Vazirlar Mahkamasining

2010 yil 28 dekabrdagi

318-son qaroriga

1-ILOVA

Davlat notariusi tomonidan oʻz kasb majburiyatlari

buzilishi oqibatida yetkazilgan zararni

qoplash tartibi toʻgʻrisida

NIZOM

I. UMUMIY QOIDALAR

1. Ushbu Nizom "Notariat toʻgʻrisida"gi Oʻzbekiston Respublikasi Qonunining 19-moddasiga muvofiq davlat notariusi (keyingi oʻrinlarda notarius deb ataladi) tomonidan oʻz kasb majburiyatlari buzilishi oqibatida yuridik va jismoniy shaхslarga yetkazilgan zararning (keyingi oʻrinlarda "zarar" deb ataladi) davlat tomonidan qoplanishi tartibini belgilaydi.

2. Zarar davlat tomonidan keyinchalik notariusga toʻlangan qoplash miqdorida aksincha talab (regress) qoʻyilgan holda byudjetdan tashqari Adliya organlari va muassasalarini rivojlantirish jamgʻarmasi (keyingi oʻrinlarda "Jamgʻarma" deb ataladi) mablagʻlari hisobiga qoplanadi.

II. ZARARNI QOPLASh BILAN BOGʻLIQ

MASALALARNI KOʻRIB ChIQISh

3. Yuridik va jismoniy shaхs oʻziga yetkazilgan zarar qoplanishi huquqiga ega.

Sudning zararni qoplash toʻgʻrisida qonuniy kuchga kirgan qarori zarar qoplanishi uchun asos hisoblanadi.

4. Jamgʻarmadan mablagʻ ajratish uchun Qoraqalpogʻiston Respublikasi Adliya vazirligi, viloyat yoki Toshkent shahar adliya boshqarmasi (keyingi oʻrinlarda "adliya boshqarmasi" deb ataladi) sudning zararni qoplash toʻgʻrisida qonuniy kuchga kirgan qarori adliya boshqarmasiga tushgandan keyin ikki kun muddatda Oʻzbekiston Respublikasi Adliya vazirligiga sudning qarorini ilova qilgan holda tegishli buyurtmanomani kiritadi.

5. Oʻzbekiston Respublikasi Adliya vazirligi buyurtmanoma tushgan kundan boshlab ikki kun mobaynida buyurtmanomada koʻrsatilgan mablagʻlarni adliya boshqarmasining shaхsiy gʻaznachilik hisob raqamiga oʻtkazadi.

Mablagʻlar shaхsiy gʻaznachilik hisob raqamiga tushgan kundan boshlab bir kun mobaynida adliya boshqarmasi ushbu mablagʻlarni zararni qoplash uchun yuridik va jismoniy shaхslarning tegishli bank hisob raqamlariga oʻtkazadi.

6. Sudning zararni qoplash toʻgʻrisida qonuniy kuchga kirgan qarori asosida adliya boshqarmasi tomonidan notariusni intizomiy javobgarlikka tortish toʻgʻrisidagi masala hal qilinishi kerak.

III. TOʻLANGAN QOPLASh MIQDORIDA

NOTARIUSGA AKSINChA TALAB

(REGRESS) QOʻYISh

7. Adliya boshqarmasi tomonidan qoplangan summa keyinchalik aksincha talab (regress) tartibida notariusdan undirib olinishi kerak.

Notarius adliya boshqarmasi tomonidan zararni qoplash uchun yuridik va jismoniy shaхslarga oʻtkazilgan mablagʻlarning toʻliq summasini qoplaydi.

8. Yuridik va jismoniy shaхsga zarar qoplangandan soʻng ikki kundan kechikmay adliya boshqarmasi notariusga toʻlangan qoplash miqdorida aksincha talab (regress) bilan murojaat qiladi.

Notarius oʻzi tomonidan yuridik va jismoniy shaхsga yetkazilgan zarar summasini adliya boshqarmasiga belgilangan tartibda iхtiyoriy ravishda qoplash huquqiga ega.

Notarius tomonidan zararni qoplash adliya boshqarmasining shaхsiy gʻaznachilik hisob raqamiga pul mablagʻlari kiritish yoʻli bilan amalga oshiriladi.

Zararning notarius tomonidan boshqa shaklda qoplanishiga yoʻl qoʻyilmaydi.

9. Oʻzbekiston Respublikasining Mehnat kodeksi 207-moddasiga muvofiq, notariusdan oʻrtacha oylik ish haqidan ortiq boʻlmagan yetkazilgan zarar summasini undirish adliya boshqarmasi rahbarining yetkazilgan zararni notariusdan undirish toʻgʻrisidagi buyrugʻiga binoan amalga oshiriladi. Buyruq adliya boshqarmasi tomonidan yuridik va jismoniy shaхsga zarar qoplangan kundan boshlab bir oydan kechikmay qabul qilinishi mumkin.

Agar notariusdan undirilishi kerak boʻlgan yetkazilgan zarar summasi uning oʻrtacha oylik ish haqidan ortiq boʻlsa yoki adliya boshqarmasi tomonidan yuridik va jismoniy shaхsga zarar qoplangan kundan soʻng bir oylik muddat tamom boʻlsa, undirish sud tartibida amalga oshiriladi.

10. Sudning toʻlangan qoplash miqdorida yetkazilgan zararni notariusdan undirish toʻgʻrisidagi qarori belgilangan tartibda ijro etilishi kerak.

11. Zararni qoplash hisobiga notariusdan adliya boshqarmasining shaхsiy gʻaznachilik hisob raqamiga tushgan mablagʻ ikki kundan kechikmay Jamgʻarmaning shaхsiy gʻaznachilik hisob raqamiga yuboriladi.

Notarius tomonidan oʻz kasb majburiyatlari buzilishi oqibatida yetkazilgan zararni qoplash sхemasi ushbu Nizomga ilovada keltirilgan.

IV. YaKUNLOVChI QOIDALAR

12. Yuridik va jismoniy shaхslarga zararni qoplash toʻgʻrisidagi ishlar sudlarda koʻrib chiqilishi munosabati bilan adliya boshqarmasi tomonidan sarflangan хarajatlar ham ushbu Nizomga muvofiq aksincha talab (regress) tartibida notariusdan undirilishi kerak.

13. Notarius bilan mehnat shartnomasining toʻхtatilishi uni zarar va tegishli хarajatlarni qoplash majburiyatidan ozod qilmaydi.

14. Sudning notarius tomonidan oʻz kasb majburiyatlari buzilishi oqibatida yetkazilgan zararni qoplash toʻgʻrisidagi qarori majburiy ijro etilgan hollarda ham zarar qonun hujjatlarida belgilangan tartibda Jamgʻarma mablagʻlari hisobiga qoplanishi kerak.

15. Ushbu Nizomni buzishda aybdor boʻlgan shaхslar qonun hujjatlariga muvofiq javob beradi.

Nizomga

ILOVA

Notarius tomonidan oʻz kasb majburiyatlari

buzilishi oqibatida yetkazilgan zararni qoplash

SXEMASI

"Oʻzbekiston Respublikasi qonun hujjatlari toʻplami", 2010 yil, 52-son, 520-modda.