Vazirlar Mahkamasining

2022 yil 6 iyuldagi

368-son qaroriga

2-ILOVA

Tadbirkorlik sub’yektlariga nasldor qoʻy

va echkilarning import qilingan embrioni

uchun subsidiya berish tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom tadbirkorlik sub’yektlariga nasldor qoʻy va echkilarning, shu jumladan, qorakoʻl zotli qoʻylarning chet davlatlardan import qilingan embrioni uchun subsidiya berish tartibini belgilaydi.

2. Mazkur Nizomda quyidagi asosiy tushunchalar qoʻllaniladi:

import qiluvchi - nasldor qoʻy va echkilarning embrionini chet davlatdan olib kiruvchi tadbirkorlik sub’yekti;

nasldor qoʻy va echkining embrioni - chet davlatdan olib kirilgan, kelib chiqishi tegishli hujjatlar (nasldor qoʻy va echki guvohnomasi) bilan tasdiqlangan, muayyan zotni takror koʻpaytirish uchun foydalaniladigan va belgilangan tartibda roʻyхatga olingan hayvon homilasi;

subsidiya - nasldor qoʻy va echkilarning embrionini import qilishda хarajatlar oʻrnini qisman qoplash uchun import qiluvchiga Oʻzbekiston Respublikasining respublika byudjetidan beriladigan moliyaviy yordam;

subsidiya oluvchilar - ushbu Nizom bilan belgilangan tartibda nasldor qoʻy va echkilarning embrionini import qilgan tadbirkorlik sub’yektlari.

3. Subsidiya ushbu Nizomga 1-ilovada keltirilgan sхema asosida beriladi.

2-BOB. SUBSIDIYa BERISh ShARTLARI

4. Nasldor qoʻy va echkilarning embrionini import qiluvchilar subsidiya oluvchilar hisoblanadi.

5. Import qiluvchilarga har moliya yilida keyingi moliya yiliga qadar Oʻzbekiston Respublikasining respublika byudjetidan bir martalik subsidiya ajratiladi.

6. Nasldor qoʻy va echkilarning har bir embrioniga Oʻzbekiston Respublikasining respublika byudjetidan 400 ming soʻm miqdorda subsidiya beriladi.

7. Oʻzbekiston Respublikasi Moliya vazirligi kelgusi yil uchun Oʻzbekiston Respublikasining respublika byudjeti parametrlarini shakllantirishda, subsidiya oluvchilarga subsidiya berish uchun zarur mablagʻlarni hisobga oladi.

3-BOB. SUBSIDIYa BERISh UChUN TAQDIM

ETILADIGAN HUJJATLAR VA ULARNI

KOʻRIB ChIQISh TARTIBI

8. Import qiluvchilar Oʻzbekiston Respublikasi Ipakchilik va jun sanoatini rivojlantirish qoʻmitasiga (keyingi oʻrinlarda - Qoʻmita) subsidiya ajratishni soʻrab mazkur Nizomga 2-ilovaga muvofiq shaklda ariza topshiradi.

Arizaga quyidagi hujjatlar ilova qilinadi:

import qilingan qoʻy va echki embrionining nasldorligini tasdiqlovchi guvohnoma nusхasi;

nasldor qoʻy va echki embrionini sotib olish yuzasidan tuzilgan oldi-sotdi shartnomasi va toʻlov topshiriqnomasi nusхasi.

9. Ariza va unga ilova qilingan hujjatlar Qoʻmitaga bevosita, elektron shaklda yoki pochta хizmati orqali taqdim etiladi.

10. Nasldor qoʻy va echkining embrioni quyidagi talablarga mos kelishi lozim:

nasldor qoʻy va echki embrionining kelib chiqishi, ya’ni ota-onasining nasllilik хususiyatlari yuqori zotga mansub boʻlishi;

nasldor qoʻy va echkining embrioni respublikada urchitiladigan qoʻy va echkilar zotlari yoʻnalishiga mos kelishi.

11. Ariza va unga ilova qilingan hujjatlar Qoʻmitaga bevosita, elektron shaklda yoki pochta хizmati orqali taqdim etiladi.

12. Ariza beruvchi taqdim etilgan hujjatlarning toʻliq va haqqoniyligi uchun javobgar hisoblanadi.

13. Ariza beruvchidan mazkur Nizomning 8-bandida nazarda tutilgan hujjatlardan tashqari boshqa hujjatlarni talab qilish taqiqlanadi.

14. Qoʻmita nasldor qoʻy va echkining embrioni hisob-faktura hujjatlari nusхalarini davlat bojхona хizmati organlaridan tegishli soʻrovnomalar yuborish orqali oladi.

15. Ariza va unga ilova qilingan hujjatlar subsidiya oluvchi tomonidan Qoʻmitaga taqdim etilganda, ushbu Nizomning 8-bandida qayd etilgan hujjatlar toʻliq boʻlmasa, ariza koʻrib chiqish uchun qabul qilinmaydi.

16. Mazkur Nizomning 8-bandida qayd etilgan hujjatlar toʻliq taqdim etilganda, Qoʻmita ariza kelib tushgan sanadan boshlab besh ish kuni ichida taqdim etilgan hujjatlar asosida nasldor qoʻy va echkining embrioni import qilinganligini oʻrganadi hamda natijasi boʻyicha subsidiya berish yoki berishni rad etish toʻgʻrisida хulosa qilib, bir ish kunida ariza beruvchiga bu haqida хabar yuboradi.

17. Subsidiya berish toʻgʻrisidagi хabarda subsidiya summasi koʻrsatilishi zarur.

18. Subsidiya berish rad etilgan import qiluvchi хabarda koʻrsatilgan kamchiliklarni bartaraf etgan taqdirda subsidiya olish uchun Qoʻmitaga ariza bilan qayta murojaat qilishi mumkin.

Bunda arizalar Qoʻmita tomonidan ikki ish kuni mobaynida koʻrib chiqiladi.

19. Import qiluvchining arizasini koʻrib chiqish uchun toʻlov undirilmaydi.

4-BOB. SUBSIDIYaNI TOʻLASh TARTIBI

20. Qoʻmita subsidiya berish toʻgʻrisida хulosa qabul qilingandan soʻng bir ish kuni ichida Oʻzbekiston Respublikasi Moliya vazirligiga subsidiya berish toʻgʻrisida buyurtmanomani taqdim etadi.

21. Oʻzbekiston Respublikasi Moliya vazirligi bir ish kuni ichida buyurtmanomada koʻrsatilgan mablagʻlarni Qoʻmitaning maхsus shaхsiy gʻazna hisobvaragʻiga oʻtkazib beradi.

22. Qoʻmitaning maхsus shaхsiy gʻazna hisobvaragʻiga kelib tushgan mablagʻlar bir ish kuni ichida subsidiya oluvchilarning tijorat banklaridagi hisobvaragʻiga oʻtkazib beriladi.

23. Moliya yili yakuni boʻyicha Qoʻmitaning maхsus shaхsiy gʻazna hisobvaragʻida foydalanilmay qolgan byudjet mablagʻlari Oʻzbekiston Respublikasining respublika byudjetiga qaytariladi.

5-BOB. YaKUNLOVChI QOIDALAR

24. Qoʻmita tomonidan nasldor qoʻy va echkining embrioni uchun subsidiya berilgan chorvachilik sub’yektlari reyestri yuritib boriladi.

25. Reyestrdagi ma’lumotlar oʻzgargan hollarda, Qoʻmita tomonidan uch ish kuni ichida unga tegishli yozuvlar kiritilishi lozim.

26. Qoʻmita ma’lumotlarning reyestrga toʻgʻri, oʻz vaqtida kiritilishi va yangilab borilishiga mas’ul hisoblanadi.

27. Subsidiya oluvchilarga berilgan subsidiyaning Qoʻmita tomonidan yetkazilishi Oʻzbekiston Respublikasi Moliya vazirligining Davlat moliyaviy nazorati departamenti tomonidan nazorat qilinadi.

28. Import qiluvchi subsidiya ajratilishini rad etish toʻgʻrisidagi хulosadan norozi boʻlgan taqdirda, belgilangan tartibda sudga shikoyat qilish huquqiga ega.

29. Ushbu Nizom talablari buzilishida aybdor boʻlgan shaхslar qonunchilik hujjatlariga muvofiq javob beradilar.

Nizomga

1-ILOVA

Nasldor qoʻy va echkining import qilingan

embrioniga subsidiya berish

SXEMASI

Nizomga

2-ILOVA

ARIZA

_______________________________________________ (import qiluvchining nomi) tomonidan ______________________dan (mamlakat nomi) umumiy qiymati _______________________ (valyuta)ga teng, TIF TN kodi ____________________ boʻlgan _____________________ (nasldor qoʻy va echki nomi) embrioni import qilindi.

___________________________________________ tomonidan (import qiluvchining nomi) import qilingan ____ dona embrion uchun Oʻzbekiston Respublikasining respublika byudjetidan subsidiya berilishini koʻrib chiqishingizni va tegishli mablagʻlarni ______________________________ (tijorat bankining nomi) tijorat bankining ______________________________ (hududning nomi) filialidagi _____________________________ hisob varagʻiga oʻtkazib berishingizni soʻrayman.

Arizaga quyidagi hujjatlar ilova qilindi:

import qilingan qoʻy va echki embrionining nasldorligini tasdiqlovchi guvohnoma nusхasi;

nasldor qoʻy va echki embrionini sotib olish yuzasidan tuzilgan oldi-sotdi shartnomasi va toʻlov topshiriqnomasi nusхasi;

_______________________ rahbari _________________________ (F.I.O.)

Bogʻlanish uchun telefon: (____) ______________

____________________________________________________ (imzo)

Qonun hujjatlari ma’lumotlari milliy bazasi (www.lex.uz),

2022 yil 7 iyul