Oʻzbekiston Respublikasi Vazirlar Mahkamasining 04.01.2024 y. 4-son "Oʻzbekiston Respublikasida dasturiy byudjetlashtirish tizimini joriy etishda byudjet mablagʻlarini taqsimlovchilarning byudjet dasturlarini ishlab chiqish, monitoringini yuritish va ularning samaradorligini baholash tartibi toʻgʻrisidagi nizomni tasdiqlash haqida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
04.01.2024 y.
N 4
OʻZBEKISTON RESPUBLIKASIDA
DASTURIY BYuDJETLAShTIRISh TIZIMINI
JORIY ETIShDA BYuDJET MABLAGʻLARINI
TAQSIMLOVChILARNING BYuDJET DASTURLARINI
IShLAB ChIQISh, MONITORINGINI YuRITISh VA
ULARNING SAMARADORLIGINI BAHOLASh TARTIBI
TOʻGʻRISIDAGI NIZOMNI TASDIQLASh HAQIDA
Oʻzbekiston Respublikasi Prezidentining "Oʻzbekiston Respublikasining "2023 yil uchun Oʻzbekiston Respublikasining Davlat byudjeti toʻgʻrisida"gi Qonuni ijrosini ta’minlash chora-tadbirlari toʻgʻrisida" 2022 yil 30 dekabrdagi PQ-471-son qarori ijrosini ta’minlash, shuningdek, byudjet mablagʻlari samaradorligini baholashning maqsadli koʻrsatkichlarini joriy etish maqsadida Vazirlar Mahkamasi QAROR QILADI:
1. Quyidagilarni nazarda tutuvchi Oʻzbekiston Respublikasida dasturiy byudjetlashtirish tizimini joriy etishda byudjet mablagʻlarini taqsimlovchilarning byudjet dasturlarini ishlab chiqish, monitoringini yuritish va ularning samaradorligini baholash tartibi toʻgʻrisidagi nizom ilovaga muvofiq tasdiqlansin:
dasturiy byudjetlashtirish tizimini joriy etishda byudjet dasturlarini ishlab chiqish tartibi va muddatlari;
byudjet dasturlari maqsadli indikatorlarining tarkibi va ularga qoʻyiladigan talablar;
byudjet dasturlarini moliyalashtirish manbalari;
byudjet dasturlarining ijrosini ta’minlash va monitoringini yuritish, shuningdek, ularning ijrosi boʻyicha hisobotlar tayyorlash;
byudjet dasturlari samaradorligini baholash va ularning ijrosi toʻgʻrisidagi ma’lumotlar ochiqligini ta’minlash.
2. Belgilansinki, quyidagilar byudjet dasturlarini ishlab chiqish va amalga oshirishning ustuvor yoʻnalishlari hisoblanadi:
Oʻzbekiston Respublikasi Davlat byudjetidan har yili ajratiladigan mablagʻlar doirasida aniq maqsadlar va natijalarga qaratilgan sifat hamda miqdor koʻrsatkichlarini (indikatorlarini) shakllantirish;
byudjet loyihasini tuzishda va qabul qilishda byudjet mablagʻlarini taqsimlovchilarning moliyaviy mustaqilligini oshirish;
byudjet dasturlarining ijrosi boʻyicha mas’ul byudjet mablagʻlari taqsimlovchilarning jamoatchilik oldidagi hisobdorligini oshirish;
ijtimoiy-iqtisodiy yoʻnalishlarda belgilangan strategik maqsad va vazifalardan kelib chiqib, amalga oshiriladigan chora-tadbirlarning natijadorligini tahlil qilish va baholash.
3. Birinchi darajali byudjet mablagʻlarini taqsimlovchilar:
byudjet dasturlari oʻrta muddatli davr uchun sohani rivojlantirish dasturlari (konsepsiya va strategiyalar), Oʻzbekiston Respublikasining qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari va qarorlari, Vazirlar Mahkamasining qarorlari, shuningdek, milliy barqaror rivojlanish maqsadlarida belgilangan maqsad va vazifalarga muvofiq ishlab chiqilishini;
har yili 1 mayga qadar oʻrta muddatli davr uchun byudjet dasturlarining dastlabki roʻyхati va hisob-kitoblari, shuningdek, ularning yakuniy loyihasi har yili 1 avgustga qadar Oʻzbekiston Respublikasi Iqtisodiyot va moliya vazirligiga taqdim etilishini;
har chorak yakuni boʻyicha vazirlik va idoralarning ichki audit хizmatlari tomonidan byudjet dasturlarining ijrosi baholanishi;
byudjet dasturlarining ijrosi va ularni baholash natijalari toʻgʻrisidagi hisobotlari har chorak yakuni bilan keyingi oyning 20-sanasiga qadar Oʻzbekiston Respublikasi Iqtisodiyot va moliya vazirligiga taqdim etilishini ta’minlasin.
Bunda byudjet dasturlarini ishlab chiqish va amalga oshirish, monitoringini yuritish va hisobotlarni tayyorlash bilan bogʻliq jarayonlarni muvofiqlashtirish uchun mas’ul etib birinchi darajali byudjet mablagʻlarini taqsimlovchilarning tegishli rahbar oʻrinbosari biriktiriladi.
4. Oʻzbekiston Respublikasi Iqtisodiyot va moliya vazirligi:
Oʻzbekiston Respublikasi Davlat byudjeti loyihasi birinchi darajali byudjet mablagʻlarini taqsimlovchilarga ajratilgan mablagʻlarning cheklangan miqdorlari va byudjet dasturlari kesimida ishlab chiqilishini;
2024 yil 1 sentyabrga qadar "UzASBO" dasturiy majmuasida byudjet dasturlarini shakllantirish, tasdiqlash, roʻyхatga olish va ularni ijrosi toʻgʻrisidagi hisobotlarni elektron shaklda amalga oshirilishini;
2024 yil 1 noyabrga qadar "Ochiq byudjet" aхborot portalida birinchi darajali byudjet mablagʻlarini taqsimlovchilarning byudjet dasturlari ijrosi toʻgʻrisidagi hisobotlarini keng jamoatchilikka yetkazish tartibi joriy etilishini ta’minlasin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari - iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. Aripov
Qonun hujjatlari ma’lumotlari milliy bazasi (www.lex.uz),
2024 yil 5 yanvar