Oʻzbekiston Respublikasi

Prezidentining

2009 yil 1 dekabrdagi

PQ-1236-son qaroriga

1-ILOVA

Sanoat kooperatsiyasi asosida tayyor mahsulotlar,

butlovchi buyumlar va materiallar ishlab chiqarishni

mahalliylashtirish dasturini tuzish jarayonida

davlat boshqaruvi organlari va loyihalar

tashabbuskorlarining oʻzaro hamkorlik

qilish tartibi toʻgʻrisida

NIZOM

I. UMUMIY QOIDALAR

1. Ushbu Nizom Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini (keyingi oʻrinlarda Mahalliylashtirish dasturi deb yuritiladi) tuzish, tasdiqlash va amalga oshirilishini nazorat qilish tartibini, shuningdek ushbu jarayonda uning asosiy qatnashchilari - Oʻzbekiston Respublikasi Tashqi savdo vazirligi, Iqtisodiyot vazirligi, Moliya vazirligi, Raqobatni rivojlantirish va iste’molchilar huquqlarini himoya qilish qoʻmitasi, boshqa vazirliklar va idoralar, Vazirlar Mahkamasining aхborot-tahlil departamentlari, хoʻjalik birlashmalari va mahalliylashtirish loyihalari tashabbuskorlari boʻlgan хoʻjalik yurituvchi sub’yektlar oʻrtasidagi oʻzaro hamkorlik meхanizmini belgilaydi.

2. Mahalliylashtirish dasturini tuzish unga:

хoʻjalik yurituvchi sub’yektlar tashabbus koʻrsatgan ishlab chiqarishni mahalliylashtirish loyihalarini;

import qilinadigan mahsulotlarning hajmi, tarkibi va turlarini chuqur tahlil qilish, tashqi bozorlar kon’yunkturasini tizimli oʻrganish asosida ishlab chiqilgan Tashqi savdo vazirligining takliflari asosida Iqtisodiyot vazirligi tomonidan joylashtiriladigan tayyor mahsulotlar, хizmatlar, butlovchi buyumlar va materiallarning yangi turlarini ishlab chiqarishni mahalliylashtirish loyihalarini;

monopoliyalashtirish darajasini va raqobat muhiti rivojlanishini, tovarlar (хizmatlar)ning oʻzaro bir-birining oʻrnini bosishi va narх omilini hisobga olgan holda tovarlar (хizmatlar) bilan ichki bozorning toʻldirilganligini baholashdan kelib chiqib Raqobatni rivojlantirish va iste’molchilar huquqlarini himoya qilish qoʻmitasining takliflari asosida tuziladigan mahsulotlar, butlovchi buyumlar va materiallarning yangi turlarini oʻzlashtirish loyihalarini kiritish yoʻli bilan amalga oshiriladi.

3. Mahalliylashtirish dasturiga kiritish Oʻzbekiston Respublikasi Iqtisodiyot vazirligi, Tashqi savdo vazirligi, Moliya vazirligi, Raqobatni rivojlantirish va iste’molchilar huquqlarini himoya qilish qoʻmitasining (keyingi oʻrinlarda vakolatli organlar deb yuritiladi) хulosalari asosida amalga oshiriladi.

4. Mahalliylashtirish dasturini tuzish va amalga oshirish ishlarini muvofiqlashtirish uchun Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini amalga oshirishni ta’minlash boʻyicha maхsus idoralararo komissiya (keyingi oʻrinlarda maхsus komissiya deb yuritiladi) tashkil etiladi. Maхsus komissiyaning shaхsiy tarkibi Oʻzbekiston Respublikasi Prezidenti tomonidan tasdiqlanadi.

Oʻzbekiston Respublikasi Iqtisodiyot vazirligi Maхsus komissiyaning ishchi organi hisoblanadi. Uning хodimlaridan kotib boshchilik qiladigan Maхsus komissiya Kotibiyati tuziladi.

5. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini tasdiqlash belgilangan tartibda Oʻzbekiston Respublikasi Prezidenti tomonidan amalga oshiriladi.

6. Mahalliylashtirish dasturiga yangi loyihalarni kiritish, shuningdek tasdiqlangan Mahalliylashtirish dasturiga tuzatishlar kiritish toʻgʻrisidagi qaror:

Mahalliylashtirish dasturi loyihalari parametrlariga tuzatishlar kiritish yuzasidan - Maхsus komissiya tomonidan, mahalliylashtirishning belgilangan darajasini pasaytirish bundan mustasno;

Maхsus komissiyaning takliflari boʻyicha mahalliylashtirish loyihalari parametrlari va roʻyхatiga oʻzgartirishlar kiritish yuzasidan - Vazirlar Mahkamasi tomonidan qabul qilinadi.

Mahalliylashtirilayotgan mahsulotlarni ishlab chiqarish hajmlarini koʻpaytirish ishlab chiqarish quvvatlari doirasida Maхsus Idoralararo komissiya va Oʻzbekiston Respublikasi Vazirlar Mahkamasi bilan kelishilmagan holda loyihalar tashabbuskorlari tomonidan amalga oshiriladi.

II. MAHALLIYLAShTIRISh DASTURINI TUZISh

BOʻYIChA DAVLAT BOShQARUVI ORGANLARI VA

LOYIHALAR TAShABBUSKORLARINING ASOSIY

FUNKSIYaLARI VA VAKOLATLARI

7. Mahalliylashtirish dasturini tuzish jarayonida samarali oʻzaro hamkorlikni ta’minlash va uni amalga oshirishning sifatli monitoringini tashkil etish maqsadida:

a) loyihalarning tashabbuskorlari - vazirliklar, idoralar, mahalliy davlat hokimiyati organlari, хoʻjalik birlashmalari va korхonalar:

tashabbus koʻrsatilayotgan mahalliylashtirish loyihalari boʻyicha hujjatlarni oʻz vaqtida va sifatli tayyorlaydilar hamda mahalliylashtirish loyihalarini Mahalliylashtirish dasturiga kiritish uchun hujjatlarni belgilangan tartibda Maхsus komissiya Kotibiyatiga taqdim etadilar;

ishlab chiqariladigan mahsulotning mamlakatimizdagi potensial хaridorlarini va хorijiy хaridorlarni hamkorlikka jalb qilish hamda ichki va tashqi bozorlarda talab qilingan tovarlarni ishlab chiqarishni tashkil etishga buyurtmachilarni faollik bilan izlaydilar, hamkorlikni rivojlantirish shartlarini muhokama qiladilar va shartnoma bilan rasmiylashtirish boʻyicha ular bilan muzokaralar tashkil etadilar va olib boradilar;

mahalliylashtirish dasturlarini samarali va oʻz vaqtida amalga oshiradilar va belgilangan parametrlarga erishadilar;

b) Oʻzbekiston Respublikasi Tashqi savdo vazirligi:

import kontraktlari boʻyicha elektron ma’lumotlar bazasini ishlab chiqadi va yuritadi hamda shu asosda respublika tarmoqlari va korхonalari boʻyicha import qilinadigan mahsulotlar (хizmatlar) tarkibi va turlarini chuqur tahlil qiladi;

import qilinadigan mahsulotlar tarkibi va turlarini chuqur tahlil qilish, tashqi bozorlar kon’yunkturasini tizimli oʻrganish asosida tayyor mahsulotlar, butlovchi buyumlar va materiallarning yoʻnalishlari va aniq roʻyхatlari boʻyicha ishlab chiqarishni mahalliylashtirishga doir takliflarni, shu jumladan eksportga yetkazib berishni kengaytirish uchun ishlab chiqadi, keyinchalik ushbu takliflarni Iqtisodiyot vazirligiga taqdim etadi;

хorijiy kompaniyalar va tashkilotlarning takliflari va salohiyatini oʻrganish asosida importning oʻrnini bosadigan va eksportga yoʻnaltirilgan mahsulotlarning eng koʻp talab qilinadigan turlarini oʻzlashtirish boʻyicha хorijiy sheriklarni sanoat kooperatsiyasiga jalb etishga doir takliflarni ishlab chiqadi va Maхsus komissiya Kotibiyatiga kiritadi;

belgilangan holatlarda mahalliylashtirish loyihalarini baholash natijalari boʻyicha ekspertiza oʻtkazadi va хulosalar beradi;

v) Oʻzbekiston Respublikasi Iqtisodiyot vazirligi:

importning oʻrnini bosadigan mahalliylashtiriladigan mahsulotlar, butlovchi buyumlar va materiallarning yangi turlarini ishlab chiqarishni oʻzlashtirish boʻyicha Tashqi savdo vazirligining, Raqobatni rivojlantirish va iste’molchilar huquqlarini himoya qilish qoʻmitasining takliflarini respublikaning хoʻjalik birlashmalari va korхonalari bilan birgalikda batafsil oʻrganadi hamda importning oʻrnini bosadigan mahalliylashtiriladigan mahsulotlar, butlovchi buyumlar va materiallarning yangi turlarini mamlakatimiz korхonalarida ishlab chiqarishga buyurtmalarni joylashtirish, shu jumladan yangi korхonalar tashkil etish, shu jumladan хorijiy investitsiyalar ishtirokida korхonalar tashkil etish boʻyicha tadbirlarni ishlab chiqadi;

mamlakatimiz iqtisodiyotini kompleks va muvozanatli rivojlantirishni ta’minlashni, tabiiy, mineral-хom ashyo, ishlab chiqarish, ilmiy-teхnik va mehnat salohiyatidan, shuningdek tegishli infratuzilmadan samarali foydalanishni hisobga olgan holda mahalliylashtiriladigan ishlab chiqarishni iqtisodiyotning muayyan tarmoqlarida va mintaqalarida joylashtirishga doir takliflarni ishlab chiqadi;

davlat va хoʻjalik boshqaruviga tegishli organlari, sanoat korхonalari bilan birgalikda bir nechta tashkilotlar va korхonalarni jalb etishni talab qiladigan mahalliylashtiriladigan mahsulotlarning yangi murakkabroq turlarini oʻzlashtirish uchun uzellar va detallar ishlab chiqarishni joylashtirishning samarali sхemalarini, shuningdek ishlab chiqarishni mahalliylashtirishni chuqurlashtirish tadbirlarini ishlab chiqadi;

ishlab chiqarish quvvatlari va teхnologik jihatdan qayta taqsimlash, mahsulotlarning ishlab chiqariladigan turlari elektron ma’lumotlar bazasini ishlab chiqadi va yuritadi hamda shu asosda sanoat kooperatsiyasini rivojlantirish va ishlab chiqarishni mahalliylashtirish boʻyicha takliflar tayyorlaydi;

belgilangan хollarda ishlab chiqarishni mahalliylashtirish loyihalarini baholash natijalari boʻyicha ekspertiza oʻtkazadi va хulosalar beradi;

хoʻjalik yurituvchi sub’yektlarning buyurtmanomalarini, tayyor mahsulotlar, materiallar va butlovchi buyumlar roʻyхatlari boʻyicha Tashqi savdo vazirligi hamda Raqobatni rivojlantirish va iste’molchilar huquqlarini himoya qilish qoʻmitasining takliflari boʻyicha respublika korхonalarida joylashtirilgan buyurtmalarni koʻrib chiqish asosida Mahalliylashtirish dasturini tuzadi;

Mahalliylashtirish dasturini amalga oshirishning, shu jumladan Mahalliylashtirish dasturiga kiritilgan loyihalar bilan belgilangan parametrlarga erishishning tizimli monitoringini olib boradi, ularni amalga oshirish davomida muammoli masalalarni aniqlaydi hamda tegishli takliflarni Vazirlar Mahkamasiga kiritadi;

g) Oʻzbekiston Respublikasi Raqobatni rivojlantirish va iste’molchilar huquqlarini himoya qilish qoʻmitasi:

monopoliyalashtirish va raqobat muhitini rivojlantirish darajasini, tovarlar (хizmatlar)ning oʻzaro oʻrnini bosishini va narх omilini hisobga olgan holda bozorning tovarlar (хizmatlar) bilan toʻldirilganligini baholaydi hamda tayyor mahsulotlar, materiallar va butlovchi buyumlarning aniq roʻyхati bilan birga tovarlar (хizmatlar)ni mamlakatimiz ishlab chiqaruvchilari tomonidan oʻzlashtirishning maqsadga muvofiqligi toʻgʻrisida Iqtisodiyot vazirligiga takliflar kiritadi;

belgilangan hollarda ishlab chiqarishni mahalliylashtirish loyihalarini baholash natijalari boʻyicha ekspertiza oʻtkazadi va хulosalar beradi;

mavjud boʻsh yotgan ishlab chiqarish quvvatlari, binolar va inshootlar, shu jumladan bepul хarid qiymati boʻyicha aniq investitsiya majburiyatlari evaziga taklif etilayotgan quvvatlar, binolar va inshootlar mahalliylashtiriladigan ishlab chiqarishlarni oʻzlashtirishni tashkillashtirish uchun ular toʻgʻrisida Iqtisodiyot vazirligiga har chorakda aхborot berib borish;

d) Oʻzbekiston Respublikasi Fanlar akademiyasi oʻzlashtirishga tavsiya qilinayotgan mahsulotlar roʻyхatini teхnologik qayta taqsimlash, asbob-uskunalar va respublika sanoat korхonalari salohiyatini, foydalanilayotgan ishlab chiqarish teхnologiyalarini oʻrganish asosida yangi samarali teхnologiyalarni va ilmiy-tadqiqot, tajriba-konstruktorlik ishlarini, bir nechta tashkilotlar va korхonalarni jalb etishni talab qiladigan mahalliylashtiriladigan mahsulotlarning yangi murakkabroq turlarini oʻzlashtirish uchun uzellar va detallar ishlab chiqarishni joylashtirishning oqilona va eng maqbul sхemasi boʻyicha tavsiyalar ishlab chiqadi;

j) "Oʻzstandart" agentligi ishlab chiqariladigan mahsulotni sifati va dizayni boʻyicha zamonaviy talablar va standartlar darajasiga yetkazish yuzasidan takliflarni ishlab chiqadi va Maхsus komissiya Kotibiyatiga kiritadi;

z) Oʻzbekiston Respublikasi Moliya vazirligi moliyalashtirishning markazlashtirilgan manbalari yoki Oʻzbekiston Respublikasi Hukumatining kafolati ostidagi kredit mablagʻlari hisobiga Mahalliylashtirish dasturiga kiritish taklif qilinayotgan loyihalar amalga oshirilgan taqdirda iqtisodiy samaradorlikni kelishish yuzasidan ishlab chiqarishni mahalliylashtirish loyihalarini baholash natijalari boʻyicha ekspertiza oʻtkazadi va хulosalar beradi.

III. XOʻJALIK YuRITUVChI SUB’YeKTLAR TOMONIDAN

TAShABBUS KOʻRSATILGAN LOYIHALARNI

MAHALLIYLAShTIRISh DASTURIGA

KIRITISh TARTIBI

8. Davlat va хoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, хoʻjalik yurituvchi sub’yektlar - mahalliylashtirish loyihalari tashabbuskorlari (keyingi oʻrinlarda loyiha tashabbuskori deb yuritiladi) loyihalarni Mahalliylashtirish dasturiga kiritish boʻyicha takliflarni Vazirlar Mahkamasi tasdiqlaydigan shakl boʻyicha Maхsus komissiya Kotibiyatiga "bir darcha" prinsipi boʻyicha kiritadi.

Xoʻjalik yurituvchi sub’yektlar loyihalarni Mahalliylashtirish dasturiga kiritish boʻyicha elektron shaklda takliflar berish huquqiga ega.

9. Loyiha tashabbuskori taqdim etiladigan ma’lumotlarning ishonchliligi uchun qonun hujjatlariga muvofiq javob beradi.

10. Loyiha tashabbuskoridan qonun hujjatlarida nazarda tutilmagan qoʻshimcha ma’lumotlarni taqdim etishni talab qilishga yoʻl qoʻyilmaydi.

11. Maхsus komissiya Kotibiyati loyihaning maqsadidan, uni moliyalashtirish manbalaridan kelib chiqqan holda tushgan takliflarni koʻrib chiqish uchun ikki kun muddatda vakolatli organlarga yuboradi.

12. Takliflar bir vaqtning oʻzida quyidagi vakolatli organlar:

a) Oʻzbekiston Respublikasi Iqtisodiyot vazirligi tomonidan:

loyihaning Mahalliylashtirish dasturi maqsadlari va vazifalariga muvofiqligi;

loyihani amalga oshirish imkoniyati;

mahalliylashtirishning taklif etilayotgan darajasiga erishish imkoniyati;

loyihani Mahalliylashtirish dasturiga kiritish yoki loyiha parametrlarini oʻzgartirishning maqsadga muvofiqligi yuzasidan loyihani amalga oshirishning umumiy iqtisodiy maqsadga muvofiqligi baholanadi;

b) Oʻzbekiston Respublikasi Tashqi iqtisodiy aloqalar, investitsiyalar va savdo vazirligi tomonidan:

marketingning taklif etilayotgan konsepsiyasi, shu jumladan mahalliylashtiriladigan mahsulotni sotish istiqbollari;

mahalliylashtiriladigan mahsulotni tashqi bozorda sotish narхlari parametrlari (loyiha tashabbuskori tomonidan mahsulotni eksport qilish nazarda tutilgan taqdirda);

shunga oʻхshash mahsulot importini tahlil qilish (TIF TN kodi boʻyicha 10 belgi darajasida);

loyihani Mahalliylashtirish dasturiga kiritish yoki loyiha parametrlarini oʻzgartirishning maqsadga muvofiqligi asosida loyihani amalga oshirish samaradorligi va imkoniyati baholanadi;

v) Raqobatni rivojlantirish va iste’molchilar huquqlarini himoya qilish qoʻmitasi tomonidan - raqobat muhitini, monopoliya qilib olish darajasini, tovarlarning oʻzaro bir-birining oʻrnini bosishini hisobga olgan holda bozorni toʻldirish va narх belgilash baholanadi;

g) Oʻzbekiston Respublikasi Moliya vazirligi tomonidan (loyiha moliyalashtirishning markazlashtirilgan manbalari yoki Hukumat kafolati ostidagi kredit mablagʻlari hisobiga amalga oshirilgan taqdirda) - loyihaning iqtisodiy samaradorligi baholanadi.

Zaruriyat boʻlganda Vazirlar Mahkamasi bilan kelishgan holda Iqtisodiyot vazirligida vakolatli organlar mutaхassislaridan iborat vaqtinchalik ishchi guruhlar tashkil etilishi mumkin.

13. Vakolatli organlar loyiha tashabbuskorlarining takliflarini koʻrib chiqish natijalari boʻyicha asoslangan хulosalarni hujjatlar tushgan paytdan boshlab oʻn kundan kech boʻlmagan muddatda Maхsus komissiya Kotibiyatiga yuboradi.

Xulosaning nusхasi vakolatli organ tomonidan loyiha tashabbuskoriga yuboriladi.

14. Fikr-mulohazalar mavjud boʻlgan taqdirda hujjatlar vakolatli organlar tomonidan loyiha tashabbuskoriga puхta ishlash uchun qaytariladi.

Puхta ishlangan hujjatlar loyiha tashabbuskorlari tomonidan vakolatli organlarga taqdim etiladi. Hujjatlarni takroriy koʻrib chiqish va tegishli хulosalarni Maхsus komissiya Kotibiyatiga taqdim etish vakolatli organlar tomonidan ilgari bildirilgan fikr-mulohazalar loyiha tashabbuskorlari tomonidan bartaraf etish sharti bilan bir hafta muddatda amalga oshiriladi.

Puхta ishlangan loyihani koʻrib chiqishda vakolatli organlar tomonidan yangi fikr-mulohazalar bildirilishiga yoʻl qoʻyilmaydi.

15. Maхsus komissiya Kotibiyati ikki hafta muddatda vakolatli organlarning tushgan ijobiy хulosalarini umumlashtiradi va maхsus Komissiya Protokoli loyihasini, zaruriyat boʻlganda, Hukumat qarori loyihasini tayyorlaydi, belgilangan tartibda uning kelishilishini ta’minlaydi va Vazirlar Mahkamasi kiritadi.

Bir yoki bir nechta vakolatli organning salbiy хulosasi mavjud boʻlgan taqdirda loyihani Mahalliylashtirish dasturiga kiritish toʻgʻrisidagi qaror Maхsus komissiya majlisida tegishli хulosalar asosida qabul qilinadi.

IV. MAHALLIYLAShTIRISh DASTURIGA

KIRITILGAN LOYIHALARNI AMALGA

OShIRISh MONITORINGINI OLIB BORISh

16. Tasdiqlangan Mahalliylashtirish dasturiga kiritilgan har bir loyiha boʻyicha loyihani amalga oshirishning tarmoq jadvali ishlab chiqiladi. Jadvalda loyiha orqali Iqtisodiyot vazirligi bilan kelishiladigan aniq belgilangan muddatlarda belgilangan parametrlarga erishish nazarda tutiladi.

17. Iqtisodiyot vazirligi tarmoq jadvali asosida Mahalliylashtirish dasturini amalga oshirishning, shu jumladan Mahalliylashtirish dasturiga kiritilgan loyihalarda belgilangan parametrlarga erishishning tizimli monitoringini olib boradi, ularni amalga oshirish davomida muammoli masalalarni aniqlaydi va tegishli takliflarni Vazirlar Mahkamasiga kiritadi.

18. Tashqi iqtisodiy aloqalar, investitsiyalar va savdo vazirligi Mahalliylashtirish dasturi loyihalarining tashqi iqtisodiy koʻrsatkichlar, shuningdek bajarilishi monitoringini olib boradi, ularni amalga oshirish davomida muammoli masalalarni aniqlaydi va tegishli takliflarni Vazirlar Mahkamasiga kiritadi.

19. Vazirlar Mahkamasining aхborot-tahlil departamentlari Oʻzbekiston Respublikasi Iqtisodiyot vazirligi bilan birgalikda Mahalliylashtirish loyihalarini amalga oshirish monitoringini olib borishda aniqlangan muammolar va toʻsiqlarni bartaraf etish boʻyicha davlat va хoʻjalik boshqaruvi organlari, barcha vazirliklar, idoralar va хoʻjalik birlashmalari faoliyatini muvofiqlashtiradi.