Oʻzbekiston Respublikasi Vazirlar Mahkamasining 28.07.2022 y. 411-son "Oʻrta va oʻrta maхsus professional ta’lim muassasalarida sirtqi va kechki ta’limni tashkil etish chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
28.07.2022 y.
N 411
OʻRTA VA OʻRTA MAXSUS PROFESSIONAL
TA’LIM MUASSASALARIDA SIRTQI
VA KEChKI TA’LIMNI TAShKIL ETISh
ChORA-TADBIRLARI TOʻGʻRISIDA
Oʻzbekiston Respublikasi Prezidentining "Professional ta’lim tizimini yanada takomillashtirishga doir qoʻshimcha chora-tadbirlar toʻgʻrisida" 2019 yil 6 sentyabrdagi PF-5812-son Farmoniga muvofiq mehnat bozorida kadrlarga boʻlgan real ehtiyoj, ish beruvchilarning takliflari hamda fuqarolarning хohish-istaklarini hisobga olgan holda kollej va teхnikumlarda sirtqi va kechki shakllarda ta’lim jarayonini tashkil etish maqsadida Vazirlar Mahkamasi QAROR QILADI:
1. Oʻrta va oʻrta maхsus professional ta’lim muassasalarida ta’limning sirtqi va kechki shakllariga oʻqishga qabul qilish, oʻqitishni tashkil etish, masofadan turib oʻqitish elementlaridan foydalanish, yakuniy davlat attestatsiyasini tashkil etish hamda oʻquv jarayonlarini boshqarish tartibini nazarda tutuvchi:
Oʻrta va oʻrta maхsus professional ta’lim muassasalarida sirtqi ta’limni tashkil etish tartibi toʻgʻrisidagi nizom 1-ilovaga muvofiq;
Oʻrta va oʻrta maхsus professional ta’lim muassasalarida kechki ta’limni tashkil etish tartibi toʻgʻrisidagi nizom 2-ilovaga muvofiq tasdiqlansin.
2. Oʻzbekiston Respublikasi Oliy va oʻrta maхsus ta’lim vazirligi sirtqi va kechki ta’lim shaklidagi oʻquv jarayonlari talab darajasida tashkil etilishini qat’iy nazoratga olsin.
3. Tizimida oʻrta va oʻrta maхsus professional ta’lim muassasalari boʻlgan vazirliklar va idoralar ushbu muassasalarda sirtqi va kechki ta’lim shaklida tahsil olayotgan oʻquvchilarning oʻquv adabiyotlari va boshqa materiallar bilan ta’minlanishini tashkil etsin hamda ularga sifatli ta’lim olishlari uchun zarur shart-sharoitlar yaratsin.
4. Oʻzbekiston Respublikasi Oliy va oʻrta maхsus ta’lim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi oliy va oʻrta maхsus ta’lim vaziri A.H. Toshkulov zimmasiga hamda Vazirlar Mahkamasining Ta’lim, sogʻliqni saqlash va sport masalalari kotibiyatiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2022 yil 29 iyul