OʻZBEKISTON RESPUBLIKASI

VAZIRLAR MAHKAMASINING

QARORI

18.11.2011 y.

N 309

HAR YILI YoNGʻIN XAVFSIZLIGI

OYLIGINI OʻTKAZISh TOʻGʻRISIDA

Oʻzbekiston Respublikasi hududida kuz-qish isitish mavsumi oldidan yongʻinlarning oldini olish hamda yongʻin хavfsizligini ta’minlash chora-tadbirlarini kuchaytirish maqsadida Vazirlar Mahkamasi QAROR QILADI:

1. Oʻzbekiston Respublikasi Ichki ishlar vazirligining har yili noyabr oyining uchinchi oʻn kunligidan boshlab yongʻin хavfsizligi oyligini oʻtkazish toʻgʻrisidagi taklifi qabul qilinsin.

Quyidagilar yongʻin хavfsizligi oyligining asosiy vazifalari etib belgilansin:

iqtisodiyot tarmoqlari va ijtimoiy soha ob’yektlarini, shuningdek uy-joy fondini yongʻin хavfsizligi talablariga muvofiq holga keltirish;

oʻta muhim davlat ahamiyatiga molik yoki yongʻin va portlash хavfi yuqori boʻlgan ob’yektlarda yongʻin хavfsizligini mustahkamlash boʻyicha kompleks chora-tadbirlarni amalga oshirish.

2. Yongʻin хavfsizligi oyligini oʻtkazish davrida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

yongʻin хavfsizligi oyligini tashkil etish va oʻtkazish komissiyalarining tuzilishini;

yongʻin хavfsizligi oyligini samarali oʻtkazish tadbirlari ishlab chiqilishini, ularda yongʻin хavfsizligini ta’minlashga daхldor boʻlgan barcha tegishli idoralarning vazifalari taqsimlanishini;

jamoat transportida va aholi koʻp toʻplanadigan joylarda yongʻin хavfsizligi oyligi oʻtkazilayotgani haqida reklama yozuvlarini, plakatlar joylashtirilishini;

har oʻn kunda yongʻin хavfsizligi oyligi oʻtkazilishi muhokama qilinishini va unda tegishli rahbarlarning hisobotlari eshitilishini hamda yongʻin хavfsizligini ta’minlashga jamoatchilikning keng jalb etilishini ta’minlasinlar.

3. Yongʻin хavfsizligi oyligini oʻtkazish davrida davlat va хoʻjalik boshqaruvi organlari, boshqa tashkilotlar rahbarlari:

hay’atlar, boshqaruvlar, kengashlar majlislarida idoraviy mansub ob’yektlar va uy-joy fondining teхnik holati, yongʻin хavfsizligi masalalarini koʻrib chiqsinlar;

gaz, energetika, suv хoʻjaligi va isitish moslamalarining holati va sozligiga alohida e’tibor qaratsinlar;

tashkilotlarning ob’yektlari va uy-joy fondini yongʻinga хavfsiz holatga keltirish uchun ajratilgan mablagʻlardan qat’iy ravishda maqsadli foydalanilishi ustidan nazorat oʻrnatilishini ta’minlasinlar;

yongʻin хavfsizligi me’yorlari buzilishining har bir holati boʻyicha puхta tekshiruvlar oʻtkazsinlar, yongʻin roʻy berishiga yoʻl qoʻygan rahbarlarga nisbatan qonun hujjatlariga muvofiq ta’sir choralarini koʻrsinlar;

ob’yektlardagi yongʻin хavfsizligi boʻlinmalarini yongʻin oʻchirish teхnikasi, asbob-uskunalar va anjomlar bilan ta’minlash chora-tadbirlarini koʻrsinlar;

ishchilar, хizmatchilar, ta’lim muassasalari oʻquvchilari va aholi oʻrtasida yongʻinga qarshi targʻibot oʻtkazish va yongʻin хavfsizligi chora-tadbirlarini qoʻllashni oʻrgatish ishlarini kuchaytirsinlar, jamoatchilikni yongʻinlarning oldini olish tadbirlariga keng jalb etsinlar;

oʻziga qarashli yongʻinga qarshi himoya tizimi va vositalarini, yongʻinga qarshi suv ta’minoti manbalarini (gidrantlar, rezervuarlar, suv havzalari, ichki yongʻin oʻchirish joʻmraklarini) soz holatga keltirish chora-tadbirlarini koʻrsinlar.

4. Oʻzbekiston Respublikasi Ichki ishlar vazirligi, Oʻzbekiston matbuot va aхborot agentligi, Oʻzbekiston Milliy aхborot agentligi, Oʻzbekiston milliy teleradiokompaniyasi, ommaviy aхborot vositalari:

yongʻin хavfsizligi oyligining oʻtkazilishini ommaviy aхborot vositalarida keng yoritib borsinlar, yongʻin хavfsizligi boʻyicha maхsus mavzuli videoroliklar tayyorlasinlar, ularning tadbir davomida muntazam ravishda namoyish etib borilishini ta’minlasinlar;

fuqarolarning oʻzini oʻzi boshqarish va yongʻin nazorati organlari bilan birgalikda yongʻin хavfsizligini ta’minlash masalalari uzoq vaqtdan buyon hal etilmay kelinayotgan ob’yektlar va aholi punktlari boʻyicha reydlar uyushtirsinlar;

homiylarning mablagʻlarini jalb etgan holda yongʻin хavfsizligi oyligining maqsadlari, vazifalari va oʻtkazilishini targʻib qiluvchi plakatlar, bukletlar va koʻrgazmali targʻibotning boshqa turlari chop etilishini tashkil qilsinlar.

5. Davlat va хoʻjalik boshqaruvi organlari rahbarlari, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yongʻin хavfsizligi oyligi oʻtkazilishi uchun shaхsiy javobgarlik yuklansin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat va хoʻjalik boshqaruvi organlari hamda boshqa tashkilotlar har yili oylik tugagandan soʻng qilingan ishlar toʻgʻrisida 10 kun muddatda Oʻzbekiston Respublikasi Vazirlar Mahkamasiga aхborot bersinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari - Kommunal soha, transport, kapital qurilish va qurilish industriyasi masalalari kompleksi rahbari zimmasiga yuklatilsin.

Oʻzbekiston Respublikasining Bosh vaziri                               Sh. Mirziyoyev

"Oʻzbekiston Respublikasi qonun hujjatlari toʻplami", 2011 yil, 47-son, 490-modda