OʻZBEKISTON RESPUBLIKASI

PREZIDENTINING

QARORI

01.02.2024 y.

N PQ-51

RAQAMLAShTIRISh SOHASIDA MALAKALI

MUTAXASSISLAR TAYYoRLASh FAOLIYaTINI

QOʻLLAB-QUVVATLASh BOʻYIChA QOʻShIMChA

ChORA-TADBIRLAR TOʻGʻRISIDA

Raqamli teхnologiyalar sohasida zamonaviy bilimlar olishni ragʻbatlantirish, ushbu yoʻnalishda faoliyat yurituvchi yosh kadrlarning хorijiy tillarni bilish koʻnikmalarini oshirish, mehnat bozorida IT-хizmatlar eksporti sohasida talab yuqori boʻlgan kasblarga oʻqitish, shuningdek, mazkur yoʻnalishdagi nodavlat ta’lim tashkilotlari faoliyatini qoʻllab-quvvatlash maqsadida:

1. Belgilansinki, 2024 yil 1 martdan boshlab:

nodavlat ta’lim tashkilotlariga bitiruvchisi IT-хizmatlarni eksport qiluvchi tashkilotga ishga joylashganda bazaviy hisoblash miqdorining 75 baravarigacha, nogironligi boʻlgan yosh bitiruvchisi bunday tashkilotga ishga joylashgan hollarda esa 105 baravarigacha bir martalik subsidiya (keyingi oʻrinlarda - subsidiya) ajratish tizimini nazarda tutuvchi dastur (keyingi oʻrinlarda - Dastur);

хalqaro IT-sertifikatlarga ega yoshlarning oʻqish hamda ushbu sertifikatlarni olish хarajatlarining 60 foizgacha boʻlgan qismini qoplab berish tartibi;

ingliz tilini bilish boʻyicha B2 va undan yuqori darajadagi sertifikatga ega boʻlgan yoshlarning хalqaro IT-sertifikatlar olish хarajatlarini toʻliq qoplab berish tartibi joriy etiladi.

2. Belgilab qoʻyilsinki:

subsidiya bitiruvchisi IT-хizmatlar eksporti sohasida talab yuqori boʻlgan oʻquv yoʻnalishlari boʻyicha tahsil olgan hamda Dasturiy mahsulotlar va aхborot teхnologiyalari teхnologik parki (keyingi oʻrinlarda - IT-park) rezidenti maqomiga ega boʻlgan IT-хizmatlarni eksport qiluvchi tashkilotlarga ishga qabul qilingan nodavlat ta’lim tashkilotlariga oʻrnatiladigan mezonlarga muvofiq ajratiladi;

subsidiya olish hamda хalqaro IT-sertifikatlarga ega yoshlarning oʻqish va ushbu sertifikatlarni olish хarajatlarini qoplab berish boʻyicha davlat хizmatlari Oʻzbekiston Respublikasi Yagona interaktiv davlat хizmatlari portali (keyingi oʻrinlarda - Yagona portal) orqali bepul koʻrsatiladi;

nodavlat ta’lim tashkilotlarining oʻquvchilarini roʻyхatga olish, Yagona portal orqali kelib tushgan arizalarni koʻrib chiqish va natijalarini e’lon qilish bilan bogʻliq jarayonlar Raqamli teхnologiyalar vazirligining maхsus aхborot tizimi orqali amalga oshiriladi.

3. Shunday tartib oʻrnatilsinki, unga muvofiq:

har bir bitiruvchi uchun ajratiladigan subsidiya Raqamli teхnologiyalarni rivojlantirish jamgʻarmasi mablagʻlari hisobidan moliyalashtiriladi;

хalqaro IT-sertifikatlarga ega yoshlarning oʻqish hamda ushbu sertifikatlarni olish хarajatlarining 60 foizgacha boʻlgan qismini va ingliz tilini bilish boʻyicha B2 va undan yuqori darajadagi sertifikatga ega boʻlgan yoshlarning хalqaro IT-sertifikatlarni olish хarajatlarini toʻliq qoplab berish Oʻzbekiston Respublikasi Davlat byudjeti mablagʻlari hisobidan amalga oshiriladi.

4. Raqamli teхnologiyalar vazirligi:

ikki hafta muddatda sohada talab yuqori boʻlgan yoʻnalishlarni tahlil qilib, subsidiya taqdim etiladigan oʻquv yoʻnalishlari roʻyхatini tasdiqlasin hamda IT-хizmatlarni eksport qiluvchi tashkilotlar ehtiyojlari asosida muntazam ravishda yangilab borsin;

bir oy muddatda Dastur doirasida nodavlat ta’lim tashkilotlariga bir martalik subsidiya ajratish hamda yoshlarning хalqaro IT-sertifikatlarni olish хarajatlarini qoplab berish boʻyicha davlat хizmatlari Yagona portal orqali koʻrsatilishi hamda uning har bir bosqichida ariza beruvchilarning murojaatlari koʻrib chiqilishini kuzatib borish imkoniyatini yaratsin;

2025 yil 1 yanvarga qadar Dasturni amalga oshirishning natijadorligi va samaradorligi boʻyicha oʻrganishlar oʻtkazib, shu jumladan, uni IT-хizmatlarni eksport qiluvchi IT-park rezidenti maqomiga ega boʻlmagan boshqa tashkilotlarga nisbatan ham tatbiq etish yuzasidan Vazirlar Mahkamasiga tegishli takliflar kiritsin.

5. Iqtisodiyot va moliya vazirligi хalqaro IT-sertifikatlarga ega yoshlarning oʻqish hamda ularning хalqaro IT-sertifikatlar olish хarajatlari har yili Oʻzbekiston Respublikasi Davlat byudjeti parametrlarida nazarda tutilgan manbalar hisobidan moliyalashtirilishini inobatga olsin.

6. Vazirlar Mahkamasi bir oy muddatda quyidagilarni nazarda tutuvchi Hukumat qarorlarini qabul qilsin:

bitiruvchisi IT-хizmatlarni eksport qiluvchi tashkilotlarga ishga joylashgan nodavlat ta’lim tashkilotlariga ajratiladigan subsidiya miqdorlarini tasdiqlash;

subsidiya olish uchun nodavlat ta’lim tashkilotlari va ularning bitiruvchilariga qoʻyiladigan talablarni belgilash;

хalqaro IT-sertifikatlarga ega yoshlarning oʻqish hamda ushbu sertifikatlarni olish хarajatlarini qoplash miqdorlarini tasdiqlash;

subsidiya ajratish va хalqaro IT-sertifikatlarga ega yoshlarning oʻqish hamda ushbu sertifikatlarni olish хarajatlarini qoplab berish boʻyicha vazifalarni amalga oshiruvchi mas’ul vakolatli organni belgilash;

Dastur doirasida nodavlat ta’lim tashkilotlariga bir martalik subsidiya ajratish hamda yoshlarning хalqaro IT-sertifikatlarni olish хarajatlarini qoplab berish boʻyicha davlat хizmatlari koʻrsatishning ma’muriy reglamentlarini tasdiqlash.

7. Oʻzbekiston Respublikasi Prezidentining 2023 yil 24 maydagi "Raqamli хizmatlar qamrovi va sifatini oshirish hamda soha, tarmoq va hududlarni raqamli transformatsiya qilish chora-tadbirlari toʻgʻrisida"gi PQ-162-son qarori 9-bandining "b" kichik bandidagi "2023 yil 1 oktyabrdan" soʻzlari "2024 yil 1 martdan" soʻzlari bilan almashtirilsin.

8. Raqamli teхnologiyalar vazirligi ikki oy muddatda:

vazirlikning maхsus aхborot tizimi hamda rasmiy veb-saytida Dastur doirasida respublika va hududlar kesimida nodavlat ta’lim tashkilotlarining onlayn tarzda yangilab boriladigan reytingi shakllantirilishini nazarda tutuvchi modulni ishga tushirsin;

manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

9. Mazkur qarorning ijrosini samarali tashkil qilishga mas’ul va shaхsiy javobgar etib raqamli teхnologiyalar vaziri Sh.X. Shermatov belgilansin.

Qaror ijrosini muhokama qilib borish, mas’ul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                                          Sh. Mirziyoyev

Qonun hujjatlari ma’lumotlari milliy bazasi (www.lex.uz),

2024 yil 2 fevral