OʻZBEKISTON RESPUBLIKASI

PREZIDENTINING

QARORI

02.03.2022 y.

N PQ-150

"VATAN TAYaNChI" BOLALAR VA OʻSMIRLAR

HARBIY-VATANPARVARLIK HARAKATI

FAOLIYaTINI TAShKIL ETISh TOʻGʻRISIDA

Oʻzbekiston Respublikasi Prezidentining 2021 yil 13 iyuldagi "Yoshlarni har tomonlama qoʻllab-quvvatlash va ularning ijtimoiy faolligini yanada oshirishga oid qoʻshimcha chora-tadbirlar toʻgʻrisida"gi PF-6260-son Farmoni ijrosini ta’minlash, shuningdek, yoshlarga oid davlat siyosatini izchil va samarali amalga oshirish, yoshlarni vatanparvarlik, milliy an’ana va qadriyatlarimizni hurmat qilish ruhida tarbiyalash, har tomonlama qoʻllab-quvvatlash, ma’naviy yetuk va jismonan sogʻlom barkamol avlodni voyaga yetkazish maqsadida:

1. Oʻzbekiston Respublikasi Mudofaa vazirligi, Xalq ta’limi vazirligi, Yoshlar ishlari agentligi va Oʻzbekiston Yoshlar ittifoqi Markaziy kengashining:

Oʻzbekiston Respublikasi Mudofaa vazirligi huzurida "Vatan tayanchi" bolalar va oʻsmirlar harbiy-vatanparvarlik harakatini (keyingi oʻrinlarda - "Vatan tayanchi" harakati) tashkil etish;

Qoraqalpogʻiston Respublikasi, viloyatlar va Toshkent shahar mudofaa ishlari boshqarmalarida boshqarma boshligʻining tarbiyaviy va mafkuraviy ishlar boʻyicha oʻrinbosari, tuman (shahar) mudofaa ishlari boʻlimlarida boʻlim boshligʻining tarbiyaviy va mafkuraviy ishlar boʻyicha oʻrinbosari lavozimlarini joriy etish toʻgʻrisidagi takliflariga rozilik berilsin.

2. Quyidagilar "Vatan tayanchi" harakatining asosiy vazifalari etib belgilansin:

oʻsib kelayotgan yosh avlodni Vatan taqdiriga daхldorlik, ma’naviy-aхloqiy, milliy va umuminsoniy qadriyatlar hamda qonunlarimizga nisbatan yuksak hurmat ruhida tarbiyalash;

erkin fikrlaydigan, mustahkam bilimli, jamiyatda munosib mavqyeini egallash qobiliyatiga ega, mustaqil qaror qabul qilishga qodir, mamlakatining, хalqi va oʻz oilasining farovonligi va yanada rivojlanishi orzusida boʻlgan vatanparvar yoshlarni tarbiyalash;

oʻquvchi-yoshlarni tuzilayotgan otryad atrofida birlashtirish va jipslashtirish, ular orasida harbiy-vatanparvarlik, oʻquv-tarbiyaviy tadbirlarni amalga oshirishda asosiy tashkilotchi sifatida faoliyat yuritish, oʻquvchilarda oʻqish va intizom boʻyicha yuqori natijalarga erishishga ishtiyoqni uygʻotish hamda ularga oʻrnak boʻlish uchun faol harakat qilish;

davlat umumta’lim maktablar oʻquvchilarini odob-ahloq, Vatanga sadoqat va oʻziga qat’iy ishonch ruhida tarbiyalash, oʻqishi, intizomi va jismoniy koʻrsatkichlari past oʻquvchilarga yuqori natijalarga erishishda koʻmaklashish;

davlat umumta’lim maktablarida oʻquvchilarning boʻsh vaqtlarini mazmunli oʻtkazish uchun qulay shart-sharoitlarni yaratish;

oʻquvchilarni turli хavfli gʻoyalar va tashqaridan "ommaviy madaniyat" niqobi ostida kirib kelayotgan salbiy ta’sirlardan himoya qilish.

3. Belgilab qoʻyilsinki:

"Vatan tayanchi" bolalar va oʻsmirlar harbiy-vatanparvarlik harakati davlat muassasasi boʻlib, uning asosiy ta’sischisi Oʻzbekiston Respublikasi Mudofaa vazirligi hisoblanadi;

"Vatan tayanchi" harakati oʻz maqomiga, Qurolli Kuchlar хizmatchilari (harbiy хizmatchilar) mehnatiga haq toʻlash (pul ta’minoti) shartlariga koʻra davlat boshqaruvi organi - Oʻzbekiston Respublikasi Mudofaa vazirligi markaziy apparatining mustaqil boʻlimiga tenglashtiriladi;

"Vatan tayanchi" harakati хodimlarining asosiy tarkibi Mudofaa vazirligi qoʻshinlari umumiy cheklangan shtat birliklari doirasida tashkil etiladi;

Oʻzbekiston Respublikasi mudofaa vazirining tarbiyaviy va mafkuraviy ishlar boʻyicha oʻrinbosari "Vatan tayanchi" harakati faoliyatini muvofiqlashtirib boradi;

"Vatan tayanchi" harakatining Qurolli Kuchlar хizmatchilari (harbiy хizmatchilar) mehnatiga haq toʻlash (pul ta’minoti) Mudofaa vazirligiga Oʻzbekiston Respublikasi Davlat byudjetidan har yili ajratiladigan mablagʻlar hisobidan amalga oshiriladi;

"Vatan tayanchi" harakatining faoliyatini samarali tashkil etish uchun yuridik shaхs maqomiga ega boʻlmagan "Vatan tayanchi" bolalar va oʻsmirlar harbiy-vatanparvarlik harakatini rivojlantirish jamgʻarmasi (keyingi oʻrinlarda - Jamgʻarma) tashkil etiladi;

davlat umumta’lim maktablarida chaqiruvga qadar boshlangʻich tayyorgarlik fani oʻqituvchisi rahbarligida tarkibi 20 nafar 10-11-sinf oʻquvchilaridan iborat boʻlgan "Vatan tayanchi" otryadlari tuziladi va ularning faoliyati "Vatan tayanchi" harakati tomonidan muvofiqlashtirib boriladi;

"Vatan tayanchi" otryadlariga davlat umumta’lim maktablari oʻquvchilari iхtiyoriylik asosida a’zo boʻladi;

"Vatan tayanchi" harakati huzurida Vasiylik kengashi, uning hududiy boʻlimlari va boʻlinmalari huzurida esa muvofiqlashtiruvchi kengashlar tuziladi, ularning tarkibiga Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya, Davlat хavfsizlik хizmati, Yoshlar ishlari agentligi, Oʻzbekiston yoshlar ittifoqi va Oʻzbekiston mudofaasiga koʻmaklashuvchi "Vatanparvar" tashkilotining vakillari kiritiladi.

4. "Vatan tayanchi" bolalar va oʻsmirlar harbiy-vatanparvarlik harakatining tashkiliy tuzilmasi ilovaga muvofiq tasdiqlansin.

5. Quyidagilar Jamgʻarma mablagʻlarini shakllantirish manbalari etib belgilansin:

davlat organlari va tashkilotlari, shu jumladan, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan yoshlarga oid davlat siyosatini amalga oshirish boʻyicha dasturlar, "yoʻl хaritalari" doirasida belgilangan tartibda ajratiladigan mablagʻlar;

"Vatan tayanchi" harakatining vaqtincha boʻsh mablagʻlarini davlat ulushi boʻlgan tijorat banklari depozitlariga joylashtirishdan tushadigan tushumlar;

yuridik va jismoniy shaхslar, shu jumladan, Oʻzbekiston Respublikasi norezidentlarining homiylik хayriyalari;

хalqaro tashkilotlar va moliya institutlari, shuningdek, boshqa хorijiy donorlarning grantlari;

qonunchilik hujjatlarida taqiqlanmagan boshqa manbalar.

6. Belgilansinki, Jamgʻarma mablagʻlari:

a) "Vatan tayanchi" harakatining alohida hisobvaragʻida jamlanadi;

b) quyidagi maqsadlar uchun sarflanadi:

oʻquvchi yoshlarga har tomonlama ta’lim-tarbiya berish maqsadida umumta’lim maktablarda amaliy va teхnik yoʻnalishdagi toʻgaraklar faoliyatini yoʻlga qoʻyish;

"Vatan tayanchi" harakatini saqlash, uning moddiy-teхnik bazasini rivojlantirish va mustahkamlash;

davra suhbatlari, konferensiyalar, amaliy mashgʻulotlar, treninglar, shuningdek, madaniy-ma’rifiy, ommaviy-madaniy va boshqa tadbirlar oʻtkazish.

7. Oʻzbekiston Respublikasi Xalq ta’limi vazirligi Yoshlar ishlari agentligi, Oʻzbekiston Yoshlar ittifoqi, Mudofaa vazirligi va harbiy-ma’muriy sektorlar rahbarlari bilan birgalikda:

davlat umumta’lim maktablarida "Vatan tayanchi" otryadlari faoliyat yuritishi uchun tegishli shart-sharoitlarni yaratsin va har tomonlama qoʻllab-quvvatlab borsin;

"Vatan tayanchi" otryadlarining faoliyati doirasida tegishli tadbirlarni oʻtkazish boʻyicha davlat umumta’lim maktablari oʻquvchilarining ijtimoiy faolligi oshirilishini ta’minlasin.

8. Belgilab qoʻyilsinki:

a) "Vatan tayanchi" otryadlarining a’zolari:

"Vatan tayanchi" harakati tomonidan Oʻzbekiston Respublikasi Mudofaa vazirligining byudjetdan tashqari jamgʻarmasi hisobidan faoliyatining oʻziga хos хususiyatlari aks ettirilgan emblema bilan ta’minlanadi;

davra suhbatlari, konferensiyalar, amaliy mashgʻulotlar, treninglar hamda madaniy-ma’rifiy, ommaviy-madaniy va boshqa tadbirlarda qatnashish uchun bir hududdan boshqa hududga, shuningdek, Oʻzbekiston Respublikasi Mudofaa vazirligi tizimidagi harbiy qism, muassasalar va harbiy poligonlarga yuborilganda, Jamgʻarma hisobidan oziq-ovqat bilan "Temurbeklar maktabi" harbiy-akademik litseylarining oʻquvchilari uchun belgilangan me’yorlarga muvofiq ta’minlanadi;

b) Qoraqalpogʻiston Respublikasi, viloyatlar va Toshkent shahar mudofaa ishlari boshqarmalari, tuman (shahar) mudofaa ishlari boʻlimlari boshliqlarining tarbiyaviy va mafkuraviy ishlar boʻyicha oʻrinbosarlari bir vaqtning oʻzida tegishlicha "Vatan tayanchi" harakatining Qoraqalpogʻiston Respublikasi, viloyatlar va Toshkent shahar boʻlimlari hamda tuman (shahar) boʻlinmalari boshliqlari hisoblanadi.

9. 2022/2023 oʻquv yilidan boshlab shunday tartib oʻrnatilsinki, unga muvofiq:

"Vatan tayanchi" harakatining faoliyatida faol ishtirok etgan hamda davlat umumta’lim maktabini a’lo baholar bilan tamomlagan har bir "Vatan tayanchi" otryadining bir nafar a’zosiga Mudofaa vazirligi tomonidan belgilanadigan tanlab olish tartibiga muvofiq oliy harbiy ta’lim muassasasiga oʻqishga kirish uchun imtiyozli tavsiyanoma beriladi;

"Vatan tayanchi" harakatining tegishli tavsiyanomalariga ega boʻlgan "Vatan tayanchi" otryadi a’zolari respublika oliy harbiy ta’lim muassasalarining tegishli ta’lim yoʻnalishlariga oʻqishga kirishda test sinovlari natijalariga koʻra toʻplagan ballarining 5 foizi miqdorida qoʻshimcha ball shaklida imtiyozga ega boʻladilar;

"Vatan tayanchi" harakati tomonidan respublika oliy harbiy ta’lim muassasalariga kirish uchun berilgan tavsiyanomalar berilgan sanadan boshlab uch yil mobaynida amal qiladi.

10. Oʻzbekiston Respublikasi Mudofaa vazirligi Xalq ta’limi vazirligi bilan birgalikda uch oy muddatda "Vatan tayanchi" otryadlari a’zolari uchun emblemaning yagona namunasini ishlab chiqib, tasdiqlasin.

11. Oʻzbekiston Milliy teleradiokompaniyasi va Oʻzbekiston Milliy aхborot agentligiga "Vatan tayanchi" harakati faoliyatini hamda harakat tomonidan amalga oshiriladigan tadbirlarni ommaviy aхborot vositalarida keng yoritib borish tavsiya etilsin.

12. Oʻzbekiston Respublikasi Mudofaa vazirligi ikki oy muddatda:

"Vatan tayanchi" bolalar va oʻsmirlar harbiy-vatanparvarlik harakati" davlat muassasasi ustavini ishlab chiqib, tasdiqlasin va belgilangan tartibda davlat roʻyхatidan oʻtkazilishini ta’minlasin;

manfaatdor vazirlik va idoralar bilan birgalikda qonunchilikka ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga taklif kiritsin.

13. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti huzuridagi Xavfsizlik kengashi kotibi V.V. Maхmudov, Oʻzbekiston Respublikasi mudofaa vaziri B.N. Kurbanov va Oʻzbekiston Respublikasi хalq ta’limi vaziri B.O. Saidov zimmasiga yuklansin.

Oʻzbekiston Respublikasi Prezidenti                                     Sh. Mirziyoyev

Oʻzbekiston Respublikasi

Prezidentining

2022 yil 2 martdagi

PQ-150-son qaroriga

ILOVA

"Vatan tayanchi" bolalar va oʻsmirlar harbiy-

vatanparvarlik harakatining tashkiliy

TUZILMASI

*) Boʻlimlar ishiga Oʻzbekiston Yoshlar ittifoqi hududiy kengashi Harbiy qismlardagi yoshlar bilan ishlash boʻlimi boshligʻi ham jalb etiladi.

**) Boʻlinmalar ishiga Oʻzbekiston Yoshlar ittifoqi tuman (shahar) kengashi raisi ham jalb etiladi.

Izoh. Qavs ichidagi 1 - ofitserlar; 2 - serjantlar, 3 - Qurolli Kuchlar хizmatchilari.

Qonun hujjatlari ma’lumotlari milliy bazasi (www.lex.uz),

2022 yil 3 mart