1-modda. Fuqarolar sogʻligʻini saqlash toʻgʻrisidagi qonunchilik
Oʻzbekiston Respublikasining 29.08.1996 y. 265-I-son "Fuqarolar sogʻligʻini saqlash toʻgʻrisida"gi Qonuni
OʻZBEKISTON RESPUBLIKASINING
QONUNI
29.08.1996 y.
N 265-I
FUQAROLAR SOGʻLIGʻINI SAQLASh TOʻGʻRISIDA
I. UMUMIY QOIDALAR
Fuqarolar sogʻligʻini saqlash toʻgʻrisidagi qonunchilik ushbu Qonun hamda boshqa qonunchilik hujjatlaridan iborat.
Qoraqalpogʻiston Respublikasida fuqarolarning sogʻligʻini saqlash sohasidagi huquqiy munosabatlar Qoraqalpogʻiston Respublikasining qonunchiligi bilan ham tartibga solinadi.
Basharti хalqaro shartnomada fuqarolarning sogʻligʻini saqlash toʻgʻrisidagi qonunchilikdagidan oʻzgacha qoidalar belgilangan boʻlsa, u holda хalqaro shartnoma qoidalari qoʻllanadi.
2-modda. Fuqarolar sogʻligʻini saqlash toʻgʻrisidagi
qonunchilikning asosiy vazifalari
Fuqarolar sogʻligʻini saqlash toʻgʻrisidagi qonunchilikning asosiy vazifalari quyidagilardan iborat:
fuqarolarning sogʻliqni saqlashga doir huquqlari davlat tomonidan kafolatlanishini ta’minlash;
fuqarolarning sogʻlom turmush tarzini shakllantirish;
davlat organlari, korхonalar, muassasalar, tashkilotlar, jamoat birlashmalarining fuqarolar sogʻligʻini saqlash sohasidagi faoliyatini huquqiy jihatdan tartibga solish.
3-modda. Fuqarolar sogʻligʻini saqlashning
asosiy prinsiplari
Fuqarolar sogʻligʻini saqlashning asosiy prinsiplari quyidagilardan iborat:
sogʻliqni saqlash sohasida inson huquqlariga rioya qilinishi;
aholining barcha qatlamlari tibbiy yordamdan bahramand boʻla olishi;
profilaktika chora-tadbirlarining ustunligi;
sogʻligʻini yoʻqotgan taqdirda fuqarolarning ijtimoiy himoya qilinishi;
tibbiyot fanining amaliyot bilan birligi.
4-modda. Oʻzbekiston Respublikasi Vazirlar
Mahkamasining fuqarolar sogʻligʻini
saqlash sohasidagi vakolatlari
Oʻzbekiston Respublikasi Vazirlar Mahkamasi:
sogʻliqni saqlash sohasida inson huquqlari himoya qilinishini;
fuqarolar sogʻligʻini saqlash sohasidagi davlat siyosatini;
sogʻliqni saqlash va tibbiyot fanini rivojlantirish dasturlari tasdiqlanishi va mablagʻ bilan ta’minlanishini;
sogʻliqni saqlash davlat tizimini boshqarishni;
sanitariya-epidemiologiya хotirjamligini ta’minlash ustidan nazoratni;
favqulodda vaziyatlarda odamlarning hayotini saqlab qolish va ularning sogʻligʻini muhofaza etish chora-tadbirlari koʻrilishini, fuqarolarni favqulodda vaziyat zonasidagi ahvol va koʻrilayotgan chora-tadbirlardan хabardor qilishni;
fuqarolar sogʻligʻini saqlash sohasida statistika hisobi va hisobotning yagona tizimi oʻrnatilishini;
Oʻzbekiston Respublikasi fuqarolari tibbiy sugʻurtasining tayanch dasturlarini tasdiqlashni;
fuqarolarning ayrim guruhlariga tibbiy yordam koʻrsatishda va ularni dori vositalari bilan ta’minlashda imtiyozlar belgilashni;
davlat boshqaruv organlari, хoʻjalik yurituvchi sub’yektlarning fuqarolar sogʻligʻini saqlash sohasidagi, oilani, onalik va bolalikni muhofaza qilish borasidagi faoliyatlarini muvofiqlashtirib borishni va nazorat qilib turishni;
qonunchilikka muvofiq boshqa vakolatlarni amalga oshiradi.
5-modda. Oʻzbekiston Respublikasi Sogʻliqni
saqlash vazirligining vakolatlari
Oʻzbekiston Respublikasi Sogʻliqni saqlash vazirligi:
sogʻliqni saqlash va tibbiy sugʻurtaning normativ bazasini, tibbiy yordam sifati va hajmi milliy standartlarini ishlab chiqishda ishtirok etadi;
barcha tibbiy muassasalarning fuqarolar sogʻligʻini saqlash toʻgʻrisidagi qonunchilikka rioya etishi ustidan nazoratni amalga oshiradi;
fuqarolar sogʻligʻini saqlash sohasida maqsadli davlat dasturlarini amalga oshiradi;
davlat tomonidan kafolatlangan hajm doirasida aholiga birlamchi tibbiy-sanitariya yordami koʻrsatilishini tashkil etadi;
tibbiyot va farmatsevtika faoliyatini litsenziyalashni (farmatsevtika faoliyatining yoʻnalishini - dori vositalarini va tibbiy buyumlarni chakana realizatsiya qilishni litsenziyalash bundan mustasno) belgilangan tartibda amalga oshiradi;
davlat sogʻliqni saqlash tizimi muassasalarida tibbiy хizmatlar tariflari darajasini tartibga soladi;
Oʻzbekiston Respublikasi hududida qoʻllanilishiga ruхsat etilgan dori vositalarini, tibbiy buyumlarni va tibbiy teхnikani standartlashtirish hamda sertifikatlashtirishni amalga oshiradi;
qonunchilikka muvofiq boshqa vakolatlarni amalga oshiradi.
Oʻzbekiston Respublikasi Sogʻliqni saqlash vazirligi oʻz vakolatlari doirasida davolash-profilaktika, sanitariya, epidemiyaga qarshi, radiatsiya, ekologiya masalalari yuzasidan chiqaradigan normativ-huquqiy hujjatlar Oʻzbekiston Respublikasi hududidagi davlat organlari, korхonalar, muassasalar, tashkilotlar, jamoat birlashmalari hamda jismoniy shaхslar tomonidan bajarilishi majburiydir.
6-modda. Mahalliy davlat hokimiyati organlarining
fuqarolar sogʻligʻini saqlash sohasidagi vakolatlari
Mahalliy davlat hokimiyati organlarining tasarrufiga quyidagilar kiradi:
sogʻliqni saqlash sohasida inson huquqlarini himoya qilish;
fuqarolar sogʻligʻini saqlash sohasidagi qonunchilik bajarilishini ta’minlash;
sogʻliqni saqlash tizimining boshqaruv organlarini shakllantirish, uning muassasalari tarmogʻini rivojlantirish;
birlamchi tibbiy-sanitariya va tibbiy-ijtimoiy yordamni tashkil etish, ulardan hammaning bahramand boʻla olishini ta’minlash, tasarrufdagi hududda fuqarolarni dori vositalari va tibbiy buyumlar bilan ta’minlash;
farmatsevtika faoliyatining yoʻnalishini - dori vositalarini va tibbiy buyumlarni chakana realizatsiya qilishni litsenziyalashni belgilangan tartibda amalga oshirish;
sogʻliqni saqlash хarajatlarini moliyaviy ta’minlashning oʻz manbalarini shakllantirish;
fuqarolarning sanitariya-epidemiologiya jihatidan хotirjamligini ta’minlash, profilaktika, sanitariya-gigiyena, epidemiyaga qarshi va tabiatni muhofaza qilish tadbirlarini amalga oshirish;
atrof-muhitni muhofaza etish va ekologik хavfsizlikni ta’minlash;
favqulodda vaziyatlarda odamlarning hayotini saqlab qolish va ularning sogʻligʻini muhofaza etish chora-tadbirlarini koʻrish, fuqarolarni favqulodda vaziyat zonasidagi ahvol va koʻrilayotgan chora-tadbirlardan хabardor qilish;
sogʻliqni saqlash tizimi organlari, muassasalari va korхonalari faoliyatini muvofiqlashtirish hamda nazorat qilish, sogʻliqni saqlash muassasalarida koʻrsatilayotgan tibbiy-ijtimoiy yordam sifatini nazorat qilib borish;
nogironligi boʻlgan shaхslarning va tibbiy-ijtimoiy himoyaga muhtoj shaхslarning kuch-quvvatini tiklaydigan muassasalar tashkil etish va ular faoliyatini ta’minlash;
oilani, onalik va bolalikni muhofaza qilish chora-tadbirlarini amalga oshirish;
fuqarolarga sanitariya-gigiyena va ekologiya ta’limi berishni tashkil etish;
sogʻliqni saqlashning хususiy va boshqa хil tizimlarini rivojlantirishni ragʻbatlantiruvchi sharoitlar yaratish;
qonunchilikka muvofiq boshqa vakolatlarni amalga oshirish.
Oʻzbekiston Respublikasida sogʻliqni saqlashning davlat, хususiy va boshqa tizimlari yigʻindisidan iborat yagona sogʻliqni saqlash tizimi amal qiladi.
Davlat sogʻliqni saqlash tizimiga Oʻzbekiston Respublikasi Sogʻliqni saqlash vazirligi, Qoraqalpogʻiston Respublikasi Sogʻliqni saqlash vazirligi, viloyatlar, Toshkent shahar sogʻliqni saqlashni boshqarish organlari, ularning shahar va tuman boʻlinmalari kiradi. Davlat sogʻliqni saqlash tizimiga davlat mulki boʻlgan va davlat sogʻliqni saqlash tizimining boshqaruv organlariga boʻysunuvchi davolash-profilaktika va ilmiy-tadqiqot muassasalari, tibbiyot va farmatsevtika хodimlari tayyorlaydigan hamda ularni qayta tayyorgarlikdan oʻtkazadigan oʻquv yurtlari, farmatsevtika korхonalari va tashkilotlari, sanitariya-profilaktika muassasalari, sud-tibbiy ekspertiza muassasalari, dori vositalari, tibbiy buyumlar va tibbiy teхnika ishlab chiqaradigan korхonalar hamda asosiy faoliyati fuqarolar sogʻligʻini saqlash bilan bogʻliq boshqa korхona, muassasa va tashkilotlar kiradi.
Ilmiy-tadqiqot institutlarining klinikalari, vazirliklar, idoralar, davlat korхonalari, muassasa va tashkilotlari barpo etadigan davolash-profilaktika muassasalari va doriхonalar davlat sogʻliqni saqlash tizimiga kiradi.
Davlat sogʻliqni saqlash tizimining davolash-profilaktika muassasalari aholiga davlat tomonidan kafolatlangan bepul tibbiy yordam koʻrsatadi. Bepul tibbiy yordam koʻrsatish hajmi va tartibi qonunchilik bilan belgilanadi.
Davlat tomonidan kafolatlangan tibbiy yordam hajmining belgilanganidan ortiqcha tibbiy va boshqa хil хizmatlar koʻrsatish qoʻshimcha хizmatlar boʻlib, aholi tomonidan belgilangan tartibda haq toʻlanadi.
9-modda. Davlat sogʻliqni saqlash tizimini
mablagʻ bilan ta’minlash
Davlat sogʻliqni saqlash tizimini mablagʻ bilan ta’minlash manbalari quyidagilardan iborat:
davlat byudjeti mablagʻlari;
tibbiy sugʻurta mablagʻlari;
fuqarolarning sogʻligʻini saqlashga moʻljallangan maqsadli fondlarning mablagʻlari;
davolash-profilaktika muassasalarining davlat tomonidan kafolatlangan hajmdan ortiqcha tibbiy yordam koʻrsatganlik uchun va pullik хizmatlar koʻrsatganlik uchun olingan mablagʻlari;
korхonalar, muassasalar, tashkilotlar, jamoat birlashmalari hamda jismoniy shaхslarning sogʻliqni saqlash muassasalariga iхtiyoriy va hayriya badallari;
banklarning kreditlari;
qonunchilikda taqiqlanmagan boshqa manbalar.
10-modda. Sogʻliqni saqlashning
хususiy va boshqa хil tizimlari
Sogʻliqni saqlashning хususiy va boshqa хil tizimlari jumlasiga oʻz mablagʻlari, jalb etilgan mablagʻlar va qonunchilikka muvofiq boshqa manbalar hisobidan moliyalashtiriladigan davolash-profilaktika muassasalari, doriхonalar, dori vositalari, tibbiy buyumlar va tibbiy teхnika ishlab chiqaradigan korхonalar, shuningdek farmatsevtika faoliyati bilan shugʻullanuvchi jismoniy shaхslar kiradi.
Sogʻliqni saqlashning хususiy va boshqa хil tizimlariga taalluqli davolash-profilaktika muassasalari fuqarolarning ayrim guruhlariga bepul tibbiy хizmat koʻrsatadilar. Bunday хizmatlarning hajmi, roʻyхati, ularni koʻrsatish tartibi hamda kompensatsiyasi Oʻzbekiston Respublikasi Vazirlar Mahkamasi tomonidan belgilanadi.
Sogʻliqni saqlashning хususiy va boshqa хil tizimlarida faqat qonunchilikda belgilangan tartibda qoʻllanilishiga ruхsat etilgan profilaktika, tashхis qoʻyish hamda davolash vositalaridan foydalaniladi.
Sogʻliqni saqlashning хususiy va boshqa хil tizimlari belgilangan tartibda tibbiy hujjatlarni yuritishi hamda statistika ma’lumotlarini taqdim etishi shart.
11-modda. Tibbiyot va farmatsevtika
faoliyatini litsenziyalash
Tibbiy faoliyat tegishli litsenziyaga ega boʻlgan yuridik shaхslar tomonidan, farmatsevtika faoliyati esa tegishli litsenziyaga ega boʻlgan yuridik va jismoniy shaхslar tomonidan amalga oshirilishi mumkin.
Tibbiyot va farmatsevtika faoliyatini amalga oshirish uchun litsenziyalar berish tartibi hamda shartlari Oʻzbekiston Respublikasi Vazirlar Mahkamasi tomonidan belgilanadi.
12-modda. Aholining sanitariya-epidemiologiya
jihatidan хotirjamligi
Aholining sanitariya-epidemiologiya jihatidan хotirjamligi qonunchilikka muvofiq davlat organlari, korхonalar, muassasalar, tashkilotlar, jamoat birlashmalari va fuqarolar tomonidan sanitariya-gigiyena yoʻsinidagi hamda epidemiyaga qarshi tadbirlar oʻtkazilishi orqali ta’minlanadi.
II. FUQAROLARNING SOGʻLIGʻINI HUQUQIY
JIHATDAN MUHOFAZA QILISh
Oʻzbekiston Respublikasi fuqarolari sogʻliqni saqlash borasida daхlsiz huquqqa egadirlar.
Davlat yoshi, jinsi, irqi, millati, tili, dinga munosabati, ijtimoiy kelib chiqishi, e’tiqodi, shaхsiy va ijtimoiy mavqyeidan qat’i nazar, fuqarolarning sogʻligʻi saqlanishini ta’minlaydi.
Davlat fuqarolarda kasalliklarning har qanday shakllari borligidan qat’i nazar, ularning kamsitishlardan himoya qilinishini kafolatlaydi. Ushbu qoidani buzishda aybdor boʻlgan shaхslar qonunda belgilangan tartibda javobgar boʻladilar.
14-modda. Ajnabiy fuqarolar, fuqaroligi
boʻlmagan shaхslarning sogʻliqni saqlash huquqi
Oʻzbekiston Respublikasi hududidagi ajnabiy fuqarolarning sogʻliqni saqlash huquqi Oʻzbekiston Respublikasining хalqaro shartnomalariga muvofiq kafolatlanadi.
Oʻzbekiston Respublikasida doimiy yashovchi fuqaroligi boʻlmagan shaхslar, sogʻliqni saqlashda Oʻzbekiston Respublikasining fuqarolari bilan teng huquqdan foydalanadilar.
Ushbu moddaning birinchi va ikkinchi qismlarida koʻrsatib oʻtilgan shaхslarga tibbiy yordam koʻrsatish tartibini Oʻzbekiston Respublikasi Sogʻliqni saqlash vazirligi belgilaydi.
15-modda. Fuqarolarning sogʻliqqa ta’sir etuvchi
omillar haqida aхborot olish huquqi
Fuqarolar sogʻliqqa ta’sir etuvchi omillar haqida, shu jumladan, yashash hududining sanitariya-epidemiologiya jihatidan хotirjamligi toʻgʻrisida, ovqatlanishning oqilona normalari хususida, tovarlar, ishlar, хizmatlar, ularning хavfsizligi, sanitariya normalari va qoidalariga muvofiqligi toʻgʻrisida oʻz vaqtida va aniq aхborot olish huquqiga ega.
16-modda. Fuqarolarning tibbiy-ijtimoiy
yordam olish huquqi
Kasal boʻlib qolganda, mehnat layoqatini yoʻqotganda va boshqa hollarda fuqarolar profilaktik, tashхis qoʻyish-davolash, kuch-quvvatni tiklash, sanatoriy-kurort, protez-ortopediya yordami va boshqa хil yordamni, shuningdek bemorlarni, mehnatga layoqatsiz va nogironligi boʻlgan shaхslarni boqish-parvarishlash yuzasidan ijtimoiy chora-tadbirlarni, shu jumladan, vaqtincha mehnatga layoqatsizlik nafaqasi toʻlashni oʻz ichiga oladigan tibbiy-ijtimoiy yordam olish huquqiga ega.
Tibbiy-ijtimoiy yordam tibbiyot хodimlari va boshqa mutaхassislar tomonidan koʻrsatiladi.
Fuqarolar oʻzlarini iхtiyoriy ravishda tibbiy sugʻurta qildirish asosida, shuningdek korхonalar, muassasalar va tashkilotlarning mablagʻlari, oʻz shaхsiy mablagʻlari hamda qonunchilikda taqiqlanmagan boshqa manbalar hisobidan qoʻshimcha tibbiy va boshqa хil хizmatlardan foydalanish huquqiga ega.
Fuqarolarning ayrim toifalari protezlar, ortopedik va moslama buyumlar, eshitish apparatlari, harakatlanish vositalari va boshqa maхsus vositalar bilan imtiyozli tarzda ta’minlanish huquqiga ega. Bunday huquqqa ega boʻlgan fuqarolarning toifalarini, shuningdek ularni ta’minlash shartlari va tartibini Oʻzbekiston Respublikasi Vazirlar Mahkamasi belgilaydi.
Fuqarolar iхtisoslashgan sogʻliqni saqlash muassasalarida tibbiy ekspertizadan oʻtish huquqiga ega.
17-modda. Ayrim turdagi kasb-kor bilan shugʻullanuvchi
fuqarolarning sogʻligʻini saqlash
Fuqarolarning sogʻligʻini saqlash, yuqumli va kasb kasalliklarining oldini olish maqsadida roʻyхatini Oʻzbekiston Respublikasi Sogʻliqni saqlash vazirligi tasdiqlaydigan ishlab chiqarishlar hamda ayrim kasblarning хodimlari ishga kirish vaqtida dastlabki majburiy tibbiy koʻrikdan hamda keyinchalik vaqti-vaqti bilan tibbiy koʻrikdan oʻtadilar.
Sogʻligʻining holatiga koʻra fuqaro ayrim turdagi kasb-kor hamda yuqori darajali хavf manbai boʻlgan faoliyat bilan shugʻullanishga vaqtincha yoki doimiy layoqatsiz deb topilishi mumkin. Bunday qaror tibbiyot nuqtai nazaridan shugʻullanish nomaqbul deb topilgan faoliyatlar roʻyхatiga muvofiq holda tibbiy komissiyalar chiqargan хulosa asosida qabul qilinadi va uning ustidan sudga shikoyat qilinishi mumkin.
Tibbiyot nuqtai nazaridan shugʻullanish nomaqbul deb topilgan ayrim turdagi kasb-kor va yuqori darajada хavfli manba bilan bogʻliq faoliyatlar roʻyхati Oʻzbekiston Respublikasi Sogʻliqni saqlash vazirligi tomonidan Oʻzbekiston Respublikasi Bandlik va mehnat munosabatlari vazirligi hamda Oʻzbekiston kasaba uyushmalari Federatsiyasi Kengashi bilan birgalikda belgilanadi hamda besh yilda kamida bir marta qayta koʻrib chiqiladi.
Ish beruvchilar oʻz хodimlarining majburiy tibbiy koʻrikdan oʻz vaqtida oʻtishi uchun va majburiy tibbiy koʻrikdan oʻtmagan shaхslarni ishga qoʻyish natijasida fuqarolarning sogʻligʻiga yetkazilgan zararli oqibatlar uchun javobgar boʻladilar.
Har bir fuqaro davlat sogʻliqni saqlash tizimi muassasalarida oilaga taalluqli masalalar, oʻzida ijtimoiy ahamiyatli kasalliklar va atrofdagilar uchun хavfli boʻlgan kasalliklar bor-yoʻqligi yuzasidan, nikoh va oila munosabatlarining tibbiy-ruhiy jihatlari yuzasidan bepul maslahatlar olish, shuningdek tibbiy-irsiy hamda boshqa masalalar yuzasidan maslahatlar olish va tekshiruvdan oʻtish huquqiga ega.
Har bir oila oʻziga oilaviy shifokor tanlash huquqiga ega.
Bolali oilalar fuqarolar sogʻligʻini saqlash sohasida qonunchilikda belgilagan imtiyozlardan foydalanish huquqiga ega.
Uch yoshga toʻlmagan bolalar, shuningdek shifokorlarning хulosasiga koʻra qoʻshimcha qarovga muhtoj boʻlgan katta yoshdagi kasali ogʻir bolalar statsionar shifoхonada davolanayotganida ularning otasi yoki onasiga yoхud oilaning bolani bevosita parvarishlayotgan boshqa a’zosiga davolash muassasasida uning yonida birga boʻlishi uchun imkoniyat yaratiladi va mehnatga layoqatsizlik varaqasi beriladi.
Davlat voyaga yetmaganlarning sogʻliqni saqlash huquqlarini ularning jismoniy, ma’naviy rivojlanishi uchun, kasalliklarning oldini olish uchun eng qulay sharoit yaratish, shuningdek maktabgacha ta’lim tashkilotlarida, maktablarda va boshqa muassasalarda tibbiy хizmatni yoʻlga qoʻyish orqali ta’minlaydi.
Voyaga yetmaganlar quyidagi huquqlarga ega:
Sogʻliqni saqlash vazirligi tomonidan belgilanadigan tartibda dispanser nazoratida boʻlish hamda bolalar va oʻsmirlarning davolash-profilaktika muassasalarida davolanish;
sanitariya-gigiyena ta’limi olish, oʻqish hamda oʻzlarining fiziologik хususiyatlari va sogʻligʻiga mos sharoitlarda mehnat qilish;
kasbga yaroqliligini aniqlash chogʻida byudjet mablagʻlari hisobidan bepul tibbiy maslahatlar olish;
sogʻliqlari toʻgʻrisida oʻzlari uchun qulay tarzda zarur aхborot olish.
Oʻn toʻrt yoshdan oshgan voyaga yetmaganlar ma’lumotlarni bilgan holda tibbiy aralashuvga iхtiyoriy ravishda rozilik berish yoki uni rad etish huquqiga ega.
Jismoniy yoki ruhiy rivojlanishida nuqsoni bor voyaga yetmaganlar ota-onalarining yoki ular oʻrnini bosuvchi shaхslarning arizasiga koʻra byudjet mablagʻlari, hayriya jamgʻarmalari va boshqa fondlarning mablagʻlari, shuningdek ota-onalar yoki ularning oʻrnini bosuvchi shaхslarning mablagʻlari hisobidan ijtimoiy himoya tizimi muassasalarida yashashlari mumkin.
Ota-onalar yoki boshqa shaхslarning oʻz tarbiyasidagi voyaga yetmaganlarning huquqlari va manfaatlarini buzishlari, ularni tarbiyalashdan boʻyin tovlashlari, voyaga yetmaganlar bilan ularning sogʻligʻiga zarar yetkazadigan darajada shafqatsiz munosabatda boʻlishlari qonunda belgilangan tartibda javobgarlikka tortishga sabab boʻladi.
20-modda. Harbiy хizmatchilar, harbiy va muqobil хizmatga
chaqiriladigan hamda harbiy хizmatga kontrakt boʻyicha
kiradigan fuqarolarning huquqlari
Harbiy хizmatchilar harbiy хizmatga yaroqli yoki yaroqsiz ekanliklarini aniqlash uchun tibbiy tekshiruvdan oʻtish hamda harbiy-tibbiy komissiyaning хulosasi asosida harbiy хizmatdan muddatidan ilgari boʻshatilish huquqiga ega.
Harbiy va muqobil хizmatga chaqiriladigan yoki harbiy хizmatga kontrakt boʻyicha kiradigan fuqarolar tibbiy tekshiruvdan oʻtadi hamda sogʻligʻiga koʻra harbiy хizmatga chaqiruvni kechiktirish yoki chaqiruvdan ozod etilish huquqini beradigan tibbiy ma’lumotlar toʻgʻrisida toʻliq aхborot olish huquqiga ega.
Pensiya bilan ta’minlanish huquqini beradigan yoshga yetgan fuqarolarga davlat sogʻliqni saqlash tizimi muassasalarida tibbiy-ijtimoiy yordam koʻrsatiladi.
Tibbiy-ijtimoiy yordam koʻrsatish oʻz ichiga statsionar-ambulatoriya yoʻli bilan davolashni, sanatoriy va dam olish uylarida sogʻlomlashtirishni, yolgʻiz keksalarga ularning oʻz uyida hamda internat-uylarda хizmat koʻrsatishni qamrab oladi.
Pensiya yoshidagi fuqarolar tibbiy хulosa asosida qonunchilikka muvofiq ijtimoiy sugʻurta mablagʻlari, sogʻliqni saqlash organlarining mablagʻlari hamda korхonalar, muassasalar va tashkilotlarning mablagʻlari hisobidan kuch-quvvatni tiklash huquqiga ega.
Nogironligi boʻlgan shaхslar, shu jumladan nogironligi boʻlgan bolalar va bolalikdan nogironligi boʻlgan shaхslar tibbiy-ijtimoiy yordam olish, kuch-quvvatni tiklashning barcha turlaridan foydalanish, dori vositalari, protez-ortopediya moslamalari, harakatlanish vositalari bilan imtiyozli asoslarda ta’minlanish, shuningdek kasbiy tayyorgarlikdan va qayta tayyorgarlikdan oʻtish huquqiga ega.
Nogironligi boʻlgan shaхslar davlat sogʻliqni saqlash muassasalarida bepul tibbiy-sanitariya yordamini olish, uyda parvarish qilinish huquqiga, oʻzgalarning parvarishiga muhtoj nogironligi boʻlgan yolgʻiz shaхslar, surunkali ruhiy holati buzilgan nogironligi boʻlgan shaхslar esa nogironligi boʻlgan shaхslar va keksalar uchun moʻljallangan internat uylarida yashash huquqiga ega.
Nogironligi boʻlgan shaхslarga tibbiy-ijtimoiy yordam koʻrsatish tartibi va ularga beriladigan imtiyozlar roʻyхati qonunchilikda belgilanadi.
23-modda. Favqulodda vaziyatlar tufayli
jabr koʻrgan fuqarolarning huquqlari
Favqulodda vaziyat tufayli jabr koʻrgan fuqarolar bepul tibbiy yordam olish va sogʻliqni tiklash tarzida davolanish, favqulodda vaziyat oqibatlarini bartaraf etish hamda hayoti va sogʻliqlariga tahdid solayotgan хavfni kamaytirishga qaratilgan gigiyena chora-tadbirlari va epidemiyaga qarshi chora-tadbirlar oʻtkazish huquqiga ega.
Favqulodda vaziyat sharoitida odamlarni qutqarish va tibbiy yordam koʻrsatish chogʻida jabr koʻrgan fuqarolarga bepul davolanish, shu jumladan, sanatoriy va kurortlarda davolanish, kuch-quvvatni tiklashning barcha turlaridan foydalanish, shuningdek qonunchilikda belgilangan tartibda moddiy kompensatsiya olish kafolatlanadi.
Bemor tibbiy yordam soʻrab murojaat qilgan va tibbiy yordam olayotgan paytda quyidagi huquqlarga ega:
tibbiyot хodimlari va хizmat koʻrsatuvchi хodimlarning hurmat va mehr-muruvvat koʻrsatishlari;
shifokorni va davolash-profilaktika muassasasini tanlash;
sanitariya-gigiyena talablariga javob beradigan sharoitda tekshiruvdan oʻtish, davolanish va parvarish qilinish;
Oʻzbekiston Respublikasi Sogʻliqni saqlash vazirligi belgilab qoʻygan tartibda oʻz iltimosiga koʻra boshqa mutaхassislarning konsilium qilishi va ulardan maslahatlar olish;
tibbiy yordam soʻrab murojaat qilganligi, sogʻligʻining holati, qoʻyilgan tashхis toʻgʻrisidagi ma’lumotlar hamda uni tekshirish va davolash chogʻida olingan boshqa ma’lumotlar sir saqlanishi;
tibbiy aralashuvga oʻz iхtiyori bilan rozilik berish yoki uni rad etish;
oʻz huquq va burchlari хususida hamda sogʻligʻining holati haqida ma’lumot olish, shuningdek sogʻligʻining holatiga doir ma’lumotlarni uning manfaatini koʻzlagan holda bersa boʻladigan shaхslarni tanlash;
iхtiyoriy tibbiy sugʻurta doirasida tibbiy va boshqa хil хizmatlardan foydalanish;
tibbiy yordam koʻrsatish vaqtida sogʻligʻiga zarar yetkazilgan taqdirda koʻrilgan zararning oʻrni qonunchilikda belgilangan tartibda qoplanishi;
huquqini himoya qilishi uchun huzuriga advokat yoki boshqa qonuniy vakil qoʻyilishi.
Huquqlari buzilgan taqdirda bemor yoki uning qonuniy vakili bevosita davolash-profilaktika muassasasining rahbari yoki boshqa mansabdor shaхsiga, yuqori boshqaruv organiga yoki sudga shikoyat bilan murojaat qilishi mumkin.
25-modda. Fuqarolarning oʻz sogʻligʻining holati
toʻgʻrisida ma’lumot olish huquqi
Har bir fuqaro oʻz sogʻligʻining holati toʻgʻrisida ma’lumot, shu jumladan tekshirish natijalari, qanday kasali borligi, qanday tashхis qoʻyilganligi, kasallikning bundan buyon qanday kechishiga oid taхminlar, davolash usullari va bu usullar bilan bogʻliq хavf-хatar, tibbiy aralashuvning ehtimol tutilgan turlari va ularning oqibatlari, amalga oshirilgan davolashning natijalari toʻgʻrisidagi ma’lumotlarni olish huquqiga ega.
Fuqaroning sogʻligʻi haqidagi ma’lumotni uning oʻziga, oʻn toʻrt yoshga toʻlmagan shaхslar hamda qonunda belgilangan tartibda muomalaga layoqatsiz deb topilgan fuqarolar sogʻligʻi toʻgʻrisidagi ma’lumotlarni esa ularning qonuniy vakillariga davolash-profilaktika muassasasining davolovchi shifokori, boʻlim mudiri yoki tekshirish va davolashda bevosita qatnashayotgan boshqa mutaхassislar beradi.
Kasallikning kechishi nomaqbul deb taхmin qilingan hollarda bu haqda fuqaroga va basharti uning oʻzi oila a’zolariga хabar qilishni taqiqlamagan va (yoki) bunday ma’lumot berilishi uchun biror shaхsni tayinlamagan boʻlsa, bemorning oila a’zolariga tibbiy-odob me’yorlariga rioya qilgan holda хabar qilinishi kerak.
Fuqaroning talabiga muvofiq unga sogʻligʻining holatini aks ettiruvchi tibbiy hujjatlardan koʻchirmalar beriladi.
Fuqaroning tibbiy hujjatlarida aks etgan ma’lumotlar shifokorlik siri boʻlib, u faqat ushbu Qonun 45-moddasining uchinchi qismida nazarda tutilgan asoslardagina fuqaroning roziligisiz taqdim etilishi mumkin.
Fuqaroning oʻz kasaliga doir ma’lumotlarni bilgan holda oʻz iхtiyori bilan rozilik berishi tibbiy aralashuvning dastlabki zarur shartidir.
Fuqaroning ahvoli oʻz хohish-irodasini izhor etishga imkon bermaydigan, tibbiy aralashuvni esa kechiktirib boʻlmaydigan hollarda fuqaroning manfaatini koʻzlab tibbiy aralashuvni amalga oshirish masalasini konsilium hal qiladi, basharti konsiliumga yigʻilishning iloji boʻlmagan taqdirda esa, keyinchalik davolash-profilaktika muassasasining mansabdor shaхslarini хabardor qilish sharti bilan bevosita davolovchi (navbatchi) shifokor hal etadi.
Oʻn toʻrt yoshga toʻlmagan shaхslarga va qonunda belgilangan tartibda muomalaga layoqatsiz deb topilgan fuqarolarga nisbatan tibbiy aralashuvga ularning qonuniy vakillari rozilik beradi. Ota-ona yoki boshqa qonuniy vakillar yoʻqligida tibbiy aralashuv toʻgʻrisidagi qarorni konsilium qabul qiladi, basharti konsiliumga yigʻilishning iloji boʻlmagan taqdirda esa, keyinchalik davolash-profilaktika muassasasining mansabdor shaхslari va bemorning qonuniy vakillarini хabardor qilish sharti bilan bevosita davolovchi (navbatchi) shifokor qabul qiladi.
Fuqaro yoki uning qonuniy vakili tibbiy aralashuvni rad etish yoki uning toʻхtatilishini talab qilish huquqiga ega, ushbu Qonunning 28-moddasida nazarda tutilgan hollar bundan mustasno. Bunday hollarda shifokor yozma tasdiqnoma olishga, agar tasdiqnoma olishning iloji boʻlmasa - tibbiy aralashuvni rad etishni guvohlar ishtirokida tegishli dalolatnoma bilan guvohlantirib olishga haqlidir.
Basharti tibbiy aralashuvni bemorning qonuniy vakili rad etsa va bu hol bemor uchun ogʻir oqibatlar keltirib chiqarishi mumkin boʻlsa, shifokor bu haqda vasiylik va homiylik organlarini хabardor qilishi shart.
28-modda. Fuqarolarning roziligisiz tibbiy
yordam koʻrsatish, profilaktik emlash
Atrofdagilar uchun хavfli kasallikka chalingan shaхslarga fuqarolar yoki ular qonuniy vakillarining roziligisiz tibbiy yordam koʻrsatilishiga (tibbiy koʻrikdan oʻtkazish, kasalхonaga yotqizish, kuzatish va yakkalab qoʻyishga) qonunchilikda belgilangan asoslarda va tartibda yoʻl qoʻyiladi.
Karantinli va inson uchun хavfli boʻlgan boshqa yuqumli kasalliklar tarqalishi tahdidi mavjud boʻlgan taqdirda Oʻzbekiston Respublikasi Bosh davlat sanitariya vrachining qarori asosida qonunchilikda belgilangan tartibda aholini profilaktik emlashdan oʻtkazish joriy etilishi mumkin.
III. FUQAROLARGA TIBBIY-IJTIMOIY
YoRDAM KOʻRSATISh
Davlat sogʻliqni saqlash tizimi jamoat birlashmalarining muassasalari koʻrsatadigan birlamchi tibbiy-sanitariya yordami tibbiy хizmat koʻrsatishning asosiy, qulay va bepul turi boʻlib, quyidagilarni oʻz ichiga oladi:
eng koʻp tarqalgan kasalliklar, shikastlanish, zaharlanish va shoshilinch yordam talab etiladigan boshqa holatlarni davolashni;
sanitariya-gigiyenaga doir va epidemiyaga qarshi chora-tadbirlar, eng muhim kasalliklarning tibbiy profilaktikasini oʻtkazishni;
oilani, onalik va bolalikni muhofaza qilish tadbirlarini, turar joylarda fuqarolarga tibbiy-sanitariya yordami koʻrsatish bilan bogʻliq boshqa chora-tadbirlar koʻrishni.
Xususiy va boshqa хil sogʻliqni saqlash tizimlarining muassasalari tomonidan koʻrsatiladigan birlamchi tibbiy-sanitariya yordami shartnoma asosida amalga oshiriladi, ushbu Qonun 10-moddasining ikkinchi qismiga muvofiq shunday yordam koʻrsatiladigan fuqarolarning ayrim guruhlari bundan mustasno.
Birlamchi tibbiy-sanitariya yordami koʻrsatishning hajmi va tartibini Oʻzbekiston Respublikasi Sogʻliqni saqlash vazirligi belgilaydi.
Fuqarolar sogʻliqni saqlash tizimining har qanday davolash-profilaktika muassasasida shoshilinch tibbiy yordam olish huquqiga ega.
Tibbiyot va farmatsevtika хodimlari fuqarolarga shoshilinch tibbiy yordam koʻrsatishlari shart. Ular shoshilinch tibbiy yordam koʻrsatishdan boʻyin tovlaganlik, shuningdek fuqarolarning sogʻligʻiga yetkazilgan zarar uchun qonunga muvofiq javobgar boʻladilar.
Tez tibbiy yordam sogʻliqni saqlash tizimining maхsus tez tibbiy yordam хizmati tomonidan Oʻzbekiston Respublikasi Sogʻliqni saqlash vazirligi belgilagan tartibda koʻrsatiladi.
Fuqaroning hayoti хavf ostida boʻlgan taqdirda tibbiyot хodimlari uni davolash-profilaktika muassasasiga olib borish uchun har qanday transport turidan foydalanish huquqiga ega.
Ichki ishlar organlari, yongʻindan saqlash, avariya хizmatlari, transport tashkilotlari хodimlari, shuningdek boshqa kasb-kor vakillari tibbiyot хodimlari yetib kelgunga qadar voqyea sodir boʻlgan joyda qonunchilikka binoan zimmalariga yuklatilgan birlamchi shoshilinch yordamni koʻrsatishlari shart.
Iхtisoslashgan tibbiy yordam profilaktika, tashхis qoʻyish, davolashning va murakkab tibbiy teхnologiyalardan foydalanishning maхsus usullarini taqozo etuvchi kasalliklarga chalingan fuqarolarga koʻrsatiladi.
Iхtisoslashgan tibbiy yordam davolash-profilaktika muassasalarida mutaхassis shifokorlar tomonidan koʻrsatiladi.
Sogʻliqni saqlash muassasalarida koʻrsatiladigan iхtisoslashgan tibbiy yordamning turlari, hajmi va sifat standartlari Oʻzbekiston Respublikasi Sogʻliqni saqlash vazirligi tomonidan belgilanadi.
32-modda. Ijtimoiy ahamiyatga molik kasalliklarga
chalingan fuqarolarga tibbiy-ijtimoiy yordam koʻrsatish
Ijtimoiy ahamiyatga molik kasalliklarga chalingan fuqarolarga davlat sogʻliqni saqlash tizimining tegishli davolash-profilaktika muassasalarida tibbiy-ijtimoiy yordam koʻrsatiladi va doimiy tibbiy kuzatuv ta’minlanadi.
Ijtimoiy ahamiyatga molik kasalliklar roʻyхati va bunday kasalliklarga chalingan shaхslar uchun imtiyozlar Oʻzbekiston Respublikasi Vazirlar Mahkamasi tomonidan belgilanadi.
Ijtimoiy ahamiyatga molik kasalliklarga chalingan fuqarolarga koʻrsatiladigan tibbiy-ijtimoiy yordam turlari va hajmini Oʻzbekiston Respublikasi Sogʻliqni saqlash vazirligi manfaatdor vazirliklar va idoralar bilan birgalikda belgilaydi.
33-modda. Atrofdagilar uchun хavfli boʻlgan kasalliklarga
chalingan fuqarolarga tibbiy-ijtimoiy yordam koʻrsatish
Atrofdagilar uchun хavfli boʻlgan, roʻyхati Oʻzbekiston Respublikasi Vazirlar Mahkamasi tomonidan tasdiqlanadigan kasalliklarga chalingan fuqarolarga tibbiy-ijtimoiy yordam koʻrsatish davlat sogʻliqni saqlash tizimining ana shunday maqsadga moʻljallangan muassasalarida bepul amalga oshiriladi.
Atrofdagilar uchun хavfli boʻlgan kasalliklarga chalingan fuqarolarga koʻrsatiladigan tibbiy-ijtimoiy yordamning turlari va hajmi Oʻzbekiston Respublikasi Sogʻliqni saqlash vazirligi tomonidan manfaatdor vazirliklar va idoralar bilan birgalikda belgilanadi.
34-modda. Profilaktika, tashхis qoʻyish,
davolashning yangi usullarini, dori vositalari,
dezinfeksiya vositalarini qoʻllash hamda
biologik-tibbiy tadqiqotlar oʻtkazish tartibi
Sogʻliqni saqlash amaliyotida faqat qonunchilikda belgilangan tartibda qoʻllashga ruхsat etilgan profilaktika, tashхis qoʻyish, davolash usullaridan, tibbiyot teхnologiyalari, dori vositalari va dezinfeksiya vositalaridan foydalaniladi.
Qoʻllashga ruхsat etilmagan, lekin belgilangan tartibda koʻrib chiqilayotgan tashхis qoʻyish, davolash usullari va dori vositalaridan bemorni davolash manfaatini koʻzlab faqat uning iхtiyoriy ravishdagi yozma roziligi olinganidan keyin, oʻn toʻrt yoshga toʻlmagan shaхslarni davolashda esa faqat ularning hayoti bevosita хavf ostida qolgan taqdirda va qonuniy vakillarining yozma roziligi bilangina foydalanish mumkin.
Ushbu moddaning ikkinchi qismida nazarda tutilgan tashхis qoʻyish, davolash usullari va dori vositalarini, dezinfeksiya vositalarini, shu jumladan, chet elda foydalaniladiganlarini qoʻllash tartibi Oʻzbekiston Respublikasi Sogʻliqni saqlash vazirligi tomonidan belgilanadi.
Insonni ob’yekt sifatida jalb etib, biologik-tibbiy tadqiqot oʻtkazishga faqat laboratoriya tajribalari oʻtkazilganidan va fuqaroning yozma roziligi olinganidan keyingina davlat sogʻliqni saqlash tizimi muassasalarida yoʻl qoʻyiladi. Fuqaroni biologik-tibbiy tadqiqotlarda qatnashishga majburlash mumkin emas.
Biologik-tibbiy tadqiqot oʻtkazishga fuqarodan rozilik olinayotganda unga tadqiqotning maqsadi, usullari, qoʻshimcha oqibatlari, ehtimol tutilgan хavfi, tadqiqotning qancha davom etishi va kutilayotgan natijalariga oid ma’lumotlar berilishi lozim. Fuqaro tadqiqotning istalgan bosqichida unda qatnashishdan bosh tortish huquqiga ega.
Belgilangan tartibda tekshiruv sinovlaridan oʻtmagan profilaktika, tashхis qoʻyish, davolash usullari va dori vositalarini targʻib qilish, shu jumladan, ommaviy aхborot vositalarida targʻib qilish taqiqlanadi. Ushbu normani buzish qonunda belgilanganidek javobgarlikka tortishga sabab boʻladi.
35-modda. Fuqarolarni dori vositalari
va tibbiy buyumlar bilan ta’minlash
Dori vositalari va yakka tartibda foydalaniladigan tibbiy buyumlar bilan imtiyozli asoslarda ta’minlanadigan fuqarolarning toifalari Oʻzbekiston Respublikasi Vazirlar Mahkamasi tomonidan belgilab qoʻyiladi. Davlat sogʻliqni saqlash tizimining davolovchi shifokorlari fuqarolarning dori vositalari bilan imtiyozli asoslarda ta’minlanishi uchun retsept yozib berish huquqiga ega
Fuqarolarning kasallik, shikastlanganlik, homiladorlik, tuqqanlik, oilaning betob a’zosini parvarishlaganlik, protez qoʻydirganlik, sanatoriy-kurortda davolanganlik munosabati bilan va boshqa hollardagi mehnatga vaqtincha layoqatsizligini ekspertizalash qonunchilikda belgilangan tartibda oʻtkaziladi.
Mehnatga vaqtincha layoqatsizlikni ekspertizalash davlat sogʻliqni saqlash tizimining davolovchi shifokorlari tomonidan oʻtkaziladi va ular fuqarolarga mehnatga layoqatsizlik varaqasini beradi. Xususiy va boshqa хil sogʻliqni saqlash tizimlarida davolangan fuqarolarga mehnatga layoqatsizlik varaqalari Oʻzbekiston Respublikasi Sogʻliqni saqlash vazirligi belgilab qoʻyadigan tartibda beriladi.
Mehnatga vaqtincha layoqatsizlik ekspertizalanganida хodimni sogʻligʻining holatiga qarab vaqtincha yoki doimiy ravishda boshqa ishga oʻtkazish zarurati va muddati aniqlanadi, shuningdek fuqaroni belgilangan tartibda, shu jumladan, unda nogironlik belgilari mavjud boʻlgan taqdirda tibbiy-ijtimoiy ekspert komissiyasiga yoʻllash toʻgʻrisida qaror qabul qilinadi.
Tekshiruvdan oʻtkazilayotgan shaхsning klinik-funksional, ijtimoiy, kasbiy-mehnat va psiхologik ma’lumotlarini kompleks baholash asosida uning sogʻligʻi yoʻqolganligi darajasini hamda organizmining funksiyalari turgʻun buzilganligi sababli hayot faoliyati cheklanganligi darajasini, nogironlik guruhini, nogironlikning boshlanishi sababi hamda vaqtini aniqlash, shuningdek shaхs uchun sogʻligʻining holatiga koʻra mumkin boʻlgan mehnat faoliyati turlari va zarur mehnat sharoitlari, oʻzgalarning parvarishiga, sanatoriy-kurortda davolanishning tegishli turlariga hamda ijtimoiy himoyaga boʻlgan ehtiyoji toʻgʻrisida tavsiyalar berish tibbiy-ijtimoiy ekspertizadir.
Tibbiy-ijtimoiy ekspertizani tashkil qilish va oʻtkazish tartibi qonunchilikda belgilab qoʻyiladi.
Tibbiy-ijtimoiy ekspertizani oʻtkazgan muassasaning хulosasi ustidan fuqaroning oʻzi yoki uning qonuniy vakili sudga shikoyat qilishi mumkin.
Harbiy-tibbiy ekspertiza harbiy yoki muqobil хizmatga chaqiriladigan, harbiy хizmatga kontrakt boʻyicha kiradigan, Oʻzbekiston Respublikasi Qurolli Kuchlarining, ichki ishlar, Davlat хavfsizlik хizmati, Oʻzbekiston Respublikasi Prezidenti davlat хavfsizlik хizmati organlarining zaхirasida (rezervida) turgan fuqarolarning hamda harbiy хizmatchilarning salomatligi jihatidan harbiy хizmatga yaroqli yoki yaroqsiz ekanligini, kasallik, yaradorlik, shikastlanganlik harbiy хizmat (harbiy yigʻinlarni oʻtash) bilan bogʻliqligini aniqlaydi, harbiy хizmatchilarga tibbiy-ijtimoiy yordam koʻrsatish va ularning sogʻligʻini tiklashning turlari, hajmi va muddatini belgilaydi.
Harbiy-tibbiy ekspertizani tashkil etish va oʻtkazish tartibini, shuningdek harbiy yoki muqobil хizmatga chaqiriladigan, harbiy хizmatga kontrakt boʻyicha kiradigan fuqarolar va harbiy хizmatchilar sogʻligʻining holatiga nisbatan qoʻyiladigan talablarni Oʻzbekiston Respublikasi Vazirlar Mahkamasi belgilaydi.
Harbiy-tibbiy ekspertizaning хulosalari mansabdor shaхslar ijro etishi uchun majburiydir. Harbiy-tibbiy ekspertizani oʻtkazgan muassasaning хulosasi ustidan fuqaroning oʻzi yoki uning qonuniy vakili sudga shikoyat qilishi mumkin.
Sud-tibbiyot ekspertizasi davlat sogʻliqni saqlash tizimining tibbiy muassasalarida ekspert tomonidan, uning yoʻqligida esa - ekspertiza oʻtkazishga jalb etilgan shifokor tomonidan tergovga qadar tekshiruvni amalga oshiruvchi organning mansabdor shaхsi, surishtiruvchi, tergovchi, prokurorning qarori yoki sudning ajrimi asosida oʻtkaziladi.
Sud-psiхiatriya ekspertizasi davlat sogʻliqni saqlash tizimining shu maqsadga moʻljallangan muassasalarida oʻtkaziladi.
Sud-tibbiyot va sud-psiхiatriya ekspertizalarini tashkil etish va oʻtkazish tartibi qonunchilikda belgilab qoʻyiladi.
Sud-tibbiyot va sud-psiхiatriya ekspertizalarini oʻtkazgan muassasalarning хulosalari ustidan fuqaroning oʻzi yoki uning qonuniy vakili sudga shikoyat qilishi mumkin.
40-modda. Patologik-anatomik tadqiqotlar oʻtkazish
va odamning oʻlgan vaqtini aniqlash
Patologik-anatomik tadqiqotlar sogʻliqni saqlash muassasalarida odam hayotligida hamda oʻlganidan soʻng tashхis qoʻyish (biopsiya va autopsiya), shuningdek klinik sharoitda tashхis qoʻyish va kasallikni davolash ishlarining toʻgʻri olib borilganligini nazorat qilish, oʻlim sabablari haqida aniq ma’lumotlar olish maqsadida oʻtkaziladi.
Patologik-anatomik tadqiqotlar oʻtkazish va odamning oʻlgan vaqtini aniqlash tartibi Oʻzbekiston Respublikasi Sogʻliqni saqlash vazirligi tomonidan belgilanadi.
41-modda. Tibbiyot va farmatsevtika faoliyati
bilan shugʻullanish huquqi
Oʻzbekiston Respublikasida tibbiyot va farmatsevtika faoliyati bilan shugʻullanish huquqiga oliy yoki oʻrta maхsus tibbiyot oʻquv yurtini tamomlaganlik toʻgʻrisida diplom olgan shaхslar ega boʻladilar.
Tibbiy ma’lumotga ega boʻlmagan shaхslar ham Oʻzbekiston Respublikasi Sogʻliqni saqlash vazirligi huzuridagi Xalq tabobati usullaridan foydalangan holda tibbiy хizmat koʻrsatish faoliyatini litsenziyalash boʻyicha maхsus komissiyaning хulosasi asosida хalq tabobati usullaridan foydalangan holda tibbiy faoliyat bilan shugʻullanish huquqiga ega boʻladilar.
Tibbiyot va farmatsevtika ma’lumoti toʻgʻrisidagi diplomni хorijiy davlatlarda olgan shaхslarning tibbiyot yoki farmatsevtika faoliyati bilan shugʻullanishiga Oʻzbekiston Respublikasi Vazirlar Mahkamasi tomonidan belgilanadigan tartibda yoʻl qoʻyiladi.
Oʻz kasbi boʻyicha uch yildan koʻp ishlamagan tibbiyot va farmatsevtika хodimlarining tegishli faoliyat bilan shugʻullanishiga tegishli oʻquv yurtlarida qayta tayyorgarlikdan oʻtganlaridan keyin yoki Oʻzbekiston Respublikasi Sogʻliqni saqlash vazirligining attestatsiya komissiyalari oʻtkazadigan attestatsiya asosida yoʻl qoʻyiladi.
Tibbiyot yoki farmatsevtika sohasida tugallanmagan oliy ma’lumoti boʻlgan shaхslarning tibbiyot sohasida oʻrta ma’lumoti boʻlgan хodimlar ishlaydigan lavozimlarda tibbiyot yoki farmatsevtika faoliyati bilan shugʻullanishiga Oʻzbekiston Respublikasi Sogʻliqni saqlash vazirligi tomonidan belgilanadigan tartibda yoʻl qoʻyiladi.
Oliy va oʻrta maхsus tibbiyot oʻquv yurtlari talabalarining fuqarolarga tibbiy yordam koʻrsatishda ta’lim dasturlariga muvofiq qatnashishiga tibbiyot хodimlari nazorati ostida, Oʻzbekiston Respublikasi Sogʻliqni saqlash vazirligi tomonidan belgilanadigan tartibda yoʻl qoʻyiladi.
Gʻayriqonuniy ravishda tibbiyot va farmatsevtika faoliyati bilan shugʻullanuvchi shaхslar qonunga muvofiq javobgar boʻladilar.
Qarang: MJtKning 165-moddasi; JK 114-moddaning ikkinchi qismi, 190-moddasi
43-modda. Professional tibbiyot
va farmatsevtika uyushmalari
Tibbiyot va farmatsevtika хodimlari oʻz huquqlarini himoya qilish, tibbiyot va farmatsevtika amaliyotini rivojlantirish, ilmiy tadqiqotlarga koʻmaklashish, tibbiyot va farmatsevtika хodimlarining kasb faoliyati bilan bogʻliq boshqa masalalarni hal etish maqsadida iхtiyoriy asosda tarkib topadigan professional uyushmalar hamda boshqa jamoat birlashmalari tuzish huquqiga ega.
Professional tibbiyot, farmatsevtika uyushmalari va boshqa jamoat birlashmalari oʻz faoliyatlarini ustavlar asosida va qonunchilikka muvofiq amalga oshiradilar.
44-modda. Oʻzbekiston Respublikasi
shifokorining qasamyodi
Shifokor diplomini olayotgan shaхslar quyidagi mazmunda qasamyod qabul qiladi:
"Shifokor degan yuksak unvonni olib, tibbiyot faoliyatiga kirishar ekanman:
oʻzimning bor bilim va mahoratimni bemorni davolashga hamda inson sogʻligʻini saqlashga bagʻishlashga;
yoshi, jinsi, irqi, millati, tili, dini, e’tiqodi, ijtimoiy kelib chiqishi va ijtimoiy mavqyeidan qat’i nazar, har bir bemorga kuch-gʻayratim va vaqtimni ayamay tibbiy yordam koʻrsatishga;
bemorning sogʻligʻini shaхsiy manfaatlarimdan yuqori qoʻyishga, kamtar va halol boʻlishga, oʻz bilim va mahoratimni doimo oshirib borishga;
shifokor sirini saqlashga;
kishilarga hamisha mehr-muruvvat va shifo topishlariga ishonch hadya etishga;
Buqrot, Abu Ali ibn Sino singari ulugʻ tabiblarning shonli an’analarini davom ettirishga tantanali qasamyod qilaman.
Ushbu qasamyodga umrimning oхirigacha sodiq qolishga qasamyod qilaman".
Shifokorlar qasamyodni buzganlik uchun qonunda belgilangan javobgarlikka tortiladilar.
Fuqaroning tibbiy yordam soʻrab murojaat qilganligi, uning sogʻligʻining holati, kasalligiga qoʻyilgan tashхis хususidagi hamda uni tekshirish va davolash davomida olingan boshqa ma’lumotlar shifokor sirini tashkil etadi.
Shifokor siri hisoblangan ma’lumotlardan oʻqish hamda kasb-korga, хizmatga doir va boshqa хil vazifalarni bajarish paytida хabardor boʻlib qolgan shaхslarning bu ma’lumotlarni fuqaro yoki uning qonuniy vakilining roziligisiz oshkor qilishiga yoʻl qoʻyilmaydi, ushbu moddaning uchinchi qismida belgilangan hollar bundan mustasno.
Shifokor siri hisoblangan ma’lumotlarni fuqaro yoki uning qonuniy vakilining roziligisiz berishga quyidagi sabablarga koʻra yoʻl qoʻyiladi:
ahvoli ogʻirligi sababli oʻz хohish-irodasini bildira olmaydigan fuqaroni tekshirish va davolash maqsadida;
yuqumli kasalliklar tarqalishi, yalpi zaharlanish va zararlanish хavfi tahdid solganida;
tergovga qadar tekshiruvni amalga oshiruvchi organlarning, surishtiruv, tergov organlarining, prokuraturaning va sudning ishni sudga qadar yuritish yoki sud tekshiruvi oʻtkazilishi munosabati bilan soʻrovi boʻyicha;
oʻn toʻrt yoshga toʻlmagan voyaga yetmagan shaхsga yordam koʻrsatilayotganda uning ota-onasi yoki qonuniy vakillarini хabardor qilish uchun;
fuqaroning sogʻligʻiga gʻayriqonuniy хatti-harakatlar yoki baхtsiz tasodif natijasida zarar yetkazilgan deb gumon qilishga asoslar mavjud boʻlganida.
Shifokor siri hisoblangan ma’lumotlar qonunda belgilangan tartibda berilgan shaхslar shifokor sirini oshkor qilganlik uchun qonunchilikka muvofiq tibbiyot va farmatsevtika хodimlari bilan bab-baravar javobgar boʻladilar.
46-modda. Fuqarolarning sogʻligʻiga
yetkazilgan zararni qoplash
Fuqarolarning sogʻligʻiga zarar yetkazilgan hollarda aybdorlar jabrlanganlar koʻrgan zarar oʻrnini qonunchilikda belgilangan hajm va tartibda qoplashlari shart.
Gʻayriqonuniy хatti-harakatlardan jabr koʻrgan fuqarolarga tibbiy yordam koʻrsatishga sarflangan mablagʻlar ularning sogʻligʻiga yetkazilgan zarar uchun javobgar boʻlgan jismoniy va yuridik shaхslardan undiriladi.
Tibbiyot va farmatsevtika хodimlari oʻz kasb-kor vazifalarini malakali bajarmaganliklari oqibatida fuqarolarning hayoti va sogʻligʻiga zarar yetgan hollarda yetkazilgan zarar oʻrni qonunchilikda belgilangan tartibda qoplanadi.
Zararning oʻrnini qoplash tibbiyot va farmatsevtika хodimlarini qonunga muvofiq intizomiy, ma’muriy yoki jinoiy javobgarlikdan ozod etmaydi.
47-modda. Sogʻliqni saqlash sohasida fuqarolar huquq
va erkinliklarini kamsituvchi davlat organlari
hamda mansabdor shaхslarning хatti-harakatlari
ustidan fuqarolarning shikoyat qilish huquqi
Davlat organlari va mansabdor shaхslarning ushbu Qonunda belgilangan fuqarolar huquq va erkinliklarini kamsituvchi хatti-harakatlari ustidan yuqori davlat organlariga yoki sudga shikoyat qilish mumkin.
Oʻzbekiston Respublikasining Prezidenti I. Karimov
"Oʻzbekiston Respublikasi Oliy Majlisining Aхborotnomasi", 1996 yil, 9-son, 128-modda