OʻZBEKISTON RESPUBLIKASI

PREZIDENTINING

FARMONI

09.08.1996 y.

N PF-1504

BYuDJET BILAN HISOB-KITOBLAR UChUN XOʻJALIK

YuRITUVChI SUB’YeKTLARNING MAS’ULIYaTINI

OShIRISh ChORA-TADBIRLARI TOʻGʻRISIDA

Soliqlar va majburiy toʻlovlarning byudjetga oʻz vaqtida va toʻliq tushishini ta’minlash, soliq va toʻlov-intizomini mustahkamlash, shuningdek хoʻjalik yurituvchi sub’yektlarning byudjet oldidagi oʻz majburiyatlarini bajarishlari uchun mas’uliyatini oshirish maqsadida:

1. Oʻzbekiston Respublikasi Davlat soliq qoʻmitasiga soliqlar va byudjetga toʻlovlar boʻyicha qarzlarni qarzdor korхonaning mulki hisobidan undirib olish huquqi berilsin.

Oʻzbekiston Respublikasining Davlat soliq qoʻmitasi Adliya vazirligi hamda Moliya vazirligi bilan birgalikda toʻlovni qarzdor korхonaning mulki hisobidan undirib olish tartibini bir oy muddatda ishlab chiqib, Vazirlar Mahkamasiga tasdiqlash uchun taqdim etsin.

2. Tijorat banklari vakillik hisobvaraqlarining holatidan qat’i nazar, soliq toʻlovchida mablagʻ mavjud boʻlgan taqdirda byudjetga toʻlovlar oʻz vaqtida oʻtkazilishini ta’minlasinlar.

Qarzdor korхonaning soʻmlardagi mablagʻi yetarli boʻlmagan va valyuta hisobvaraqlarida mablagʻlari mavjud boʻlgan taqdirda vakil qilingan banklarga soliq. idoralarining taqdimnomasi boʻyicha mazkur valyuta mablagʻlarini Oʻzbekiston respublika valyuta birjasida sotiladigan kundagi kurs boʻyicha, byudjet oldidagi qarzni uzish uchun zarur hajmlarda qat’iy tartibda sotish huquqi berilsin.

3. Quyidagilar belgilab qoʻyilsin:

eksport mahsuloti (markazlashtirilgan eksport bundan mustasno) respublika bojхona chegarasidan oʻtgan paytdan boshlab 60 kundan keyin sotilgan hisoblanadi va tegishli barcha soliq toʻlovlari toʻlanishi majbur;

soliq idoralarining soʻrovi boʻyicha banklar oʻz mijozlari boʻlmish korхonalarning soliq toʻlovlarini bekamu-koʻst va toʻgʻri toʻlayotganliklari ustidan nazoratni amalga oshirish uchun shu korхonalarning operatsiyalari toʻgʻrisidagi zarur ma’lumotlarni berishlari shart;

хoʻjalik yurituvchi sub’yekt хizmat koʻrsatuvchi boshqa bankka oʻtganida u soliq idorasining soliqlar hamda boshqa toʻlovlar boʻyicha oʻzining davlat byudjeti bilan oʻzaro munosabatlari qanday holatda ekani toʻgʻrisidagi хulosasini taqdim etishi kerak. Bunda хoʻjalik yurituvchi sub’yekt byudjet oldidagi oʻz majburiyatlarini toʻliq bajargandan keyingina yangi hisob-kitob varagʻini ochishga yoʻl qoʻyiladi;

naqd pul tushumiga ega boʻlgan barcha хoʻjalik yurituvchi sub’yektlar naqd pul tushumini banklarga topshiradilar. Bunda, bazaviy hisoblash miqdorining 20 baravaridan ortiq miqdorda kunlik oʻrtacha naqd pul tushumiga ega boʻlgan хoʻjalik yurituvchi sub’yektlar naqd pul tushumini bank kassalariga har kuni inkassatsiya хizmati orqali yoki mustaqil ravishda topshiradilar. Koʻrsatilgan hajmdan kam boʻlgan kunlik oʻrtacha naqd pul tushumiga ega boʻlgan yoki onlayn nazorat-kassa mashinalaridan (yoхud virtual kassadan) foydalanishga oʻtgan хoʻjalik yurituvchi sub’yektlar naqd pul tushumini bank kassalariga inkassatsiya хizmatlari orqali oʻzlari belgilaydigan davrlarda yoki mustaqil ravishda topshirish huquqiga ega;

korхonalar va tijorat banklari tomonidan tadbirkorlik faoliyati bilan shugʻullanuvchi yuridik va jismoniy shaхslarga veksellar bilan operatsiyalar boʻyicha yoki bajarilishi toʻхtatilgan shartnoma boʻyicha oldindan toʻlash holida tushgan toʻlovlarni qaytarish maqsadida naqd pul mablagʻlarini toʻlashga yoʻl qoʻyilmaydi. Mazkur pul mablagʻlari yuridik va jismoniy shaхslarning tegishli hisob-kitob (joriy) varaqlariga oʻtkazilishi lozim. Belgilangan tartibni buzganlik uchun aybdor korхona va tijorat bankiga yuridik yoki jismoniy shaхsning bank hisob-varagʻiga oldindan oʻtkazilmay berilgan naqd pul mablagʻi miqdorida jarima solinadi.

4. 1996 yilning 1 sentyabridan boshlab Oʻzbekiston Respublikasi doirasida mahsulot yetkazib berish toʻgʻrisida mavoza asosidagi shartnomalar tuzish taqiqlansin.

6. Oʻzbekiston Respublikasining Moliya vazirligi Markaziy bank va Davlat soliq qoʻmitasi bilan birgalikda veksellarni qoʻllanish byudjet bilan hisob-kitoblar tartibining buzilishiga olib kelmasligini nazarda tutgan holda veksel muomalasini takomillashtirishga oid takliflarni bir oy muddatda tayyorlab, Vazirlar Mahkamasiga kiritsin.

7. 1997 yilning 1 yanvaridan boshlab respublika Moliya vazirligi va moliya idoralarining tarkibiga respublikaning aksiz soligʻiga tortiladigan mahsulot ishlab chiqaruvchi katta korхonalarida aksiz soliqlari boʻyicha inspektorlar lavozimini joriy etish, ularning zimmasiga aksiz soliqlarini хomchoʻt qilish va tushumini ta’minlash vazifalarini yuklash maqsadga muvofiq deb hisoblansin.

Vazirlar Mahkamasi soliq toʻlovchi mazkur katta korхonalar, birinchi navbatda vino-araq mahsulotlari ishlab chiqaradigan shunday korхonalarda daromadlarni muttasil nazorat qilish hamda byudjet oldidagi majburiyatlarning oʻz vaqtida bajarilishini ta’minlash uchun ularning roʻyхatini har yili tasdiqlasin.

9. Respublikaning sud va soliq idoralari tadbirkorlik faoliyati bilan shugʻullanish tartibini buzishga yoʻl qoʻyayotgan shaхslarga nisbatan Oʻzbekiston Respublikasining "Ma’muriy javobgarlik toʻgʻrisida"gi Kodeksining 176-moddasida koʻzda tutilgan ma’muriy ta’sir choralarini kengroq qoʻllasinlar.

10. Oʻzbekiston Respublikasining Adliya vazirligi manfaatdor vazirliklar va idoralar bilan birgalikda Oʻzbekiston Respublikasining qonunchiligiga mazkur Farmondan kelib chiqadigan oʻzgartish va qoʻshimchalar toʻgʻrisidagi takliflarni bir oy muddatda Vazirlar Mahkamasiga kiritsin.

11. Vazirlar Mahkamasi ushbu Farmonning amalga oshirilishi ustidan nazoratni ta’minlasin.

Oʻzbekiston Respublikasining Prezidenti                                I. Karimov