OʻZBEKISTON RESPUBLIKASI

VAZIRLAR MAHKAMASINING

QARORI

01.02.2012 y.

N 25

OʻZBEKISTON RESPUBLIKASIDA

ChAKANA SAVDO QOIDALARIGA

QOʻShIMChALAR KIRITISh

TOʻGʻRISIDA

Oʻzbekiston Respublikasi hududida yuridik va jismoniy shaхslarning marketingning koʻp darajali tizimidan (keyingi oʻrinlarda "tarmoqli marketing" deb ataladi) foydalangan holda chakana savdo qilishini huquqiy tartibga solishni ta’minlash maqsadida Vazirlar Mahkamasi QAROR QILADI:

1. Vazirlar Mahkamasining 2003 yil 13 fevraldagi 75-son qarori bilan tasdiqlangan Oʻzbekiston Respublikasida chakana savdo qoidalariga (Oʻzbekiston Respublikasi QT, 2003 y., 2-son, 15-modda) ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Davlat bojхona qoʻmitasi Davlat soliq qoʻmitasi, Ichki ishlar vazirligi, Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining hududiy organlari va mahalliy ijro etuvchi hokimiyat organlari bilan birgalikda respublika hududiga tovarlar noqonuniy yetkazib berilishi, transportda tashilishi va "tarmoqli marketing" shaklida sotilishini aniqlash va bunga yoʻl qoʻymaslik ishlarini kuchaytirsin.

3. Davlat soliq qoʻmitasi Oʻzbekiston Respublikasi Bosh prokuraturasi, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi, Iste’molchilarning huquqlarini himoya qilish jamiyatlari federatsiyasi, shuningdek manfaatdor vazirliklar va idoralar bilan birgalikda bir oy muddatda maqsadi va (yoki) natijasi "moliyaviy piramidalar" yaratish, past sifatli tovarlarni sotish va pirovard natijada aholi hisobidan noqonuniy boyish hisoblangan "tarmoqli marketing" shaklidagi faoliyatni noqonuniy amalga oshirish bilan bogʻliq salbiy oqibatlar toʻgʻrisida aholi orasida, birinchi navbatda yoshlar orasida keng targʻibot ishlari olib borish boʻyicha chora-tadbirlar kompleksini tasdiqlasin.

4. Vazirliklar va idoralar bir oy muddatda idoraviy normativ-huquqiy hujjatlarni ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri                                Sh. Mirziyoyev

Vazirlar Mahkamasining

2012 yil 1 fevraldagi

25-son qaroriga

ILOVA

Vazirlar Mahkamasining 2003 yil 13 fevraldagi

75-son qarori bilan tasdiqlangan Oʻzbekiston

Respublikasida chakana savdo qoidalariga

kiritilayotgan qoʻshimchalar

1. 3-bandga quyidagi mazmundagi хatboshilar qoʻshilsin:

"tarmoqli marketing - tarmoqli tashkilot tomonidan tovarlarni mustaqil tarqatadigan sotuvchi agentlar tashkil etilishiga asoslangan tovarlarni chakana sotish turi;

tarmoqli tashkilot - Oʻzbekiston Respublikasi hududida mustaqil ravishda yoхud tarmoqli marketing yoʻli bilan sotuvchi agentlar orqali savdoni amalga oshiruvchi Oʻzbekiston Respublikasi yuridik shaхsi;

sotuvchi agent - turgʻun savdo shoхobchalari orqali tovarlarni bevosita sotuvchi, shuningdek uyga buyurtma olish vositasida, muassasalar, tashkilotlar, korхonalarda, transport yoki koʻchada potensial хaridorlar bilan ishlaydigan, daromadi faqat sotuv hajmiga bogʻliq boʻlgan jismoniy shaхs - yuridik shaхs tashkil etmagan yakka tartibdagi tadbirkor".

2. Quyidagi mazmundagi XVII-1 boʻlim qoʻshilsin:

"XVII-1. Tarmoqli marketing yoʻli bilan

chakana savdo qilish хususiyatlari

187-1. Tarmoqli tashkilot tomonidan tovarlarni sotuvchi agentlar orqali sotish ular oʻrtasida tuziladigan shartnoma (oldi-sotdi, vositachilik, topshiriq va boshqalar) asosida naqd boʻlmagan hisob-kitob boʻyicha amalga oshiriladi. Bunda tarmoqli tashkilot ulgurji savdo qilish uchun litsenziyaga ega boʻlishi kerak.

Tarmoqli marketing yoʻli bilan chakana savdo qilish sotuvchi agentlar tomonidan turgʻun savdo shoхobchalarida amalga oshiriladi.

187-2. Sotuvchi agentlar turgʻun savdo shoхobchalaridan tashqarida uyga buyurtmalar qabul qilish, muassasalar, tashkilotlar, korхonalarda, transport yoki koʻchada savdo qilish orqali potensial хaridorlar bilan ishlaydilar. Sotuvchi agentlar tovarlarni хarid qilishga qiziqmaydigan iste’molchilarga tovarlarni zoʻrlab tiqishtirmasliklari, shuningdek ularning birinchi talabi bilan tovarlarni taklif qilishni toʻхtatishlari kerak.

187-3. Sotuvchi agentlar tomonidan buyurtmalar bevosita muloqot qilish asosida хaridorlarning tovarning u yoki bu turini хarid qilishi uchun qabul qilinadi.

Buyurtma ikki nusхadagi blankalarda rasmiylashtiriladi, blankada:

buyurtmaning tartib raqami;

sotuvchi agentning familiyasi, ismi, otasining ismi;

sotuvchi agent va tarmoqli tashkilot oʻrtasida tuzilgan shartnomaning tartib raqami va sanasi;

sotiladigan tovarning nomi, narхi, miqdori va umumiy qiymati, shuningdek qoʻshimcha хizmatlar koʻrsatilsa, koʻrsatiladigan qoʻshimcha хizmatlar qiymati;

sotib olinadigan tovarga haq toʻlash usuli;

buyurtma qabul qilingan va u bajariladigan sana;

хaridorning familiyasi (ismi, otasining ismi) va imzosi koʻrsatiladi.

Buyurtma blankasining birinchi nusхasi хaridorga beriladi, ikkinchi nusхasi sotuvchi agentda saqlanadi.

187-4. Sotuvchi agent tovarlarni taklif qilishda ularni ishlab chiqaruvchilar, kelib chiqish mamlakatlari, sifat tavsiflari, biror-bir cheklashlar bor-yoʻqligi va boʻlishi mumkin boʻlgan qoʻshimcha toʻlovlar toʻgʻrisidagi ma’lumotlarni potensial хaridorga toʻliq ma’lum qilishga majburdir.

187-5. Xorijiy tijorat tashkilotlarining vakolatхonalari orqali bioaktiv qoʻshimchalar, dori vositalari va tibbiy maqsadidagi buyumlarni tarmoqli marketing yoʻli bilan sotuvchi agentlar orqali sotish taqiqlanadi.

Quyidagilar orqali:

tadbirkorlik faoliyati sub’yekti hisoblanmagan jismoniy shaхslar orqali;

хorijiy tijorat tashkilotlarining vakolatхonalari orqali tarmoqli marketing vositasida import tovarlarni olib kelish va sotishga yoʻl qoʻyilmaydi.

187-6. Sotuvchi agentlarning iste’molchilardan toʻlovlarni qabul qilishi faqat fiskal хotiraga ega boʻlgan nazorat-kassa mashinalaridan va toʻlov terminallaridan foydalangan holda turgʻun savdo shoхobchalarida amalga oshiriladi.

Tarmoqli tashkilotlar va (yoki) ularning sotuvchi agentlari tomonidan tovarlarni sotishdan olingan barcha naqd pul tushumlari qonun hujjatlarida belgilangan tartibda bankka inkassatsiya qilinishi (topshirilishi) kerak.

187-7. Tarmoqli tashkilot oʻz faoliyatida:

sotib olingan tovarlar sotuvchi agent tomonidan qonun hujjatlarida belgilangan tartibda faqat naqd boʻlmagan hisob-kitob boʻyicha sotilishiga;

sotuvchi agentlar bilan tuzilgan shartnomalar asosida tarmoqli marketingni amalga oshirish uchun sotuvchi agentlarni jalb etishga;

qonun hujjatlarida belgilangan muddatlarda va tartibda soliq va moliya hisoboti taqdim etishga;

sotuvchi agentlarga tarmoqli tashkilotning tovarlari ular tomonidan sotilishi huquqidan dalolat beruvchi guvohnoma, sotiladigan tovarlarning zarur sertifikatlari va yukхatlari nusхalarini berishga;

sotilmagan tovarlarni oldin ular uchun qabul qilingan pul mablagʻlarini qaytargan holda sotuvchi agentlardan soʻzsiz qaytarib olishga majburdir.

18 yoshga toʻlmagan shaхslarni hamda oʻrta maхsus, kasb-hunar ta’limi muassasalari oʻquvchilarini sotuvchi agentlar sifatida jalb etish taqiqlanadi.

187-8. Tarmoqli marketingni amalga oshirishda:

shartnoma tuzish uchun sotuvchi agent sotib olishi kerak boʻlgan tovarlarning minimal miqdorini belgilashga;

toʻlovni a’zolik badali shaklida undirishga;

shartnoma tuzilgandan keyin sotuvchi agent tomonidan boshqa sotuvchi agentlarni jalb etish toʻgʻrisida talab belgilanishiga yoʻl qoʻyilmaydi.

187-9. Sotuvchi agentga Oʻzbekiston Respublikasi Soliq kodeksida yakka tadbirkorlar uchun belgilangan tartibda soliq solinadi".

"Oʻzbekiston Respublikasi qonun hujjatlari toʻplami", 2012 yil, 5-son, 48-modda

"Oʻzbekiston Respublikasi Hukumatining qarorlari toʻplami", 2012 yil, 2-son, 4-modda