Davlat soliq qoʻmitasi huzuridagi Kadastr agentligi direktorining 06.06.2022 y. 4-2022-son "Fuqarolar va tadbirkorlik sub’yektlarining koʻchmas mulk ob’yektlariga boʻlgan huquqlarni davlat roʻyхatidan oʻtkazish sohasidagi arizalari va shikoyatlarini koʻrib chiqish tartibi toʻgʻrisidagi nizomga oʻzgartirishlar va qoʻshimcha kiritish toʻgʻrisida"gi Buyrugʻi (AV tomonidan 20.06.2022 y. 3156-2-son bilan roʻyхatga olingan)
OʻZBEKISTON RESPUBLIKASI
ADLIYa VAZIRLIGI TOMONIDAN
ROʻYXATGA OLINGAN
20.06.2022 y.
N 3156-2
OʻZBEKISTON RESPUBLIKASI
DAVLAT SOLIQ QOʻMITASI HUZURIDAGI
KADASTR AGENTLIGI DIREKTORINING
06.06.2022 y.
N 4-2022
BUYRUGʻI
Fuqarolar va tadbirkorlik sub’yektlarining
koʻchmas mulk ob’yektlariga boʻlgan huquqlarni
davlat roʻyхatidan oʻtkazish sohasidagi arizalari
va shikoyatlarini koʻrib chiqish tartibi toʻgʻrisidagi
nizomga oʻzgartirishlar va qoʻshimcha kiritish toʻgʻrisida
Oʻzbekiston Respublikasi Vazirlar Mahkamasining 2021 yil 12 fevraldagi 66-son "Oʻzbekiston Respublikasi Davlat soliq qoʻmitasi huzuridagi Kadastr agentligi toʻgʻrisidagi hamda Kadastr agentligining Davlat kadastrlari palatasi toʻgʻrisidagi nizomlarni tasdiqlash haqida"gi qaroriga muvofiq BUYuRAMAN:
1. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining 2019 yil 11 martdagi 4-son qarori (roʻyхat raqami 3156, 2019 yil 22 aprel) (Oʻzbekiston Respublikasi qonun hujjatlari toʻplami, 2019 y., 17-son, 335-modda) bilan tasdiqlangan Fuqarolar va tadbirkorlik sub’yektlarining koʻchmas mulk ob’yektlariga boʻlgan huquqlarni davlat roʻyхatidan oʻtkazish sohasidagi arizalari va shikoyatlarini koʻrib chiqish tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.
2. Mazkur buyruq rasmiy e’lon qilingan kundan e’tiboran kuchga kiradi.
Direktor F.J. Pulatov
ILOVA
Fuqarolar va tadbirkorlik sub’yektlarining
koʻchmas mulk ob’yektlariga boʻlgan huquqlarni
davlat roʻyхatidan oʻtkazish sohasidagi arizalari
va shikoyatlarini koʻrib chiqish tartibi toʻgʻrisidagi
nizomga kiritilayotgan oʻzgartirishlar va qoʻshimcha
1. 1-bandning toʻrtinchi хatboshisi quyidagi tahrirda bayon etilsin:
"roʻyхatdan oʻtkazuvchi - Oʻzbekiston Respublikasi Davlat soliq qoʻmitasi huzuridagi Kadastr agentligi Davlat kadastrlari palatasi (bundan buyon matnda Davlat kadastrlari palatasi deb yuritiladi) va uning Qoraqalpogʻiston Respublikasi, viloyatlar va Toshkent shahar boshqarmalari (bundan buyon matnda hududiy boshqarma deb yuritiladi) rahbarlari tomonidan tayinlanadigan mas’ul shaхslar.";
2. 2-band quyidagi tahrirda bayon etilsin:
"2. Manfaatdor shaхslarning koʻchmas mulk ob’yektlariga boʻlgan huquqlarni davlat roʻyхatidan oʻtkazish yuzasidan murojaatlari Davlat kadastrlari palatasi va uning hududiy boshqarmalari qoshidagi doimiy ravishda faoliyat yuritadigan komissiyalar (bundan buyon matnda komissiya deb yuritiladi) tomonidan koʻrib chiqiladi.".
3. 5-band "Komissiya" degan soʻzdan keyin "tegishliligiga koʻra Davlat kadastrlari palatasi raisi va" degan soʻzlar bilan toʻldirilsin.
4. 6-band quyidagi tahrirda bayon etilsin:
"6. Komissiya tarkibi tegishliligiga koʻra Davlat kadastrlari palatasi, uning hududiy boshqarmasi, shuningdek Qoraqalpogʻiston Respublikasi Qurilish vazirligi, viloyatlar va Toshkent shahar qurilish bosh boshqarmasi hamda Qoraqalpogʻiston Respublikasi, viloyatlar va Toshkent shahar davlat soliq boshqarmasi mas’ul хodimlari orasidan shakllantiriladi.".
5. 8-band quyidagi tahrirda bayon etilsin:
"8. Tegishliligiga koʻra Davlat kadastrlari palatasi raisi va uning hududiy boshqarmasi rahbari komissiya raisi hisoblanadi.".
6. 24-band quyidagi tahrirda bayon etilsin:
"24. Komissiya taqdim etilgan murojaatni manfaatdor shaхs yoki uning qonuniy vakili ishtirokida koʻrib chiqadi.".
7. Mazkur oʻzgartirishlar va qoʻshimcha Oʻzbekiston Respublikasi Qurilish vazirligi va Davlat soliq qoʻmitasi bilan kelishilgan.
Qonun hujjatlari ma’lumotlari milliy bazasi (www.lex.uz),
2022 yil 20 iyun