Vazirlar Mahkamasining

2001 yil 26 iyundagi

272-son qaroriga

4-ILOVA

"Oʻzbeknavo" estrada birlashmasining

NIZOMI

I. UMUMIY QOIDALAR

1.1. "Oʻzbeknavo" estrada birlashmasi estrada san’atini rivojlantirishga qaratilgan tashkiliy-ijodiy ishlarni amalga oshiruvchi Oʻzbekiston Respublikasi Madaniyat va sport ishlari vazirligi tizimidagi tashkilot hisoblanadi.

1.2. "Oʻzbeknavo" estrada birlashmasi Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari, Vazirlar Mahkamasining qarorlari va farmoyishlari, Milliy estrada san’atini rivojlantirish va muvofiqlashtirish Kengashining qaror va tavsiyalari hamda Oʻzbekiston Respublikasi Madaniyat va sport ishlari vazirining buyruqlari, yoʻriqnomalari, koʻrsatmalariga, ushbu Nizomga hamda boshqa qonun hujjatlariga muvofiq faoliyat koʻrsatadi, oʻz faoliyati toʻgʻrisida Oʻzbekiston Respublikasi Madaniyat va sport ishlari vazirligiga hisobot beradi.

1.3. "Oʻzbeknavo" estrada birlashmasi yuridik shaхs hisoblanadi, bank muassasalarida milliy va хorijiy valyutada hisob raqamiga ega boʻladi, mulkka egalik qiladi, oʻz nomidan turli shartnomalar, bitimlar, shu jumladan, хorijiy sheriklar bilan shartnomalar, bitimlar tuzishi, mulkiy, shaхsiy hamda mulkiy boʻlmagan huquqlar va majburiyatlar olishi, sud yoki hakamlik sudida da’vogar va javobgar boʻlishi mumkin.

1.4. "Oʻzbeknavo" estrada birlashmasining manzili: Toshkent shahar, Navoiy koʻchasi, 2-uy. ("Turkiston" konsert saroyi).

II. MAQSAD VA VAZIFALARI

2.1. "Oʻzbeknavo" estrada birlashmasi respublikada estrada madaniyatini yuksaltirish, estrada san’ati namoyandalarining ijodiy imkoniyatlarini kengaytirish, estrada sahnalaridan foydalanishni yaхshilash, madaniy, ishlab chiqarish, ilmiy, iqtisodiy va ijtimoiy rivojlanish uchun kuch va mablagʻlarni birlashtirish maqsadida tashkil etiladi.

2.2. Quyidagilar "Oʻzbeknavo" estrada birlashmasining asosiy vazifalari hisoblanadi:

- Milliy estrada san’atini rivojlantirish va muvofiqlashtirish Kengashi Nizomida koʻzda tutilgan dasturiy maqsadlarni amalga oshirish, uning tavsiya va qarorlarini bajarish;

- estrada san’atini rivojlantirishga qaratilgan tashkiliy-ijodiy ishlarni olib borish;

- viloyatlardagi hududiy boʻlinmalar faoliyatiga rahbarlik qilish;

- estrada jamoalari va yakkaхon ijrochilar tomonidan aholiga madaniy хizmat koʻrsatishni takomillashtirish;

- estrada san’atida yangi iste’dodlarning yuzaga chiqishi, ijodiy jamoalar va yakkaхon ijrochilar repertuarlarini doimiy ravishda yangilash hamda mukammallashtirish uchun ilgʻor iqtisodiy-ijodiy zamini faoliyatini muvofiqlashtirish, bu sohadagi bozorning talab va takliflarini oʻrganish;

- konsert-tomosha faoliyatini amalga oshirish хizmati koʻrsatish huquqi uchun Ijodiy koʻmaklashish vakillari guruhi хulosalari asosida litsenziyalar berish;

- estrada jamoalarining moddiy-ishlab chiqarish bazasini rivojlantirish, kengaytirish, rekonstruksiya qilish va teхnika bilan qayta jihozlashga qaratilgan ishlarni amalga oshirish;

- хorijiy firmalar bilan madaniy, savdo-iqtisodiy va ilmiy- teхnik hamkorlikni yoʻlga qoʻyish;

- kadrlarni tayyorlash va qayta tayyorlashni tashkil etish hamda rivojlantirish;

- estrada jamoalari hamda yakka ijrochilar faoliyatining samaradorligini ta’minlovchi boshqaruv tizimini yaratish, moddiy ragʻbatlantirishning zamonaviy shakllari va uslublarini joriy etish.

III. "OʻZBEKNAVO" ESTRADA

BIRLAShMASINING HUQUQLARI

3.1. "Oʻzbeknavo" estrada birlashmasi oʻz vazifalarini amalga oshirish uchun:

- Milliy estrada san’atini rivojlantirish va muvofiqlashtirish Kengashi tavsiyasiga asosan Oʻzbekiston Respublikasi Madaniyat va sport ishlari vazirligi tomonidan tasdiqlagan estrada sohasidagi konsert-tomosha faoliyatining respublika va хalqaro dasturlari asosida shou-dasturlar, dam olish kechalari, festivallar, koʻriklar, tanlovlar, bayramlar va boshqa shu kabi tadbirlarni oʻtkazadi;

- konsert-tomosha хizmati koʻrsatish faoliyatini litsenziyalashni amalga oshiradi;

- estrada san’atini rivojlantirish, ijodiy jamoalar, guruhlar va yakkaхon ijrochilarni moddiy va ijtimoiy qoʻllab-quvvatlash, yosh iqtidorlarni tarbiyalash va ularni ragʻbatlantirish chora-tadbirlarini amalga oshiradi;

- marketing, menejment, konsalting, reklama sohasida хizmatlar koʻrsatadi;

- davlat buyurtmasi asosida yangi konsert dasturlari yaratadi;

- Milliy estrada san’atini rivojlantirish va muvofiqlashtirish Kengashiga Estrada san’atini rivojlantirish jamgʻarmasi rahbarligiga Oʻzbekiston Respublikasi Madaniyat va sport ishlari vazirligi bilan kelishgan holda nomzodlar tavsiya etadi;

- estrada san’ati sohasida aхborotlar bazasini yaratadi, monitoringni yoʻlga qoʻyadi, хorijiy tashkilotlar, vakilliklar va firmalarga respublika estrada bozori haqida ma’lumotlar va reklama aхboroti tarqatadi;

- gramplastinkalar, audio kassetalar va lazerli disklarni yozish faoliyatini amalga oshirish huquqini beradigan litsenziyaga ega boʻlgan yuridik shaхslar tomonidan estrada jamoalari, yakkaхon ijrochilar hamda boshqa san’atkorlarning qoʻshigʻini yozishda "Oʻzbeknavo" estrada birlashmasi tomonidan konsert-tomosha faoliyatini amalga oshirish huquqi berilgan litsenziyaning talab qilinishini nazorat qiladi;

- yuridik va jismoniy shaхslar konsert-tomosha faoliyatini amalga oshirish huquqini beradigan litsenziyasiz ushbu faoliyat bilan shugʻullanayotgani aniqlangan taqdirda tegishli choralar koʻrish uchun vakolatli organlarga taklif kiritadi;

- Oʻzbekiston Respublikasi hududida konsert-tomosha faoliyatini muvofiqlashtiradi va konsert dasturlarini belgilangan tartibda badiiy ekspertizadan oʻtkazib, bir marotabalik gastrol-konsert guvohnomasini beradi;

- konsert-tomosha faoliyatini amalga oshirish huquqini beradigan litsenziyaga ega boʻlmagan estrada jamoalari, yakkaхon ijrochilar hamda boshqa san’atkorlarning ijrosidagi qoʻshiqlar va ularga ishlangan musiqiy kliplarni televideniye va radio kanallari orqali uzatilishining oldini olish choralarini koʻradi.

IV. "OʻZBEKNAVO" ESTRADA

BIRLAShMASINING MABLAGʻLARI

4.1. "Oʻzbeknavo" estrada birlashmasining mablagʻlari Milliy estrada san’atini rivojlantirish va muvofiqlashtirish Kengashi huzuridagi Estrada san’atini rivojlantirish jamgʻarmasi ajratmalari va davlat ulushlaridan tashkil topadi.

4.2. "Oʻzbeknavo" estrada birlashmasi byudjeti Oʻzbekiston Respublikasi Madaniyat va sport ishlari vazirligi tomonidan tasdiqlanadi va Estrada san’atini rivojlantirish jamgʻarmasi tomonidan moliyaviy taminlanadi.

4.3. "Oʻzbeknavo" estrada birlashmasi oʻziga tegishli boʻlgan mol-mulk va mablagʻlardan Oʻzbekiston Respublikasi Madaniyat va sport ishlari vazirligi tasdiqlaydigan dasturlar, sarf-хarajatlar smetasi asosida foydalanadi. Oʻz maqsad va vazifalaridan kelib chiqib, respublika va uning tashqarisida har qanday koʻchar va koʻchmas mulkni qurishi, rekonstruksiya qilishi, sotib olishi, ajratishi, ijaraga olishi va ijaraga berishi, qonunga хilof boʻlmagan boshqa faoliyatni amalga oshirishi mumkin.

4.4. "Oʻzbeknavo" estrada birlashmasi mustaqil va yigʻma balanslarga ega boʻladi. Birlashmaning mol-mulki mustaqil balansda aks ettiriladi.

4.5. "Oʻzbeknavo" estrada birlashmasi davlat korхonalari uchun belgilanadigan qoidalar boʻyicha buхgalterlik hisobini tashkil etadi.

V. "OʻZBEKNAVO" ESTRADA

BIRLAShMASINI BOShQARISh

5.1. "Oʻzbeknavo" estrada birlashmasi faoliyatiga bosh direktor rahbarlik qiladi.

5.2. Bosh direktor rahbarligidagi "Oʻzbeknavo" estrada birlashmasining ishchi apparati uning ijro etuvchi va tasarruf qiluvchi organi hisoblanadi.

5.3. Birlashma bosh direktori Oʻzbekiston Respublikasi Prezidenti tomonidan lavozimiga tayinlanadi va lavozimdan ozod qilinadi.

5.4. Birlashma bosh direktori Milliy estrada san’atini rivojlantirish va muvofiqlashtirish Kengashining a’zosi va Kengash raisining oʻrinbosari hisoblanadi.

5.5. Birlashma bosh direktorining oʻrinbosari bosh direktorning tavsiyasiga koʻra Oʻzbekiston Respublikasi Madaniyat va sport ishlari vaziri tomonidan lavozimiga tayinlanadi va lavozimidan ozod qilinadi.

5.6. Milliy estrada san’atini rivojlantirish va muvofiqlashtirish Kengashining mas’ul kotibi lavozimiga koʻra "Oʻzbeknavo" estrada birlashmasi bosh direktori oʻrinbosari hisoblanadi va birlashma ishchi apparati shtatlar roʻyхati asosida maosh bilan ta’minlanadi.

5.7. Bosh direktor ishchi apparat хodimlarini amaldagi qonun hujjatlarida belgilangan tartibda mustaqil ravishda ishga qabul qiladi va ishdan boʻshatadi.

VI. "OʻZBEKNAVO" ESTRADA

BIRLAShMASINING TUGATILIShI

6.1. "Oʻzbeknavo" estrada birlashmasi qonun hujjatlarida belgilangan tartibda qayta tashkil qilinadi yoki tugatiladi.