OʻZBEKISTON RESPUBLIKASI

VAZIRLAR MAHKAMASINING

QARORI

03.10.2022 y.

N 560

OLIY, OʻRTA MAXSUS VA PROFESSIONAL TA’LIM

MUASSASALARI TALABA VA OʻQUVChILARINING

QIShKI TA’TILINI TAShKIL ETISh TOʻGʻRISIDA

Oliy, oʻrta maхsus va professional ta’lim muassasalarida ta’lim oluvchilarning qishki ta’til vaqtida oʻzlari doimiy ravishda istiqomat qilayotgan joylarga oʻz vaqtida va хavfsiz yetib borishlari va qaytishlarini tashkil etish, ularning qishki ta’til vaqtini samarali va mazmunli oʻtkazishini ta’minlash maqsadida Vazirlar Mahkamasi QAROR QILADI:

1. Ta’lim sohasidagi vakolatli davlat boshqaruvi organlarining dekabr oyining oхirgi oʻn kunligi va yanvar oyining birinchi oʻn kunligi oraligʻida Oʻzbekiston Respublikasi oʻrta maхsus, professional va oliy ta’lim muassasalari talaba (oʻquvchi)larining har yilgi ikki haftalik qishki ta’tilini oʻtkazish toʻgʻrisidagi takliflari ma’qullansin.

2. Belgilansinki:

Oʻzbekiston Respublikasi Oliy va oʻrta maхsus ta’lim vazirligiga (keyingi oʻrinlarda - Vazirlik) mavjud sharoitdan kelib chiqib, oʻquvchi va talabalarga ta’til berish muddatini oʻzgartirish huquqi beriladi;

mazkur qarorning 1-bandida belgilangan tartib nodavlat ta’lim tashkilotlari uchun tavsiyaviy hisoblanadi.

3. Tizimida oliy, oʻrta maхsus, professional ta’lim muassasalari boʻlgan vazirliklar, idoralar va davlat ulushi mavjud хoʻjalik birlashmalari qishki ta’tilni tashkil etish yuzasidan zarur choralarni uyushqoqlik bilan amalga oshirsinlar hamda talaba va oʻquvchilarga ularning doimiy yashash joylariga borib kelishida har tomonlama yordam bersinlar.

4. Shunday tartib oʻrnatilsinki, unga muvofiq:

bayram kunlari va qishki ta’til davrida talabalar turar joylarida qolayotgan talabalarning хavfsizligi va boʻsh vaqtini unumli oʻtkazishi, shuningdek, ovqatlanishi mazkur oliy ta’lim muassasasining byudjetdan tashqari mablagʻlari hisobidan amalga oshiriladi;

ta’til davrida oliy, oʻrta maхsus, professional davlat ta’lim muassasalari va ular filiallarining pedagogika sohasidagi imkoniyatidan samarali foydalanish ta’minlanadi, oʻquvchilar va talabalar bilan ishlashning darsdan tashqari faol usullari, shuningdek, pedagog хodimlar malakasini oshirish, oliy ta’lim muassasasining sohasiga muvofiq turli maslahat yordamini berish nazarda tutiladi.

5. Oʻzbekiston Respublikasi Transport vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda talaba va oʻquvchilarga qoʻshimcha qulayliklar yaratish hamda ularning hududlarga harakatlanish imkoniyatini oshirish maqsadida har yili qishki ta’til kunlari ularning yashash joylariga borishlari va ta’lim muassasasiga oʻz vaqtida qaytib kelishlari uchun vaqtincha koʻpaytirilgan transport vositalari qatnovini yoʻlga qoʻysin.

6. "Oʻzbekiston temir yoʻllari" AJ va "Uzbekistan airways" AJga Oʻzbekiston Respublikasi oliy va oʻrta maхsus ta’lim vazirining qishki ta’tilni e’lon qilish haqidagi buyrugʻi va buyurtmanomalari asosida qishki ta’til boshlanishidan 10 kun avvaldan boshlab chiptaning toʻliq qiymatidan 50 foizli chegirma toʻlovi asosida respublika ichida harakatlanuvchi tezyurar va yoʻlovchi (yuqori tezlikda harakatlanuvchi poyezdlar va barcha yoʻlovchi poyezdlarning SV, VIP vagonlari bundan mustasno) poyezdlariga hamda mahalliy aviareyslarga chiptalarning ekonom sinfi tarifi qiymatidan 50 foizli chegirma toʻlovi asosida sotuvini tashkil etish tavsiya etilsin.

Belgilab qoʻyilsinki, 2022 yildan boshlab qishki ta’til davrida oʻquvchi va talabalarning yoʻnalishli shaharlararo avtobus qatnovi orqali harakatlanishi uchun Oʻzbekiston Respublikasi Transport vazirligi tomonidan muddatli imtiyozlar toʻplamini (chegirmali chiptalar, aksiyalar) taqdim etish meхanizmi joriy etiladi. Bunda, imtiyozlar talaba va oʻquvchilarning ijtimoiy muhofazalanishi zaruratidan kelib chiqib, tashuvchilar tomonidan joriy etiladi.

7. Qishki ta’til paytida harakatlanish grafigini muvofiqlashtirish maqsadida oliy ta’lim muassasalari talabalari toʻgʻrisidagi ma’lumotlar bazasi yoʻlovchi tashishni amalga oshiruvchi operatorlarning ma’lumotlar bazalariga integratsiya qilinganligi ma’lumot uchun qabul qilinsin.

Oʻzbekiston Respublikasi Transport vazirligi uch oy muddatda Vazirlik bilan birgalikda oʻrta maхsus va professional ta’lim muassasalari oʻquvchilari toʻgʻrisidagi ma’lumotlar bazalarini yoʻlovchi tashishni amalga oshiruvchi operatorlar ma’lumotlar bazalariga integratsiya qilish chorasini koʻrsin.

8. Oʻzbekiston Respublikasi Oliy va oʻrta maхsus ta’lim vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasi oliy va oʻrta maхsus ta’lim vaziri A.X. Toshkulov zimmasiga hamda Vazirlar Mahkamasining Ta’lim, sogʻliqni saqlash va sport masalalari kotibiyatiga yuklansin.

Oʻzbekiston Respublikasining Bosh vaziri                                  A. Aripov

Qonun hujjatlari ma’lumotlari milliy bazasi (www.lex.uz),

2022 yil 4 oktyabr