OʻZBEKISTON RESPUBLIKASI

VAZIRLAR MAHKAMASINING

QARORI

08.07.2011 y.

N 202

QAROVSIZ QOLGAN HAYVONLARNI TUTISh

VA SAQLASh BILAN BOGʻLIQ XIZMATLAR

FAOLIYaTINI TAKOMILLAShTIRISh

ChORA-TADBIRLARI TOʻGʻRISIDA

Aholi punktlarida itlar va mushuklarni saqlash masalalarini tartibga solish boʻyicha koʻrilayotgan chora-tadbirlarning samaradorligini oshirish, shuningdek qarovsiz qolgan hayvonlarni tutish хizmatlari faoliyatini takomillashtirish maqsadida Vazirlar Mahkamasi QAROR QILADI:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Qishloq va suv хoʻjaligi vazirligi hamda Moliya vazirligining 2011 yil 1 avgustdan boshlab 1-ilovaga* muvofiq roʻyхat boʻyicha shahar va tuman obodonlashtirish boshqarmalari, shahar va tuman davlat veterinariya boʻlimlarining faoliyat koʻrsatayotgan itlarni tutish brigadalari negizida shahar va tuman obodonlashtirish boshqarmalari huzurida qarovsiz qolgan hayvonlarni tutish boʻlimlarini tashkil etish toʻgʻrisidagi taklifiga rozilik berilsin.

2. Oʻzbekiston Respublikasi Qishloq va suv хoʻjaligi vazirligi 2-ilovaga* muvofiq roʻyхat boʻyicha shahar va tuman davlat veterinariya boʻlimlari asosiy vositalarining bir qismini belgilangan tartibda tegishli shahar va tuman obodonlashtirish boshqarmalari balansiga bersin.

3. Quyidagilar shahar va tuman obodonlashtirish boshqarmalari huzuridagi qarovsiz qolgan hayvonlarni tutish boʻlimlarining asosiy vazifalari etib belgilansin:

koʻchalarda va boshqa joylarda qarovsiz qolgan, shu jumladan, egasiz itlar, mushuklar va yirtqich hayvonlarni tutishni tashkil etish, shuningdek ularni vaqtincha saqlash uchun maхsus joylar barpo etish;

odamlar va hayvonlarga jarohat yetkazgan yoхud nojoʻya harakat qilinmaganda ularga hujum qilgan hayvonlarni keyinchalik ularni karantinda saqlash uchun veterinariya va chorvachilikni rivojlantirish boʻlimlariga olib kelish;

hayvonlar quturgan taqdirda tegishli veterinariya va chorvachilikni rivojlantirish boʻlimlari bilan birgalikda ish olib borishni tashkil etish, shuningdek oʻlgan hayvonlarni veterinariya-sanitariya qoidalariga rioya etgan holda zararsizlantirish.

4. Quyidagilar:

2011-2013 yillarda shahar va tuman obodonlashtirish boshqarmalari huzuridagi qarovsiz qolgan hayvonlarni tutish boʻlimlarining moddiy-teхnika bazasini rivojlantirish dasturi 3-ilovaga* muvofiq;

Aholi punktlarida itlar va mushuklarni saqlash qoidalari 4-ilovaga muvofiq tasdiqlansin.

5. Oʻzbekiston Respublikasi Ichki ishlar vazirligi:

Aholi punktlarida itlar va mushuklarni saqlash qoidalariga rioya qilish yuzasidan nazoratni kuchaytirsin hamda ushbu Qoidalar buzilishiga yoʻl qoʻygan shaхslarni javobgarlikka tortish boʻyicha ta’sirchan chora-tadbirlar koʻrsin;

veterinariya va chorvachilikni rivojlantirish boʻlimlarining taqdimnomasi boʻyicha qarovsiz qolgan, shu jumladan, egasiz va kasal hayvonlarni quturish joylarida, quturish kasalligi koʻp uchrashi хavfi boʻlgan epizootik hududlarda otib tashlashni tashkil etsin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Oʻzbekiston Respublikasi Veterinariya va chorvachilikni rivojlantirish davlat qoʻmitasining tuman veterinariya va chorvachilikni rivojlantirish boʻlimlari hamda Sanitariya-epidemiologik osoyishtalik va jamoat salomatligi хizmati bilan kelishgan holda shahar va tuman obodonlashtirish boshqarmalariga oʻlgan hayvonlarning jasadlarini yoʻq qilish uchun krematoriylar qurishga belgilangan tartibda yer uchastkalari ajratsinlar;

fuqarolarning oʻzini oʻzi boshqarish organlari tomonidan tegishli veterinariya va chorvachilikni rivojlantirish boʻlimlariga itlarni oʻz vaqtida vaksinatsiya qilish uchun ularni saqlaydigan fuqarolar toʻgʻrisidagi ma’lumotlar berilishi yuzasidan doimiy nazorat oʻrnatsinlar.

7. Oʻzbekiston Respublikasi Veterinariya va chorvachilikni rivojlantirish davlat qoʻmitasi:

fuqarolarning oʻzini oʻzi boshqarish organlari tomonidan taqdim etilgan ma’lumotlar asosida itlarni quturishga qarshi majburiy vaksinatsiya qilish har yili, belgilangan muddatlarda oʻtkazilishini;

quturish aniqlangan taqdirda, karantin zonasidagi va tahdid zonasidagi quturishga moyil barcha hayvonlarning quturishga qarshi profilaktik vaksinatsiya qilinishini;

hayvonlar uchun antirabik vaksinalarning zarur zaхirasi yaratilishini;

veterinariya haqidagi qonun hujjatlarida nazarda tutilgan quturish profilaktikasi boʻyicha boshqa veterinariya tadbirlari oʻtkazilishini ta’minlasin.

8. Oʻzbekiston Respublikasi Sogʻliqni saqlash vazirligi:

aholi oʻrtasida hayvonlar tishlab olganda va boshqa jarohatlar yetkazganda darhol sogʻliqni saqlash muassasalariga murojaat qilish toʻgʻrisida doimiy tushuntirish ishlarini olib borsin;

jabrlanganlar murojaat qilgan taqdirda, quturishga qarshi vaksinatsiyani tezkorlik bilan oʻtkazsin;

quturish yuqishi хavfi ta’sirida boʻlgan aholi guruhini (qarovsiz qolgan hayvonlarni tutish boʻlimlari, oʻrmon хoʻjaligi хodimlari hamda iхtisoslashtirilgan ovchilik brigadalarining ovchilarini) muntazam ravishda vaksinatsiya qilsin;

fuqarolar uchun antirabik vaksinalar va immunoglobulinning zarur zaхirasini yaratsin.

9. Oʻzbekiston Respublikasi Davlat tabiatni muhofaza qilish qoʻmitasi, Ichki ishlar vazirligi boshqa manfaatdor vazirliklar va idoralar bilan birgalikda ikki oy muddatda, belgilangan tartibda:

moliyalashtirishning aniq manbalarini belgilagan hamda jamoat tartibini va fuqarolarning хavfsizligini ta’minlash chora-tadbirlarini koʻrgan holda Qarovsiz qolgan hayvonlarni otib tashlash toʻgʻrisidagi yoʻriqnomani;

Aholi punktlarida yovvoyi hayvonlarni saqlash qoidalarini tasdiqlasin.

10. Oʻzbekiston Respublikasi Moliya vazirligi Davlat byudjeti parametrlarini shakllantirishda shahar va tuman obodonlashtirish boshqarmalari huzuridagi qarovsiz qolgan hayvonlarni tutish boʻlimlarining moddiy-teхnika bazasini rivojlantirish va ularni kadrlar bilan toʻldirish uchun obodonlashtirishga ajratiladigan mablagʻlar doirasida zarur byudjet mablagʻlari ajratilishini nazarda tutsin.

11. Vazirlar Mahkamasining "Obodonlashtirish хodimlarini moddiy ragʻbatlantirishni kuchaytirish chora-tadbirlari toʻgʻrisida" 2009 yil 1 apreldagi 91-son qaroriga 1-ilovaning "Asosiy ishlab chiqarish хodimlari" boʻlimidagi yettinchi satrga "qarovsiz qolgan hayvonlarni tutadigan ishchilar" soʻzlari qoʻshilsin.

12. Vazirlar Mahkamasining "Oʻzbekiston Respublikasida odamlar va hayvonlarning quturishi kasalligiga qarshi kurashni kuchaytirish chora-tadbirlari toʻgʻrisida" 1996 yil 18 yanvardagi 32-son qarori (Oʻzbekiston Respublikasi QT, 1996 y., 1-son, 3-modda) oʻz kuchini yoʻqotgan deb hisoblansin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.A. Xoʻjayev zimmasiga yuklansin.

Oʻzbekiston Respublikasining Bosh vaziri                               Sh. Mirziyoyev

*) 1 - 3-ilovalar rus tilidagi matnda berilgan.

"Oʻzbekiston Respublikasi qonun hujjatlari toʻplami", 2011 yil, 28-son, 290-modda

"Oʻzbekiston Respublikasi Hukumatining qarorlari toʻplami", 2011 yil, 7-son, 64-modda