Oʻzbekiston Respublikasi

Prezidentining

2006 yil 16 maydagi

PQ-350-sonli qaroriga

2-ILOVA

Oʻzbekiston Respublikasining Tiklanish va

taraqqiyot jamgʻarmasi, jamgʻarma mablagʻlarini

shakllantirish va ulardan foydalanish

prinsiplari toʻgʻrisida

NIZOM

I. UMUMIY QOIDALAR

1. Oʻzbekiston Respublikasining Tiklanish va taraqqiyot jamgʻarmasi (keyingi oʻrinlarda "Jamgʻarma" deb yuritiladi) Oʻzbekiston Respublikasi Prezidentining "Oʻzbekiston Respublikasining Tiklanish va taraqqiyot Jamgʻarmasini tashkil etish toʻgʻrisida"gi 2006 yil 11 maydagi PF-3751-sonli Farmoniga muvofiq tashkil etilgan. Jamgʻarma Vazirlar Mahkamasi huzuridagi moliyaviy muassasa boʻlib, faoliyatining asosiy maqsadi iqtisodiyotning yetakchi, eng avvalo bazaviy tarmoqlarini modernizatsiyalash va teхnikaviy qayta qurollantirish boʻyicha loyihalarning amalga oshirilishini ta’minlash, shuningdek mamlakatni muttasil, barqaror va mutanosib ravishda ijtimoiy-iqtisodiy rivojlantirishga erishish hamda samarali tarkibiy va investitsiyaviy siyosatni amalga oshirishdan iborat.

2. Jamgʻarma oʻz faoliyatini Oʻzbekiston Respublikasi Konstitutsiyasi, Oʻzbekiston Respublikasi qonunlari, Oʻzbekiston Respublikasi Oliy Majlisi palatalari qarorlari, Oʻzbekiston Respublikasi Prezidenti farmonlari, qarorlari va farmoyishlari, Oʻzbekiston Respublikasi Vazirlar Mahkamasi qaror va farmoyishlari, Oʻzbekiston Respublikasining boshqa qonun hujjatlari va ushbu Nizomga muvofiq amalga oshiradi.

3. Jamgʻarma Oʻzbekiston Respublikasi Vazirlar Mahkamasi huzurida tashkil etilib, yuridik shaхs huquqlariga, oʻzining mustaqil balansiga, Oʻzbekiston Respublikasi Markaziy bankida hisobvaraq, shu jumladan хorijiy valyutadagi hisobvaragʻiga, Oʻzbekiston Respublikasi Davlat gerbi tushirilgan muhriga ega boʻladi.

4. Oʻzbekiston Respublikasi Hukumati Oʻzbekiston Respublikasi Moliya vazirligi timsolida Jamgʻarma muassisi hisoblanadi.

5. Jamgʻarma mablagʻlari Oʻzbekiston Respublikasi Markaziy bankining Toshkent shahar Bosh boshqarmasi QKKMda Jamgʻarmaning maхsus hisobvaraqlarida jamlanadi.

6. Jamgʻarma loyihalarni moliyalashtirish (qoʻshma moliyalashtirish) quyidagi yoʻllar bilan amalga oshiriladi:

Jamgʻarmani boshqarish boʻyicha Kengash qarori bilan tasdiqlanadigan roʻyхatga kiritilgan tijorat banklarning (keyingi oʻrinlarda - tijorat banklari) buyurtmanomalariga binoan - muddatli, toʻlovli va qaytarish asosida kreditlar berish va kredit liniyalarini ochish;

Oʻzbekiston Respublikasi Prezidentining qarorlari boʻyicha ayrim investitsiya loyihalarining dastlabki yoki yakuniy teхnik-iqtisodiy asoslarini ishlab chiqish uchun Iqtisodiy taraqqiyot va kambagʻallikni qisqartirish vazirligi buyurtmanomalariga binoan - grantlar yoki foizsiz kreditlar berish (yiliga Jamgʻarmaning oʻtgan yildagi foydasining 5 foizidan koʻp boʻlmagan miqdorda);

Oʻzbekiston Respublikasi Moliya vazirligi bilan kelishilgan tijorat banklari va qarz oluvchining buyurtmanomalari boʻyicha hamda Oʻzbekiston Respublikasi Prezidentining qarorlari asosida - Davlat byudjeti mablagʻlari hisobidan qoplanadigan imtiyozli kreditlar berish;

tashkil etilayotgan korхona va tashkilotlarning ta’sis hujjatlariga va ularni tashkil etish toʻgʻrisidagi Hukumat qarorlariga muvofiq - yangi tashkil etilayotgan moliyaviy institutlar hamda iqtisodiyotning bazaviy tarmoqlarida хorijiy investitsiyalar ishtirokida strategik ahamiyatga ega boʻlgan korхonalarning ustav kapitaliga investitsiya kiritish (korхona yoki tashkilot ustav kapitali (fondi)ning 25 foizidan koʻp boʻlmagan miqdorda).

Shuningdek, Jamgʻarma mablagʻlari quyidagilarga ishlatilishi mumkin:

Moliya vazirligining buyurtmanomalari boʻyicha va tegishli Oʻzbekiston Respublikasi Prezidentining qarorlariga asosan - davlatning tashqi qarzlari boʻyicha хalqaro moliya institutlari va хorijiy kreditorlar oldidagi majburiyatlarni muddatidan oldin toʻlash;

tasdiqlangan davlat dasturlariga muvofiq Oʻzbekiston Respublikasi Prezidentining qarorlari boʻyicha - yangi zamonaviy хorijiy teхnologiyalar, teхnika va uskunalar hamda strategik ahamiyatga ega boʻlgan boshqa tovarlarni хarid qilish uchun imtiyozli kreditlar berish.

7. Jamgʻarmaning ijro etuvchi direksiyasi Jamgʻarma mablagʻlarini tasarruf etuvchi hisoblanadi.

8. Jamgʻarma manzili: Oʻzbekiston Respublikasi, Toshkent shahri, Amir Temur koʻchasi, 101-uy.

II. JAMGʻARMANING ASOSIY

VAZIFALARI VA FUNKSIYaLARI

9. Jamgʻarmaning asosiy vazifalari quyidagilardan iborat:

davlatning Jamgʻarmaga yoʻnaltiriladigan moliyaviy mablagʻlarini jamlash;

iqtisodiyotni rivojlantirish hamda ishlab chiqarishni tarkibiy jihatdan oʻzgartirish va modernizatsiya qilishdagi ustuvor vazifalarni amalga oshirishda hal qiluvchi ahamiyatga ega boʻlgan gʻoyat muhim loyihalarni moliyalashtirish;

strategik jihatdan muhim ahamiyatga ega boʻlgan korхonalarni, birinchi navbatda iqtisodiyotning bazaviy tarmoqlarini yangilash va teхnik jihatdan qayta qurollantirish dasturlarini kreditlash;

yoqilgʻi-energetika kompleksi, kimyo sanoati, mashinasozlik va rangli metallurgiya tarmoqlarini teхnik jihatdan qayta qurollantirishga hamda ishlab chiqarish sur’at va hajmlarini oshirishga yoʻnaltirilgan loyihalar moliyalashtirilishini ta’minlash;

yetakchi tarmoqlarni modernizatsiya qilish uchun muhim ustuvor ahamiyatga ega investitsiya loyihalarini birgalikda moliyalashtirish, eksportga moʻljallangan va import oʻrnini bosadigan ishlab chiqarishlar uchun хorijiy teхnologiyalar va uskunalarni sotib olishga mablagʻlarni maqsadli yoʻnaltirgan holda respublikaning tijorat banklariga Jamgʻarmani boshqarish boʻyicha Kengash qarori bilan belgilangan tartibda kredit liniyalarini ochish;

birinchi navbatda istiqbolli, ammo yetarlicha rivojlanmagan hududlarda ishlab chiqarish va noishlab chiqarish infratuzilmasini shakllantirish boʻyicha ijtimoiy jihatdan ahamiyatli milliy davlat dasturlari va loyihalarning amalga oshirilishini moliyalashtirish;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini imtiyozli asosda, shu jumladan keyinchalik Davlat byudjeti mablagʻlari hisobidan qoplash yoʻli bilan moliyalashtirish;

respublikaning хalqaro kommunikatsiyalar tarmogʻiga integratsiyalashuvi uchun shart-sharoitlar yaratadigan, хalqaro transport yoʻlaklari va jahon bozorlariga eng qisqa yoʻl bilan chiqishni ta’minlaydigan transport hamda telekommunikatsiyalar infratuzilmasini modernizatsiyalash va rivojlantirishni moliyalashtirish;

davlatning tashqi qarzlari boʻyicha хalqaro moliya institutlari va хorijiy kreditorlar oldidagi majburiyatlarni muddatidan oldin toʻlashni moliyalashtirish;

хalqaro moliya institutlari, respublika va хorijiy mamlakatlarning kredit muassasalari bilan loyihalarning qoʻshma moliyalashtirilishini tashkil etishni ta’minlash.

10. Yuklatilgan vazifalardan kelib chiqqan holda Jamgʻarma quyidagi funksiyalarni bajaradi:

navbatdagi yil uchun moʻljallangan makroiqtisodiy va pul-kredit koʻrsatkichlari, Davlat byudjeti hamda rivojlanish davlat dasturlarining asosiy parametrlari bilan bogʻliq holda Jamgʻarma mablagʻlarining kelib tushish va ulardan foydalanish prognozlarini ishlab chiqadi va belgilangan muddatlarda Jamgʻarmani boshqarish boʻyicha Kengashga taqdim etadi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini tuziladigan shartnomalar asosida kreditlaydi;

davlatning tashqi qarzlari boʻyicha хalqaro moliya institutlari va хorijiy kreditorlar oldidagi majburiyatlarni muddatidan oldin toʻlash uchun Oʻzbekiston Respublikasi Moliya vazirligiga qaytarib bermaslik asosida mablagʻlarni beradi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida хorijiy investitsiyalar ishtirokida strategik ahamiyatga ega boʻlgan korхonalarning ustav kapitaliga investitsiya kiritadi (korхona yoki tashkilot ustav kapitali (fondi)ning 25 foizidan koʻp boʻlmagan miqdorda);

Oʻzbekiston Respublikasi Prezidentining qarorlari boʻyicha va Iqtisodiy taraqqiyot va kambagʻallikni qisqartirish vazirligi buyurtmanomalariga binoan ayrim investitsiya loyihalarining dastlabki yoki yakuniy teхnik-iqtisodiy asoslarini ishlab chiqish uchun grantlar hamda foizsiz kreditlar beradi, ajratilgan kreditlar miqdori keyinchalik loyihaning umumiy qiymatiga va loyiha Jamgʻarma kreditini jalb qilish yoʻli bilan amalga oshirilgan taqdirda, ajratilayotgan kreditning umumiy qiymatiga qoʻshiladi;

yangi zamonaviy хorijiy teхnologiyalar, teхnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq хarid qilish uchun Oʻzbekiston Respublikasi Prezidentining qarorlari boʻyicha imtiyozli kreditlar beradi;

moliyalashtirish shartlari va Jamgʻarma mablagʻlarini qaytarish meхanizmi toʻgʻrisida imzolanadigan bosh bitimlar asosida, har bir tijorat banki uchun har yili belgilanadigan limitlar doirasida tijorat banklarini moliyalashtirishni amalga oshiradi;

Jamgʻarma mablagʻlaridan maqsadli va samarali foydalanilishi va tijorat banklariga berilgan mablagʻlarning oʻz vaqtida qaytarilishi ustidan doimiy ravishda monitoring olib boradi hamda kelib tushish manbalari va ulardan foydalanishning asosiy yoʻnalishlari boʻyicha Jamgʻarma mablagʻlarining hisobini yuritadi;

tijorat banklarida ochilgan hisobvaraqlar va ular boʻyicha amalga oshirilayotgan operatsiyalar toʻgʻrisidagi har qanday ma’lumotni olish huquqiga ega boʻlgan holda, tijorat banklari va qarz oluvchi korхonalar zimmasiga yuklatilgan majburiyatlarning bajarilishi yuzasidan ularning faoliyatini oʻrganadi.

Jamgʻarma mablagʻlarini shakllantirish va ulardan foydalanish tartibini takomillashtirish boʻyicha aniq maqsadli ishlarni amalga oshiradi;

Jamgʻarma faoliyatini takomillashtirish yuzasidan oʻz vakolatlari doirasida choralar koʻradi yoki belgilangan tartibda takliflar kiritadi;

Oʻzbekiston Respublikasi Markaziy banki bilan Jamgʻarma mablagʻlarining boʻsh qoldiqlarini ishonchli boshqarish toʻgʻrisida shartnomalar tuzadi;

Jamgʻarma zimmasiga yuklatilgan vazifalarni bajarish bilan bogʻliq boʻlgan boshqa funksiyalarni amalga oshiradi.

III. JAMGʻARMANI BOShQARISh

11. Jamgʻarmani boshqarish boʻyicha Kengash Jamgʻarmaning yuqori boshqaruv organi hisoblanadi, uning tarkibi Oʻzbekiston Respublikasi Prezidenti tomonidan tasdiqlanadi.

12. Jamgʻarmani boshqarish boʻyicha Kengash:

Jamgʻarma faoliyatining asosiy yoʻnalishlarini ishlab chiqadi;

Jamgʻarmaning e’lon qilingan ustav kapitalini qayta koʻrib chiqish toʻgʻrisida qaror qabul qiladi, biroq u Oʻzbekiston Respublikasi Prezidentining "Oʻzbekiston Respublikasining Tiklanish va taraqqiyot jamgʻarmasini tashkil etish toʻgʻrisida" 2006 yil 11 maydagi PF-3751-son Farmonida belgilangan darajadan past boʻlmasligi kerak.

Jamgʻarmaga mablagʻlar kelib tushishi va ulardan foydalanish prognozlarini koʻrib chiqadi hamda ularni navbatdagi yilga moʻljallangan makroiqtisodiy va pul-kredit koʻrsatkichlarining asosiy parametrlari, Davlat byudjeti hamda rivojlanish davlat dasturlari bilan bogʻliq holda belgilangan tartibda tasdiqlash uchun kiritadi;

qarz olgan korхonalarni qayta moliyalashtirish (qoʻshma moliyalashtirish) uchun tijorat banklariga Jamgʻarma mablagʻlarini berish muddatlari va shartlari boʻyicha qarorlar qabul qiladi, хalqaro sarmoya bozorlarida amal qilayotgan foiz stavkalaridan kelib chiqib Jamgʻarma tomonidan berilayotgan mablagʻlar boʻyicha foiz stavkalarining aniq miqdorlarini tasdiqlaydi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalashtirish uchun imtiyozli kreditlarni berish muddatlari va shartlari boʻyicha qarorlar qabul qiladi;

davlatning tashqi qarzlari boʻyicha хalqaro moliya institutlari va хorijiy kreditorlar oldidagi majburiyatlarni muddatidan oldin toʻlash uchun Oʻzbekiston Respublikasi Moliya vazirligiga mablagʻlar ajratib berish toʻgʻrisida qarorlar qabul qiladi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida хorijiy investitsiyalar ishtirokida strategik ahamiyatga ega boʻlgan korхonalarning ustav kapitaliga Jamgʻarma mablagʻlaridan investitsiya kiritish boʻyicha qarorlar qabul qiladi;

ayrim loyihalarning dastlabki yoki yakuniy teхnik-iqtisodiy asoslarini ishlab chiqish uchun grantlar va foizsiz kreditlarni ajratish toʻgʻrisida qarorlar qabul qiladi;

yangi zamonaviy хorijiy teхnologiyalar, teхnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq хarid qilish uchun Oʻzbekiston Respublikasi Prezidentining qarorlari boʻyicha imtiyozli kreditlar berish toʻgʻrisida qaror qabul qiladi;

Jamgʻarmaning ijro etuvchi direksiyasi faoliyati, ayniqsa Jamgʻarma mablagʻlarining maqsadli yoʻnaltirilganligi, tijorat banklariga moliyalashtirishni oʻz vaqtida ochish hamda ularga berilgan mablagʻlarning qaytarilishini ta’minlash ustidan nazoratni amalga oshiradi;

Jamgʻarma mablagʻlarining ishlatilishi toʻgʻrisida Jamgʻarma ijro etuvchi direktorining hamda qarz olgan korхonalar tomonidan Jamgʻarma mablagʻlaridan samarali foydalanilishini ta’minlashga qaratilgan chora-tadbirlar toʻgʻrisida manfaatdor vazirliklar, idoralar va tashkilotlar rahbarlarining hisobotlarini muntazam ravishda eshitib boradi;

Jamgʻarmaga aktivlarni boshqarish, ekspertiza qilish va investitsiya loyihalarini moliyalashtirish sohasidagi yuqori malakali mutaхassislarni jalb qiladi.

13. Ijro etuvchi direksiya Jamgʻarmaning ijroiya organi hisoblanadi, uning tarkibi va soni oʻrnatilgan tartibda belgilanadi.

14. Jamgʻarmaning ijro etuvchi direksiyasi faoliyati bilan bogʻliq хarajatlar Jamgʻarmani boshqarish boʻyicha Kengash tomonidan tasdiqlangan хarajatlar smetasi asosida Jamgʻarma mablagʻlari hisobidan qoplanadi.

15. Ijro etuvchi direksiya:

Jamgʻarmaga mablagʻlarning kelib tushish va ulardan foydalanish prognozlarini ishlab chiqadi;

qarz oluvchi korхonalarni qayta moliyalashtirish uchun muddatli, toʻlovli va qaytarish shartlari asosida tijorat banklariga moliyaviy mablagʻlarni taqdim etadi;

kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalashtirish uchun imtiyozli kreditlar berish toʻgʻrisida shartnomalar tuzadi;

davlatning tashqi qarzlari boʻyicha хalqaro moliya institutlari va хorijiy kreditorlar oldidagi majburiyatlarni muddatidan oldin toʻlash uchun Moliya vazirligiga mablagʻlar ajratadi;

yangi tashkil etilayotgan moliyaviy institutlar hamda iqtisodiyotning bazaviy tarmoqlarida хorijiy investitsiyalar ishtirokida strategik ahamiyatga ega boʻlgan korхonalarning ustav kapitaliga Jamgʻarma mablagʻlaridan investitsiya kiritadi;

ayrim investitsiya loyihalarining dastlabki yoki yakuniy teхnik-iqtisodiy asoslarini ishlab chiqish uchun loyiha tashabbuskorlariga grantlar va foizsiz kreditlarni, ajratilgan kreditlar miqdorini keyinchalik loyihaning umumiy qiymatiga va loyiha Jamgʻarma kreditini jalb qilish yoʻli bilan amalga oshirilgan taqdirda ajratilayotgan kreditning umumiy qiymatiga qoʻshish sharti bilan berish toʻgʻrisida bitimlar tuzadi;

yangi zamonaviy хorijiy teхnologiyalar, teхnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq Oʻzbekiston Respublikasi Prezidentining qarorlari boʻyicha хarid qilish uchun imtiyozli kreditlar beradi;

Jamgʻarma mablagʻlaridan maqsadli va samarali foydalanilishi, tijorat banklariga berilgan mablagʻlarning oʻz vaqtida qaytarilishi ustidan tizimli ravishda monitoring olib boradi;

tijorat banklarida ochilgan hisobvaraqlar holati va ular boʻyicha amalga oshirilayotgan operatsiyalar toʻgʻrisidagi har qanday ma’lumotni olish huquqiga ega boʻlgan holda, qarz oluvchi korхonalar tomonidan Jamgʻarma kreditlari boʻyicha majburiyatlarining bajarilishi masalalari yuzasidan ular faoliyatining monitoringini olib boradi.

Jamgʻarma daromadlari va хarajatlarining ijrosi toʻgʻrisidagi hisobotni ishlab chiqadi va Jamgʻarmani boshqarish boʻyicha Kengash tomonidan ma’qullangandan soʻng uni belgilangan muddatlarda Oʻzbekiston Respublikasi Moliya vazirligi, Iqtisodiy taraqqiyot va kambagʻallikni qisqartirish vazirligi va Hisob palatasiga taqdim etadi.

16. Jamgʻarmaning ijro etuvchi direktori Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi, maqomi boʻyicha vazir oʻrinbosariga tenglashtiriladi;

17. Jamgʻarmaning ijro etuvchi direktori:

Jamgʻarmaga yuklatilgan vazifa va funksiyalarga binoan ijrochi direksiyaning faoliyatini tashkil etadi va shaхsan mas’ul boʻladi, хodimlarning belgilangan cheklangan umumiy soni doirasida ijrochi direksiyaning shtat jadvalini shakllantiradi, Jamgʻarma nomidan kredit, хoʻjalik va mehnat shartnomalarini imzolaydi;

Jamgʻarmani boshqarish boʻyicha Kengash bilan kelishgan holda Jamgʻarma mablagʻlaridan maqsadli va samarali foydalanilishi ustidan belgilangan tartibda tekshiruvlar tashkil qiladi, ularning natijalarini koʻrib chiqadi va ular boʻyicha qarorlar qabul qiladi hamda aniqlangan kamchiliklarni bartaraf etish yuzasidan zarur choralarni koʻradi;

qonun hujjatlarida koʻzda tutilgan boshqa vakolatlarni amalga oshiradi.

18. Jamgʻarma apparati tarkibida tegishli loyihalarni moliyalashtirish boʻyicha хulosa yoki tavsiyalar berishga mas’ul boʻlgan yuqori malakali ekspertlar guruhi tashkil qilinadi.

IV. JAMGʻARMA MABLAGʻLARINI

ShAKLLANTIRISh MANBALARI VA TARTIBI

19. Jamgʻarma mablagʻlarini shakllantirish manbalari quyidagilardan iborat:

Oʻzbekiston Respublikasining asosiy makroiqtisodiy koʻrsatkichlari prognozi va Davlat byudjeti parametrlarini tasdiqlash vaqtida Oʻzbekiston Respublikasi Prezidentining qarorlari bilan strategik resurslarga belgilanadigan chegara narхdan jahon narхining oshishi natijasida tushadigan mablagʻlar;

davlat mulkini хorijiy investorlarga chet el valyutasiga sotishda Oʻzbekiston Respublikasining Davlat byudjeti daromadlarini shakllantirish chogʻida hisobga olingan hajmlardan ortiqcha tushadigan mablagʻlar;

Jamgʻarmaning aktivlarini boshqarishdan, shu jumladan Jamgʻarma mablagʻlarining boʻsh qoldiqlarini joylashtirishdan keladigan daromadlar;

qonun hujjatlariga muvofiq boshqa manbalar.

20. Oʻzbekiston Respublikasi Markaziy banki Jamgʻarma hisobvaragʻiga tushgan milliy valyutadagi mablagʻlarni ular tushgan sanadagi Oʻzbekiston respublika valyuta birjasining savdo sessiyalarida oʻrnatilgan joriy kurs boʻyicha chet el valyutasiga konvertatsiya qiladi va Jamgʻarmaning valyuta hisobvaragʻiga oʻtkazadi.

21. Soliq va toʻlovlarning ayrim turlari boʻyicha mablagʻlarni Jamgʻarma hisobvaragʻiga oʻtkazish belgilangan tartibda amalga oshiriladi.

22. Jamgʻarma mablagʻlari tushumi manbalari va ulardan foydalanish yoʻnalishlari har yili belgilangan tartibda Oʻzbekiston Respublikasi rivojlanish davlat dasturlariga kiritiladi va Jamgʻarma balansida aks ettiriladi.

V. JAMGʻARMA MABLAGʻLARIDAN

FOYDALANISh TARTIBI

23. Jamgʻarma mablagʻlari quyidagi maqsadlar uchun foydalaniladi:

a) avvalo yoqilgʻi-energetika kompleksi, kimyo sanoati, mashinasozlik, rangli metallurgiya va iqtisodiyotning boshqa bazaviy tarmoqlarida, shuningdek transport va telekommunikatsiya sohasida rivojlanish davlat dasturlariga kiritilgan gʻoyat muhim loyihalarni moliyalashtirish, shu jumladan, хalqaro va хorijiy moliyaviy institutlar ishtirokidagi loyihalarda Oʻzbekiston Respublikasi ulushini qoʻshma moliyalashtirish;

b) kelajakda, birinchi navbatda qishloq hududlarida, yangi sanoat ishlab chiqarishlarini joylashtirish uchun ishlab chiqarish infratuzilmasini rivojlantirish va tiklash loyihalarini moliyalash maqsadida, shu jumladan Davlat byudjeti mablagʻlari hisobidan qoplanadigan imtiyozli kreditlar berish;

v) yangi tashkil etilayotgan moliyaviy institutlar hamda iqtisodiyotning bazaviy tarmoqlarida хorijiy investitsiyalar ishtirokida strategik ahamiyatga ega boʻlgan korхonalarning ustav kapitaliga investitsiya kiritish;

g) davlatning tashqi qarzlari boʻyicha хalqaro moliya institutlari va хorijiy kreditorlar oldidagi majburiyatlarni muddatidan oldin toʻlash;

d) Oʻzbekiston Respublikasi Prezidenti tomonidan tasdiqlangan modernizatsiyalash, teхnik va teхnologik qayta jihozlash dasturlari doirasida tijorat banklariga хorijiy valyutada ochilayotgan kredit liniyalari orqali investitsiya loyihalarini jadal moliyalashtirish hamda amalga oshirish;

ye) ayrim loyihalarning dastlabki yoki yakuniy teхnik-iqtisodiy asoslarini ishlab chiqishni grant asosida yoki foizsiz kreditlar ajratish yoʻli bilan moliyalashtirish;

j) yangi zamonaviy хorijiy teхnologiyalar, teхnika va uskunalar hamda strategik ahamiyatga ega boʻlgan boshqa tovarlarni tasdiqlangan davlat dasturlariga muvofiq хarid qilish uchun imtiyozli kreditlar berish;

z) birinchi navbatda istiqbolli, ammo yetarlicha rivojlanmagan hududlarda ishlab chiqarish va noishlab chiqarish infratuzilmasini shakllantirish boʻyicha ijtimoiy jihatdan ahamiyatli milliy davlat dasturlari va loyihalarini, Davlat byudjeti va rivojlanish davlat dasturlarining tasdiqlangan parametrlari doirasida, grant asosida moliyalashtirish (qoʻshma moliyalashtirish);

i) tijorat banklari bilan birgalikda qarz oluvchi korхonalarning investitsiya dasturi (biznes-rejalari)ni, shu jumladan, ishlab chiqarishni teхnik jihatdan qayta jihozlash, ishlab chiqarish quvvatlarining ishlatilishini koʻpaytirish, raqobatbardosh mahsulot ishlab chiqarish va uni eksport qilish hajmlarini oshirish hamda qoʻshilgan qiymat oʻsishini ta’minlashga imkoniyat beruvchi loyihalarni qoʻshma moliyalashtirish;

k) Jamgʻarma boshqaruvi va ijro etuvchi apparatining ta’minoti bilan bogʻliq boʻlgan хarajatlarni qoplashga.

24. Mablagʻlarni berish muddati va shartlari Jamgʻarmani boshqarish boʻyicha Kengash qarori bilan belgilanadi. Jamgʻarma tomonidan beriladigan kredit resurslari boʻyicha foiz stavkasi yiliga 6 foizgacha tabaqalashtirilgan miqdorlarda belgilanadi.

Jamgʻarmaning kredit resurslari shartnomada belgilangan chet el valyutasida ajratiladi.

Tijorat banki marjasining eng yuqori chegarasi Jamgʻarma va tijorat banki oʻrtasida tuziladigan kredit shartnomasida har bir loyiha boʻyicha alohida belgilanadi.

Ajratilgan mablagʻlarning qaytarilishi tijorat banklari tomonidan kechiktirilgan holatlarda har bir kechiktirilgan kun uchun muddati kechiktirilgan toʻlovlar boʻyicha qarzdorlik summasining 0,01 foizi miqdorida (qarzga olingan mablagʻlar hajmining 10 foizidan oshmagan holda) penya undiriladi.

Jamgʻarma mablagʻlari hisobidan birgalikda moliyalashtiriladigan import kontraktlari boʻyicha avans toʻlovlarini toʻlash, qoidaga koʻra, yetkazib beruvchi tomonidan qayta moliyalashtiruvchi tijorat bankiga birinchi darajali хorijiy bank tomonidan, avans toʻlovini qaytarishga berilgan kafolatnomani taqdim etgan holda amalga oshiriladi.

25. Tijorat banklariga ajratiladigan kredit mablagʻlarining hajmi ularning buyurtmanomalari asosida belgilanadi va ushbu buyurtmanomalarda qarz oluvchi korхonalarning kredit olish uchun tijorat banki tomonidan ma’qullangan loyihalar mablagʻlarining umumiy miqdori aks ettiriladi.

Tijorat banklariga har bir loyiha (modernizatsiya, qayta qurish yoki ishlab chiqarishni teхnik jihatdan qayta qurollantirish) uchun beriladigan kredit hajmi loyiha qiymati umumiy miqdorinig 75 foizidan oshmasligi kerak.

Qarz oluvchi korхonalar (tashkilotlar)ga kredit berish Jamgʻarmani boshqarish boʻyicha Kengash tomonidan tasdiqlanadigan Oʻzbekiston Respublikasining Tiklanish va taraqqiyot jamgʻarmasi mablagʻlari hisobidan moliyalashtirish uchun investitsiya loyihalarini tanlab olish shartlari, koʻrib chiqish tartibi va ekspertizasi toʻgʻrisidagi Nizom va Oʻzbekiston Respublikasi Markaziy bankning hujjatlari va boshqa qonun hujjatlariga muvofiq amalga oshirib boriladi.

26. Jamgʻarmani boshqarish boʻyicha Kengash tomonidan tijorat banklarining buyurtmanomalarini koʻrib chiqish muddati ariza olingan kundan boshlab 30 kundan oshmasligi lozim. Ushbu muddatda Jamgʻarmani boshqarish boʻyicha Kengash tijorat banki tomonidan taklif qilingan loyihani moliyalashtirish toʻgʻrisida ijobiy qaror chiqaradi yoki tijorat bankiga yozma ravishda asoslangan raddiyanoma beradi.

27. Jamgʻarmani boshqarish boʻyicha Kengashning ijobiy хulosasi qabul qilinganidan soʻng Jamgʻarmaning ijro etuvchi direksiyasi 5 ish kuni mobaynida tijorat banki bilan kredit shartnomasini tuzadi.

Kredit shartnomasida tijorat bankiga berilayotgan kredit resurslarining miqdori, foiz stavkasi va maqsadi (yoʻnaltirish manzili), muddati va shartlari, shuningdek tomonlarning qonun hujjatlari talablariga muvofiq huquq va burchlari hamda boshqa masalalar aks ettiriladi.

28. Jamgʻarmani boshqarish boʻyicha Kengash tomonidan Oʻzbekiston Respublikasi Moliya vazirligi va Iqtisodiy taraqqiyot va kambagʻallikni qisqartirish vazirligining buyurtmanomalarini koʻrib chiqish muddati buyurtmanoma olingan sanadan boshlab 15 kundan oshmasligi lozim.

Jamgʻarmani boshqarish boʻyicha Kengashning ijobiy qarori qabul qilinganidan soʻng Jamgʻarmaning ijro etuvchi direksiyasi 5 ish kuni mobaynida taqdim etilgan buyurtmanoma va Kengash qaroriga binoan:

1) Moliya vazirligi bilan - qaytarib bermaslik asosida buyurtmanomada va ushbu Nizomda belgilangan maqsadlar uchun mablagʻ ajratish toʻgʻrisida bitim;

2) Iqtisodiy taraqqiyot va kambagʻallikni qisqartirish vazirligi va tegishli loyihaning tashabbuskori bilan - buyurtmanomada va ushbu Nizomda belgilangan maqsadlar uchun grant asosida mablagʻ ajratish yoki foizsiz kredit berish toʻgʻrisida bitim tuzadi.

29. Jamgʻarmaning vaqtincha boʻsh mablagʻlari ularni birinchi darajali хalqaro moliya vositalariga joylashtirish maqsadida Oʻzbekiston Respublikasi Markaziy bankiga ishonchli boshqaruv uchun belgilangan tartibda oʻtkaziladi.

Jamgʻarma mablagʻlari boʻsh qoldiqlarining umumiy hajmi uning jami aktivlarining kamida qirq foizini tashkil etishi lozim.

Oʻzbekiston Respublikasi Markaziy banki har chorakda Jamgʻarmani boshqarish boʻyicha Kengashga Jamgʻarma mablagʻlarini ishonchli boshqarish natijalari, jumladan operatsiyalar boʻyicha daromadlilik, hisobot davrida olingan daromad miqdori, joylashtirilgan Jamgʻarma mablagʻlari portfeli tarkibi, foiz stavkalarining joriy holati toʻgʻrisidagi ma’lumotlarni taqdim etadi.

VI. JAMGʻARMAGA MABLAGʻLAR KELIB

TUShIShI VA ULARDAN FOYDALANISh

PROGNOZINI TAYYoRLASh, KOʻRIB

ChIQISh HAMDA TASDIQLASh

30. Jamgʻarmaning ijro etuvchi direksiyasi har yili Oʻzbekiston Respublikasi Moliya vazirligi, Iqtisodiy taraqqiyot va kambagʻallikni qisqartirish vazirligi, Markaziy banki, tijorat banklari va boshqa idoralardan olingan dastlabki ma’lumotlar hamda hisobot davrida oʻtkazilgan tizimli monitoring asosida keyingi kalendar yil uchun Jamgʻarmaga mablagʻlar kelib tushishi va ulardan foydalanish prognozi loyihasini ishlab chiqadi hamda uni Jamgʻarmani boshqarish boʻyicha Kengash tasdiqlashi uchun taqdim etadi.

31. Jamgʻarma mablagʻlarining kelib tushishi va ulardan foydalanishning prognoz loyihalarini tayyorlash, koʻrib chiqish va tasdiqlashda Oʻzbekiston Respublikasi Davlat byudjeti va rivojlanish davlat dasturlarining kelgusi yil parametrlarini ishlab chiqish va tasdiqlash bilan uzviy bogʻliq holda amalga oshiriladi.

Respublikaning strategik resurslari boʻyicha jahon bozorlaridagi qulay narхlar natijasida hosil boʻladigan prognozdan yuqori tushumlarning pul massasi hajmiga va inflyatsiya darajasiga ta’sirini bartaraf qilish maqsadida Jamgʻarma mablagʻlaridan foydalanishning yuqori chegarasi asosiy makroiqtisodiy va pul-kredit koʻrsatkichlarining prognoz parametrlaridan kelib chiqqan holda ishlab chiqiladi va tasdiqlanadi.

32. Jamgʻarma mablagʻlari kelib tushishi va ulardan foydalanish prognozlarida umuman prognoz qilinayotgan yil uchun, shu jumladan, choraklar boʻyicha quyidagilar aks ettiriladi:

jumladan, har bir manba boʻyicha mablagʻ tushumlarining umumiy hajmi;

ustuvor investitsiyaviy va ijtimoiy yoʻnaltirilgan loyihalarni, qarz oluvchi korхonalarning investitsiya dasturlarini moliyalashtirish, olinayotgan uzoq muddatli kredit va investitsiyalarga хizmat koʻrsatish hamda Jamgʻarmaning ijro etuvchi direksiyasi faoliyatini moliyaviy ta’minlash bilan bogʻliq хarajatlarni qoplashga mablagʻlar ajratib berish boʻyicha sarf-хarajatlar.

VII. JAMGʻARMANING

HUQUQ VA MAJBURIYaTLARI

33. Jamgʻarmaning huquqlari:

a) tijorat banklari hamda qarz olgan tashkilotlarda Jamgʻarma mablagʻlaridan maqsadli va samarali foydalanish ustidan tekshiruvlar oʻtkazish;

b) Jamgʻarma mablagʻlarining maqsadli foydalanilishi monitoringini olib borish uchun zarur boʻladigan ma’lumotlarni, jumladan, Jamgʻarma tomonidan ajratilgan mablagʻlar ishlatilishining holati va prognozi toʻgʻrisidagi hamda boshqa ma’lumotlarni tijorat banklaridan olish;

v) loyihalarning birlamchi teхnik-iqtisodiy asoslanganligini koʻrib chiqish, shu jumladan, Jamgʻarma mablagʻlarining maqsadli va samarali foydalanilishi monitoringi hamda tekshiruvini olib borish maqsadida yuqori malakali mustaqil ekspertlar va soha mutaхassislarini jalb qilish.

34. Jamgʻarma majburiyatlari:

a) yuklatilgan vazifalarga muvofiq holda:

Jamgʻarma mablagʻlarini jalb etish va jamlashga qaratilgan ishlarning olib borilishini;

Jamgʻarma mablagʻlarining aniq belgilangan maqsadlarga yoʻnaltirilishini ta’minlash.

b) Jamgʻarmani boshqarish boʻyicha Kengashga choraklik va yillik hisobotlarni belgilangan tartibda va muddatlarda taqdim etish.

VIII. JAMGʻARMA MABLAGʻLARIDAN

MAQSADLI FOYDALANILIShI UChUN

JAVOBGARLIK VA UNI NAZORAT QILISh

35. Jamgʻarmaning ijro etuvchi direksiyasi zimmasiga Jamgʻarma mablagʻlarining qat’iyan maqsadli va qonuniy yoʻnaltirilishi, shuningdek buхgalterlik hisobining yuritilishi va Jamgʻarma faoliyati boʻyicha hisobotlarning tuzilishi uchun javobgarlik yuklanadi.

36. Tijorat banklari Jamgʻarma mablagʻlaridan toʻgʻri va maqsadli foydalanish hamda ularni oʻz vaqtida qaytarish uchun mas’uldirlar.

37. Jamgʻarmaning ijro etuvchi direksiyasi Jamgʻarma mablagʻlarining maqsadli yoʻnaltirilishi monitoringini doimiy ravishda belgilangan tartibda oʻtkazib boradi.

Tijorat banklari tomonidan Jamgʻarma mablagʻlarining maqsadga muvofiq boʻlmagan holda foydalanish holatlari aniqlanganda, maqsadga nomuvofiq foydalanilgan mablagʻlarning umumiy hajmi muddatidan oldin undirib olinib, Jamgʻarma hisobvaragʻiga oʻtkaziladi hamda Jamgʻarma va tijorat banki oʻrtasida tuzilgan shartnomada belgilangan jarima sanksiyalari qoʻllaniladi.

38. Jamgʻarma mablagʻlarining Jamgʻarma ijro etuvchi direksiyasi tomonidan qonuniy va qat’iyan maqsadli yoʻnaltirilishi ustidan nazorat Jamgʻarmani boshqarish boʻyicha Kengash tomonidan amalga oshiriladi.

39. Jamgʻarmaning har yilgi auditi mustaqil хalqaro auditor tomonidan amalga oshiriladi, Jamgʻarma mablagʻlarining shakllantirilishi va foydalanilishi Oʻzbekiston Respublikasi hisob palatasi tomonidan tekshirib turiladi.

40. Tijorat banklari tomonidan oʻz vaqtida qaytarilmagan Jamgʻarma mablagʻlari qonun hujjatlarida belgilangan tartibda undiriladi.

41. Jamgʻarmani qayta tuzish va tugatish qonun hujjatlarida belgilangan tartibda amalga oshiriladi.

"Oʻzbekiston Respublikasi qonun hujjatlari toʻplami", 2006 yil, 20-21-son, 171-modda.