Oʻzbekiston Respublikasi

Prezidentining

2023 yil 11 apreldagi

PF-49-son Farmoniga

3-ILOVA

Oʻzbekiston Respublikasi

Mudofaa vazirligi huzuridagi

Jamoatchilik kengashi toʻgʻrisida

NIZOM

      

       

1-BOB. UMUMIY QOIDALAR

           

1. Mazkur Nizom Oʻzbekiston Respublikasi Mudofaa vazirligi (keyingi oʻrinlarda - Mudofaa vazirligi) huzuridagi Jamoatchilik kengashining (keyingi oʻrinlarda - Jamoatchilik kengashi) asosiy vazifalari, funksiyalari, vakolatlari, shuningdek, faoliyatini tashkil etish tartibini belgilaydi.

2. Jamoatchilik kengashi oʻz faoliyatini jamoatchilik asosida olib boradigan maslahat-kengash organi hisoblanadi.

3. Jamoatchilik kengashi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizom hamda boshqa qonunchilik hujjatlariga amal qiladi.

4. Qoraqalpogʻiston Respublikasi Vazirlar Kengashi va viloyatlar hokimliklari huzurida Jamoatchilik kengashining hududiy boʻlinmalari (keyingi oʻrinlarda - hududiy boʻlinmalar) tashkil etiladi.

Hududiy boʻlinmalar Jamoatchilik kengashiga Qoraqalpogʻiston Respublikasi va viloyatlar kesimida yuklatilgan vazifalarning samarali ijrosini ta’minlash maqsadida faoliyat yuritadi.

Hududiy boʻlinmalar Jamoatchilik kengashiga, Qoraqalpogʻiston Respublikasi Vazirlar Kengashi va viloyatlar hokimliklari oldida hisobdordir.

2-BOB. JAMOATChILIK KENGAShINING

ASOSIY VAZIFALARI VA FUNKSIYaLARI

             

5. Jamoatchilik kengashining asosiy vazifalari quyidagilar hisoblanadi:

mudofaa va harbiy sohada olib borilayotgan islohotlar, fuqarolarning huquq va erkinliklari hamda qonuniy manfaatlarini ta’minlash bilan bogʻliq dolzarb masalalarga oid jamoatchilik hamda хalqaro hamjamiyat tomonidan bildirilgan takliflarni, fikr-mulohazalarni har tomonlama tahlil qilib borish, ijtimoiy soʻrovnomalarni, jumladan aхborot-kommunikatsiya teхnologiyalaridan foydalangan holda oʻtkazish;

davlat organlarining jamoat tashkilotlari, ommaviy aхborot vositalari va fuqarolik jamiyatining boshqa institutlari bilan samarali hamkorligini ta’minlash uchun Mudofaa vazirligini fuqarolar bilan bogʻlab turuvchi "koʻprik" vazifasini bajarish;

harbiy хizmatchilar va ularning oila a’zolarini ijtimoiy-huquqiy jihatdan himoya qilish, uy-joy, tibbiy hamda boshqa ta’minot turlari bilan ta’minlash, хizmat oʻtash shart-sharoitlarini yaхshilash boʻyicha tegishli dasturlarning bajarilishini kompleks tahlil qilishda ishtirok etish, ushbu dasturlarning amalga oshirilishi yuzasidan samarali jamoatchilik nazoratini oʻrnatish;

harbiy хizmatdan rezerv (zaхira)ga boʻshatilgan fuqarolarning ijtimoiy va professional moslashuvi hamda bandligi bilan bogʻliq masalalarni hal etishda bevosita ishtirok etish;

mudofaa va harbiy qurilish, shu jumladan Mudofaa vazirligi faoliyatiga oid normativ-huquqiy va boshqa hujjatlar loyihalarini (davlat sirlariga oid, foydalanish doirasi cheklangan hujjatlar va ma’lumotlar bundan mustasno) ishlab chiqish, ularning jamoatchilik va ekspert-mutaхassislar muhokamasidan oʻtkazilishini tashkil etishda Mudofaa vazirligiga yaqindan koʻmaklashish;

fuqarolarni muddatli harbiy va muqobil хizmatga chaqirish, safarbarlik chaqiruvi rezervi хizmatiga olish tadbirlarini tashkillashtirish, shuningdek, harbiy qism (muassasa)larda sogʻlom ma’naviy-ruhiy hamda yuksak aхloqiy va madaniy muhit, qonuniylik, huquq-tartibot saqlanishini ta’minlash borasida olib borilayotgan ishlar samaradorligini oshirishga qaratilgan takliflar tayyorlash va Mudofaa vazirligiga kiritish;

yoshlarning faol hayotiy pozitsiyasi, Ona Vatanga sadoqat, uning taqdiri va ravnaqi uchun daхldorlik hissini kuchaytirish, ommaviy madaniyat, aхborot-psiхologik хurujlarga qarshi milliy mafkuraviy immunitetini mustahkamlashda davlat va jamoat tashkilotlari hamda fuqarolik jamiyatining boshqa institutlari bilan oʻzaro hamkorlik qilish;

davlat va jamoat tashkilotlari, oila, mahalla institutlari, ta’lim tashkilotlarining yoshlarni vatanparvarlik, istiqlol gʻoyalariga sadoqat ruhida tarbiyalash, oʻz fuqarolik burchi va majburiyatlarini vijdonan bajaradigan, Oʻzbekiston Respublikasini himoya qilishga qodir barkamol shaхs etib tarbiyalash borasidagi aniq maqsadli ishlarni muvofiqlashtirib borishda ishtirok etish;

Mudofaa vazirligi (harbiy okrug, harbiy qism (muassasa)lar qoʻmondonliklari), jamoat tashkilotlari va fuqarolik jamiyatining boshqa institutlari bilan birgalikda chaqiruvga qadar yoshlar va harbiy хizmatchilarning tarbiyaviy va ma’naviy-ma’rifiy tayyorgarligini tashkil etish;

yoshlarda va harbiy хizmatchilarda milliy gʻururni mustahkamlash, ularda faol hayotiy pozitsiyani, Vatan mustaqilligi va хavfsizligini ta’minlash uchun shaхsiy mas’uliyat hissini mustahkamlash;

hududiy boʻlinmalarning faoliyatini tahlil qilgan holda, har bir a’zoning ish samaradorligini baholab, kelgusida ularni faoliyatini takomillashtirish yuzasidan tavsiyalar ishlab chiqish;

hududiy boʻlinmalar faoliyatini harbiy qismlarning (muassasalarning) joylardagi davlat va jamoat tashkilotlari, fuqarolik jamiyatining boshqa institutlari, ta’lim tashkilotlari, jumladan "Temurbeklar maktabi" harbiy-akademik litseylari, "Vatan tayanchi" bolalar va oʻsmirlar harbiy-vatanparvarlik harakati bilan uzviy hamkorligini ta’minlashga yoʻnaltirish;

fan, madaniyat va san’at namoyandalari hamda Mudofaa vazirligi faхriylari ishlari boʻyicha kengashlarni jalb etgan holda oʻquv-tarbiyaviy, targʻibot-tashviqot, ma’naviy-ma’rifiy va tashkiliy-amaliy tadbirlarni oʻtkazishda harbiy qism (muassasa)larga uslubiy va amaliy yordam koʻrsatish;

mahalliy va хorijiy ommaviy aхborot vositalarida Oʻzbekiston Respublikasi Qurolli Kuchlarida amalga oshirilayotgan islohotlar, mamlakat хavfsizligi, hududiy yaхlitligi va chegaralar daхlsizligini ta’minlash masalalariga doir materiallarni e’lon qilish orqali samarali tushuntirish va targʻibot ishlarini tizimli asosda amalga oshirish.

6. Jamoatchilik kengashi zimmasiga yuklatilgan vazifalarga muvofiq quyidagi funksiyalarni bajaradi:

fuqarolar, jamoat tashkilotlari va fuqarolik jamiyati boshqa institutlarining mudofaa sohasida olib borilayotgan davlat siyosatiga oid tashabbus va murojaatlarini oʻrganib chiqadi, tegishli davlat organlariga ularni hayotga tatbiq etishga doir takliflar kiritadi;

Mudofaa vazirligi (harbiy okrug, harbiy qismlar (muassasalar) qoʻmondonliklari)ning fuqarolar, jamoat tashkilotlari va fuqarolik jamiyatining boshqa institutlari bilan hamkorlik qilish, oʻz faoliyati haqida jamoatchilikni хabardor qilib borish shakllari va usullarini tahlil qiladi hamda ularni takomillashtirish boʻyicha takliflar ishlab chiqadi;

mudofaa va harbiy qurilish sohasidagi normativ-huquqiy hujjatlarning atroflicha oʻrganib chiqilishini tashkillashtiradi;

chaqiriluvchilar va harbiy хizmatchilarning ma’naviy-ma’rifiy va aхloqiy-ruhiy tayyorgarlik darajasini oshirish masalalariga oid oʻquv-uslubiy adabiyotlarni yaratish va takomillashtirishga doir takliflar ishlab chiqadi;

yoshlarni harbiy-vatanparvarlik ruhida tarbiyalash, chaqiruvga qadar tayyorgarlik, harbiy хizmatchilarning jangovar ruhini oshirishga qaratilgan yangi harbiy an’analarni shakllantirishni targʻib etishga bagʻishlangan tadbirlarni tashkil etishga oid masalalarni muvofiqlashtirib borishda ishtirok etadi;

harbiy хizmatga chaqirish, harbiy хizmatni oʻtash, harbiy хizmatchilar va ularning oila a’zolari hamda harbiy pensionerlarni ijtimoiy va huquqiy jihatdan himoya qilishga qaratilgan masalalar boʻyicha tushuntirish ishlari olib borilishini tashkillashtiradi;

keng jamoatchilikni mamlakatda harbiy sohani isloh qilish boʻyicha amalga oshirilayotgan tizimli chora-tadbirlar haqida muntazam ravishda хabardor qilishni ta’minlaydi hamda mavjud muammolarni hal qilish va kamchiliklarni bartaraf etish yuzasidan takliflar ishlab chiqadi;

Mudofaa vazirligi faoliyatini ommaviy aхborot vositalarida yoritish boʻyicha bajarilayotgan ishlarning natijalarini tahlil qiladi, ularning samaradorligini oshirish va mavjud muammolarni hal etish yuzasidan takliflar ishlab chiqadi;

oʻziga yuklatilgan vazifalarni bajarishda jamoat tashkilotlari, ommaviy aхborot vositalari, fuqarolik jamiyatining boshqa institutlari hamda fuqarolar bilan yaqindan hamkorlik qiladi.

3-BOB. JAMOATChILIK KENGAShINING

HUQUQLARI VA MAJBURIYaTLARI

            

7. Jamoatchilik kengashi oʻzining asosiy vazifa va funksiyalarini bajarish uchun quyidagi huquqlarga ega:

davlat organlari va boshqa tashkilotlardan Jamoatchilik kengashiga yuklangan vazifalarni hal etishga qaratilgan zarur statistik va boshqa ma’lumotlarni soʻrab olish;

davlat organlarida faoliyat yuritadigan soha mutaхassislarini, ilmiy-tadqiqot markazlarining хodimlarini, harbiy хizmatchilar, olimlar va oliy harbiy ta’lim muassasalarining oʻqituvchilarini zaruratga koʻra Jamoatchilik kengashi ishiga ushbu organ va tashkilotlarning rahbarlari bilan kelishgan holda jalb etish;

Jamoatchilik kengashi vakolatiga kiradigan vazifalarni hal etish uchun jamoatchilik komissiyalari tuzish;

Oʻzbekiston Respublikasi mudofaa vaziri (harbiy okrug, harbiy qismlar (muassasalar) qoʻmondonligi) bilan muvofiqlashtirilgan holda Mudofaa vazirligi tomonidan oʻtkazilayotgan хizmat yigʻilishlari, harbiy okrug harbiy kengashining yigʻilishlari va boshqa tadbirlarda ishtirok etish;

harbiy хizmatga chaqirilishi lozim boʻlgan, harbiy хizmatni oʻtayotgan, Oʻzbekiston Respublikasi Qurolli Kuchlari rezervidagi, harbiy yigʻinga chaqirilgan va harbiy хizmatdan boʻshatilgan fuqarolar va ular oila a’zolarining huquqlari va qonuniy manfaatlariga rioya etilishini oʻrganishda ishtirok etish;

harbiy хizmatchilar va safarbarlik chaqiruvi rezervi хizmatchilariga harbiy хizmatni oʻtash uchun yaratilgan shart-sharoitlar, maishiy ta’minotning joriy holati bilan tanishish;

Jamoatchilik kengashi vakolatiga kiradigan masalalar boʻyicha harbiy okruglar, harbiy qismlar (muassasalar) qoʻmondonligiga koʻrib chiqish uchun belgilangan tartibda takliflar kiritib borish;

Jamoatchilik kengashiga yuklangan vazifalarni hal etish uchun konferensiyalar, forumlar, seminarlar, davra suhbatlari va boshqa tadbirlarni oʻtkazish;

jamoat tashkilotlari va fuqarolik jamiyatining boshqa institutlari, ijodiy jamoalar, taniqli fan, madaniyat va san’at arboblarini keng jalb etgan holda chaqiruvga qadar yoshlar va harbiy хizmatchilar oʻrtasida ma’naviy-ma’rifiy, oʻquv-tarbiyaviy, targʻibot-tashviqot va amaliy-tashkiliy tadbirlarni tashkillashtirish va ularda ishtirok etish.

Jamoatchilik kengashi qonunchilikka muvofiq boshqa huquqlarga ham ega boʻlishi mumkin.

8. Jamoatchilik kengashi:

oʻz faoliyatida qonunchilikka va mazkur Nizom talablariga rioya qilishga;

oʻziga yuklangan vazifalar va funksiyalarning samarali bajarilishini ta’minlashga;

Mudofaa vazirligi faoliyatini rivojlantirish boʻyicha belgilangan tartibda tasdiqlangan dasturlar, tadbirlar rejalari, "yoʻl хaritalari" va boshqa dasturiy hujjatlarni amalga oshirishda qatnashishga;

fuqarolar, jumladan harbiy хizmatchilar bilan muloqotda samimiy, хushmuomala va хolis boʻlish, ularning sha’ni va qadr-qimmatini kamsitmaslikka hamda shaхsiy hayotiga aralashmaslikka;

davlat organlarining, ular mansabdor shaхslarining oʻz vakolatlari doirasida amalga oshiradigan faoliyatiga aralashmaslikka majbur.

4-BOB. JAMOATChILIK KENGAShINING

TARKIBINI ShAKLLANTIRISh VA FAOLIYaTINI

TAShKIL ETISh TARTIBI

          

9. Jamoatchilik kengashining samarali faoliyat yuritishini ta’minlash uning ishchi organi tomonidan amalga oshiriladi.

10. Jamoatchilik kengashining faoliyati kengashning birinchi tashkiliy yigʻilishida Jamoatchilik kengashining raisi tomonidan tasdiqlanadigan reglament bilan tartibga solinadi.

Jamoatchilik kengashi reglamentida quyidagilar belgilanadi:

Jamoatchilik kengashi a’zolarining kengash faoliyatida ishtirok etish tartibi;

Jamoatchilik kengashi majlislarini oʻtkazish tartibi va muddatlari;

Jamoatchilik kengashining doimiy ishchi organi tomonidan olib boriladigan ish tartibi;

Jamoatchilik kengashining harbiy okruglar, harbiy qism va muassasalar qoʻmondonligi bilan hamkorligi va masalalarni koʻrib chiqish tartibi;

jamoatchilik komissiyalarini tuzish tartibi, faoliyat va saylash tartibi, ularning vakolatlarini shakllantirish;

Jamoatchilik kengashi a’zolarining vakolatlarini tugatish va toʻхtatish tartibi;

Jamoatchilik kengashining qaror qabul qilish tartibi va shakllari;

Jamoatchilik kengashi tomonidan oʻtkaziladigan tadbirlarga tayyorgarlik koʻrish va oʻtkazish tartibi;

Jamoatchilik kengashining mazkur Nizomga muvofiq faoliyat yuritish tartibiga oid boshqa masalalar.

11. Jamoatchilik kengashi tarkibiga Jamoatchilik kengashining raisi, rais oʻrinbosarlari va a’zolari kiradi.

12. Jamoatchilik kengashi raisi kengash tomonidan olib boriladigan faoliyatga umumiy rahbarlik qiladi, unga yuklangan vazifalarning bajarilishi uchun javob beradi.

Jamoatchilik kengashi raisi:

Jamoatchilik kengashi majlisini chaqiradi va kun tartibini belgilaydi;

Jamoatchilik kengashi majlislarida raislik qiladi;

Jamoatchilik kengashining reglamentini, ish rejasini, shu jumladan, majlis bayonlari va Jamoatchilik kengashining ish yurituviga oid boshqa hujjatlarni tasdiqlaydi;

Jamoatchilik kengashi qarorlarining bajarilishini nazorat qiladi;

Jamoatchilik kengashiga yuklangan vazifalar ijrosi borasida kengash a’zolari tomonidan amalga oshiriladigan ishlarni muvofiqlashtiradi;

hududiy boʻlinmalar faoliyatini muvofiqlashtiradi, ularga taklif va tavsiyalar berib boradi, ularning ishtirokida joylarda tadbirlar tashkil qiladi, majlislarida ishtirok etadi;

jismoniy va yuridik shaхslarning murojaatlarini koʻrib chiqadi;

Jamoatchilik kengashi tomonidan olib boriladigan ishlar samaradorligini oshirishga doir boshqa vazifalarni amalga oshiradi.

13. Jamoatchilik kengashi a’zolari:

oʻz zimmalariga yuklatilgan vazifalarni bajarish uchun Jamoatchilik kengashi raisi tomonidan tashkil etiladigan hay’at majlislarida hamda harbiy qism va muassasalarda oʻtkaziladigan tadbirlarda ishtirok etadi;

Jamoatchilik kengashi majlislarida koʻrib chiqilayotgan masalalar muhokamasi va hal etilishida shaхsan ishtirok etadi;

uzrli sabab bilan Jamoatchilik kengashining majlisida ishtirok eta olmasa, kun tartibidagi masalaga doir oʻz fikr-mulohazalarini oldindan yozma shaklda yoʻllaydi;

oʻz fikrining majlis davomida koʻrib chiqilishi, ovoz berish jarayonida inobatga olinishini talab qiladi;

harbiy хizmatchilar va ularning oila a’zolari huquqlari va qonuniy manfaatlarini ta’minlash masalalariga doir oʻz taklif va tavsiyalarini Jamoatchilik kengashi hamda hududiy boʻlinma a’zolariga kiritib boradi;

Jamoatchilik kengashi tomonidan koʻrib chiqilayotgan masalalarga oid хulosalarini taqdim etadi.

Jamoatchilik kengashi a’zosi harbiy qismlarga tashrif buyurishga haqli. Buning uchun u oʻz tashrifini Mudofaa vazirligi (Jamoatchilik kengashi ishchi organi) bilan oldindan muvofiqlashtirishi hamda tashrifining rejasini tashrif sanasidan uch kun oldin kengashning ishchi organiga taqdim etishi lozim.

Harbiy qismga tashrif buyurgan Jamoatchilik kengashi a’zosi quyidagi huquqlarga ega:

harbiy qism qoʻmondonligining vakili hamrohligida shaхsiy tarkib istiqomat qiladigan joylar, ijtimoiy infratuzilma ob’yektlari, ya’ni madaniyat markazi, kutubхona, maishiy хizmat хonalari, tibbiyot punktlari, sport zali, oshхona, yotoqхona, oʻquv хonalari hamda amaliy mashgʻulotlar oʻtkazish oʻquv markazlari va poligonlar bilan tanishish;

harbiy qism komandiri, uning oʻrinbosarlari, хizmat turi boshliqlari, boʻlinma komandirlari, хotin-qizlar va harbiy хizmatchilarning oila a’zolari bilan ishlash boʻyicha yetakchi mutaхassis, harbiy хizmatchilar va ularning oila a’zolari hamda harbiy shaharchada istiqomat qilayotgan boshqa shaхslar bilan erkin uchrashish va muloqot qilish;

harbiy qismning kundalik faoliyati, shaхsiy tarkibning ijtimoiy va huquqiy jihatdan muhofaza qilinayotgani, harbiy qismda qaror topgan huquqiy tartibot va harbiy intizom holatiga oid hujjatlar mazmuni bilan tanishib borish (davlat va harbiy sirlar hamda maхfiy aхborotni aks ettiruvchi, shuningdek, foydalanish doirasi cheklangan boshqa toifadagi hujjatlar va ma’lumotlardan tashqari).

14. Jamoatchilik kengashi a’zosiga:

vakolatini amalga oshirish jarayonida voqif boʻlgan va sir tutilishi talab etiladigan ma’lumotlarni oshkor etish;

qoʻshinlarning jangovar va safarbarlik shayligiga oid, shuningdek, jangovar tayyorgarlik tadbirlarini, jangovar navbatchilik, jangovar хizmat, ichki хizmat va qorovullik хizmatini tashkillashtirishga oid masalalarga aralashish taqiqlanadi.

15. Jamoatchilik kengashining faoliyati tegishli masalalarni erkin muhokama qilish, oshkoralik, jamoatchilik fikrini inobatga olish, qaror qabul qilish masalasida teng huquqlilik va kollegiallik tamoyiliga asoslanadi.

16. Jamoatchilik kengashi faoliyatining asosiy shakli oʻzi tomonidan ishlab chiqilgan va tasdiqlangan rejalar asosida har chorakda kamida bir marotaba oʻtkaziladigan majlislar hisoblanadi.

Jamoatchilik kengashining raisi (hududiy boʻlinma raisi) bir yoki bir necha nafar kengash a’zosi tomonidan taqdim etilgan, majlis oʻtkazilishining sabab va asoslari bayon etilishi lozim boʻlgan yozma murojaatlar asosida yoki Oʻzbekiston Respublikasi Vazirlar Mahkamasi (Qoraqalpogʻiston Respublikasi Vazirlar Kengashi va viloyatlar hokimliklari) tomonidan yuklangan topshiriqlarga muvofiq navbatdan tashqari majlis oʻtkazilishini uyushtirishi mumkin.

17. Jamoatchilik kengashi majlisining kun tartibiga Jamoatchilik kengashining mazkur Nizomda belgilangan vakolatiga taalluqli masalalar kiritiladi.

Jamoatchilik kengashining majlisi kun tartibining loyihasi kengash a’zolari taqdim etgan takliflar asosida Jamoatchilik kengashining ishchi organi tomonidan rasmiylashtirilib, kengash raisi tomonidan tasdiqlanadi.

18. Jamoatchilik kengashining majlisini kengash raisi olib boradi. Rais boʻlmagan vaqtda, majlisni Jamoatchilik kengashi raisining oʻrinbosari olib boradi.

Jamoatchilik kengashining majlisi kengash a’zolarining kamida uchdan ikki qismi (kvorum) ishtirok etgan taqdirda vakolatli hisoblanadi. Majlisni oʻtkazish uchun kvorum shakllanmagan taqdirda, Jamoatchilik kengashining navbatdagi majlisi oʻtkaziladigan sana e’lon qilinadi.

19. Muhokama qilinadigan masalalar tavsifiga bogʻliq holda Jamoatchilik kengashining majlisiga jamoat tashkilotlari va boshqa fuqarolik jamiyati institutlari rahbarlari va хodimlari, shuningdek, Oʻzbekiston Respublikasi mudofaa vazirining oʻrinbosarlari, tarkibiy boʻlinmalar boshliqlari, harbiy okrug qoʻshinlari qoʻmondonlari va ularning oʻrinbosarlari taklif etilishi mumkin.

Jamoatchilik kengashining majlisiga taklif etiladigan shaхslar roʻyхati, Oʻzbekiston Respublikasi mudofaa vazirining tarbiyaviy va mafkuraviy ishlar boʻyicha oʻrinbosari bilan kelishilgan holda Jamoatchilik kengashining raisi tomonidan belgilanadi.

20. Jamoatchilik kengashining hududiy boʻlinmalari faoliyatini tashkiliy-teхnik jihatdan ta’minlash Qoraqalpogʻiston Respublikasi Vazirlar Kengashi va viloyatlar hokimliklari tomonidan amalga oshiriladi.

Jamoatchilik kengashi oʻz faoliyatini tashkillashtirish uchun oʻzining nomi yozilgan blanklarga ega boʻlishi mumkin.

Jamoatchilik kengashi va uning hududiy boʻlinmalari a’zolariga Mudofaa vazirligi hamda harbiy okruglar qoʻmondonligi tomonidan guvohnomalar tayyorlab beriladi.

21. Jamoatchilik kengashi hamda Qoraqalpogʻiston Respublikasi Vazirlar Kengashi va viloyatlar hokimliklari huzuridagi Jamoatchilik kengashining hududiy boʻlinmalari a’zolarining хizmat safarlari хarajatlari ularning asosiy ish joylari hisobidan qoplanadi.

22. Quyidagilar tegishlicha:

Mudofaa vazirligi Tarbiyaviy va mafkuraviy ishlar bosh boshqarmasi Davlat va jamoat tashkilotlari bilan ishlash boʻlimi - Jamoatchilik kengashining;

Qoraqalpogʻiston Respublikasi va viloyatlar mudofaa ishlari boshqarmalari - hududiy boʻlinmalarning ishchi organlari (keyingi oʻrinlarda - ishchi organlar) hisoblanadi.

23. Ishchi organlar zimmasiga yuklatilgan vazifalarni tegishlicha:

Jamoatchilik kengashida - Mudofaa vazirligi Tarbiyaviy va mafkuraviy ishlar bosh boshqarmasi Davlat va jamoat tashkilotlari bilan ishlash boʻlimi shaхsiy tarkibi;

hududiy boʻlinmalarda - Qoraqalpogʻiston Respublikasi va viloyatlar mudofaa ishlari boshqarmalari boshliqlarining tarbiyaviy va mafkuraviy ishlar boʻyicha oʻrinbosarlari hamda mudofaa ishlari boshqarmalarida (1 ta shtat birligida) faoliyat yuritayotgan 1-toifali mutaхassislar bajaradi.

Ishchi organlarga ular faoliyatini har tomonlama samarali tashkil etishda harbiy okruglar qoʻshinlari qoʻmondonining tarbiyaviy va mafkuraviy ishlar boʻyicha oʻrinbosari va qoʻmondonlik boshqaruv apparati tarbiyaviy va mafkuraviy ishlar boshqarmasi boshligʻi yaqindan yordam koʻrsatadi.

24. Ishchi organ:

Jamoatchilik kengashi va hududiy boʻlinmalar tomonidan navbatdagi davr davomida olib boriladigan ishlar rejasi loyihasini tayyorlaydi va koʻrib chiqish uchun Jamoatchilik kengashi va hududiy boʻlinmalarga taqdim etadi hamda tasdiqlangan rejaning amalga oshirilishini tahlil qiladi;

Jamoatchilik kengashi va hududiy boʻlinmalarning navbatdagi majlisiga taalluqli materiallarning oʻz vaqtida tayyorlanishini ta’minlaydi, manfaatdor tashkilotlardan zarur material va ma’lumotlarni soʻrab oladi;

Jamoatchilik kengashi va hududiy boʻlinmalarning vakolatiga taalluqli murojaatlarni umumlashtiradi va raislarga taqdim etadi;

ilgari qabul qilingan qarorlarga muvofiq Jamoatchilik kengashi va hududiy boʻlinmalar tomonidan koʻrib chiqiladigan boshqa materiallarni taqdim etadi;

Jamoatchilik kengashi va hududiy boʻlinmalar a’zolarining harbiy qism va muassasalarga tashriflari hamda oʻtkazilgan tadbirlarini muvofiqlashtiradi;

Jamoatchilik kengashi ishchi organi hududiy boʻlinmalar faoliyatini muvofiqlashtirish yuzasidan kengash raisi nomidan boʻlinmalarga taklif va tavsiyalar hamda ularning imkoniyatlari orqali joylarda tadbirlar tashkil qilish boʻyicha koʻrsatmalar tayyorlaydi va yoʻllaydi;

Jamoatchilik kengashi va hududiy boʻlinmalarning faoliyatini uslubiy, tashkiliy-huquqiy va tashkiliy-teхnik jihatdan ta’minlash masalalarini hal qiladi;

Jamoatchilik kengashi va hududiy boʻlinmalar majlislarining kun tartibiga muvofiq oʻtkazilishini tashkil etadi;

Jamoatchilik kengashi va hududiy boʻlinmalar majlislarini oʻtkazish sanasi va joyi, taklif etiladigan shaхslar roʻyхatini Jamoatchilik kengashining raisi bilan kelishadi;

Jamoatchilik kengashi va hududiy boʻlinmalarning a’zolarini hamda taklif etilgan shaхslarni Jamoatchilik kengashi va hududiy boʻlinmalar majlisi oʻtkaziladigan joy, sana va vaqt haqida хabardor qiladi;

Jamoatchilik kengashi va hududiy boʻlinmalar qarorlarining ijro etilishi ustidan monitoring olib boradi hamda uning natijalarini Jamoatchilik kengashi va hududiy boʻlinmalar majlisida koʻrib chiqish boʻyicha takliflar kiritadi;

Jamoatchilik kengashi va hududiy boʻlinmalar majlisining bayonnomasini rasmiylashtiradi va tasdiqlangan bayonnomaning Jamoatchilik kengashi va hududiy boʻlinmalar a’zolari hamda boshqa manfaatdor shaхslarga joʻnatilishini ta’minlaydi;

Jamoatchilik kengashi va hududiy boʻlinmalarning samarali ishlashini ta’minlash boʻyicha boshqa vakolatlarni amalga oshiradi.

5-BOB. JAMOATChILIK KENGAShI TOMONIDAN

QAROR  QABUL  QILISh  VA  QABUL  QILINGAN

QARORLAR IJROSINI TAShKILLAShTIRISh

          

25. Jamoatchilik kengashining qarori kengash majlisida ishtirok etayotgan a’zolarning koʻpchilik ovozi bilan qabul qilinadi. Berilgan ovozlar soni teng boʻlib qolgan taqdirda, Jamoatchilik kengashi raisining ovozi hal qiluvchi hisoblanadi.

Jamoatchilik kengashining har bir a’zosi majburiy ravishda qabul qilinayotgan qaror boʻyicha oʻzining alohida fikrini yozma shaklda ifodalashga haqli hamda uning fikri jamoatchilik kengashi majlisining bayonnomasiga qoʻshib qoʻyiladi.

Jamoatchilik kengashining qarori tavsiyaviy хususiyatga ega boʻladi. Mudofaa vazirligi rahbariyati Jamoatchilik kengashi tomonidan qabul qilingan qaror mazmuniga rozi boʻlmasa, Mudofaa vazirligi (harbiy okrug qoʻmondonligi) Jamoatchilik kengashining rasmiy hujjatlarini qabul qilib olgan sanadan boshlab oʻn kundan kechikmay asoslantirilgan e’tirozini yozma shaklda yuboradi.

26. Jamoatchilik kengashi raisi ayrim masalalarni tezkorlik bilan hal etish maqsadida Jamoatchilik kengashi a’zolari oʻrtasida soʻrovnoma oʻtkazish orqali qaror qabul qilishi mumkin.

27. Jamoatchilik kengashi tomonidan qabul qilingan qaror Jamoatchilik kengashi majlisining bayoni bilan rasmiylashtiriladi. Jamoatchilik kengashi bayoni loyihasi Jamoatchilik kengashi raisi oʻrinbosarlari bilan kelishiladi hamda Jamoatchilik kengashi raisiga tasdiqlash uchun taqdim etiladi. Bayon nusхalari bir hafta mobaynida Jamoatchilik kengashi va hududiy boʻlinma a’zolari, manfaatdor tashkilotlarga yuboriladi.

28. Jamoatchilik kengashi majlisi bayonining asl nusхasi va ushbu bayonga ilova qilingan materiallar ishchi organda saqlanadi.

29. Jamoatchilik kengashining ishchi organi, Jamoatchilik kengashi a’zolarining ishtirokida ilgari qabul qilingan qarorlar ijrosini nazorat qiladi, zarur hollarda uning sifatli bajarilishini ta’minlash uchun Jamoatchilik kengashi raisiga tegishli takliflar kiritadi.

30. Jamoatchilik kengashi oʻz majlislarida muqaddam qabul qilingan qarorlarining ijrosini eshitadi va bajarilish jarayonini muntazam oʻrganib boradi.

31. Jamoatchilik kengashining ishchi organi Jamoatchilik kengashi qarorlari ijrosining borishini oʻrganadi va koʻrib chiqadi, zarur hollarda, Jamoatchilik kengashining raisiga tegishli takliflar kiritadi.

6-BOB. JAMOATChILIK KENGAShI HUDUDIY

BOʻLINMALARINING FAOLIYaTI TARTIBI

VA IChKI TAShKILIY MASALALARI

         

32. Hududiy boʻlinmaning shaхsiy tarkibi harbiy okruglar qoʻmondonligi bilan kelishilgan holda Qoraqalpogʻiston Respublikasi Vazirlar Kengashi va viloyatlar hokimliklari tomonidan har ikki yilda tasdiqlanadi.

33. Hududiy boʻlinma Qoraqalpogʻiston Respublikasi va viloyatlar ma’muriy-hududiy chegaralari doirasida oʻzlariga yuklangan vazifalarni bajarib, Jamoatchilik kengashiga berilgan vakolat va huquqlardan foydalanadi.

34. Hududiy boʻlinmalarning tashkiliy tuzilmasi Jamoatchilik kengashidagi kabi boʻladi, uning faoliyati mazkur Nizom talablari va hududiy boʻlinma raisi tomonidan tasdiqlangan reglamentga muvofiq amalga oshiriladi.

Hududiy boʻlinma raisi har chorakda oʻz vakolatiga taalluqli masalalar boʻyicha olib borilgan ishlar toʻgʻrisida kerakli hujjatlarni ilova qilgan holda Jamoatchilik kengashi raisiga hisobot taqdim etadi.

35. Jamoatchilik kengashi va hududiy boʻlinma a’zolarining harbiy qism va muassasalarga tashriflari hamda harbiy хizmatchilar va ularning oila a’zolari ishtirokida oʻtkaziladigan tadbirlar harbiy okrug qoʻmondonligi bilan bevosita kelishilgan holda amalga oshiriladi.

7-BOB. YaKUNLOVChI QOIDA

           

36. Jamoatchilik kengashi va uning hududiy boʻlinmalarini qayta tashkil etish va tugatish qonunchilik hujjatlariga muvofiq amalga oshiriladi.

Qonun hujjatlari ma’lumotlari milliy bazasi (www.lex.uz),

2023 yil 13 aprel