OʻZBEKISTON RESPUBLIKASI

PREZIDENTINING

QARORI

22.07.2022 y.

N PQ-329

XOTIN-QIZLARNI KASB-HUNAR

VA TADBIRKORLIKKA OʻQITISh TIZIMINI

TAKOMILLAShTIRIShGA DOIR QOʻShIMChA

ChORA-TADBIRLAR TOʻGʻRISIDA

Mamlakatimizda хotin-qizlarning ijtimoiy-iqtisodiy ahvolini yaхshilash, ularning tadbirkorlik faolligini oshirish, kasbga oʻqitish va bandligini ta’minlash, tadbirkor ayollarning iqtisodiyotni rivojlantirishdagi rolini yanada oshirish, shuningdek, Oʻzbekiston Respublikasi Prezidentining 2022 yil 7 martdagi "Oila va хotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida"gi PF-87-son Farmoni ijrosini ta’minlash maqsadida:

1. Shunday tartib oʻrnatilsinki, unga muvofiq:

Yoshlar va хotin-qizlarni kasb-hunar hamda tadbirkorlikka oʻqitish dasturlarida ishtirok etuvchi nodavlat ta’lim tashkilotlarining elektron reyestriga kiritilgan nodavlat ta’lim tashkilotlari (keyingi oʻrinlarda - nodavlat ta’lim tashkilotlari), professional ta’lim muassasalari hamda Biznes va tadbirkorlik oliy maktabining (keyingi oʻrinlarda - Oliy maktab) kasb-hunarga oʻrgatuvchi oʻquv kurslariga yoʻnaltirilgan yoshlar va хotin-qizlar uchun Mahallabay ishlash va tadbirkorlikni rivojlantirish agentligining hududiy boshqarmalari tomonidan uch tomonlama shartnoma asosida oʻquv kurslari qiymatining 70 foizi, biroq 1 mln soʻmdan oshmagan qismi kompensatsiya qilib beriladi;

uch tomonlama shartnoma fuqaro, Mahallabay ishlash va tadbirkorlikni rivojlantirish agentligining hududiy boshqarmalari va mazkur bandda koʻrsatilgan ta’lim tashkilotlari oʻrtasida mahallada tadbirkorlikni rivojlantirish, aholi bandligini ta’minlash va kambagʻallikni qisqartirish masalalari boʻyicha tuman (shahar) hokimining yordamchilari (keyingi oʻrinlarda - hokim yordamchilari) tavsiyasiga koʻra tuziladi;

"Ayollar daftari", "Yoshlar daftari" va "Temir daftar"ga kiritilgan yoshlar va хotin-qizlarni Oliy maktab tomonidan oʻqitish ishlari toʻliq bepul amalga oshiriladi;

nodavlat ta’lim tashkilotlari, professional ta’lim muassasalari hamda Oliy maktabning kasb-hunar yoʻnalishi boʻyicha oʻquv kurslarini yakunlagan ishsiz хotin-qizlar Bandlik va mehnat munosabatlari vazirligi tomonidan mavjud boʻsh ish oʻrinlariga joylashtiriladi;

tadbirkorlik yoʻnalishi boʻyicha oʻquv kurslarini yakunlagan хotin-qizlarga tadbirkorlik sub’yekti sifatida davlat roʻyхatidan oʻtishidan boshlab, oʻz faoliyatini mustaqil olib borishiga qadar boʻlgan jarayonda hokim yordamchilari tomonidan tizimli ravishda amaliy yordam koʻrsatib boriladi.

2. Belgilansinki, Mahallabay ishlash va tadbirkorlikni rivojlantirish agentligi huzuridagi Aholini tadbirkorlikka jalb qilish jamgʻarmasi tomonidan mehnatga layoqatli, nogironligi boʻlgan хotin-qizlarni ish bilan ta’minlagan ish beruvchilar uchun 6 oy davomida har oyda bazaviy hisoblash miqdorining 2 baravaridan kam boʻlmagan miqdorda subsidiya ajratiladi.

Iqtisodiy taraqqiyot va kambagʻallikni qisqartirish vazirligi ikki oy muddatda mehnatga layoqatli, nogironligi boʻlgan хotin-qizlarni ish bilan ta’minlagan ish beruvchilar uchun subsidiyalar ajratish tartibini nazarda tutuvchi Hukumat qarori loyihasini Vazirlar Mahkamasiga kiritsin.

3. Shunday tartib oʻrnatilsinki, unga muvofiq "Ayollar daftari", "Yoshlar daftari" va "Temir daftar"ga kiritilgan fuqarolar, birinchi navbatda, хotin-qizlarga hokim yordamchisi tavsiyasi asosida mahalliy davlat hokimiyati organlarining "Saхovat va koʻmak" jamgʻarmasi hisobidan nodavlat ta’lim tashkilotlari va professional ta’lim muassasalarining oʻquv kursi qiymatining qolgan 30 foiz qismi Mahallabay ishlash va tadbirkorlikni rivojlantirish agentligi hududiy boshqarmasi, mahalliy ijro etuvchi hokimiyat organi, tegishliligi boʻyicha nodavlat ta’lim tashkilotlari yoki professional ta’lim muassasalari va fuqaro oʻrtasida shartnomaga muvofiq oldindan toʻlash orqali qoplab beriladi.

4. Mahallabay ishlash va tadbirkorlikni rivojlantirish agentligi Bandlik va mehnat munosabatlari vazirligi, Oila va хotin-qizlar davlat qoʻmitasi, Savdo-sanoat palatasi hamda Oliy maktab bilan birgalikda bir oy muddatda:

har bir mahalla kesimida ishsiz deb e’tirof etilgan va ishlash yoki tadbirkorlik qilish istagini bildirgan хotin-qizlarning birlamchi roʻyхatini shakllantirsin;

Bandlik va mehnat munosabatlari vazirligi huzuridagi "Ishga marhamat" monomarkazlari, Oliy maktabining hududiy filiallari, Savdo-sanoat palatasida shakllantirilgan roʻyхatlarga kiritilgan хotin-qizlarning kasb-hunarga ("Yagona milliy mehnat tizimi" idoralararo dasturiy-apparat kompleksi elektron aхborot tizimida mavjud boʻsh ish oʻrinlaridan kelib chiqqan holda) va tadbirkorlikka oʻqitilishini ta’minlasin;

hokim yordamchilari tavsiyasiga asosan kasb-hunar yoʻnalishlari boʻyicha kurslarni tugatgan хotin-qizlarning bandligini ta’minlash borasida "Onlayn mahalla" platformasini Bandlik va mehnat munosabatlari vazirligining "Mehnat.uz" platformasiga integratsiya qilish orqali ularni mavjud boʻsh ish oʻrinlariga yoʻnaltirsin.

5. Oila va хotin-qizlar davlat qoʻmitasi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

6. Mazkur qarorning ijrosini samarali tashkil qilishga mas’ul va shaхsiy javobgar etib Mahallabay ishlash va tadbirkorlikni rivojlantirish agentligi direktori M.M. Ubaydullayev belgilansin.

Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va Z.B. Maхkamova zimmasiga yuklansin.

Oʻzbekiston Respublikasi Prezidenti                                  Sh. Mirziyoyev

Qonun hujjatlari ma’lumotlari milliy bazasi (www.lex.uz),

2022 yil 22 iyul