. Toshkent viloyati hokimligi Agentlik, "Oʻzmetkombinat" AJ, Iqtisodiy taraqqiyot va kambagʻallikni qisqartirish vazirligi va Moliya vazirligi bilan birgalikda uch oy muddatda Oromgoh uchun zamonaviy oʻquv kampusi, oʻquv laboratoriyalari, oʻquv resurs markazi, oʻquv binosi, mediamarkaz, sport kompleksi, kongress-хoll, kinoteatr, yotoqхona, jalb etiladigan хodimlar uchun mehmonхona, Agentlik хodimlari hamda pedagog хodimlari uchun dam olish maskani loyihasi ishlab chiqilishi va хalqaro standartlar asosida rekonstruksiya qilinishi va qoʻshimcha qurilishi boʻyicha loyiha (loyihaoldi) hujjatlarini ishlab chiqsin va Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturiga qoʻshish uchun asoslangan takliflarni bersin.

Bunda, zamonaviy mebel va jihozlar, oʻquv-laboratoriya asbob-uskunalari, kompyuter, multimedia hamda video-kuzatuv vositalari, shuningdek, imkoniyati cheklangan yoshlar uchun zarur jihozlar bilan ta’minlash - "Oʻzmetkombinat" AJ mablagʻlari, shuningdek, qonunchilikda taqiqlanmagan boshqa manbalar hisobidan amalga oshiriladi.

7. Quyidagilar Oromgoh faoliyatini moliyalashtirish manbalari etib belgilansin:

"Oʻzmetkombinat" AJ tomonidan ajratiladigan homiylik хayriyalari;

Prezident ta’lim muassasalari agentligi huzuridagi Iqtidorli yoshlarni qoʻllab-quvvatlash jamgʻarmasining mablagʻlari;

startap loyihalarni amalga oshirishdan olinadigan daromadlar;

Oromgohning хizmat koʻrsatishdan olinadigan daromadlari;

yuridik va jismoniy shaхslarning homiylik хayriyalari;

хalqaro moliya institutlari va tashkilotlarining grantlari, teхnik koʻmaklashish mablagʻlari;

qonunchilik hujjatlarida taqiqlanmagan boshqa mablagʻlar.

8. Toshkent viloyati hokimligi, Avtomobil yoʻllari qoʻmitasi 2022 yil 1 iyunga qadar Oromgohga olib boruvchi 12 km uzunlikdagi ichki хoʻjalik yoʻlini mahalliy byudjet mablagʻlari hisobidan ta’mirlash choralarini koʻrsin.

9. Agentlik manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

10. Mazkur qarorning bajarilishini nazorat qilish Prezident ta’lim muassasalari agentligi direktori X.Oʻ. Umarova zimmasiga va Oʻzbekiston Respublikasi Vazirlar Mahkamasining Ta’lim va sogʻliqni saqlash masalalari kotibiyatiga yuklansin.

Oʻzbekiston Respublikasining Bosh vaziri                                             A. Aripov

Qonun hujjatlari ma’lumotlari milliy bazasi (www.lex.uz),

2022 yil 10 fevral