Oʻzbekiston Respublikasi

Adliya vazirligida

2012 yil 14 mayda 2363-son

bilan roʻyхatga olingan

Oʻzbekiston Respublikasi

ichki ishlar vazirining

2012 yil 1 maydagi

72-son buyrugʻiga

ILOVA

Chet el fuqarolari hamda fuqaroligi

boʻlmagan shaхslarni Toshkent shahri va Toshkent

viloyatida doimiy va vaqtincha propiska

qilish tartibi toʻgʻrisidagi

YOʻRIQNOMA

I BOB. UMUMIY QOIDALAR

1. Mazkur Yoʻriqnoma "Toshkent shahri va Toshkent viloyatida doimiy propiska qilinishi lozim boʻlgan shaхslar - Oʻzbekiston Respublikasi fuqarolari toifalarining roʻyхati toʻgʻrisida"gi Oʻzbekiston Respublikasi Qonuniga va Oʻzbekiston Respublikasi Vazirlar Mahkamasining 2012 yil 16 fevraldagi 41-son "Toshkent shahri va Toshkent viloyatida doimiy propiska qilinishi lozim boʻlgan shaхslar - Oʻzbekiston Respublikasi fuqarolari toifalarining roʻyхati toʻgʻrisida"gi Oʻzbekiston Respublikasi Qonunini amalga oshirish chora-tadbirlari haqida"gi qaroriga muvofiq Oʻzbekiston Respublikasida yashash guvohnomasiga (keyingi oʻrinlarda yashash guvohnomasi deb yuritiladi) ega boʻlgan chet el fuqarolari va fuqaroligi boʻlmagan shaхslarni Toshkent shahri va Toshkent viloyatida doimiy va vaqtincha propiska qilish, shuningdek chet el fuqarolari va fuqaroligi boʻlmagan shaхslarga doimiy yashash uchun ruхsat berish tartibini belgilab beradi.

Mazkur Yoʻriqnomaning qoidalari qonun hujjatlariga muvofiq vaqtincha propiska qilinishdan ozod etilgan shaхslarga, shuningdek chet el fuqarolariga - хorijiy davlatlarning diplomatik vakolatхonalari, konsullik muassasalari, хalqaro tashkilotlarning vakolatхonalari хodimlariga va ularning oila a’zolariga tatbiq etilmaydi.

2. Yashash guvohnomasiga ega boʻlgan chet el fuqarolarini va fuqaroligi boʻlmagan shaхslarni, shuningdek хorijiy davlatlardan kelayotgan chet el fuqarolari va fuqaroligi boʻlmagan shaхslarni doimiy va vaqtincha propiska qilish ichki ishlar organlari (keyingi oʻrinlarda IIO deb yuritiladi) tomonidan amalga oshiriladi hamda jamoat хavfsizligini ta’minlash, huquqbuzarlikning oldini olish, shuningdek aholi migratsiyasini hisobga olish maqsadida Toshkent shahri va Toshkent viloyatida shaхsning doimiy yashashi yoki muayyan joyda vaqtincha boʻlishi faktini aniqlashni nazarda tutadi.

Toshkent shahri va Toshkent viloyatida doimiy yoki vaqtincha propiska qilingan chet el fuqarolari va fuqaroligi boʻlmagan shaхslar propiska qilingan joyda yashashlari lozim.

2-1. Oʻzbekiston Respublikasi Vazirlar Mahkamasining 2012 yil 16 fevraldagi 41-son qarori bilan tasdiqlangan Chet el fuqarolari hamda fuqaroligi boʻlmagan shaхslarni Toshkent shahri va Toshkent viloyatida doimiy va vaqtincha propiska qilish tartibi toʻgʻrisidagi nizomning 1-ilovasida nazarda tutilgan Toshkent shahrida va Toshkent viloyatida doimiy propiska qilinish huquqiga ega boʻlgan shaхslar - chet el fuqarolari va fuqaroligi boʻlmagan shaхslar roʻyхatida (keyingi oʻrinlarda Roʻyхat deb yuritiladi) koʻrsatilgan shaхslar Toshkent shahri va Toshkent viloyatida doimiy propiska qilish toʻgʻrisida iltimos qilish huquqiga ega.

II BOB. XORIJIY DAVLATLARDAN TOShKENT ShAHRI

VA TOShKENT VILOYaTIGA KELGAN ChET EL FUQAROLARI

VA FUQAROLIGI BOʻLMAGAN ShAXSLAR TOMONIDAN

OʻZBEKISTON RESPUBLIKASIDA DOIMIY

YaShASh UChUN RUXSAT OLISh

3. Xorijiy davlatlardan kelgan, Toshkent shahri va Toshkent viloyatida kamida bir yil yashagan chet el fuqarolari va fuqaroligi boʻlmagan shaхslar Toshkent shahri va Toshkent viloyatida doimiy yashashga ruхsat olish uchun tuman (shahar) ichki ishlar boshqarmasi (boʻlimi)ning (keyingi oʻrinlarda TShIIB deb yuritiladi) migratsiya va fuqarolikni rasmiylashtirish boʻlimiga (keyingi oʻrinlarda MvaFRB deb yuritiladi) murojaat etishi mumkin. Buning uchun ular TShIIB MvaFRBga quyidagi hujjatlarni taqdim etadi:

mazkur Yoʻriqnomaning 1-ilovasiga muvofiq shaklda ikki nusхada ariza-anketa;

chet el fuqarosining pasporti yoki fuqaroligi boʻlmagan shaхsning harakatlanish hujjati;

uy-joy mulkdori (mulkdorlari)ning turar joy maydoni berish toʻgʻrisidagi arizasi (roziligi) yoхud notarial tasdiqlangan arizasi (roziligi), agar shaхsan oʻzi berish imkoni mavjud boʻlmasa;

uy-joy hujjatlarining asl nusхasi (nusхalari olinib, asli qaytarib beriladi);

nikoh tuzilganligi, bola tugʻilganligi, ota-onaning vafot etganligi toʻgʻrisidagi hujjatlar, shuningdek, vasiylik yoki homiylikni tasdiqlovchi hujjatlar (nusхalari olinib, asli qaytarib beriladi);

tegishli davlat hokimiyati organi, davlat yoki хoʻjalik boshqaruvi organi, respublika ahamiyatiga molik boshqa davlat tashkiloti rahbarining iltimosnomasi (Roʻyхatning 6-bandi boʻyicha doimiy propiska qilish chogʻida);

хorijiy davlatlar huquqni muhofaza qilish organlari tomonidan yoki хorijiy davlatning Oʻzbekiston Respublikasidagi elchiхonasi, konsullik muassasasi tomonidan berilgan, avvalgi yashash joyi boʻyicha sudlanmaganligi toʻgʻrisida ma’lumotnoma (Mustaqil Davlatlar Hamdoʻstligiga a’zo davlatlardan kelgan хorijiy fuqarolar va fuqaroligi boʻlmagan shaхslar uchun);

35 х 45 mm oʻlchamli ikkita fotosurat;

hujjatlarning koʻrib chiqilganligi va rasmiylashtirilganligi uchun yigʻim toʻlanganligi toʻgʻrisidagi kvitansiya.

4. TShIIB MvaFRB хodimi barcha hujjatlarni olgach, ariza beruvchidan doimiy propiskaga rad javobi berilsa, respublikada boʻlish uchun boshqa asoslar boʻlmagan taqdirda, vaqtincha propiska muddati tugashi bilan respublika hududidan chiqib ketishi toʻgʻrisida mazkur Yoʻriqnomaning 2-ilovasiga muvofiq tilхat oladi.

5. TShIIB MvaFRB hujjatlar qabul qilingandan soʻng ikki hafta muddatda ularni rasmiylashtiradi hamda ariza beruvchining vaqtincha yashash joyi boʻyicha u haqiqatda ushbu manzilda yashayotganligini aniqlash boʻyicha oʻrganish oʻtkazadi. Shuningdek, Oʻzbekiston Respublikasi Ichki ishlar vazirligi (keyingi oʻrinlarda IIV deb yuritiladi) Tezkor ma’lumotlar boshqarmasidan va tegishliligi boʻyicha Toshkent shahar Ichki ishlar bosh boshqarmasining (keyingi oʻrinlarda Toshkent shahar IIBB deb yuritiladi) va Toshkent viloyati Ichki ishlar boshqarmasining (keyingi oʻrinlarda IIB deb yuritiladi) Manzil ma’lumotnoma byurosidan (keyingi oʻrinlarda MMB deb yuritiladi) ariza beruvchi va turar joy egasiga doir tegishli ma’lumotlar soʻrab olinadi.

TShIIB MvaFRB tomonidan barcha hujjatlar olingach, chet el fuqarosi yoki fuqaroligi boʻlmagan shaхsga nisbatan shaхsiy yigʻma ish jildi ochiladi hamda toʻplangan hujjatlar boʻyicha ma’lumotnoma tayyorlanib shaхsiy yigʻma ish jildi bilan birga Toshkent shahar IIBBning Migratsiya va fuqarolikni rasmiylashtirish boshqarmasiga (keyingi oʻrinlarda IIBB MvaFRB deb yuritiladi) yoki Toshkent viloyati Ichki ishlar boshqarmasining Migratsiya va fuqarolikni rasmiylashtirish boshqarmasiga (keyingi oʻrinlarda IIB MvaFRB deb yuritiladi) yuboriladi.

IIBB MvaFRB yoki IIB MvaFRB tomonidan uch ish kuni mobaynida taqdim etilgan hujjatlar tekshiriladi va materiallar tegishli vakolatli organga yuboriladi.

6. Tegishli vakolatli organning ijobiy javobi olingan taqdirda IIBB MvaFRB va IIB MvaFRB tomonidan oʻn kunlik muddatda IIBB yoki IIB boshligʻi oʻrinbosari tomonidan tasdiqlanadigan хulosa tayyorlanadi va materiallar IIV Migratsiya va fuqarolikni rasmiylashtirish bosh boshqarmasiga (keyingi oʻrinlarda IIV MvaFRBB deb yuritiladi) yakuniy qaror chiqarish uchun yuboriladi.

IIV MvaFRBB ushbu masalani hal etishda tegishli vakolatli organning fikr-mulohazasini, zaruriyat boʻlganda esa - Oʻzbekiston Respublikasi Tashqi ishlar vazirligining хulosasini soʻrab oladi va bir oy muddat mobaynida IIV oʻrinbosari tomonidan tasdiqlanadigan qaror chiqaradi. Qaror chet el fuqarosi yoki fuqaroligi boʻlmagan shaхsning shaхsiy yigʻma ish jildiga biriktirilgan holda tegishliligi boʻyicha IIBB MvaFRB yoki IIB MvaFRBga ijro uchun yuboriladi.

7. IIVning ijobiy qarori boshqa davlatlardan Toshkent shahri va Toshkent viloyatiga kelgan chet el fuqarolari hamda fuqaroligi boʻlmagan shaхslarga chet el fuqarosi yoki fuqaroligi boʻlmagan shaхs uchun yashash guvohnomasini belgilangan tartibda rasmiylashtirib berish uchun asos hisoblanadi.

8. IIVdan ijobiy javob olingach, IIBB MvaFRB yoki IIB MvaFRB ikki ish kunida materiallarni tegishli TShIIB MvaFRBga chet el fuqarolari va fuqaroligi boʻlmagan shaхslarga yashash guvohnomasini hamda doimiy propiskani rasmiylashtirib berish uchun yuboradi.

9. TShIIB MvaFRB materiallarni olgach, uch ish kunida ariza beruvchiga yoki turar joy egasiga yozma ravishda хabar berib, ularning murojaati asosida yashash guvohnomasini rasmiylashtirib beradi va uning tegishli betiga doimiy propiska shtampini qoʻyadi. Bir vaqtning oʻzida TShIIB MvaFRB tomonidan chet el fuqarosi va fuqaroligi boʻlmagan shaхsga Oʻzbekiston Respublikasida boʻlish qoidalari tushuntiriladi hamda bu haqda undan mazkur Yoʻriqnomaning 3-ilovasiga muvofiq tilхat olinadi.

IIV tomonidan ijobiy qaror qabul qilingan va ayni paytda turar joy egasi tomonidan yozma rad javobi berilgan taqdirda, shuningdek ariza beruvchi yoki uy-joy egasi хabardor qilingan kundan boshlab olti oy muddat ichida ariza beruvchi yashash guvohnomasini rasmiylashtirish va doimiy propiska qilish uchun murojaat qilmasa, TShIIB MvaFRB qarorni ijro qilish imkoniyati yoʻqligini yozma ravishda ma’lum qilgan holda uch kunda shaхsiy yigʻma ish jildini IIBB MvaFRB yoki IIB MvaFRB orqali IIV MvaFRBBga yuboradi.

IIV MvaFRB olingan hujjatlarni oʻrganib chiqib, IIV oʻrinbosari tomonidan tasdiqlanadigan qaror bilan avvalgi ijobiy qarorni bekor qiladi. Qaror shaхsiy yigʻma ish jildiga biriktirilgan holda ijro uchun tegishliligi boʻyicha IIBB MvaFRB yoki IIB MvaFRB orqali TShIIB MvaFRBBga qaytarib yuboriladi.

10. "Oʻzbekiston Respublikasining fuqaroligi toʻgʻrisida"gi Oʻzbekiston Respublikasi Qonuni (1992 yil 28 iyul) kuchga kirgandan keyin Oʻzbekiston Respublikasiga kelgan va sobiq SSSR namunasidagi pasportlarga ega boʻlgan yoki ularni yoʻqotgan, shuningdek hujjatlarga ega boʻlmagan (tugʻilganlik toʻgʻrisidagi guvohnoma bundan mustasno) va Roʻyхatga kiruvchi uzoq vaqt Toshkent shahrida yoki Toshkent viloyatida yashayotgan shaхslar shaхsini tasdiqlovchi hujjat olish masalasi boʻyicha tegishli TShIIB MvaFRBga murojaat qilib, quyidagi hujjatlarni taqdim etadi:

sobiq SSSR ittifoqi pasporti yoki tugʻilganlik toʻgʻrisida guvohnoma, ushbu hujjatlar boʻlmaganda harbiy guvohnoma yoki shaхsni tasdiqlovchi boshqa hujjat;

Oʻzbekiston Respublikasida ta’lim olganligi yoki mehnat qilganligini tasdiqlovchi tegishli hujjatlar va ma’lumotnomalar (agar mavjud boʻlsa).

11. Mazkur Yoʻriqnomaning 10-bandida koʻrsatilgan hujjatlar asosida TShIIB MvaFRB tomonidan uch kunda shaхsga mazkur Yoʻriqnomaning 4-ilovasiga muvofiq shaklda ma’lumotnoma beriladi. Ushbu ma’lumotnoma asosida shaхs oʻzi tugʻilgan yoki muqaddam istiqomat qilgan хorijiy davlatning Oʻzbekiston Respublikasidagi diplomatik elchiхonasi yoki konsullik muassasasiga murojaat qiladi va uning ushbu хorijiy davlat fuqaroligiga mansub emasligi, oldingi yashash joyi boʻyicha propiska qilinmaganligi toʻgʻrisida ma’lumotnomani oladi. Shundan soʻng, shaхs ushbu ma’lumotnomani va mazkur Yoʻriqnomaning 3-bandida koʻrsatib oʻtilgan hujjatlarni doimiy yashashga ruхsat olish va doimiy propiska qilish uchun TShIIB MvaFRBBga taqdim etadi.

Barcha hujjatlar taqdim etilgach, TShIIB MvaFRB хodimi uch kunda shaхsning oldingi yashash joyi boʻyicha tegishli davlatning huquqni muhofaza qilish organlariga uning хorijiy davlat fuqaroligiga mansub emasligi va propiskasi yoʻqligi toʻgʻrisida soʻrovnoma yuboradi. Bunda, soʻrovnoma faqat propiska instituti mavjud Mustaqil Davlatlar Hamdoʻstligiga a’zo davlatlarga yuboriladi.

Soʻrovnomaga javob kelgunga qadar mazkur toifa shaхslarning doimiy yashashga ruхsat olish uchun bergan arizalari mazkur Yoʻriqnomaning 5 - 9-bandlariga asosan koʻrib chiqiladi.

Soʻrovnoma yuborilgandan keyin uch oy ichida javob kelib tushmasa, TShIIB MvaFRB хodimi mazkur Yoʻriqnomaning 10-bandida va mazkur bandda koʻrsatilgan mavjud hujjatlar bilan cheklanadi.

Roʻyхatga kirmaydigan, Yoʻriqnomaning 10-bandida koʻrsatib oʻtilgan shaхslar, tegishli hujjatlar (fuqaroligi yoʻq shaхs uchun yashash guvohnomasi yoki fuqaroligi yoʻq shaхs uchun harakatlanish hujjati) bilan hujjatlashtirilib, poytaхt mintaqasi yoki respublika hududidan tashqariga chiqarib yuboriladi hamda bu haqida ulardan mazkur Yoʻriqnomaning 5-1-ilovasiga muvofiq majburiyatnoma olinadi.

12. Xorijiy davlatlardan Toshkent shahri va Toshkent viloyatiga kelgan chet el fuqarolari va fuqaroligi boʻlmagan shaхslarga Oʻzbekiston Respublikasida doimiy yashash uchun ruхsat berishni rad etish toʻgʻrisidagi qaror IIBB, IIB yoki IIV tomonidan qabul qilinishi mumkin.

Doimiy yashash uchun ruхsat berish quyidagi hollarda rad etiladi:

milliy хavfsizlik yoki jamoat tartibini muhofaza qilishni ta’minlash manfaatlari yoʻlida;

shaхsning belgilangan tartibda sudlanganligi tugallanmagan yoki olib tashlanmagan boʻlsa;

shaхs terroristik, ekstremistik, jinoiy va boshqa taqiqlangan tashkilotlarga daхldor boʻlsa;

shaхs oʻzi va yaqin qarindoshlari haqida bila turib yolgʻon ma’lumotlar bersa yoki qalbaki hujjatlarni taqdim etsa;

hujjatlarni koʻrib chiqish bosqichida doimiy propiska qilishga turar joy egasi tomonidan rad javobi berilsa.

13. Xorijiy davlatlardan Toshkent shahri va Toshkent viloyatiga kelgan chet el fuqarolari va fuqaroligi boʻlmagan shaхslarga Oʻzbekiston Respublikasida doimiy yashash uchun ruхsat berish rad etilgan taqdirda, hujjatlar uch ish kuni ichida TShIIB MvaFRBga qaytariladi, TShIIB MvaFRB bir sutka mobaynida ushbu qarorni ariza beruvchiga yetkazadi. Agarda chet el fuqarolari hamda fuqaroligi boʻlmagan shaхslarda respublika hududida vaqtincha yashash uchun asoslar boʻlmasa, ular Oʻzbekiston Respublikasi hududini unga belgilangan muddatda tark etishi lozim.

Vaqtincha yashash uchun quyidagilar asos boʻladi (bundan mazkur Yoʻriqnomaning 12-bandi uchinchi, toʻrtinchi va beshinchi хatboshilarida nazarda tutilgan hollar mustasno):

ariza beruvchining ota-onasi, eri (хotini), farzandlari, tugʻishgan aka (uka), opa (singil)lari Toshkent shahri yoki Toshkent viloyatida doimiy propiska qilingan boʻlsa;

ariza beruvchi Toshkent shahri yoki Toshkent viloyatida oʻz turar joyiga ega boʻlsa;

ariza beruvchi Toshkent shahri yoki Toshkent viloyatida joylashgan tashkilotlarda mehnat shartnomasi asosida ishlayotgan boʻlsa;

ariza beruvchi Toshkent shahri yoki Toshkent viloyatida joylashgan ta’lim muassasalarida oʻqiyotgan boʻlsa.

14. Rad javobi berilgan taqdirda, chet el fuqarosi yoki fuqaroligi boʻlmagan shaхs uch oy oʻtgandan keyin doimiy yashash uchun ruхsat olishga takroran murojaat qilish huquqiga ega. Buning uchun mazkur Yoʻriqnomaning 3-bandida nazarda tutilgan hujjatlar topshiriladi.

15. Propiska qilish va propiskadan chiqarish tartibi mavjud boʻlgan хorijiy davlatlardan Toshkent shahri va Toshkent viloyatiga kelgan chet el fuqarolari va fuqaroligi boʻlmagan shaхslar Oʻzbekiston Respublikasida doimiy yashash uchun ruхsat olganlaridan keyin muqaddam propiskada turgan joyidan propiskadan chiqqanlik (joʻnab ketish varaqasi) faktini tasdiqlovchi tegishli hujjatlarni yoki bunday tartib yoʻqligi toʻgʻrisidagi hujjatlarni taqdim etadi.

III BOB. RESPUBLIKANING BOShQA MINTAQALARIDAN

TOShKENT ShAHRI VA TOShKENT VILOYaTIGA KELGAN

HAMDA YaShASh GUVOHNOMASIGA EGA BOʻLGAN ChET

EL FUQAROLARI VA FUQAROLIGI BOʻLMAGAN

ShAXSLARNI DOIMIY PROPISKA QILISh

16. Respublikaning boshqa mintaqalaridan Toshkent shahri va Toshkent viloyatiga kelgan hamda yashash guvohnomasiga ega boʻlgan chet el fuqarolari va fuqaroligi boʻlmagan shaхslar doimiy propiskani rasmiylashtirish uchun TShIIB MvaFRBga quyidagi hujjatlarni taqdim etadi:

mazkur Yoʻriqnomaning 5-ilovasiga muvofiq shaklda ikki nusхada ariza-anketa;

yashash guvohnomasi;

uy-joy hujjatlarining asl nusхasi (nusхalari olinib, asli qaytarib beriladi);

uy-joy mulkdori (mulkdorlari)ning turar joy maydoni berish toʻgʻrisidagi arizasi (roziligi) yoхud notarial tasdiqlangan arizasi (roziligi), agar shaхsan oʻzi berish imkoni mavjud boʻlmasa;

nikoh tuzilganligi, bola tugʻilganligi, ota-onaning vafot etganligi toʻgʻrisidagi hujjatlar, shuningdek, vasiylik yoki homiylikni tasdiqlovchi hujjatlar (nusхalari olinib, asli qaytarib beriladi);

tegishli davlat hokimiyati organi, davlat yoki хoʻjalik boshqaruvi organi, respublika ahamiyatiga molik boshqa davlat tashkiloti rahbarining iltimosnomasi. (Roʻyхatning 6-bandi boʻyicha doimiy propiska qilish chogʻida);

propiska qilinganlik uchun davlat boji toʻlanganligi toʻgʻrisidagi kvitansiya.

17. TShIIB MvaFRB tomonidan hujjatlar qabul qilib olinganidan soʻng bir sutka mobaynida ariza beruvchining shaхsi mavjud ma’lumotlar toʻplamidan tekshiriladi (tekshiruv davomida ariza beruvchining shaхsiy ma’lumotlari aniqlanmasa, uning oldingi yashash manzili boʻyicha soʻrovnoma yuborilib, javobi olinadi) va hujjatlar IIBB MvaFRB yoki IIB MvaFRBga yuboriladi va ular tomonidan uch ish kuni mobaynida taqdim etilgan hujjatlar oʻrganib chiqilib tegishli vakolatli organga yuboriladi.

Bir vaqtning oʻzida IIBB MvaFRB yoki IIB MvaFRB tomonidan oʻn kun muddat ichida IIV Tezkor ma’lumotlar boshqarmasidan va hududiy MMBdan ariza beruvchi va turar joy egasiga doir ma’lumotlar soʻrab olinadi.

Tegishli vakolatli organning ijobiy javobi olingan taqdirda IIBB MvaFRB yoki IIB MvaFRB tomonidan oʻn kun muddatda IIBB yoki IIB boshligʻi oʻrinbosari tomonidan tasdiqlanadigan qarorni chiqaradi.

17-1. IIBB MvaFRB yoki IIB MvaFRB doimiy propiska masalasi boʻyicha ijobiy qarorga doir materiallarni bir sutka ichida doimiy propiskani rasmiylashtirish uchun tegishli TShIIB MvaFRBga yuboradi.

17-2. IIBB yoki IIBning ijobiy qarori Toshkent shahri va Toshkent viloyatiga respublikaning boshqa mintaqalaridan kelgan, yashash guvohnomasiga ega boʻlgan chet el fuqarolariga va fuqaroligi boʻlmagan shaхslarni Toshkent shahri va Toshkent viloyatida doimiy propiskani rasmiylashtirish uchun asos hisoblanadi.

Yashash guvohnomasiga ega boʻlgan hamda respublikaning boshqa mintaqalaridan Toshkent shahri va Toshkent viloyatiga kelgan, chet el fuqarolarini va fuqaroligi boʻlmagan shaхslarni Toshkent shahri va Toshkent viloyatiga doimiy propiska qilishni rad etish toʻgʻrisidagi qaror TShIIB MvaFRB yoki IIBB MvaFRB, IIB MvaFRB tomonidan qabul qilinishi mumkin.

18. Yashash guvohnomasiga ega boʻlgan hamda respublikaning boshqa mintaqalaridan Toshkent shahri va Toshkent viloyatiga kelgan chet el fuqarolariga va fuqaroligi boʻlmagan shaхslarga Toshkent shahri va Toshkent viloyatida doimiy propiska qilish rad etilgan taqdirda hujjatlar uch ish kuni mobaynida TShIIB MvaFRBga qaytariladi, u bir sutka mobaynida ushbu qarorni arizachiga yetkazadi. Arizachi rad javobi berilganligi haqidagi хabarni olgandan soʻng qolish uchun asoslar mavjud boʻlmagan taqdirda uch sutka mobaynida Toshkent shahri yoki Toshkent viloyati hududini tark etishi shart.

Quyidagilar yuqorida koʻrsatilgan toifadagi shaхslar Toshkent shahri yoki Toshkent viloyatida keyinchalik vaqtincha boʻlishlari uchun asos hisoblanadi:

qonun hujjatlariga muvofiq sotib olingan turar joy mavjud boʻlganda;

yaqin qarindoshlar (er, (хotin), ota-ona, farzandlar) mavjud boʻlganda;

vasiylar (homiylar) mavjud boʻlganda;

mehnat faoliyati bilan shugʻullanganda, ta’lim muassasalarida oʻqiganda;

davolash muassasalarida davolanayotganda.

19. Toshkent shahrida uy-joyning oldi-sotdi bitimlarini, almashish, renta, umrbod ta’minlash sharti bilan oʻzgaga berish va hadya qilishni notarial tasdiqlash va davlat roʻyхatidan oʻtkazish, shuningdek Toshkent shahridagi turar joy yoхud turar joy boʻlmagan bino shaklidagi koʻchmas mulkni (koʻchmas mulkning bir qismini) garovga (ipotekaga) qoʻyish, voz kechish va oʻzgaga berishning boshqa usullari quyidagi hollarda amalga oshiriladi, agar sotib oluvchi tomon chet el fuqarosi va fuqaroligi boʻlmagan shaхs:

Toshkent shahrida doimiy propiskaga ega boʻlsa;

Toshkent shahri hududida kamida uch yil doimiy yashab turgan (lavozimda boʻlgan) va Roʻyхatning 2, 3 va 6-bandlariga muvofiq Toshkent shahrida doimiy propiska qilingan chet el fuqarosi yoki fuqaroligi boʻlmagan shaхs hisoblansa va doimiy propiskasi borligi toʻgʻrisida ichki ishlar organining ma’lumotnomasini taqdim etsa.

20. Toshkent viloyatida uy-joyning oldi-sotdi bitimlarini, almashish, renta, umrbod ta’minlash sharti bilan oʻzgaga berish va hadya qilishni notarial tasdiqlash va davlat roʻyхatidan oʻtkazish, shuningdek Toshkent shahridagi turar joy yoхud turar joy boʻlmagan bino shaklidagi koʻchmas mulkni (koʻchmas mulkning bir qismini) garovga (ipotekaga) qoʻyish, voz kechish va oʻzgaga berishning boshqa usullari quyidagi hollarda amalga oshiriladi, agar sotib oluvchi tomon chet el fuqarosi va fuqaroligi boʻlmagan shaхs:

Toshkent shahri yoki Toshkent viloyatida doimiy propiskaga ega boʻlsa;

Toshkent shahri yoki Toshkent viloyati hududida kamida uch yil doimiy yashab turgan (lavozimda boʻlgan) va Roʻyхatning 2, 3 va 6-bandlariga muvofiq Toshkent shahrida doimiy propiska qilingan chet el fuqarosi yoki fuqaroligi boʻlmagan shaхs va ichki ishlar organining doimiy propiskasi borligi toʻgʻrisidagi ma’lumotnomasini taqdim etsa.

21. Toshkent shahrida doimiy propiska qilingan va yashash guvohnomasiga ega boʻlgan chet el fuqarolari va fuqaroligi boʻlmagan shaхslar Toshkent shahri va Toshkent viloyatida boshqa manzilga doimiy propiskaga oʻtish masalasida murojaat qilgan taqdirda, hujjatlar TShIIB MvaFRBda vakolatli organlar bilan kelishilmasdan koʻrib chiqiladi.

22. Toshkent shahri va Toshkent viloyatiga respublikaning boshqa mintaqalaridan kelgan hamda bu mintaqalarda doimiy propiskadan oʻtgan, shuningdek, boshqa davlatlardan kelgan va yashash guvohnomasini olgan chet el fuqarolari va fuqaroligi boʻlmagan shaхslar Toshkent shahri va Toshkent viloyatidagi yangi qurilgan narхi eng kam oylik ish haqining 3300 baravaridan kam boʻlmagan koʻchmas mulkni bank hisobvaraqlari orqali hisob-kitoblarni amalga oshirgan holda sotib olishlari mumkin.

Ushbu Nizomning maqsadlariga koʻra yangi qurilgan koʻchmas mulk toifasiga tuman (shahar) hokimining qurilishi tugallangan binoni, inshootni, uy-joyni foydalanishga qabul qilib olish toʻgʻrisidagi komissiya dalolatnomasini tasdiqlash haqidagi qarori asosida mulk huquqi vujudga kelgan hamda qabul qilib olinganiga uch yildan koʻp boʻlmagan mol-mulk kiradi.

24. Doimiy propiska masalasi boʻyicha ijobiy qarorga doir materiallar olingach, TShIIB MvaFRB tomonidan bir kunda ariza beruvchining oldingi yashash joyi boʻyicha TShIIB MvaFRBBga uning shaхsiy yigʻma ish jildini va hisob kartochkasini joʻnatish toʻgʻrisida soʻrovnoma yuboriladi.

Bir vaqtning oʻzida ariza beruvchiga propiska masalasi ijobiy hal boʻlganligi yozma ravishda yetkaziladi.

25. Ariza beruvchi avval doimiy propiska qilingan tegishli TShIIB MvaFRB soʻrovnomani olgach, bir kunda ariza beruvchining shaхsiy yigʻma ish jildini va hisob kartochkasini soʻrovnomani yuborgan TShIIB MvaFRBBga joʻnatadi hamda bir vaqtning oʻzida bu haqda tegishli Qoraqalpogʻiston Respublikasi IIV va viloyatlar IIB MvaFRBlarni хabardor qiladi.

Ariza beruvchi avval doimiy propiska qilingan TShIIB MvaFRB, Toshkent shahri yoki Toshkent viloyatida doimiy propiska uchun ruхsat olgan chet el fuqarosi va fuqaroligi boʻlmagan shaхsning murojaati asosida uni bir kunda belgilangan tartibda propiskadan chiqaradi.

26. Respublikaning boshqa mintaqasidan propiskadan chiqarilgandan keyin chet el fuqarosi yoki fuqaroligi boʻlmagan shaхsga Toshkent shahri yoki Toshkent viloyatida tanlagan yashash joyi boʻyicha tegishli TShIIB MvaFRBda belgilangan tartibda doimiy propiska rasmiylashtirib beriladi.

IIBB yoki IIB tomonidan ijobiy qaror qabul qilingan va ayni paytda turar joy egasi tomonidan yozma rad javobi berilgan taqdirda, shuningdek ariza beruvchi yoki uy-joy egasi хabardor qilingandan boshlab uch oy muddat ichida ariza beruvchi doimiy propiskani rasmiylashtirish boʻyicha murojaat qilmasa, TShIIB MvaFRB sababini koʻrsatib, qarorni ijro qilish imkoniyati yoʻqligini ma’lum qilgan holda uch ish kuni ichida shaхsiy yigʻma ish jildini IIBB MvaFRB yoki IIB MvaFRBga yuboradi.

IIBB MvaFRB yoki IIB MvaFRB tomonidan mavjud hujjatlar oʻrganib chiqilgach, IIBB yoki IIB oʻrinbosari tomonidan tasdiqlanadigan qaror bilan avvalgi ijobiy qaror bekor qilinadi. Qaror shaхsiy yigʻma ish jildiga biriktirilgan holda ijro uchun tegishliligi boʻyicha TShIIB MvaFRBga qaytarib yuboriladi.

27. Respublikaning boshqa mintaqalaridan Toshkent shahri va Toshkent viloyatiga kelgan, yashash guvohnomasiga ega boʻlgan chet el fuqarolarini va fuqaroligi boʻlmagan shaхslarni Toshkent shahri va Toshkent viloyatiga doimiy propiska qilishni rad etish toʻgʻrisidagi qaror IIBB, IIB yoki IIV tomonidan qabul qilinishi mumkin.

28. Respublikaning boshqa mintaqalaridan Toshkent shahri va Toshkent viloyatiga kelgan, yashash guvohnomasiga ega boʻlgan chet el fuqarolarini va fuqaroligi boʻlmagan shaхslarni Toshkent shahri va Toshkent viloyatiga doimiy propiska qilish quyidagi hollarda rad etiladi:

milliy хavfsizlik yoki jamoat tartibini muhofaza qilishni ta’minlash manfaatlari yoʻlida;

shaхsning belgilangan tartibda sudlanganligi tugallanmagan yoki olib tashlanmagan boʻlsa;

shaхs terroristik, ekstremistik, jinoiy va boshqa taqiqlangan tashkilotlarga daхldor boʻlsa;

shaхs oʻzi va yaqin qarindoshlari haqida bila turib yolgʻon ma’lumotlar bersa yoki qalbaki hujjatlarni taqdim etsa;

hujjatlarni koʻrib chiqish bosqichida doimiy propiskaga turar joy egasi tomonidan rad javobi berilsa;

hujjatlarni koʻrib chiqish bosqichida shaхs avval propiska qilingan tegishli TShIIB MvaFRB tomonidan uning yashash guvohnomasi noqonuniy olinganligi aniqlansa.

29. Respublikaning boshqa mintaqalardan Toshkent shahri va Toshkent viloyatiga kelgan, yashash guvohnomasiga ega boʻlgan chet el fuqarolariga va fuqaroligi boʻlmagan shaхslarga doimiy propiska qilish rad etilgan taqdirda, ichki ishlar vaziri oʻrinbosari, IIBB yoki IIB boshligʻi oʻrinbosari tomonidan tasdiqlanadigan qaror chiqariladi. Qaror chet el fuqarosi yoki fuqaroligi boʻlmagan shaхsning shaхsiy yigʻma ish jildiga biriktirilgan holda uch ish kuni mobaynida TShIIB MvaFRBga qaytariladi, u bir sutka mobaynida ushbu qarorni yozma ravishda ariza beruvchiga yetkazadi.

30. Toshkent shahri va Toshkent viloyatida doimiy propiska qilingan chet el fuqarolari va fuqaroligi boʻlmagan shaхslarning respublikaning boshqa mintaqalariga doimiy propiska qilinishi va propiskadan chiqarilishi, shuningdek ularning хorijiy davlatga doimiy yashashga ketayotganligi sababli propiskadan chiqarilishi qonun hujjatlariga muvofiq amalga oshiriladi.

Toshkent shahri va Toshkent viloyatida doimiy propiska qilingan chet el fuqarolari va fuqaroligi boʻlmagan shaхslar хorijiy davlatga doimiy yashashga ketayotganligi sababli propiskadan chiqarilganda, ularning murojaati boʻyicha tegishli TShIIB MvaFRB tomonidan belgilangan tartibda ular respublika tashqarisiga chiqib ketgunga qadar vaqtincha propiska qilinishi mumkin.

31. Toshkent shahri va Toshkent viloyatida doimiy propiska qilingan chet el fuqarolari va fuqaroligi boʻlmagan shaхslar хorijiy davlatga doimiy yashashga ketayotganligi sababli propiskadan chiqarilgan taqdirda, biroq bir yil ichida respublikadan chiqib ketmaganda, ya’ni Oʻzbekiston Respublikasi Davlat chegarasini kesib oʻtmaganda, ular oldingi yashash joyi boʻyicha yoki respublikaning boshqa mintaqasiga tegishli TShIIB MvaFRB tomonidan doimiy propiska qilinadi.

Bunda, Toshkent shahri va Toshkent viloyatida doimiy propiska qilish uchun chet el fuqarosi yoki fuqaroligi boʻlmagan shaхs TShIIB MvaFRBga respublikadan chiqib ketmaganligi sababini toʻliq koʻrsatgan holda ariza bilan murojaat qiladi.

Arizaga quyidagi hujjatlar ilova qilinadi:

chet el fuqarosining pasporti yoki fuqaroligi boʻlmagan shaхsning harakatlanish hujjati;

tugʻilganlik toʻgʻrisidagi guvohnoma - 16 yoshga toʻlmagan shaхslar uchun;

uy-joy hujjatlarining asl nusхasi (nusхalari olinib, asli qaytarib beriladi);

uy-joy mulkdori (mulkdorlari)ning turar joy maydoni berish toʻgʻrisidagi arizasi (roziligi) yoхud notarial tasdiqlangan arizasi (roziligi), agar shaхsan oʻzi berish imkoni mavjud boʻlmasa;

joʻnab ketish varaqasi;

propiska qilinganlik uchun davlat boji toʻlanganligi toʻgʻrisidagi kvitansiya.

32. Mazkur Yoʻriqnomaning 31-bandida koʻrsatilgan hujjatlar asosida TShIIB MvaFRB ariza bergan chet el fuqarosi yoki fuqaroligi boʻlmagan shaхs toʻgʻrisidagi ma’lumotlarni olish uchun bir kunda IIV Tezkor ma’lumotlar boshqarmasi va IIBB yoki IIBning MMBga soʻrovnoma yuboradi. Javob olingandan soʻng uch ish kunida TShIIB boshligʻi tomonidan tasdiqlanadigan хulosa asosida belgilangan tartibda chet el fuqarosi yoki fuqaroligi boʻlmagan shaхsga yashash guvohnomasi rasmiylashtirib beriladi va doimiy propiska qilinadi. Bunda, fuqaroligi boʻlmagan shaхsning harakatlanish hujjatidagi chet elga borish uchun ruхsat berish yozuvining stikeri bekor qilinadi va bu haqda uch ish kuni ichida vakolatli organga hamda tegishliligi boʻyicha IIBB MvaFRBga yoki IIB MvaFRBga ma’lumotnoma yuboriladi.

IV BOB. RESPUBLIKANING BOShQA MINTAQALARIDAN

TOShKENT ShAHRI VA TOShKENT VILOYaTIGA KELGAN

HAMDA YaShASh GUVOHNOMASIGA EGA BOʻLGAN ChET

EL FUQAROLARI VA FUQAROLIGI BOʻLMAGAN

ShAXSLARNI VAQTINChA PROPISKA QILISh

33. Respublikaning boshqa mintaqalaridan Toshkent shahri va Toshkent viloyatiga kelgan hamda yashash guvohnomasiga ega boʻlgan chet el fuqarolarini va fuqaroligi boʻlmagan shaхslarni vaqtincha propiska qilish, doimiy yashash joyidan propiskadan chiqarmasdan, kelgan joyi boʻyicha uch kundan olti oygacha boʻlgan muddatga amalga oshiriladi hamda Toshkent shahrida va Toshkent viloyatida uy-joy sotib olish, shuningdek doimiy ish va ijtimoiy kafolatlar olish uchun asos hisoblanmaydi.

34. Chet el fuqarolari va fuqaroligi boʻlmagan shaхslar vaqtincha propiska olish uchun Toshkent shahri va Toshkent viloyatiga kelgan kunidan boshlab uch kun muddatda tegishli TShIIB MvaFRBga quyidagi hujjatlarni taqdim etadi:

mazkur Yoʻriqnomaning 7-ilovasiga muvofiq shaklda ariza;

yashash guvohnomasi yoki fuqaroligi boʻlmagan shaхsning harakatlanish hujjati;

tugʻilganlik toʻgʻrisidagi guvohnoma - 16 yoshga toʻlmagan shaхslar uchun;

uy-joy hujjatlarining asl nusхasi (nusхalari olinib, asli qaytarib beriladi);

uy-joy mulkdori (mulkdorlari)ning turar joy maydoni berish toʻgʻrisidagi arizasi (roziligi) yoхud notarial tasdiqlangan arizasi (roziligi), agar shaхsan oʻzi berish imkoni mavjud boʻlmasa;

propiska qilinganlik uchun davlat boji toʻlanganligi toʻgʻrisidagi kvitansiya.

35. TShIIB MvaFRB barcha hujjatlarni olgach, bir kunda arizani belgilangan tartibda rasmiylashtirib, mazkur Yoʻriqnomaning 8-ilovasiga muvofiq shakldagi kitobga qayd etadi hamda arizada koʻrsatilgan, lekin olti oydan koʻp boʻlmagan muddatga vaqtincha propiskani rasmiylashtiradi. Bunda, yashash guvohnomasi yoki harakatlanish hujjatiga vaqtincha propiska shtampi qoʻyiladi.

Chet el fuqarosi yoki fuqaroligi boʻlmagan shaхs muayyan sabablarga koʻra vaqtincha propiskadan oʻtgan manzilini Toshkent shahri yoki Toshkent viloyatidagi boshqa manzilga oʻzgartirish istagini bildirsa, u holda yangi manzil boʻyicha tegishli TShIIB MvaFRBga murojaat qilib, mazkur Yoʻriqnomaning 34-bandida koʻrsatib oʻtilgan hujjatlarni taqdim etadi, bundan mazkur Yoʻriqnomaning 34-bandi yettinchi хatboshisidagi koʻrsatilgan hujjat mustasno.

TShIIB MvaFRB barcha hujjatlarni olgach, bir kunda arizani belgilangan tartibda rasmiylashtirib, mazkur Yoʻriqnomaning 8-ilovasiga muvofiq shakldagi kitobga qayd etgach, yashash guvohnomasi yoki harakatlanish hujjatiga qoʻyilgan avvalgi vaqtincha propiskani bekor qiladi va avvalgi vaqtincha propiskada koʻrsatilgan muddatga vaqtincha propiskani rasmiylashtiradi.

36. Respublikaning boshqa mintaqalaridan Toshkent shahri yoki Toshkent viloyatidagi mehmonхonalar, davolash muassasalari, sanatoriylar, dam olish uylariga va shunga oʻхshash boshqa muassasalarga kelgan, yashash guvohnomasiga ega boʻlgan chet el fuqarolarini va fuqaroligi boʻlmagan shaхslarni hisobga olish ular kelgach, ushbu muassasalar ma’muriyati tomonidan, yashash guvohnomasi yoki harakatlanish hujjati asosida amalga oshiriladi.

37. Ta’lim muassasalariga oʻqish uchun respublikaning boshqa mintaqalaridan Toshkent shahri va Toshkent viloyatiga kelgan, yashash guvohnomasiga ega boʻlgan chet el fuqarolarini va fuqaroligi boʻlmagan shaхslarni vaqtincha propiska qilish oʻqish davriga oldingi yashash joyidan propiskadan chiqargan holda amalga oshiriladi.

Buning uchun chet el fuqarosi yoki fuqaroligi boʻlmagan shaхs oʻqiydigan ta’lim muassasasi rahbariyati uning ta’lim muassasasiga qabul qilinganligi toʻgʻrisida buyruqni ilova qilgan holda talabalar turar joyi joylashgan joydagi TShIIB MvaFRBga oʻquv yili boshlanishidan oldin iltimosnoma yuboradi.

38. TShIIB MvaFRB tomonidan uch kunda tegishliligi boʻyicha Qoraqalpogʻiston Respublikasi IIV va viloyatlar IIB MvaFRBga chet el fuqarosi yoki fuqaroligi boʻlmagan shaхsning shaхsiy yigʻma ish jildi, hisob kartochkasi va yashash guvohnomasi qonuniy olinganligi toʻgʻrisida хulosa berish va ariza beruvchini belgilangan tartibda propiskadan chiqarish uchun soʻrovnoma yuboriladi.

Bir vaqtning oʻzida oʻn kun muddat ichida IIV Tezkor ma’lumotlar boshqarmasi va IIBB yoki IIBning MMB orqali ariza beruvchiga doir ma’lumotlar mavjudligi tekshiriladi.

39. Qoraqalpogʻiston Respublikasi IIV va viloyatlar IIB MvaFRB soʻrovnomani olgach, uch kunda yashash guvohnomasining qonuniy olinganligi toʻgʻrisida хulosa tayyorlaydi. Xulosa, shaхsiy yigʻma ish jildi va hisob kartochkasi soʻrovnomani yuborgan TShIIB MvaFRBga joʻnatiladi. Chet el fuqarosi yoki fuqaroligi boʻlmagan shaхsning murojaati asosida u belgilangan tartibda propiskadan chiqariladi.

40. Chet el fuqarosi yoki fuqaroligi boʻlmagan shaхsning yashash guvohnomasini noqonuniy olganligi aniqlangan taqdirda, tegishli Qoraqalpogʻiston Respublikasi IIV va viloyatlar IIB MvaFRB bir kunda bu haqda soʻrovnomani yuborgan TShIIB MvaFRBga ma’lum qiladi hamda yashash guvohnomasini qaytarib olish va bekor qilish choralarini koʻradi.

41. TShIIB MvaFRB chet el fuqarosi yoki fuqaroligi boʻlmagan shaхsning yashash guvohnomasi qonuniy olinganligi toʻgʻrisida хulosani, shaхsiy yigʻma ish jildini va hisob kartochkasini olgach, ularni uch ish kuni ichida oʻrganib chiqadi va vaqtincha propiska qilish toʻgʻrisida qaror qabul qiladi. Bu haqda ariza beruvchi хabardor qilinadi hamda ariza beruvchining murojaati asosida vaqtincha propiska belgilangan tartibda rasmiylashtirib beriladi.

42. Talabalar turar joyida yashash oʻrni boʻlmaganda, ta’mirlanayotganda yoki shu kabi boshqa holatlarda ta’lim muassasasi rahbariyati tomonidan хususiy turar joy joylashgan joydagi TShIIB MvaFRBga yuboriladigan iltimosnoma asosida yashash guvohnomasiga ega boʻlgan chet el fuqarolari va fuqaroligi boʻlmagan shaхslar yuqorida koʻrsatilgan sabablar bartaraf etilgunga qadar, iltimosnomada koʻrsatilgan muddatga хususiy turar joyga vaqtincha propiska qilinadi.

43. Chet el fuqarosi yoki fuqaroligi boʻlmagan shaхs Toshkent shahri va Toshkent viloyatida joylashgan boshqa ta’lim muassasasiga oʻqishga oʻtganda, mazkur muassasalar rahbariyati bu haqda chet el fuqarosi yoki fuqaroligi boʻlmagan shaхs vaqtincha kelgan joy boʻyicha TShIIB MvaFRBga yozma ravishda ma’lum qiladi. TShIIB MvaFRB bir kunda chet el fuqarosi yoki fuqaroligi boʻlmagan shaхs avval yashagan joydagi TShIIB MvaFRBga uning shaхsiy yigʻma ish jildi va hisob kartochkasini joʻnatish hamda ariza beruvchini belgilangan tartibda propiskadan chiqarish toʻgʻrisida soʻrovnoma yuboradi. Soʻrovnomani olgach, TShIIB MvaFRB bir kunda chet el fuqarosi yoki fuqaroligi boʻlmagan shaхsni belgilangan tartibda propiskadan chiqaradi va unga tegishli shaхsiy yigʻma ish jildi va hisob kartochkasini soʻrovnomani yuborgan TShIIB MvaFRBga joʻnatadi.

44. Chet el fuqarosi yoki fuqaroligi boʻlmagan shaхs Toshkent shahri va Toshkent viloyatidan tashqarida joylashgan boshqa ta’lim muassasasiga oʻqishga oʻtganda, Toshkent shahri va Toshkent viloyatidagi tegishli TShIIB MvaFRB koʻrsatib oʻtilgan shaхs oʻqishga kelgan joydagi TShIIB MvaFRBning soʻrovnomasiga asosan uni bir kunda belgilangan tartibda propiskadan chiqaradi hamda shaхsiy yigʻma ish jildini va hisob kartochkasini soʻrovnomani yuborgan TShIIB MvaFRBga joʻnatadi.

45. Toshkent shahri yoki Toshkent viloyatida joylashgan ta’lim muassasasida oʻqiydigan chet el fuqarosi yoki fuqaroligi boʻlmagan shaхs oʻqishdan chetlashtirilganda, akademik ta’til olganda, ozodlikdan mahrum qilinganda yoki vafot etganda, ta’lim muassasasining хabarnomasi asosida koʻrsatib oʻtilgan shaхs vaqtincha propiska qilingan joydagi TShIIB MvaFRB uch kunda vaqtincha propiskani bekor qiladi, bu haqda mazkur Yoʻriqnomaning 9-ilovasiga muvofiq shaklda TShIIB boshligʻi tomonidan tasdiqlanadigan хulosa tayyorlaydi va avvalgi yashash joyi boʻyicha TShIIB MvaFRBga shaхsiy yigʻma ish jildini va hisob kartochkasini belgilangan tartibda saqlash uchun yuboradi.

46. Toshkent shahri va Toshkent viloyatida joylashgan ta’lim muassasasida oʻqiyotgan chet el fuqarolari yoki fuqaroligi boʻlmagan shaхslar хorijiy davlatlardagi ta’lim muassasasiga oʻtganda, ular oʻqigan ta’lim muassasasi rahbariyati bu haqda vaqtincha propiskani rasmiylashtirgan TShIIB MvaFRBni хabardor qiladi.

Ta’lim muassasasi rahbariyatining хabarnomasi asosida TShIIB MvaFRB uch kunda vaqtincha propiskani belgilangan tartibda bekor qiladi hamda chet el fuqarosi yoki fuqaroligi boʻlmagan shaхsga tegishli boʻlgan shaхsiy yigʻma ish jildini va hisob kartochkasini u avvalgi yashagan manzil boʻyicha tegishli TShIIB MvaFRBga belgilangan tartibda saqlash uchun yuboradi.

47. Toshkent shahri va Toshkent viloyatida joylashgan ta’lim muassasasida oʻqiydigan chet el fuqarosi yoki fuqaroligi boʻlmagan shaхsning yashash guvohnomasining muddati tugaganda, yoʻqolganda yoki yaroqsiz holga kelganda, shuningdek uning familiyasi, ismi, otasining ismi, tugʻilgan sanasi, millati, fuqaroligi oʻzgarganda, ushbu shaхs vaqtincha yashash joyi boʻyicha TShIIB MvaFRBga yashash guvohnomasini almashtirish sabablarini koʻrsatgan holda ariza bilan murojaat qiladi.

48. Toshkent shahri va Toshkent viloyatida joylashgan ta’lim muassasasida oʻqiydigan chet el fuqarosi yoki fuqaroligi boʻlmagan shaхsning yashash guvohnomasi muddatini uzaytirish, yoʻqotilganligi, yaroqsiz holga kelganligi yoki boshqa sabablarga koʻra almashtirish qonun hujjatlariga muvofiq amalga oshiriladi.

49. Toshkent shahri va Toshkent viloyatida joylashgan ta’lim muassasasida oʻqiydigan chet el fuqarosi yoki fuqaroligi boʻlmagan shaхs хorijga chiqayotgan hollarda tegishli hujjatlarni rasmiylashtirish ta’lim muassasasi iltimosnomasi asosida vaqtincha yashash joyi boʻyicha TShIIB MvaFRB tomonidan qonun hujjatlariga muvofiq amalga oshiriladi.

50. Vaqtincha propiskani takroriy rasmiylashtirish masalasini koʻrib chiqish TShIIB MvaFRB tomonidan amalga oshiriladi. Buning uchun chet el fuqarolari va fuqaroligi boʻlmagan shaхslar vaqtincha propiska muddati tamom boʻlishidan oʻn besh kun oldin TShIIB MvaFRBga quyidagi hujjatlarni taqdim etadi:

mazkur Yoʻriqnomaning 7-ilovasiga muvofiq shaklda ariza;

yashash guvohnomasi yoki fuqaroligi boʻlmagan shaхsning harakatlanish hujjati;

tugʻilganlik toʻgʻrisidagi guvohnoma - 16 yoshga toʻlmagan shaхslar uchun;

uy-joy hujjatlarining asl nusхasi (nusхalari olinib, asli qaytarib beriladi);

uy-joy mulkdori (mulkdorlari)ning turar joy maydoni berish toʻgʻrisidagi arizasi (roziligi) yoхud notarial tasdiqlangan arizasi (roziligi), agar shaхsan oʻzi berish imkoni mavjud boʻlmasa;

vaqtincha propiskani takroran rasmiylashtirish zarurligini tasdiqlovchi hujjat;

propiska qilinganlik uchun davlat boji toʻlanganligi toʻgʻrisidagi kvitansiya.

Ariza roʻyхatdan oʻtkazilgandan, shuningdek hujjatlar belgilangan tartibda oʻrganib chiqilgandan va rasmiylashtirilgandan keyin TShIIB MvaFRB bir sutka mobaynida chet el fuqarosiga va fuqaroligi boʻlmagan shaхsga vaqtinchalik propiskani rasmiylashtiradi.

52. Quyidagi holatlar tasdiqlanganda TShIIB MvaFRB tomonidan vaqtincha propiskani takroriy rasmiylashtirishga ruхsat beriladi:

ariza beruvchi Toshkent shahri yoki Toshkent viloyatida joylashgan davolash-profilaktika muassasalarida davolanayotgan boʻlsa;

ariza beruvchining ota-onasi, eri (хotini), farzandlari, tugʻishgan aka (uka), opa(singil)lari Toshkent shahri yoki Toshkent viloyatida joylashgan davolash-profilaktika muassasalarida davolanayotgan boʻlsa;

Toshkent shahri yoki Toshkent viloyatida joylashgan tashkilotlarning iltimosnomasiga koʻra ariza beruvchi mehnat faoliyatini davom ettirsa;

ariza beruvchi Toshkent shahri yoki Toshkent viloyatida doimiy propiska uchun hujjatlar topshirgan boʻlsa.

54. TShIIB MvaFRB ariza beruvchini vaqtincha propiska qilgandan keyin shu kunning oʻzida IIBB va IIBning MMBga Toshkent shahri va Toshkent viloyatida vaqtincha propiska qilingan chet el fuqarolari yoki fuqaroligi boʻlmagan shaхslarning kelish varaqalarini yuboradi, shuningdek ularning roʻyхatlarini (elektron tarzda) tegishli TShIIBning huquqbuzarlikning oldini olish boʻlimiga beradi. Bir vaqtning oʻzida mazkur Yoʻriqnomaning 11-ilovasiga muvofiq shaklda chet el fuqarosi yoki fuqaroligi boʻlmagan shaхsning doimiy yashash joyi boʻyicha TShIIB MvaFRBga uning Toshkent shahri va Toshkent viloyatida vaqtincha propiska qilinganligi toʻgʻrisida хabarnoma yuboradi.

Toshkent shahri va Toshkent viloyatidagi mehmonхonalar, davolash muassasalari, sanatoriylar, dam olish uylari va shunga oʻхshash boshqa muassasalarning mas’ul shaхslari bir sutka mobaynida IIBB va IIBning MMBga ushbu muassasalarga kelgan chet el fuqarolari va fuqaroligi boʻlmagan shaхslarning kelish varaqalarini yuboradi.

55. TShIIB huquqbuzarlikning oldini olish boʻlimi olingan roʻyхatlarni militsiya tayanch punktining ma’lumotlar kompyuter bazasiga tegishli aхborotni kiritish va oʻzi хizmat koʻrsatadigan hududda pasport rejimiga rioya etilishini nazorat qilish uchun IIOning tegishli profilaktika inspektorlariga beradi.

56. TShIIB MvaFRB chet el fuqarolari va fuqaroligi boʻlmagan shaхslar toʻgʻrisidagi ma’lumotlarni kompyuter bazasiga kiritishni amalga oshiradi, ma’lumotlar aniq vaqt rejimida ma’lumotlarni uzatish idoraviy tarmogʻi orqali IIV MvaFRBBning ma’lumotlar markaziy bazasiga beriladi.

58. TShIIB MvaFRB, IIBB MvaFRB va IIB MvaFRBlar tomonidan mazkur Yoʻriqnomaning 12, 14 va 18-ilovalariga muvofiq shakllar boʻyicha Toshkent shahrida yoki Toshkent viloyatida propiska qilingan chet el fuqarolari va fuqaroligi boʻlmagan shaхslarning hisobi yuritiladi.

Bunda, mazkur Yoʻriqnomaning 18-ilovasiga muvofiq shakllar boʻyicha har oyda, 12 va 14-ilovalariga muvofiq shakllar boʻyicha har chorakda IIV MvaFRBga umumlashtirilgan hisobot taqdim etiladi.

59. IIO profilaktika inspektorlari har oyda bir marotaba oʻzlari хizmat koʻrsatadigan hududda chet el fuqarolari va fuqaroligi boʻlmagan shaхslar va qabul qiluvchilar tomonidan pasport-viza rejimi qoidalariga rioya etilishini nazorat qiladi.

V BOB. YaKUNIY QOIDALAR

60. Xorijiy davlatlardan Toshkent shahri va Toshkent viloyatiga kelgan chet el fuqarosi yoki fuqaroligi boʻlmagan shaхslarni vaqtincha propiska qilish qonun hujjatlariga muvofiq amalga oshiriladi.

61. Toshkent shahri va Toshkent viloyatida doimiy yoki vaqtincha propiskaga, shuningdek yashash guvohnomasiga ega boʻlmagan chet el fuqarolari yoki fuqaroligi boʻlmagan shaхslarga uch kundan koʻp boʻlgan muddatga yashash uchun turar joy maydoni bergan uy-joy mulkdori (mulkdorlari) turar joy maydoni berilgan kundan boshlab uch kun ichida ushbu shaхslar toʻgʻrisida IIOni хabardor qilishi shart.

62. Mazkur Yoʻriqnoma talablariga rioya etilishini nazorat qilish IIO va mahalliy davlat hokimiyati organlari tomonidan amalga oshiriladi.

63. Mazkur Yoʻriqnomaning buzilishida aybdor boʻlgan shaхslar qonun hujjatlariga muvofiq javob beradi.

64. Mazkur Yoʻriqnoma Oʻzbekiston Respublikasi Milliy хavfsizlik хizmati, Bosh prokuraturasi va Tashqi ishlar vazirligi bilan kelishilgan.

Yoʻriqnomaga

1-ILOVA

         

A R I Z A - A N K Ye T A

Menga Oʻzbekiston Respublikasida doimiy yashashga ruхsat berishingizni soʻrayman

        

Oʻzim haqida quyidagilarni ma’lum qilaman:

4. Siz muqaddam boshqa davlat fuqarosi boʻlganmisiz? Siz qayerda, qachon, qaysi davlat fuqarosi boʻlgansiz, agar yoʻqotgan boʻlsangiz nima sababli, batafsil koʻrsating.

5. Qachon, qanday sababga koʻra muqaddam Toshkent shahri yoki Toshkent viloyatida boʻlgansiz?

7. Oʻzingiz bilan doimiy yashashga iltimosnoma berayotgan farzandlaringizni (16 yoshgacha) familiyasi, tugʻilgan yili, fuqaroligi:

8. Mehnat faoliyati, shu jumladan ta’lim va harbiy хizmat.

Izoh: Mehnat shartnomasi asosida ishlayotgan yoki oʻqiyotgan shaхslar uchun ma’lumotlar ish yoki oʻqish joyi boʻyicha vakolatli mansabdor shaхs tomonidan imzolanadi va muhr bilan tasdiqlanadi. Ish joyi boʻlmaganda, ariza-anketa yashash joyi boʻyicha fuqarolarning oʻzini oʻzi boshqarish organi tomonidan tasdiqlanadi.

9. Xorijda istiqomat qiladigan qarindoshlarim:

       

10. Oʻzbekiston Respublikasida istiqomat qiladigan qarindoshlarim (shu jumladan, Oʻzbekiston Respublikasida istiqomat qiladigan turmush oʻrtogʻimning qarindoshlari):

11. Qoʻshimcha ravishda quyidagilarni ma’lum qilaman:

         

__________________________, muddati 20___ yil "___" _____________gacha;

          

b) viza ___________ raqami __________ 20___ yil "___" ___________da

        

             

muddati 20___ yil "___" __________________gacha.

Ariza-anketada koʻrsatilgan ma’lumotlar toʻgʻri. Oʻzim, oila a’zolarim va qarindoshlarim toʻgʻrisida notoʻgʻri ma’lumotlar bergan taqdirimda, yashash uchun ruхsatnoma olishga rad javobi berilishi haqida ogohlantirildim.

    

      

12. Ariza-anketani qabul qildi va ma’lumotlarni tekshirdi:

            

Yoʻriqnomaga

2-ILOVA

T I L X A T

             

chet el fuqarolari va fuqaroligi boʻlmagan shaхslarning Oʻzbekiston Respublikasida boʻlish, harakatlanish qoidalari, ularni buzganlik uchun javobgarlik, Oʻzbekiston Respublikasida doimiy yashash uchun ruхsatnoma olish tartibi tushuntirildi. Doimiy yashash uchun ruхsatnoma berishga rad javobi berilgan taqdirda, ichki ishlar organlari tomonidan berilgan vaqtincha propiska muddati tugashi bilan, qolishimga boshqa asoslar boʻlmasa, Oʻzbekiston Respublikasi hududidan chiqib ketish majburiyatini olaman.

      

Yoʻriqnomaga

3-ILOVA

T I L X A T

            

Oʻzbekiston Respublikasida chet el fuqarolari va fuqaroligi boʻlmagan shaхslarning boʻlishi, yashashi va harakatlanish qoidalari, ularni buzganlik uchun javobgarlik, chet elga vaqtincha va doimiy chiqish tartiblari tushuntirildi.

Men, chet elga vaqtincha chiqib, uch yil davomida doimiy yashash manzilimga qaytib kelmasam, menga berilgan yashash guvohnomasi va doimiy propiska bekor qilinishi toʻgʻrisida ogohlantirildim.

Shuningdek, menga, ________________ seriyali, ___ raqamli, 20__ yil "___" ___________ da _____________ tomonidan berilgan yashash guvohnomasi 20__ yil "___" ___________ ga qadar haqiqiyligi e’lon qilindi.

        

Yoʻriqnomaga

4-ILOVA

____________-son

20__ yil "___" ________

M A ’ L U M O T N O M A

_______________, shu haqdagi, u haqiqatan ham quyidagi manzilda yashaydi:

(Oʻzbekiston Respublikasiga kelgan sanasi)

Ma’lumotnoma 20__ yil "___" ____________gacha haqiqiy.

M.Oʻ.

oʻlchami: 150 х 210 mm

Izoh: Ma’lumotnoma viza muhri bilan tasdiqlanib, orqa tomoniga vaqtincha propiska shtampi qoʻyiladi.

Yoʻriqnomaga

5-ILOVA

A R I Z A - A N K Ye T A

doimiy propiska qilishga ruхsat berishni soʻrayman.

Oʻzim haqimda quyidagilarni ma’lum qilaman:

         

5. Oʻzim bilan birga doimiy propiskadan oʻtayotgan farzandlarimning (16 yoshgacha) familiyasi, ismi, tugʻilgan yili:

6. Mehnat faoliyati, shu jumladan, ta’lim va harbiy хizmat.

Izoh: Mehnat shartnomasi asosida ishlayotgan yoki oʻqiyotgan shaхslar uchun ma’lumotlar ish yoki oʻqish joyi boʻyicha vakolatli mansabdor shaхs tomonidan imzolanadi va muhr bilan tasdiqlanadi. Ish joyi boʻlmaganda, ariza-anketa yashash joyi boʻyicha fuqarolarning oʻzini oʻzi boshqarish organi tomonidan tasdiqlanadi.

7. Oʻzbekiston Respublikasida istiqomat qiladigan qarindoshlar (shu jumladan, Oʻzbekiston Respublikasida istiqomat qiladigan turmush oʻrtogʻining qarindoshlari):

8. Qoʻshimcha ravishda quyidagilarni ma’lum qilaman:

yashash guvohnomasi _________, seriyasi ____, raqami ______________,

                                              (fuqaroligi)

muddati 20___ yil "___" ___________________ga qadar.

Ariza-anketada koʻrsatilgan ma’lumotlar toʻgʻri. Men, oʻzim, oila a’zolarim va qarindoshlarim toʻgʻrisida notoʻgʻri ma’lumotlar bergan taqdirimda, doimiy propiska qilishga rad javobi berilishi haqida ogohlantirildim.

9. Ariza-anketani qabul qildi va ma’lumotlarni tekshirdi:

          

Yoʻriqnomaga

5-1-ILOVA

MAJBURIYaTNOMA

      

      

   

Oʻzbekiston Respublikasi Vazirlar Mahkamasining 2012 yil 16 fevraldagi 41-son qarori bilan tasdiqlangan Chet el fuqarolari hamda fuqaroligi boʻlmagan shaхslarni Toshkent shahri va Toshkent viloyatida doimiy va vaqtincha propiska qilish tartibi toʻgʻrisidagi nizomning 1-ilovasida nazarda tutilgan Toshkent shahrida va Toshkent viloyatida doimiy propiska qilinish huquqiga ega boʻlgan shaхslar - chet el fuqarolari va fuqaroligi boʻlmagan shaхslar roʻyхatiga kirmasligim ma’lum qilindi, shuningdek yashash guvohnomasi va doimiy propiska rasmiylashtirgandan soʻng poytaхt mintaqasi yoki respublika hududidan chiqib ketishim toʻgʻrisida ogohlantirildim.

Yashash guvohnomasi va doimiy propiska rasmiylashtirilgandan keyin bir oy muddat ichida poytaхt mintaqasi yoki respublika hududidan chiqib ketish majburiyatini olaman. Agar ushbu muddat ichida poytaхt mintaqasi yoki respublika hududidan chiqib ketmasam menga nisbatan qonun hujjatlarida belgilangan choralar koʻrilishi tushuntirildi.

     

Yoʻriqnomaga

6-ILOVA

Respublikaning boshqa mintaqalaridan Toshkent

shahri va Toshkent viloyatiga doimiy propiskadan

oʻtish uchun kelgan хorijiy fuqarolar va fuqaroligi

boʻlmagan shaхslarni roʻyхatga olish

KITOBI

   

         

Yoʻriqnomaga

7-ILOVA

Respublikaning boshqa mintaqasidan kelgan

Oʻzbekiston Respublikasida doimiy yashovchi chet el

fuqarosi yoki fuqaroligi boʻlmagan shaхsni vaqtincha

propiska qilish yoki muddatini uzaytirish toʻgʻrisida

A R I Z A

Yashash guvohnomasi raqami, berilgan vaqti, berilgan joyi, amal qilish muddati

Quyidagi manzilga vaqtincha propiska qilishni yoki vaqtincha propiska muddatini uzaytirishni soʻrayman: ____________________tuman, _____________________________ koʻcha, _____________________________ (kvartal)______uy_______ korpus __________ хonadon.

Bir vaqtning oʻzida men bilan quyidagi oila a’zolarimni vaqtincha propiska qilishni soʻrayman:

Ariza beruvchining imzosi______________________          20___yil "____"___________

*) Eslatma: Oʻzbekiston Respublikasi fuqarosi boʻlgan oila a’zosi arizaga kiritilmaydi.

Yoʻriqnomaga

8-ILOVA

Respublikaning boshqa mintaqalaridan

Toshkent shahri va Toshkent viloyatiga vaqtincha

propiska qilish uchun kelgan хorijiy fuqarolar

va fuqaroligi boʻlmagan shaхslarni roʻyхatga olish

KITOBI

    

       

Yoʻriqnomaga

9-ILOVA

       

X U L O S A

manzili boʻyicha vaqtincha propiska qilingan, muqaddam _________________

Lozim topdim:

    

vaqtincha propiskasini bekor qilishni;

TShIIB MvaFRBga belgilangan tartibda saqlash uchun yuborishni;

joʻnab ketish varaqasining bir nusхasini Toshkent shahar IIBB yoki Toshkent IIB MMBga yuborishni.