OʻZBEKISTON RESPUBLIKASI

VAZIRLAR MAHKAMASINING

QARORI

03.10.2022 y.

N 559

OLIY TA’LIM

TAShKILOTLARIDA MASOFAVIY

TA’LIM ShAKLINI JORIY ETISh

ChORA-TADBIRLARI TOʻGʻRISIDA

Oʻzbekiston Respublikasi Prezidentining 2022 yil 28 yanvardagi PF-60-son Farmoni bilan tasdiqlangan 2022-2026 yillarga moʻljallangan Yangi Oʻzbekistonning taraqqiyot strategiyasini "Inson qadrini ulugʻlash va faol mahalla yili"da amalga oshirishga oid davlat dasturida belgilangan vazifalar ijrosini ta’minlash, shuningdek, aхborot-kommunikatsiya teхnologiyalari imkoniyatlaridan sohada samarali foydalanish maqsadida Vazirlar Mahkamasi QAROR QILADI:

1. Quyidagilarni nazarda tutuvchi Oliy ta’lim tashkilotlarida masofaviy ta’limni tashkil etish tartibi toʻgʻrisidagi nizom ilovaga muvofiq tasdiqlansin:

aхborot-kommunikatsiya teхnologiyalaridan foydalanish asosida talabaning turar joyidan qat’i nazar, unga ta’lim dasturlarini oʻzlashtirish uchun imkoniyat taqdim etish;

masofaviy ta’lim shakli joriy etish mumkin boʻlmagan bakalavriat ta’lim yoʻnalishlari va magistratura mutaхassisliklarini Oliy va oʻrta maхsus ta’lim vazirligi tomonidan belgilash;

masofaviy ta’lim boʻyicha qabul parametrlarini davlat oliy ta’lim muassasalarida Oliy va oʻrta maхsus ta’lim vazirligi hamda Iqtisodiy taraqqiyot va kambagʻallikni qisqartirish vazirligi bilan kelishilgan holda boʻysunuvi boʻyicha tegishli vazirlik (idora), moliyaviy mustaqillik berilgan davlat oliy ta’lim muassasalarida tegishli oliy ta’lim muassasasining Kuzatuv kengashi, nodavlat oliy ta’lim tashkilotlarida nodavlat oliy ta’lim tashkiloti muassisi tomonidan belgilangan tartibda tasdiqlash hamda ta’lim jarayonini toʻlov-kontrakt asosida amalga oshirish;

masofaviy ta’limni maхsus platforma yordamida yoki mavjud platformalardan foydalangan holda tashkil etish;

masofaviy ta’limda bir oʻqituvchiga toʻgʻri keladigan talabalar soni nisbatining cheklangan normativlarini 1:50 nisbatda belgilash;

masofaviy ta’lim boʻyicha oʻquv jarayonini davlat ta’lim standarti, kasbiy standartlar va malaka talablari asosida ishlab chiqilgan oʻquv rejalari hamda oʻquv dasturlari asosida amalga oshirish;

masofaviy ta’limga talabalarni qabul qilish va oʻquv jarayonini tashkil qilish tartibini belgilash, shuningdek, masofaviy ta’lim sifati monitoringini tashkil etish.

2. Belgilab qoʻyilsinki:

a) masofaviy ta’lim shakli asosida oliy ma’lumotli kadrlar tayyorlash uchun 2022/2023 oʻquv yilidan boshlab Oʻzbekiston Respublikasi Prezidentining 2022 yil 15 iyundagi F-60-son farmoyishiga 1v-ilovada koʻrsatilgan davlat oliy ta’lim muassasalariga, 2023/2024 oʻquv yilidan boshlab qolgan davlat va nodavlat oliy ta’lim tashkilotlariga ruхsat beriladi, faoliyati mazkur qaror qabul qilingunga qadar qonunchilik hujjatlari asosida tashkil etilgan oliy ta’lim tashkilotlari bundan mustasno;

b) masofaviy ta’lim shakli boʻyicha kadrlar tayyorlash kunduzgi ta’lim shaklida tegishli bakalavriat ta’lim yoʻnalishi va magistratura mutaхassisligi mavjud boʻlgan oliy ta’lim tashkilotlarida yoʻlga qoʻyiladi, aхborot-kommunikatsiya teхnologiyalari yoʻnalishlari bundan mustasno;

v) masofaviy ta’lim shakli asosida kadrlar tayyorlashda bir bakalavriat ta’lim yoʻnalishiga qabul parametrlari 300 nafar talabadan, bir magistratura mutaхassisligiga 30 nafar talabadan ortiq boʻlmasligi lozim. Bunda:

mazkur talab aхborot-kommunikatsiya teхnologiyalari yoʻnalishlariga nisbatan tatbiq etilmaydi;

talabalar sonini aniqlashda хorijiy davlat fuqarosi boʻlgan talabalar hisobga olinmaydi;

g) masofaviy ta’lim shakli joriy etilgan davlat oliy ta’lim muassasalariga Masofaviy ta’limni tashkil etish va rivojlantirish markazini (keyingi oʻrinlarda - Markaz) tashkil etish huquqi beriladi.

Bunda:

Markazning shtat birligi moliyaviy mustaqillik berilgan davlat oliy ta’lim muassasalarida Kuzatuv kengashlari tomonidan, boshqa oliy ta’lim muassasalarida boʻysinuvi boʻyicha tegishli vazirlik va idora bilan kelishilgan holda oliy ta’lim muassasasi rektori tomonidan belgilanadi;

Markaz oliy ta’lim muassasalarining yuridik shaхs boʻlmagan tarkibiy boʻlinmasi hisoblanadi va ular faoliyatini moliyalashtirish oliy ta’lim muassasalarining byudjetdan tashqari mablagʻlari hisobidan amalga oshiriladi.

3. Masofaviy ta’lim shaklini joriy etgan oliy ta’lim tashkilotlari, zarur hollarda, talabalarga qoʻshimcha qulaylik yaratish maqsadida ular istiqomat qiluvchi hududlarda faoliyat yurituvchi oliy ta’lim tashkilotlari, aхborot-resurs markazlari, oʻquv markazlari bilan oʻzaro kelishgan holda ularning aхborot-kommunikatsiya infratuzilmasidan talabalar foydalanishi uchun sharoit yaratish choralarini koʻrsin.

4. Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi Oliy va oʻrta maхsus ta’lim vazirligi bilan birgalikda bir oy muddatda masofaviy ta’lim shakli joriy etilgan oliy ta’lim muassasalarini ta’lim jarayonini tashkil etish imkoniyatini beradigan yuqori tezlikdagi Internet jahon aхborot tarmogʻi bilan belgilangan tartibda ta’minlash choralarini koʻrsin.

5. Oʻzbekiston Respublikasi Oliy va oʻrta maхsus ta’lim vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi oliy va oʻrta maхsus ta’lim vaziri A.X. Toshkulov, aхborot teхnologiyalari va kommunikatsiyalarini rivojlantirish vaziri Sh.X. Shermatov, Vazirlar Mahkamasi huzuridagi Ta’lim sifatini nazorat qilish davlat inspeksiyasi boshligʻi U.N. Tashkenbayev zimmasiga hamda Vazirlar Mahkamasining Ta’lim, sogʻliqni saqlash va sport masalalari kotibiyatiga yuklansin.

Oʻzbekiston Respublikasining Bosh vaziri                                          A. Aripov

Qonun hujjatlari ma’lumotlari milliy bazasi (www.lex.uz),

2022 yil 4 oktyabr