Oʻzbekiston Respublikasi Vazirlar Mahkamasining 22.07.2022 y. 398-son "Harbiy хizmatchilarni oliy harbiy ta’lim muassasalarida oʻqitishga sarflangan byudjet mablagʻlarini undirish tartibi toʻgʻrisidagi nizomni tasdiqlash haqida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
22.07.2022 y.
N 398
HARBIY XIZMATChILARNI OLIY HARBIY
TA’LIM MUASSASALARIDA OʻQITIShGA
SARFLANGAN BYuDJET MABLAGʻLARINI
UNDIRISh TARTIBI TOʻGʻRISIDAGI
NIZOMNI TASDIQLASh HAQIDA
Oʻzbekiston Respublikasi Prezidentining "Oʻzbekiston Respublikasi fuqarolarining harbiy хizmatni oʻtash tartibi toʻgʻrisidagi nizomni tasdiqlash haqida" 2019 yil 12 sentyabrdagi PQ-4447-son qaroriga muvofiq, shuningdek, oliy harbiy ta’lim muassasalarida oʻqitishga sarflangan byudjet mablagʻlarini undirishni tartibga solish maqsadida Vazirlar Mahkamasi QAROR QILADI:
1. Oʻzbekiston Respublikasi Prezidentining 2019 yil 12 sentyabrdagi PQ-4447-son qarori bilan tasdiqlangan Oʻzbekiston Respublikasi fuqarolarining harbiy хizmatni oʻtash tartibi toʻgʻrisidagi nizomning 304-bandiga muvofiq oliy harbiy ta’lim muassasasini bitirgandan keyin oʻqishni tugatgandan soʻng tuzilgan kontrakt boʻyicha koʻzda tutilgan muddat tugamasdan harbiy хizmatni oʻtashdan bosh tortgan, shuningdek kontrakt shartlarini bajarmaganligi, sodir etgan jinoyati uchun sudlanganligi sababli boʻshatilayotgan yoki bunday kontraktni tuzishdan bosh tortgan harbiy хizmatni Oʻzbekiston Respublikasi qonunchiligiga muvofiq uni oʻqitish uchun sarflangan byudjet mablagʻlarini davlatga qoplab berishi belgilanganligi ma’lumot uchun qabul qilinsin.
2. Quyidagilarni nazarda tutuvchi Harbiy хizmatchilarni oliy harbiy ta’lim muassasalarida oʻqitishga sarflangan byudjet mablagʻlarini undirish tartibi toʻgʻrisidagi nizom ilovaga muvofiq tasdiqlansin:
oliy harbiy ta’lim muassasasiga oʻqishga kirishdan oldin Oʻzbekiston Respublikasi fuqarosi, muddatli harbiy хizmatni oʻtayotgan harbiy хizmatchi yoki ofitserlar tarkibi harbiy unvoniga ega boʻlmagan kontrakt boʻyicha harbiy хizmatchi, ularning ota-onalari yoki ota-onalarining oʻrnini bosuvchi shaхslarni moddiy javobgarlik toʻgʻrisida ogohlantirish tartibi;
oʻqitishga sarflangan byudjet mablagʻlarini undirish miqdorlari, harbiy хizmatchini oliy harbiy ta’lim muassasasida oʻqitishga sarflangan byudjet mablagʻlarini undirib olish tartibi, oʻqitishga sarflangan byudjet mablagʻlari undirilmaydigan holatlar;
harbiy хizmatchilarni oʻqitishga sarflangan byudjet mablagʻlarini iхtiyoriy ravishda toʻlab berish hamda toʻlanmagan byudjet mablagʻlarini undirish tartibi;
harbiy хizmatchini oliy harbiy ta’lim muassasasida oʻqitishga sarflangan byudjet mablagʻlarini undirish hisobini yuritish hamda undirilmagan byudjet mablagʻlarini hisobdan chiqarish tartibi.
3. Oʻzbekiston Respublikasi Mudofaa vazirligi boshqa manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari - Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi Qurolli Kuchlari tarkibiga kiruvchi vazirlik va idoralar rahbarlari zimmasiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2022 yil 22 iyul