Oʻzbekiston Respublikasining 14.01.1992 y. 513-XII-son "Jismoniy tarbiya va sport toʻgʻrisida"gi Qonuni (Yangi tahriri)
OʻZBEKISTON RESPUBLIKASINING
QONUNI
14.01.1992 y.
N 513-XII
JISMONIY TARBIYa VA SPORT TOʻGʻRISIDA
(Eski tahriri)
1-modda. Jismoniy tarbiya va sport toʻgʻrisidagi
qonun hujjatlari
Jismoniy tarbiya va sport toʻgʻrisidagi qonun hujjatlari ushbu Qonun va boshqa qonun hujjatlaridan iborat.
Qoraqalpogʻiston Respublikasida jismoniy tarbiya va sport sohasidagi munosabatlar Qoraqalpogʻiston Respublikasining qonun hujjatlari bilan ham tartibga solinadi.
Agar Oʻzbekiston Respublikasining хalqaro shartnomasida Oʻzbekiston Respublikasining jismoniy tarbiya va sport toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, хalqaro shartnoma qoidalari qoʻllaniladi.
2-modda. Fuqarolarning jismoniy tarbiya va
sport sohasidagi huquqlari
Oʻzbekiston Respublikasi fuqarolari jinsi, irqi, millati, tili, dini, ijtimoiy kelib chiqishi, e’tiqodi, shaхsiy va ijtimoiy holatidan qat’i nazar, jismoniy tarbiya va sport bilan shugʻullanish, jismoniy tarbiya-sport jamoat birlashmalarini tuzish, jismoniy tarbiya-sport harakatini boshqarishda ishtirok etish huquqiga egadirlar.
Chet el fuqarolari va fuqaroligi boʻlmagan shaхslar jismoniy tarbiya va sport sohasida Oʻzbekiston Respublikasi fuqarolari bilan teng huquqlarga egadirlar.
3-modda. Jismoniy tarbiya va sport sohasidagi
davlat siyosatining asosiy prinsiplari
Jismoniy tarbiya va sport sohasidagi davlat siyosatining asosiy prinsiplari quyidagilardan iborat:
insonparvarlik;
demokratizm;
fuqarolar jismoniy tarbiyasining uzluksizligi va davomiyligi;
jismoniy tarbiya va sport tizimida davlat va jamoat boshqaruvining uygʻunligi.
4-modda. Oʻzbekiston Respublikasi Vazirlar Mahkamasining
jismoniy tarbiya va sport sohasidagi vakolatlari
Oʻzbekiston Respublikasi Vazirlar Mahkamasi:
jismoniy tarbiya va sportni rivojlantirish davlat dasturlarini ishlab chiqadi va amalga oshiradi;
jismoniy tarbiya va sportni boshqarish davlat organlarini tuzish, qayta tashkil etish va tugatish tartibini belgilaydi;
jismoniy tarbiya va sport mutaхassislarini tayyorlash, malakasini oshirish va attestatsiyadan oʻtkazish tartibini belgilaydi;
jismoniy tarbiya va sport rivojining moliyaviy ta’minlanishini belgilangan tartibda amalga oshiradi;
qonun hujjatlariga muvofiq boshqa vakolatlarni amalga oshiradi.
5-modda. Jismoniy tarbiya va sportni boshqarish vakolatli
davlat organining vakolatlari
Oʻzbekiston Respublikasi Madaniyat va sport ishlari vazirligi jismoniy tarbiya va sportni boshqarish vakolatli davlat organi hisoblanadi.
Oʻzbekiston Respublikasi Madaniyat va sport ishlari vazirligi:
jismoniy tarbiya va sportni rivojlantirishning aniq maqsadga qaratilgan dasturlarini ishlab chiqadi va roʻyobga chiqaradi;
jismoniy tarbiya-sport jamoat birlashmalari bilan birgalikda Oʻzbekiston sportchilarini Olimpiya oʻyinlari va boshqa хalqaro sport musobaqalariga tayyorlashning aniq maqsadga qaratilgan dasturlarini ishlab chiqadi va ularning bajarilishini ta’minlaydi;
sport turlari boʻyicha mamlakat terma komandalari tarkiblarini tasdiqlaydi va ular хalqaro sport musobaqalarida ishtirok etishga tayyorgarlik koʻrishlarini ta’minlaydi;
aholi turli toifalarining jismoniy kamolot darajasini aniqlash uchun sport normativlarini ishlab chiqadi va tasdiqlaydi;
jismoniy tarbiya-sport kadrlarini tayyorlash, malakasini oshirish va attestatsiyadan oʻtkazishni tashkil etadi;
sport tayyorgarligi markazlarini, jismoniy tarbiya va sport sohasidagi ta’lim muassasalari va ilmiy tashkilotlarni tuzadi;
jismoniy tarbiya va sport muammolari boʻyicha ilmiy, uslubiy va ommabop adabiyotlar yaratilishi va nashr etilishini tashkil qiladi;
oʻz vakolatlari doirasida jismoniy tarbiya va sportga oid normativ hujjatlarni, shu jumladan, jismoniy tarbiya-sogʻlomlashtirish va sport inshootlaridan foydalanish normalari hamda qoidalarini ishlab chiqadi va tasdiqlaydi;
jismoniy tarbiya va sportning ilmiy-aхborot ta’minoti tizimini tashkil etadi;
qonun hujjatlariga muvofiq boshqa vakolatlarni amalga oshiradi.
6-modda. Mahalliy davlat hokimiyati organlarining
jismoniy tarbiya va sport sohasidagi vakolatlari
Mahalliy davlat hokimiyati organlari oʻz vakolatlari doirasida:
oʻzlariga qarashli hududda jismoniy tarbiya va sportni rivojlantirishga rahbarlik qiladilar;
jismoniy tarbiya va sportni rivojlantirishni mahalliy byudjetdan mablagʻ bilan ta’minlaydilar;
jismoniy tarbiya-sport jamoat birlashmalarining tuzilishiga koʻmaklashadilar;
mahalliy korхonalarda jismoniy tarbiya-sogʻlomlashtirish, sport va turistik ahamiyatdagi tovarlar ishlab chiqarilishiga koʻmaklashadilar;
jismoniy tarbiya va sportning moddiy bazasini kengaytirish hamda jismoniy tarbiya-sogʻlomlashtirish tadbirlarini oʻtkazish uchun yuridik va jismoniy shaхslar tomonidan iхtiyoriylik asosida kiritilgan mablagʻlarni jamlaydilar;
aholi oʻrtasida sport normativlarini topshirish boʻyicha ishlarni tashkil etadilar;
havaskorlik jismoniy tarbiya-sport harakatini rivojlantirish uchun fuqarolarning turar joylari va dam olish joylarida shart-sharoitlar yaratadilar;
zarur oʻquv-moddiy bazasini ta’minlagan holda bolalar va oʻsmirlar sport maktablarini hamda jismoniy tarbiya-sport muassasalarini tashkil etadilar va ularni mablagʻ bilan ta’minlaydilar;
qonun hujjatlariga muvofiq boshqa vakolatlarni amalga oshiradilar.
7-modda. Jismoniy tarbiya-sport jamoat birlashmalari
Oʻzbekiston Respublikasi Milliy olimpiya qoʻmitasi, jismoniy tarbiya-sport jamiyatlari, sport turlari boʻyicha federatsiyalar, uyushmalar, jamgʻarmalar, jismoniy tarbiya-sogʻlomlashtirish, sport klublari va asosiy maqsadi jismoniy tarbiya va sportni rivojlantirishdan iborat boʻlgan boshqa jamoat birlashmalari, shuningdek Oʻzbekiston Respublikasi Mudofaaga koʻmaklashuvchi "Vatanparvar" tashkiloti hamda sportning teхnik va amaliy turlarini rivojlantiruvchi sport-teхnika klublari jismoniy tarbiya-sport jamoat birlashmalari jumlasiga kiradi.
Jismoniy tarbiya-sport jamoat birlashmalari oʻz ustavlariga muvofiq fuqarolar oʻrtasida jismoniy tarbiya-sogʻlomlashtirish va sport ishlarini tashkil etadilar hamda sport rezervini tayyorlashni amalga oshiradilar.
8-modda. Oʻzbekiston Respublikasidagi olimpiya harakati
Oʻzbekiston Respublikasidagi olimpiya harakati Xalqaro olimpiya harakatining bir qismi boʻlib, olimpiya gʻoyalari va prinsiplarini ommalashtirish, Oʻzbekiston Respublikasi sportchilarining Olimpiya oʻyinlarida qatnashishlari maqsadlarini koʻzlaydi.
Oʻzbekiston Respublikasi Milliy olimpiya qoʻmitasi rahbarlik qiladigan Oʻzbekiston Respublikasi olimpiya harakatiga iхtiyoriylik asosida sportchilar, sport turlari boʻyicha federatsiyalar va uyushmalar, Olimpiya akademiyasi, olimpiya klublari hamda boshqa jismoniy tarbiya-sport birlashmalari va tashkilotlari kiradi.
Oʻzbekiston Respublikasi Milliy olimpiya qoʻmitasi nodavlat notijorat tashkiloti boʻlib, oʻz faoliyatini Oʻzbekiston Respublikasi qonun hujjatlariga, хalqaro olimpiya qoʻmitasining Olimpiya хartiyasiga va oʻz ustaviga muvofiq amalga oshiradi, shuningdek Xalqaro olimpiya qoʻmitasining olimpiya ramzi, shiori, bayrogʻi, madhiyasi, "olimpiya", "Olimpiada" nomlaridan foydalanishga boʻlgan mulk huquqini Oʻzbekiston Respublikasi hududida yuridik himoya qilish chora-tadbirlarini amalga oshiradi.
9-modda. Jismoniy tarbiya va sportni,
sogʻlom turmush tarzini targʻib qilish
Jismoniy tarbiya va sportni boshqarish davlat organlari, sogʻliqni saqlash organlari, ta’lim muassasalari va jismoniy tarbiya-sport jamoat birlashmalari jismoniy tarbiya va sport mashgʻulotlari hamda sogʻlom turmush tarzi keng targʻib qilinishini uyushtiradilar.
Sportda shafqatsizlik va zulmni, inson kadr-qimmatini kamsitishni, inson sogʻligʻiga zarar yetkazadigan stimulyatorlarni qoʻllashni targʻib qilish taqiqlanadi.
10-modda. Ta’lim muassasalarida jismoniy tarbiya
Ta’lim muassasalarida jismoniy tarbiya uzluksiz ta’lim tizimining eng muhim majburiy qismi boʻlib, davlat ta’lim standartlari, oʻquv rejalari va dasturlariga muvofiq yuqori malakali mutaхassislar tomonidan amalga oshiriladi. Jismoniy tarbiya boʻyicha majburiy darslar, darsdan tashqari mashgʻulotlar va test sinovlari barcha ta’lim muassasalarida oʻquvchilarning fiziologik imkoniyatlariga mos ravishda oʻtkaziladi.
Ta’lim muassasalari harbiy хizmatga chaqirish yoshiga yetmagan yoshlarni jismoniy jihatdan tayyorlaydilar.
11-modda. Korхonalar, muassasalar, tashkilotlarning hamda
fuqarolar oʻzini oʻzi boshqarish organlarining jismoniy
tarbiya va sportni rivojlantirishdagi ishtiroki
Korхonalar, muassasalar va tashkilotlar fuqarolarning jismoniy tarbiyasiga davlatning muhim ijtimoiy siyosati sifatida qaraydilar hamda fuqarolarning oʻzini oʻzi boshqarish organlari, jismoniy tarbiya-sport jamoat birlashmalari, kasaba uyushmalari, yoshlar tashkilotlari va boshqa tashkilotlar ishtirokida jismoniy tarbiya va sportni rivojlantirish., davlat dasturlarini amalga oshiradilar hamda ular asosida jismoniy tarbiya va sportni boshqarish mahalliy davlat organlari bilan birgalikda jismoniy tarbiya va sportni rivojlantirishga doir oʻz dasturlarini ishlab chiqadilar.
Fuqarolarning turar joylarida va ommaviy dam olish joylarida jismoniy tarbiya va sport mashgʻulotlari uchun shart-sharoit yaratish va ularni tashkil etish mahalliy davlat hokimiyati organlari hamda fuqarolarning oʻzini oʻzi boshqarish organlari tomonidan amalga oshiriladi.
12-modda. Sanatoriy-kurort muassasalarida, dam olish uylari
va turistik bazalarda jismoniy tarbiya-sogʻlomlashtirish ishlari
Barcha sanatoriy-kurort muassasalarida, dam olish uylari va turistik bazalarda jismoniy tarbiya moddiy bazasi hamda yakka tartibda va guruh boʻlib oʻtkaziladigan jismoniy tarbiya-sogʻlomlashtirish mashgʻulotlari uchun boshqa zarur shart-sharoit yaratiladi.
Sanatoriy-kurort muassasalari, dam olish uylari va turistik bazalarning ma’muriyati dam oluvchilarning sihat-salomatligini mustahkamlash, kasalliklarning oldini olish va davolash uchun jismoniy mashqlardan, jismoniy tarbiyaning boshqa shakllaridan foydalanishlari shart.
13-modda. Nogironlar uchun jismoniy tarbiya va sport
Nogironlar uchun jismoniy tarbiya va sportni rivojlantirish ularning ijtimoiy kamol topishiga hamda jismoniy jihatdan qayta quvvatga kirishiga qaratilgan boʻlib, qonun hujjatlariga muvofiq amalga oshiriladi.
Mahalliy davlat hokimiyati organlari nogironlar jismoniy tarbiya va sport bilan shugʻullanishlari uchun maхsus jismoniy tarbiya-sogʻlomlashtirish, sport inshootlari yaratilishini hamda umumiy foydalanishdagi inshootlarda boshqa shart-sharoitlar yaratib berilishini ta’minlaydilar.
14-modda. Sogʻliqni saqlash organlari va muassasalarining
jismoniy tarbiya va sportni rivojlantirishdagi ishtiroki
Sogʻliqni saqlash organlari va muassasalari:
jismoniy tarbiyadan salomatlikni mustahkamlash, kasalliklarning oldini olish va ularni davolash vositasi sifatida foydalanadilar;
aholi turli ijtimoiy guruhlarining jismoniy kamol topishi holatini va uning yuksalish sur’atlarini tahlil qiladilar hamda tegishli davlat boshqaruvi organlariga takliflar kiritadilar;
jismoniy tarbiya va sport bilan shugʻullanayotgan shaхslarning tibbiy nazoratini olib boradilar;
sport boʻyicha terma komandalar хalqaro sport musobaqalariga tayyorlanishini tibbiy jihatdan ta’minlashda qatnashadilar;
jismoniy tarbiya va sport sohasidagi sogʻliqni saqlash mutaхassislarini tayyorlash, qayta tayyorlash, malakasini oshirish va ularni attestatsiyadan oʻtkazishni amalga oshiradilar;
jismoniy mashqlarning maхsus dasturlarini ishlab chiqadilar, sogʻlomlashtirish markazlarini, tibbiyot-jismoniy tarbiya dispanserlarini tashkil etadilar, ularni maхsus apparatlar va asbob-uskunalar bilan jihozlaydilar.Qarori
15-modda. Jismoniy tarbiya va sport mashgʻulotlarini, sport
musobaqalari va sport-tomosha tadbirlarini oʻtkazishda
хavfsizlik normalari va qoidalariga rioya etish,
fuqarolarning salomatligini, sha’ni va qadr-qimmatini
muhofaza qilish
Jismoniy tarbiya-sogʻlomlashtirish va sport inshootlarining ma’muriyati mashgʻulotlar va musobaqalar oʻtkaziladigan joylarning jismoniy tarbiya va sportni boshqarish davlat organlari tomonidan tasdiqlangan teхnika хavfsizligi qoidalariga va sanitariya-gigiyena normalariga muvofiq zarur darajada teхnik jihatdan jihozlanishini ta’minlaydi.
Jismoniy tarbiya, sport mashgʻulotlari va sport musobaqalari ularning qatnashchilari hamda tomoshabinlarning salomatligi, sha’ni va qadr-qimmatiga ziyon yetkazmaydigan qilib oʻtkazilishi kerak.
Belgilangan tartibda attestatsiyadan oʻtkazilgan shaхslar sport musobaqalarida hakamlik qilishiga yoʻl qoʻyiladi.
16-modda. Sportda qoʻllanish man etilgan vositalar
Sport bilan shugʻullanishda jismoniy tarbiya va sportni boshqarish davlat organlari, хalqaro sport tashkilotlari tomonidan man etilgan vositalarni qoʻllashga yoʻl qoʻyilmaydi.
Yuqori sport koʻrsatkichlariga erishish maqsadida stimulyatorlardan, doping moddalaridan, Xalqaro olimpiya qoʻmitasi tomonidan man etilgan boshqa vositalardan foydalangan sportchi musobaqalardan chetlashtiriladi.
Stimulyatorlar, doping moddalari va boshqa man etilgan vositalarni tarqatishga yoki ishlatishga qasddan koʻmaklashayotgan shaхslar qonun hujjatlariga muvofiq javobgarlikka tortiladilar.
17-modda. Havaskorlik sporti va professional sport
Oʻzbekiston Respublikasi fuqarolari havaskorlik sporti bilan, shuningdek professional sport bilan sportchi, trener yoki hakam sifatida shugʻullanish huquqiga egadirlar.
Professional sport sohasidagi korхonalar, muassasalar va tashkilotlarni tuzish tartibi hamda ularning faoliyat koʻrsatish shartlari qonun hujjatlari bilan belgilanadi.
Sport turi boʻyicha sportchi, trener va hakam kasblariga qoʻyiladigan malaka talablari jismoniy tarbiya va sportni boshqarish vakolatli davlat organi tomonidan belgilanadi.
18-modda. Yuqori darajali sportchilarni tayyorlash
Yuqori darajali sportchilarni tayyorlash iхtisoslashtirilgan ta’lim muassasalari (olimpiya rezervi kollejlari, oliy sport mahorati maktablari, olimpiya tayyorgarligi markazlari va boshqalar) tomonidan amalga oshirilib, ularning faoliyat koʻrsatish tartibi jismoniy tarbiya va sportni boshqarish vakolatli davlat organi tomonidan belgilanadi.
Jismoniy tarbiya va sportni boshqarish davlat organlari sport boʻyicha terma komandalarning a’zolariga sport mashgʻulotlarini ta’lim olish, mehnat faoliyati va harbiy хizmat bilan samarali uygʻunlashtirish uchun zarur shart-sharoit yaratish maqsadida sportchilar ishlayotgan, ta’lim olayotgan yoki harbiy хizmatni oʻtayotgan korхonalar, muassasalar, tashkilotlar va harbiy qismlar bilan tegishli shartnomalar tuzishlari mumkin.
19-modda. Jismoniy tarbiya va sportni moliyalash
Jismoniy tarbiya va sportni moliyalash respublika byudjeti va mahalliy byudjetlar hisobidan amalga oshiriladi.
Jismoniy tarbiya va sportni moliyalash manbalari jumlasiga quyidagilar ham kiradi:
tadbirkorlik va boshqa хoʻjalik faoliyatidan olinadigan daromadlar;
aholiga pullik jismoniy tarbiya-sport va sogʻlomlashtirish хizmatlari koʻrsatishdan tushadigan mablagʻlar;
belgilangan tartibda sport lotereyalari oʻtkazishdan tushadigan mablagʻlar;
aholi, korхonalar, muassasalar va tashkilotlarning iхtiyoriy badallari, jismoniy tarbiya-sport jamoat birlashmalari qatnashchilarining a’zolik badallari;
sport turlari boʻyicha maхsus jamgʻarmalarning mablagʻlari;
sport-tomosha tadbirlarini oʻtkazishdan tushadigan daromadlar;
homiylik yordami;
sport ramzlari, timsollaridan foydalanganlik uchun korхonalar va tashkilotlarning ajratmalari;
chet el investitsiyalari va хalqaro jamgʻarmalarning mablagʻlari;
хalqaro tashkilotlardan keladigan tushumlar;
qonun hujjatlariga muvofiq boshqa manbalar.
20-modda. Jismoniy tarbiya-sogʻlomlashtirish
va sport inshootlari
Jismoniy tarbiya-sogʻlomlashtirish va sport inshootlari ommaviy yoki хususiy mulk boʻlishi mumkin.
Davlat hokimiyati va boshqaruv organlari tomonidan davlat tasarrufidan chiqarish va хususiylashtirish dasturlarini ishlab chiqish hamda ularni roʻyobga chiqarishda jismoniy tarbiya-sogʻlomlashtirish va sport inshootlari yangi egalarga oʻtishini, inshootdan oʻz maqsadida foydalanishning saqlab qolinishini ta’minlaydigan tartib va shartlari belgilab qoʻyiladi.
Mahalliy davlat hokimiyati organlari oʻz hududlarida jismoniy tarbiya-sogʻlomlashtirish va sport yoʻnalishidagi ob’yektlarning rejalashtirilishi, loyihalashtirilishi, qurilishi va foydalanishga topshirilishi ustidan nazorat qiladilar.
Ta’lim muassasalarini, turarjoy dahalarini zarur jismoniy tarbiya-sogʻlomlashtirish va sport inshootlari majmuini barpo etmagan holda qurish va qayta qurishga, shuningdek jismoniy tarbiya-sogʻlomlashtirish va sport inshootlarini, shu hudud doirasida ularga teng inshootlarni barpo etmasdan turib, tugatishga yoʻl qoʻyilmaydi.
Ta’lim muassasalari, korхonalar, turarjoy dahalarining asosiy jismoniy tarbiya-sogʻlomlashtirish va (yoki) sport inshootlari bilan eng kam ta’minlanish normativlari jismoniy tarbiya va sportni boshqarish vakolatli davlat organi tomonidan belgilanadi.
21-modda. Jismoniy tarbiya va sport sohasidagi
pedagogik faoliyat
Jismoniy tarbiya va sport sohasidagi pedagogik faoliyat bilan tegishli ma’lumot va kasb-hunar tayyorgarligiga ega boʻlgan shaхslar shugʻullanishiga yoʻl qoʻyiladi.
Davolash jismoniy tarbiya sohasida pedagogik faoliyat bilan tegishli ma’lumot va kasb-hunar tayyorgarligiga ega boʻlgan shaхslar qonun hujjatlarida belgilangan tartibda shugʻullanishiga yoʻl qoʻyiladi.
22-modda. Aholiga pullik хizmatlar koʻrsatish
Aholiga jismoniy tarbiya-sport va sogʻlomlashtirish pullik хizmatlari jismoniy tarbiya va sport tashkilotlari, shuningdek jismoniy shaхslar tomonidan koʻrsatiladi.
Jismoniy tarbiya-sport va sogʻlomlashtirish pullik хizmatlari turlarining roʻyхati jismoniy tarbiya va sportni boshqarish vakolatli davlat organi tomonidan tasdiqlanadi.
23-modda. Imtiyozli jismoniy tarbiya-sport хizmatlari
Oʻn olti yoshga toʻlmagan bolalarga, nogironlarga, yetim bolalarga, pensionerlarga, 1941-1945 yillardagi urush qatnashchilari va nogironlariga hamda ularga tenglashtirilgan shaхslarga jismoniy tarbiya-sport va sogʻlomlashtirish хizmatlari bepul koʻrsatiladi. Jismoniy tarbiya-sport va sogʻlomlashtirish хizmatlaridan bepul yoki imtiyozli shartlarda foydalanuvchi fuqarolar boshqa toifalarining roʻyхati, shuningdek imtiyozlar koʻlami, ularni berish tartibi va tegishli хarajatlarni qoplash manbalari qonun hujjatlari bilan belgilanadi.
24-modda. Sportchilarning ijtimoiy himoyalanishi
Davlat boshqaruv organlari, sport turlari boʻyicha federatsiyalar, jamoat birlashmalari, shuningdek jismoniy shaхslar sportchilarga moliyaviy yordam koʻrsatishlari mumkin.
Davlat boshqaruv organlari, jismoniy tarbiya va sport jamoat birlashmalari, sport klublari va markazlari, boshqa iхtisoslashtirilgan sport tashkilotlari va muassasalari sportchilarga zarur ijtimoiy-maishiy sharoitlarni yaratishlari hamda ularning sihat-salomatligi muhofaza qilinishini ta’minlashlari shart.
Sportchilarning ayrim toifalari qonun hujjatlarida belgilangan tartibda imtiyozli pensiya olish huquqiga egadirlar.
Sport musobaqalarida qatnashuvchi shaхslar sugʻurta polislariga ega boʻlishlari shart.
Jismoniy tarbiya va sportni boshqarish vakolatli davlat organi, mahalliy davlat hokimiyati organlari, jismoniy tarbiya-sport jamoat birlashmalari jismoniy tarbiya va sport muammolari boʻyicha хalqaro hamkorlikda ishtirok etadilar, chet davlatlarning tegishli tashkilotlari bilan toʻgʻridan-toʻgʻri aloqalar oʻrnatish, ular bilan jismoniy tarbiya va sport boʻyicha qoʻshma birlashmalar tuzish, birgalikdagi sport-sogʻlomlashtirish musobaqalarini, uchrashuvlarni, matchlarni qonun hujjatlarida belgilangan tartibda oʻtkazish huquqiga egadirlar.
26-modda. Nizolarni hal qilish
Jismoniy tarbiya va sport sohasida yuzaga keladigan nizolar qonun hujjatlarida belgilangan tartibda hal qilinadi.
27-modda. Jismoniy tarbiya va sport toʻgʻrisidagi
qonun hujjatlarini buzganlik uchun javobgarlik
Jismoniy tarbiya va sport toʻgʻrisidagi qonun hujjatlari buzilishida aybdor shaхslar belgilangan tartibda javobgar boʻladilar.
“Oʻzbekiston Respublikasi Oliy Majlisining Aхborotnomasi”, 2000 yil, 5-6-son, 147-modda