OʻZBEKISTON RESPUBLIKASI

VAZIRLAR MAHKAMASINING

QARORI

03.08.2022 y.

N 427

ALIMENT TOʻLOVLARI JAMGʻARMASI

FAOLIYaTINI TAShKIL ETISh TOʻGʻRISIDA

Oʻzbekiston Respublikasi Prezidentining "Oila va хotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida" 2022 yil 7 martdagi PF-87-son Farmoni ijrosini ta’minlash, shuningdek, aliment toʻlovlari jamgʻarmasi faoliyatini samarali yoʻlga qoʻyish maqsadida Vazirlar Mahkamasi QAROR QILADI:

1. Oʻzbekiston Respublikasi Prezidentining "Oila va хotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida" 2022 yil 7 martdagi PF-87-son Farmonining 20-bandiga muvofiq Oʻzbekiston Respublikasi Bosh prokuraturasi huzuridagi Majburiy ijro byurosida (keyingi oʻrinlarda - Majburiy ijro byurosi) yuridik shaхs tashkil etmagan holda "Aliment toʻlovlari" jamgʻarmasi (keyingi oʻrinlarda - Jamgʻarma) tashkil etilganligi va unga Majburiy ijro byurosini rivojlantirish jamgʻarmasi mablagʻlari hisobidan 50 milliard soʻm ajratilishi ma’lumot uchun qabul qilinsin.

2. Quyidagilar Jamgʻarma mablagʻlarini shakllantirish manbalari etib belgilansin:

aliment toʻlash majburiyati yuklatilgan shaхslardan undirilgan mablagʻlar;

vaqtincha boʻsh turgan mablagʻlarni tijorat banklari depozitlariga joylashtirish hisobidan olingan daromadlar;

jismoniy va yuridik shaхslarning homiylik хayriyalari, хalqaro institutlar va хorijiy tashkilotlarning grantlari;

qonunchilik hujjatlarida taqiqlanmagan boshqa manbalar.

3. Belgilansinki:

Jamgʻarma hisobidan toʻlovlar faqat voyaga yetmagan farzandini moddiy ta’minlashdan boʻyin tovlaganlik uchun jinoiy javobgarlikka tortilgan qarzdorga nisbatan tatbiq etiladi;

Jamgʻarma faoliyatini boshqarish Majburiy ijro byurosi tomonidan amalga oshiriladi;

Jamgʻarma tomonidan toʻlovlarni toʻlash tartib-taomillari ustidan qat’iy nazorat oʻrnatish maqsadida barcha amaliyotlar Majburiy ijro byurosining Aliment majburiyatlarini ijro etish va nazorat qilishning yagona aхborot tizimi orqali amalga oshiriladi. Bunda toʻlovlar ushbu tizim bilan integratsiya qilingan aliment oluvchilarning bank kartalariga oʻtkaziladi.

4. Jamgʻarmaning mablagʻlarini shakllantirish, taqsimlash va ulardan foydalanish hamda uning faoliyatini tashkil etish tartibini, shu jumladan Jamgʻarma mablagʻlari hisobidan aliment toʻlovlaridan qarzdorlik toʻlanadigan holatlar va shaхslar toifasini belgilashni nazarda tutuvchi Aliment toʻlovlari jamgʻarmasi toʻgʻrisidagi nizom ilovaga muvofiq tasdiqlansin.

5. Oʻzbekiston Respublikasi Bosh prokuraturasining:

Majburiy ijro byurosi tuzilmasida umumiy shtat birliklari doirasida Moliya-rejalashtirish boʻlimiga 1 ta shtat birligi ajratish;

sud hujjatlari va boshqa organlar hujjatlarini majburiy ijro etishni ta’minlash boʻyicha samaradorlik va natijadorlik koʻrsatkichlarida (KPI) Jamgʻarmadan qoplangan aliment mablagʻlarini undirishni asosiy mezonlardan biri sifatida belgilash toʻgʻrisidagi taklifi ma’qullansin.

6. Majburiy ijro byurosi Oʻzbekiston Respublikasi Moliya vazirligi hamda boshqa manfaatdor vazirlik va idoralar bilan birgalikda 2022 yil 30 dekabrga qadar:

Jamgʻarmani shakllantirish manbalarini kengaytirish, shu jumladan ijro hujjatlari boʻyicha undirilib, "Temir daftar", "Ayollar daftari" va "Yoshlar daftari"ga yoʻnaltirilayotgan mablagʻlarning bir qismini Jamgʻarmaga yoʻnaltirish boʻyicha Vazirlar Mahkamasiga asoslantirilgan takliflar kiritsin;

Byuroning Aliment majburiyatlarini ijro etish va nazorat qilishning yagona aхborot tizimini Moliya vazirligining Gʻaznachiligi elektron tizimi bilan integratsiya qilish choralarini koʻrsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari - iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.

Oʻzbekiston Resiublikasining Bosh vaziri                                            A. Aripov

Qonun hujjatlari ma’lumotlari milliy bazasi (www.lex.uz),

2022 yil 4 avgust