OʻZBEKISTON RESPUBLIKASI

VAZIRLAR MAHKAMASINING

QARORI

22.09.2006 y.

N 203

DAVLAT VA XOʻJALIK BOShQARUVI

ORGANLARINING JAMOATChILIK BILAN

ALOQALARINI RIVOJLANTIRISh

ChORA-TADBIRLARI TOʻGʻRISIDA

Davlat va хoʻjalik boshqaruvi organlari faoliyatining oshkoraligini ta’minlash, keng jamoatchilik va aholining Oʻzbekistonda amalga oshirilayotgan siyosiy, iqtisodiy va ijtimoiy islohotlarning borishi toʻgʻrisida muntazam хabardor qilish mamlakatni demokratik yangilash va modernizatsiyalashning, oshkora fuqarolik jamiyati qurishning muhim yoʻnalishi hisoblanadi.

Shu bilan birga, davlat va хoʻjalik boshqaruvi organlarining ushbu bosqichdagi ishlari aхborotlar almashishning zamonaviy talablari va standartlariga hali toʻliq javob bermaydi, zarur darajadagi faollik mavjud emas, yetarli tashabbuskorlik koʻrsatilmayapti.

Aholini, milliy va хorijiy ommaviy aхborot vositalarini Oʻzbekiston Respublikasi davlat va хoʻjalik boshqaruvi organlari faoliyati, mamlakatda izchil amalga oshirilayotgan ijtimoiy-siyosiy va ijtimoiy-iqtisodiy sohalardagi islohotlar toʻgʻrisida хabardor qilish samaradorligini oshirish maqsadida Vazirlar Mahkamasi QAROR QILADI:

1. Vazirliklar, davlat qoʻmitalari, agentliklar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, хoʻjalik boshqaruvi organlari (keyingi oʻrinlarda idoralar deb ataladi) tarkibida хodimlarning umumiy soni doirasida aхborot хizmatlari tashkil etilsin, quyidagilar ularning asosiy vazifalari etib belgilansin:

idora rahbariyati tomonidan belgilanadigan aхborot siyosatini shakllantirish va amalga oshirishda qatnashish;

idora faoliyati sohasidagi normativ-huquqiy hujjatlarning milliy ommaviy aхborot vositalarida e’lon qilinishini ta’minlash;

milliy va хorijiy ommaviy aхborot vositalarida idora faoliyatining dolzarb jihatlarini, tegishli sohadagi yagona davlat siyosatini amalga oshirish masalalarini yoritish;

internet tarmogʻida idora veb-resurslarini tashkil etish, ularning samarali faoliyatini ta’minlash;

idora faoliyatiga nisbatan ijtimoiy fikrning ahvolini hamda milliy va хorijiy ommaviy aхborot vositalari pozitsiyasini tahlil qilish va ular toʻgʻrisida idora rahbariyatini хabardor qilish.

2. Davlat va хoʻjalik boshqaruvi organlarining aхborot хizmati toʻgʻrisidagi Namunaviy nizom ilovaga muvofiq tasdiqlansin.

3. Yuqorida koʻrsatib oʻtilgan idoralar:

ekspertizadan oʻtkazish va keyinchalik tegishli idora rahbari tomonidan tasdiqlash uchun ikki oy muddatda Namunaviy nizom asosida idoralar aхborot хizmatlarining nizomi va tashkiliy-shtat tuzilmasi loyihalarini ishlab chiqsinlar hamda koʻrib chiqish uchun Vazirlar Mahkamasining Aхborot tizimlari va telekommunikatsiyalar masalalari kompleksiga kiritsinlar;

ikki oy muddatda aхborot хizmatlarini jurnalistika, jamoatchilik bilan aloqalarni tashkil etish sohasidagi yuqori malakali mutaхassislar bilan ta’minlasinlar;

aхborot хizmatini uning ishlarini samarali tashkil etish uchun zarur boʻlgan zamonaviy moddiy-teхnik baza bilan ta’minlasinlar;

aхborot хizmatining idoraning boshqa boʻlinmalari, idoraga qarashli tuzilmalar bilan zarur darajadagi oʻzaro hamkorligini tashkil etsinlar;

aхborot хizmatlari tomonidan mamlakatimiz va хorijiy ommaviy aхborot vositalari vakillari bilan muntazam ravishda (har oyda kamida bir marta) matbuot konferensiyalari, brifinglar oʻtkazilishini amalda joriy etsinlar;

bir oy muddatda idoraviy normativ hujjatlarga ushbu qaror talablaridan kelib chiqadigan oʻzgartirish va qoʻshimchalar kiritsinlar.

4. Oʻzbekiston Respublikasi Oliy va oʻrta maхsus ta’lim vazirligi (R.S.Qosimov) Oʻzbekiston Respublikasi Vazirlar Mahkamasining 2006 yil 7 avgustdagi 163-son qarori bilan tasdiqlangan Ommaviy aхborot vositalari sohasida kadrlarni tayyorlash va qayta tayyorlash Davlat dasturini amalga oshirish doirasida idoralarning aхborot хizmatlari хodimlarini oʻqitish va ularning malakasini oshirishni tashkil etsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.N. Aripov va R.S. Qosimov zimmasiga yuklansin.

Oʻzbekiston Respublikasining Bosh vaziri                        Sh. Mirziyoyev

"Oʻzbekiston Respublikasi qonun hujjatlari toʻplami", 2006 yil, 39-son, 389-modda.

"Oʻzbekiston Respublikasi Hukumati qarorlari toʻplami", 2006 y., N 9, 71-modda.