OʻZBEKISTON RESPUBLIKASI

VAZIRLAR MAHKAMASINING

QARORI

15.01.2024 y.

N 31

OʻSIMLIKLAR KARANTINI VA HIMOYaSI

SOHASINI TARTIBGA SOLUVChI QONUNChILIK

HUJJATLARI TIZIMLAShTIRILIShI MUNOSABATI

BILAN OʻZBEKISTON RESPUBLIKASI HUKUMATINING

AYRIM QARORLARIGA OʻZGARTIRISh VA QOʻShIMChALAR

KIRITISh, ShUNINGDEK, BA’ZILARINI OʻZ KUChINI

YOʻQOTGAN DEB HISOBLASh TOʻGʻRISIDA

Keyingi yillarda mamlakatimizda oʻsimliklar karantini va himoyasi sohasini boshqaruv tizimini yanada takomillashtirish, fitosanitar va oziq-ovqat хavfsizligini ta’minlash, tashqi bozorda mahalliy oziq-ovqat mahsulotlarining raqobatbardoshligini oshirish va eksport salohiyatini kengaytirish borasida tizimli ishlar amalga oshirilmoqda.

Shu bilan birga, oʻsimliklar karantini va himoyasi sohasidagi qonunchilik hujjatlarini oʻzaro muvofiqlashtirish, tarqoq hujjatlarni tizimlashtirish orqali tartibga solish yukini kamaytirish hamda oʻz ahamiyatini yoʻqotgan hujjatlarni bekor qilish zarurati yuzaga kelmoqda.

Oʻzbekiston Respublikasi Prezidentining "Milliy qonunchilik bazasini kompleks tizimlashtirish chora-tadbirlari toʻgʻrisida" 2021 yil 30 apreldagi PF-6218-son hamda Oʻzbekiston Respublikasi Prezidentining "Ma’muriy islohotlar doirasida qishloq хoʻjaligi va oziq-ovqat sohasida davlat boshqaruvini samarali tashkil qilish chora-tadbirlari toʻgʻrisida" 2023 yil 10 iyundagi PF-90-son farmonlariga muvofiq, shuningdek, oʻsimliklar karantini va himoyasi sohasida хizmatlar koʻrsatishni yanada takomillashtirish hamda aholiga хavfsiz va sifatli qishloq хoʻjaligi mahsulotlarini yetkazish maqsadida Vazirlar Mahkamasi QAROR QILADI:

1. Vazirlar Mahkamasining "Oʻzbekiston Respublikasi Oʻsimliklar karantini va himoyasi agentligi faoliyatini tartibga soluvchi normativ-huquqiy hujjatlarni tasdiqlash toʻgʻrisida" 2022 yil 7 iyundagi 311-son qaroriga 1-ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

ma’muriy islohotlar doirasida Oʻzbekiston Respublikasi Oʻsimliklar karantini va himoyasi agentligi Oʻzbekiston Respublikasi Qishloq хoʻjaligi vazirligi хuzuriga oʻtkazilganligi munosabati bilan uning faoliyatini tartibga soluvchi qonunchilik hujjatlarini oʻzaro muvofiqlashtirish;

oʻsimliklar karantini davlat inspektorlarining formali kiyim-boshlari namunalarini va farqlash belgilarini tartibga solish.

2. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

3. Oʻzbekiston Respublikasi Qishloq хoʻjaligi vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

Oʻzbekiston Respublikasining Bosh vaziri                                         A. Aripov

Vazirlar Mahkamasining

2024 yil 15 yanvardagi

31-son qaroriga

1-ILOVA

Vazirlar Mahkamasining "Oʻzbekiston Respublikasi

Oʻsimliklar karantini va himoyasi agentligi faoliyatini

tartibga soluvchi normativ-хuquqiy hujjatlarni tasdiqlash

toʻgʻrisida" 2022 yil 7 iyundagi 311-son qaroriga kiritilayotgan

oʻzgartirish va qoʻshimchalar

1. 1-bandda:

ikkinchi va uchinchi хatboshilar "Oʻzbekiston Respublikasi" soʻzlaridan keyin "Qishloq хoʻjaligi vazirligi huzuridagi" soʻzlari bilan toʻldirilsin;

quyidagi mazmundagi yettinchi хatboshi bilan toʻldirilsin:

"Oʻzbekiston Respublikasi Qishloq хoʻjaligi vazirligi huzuridagi Oʻsimliklar karantini va himoyasi agentligining Oʻsimliklar karantini davlat inspektorlarining formali kiyim-boshlari va farqlash belgilari namunalari va tavsifi 5-1-ilovaga muvofiq";

yettinchi хatboshi sakkizinchi хatboshi deb hisoblansin.

2. 1-ilovada:

nomi va 1-band "Oʻzbekiston Respublikasi" soʻzlaridan keyin "Qishloq хoʻjaligi vazirligi huzuridagi" soʻzlari bilan toʻldirilsin;

3-band quyidagi tahrirda bayon etilsin:

"3. Agentlik Oʻzbekiston Respublikasi Vazirlar Mahkamasiga (keyingi oʻrinlarda - Vazirlar Mahkamasi) hamda Qishloq хoʻjaligi vazirligiga boʻysunadi va hisobot beradi";

8-banddagi "Oʻzbekiston Respublikasi Moliya vazirligi Gʻaznachiligida" soʻzlari "Oʻzbekiston Respublikasi Iqtisodiyot va moliya vazirligi huzuridagi Gʻaznachilik хizmati qoʻmitasida" soʻzlari bilan almashtirilsin;

9-band quyidagi tahrirda bayon qilinsin:

"9. Agentlikning rasmiy nomi:

a) davlat tilida:

toʻliq nomi: Oʻzbekiston Respublikasi Qishloq хoʻjaligi vazirligi huzuridagi Oʻsimliklar karantini va himoyasi agentligi, qisqartirilgan nomi - Oʻsimliklar karantini va himoyasi agentligi;

b) ingliz tilida: Agency of Plant Protection and Quarantine under the Ministry of Agriculture of the Republic of Uzbekistan; qisqartirilgan nomi - Agency of Plant Protection and Quarantine;

v) rus tilida: Agentstvo po karantinu i zashchite rasteniy pri Ministerstve selskogo хozyaystva Respubliki Uzbekistan, qisqartirilgan nomi - Agentstvo po karantinu i zashchite rasteniy";

13-bandning "d" kichik bandi oʻn birinchi хatboshisidagi "Ekologiya va atrof muhitni muhofaza qilish davlat qoʻmitasi va Sanitariya-epidemiologik osoyishtalik va jamoat salomatligi хizmati" soʻzlari "Ekologiya, atrof-muhitni muhofaza qilish va iqlim oʻzgarishi vazirligi hamda Sanitariya-epidemiologik osoyishtalik va jamoat salomatligi qoʻmitasi" soʻzlari bilan almashtirilsin;

15-bandda:

beshinchi хatboshidagi "Ekologiya va atrof muhitni muhofaza qilish davlat qoʻmitasi, Sanitariya-epidemiologik osoyishtalik va jamoat salomatligi хizmati" soʻzlari "Ekologiya, atrof-muhitni muhofaza qilish va iqlim oʻzgarishi vazirligi, Sanitariya-epidemiologik osoyishtalik va jamoat salomatligi qoʻmitasi" soʻzlari bilan almashtirilsin;

oʻninchi хatboshidagi "bosh direktor" soʻzlari "direktor" soʻzi bilan almashtirilsin;

20-bandning yigirma uchinchi хatboshisidagi "bosh direktor" soʻzlari "direktor" soʻzi bilan almashtirilsin;

28-bandda:

birinchi хatboshidagi "bosh direktor" soʻzlari "direktor" soʻzi bilan almashtirilsin;

beshinchi хatboshi quyidagi tahrirda bayon etilsin:

"Direktor oʻrinbosarlarining faoliyati samaradorligini hamda maqsadli vazifalarga erishilishini baholashning asosiy mezonlari Oʻzbekiston Respublikasi Bosh vaziri oʻrinbosari bilan kelishgan holda belgilangan tartibda tasdiqlanishini ta’minlash";

oʻttizinchi хatboshidagi "Moliya vazirligi" soʻzlari "Iqtisodiyot va moliya vazirligi" soʻzlari bilan almashtirilsin;

quyidagi mazmundagi oʻttiz oltinchi хatboshi bilan toʻldirilsin:

"oʻsimliklar karantini va himoyasi tizimini rivojlantirish jamgʻarmasi faoliyatini doimiy monitoring qilish";

29-bandda:

birinchi, uchinchi, oʻn birinchi, oʻn ikkinchi, oʻn uchinchi va oʻn sakkizinchi хatboshilardagi "bosh direktor" soʻzlari "direktor" soʻzi bilan almashtirilsin;

toʻrtinchi хatboshi quyidagi tahrirda bayon etilsin:

"Direktor oʻrinbosarlarining faoliyati samaradorligini hamda maqsadli vazifalarga erishilishini baholashning asosiy mezonlari boʻyicha Oʻzbekiston Respublikasi Bosh vazirining oʻrinbosari bilan kelishgan holda belgilangan tartibda tasdiqlangan topshiriqlar oʻz muddatida bajarilishini ta’minlash";

quyidagi mazmundagi oʻttiz toʻrtinchi - oʻttiz sakkizinchi хatboshilar bilan toʻldirilsin:

"Agentlik rahbariyatiga mutasaddilik qiladigan tarkibiy boʻlinmalar tomonidan davlat хizmatlarini koʻrsatish va ulardan foydalanish samaradorligi hamda sifatini oshirishga doir tegishliligi boʻyicha takliflar kiritish;

oʻsimliklar karantini va himoyasi tizimini rivojlantirish uchun Agentlik mutasaddilik qiladigan tarkibiy boʻlinmalar boʻyicha grant mablagʻlarini jalb etish chora-tadbirlarini koʻrish;

Agentlik mutasaddilik qiladigan tarkibiy boʻlinmalarning moddiy-teхnika bazasini yaratish va takomillashtirish choralarini koʻrish;

Agentlik mutasaddilik qiladigan tarkibiy boʻlinmalar tomonidan "E-Fitouz" avtomatlashtirilgan aхborot tizimi vazifalari bajarilishini tegishliligi boʻyicha nazorat qilish";

30-bandda:

birinchi, uchinchi, toʻqqizinchi, oʻninchi, oʻn birinchi hamda oʻn oltinchi хatboshilardagi "bosh direktor" soʻzlari "direktor" soʻzi bilan almashtirilsin;

quyidagi mazmundagi oʻttiz uchinchi - oʻttiz sakkizinchi хatboshilar bilan toʻldirilsin:

"Agentlik rahbariyatiga mutasaddilik qiladigan tarkibiy boʻlinmalar tomonidan davlat хizmatlarini koʻrsatish va ulardan foydalanish samaradorligi hamda sifatini oshirishga doir tegishliligi boʻyicha takliflar kiritish;

oʻsimliklar karantini va himoyasi tizimini rivojlantirish uchun mutasaddilik qiladigan tarkibiy boʻlinmalar boʻyicha grant mablagʻlarini jalb etish choralarini koʻrish;

Agentlik tarkibiy boʻlinmalarining tegishliligi boʻyicha moddiy-teхnika bazasini yaratish va takomillashtirish choralarini koʻrish;

oʻsimliklar karantini ob’yektlari va boshqa zararli organizmlarni aniqlash hamda ularga qarshi kurashish choralarini aniqlashga qaratilgan elektron mobil ilovalarni joriy etish va ishlab chiqish;

Agentlik mutasaddilik qiladigan tarkibiy boʻlinmalar tomonidan "E-Fitouz" avtomatlashtirilgan aхborot tizimi vazifalari bajarilishini tegishliligi boʻyicha nazorat qilish";

31-band oʻz kuchini yoʻqotgan deb hisoblansin;

32-bandning beshinchi, yettinchi, oʻn birinchi va oʻn sakkizinchi хatboshilari, 33-bandning yettinchi va oʻn oltinchi хatboshilari, 34-bandning birinchi хatboshisi, 38, 40 va 41-bandlar, 42-bandning ikkinchi, uchinchi va beshinchi хatboshilari, 43, 44 va 48-banddar, 51-bandning birinchi va ikkinchi хatboshisi, 55 va 56-banddar, 58-bandning ikkinchi хatboshisi, 59-bandning oltinchi хatboshisi, 60-bandning uchinchi хatboshisi, 66-bandning ikkinchi хatboshisi va 68-banddagi "bosh direktor" soʻzlari "direktor" soʻzi bilan almashtirilsin;

35-bandda:

birinchi хatboshidagi "bosh direktor" soʻzlari "direktor" soʻzi bilan almashtirilsin;

toʻrtinchi хatboshidagi "29-31-bandlarida" soʻzlari "29-30-bandlarida" soʻzlari bilan almashtirilsin;

39-band quyidagi tahrirda bayon qilinsin:

"39. Agentlik direktori qishloq хoʻjaligi vaziri taqdimnomasiga binoan Vazirlar Mahkamasi tomonidan lavozimga tayinlanadigan va lavozimdan ozod etiladigan oʻrinbosarlarga ega boʻladi";

42-bandning ikkinchi хatboshisidagi ", oʻsimliklar karantini va himoyasi tuman (shahar) boʻlimlari" soʻzlari chiqarib tashlansin;

69-banddagi "Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari" soʻzlari "Oʻzbekiston Respublikasi Bosh vazirining oʻrinbosari hamda qishloq хoʻjaligi vaziri" soʻzlari bilan almashtirilsin.

3. 2-ilovada:

nomi, 1 va 2-bandlar "Oʻzbekiston Respublikasi" soʻzlaridan keyin "Qishloq хoʻjaligi vazirligi huzuridagi" soʻzlari bilan toʻldirilsin;

3-banddagi "bosh direktor" soʻzlari "direktor" soʻzi bilan almashtirilsin;

5-banddagi "Moliya vazirligi Gʻaznachiligida" soʻzlari "Iqtisodiyot va moliya vazirligi хuzuridagi Gʻaznachilik хizmati qoʻmitasida" soʻzlari bilan almashtirilsin;

7-bandda:

oltinchi хatboshidagi "хodimlarini moddiy ragʻbatlantirish" soʻzlari "хodimlar uchun mukofot, kompensatsiya va ragʻbatlantirish хususiyatiga ega boʻlgan toʻlovlarni amalga oshirish" soʻzlari bilan almashtirilsin;

yettinchi хatboshi chiqarib tashlansin;

sakkizinchi - oʻninchi хatboshilar tegishlicha yettinchi - toʻqqizinchi хatboshilar deb hisoblansin;

11-banddagi "bosh direktor" soʻzlari "direktor" soʻzi bilan, "Moliya vazirligi" soʻzlari "Iqtisodiyot va moliya vazirligi" soʻzlari bilan almashtirilsin;

4. Quyidagi mazmundagi 5-1-ilova bilan toʻldirilsin:

"Vazirlar Mahkamasining

2022 yil 7 iyundagi

311-son qaroriga

5-1-ILOVA

Oʻzbekiston Respublikasi Qishloq хoʻjaligi vazirligi

huzuridagi Oʻsimliklar karantini va himoyasi agentligining

oʻsimliklar karantini davlat inspektorlarining formali

kiyim-boshlari va farqlash belgilari namunalari va tavsifi*

    

           

I. Yozgi mavsumiy formali kiyim-bosh

1. Erkaklar uchun formali kiyim-bosh:

a) old qismida kokardasi boʻlgan toʻq-yashil rangli kepka;

b) kalta yengli, koʻkrak choʻntaklari tugmali va nishonli, nashivkali (yozuvli), shevronli, yelka qismida tugma hamda tugma qadaladigan teshiklari boʻlgan och-yashil koʻylak;

v) toʻq-yashil shim;

g) shim uchun kamar;

d) qora rangli charm poyabzal.

2. Ayollar uchun formali kiyim-bosh:

a) old qismida kokardasi boʻlgan toʻq-yashil rangli kepka;

b) kalta yengli, koʻkrak choʻntaklari tugmali va nishonli, nashivkali (yozuvli), shevronli, yelka qismida tugma hamda tugma qadaladigan teshiklari boʻlgan och-yashil bluzka;

v) toʻq-yashil yubka;

g) qora rangli charm tufli.

II. Kuzgi va bahorgi mavsumiy formali kiyim-bosh

1. Erkaklar uchun formali kiyim-bosh:

a) old qismida kokardasi boʻlgan toʻq-yashil rangli kepka;

b) uzun yengli, koʻkrak choʻntaklari tugmali va nishonli, shevronli, yelka qismida tugma hamda tugma qadaladigan teshiklari boʻlgan och-yashil koʻylak;

v) oltinrang qisqichli toʻq-yashil rangdagi boʻyinbogʻ (regat);

g) bitta koʻkrak choʻntakli, yon tomonlari choʻntakli va nishonli, shevronli, yelka qismida tugma hamda tugma qadaladigan teshiklari boʻlgan toʻq-yashil rangli yengil kurtka;

d) toʻq-yashil rangli shim;

ye) shim uchun kamar;

j) qora rangli charm poyabzal.

2. Ayollar uchun formali kiyim-bosh:

a) old qismida kokardasi boʻlgan toʻq-yashil rangli kepka;

b) uzun yengli, koʻkrak choʻntaklari tugmali va nishonli, shevronli, yelka qismida tugma hamda tugma qadaladigan teshiklari boʻlgan och-yashil rangli bluzka;

v) toʻq-yashil rangdagi boʻyinbogʻ;

g) bitta koʻkrak choʻntakli, yon tomonlari choʻntakli va nishonli, shevronli, yelka qismida tugma hamda tugma qadaladigan teshiklari boʻlgan toʻq-yashil rangli yengil kurtka;

d) toʻq-yashil rangli yubka;

ye) qora rangli charm tufli.

III. Qishki mavsumiy formali kiyim-bosh

1. Erkaklar uchun formali kiyim-bosh:

a) orqa tomoni moʻyna (jun) bilan qoplangan, old qismida kokardasi boʻlgan toʻq-yashil rangdagi kepi;

b) uzun yengli, koʻkrak choʻntaklari tugmali va nishonli, shevronli, yelka qismida tugma hamda tugma qadaladigan teshiklari boʻlgan och-yashil rangli koʻylak;

v) oltinrang qisqichli toʻq-yashil rangdagi boʻyinbogʻ;

g) yoqasida tugma qadaladigan teshiklari boʻlgan, yon tomonlari choʻntakli, shevronli, toʻq-yashil rangdagi kurtka;

d) yoqa qismi moʻynali, koʻkrak nashivka va shevronli, plashsifat issiq kurtka;

ye) toʻq-yashil rangdagi issiq shim;

j) qora rangli etik.

2. Ayollar uchun formali kiyim-bosh:

a) orqa qismi moʻyna bilan qoplangan, old tomonida kokardasi boʻlgan toʻq-yashil rangdagi shlyapa;

b) uzun yengli, koʻkrak choʻntaklari tugmali va nishonli, shevronli, yelka qismida tugma hamda tugma qadaladigan teshiklari boʻlgan och-yashil rangli bluzka;

v) toʻq-yashil rangli boʻyinbogʻ;

g) yoqasida tugma qadaladigan teshiklari boʻlgan, yon tomonlari choʻntakli, shevronli, toʻq-yashil rangdagi kurtka;

d) yoqa qismi moʻynali, koʻkrak qismi nashivka va shevronli, plashsifat issiq kurtka;

ye) toʻq-yashil rangdagi yubka;

j) qora rangli etik.

IV. Tantanali formali kiyim-bosh

1. Erkaklar uchun formali kiyim-bosh:

a) oltin rangli kakarda qadalgan toʻq-yashil rangdagi furajka;

b) uzun yengli, koʻkrak choʻntaklari tugmali va nishonli, shevronli, yelka qismida tugma va tugma qadaladigan teshiklari boʻlgan oq koʻylak;

v) oltinrang qisqichli toʻq-yashil rangdagi boʻyinbogʻ;

g) yon va chap koʻkrak qismi choʻntakli, yoqasida tugma qadaladigan teshiklari boʻlgan, koʻkrak nishonli va shevronli toʻq-yashil rangli kurtka;

d) toʻq-yashil rangli shim;

ye) qora rangli tufli.

2. Ayollar uchun formali kiyim-bosh:

a) oltin rangli kakarda qadalgan toʻq-yashil rangdagi shlyapa;

b) uzun yengli, koʻkrak choʻntaklari tugma va nishonli, shevronli, yelka qismida tugma hamda tugma qadaladigan teshiklari boʻlgan och-yashil rangli bluzka;

v) toʻq-yashil rangli boʻyinbogʻ;

g) yoqasida tugma qadaladigan teshiklari mavjud boʻlgan, yon tomonlari choʻntakli, shevronli, toʻq-yashil rangli kurtka;

d) toʻq-yashil rangli yubka;

ye) qora rangli tufli.

V. Dala formali kiyim-bosh

Erkaklar va ayollar uchun formali kiyim-bosh:

a) old qismida kokardasi boʻlgan toʻq-yashil rangli kepka;

b) koʻkrak va yon tomonlarida choʻntaklari boʻlgan, shevronli toʻq-yashil rangdagi koʻylak;

v) yon tomonlarida, orqasida va tizzadan past qismida choʻntaklari boʻlgan toʻq-yashil rangli shim;

g) botinka.

VI. Formali kiyim-boshning farqlanuvchi belgilari

1. Kokarda

Oltin rangdagi yengil metalldan yasalgan bosh kiyim uchun kokardada qanotlari ochiq Humo qushi tasvirlangan, yuqori qismida mamlakat ramzi boʻlgan yarim oy tasviri tushirilgan, sakkiz qirrali yulduz va undagi kichik sakkiz burchakli yulduz aks ettirilgan. Humo qushining orqasida togʻlar, daryolar va gullagan vodiylar uzra koʻtarilayotgan quyosh tasvirlangan.

Pastki qismida markazda lotin harflarida "O`ZBEKISTON" deb yozilgan Oʻzbekiston Respublikasi bayrogʻi tushirilgan.

Orqa tomonida ikkita metall qisqich oʻrnatilgan boʻlib, ular yordamida kokarda furajkaning oʻrtasiga oʻrnatiladi. Kokardaning markazi burun koʻprigi bilan bir qatorda joylashgan boʻlishi kerak.

2. Shevron

Formali kiyim-boshning chap yengida (yeng tikuvidan 120 mm masofada) 90x75 mm oʻlchamda, yashil rangdagi qalqon shakliga ega shevron mavjud.

Qalqon ichida davlat ramzlari - gerb va uning atrofida Oʻzbekiston Respublikasi bayrogʻi tasvirlangan. Qalqonning yuqori qismida lotin harflari bilan "O`ZBEKISTON RESPUBLIKASI" yozuvi, qalqonning pastki qismida lotin harflari bilan "O`SIMLIKLAR KARANTINI VA HIMOYASI AGENTLIGI" yozuvi mavjud. Qalqonning pastki qismida oʻzaro kesishgan bugʻdoy boshoqlari aks ettirilgan.

Shevron matoga tushirilgan holda tayyorlanadi. Shevron matosi toʻq-yashil rangda.

3. Koʻkrak nishoni

Koʻkrak nishoni metalldan yasalgan boʻlib, yashil rangdagi qalqon shaklida ishlangan. Qalqonning markazida qanotlari ochiq Humo qushi va uning yuqori qismida yarim oy hamda kichik sakkiz qirrali yulduz tasviri tushirilgan sakkiz qirrali yulduz joylashtirilgan.

Qalqonning yuqori qismida lotin yozuvida "O`ZBEKISTON RESPUBLIKASI" yozuvi, qalqon perimetri boʻylab lotin harflarida "O`SIMLIKLAR KARANTINI VA HIMOYASI AGENTLIGI" yozuvi aks ettirilgan.

Koʻkrak nishoni formaning chap koʻkrak choʻntagiga qadaladi.

4. Nashivka

Oʻsimliklar karantini inspektorining familiyasi va ismining bosh harfi 125x25 mm li toʻgʻri burchakli, atrofi qora, yozuvi tilla rangli ip bilan lotin harflarida tikiladi.

125x40 mm oʻlchamdagi хuddi shunday ip bilan ishlov berilgan yozuv koʻkrak qismidagi chap choʻntakka aks ettirilgan boʻlib, oʻsimliklar karantini boʻyicha davlat хizmati emblemasi shevronda va lotin harflarida "O`simliklar karantini va himoyasi agentligi" degan ikki qatorli yozuv joylashtiriladi.

Yamoqlar oʻsimliklar karantini inspektori formasining koʻkrak choʻntaklariga tikiladi.

5. Petlitsa

Tugma teshigi yon tomonlari 35x75 mm boʻlgan toʻrtburchak shaklda.

Tugma teshigi asosi zich yumshoq matodan tikilgan, tugma teshigining asosiy maydoni toʻq-yashil boʻlib, unga "UZ" belgisi yopishtiriladi.

Petlitsaning cheti 4 mm kenglikda boshoq shaklida oltin rangli ipda tikilgan.

Izoh. *) Inspektorni formali kiyim-bosh va farqlash belgilari hamda oyoq kiyimlari bilan ta’minlash хarajatlari Oʻsimliklar karantini va himoyasi agentligining Oʻsimliklar karantini tizimini rivojlantirish jamgʻarmasi mablagʻlari hisobidan qoplanadi.

Oʻsimliklar karantini boʻyicha davlat хizmati inspektorining formali kiyim-boshni kiyib yurishi va farqlash belgilarini taqishi tartibi toʻgʻrisidagi nizom Oʻsimliklar karantini va himoyasi agentligi direktori tomonidan tasdiqlanadi".

Vazirlar Mahkamasining

2024 yil 15 yanvardagi

31-son qaroriga

2-ILOVA

Oʻzbekiston Respublikasi Hukumatining

oʻz kuchini yoʻqotayotgan ayrim qarorlari

ROʻYXATI

1. Vazirlar Mahkamasining "Oʻsimliklar karantini boʻyicha davlat хizmati inspektorlarining formali kiyim-boshlari namunalarini va farqlash belgilarini tasdiqlash toʻgʻrisida" 2018 yil 28 iyundagi 489-son qarori.

2. Vazirlar Mahkamasining "Oʻzbekiston Respublikasida oʻsimliklar karantini va himoyasi tizimini tubdan takomillashtirilganligi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, ba’zilarini oʻz kuchini yoʻqotgan deb hisoblash toʻgʻrisida" 2021 yil 15 dekabrdagi 752-son qaroriga 1-ilovaning 16-bandi.

Qonun hujjatlari ma’lumotlari milliy bazasi (www.lex.uz),

2024 yil 17 yanvar