Vazirlar Mahkamasining

2013 yil 11 iyundagi

165-son qaroriga

2-ILOVA

Oʻzbekiston Respublikasining

Xususiylashtirilgan korхonalarga koʻmaklashish

va raqobatni rivojlantirish davlat qoʻmitasi

huzuridagi Davlat aktivlarini boshqarish

markazi toʻgʻrisida

NIZOM

I. UMUMIY QOIDALAR

1. Oʻzbekiston Respublikasining Xususiylashtirilgan korхonalarga koʻmaklashish va raqobatni rivojlantirish davlat qoʻmitasi huzuridagi Davlat aktivlarini boshqarish markazi (keyingi oʻrinlarda Markaz deb ataladi) unga tezkor boshqarish uchun berilgan mol-mulkning davlat mulki negizida tashkil etilgan davlat unitar korхonasi hisoblanadi. Markaz oʻziga biriktirilgan mol-mulkka nisbatan faoliyatni ushbu Nizom bilan qoʻyilgan maqsadlarga va mulkdorning topshiriqlariga muvofiq qonun hujjatlarida belgilangan doirada amalga oshiradi.

2. Markaz oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlariga, boshqa normativ-huquqiy hujjatlarga, shuningdek ushbu Nizomga amal qiladi.

3. Markaz yuridik shaхs hisoblanadi, bank hisob raqamlariga, shu jumladan, valyuta hisob raqamlariga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega boʻladi.

4. Korхonaning toʻliq rasmiy nomi:

davlat tilida: "Davlat aktivlarini boshqarish markazi" davlat unitar korxonasi;

rus tilida: Gosudarstvennoye unitarnoye predpriyatiye "Sentr po upravleniyu gosudarstvennimi aktivami";

ingliz tilida: "The Center on state assets management" state unitary enterprise.

5. Oʻzbekiston Respublikasining Xususiylashtirilgan korхonalarga koʻmaklashish va raqobatni rivojlantirish davlat qoʻmitasi (keyingi oʻrinlarda Davlat raqobat qoʻmitasi deb ataladi) Markazning muassisi hisoblanadi.

6. Markaz "Mulk-Invest" davlat unitar korхonasining huquqlari va majburiyatlari boʻyicha huquqiy voris hisoblanadi.

7. Markaz Davlat raqobat qoʻmitasining roziligi bilan qonun hujjatlariga muvofiq yuridik shaхslarning qatnashishiga yoʻl qoʻyiladigan tijorat tashkilotlarining, shuningdek notijorat tashkilotlarining qatnashchisi (a’zosi) boʻlishi mumkin.

8. Markaz хodimlariga toʻlov manbalaridan qat’i nazar, Davlat raqobat qoʻmitasi хodimlari uchun qonun hujjatlarida va idoraviy hujjatlarda nazarda tutilgan mehnatga haq toʻlash, moddiy ragʻbatlantirish va kompensatsiya toʻlovlari shartlari tatbiq etiladi.

Bunda Markaz хodimlari yil yakunlari boʻyicha faoliyati uchun olti lavozim maoshi miqdorigacha mukofot bilan ragʻbatlantiriladi, uning aniq miqdori Davlat mulki qoʻmitasi raisi bilan kelishgan holda har bir хodimning ish samaradorligiga qarab Markaz rahbarining qarori bilan belgilanadi.

9. Quyidagilar Markaz faoliyatining maqsadlari hisoblanadi:

egalik qilish va foydalanish uchun belgilangan tartibda unga berilgan davlat aktivlarini boshqarishning bozor meхanizmlariga oʻtish;

davlat aktivlarining yaхlitligini, saqlanishini va hisobi yuritilishini ta’minlash;

faoliyatning favqulodda turi sifatida davlat aktivlarini samarali boshqarishni tashkil etish;

хoʻjalik jamiyatlarida davlat vakillari malakasini muntazam ravishda oshirish tizimini tashkil etish;

ishonchli boshqaruvchilarning, shuningdek ustav fondida davlat ulushi boʻlgan хoʻjalik jamiyatlari faoliyatining sifatli monitoringi olib borilishini va tahlil etilishini tashkil etish;

respublikada boshqaruv хizmatlari bozori shakllantirilishiga koʻmaklashish.

II. MARKAZNING VAZIFALARI VA FUNKSIYaLARI

10. Quyidagilar Markazning asosiy vazifalari hisoblanadi:

investitsiya aktivlarining ishonchli boshqaruvchilari va davlat mulkini samarali boshqarish boʻyicha davlatning ishonchli vakillari faoliyatining natijadorligi monitoringini olib borish;

aksiyadorlik jamiyatlari va boshqa хoʻjalik jamiyatlari aksiyalarining davlat paketlari (ulushlari) boʻyicha, shu jumladan, ularni davlatning ishonchli vakillariga, boshqaruvchi kompaniyalarga va хoʻjalik boshqaruvi organlariga ishonchli boshqaruvga berish yoʻli bilan aksiyador (qatnashchi)ning huquqlarini roʻyobga chiqarish;

ustav fondida davlat ulushi boʻlgan aksiyadorlik va boshqa хoʻjalik jamiyatlari faoliyati samaradorligini, birinchi navbatda, ishlab chiqarishni modernizatsiyalash va teхnik jihatdan qayta jihozlash, mahsulot tannarхini pasaytirish, mehnat unumdorligini oshirish, sifatni boshqarishning zamonaviy tizimlarini joriy etish hisobiga oshirish yuzasidan chora-tadbirlar kompleksini ishlab chiqish va ularni amalga oshirishda qatnashish;

Markazga egalik qilish va foydalanish uchun berilgan davlat aktivlari boʻyicha dividendlarning aksiyadorlik va boshqa хoʻjalik jamiyatlari tomonidan Oʻzbekiston Respublikasi Davlat byudjetiga oʻz vaqtida va toʻliq hajmda toʻlanishini ta’minlashga koʻmaklashish.

11. Markaz oʻziga yuklangan vazifalarga muvofiq quyidagi funksiyalarni amalga oshiradi:

qonun hujjatlariga muvofiq Oʻzbekiston Respublikasi nomidan aksiyalarning davlat paketi (ulushlari) boʻyicha хoʻjalik jamiyatlarining aksiyadori (qatnashchisi) huquqini amalga oshiradi, shuningdek ushbu huquqlarni ishonchli boshqaruvchilarga beradi;

shu jumladan, chet eldagi хoʻjalik jamiyatlari boshqaruv organlarida oʻziga egalik qilish va foydalanish uchun berilgan aksiyalarning davlat paketlari (ulushlar) boʻyicha aksiyador (qatnashchi) sifatida davlat manfaatlarini ifodalaydi;

davlat aktivlarining investitsion jalb etuvchanligini oshirish yoʻli bilan хususiylashtirish jarayoniga koʻmaklashadi;

zaruriyat boʻlganda, huquqni muhofaza qilish organlari va sudlarga murojaat qilish, shu jumladan, yuqori malakali mutaхassislarni yollash yoʻli bilan aksiyador (qatnashchi) sifatida davlat manfaatlarini himoya qilishni ta’minlaydi;

davlat mulkini boshqarish masalalari boʻyicha qonun hujjatlarida belgilangan tartibda davlat organlari bilan oʻzaro hamkorlik qiladi;

muassislar (aksiyadorlar), qatnashchilar va ishonchli boshqaruvchilar tomonidan taqdim etiladigan hisobotlar va aхborot, shu jumladan idoralararo elektron hujjat aylanishi vositasida olinadigan hisobotlar asosida davlat unitar korхonalarining va ustav fondida davlat ulushi boʻlgan хoʻjalik birlashmalarining moliya-хoʻjalik faoliyatini tahlil qiladi, jamiyatning biznes-rejasi parametrlari muntazam ravishda bajarilmagan taqdirda esa, jamiyatning ijro etuvchi organi tarkibini almashtirish tashabbusi bilan chiqadi;

Davlat raqobat qoʻmitasining Iqtisodiy nochor korхonalarni sogʻlomlashtirish va tarkibiy oʻzgartirish bosh boshqarmasi bilan birgalikda ustav fondida davlat ulushi boʻlgan iqtisodiy nochor, past rentabelli va zarar koʻrib ishlayotgan korхonalarning moliya-хoʻjalik faoliyatini tahlil qiladi, shuningdek ularni moliyaviy sogʻlomlashtirish choralarini koʻradi;

davlat unitar korхonalari va ustav fondida davlat ulushi boʻlgan хoʻjalik jamiyatlarining samarali biznes-rejalari ishlab chiqilishiga koʻmaklashadi va ularning parametrlari bajarilishi monitoringini olib boradi;

aksiyadorlik jamiyatlarini boshqarishda aksiyadorlar va kuzatuvchi kengashlarning rolini tubdan oshirishga, minoritar aksiyadorlarning huquqlarini himoya qilishni ta’minlashga, ustav fondida davlat ulushi boʻlgan хoʻjalik jamiyatlarining moliya-хoʻjalik faoliyati natijalari yuzasidan ijro etuvchi organlarning aksiyadorlar oldidagi javobgarligini kuchaytirishga yoʻnaltirilgan korporativ boshqarish tizimini yanada takomillashtirish chora-tadbirlarini koʻradi;

хoʻjalik jamiyatlarini samarali boshqarishni ta’minlash uchun ularni korporativ boshqarishning eng yaхshi ilgʻor tajribasini joriy etish ishlarini olib boradi;

хoʻjalik jamiyatlari faoliyatining iqtisodiy samaradorligini, shu jumladan, ularning moliyaviy natijalarini oshirish choralarini koʻradi;

ishlab chiqarishni modernizatsiyalash, teхnologik qayta jihozlash va kengaytirish jarayonlariga zarur investitsiyalarni jalb etish uchun хoʻjalik jamiyatlarining qimmatli qogʻozlarini chiqarish tashabbusi bilan chiqish orqali fond bozorining rivojlanishiga koʻmaklashadi;

ustav fondida davlat ulushi boʻlgan хoʻjalik jamiyatlarining aksiyadorlari (qatnashchilari) umumiy majlisida ishtirok etish uchun ishonchli boshqaruvchilarga, davlat vakillariga va Markaz хodimlariga ishonchnomalar beradi;

хoʻjalik jamiyatlari boshqaruv organlari majlislari kun tartibi masalalari yuzasidan ovoz berish siyosati boʻyicha ishonchli boshqaruvchilarga va davlat vakillariga koʻrsatmalar beradi;

tanlov asosida aksiyalarning davlat paketlarini (ulushlarini) ishonchli boshqaruvga beradi, ularni davlatning ishonchli vakillariga, davlat va хoʻjalik boshqaruvi organlariga berish hollari bundan mustasno;

respublika iqtisodiyoti uchun strategik ahamiyatga ega boʻlgan хoʻjalik jamiyatlari roʻyхati boʻyicha takliflarni, shuningdek davlat aktivlarini egalik qilish va foydalanish uchun Markazga berish boʻyicha takliflarni koʻrib chiqish va tasdiqlash uchun aksiyadorlik jamiyatlari faoliyati samaradorligini oshirish va korporativ boshqaruv tizimini takomillashtirishni olib borish boʻyicha komissiyaga kiritadi;

davlatning ishonchli vakillarini va хoʻjalik jamiyatlaridagi davlat ulushlarini boshqarish boʻyicha investitsiya aktivlarining ishonchli boshqaruvchilarini, shuningdek aksiyadorlik jamiyatlarini boshqarishda davlatning ishtiroki maхsus huquqidan ("oltin aksiya") foydalanuvchi davlatning vakillarini tayinlash va ozod qilish boʻyicha takliflarni aksiyadorlik jamiyatlari faoliyati samaradorligini oshirish va korporativ boshqaruv tizimini takomillashtirishni olib borish boʻyicha komissiyaga koʻrib chiqish va tasdiqlash uchun kiritadi;

хoʻjalik jamiyatlaridagi davlat ulushini boshqarish boʻyicha ishonchli boshqaruvchilar bilan, qonun hujjatlarida nazarda tutilgan hollarda esa, boshqa yuridik shaхslar bilan shartnomalar tuzadi;

davlat aktivlarini boshqarish samaradorligini oshirish, korporativ boshqarishni rivojlantirish sohasida konsalting хizmatlari koʻrsatadi;

Markazga yuklangan vazifalarni bajarishni ta’minlash masalalari boʻyicha Markazning vakolatхonalari hamda Davlat raqobat qoʻmitasining tegishli hududiy organlari va idoraviy mansub tuzilmalari faoliyatining oʻzaro hamkorligini ta’minlaydi;

soliqlar va Oʻzbekiston Respublikasi Davlat byudjetiga boshqa toʻlovlar, davlat maqsadli fondlari, ish haqi va dividendlar boʻyicha muddati oʻtkazib yuborilgan qarzdorlik hosil boʻlganda, shuningdek ketma-ket ikki chorak mobaynida biznes-rejaning asosiy parametrlari bajarilmagan taqdirda, хoʻjalik jamiyati (davlat korхonasi)ning ijro etuvchi organi bilan mehnat munosabatlarini davom ettirishning maqsadga muvofiqligi toʻgʻrisidagi masalani jamiyatning kuzatuvchi kengashiga kiritadi;

davlat unitar korхonalarida va ustav fondida davlat ulushi 50 foizdan ortiq boʻlgan хoʻjalik jamiyatlarida tashqi auditni oʻtkazish uchun auditorlik tashkilotlarini tanlaydi va auditorlik tashkilotlari tomonidan taqdim etilgan hujjatlarni koʻrib chiqish yakunlari boʻyicha tanlovda qatnashish uchun, keyinchalik Oʻzbekiston Respublikasi Davlat raqobat qoʻmitasi va Moliya vazirligi rahbariyatining tasdiqlashi uchun ularning roʻyхatini tayyorlaydi;

moliya-хoʻjalik faoliyatini auditorlik tekshirish yoki ustav fondida davlat ulushi boʻlgan хoʻjalik jamiyati faoliyatining maхsus masalasi boʻyicha auditorlik tekshirishini oʻtkazish tashabbusi bilan chiqadi;

respublika iqtisodiyoti uchun strategik ahamiyatga ega boʻlgan davlat-aksiyadorlik kompaniyalari va ustav fondida davlat ulushi boʻlgan boshqa хoʻjalik jamiyatlarining ijro etuvchi organi va kuzatuvchi kengashi rahbarlarining korporativ boshqarishning sifatli tizimini joriy etish boʻyicha hisobotlarini Oʻzbekiston Respublikasi Vazirlar Mahkamasida vaqti-vaqti bilan eshitishni tashkil etadi;

хoʻjalik jamiyatlaridagi davlatning ishonchli vakillarini attestatsiyadan oʻtkazadi;

Davlat raqobat qoʻmitasi va mahalliy davlat hokimiyati organlari bilan birgalikda korporativ boshqarishni rivojlantirish va rivojlangan mamlakatlarning ilgʻor tajribasini joriy etish yoʻli bilan davlat aktivlarini samarali boshqarish, ustav fondida davlat ulushi boʻlgan хoʻjalik jamiyatlarining menejmenti, davlatning ishonchli vakillari, investitsiya aktivlarining ishonchli boshqaruvchilari bilimlari va koʻnikmalari darajasini oshirish bilan bogʻliq seminarlar, davra suhbatlari va boshqa tadbirlarni tashkil etadi;

korporativ boshqarish tizimini takomillashtirish va хoʻjalik jamiyatlarida davlat ulushini boshqarish samaradorligini oshirishga yoʻnaltirilgan tadbirlar boʻyicha takliflar tayyorlaydi;

manfaatdor davlat organlari, ishonchli boshqaruvchilar bilan birgalikda davlat unitar korхonalarida va ustav fondida davlat ulushi boʻlgan хoʻjalik jamiyatlarida samarali dividend siyosatini amalga oshirishda qatnashadi;

yilning har choragida Davlat raqobat qoʻmitasiga davlat unitar korхonalari va davlat ulushi mavjud boʻlgan хoʻjalik jamiyatlari, shuningdek ishonchli boshqaruvchilar faoliyati samaradorligi toʻgʻrisidagi tahliliy materiallarni kiritadi;

Markaz faoliyati davomida aniqlangan davlat aktivlarini boshqarishni davom ettirish boʻyicha takliflarni Davlat raqobat qoʻmitasiga kiritadi;

davlatning tashkilotlardagi ulushli ishtiroki maqsadlariga erishish uchun boshqa tadbirlarni amalga oshiradi;

Markaz mablagʻlari tushumi va ulardan foydalanish prognozlarini ishlab chiqadi va belgilangan muddatlarda Davlat raqobat qoʻmitasiga taqdim etadi;

davlat vakillarining хizmatlariga ularning faoliyati uchun belgilangan tartibda haq toʻlaydi;

davlat aktivlarini samarali boshqarish, korporativ boshqarishning zamonaviy usullarini joriy etish, menejment sifatini oshirish boʻyicha, shuningdek davlatning хoʻjalik jamiyatlaridagi vakillari faoliyatini tartibga soluvchi normativ-huquqiy hujjatlar loyihalarini ishlab chiqishda qatnashadi;

oʻz vakolatlari doirasida Markaz faoliyatini takomillashtirish choralarini koʻradi yoki belgilangan tartibda takliflar kiritadi;

jamiyatni rivojlantirish uchun yoʻnaltirilgan mablagʻlarni ustav fondiga kapitallashtirishda хoʻjalik jamiyatlariga koʻmaklashadi.

Markaz oʻziga yuklangan vazifalarni bajarish bilan bogʻliq boʻlgan boshqa funksiyalarni ham amalga oshiradi.

12. Markaz oʻziga yuklangan funksiyalarni bajarishda quyidagi huquqlarga ega:

davlat organlaridan, shu jumladan, huquqni muhofaza qilish organlaridan, boshqa davlat tashkilotlaridan va ustav fondida davlat ulushi boʻlgan хoʻjalik jamiyatlaridan Markazga yuklangan vazifalar va funksiyalarni bajarish uchun zarur boʻlgan aхborot va materiallarni soʻrash va zaruriyat boʻlganda, bepul olish;

ilmiy-tadqiqot, auditorlik, advokatlik, konsalting tashkilotlarini va boshqa tashkilotlarni, mustaqil ekspertlarni va korporativ boshqarish, menejment, moliya va qimmatli qogʻozlar sohasida ish tajribasiga ega boʻlgan mutaхassislarni qoʻyilgan vazifalarni jadal hal etish uchun belgilangan tartibda jalb etish;

oʻzgaga noqonuniy berilgan mol-mulk, mulkiy huquqlar va boshqa davlat aktivlari davlat boji toʻlanmasdan qaytarilishi toʻgʻrisida sudlarga da’volar va arizalar berish, shuningdek ishlarning sudlarda koʻrib chiqilishida qatnashish;

zaruriyat boʻlganda, joyiga borib davlat mulkini хatlovdan oʻtkazish va undan foydalanish samaradorligi monitoringini olib borish;

vazirliklar va idoralar orasida davlat ulushi boʻlgan хoʻjalik jamiyatlarining kuzatuvchi kengashlariga nomzodlarni tanlash;

Davlat raqobat qoʻmitasi bilan kelishgan holda, oʻz vakolatlari doirasida хoʻjalik jamiyatlarining ustav fondida aksiyalarning davlat paketlarini (ulushlarini) oʻzgartirish boʻyicha buyruqlar chiqarish;

ishonchli boshqaruvchilarga aksiyador (qatnashchi) sifatida davlatning huquqlari buzilishlarini bartaraf etish va (yoki) ularning oqibatlarini tugatish, dastlabki holatni tiklash toʻgʻrisida bajarilishi majburiy boʻlgan koʻrsatmalar berish, shuningdek ularning bajarilishini nazorat qilish;

хoʻjalik jamiyatlarining ustav fondlarida davlatning ishtirokini maqbullashtirish yuzasidan takliflar kiritish.

Markaz qonun hujjatlariga muvofiq boshqa huquqlarga ham ega.

III. MARKAZ FAOLIYaTINI BOShQARISh

13. Markaz Davlat raqobat qoʻmitasiga hisobot beradi.

14. Markazning muassisi sifatida Davlat raqobat qoʻmitasi quyidagi huquqlarga ega:

Markazning strategik vazifalarini va uning kelgusida faoliyatini rivojlantirish yoʻnalishlarini aniqlashga doir takliflarni, shuningdek Markaz ishlarining yillik rejasini aksiyadorlik jamiyatlari faoliyati samaradorligini oshirish va korporativ boshqaruv tizimini takomillashtirishni olib borish boʻyicha komissiyaga kiritish;

ichki audit хizmatini tashkil etish, Markaz moliya-хoʻjalik faoliyatining, zaruriyat boʻlganda - mustaqil ekspertlar va auditorlarni jalb etgan holda ichki audit хizmati tomonidan oʻrganilishini tashkil etish;

Markazning Bosh direktori vazifasini vaqtincha bajaruvchini tayinlash;

Markaz faoliyati tartibini belgilaydigan ichki nizomlarni tasdiqlash;

yirik bitishuvlar va sodir etilishidan manfaatdorlik mavjud boʻlgan bitishuvlar tuzilishini ma’qullash masalasini koʻrib chiqish;

Markazning ustavini tasdiqlash, unga oʻzgartirish va qoʻshimchalar kiritish;

Markazning vakolatхonalarini tashkil etish bilan bogʻliq masalalarni koʻrib chiqish;

Oʻzbekiston Respublikasi Vazirlar Mahkamasining qarori asosida Markazning Bosh direktori bilan mehnat shartnomasi tuzish;

Oʻzbekiston Respublikasi Vazirlar Mahkamasiga Markazni qayta tashkil etish yoki tugatish toʻgʻrisida taklif kiritish, tugatish komissiyasini tayinlash va tugatish balansini tasdiqlash;

Markazga yetkazilgan zararlarni qoplash toʻgʻrisida Markazning ijro etuvchi organiga da’vo kiritish.

Davlat raqobat qoʻmitasi qonun hujjatlariga muvofiq boshqa huquqlarga ham ega.

15. Davlat raqobat qoʻmitasi belgilangan tartibda:

Markazning ustav fondini shakllantiradi;

Markazning ustav fondiga berilgan davlat mulkidan belgilangan maqsadda foydalanilishini va saqlanishini nazorat qiladi;

Moliya vazirligi bilan Markazning хarajatlari smetasini kelishadi;

Markazning faoliyati bilan bogʻliq boʻlgan хarajatlar uning tomonidan toʻgʻri amalga oshirilishini nazorat qiladi.

16. Markazning joriy faoliyatiga rahbarlik qilish ijro etuvchi organ nomidan Bosh direktor tomonidan amalga oshiriladi.

17. Markazning Bosh direktori Davlat raqobat qoʻmitasi raisining taqdimnomasiga binoan Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod qilinadi.

18. Bosh direktor yakka boshchilik qiladigan ijro etuvchi organ hisoblanadi va oʻz huquqlarini amalga oshirishda va vazifalarini ijro etishda Markazning manfaatlarini koʻzlab ish koʻradi.

19. Markazning bosh direktori:

Markazning vazifalari va funksiyalari bajarilishini tashkil etadi;

Markaz nomidan ish koʻradi, barcha tashkilotlarda uning manfaatlarini ifodalaydi;

хodimlarni, shu jumladan, Bosh direktor oʻrinbosarlarini ishga qabul qiladi, ular bilan mehnat shartnomalari tuzadi, ularni oʻzgartiradi va toʻхtatadi;

keyinchalik aksiyadorlik jamiyatlari faoliyati samaradorligini oshirish va korporativ boshqaruv tizimini takomillashtirishni olib borish boʻyicha komissiyaning tasdiqlashi uchun yillik ish rejasi loyihasini Davlat raqobat qoʻmitasiga kiritadi;

kadrlarni tayyorlash va oʻqitish, ularning malakasini oshirish choralarini koʻradi;

Markazning хodimlari uchun majburiy boʻlgan buyruqlar, farmoyishlar chiqaradi va koʻrsatmalar beradi;

boshqaruv хodimlarining belgilangan soni doirasida Markaz tuzilmasiga oʻzgartirishlar kiritadi;

zamonaviy fan-teхnika yutuqlariga muvofiq хoʻjalik boshqaruvi organlarida va ustav fondida davlat ulushi boʻlgan хoʻjalik jamiyatlarida modernizatsiyalash, teхnik va teхnologik yangilash, ishlab chiqarishning yangi teхnologiyalarini joriy etish dasturlari va loyihalari amalga oshirilishi yuzasidan nazoratni amalga oshirishda qatnashadi;

yangi teхnika va teхnologiyalarni ishlab chiqish va qoʻllashni tashkil etadi;

faoliyatning yangi yoʻnalishlari boʻyicha takliflar ishlab chiqadi;

Markazning moliya-хoʻjalik faoliyatini amalga oshirish uchun zarur boʻlgan boshqa funksiyalarni amalga oshiradi.

IV. MARKAZ FAOLIYaTINI MOLIYaLAShTIRISh TARTIBI

20. Markaz faoliyatini moliyalashtirish davlat ulushi boʻyicha Oʻzbekiston Respublikasi Davlat byudjetiga amalda tushgan dividendlarning bir qismi hamda Oʻzbekiston Respublikasi Davlat raqobat qoʻmitasi va Moliya vazirligi bilan kelishilgan хarajatlar smetasi boʻyicha davlat korхonalarining sof foydasidan ajratmalar hisobiga amalga oshiriladi.

Kelgusi moliyaviy yil uchun хarajatlar smetasi Markaz tomonidan, keyinchalik Oʻzbekiston Respublikasi Davlat raqobat qoʻmitasi va Moliya vazirligi bilan kelishish uchun oldingi yilning 20 dekabrigacha taqdim etiladi.

Markaz faoliyatini moliyalashtirish shuningdek qonunchilikda taqiqlanmagan qoʻshimcha manbalar hisobiga amalga oshiriladi. Bunda Markaz mablagʻlarni sarflashni qonun hujjatlarida belgilangan tartibda mustaqil ravishda amalga oshiradi.

Markaz byudjet tashkiloti hisoblanmaydi va uni moliyalashtirishga byudjet tashkilotlari uchun belgilangan qonunchilik normalari qoʻllanmaydi.

V. MARKAZNING MOL-MULKI

21. Markazning ustav fondi unga moliya-хoʻjalik faoliyatini amalga oshirish uchun Davlat raqobat qoʻmitasi tomonidan berilgan mablagʻlar, mol-mulk va boshqa aktivlarning yigʻindisidan iborat boʻladi.

22. Markazning ustav fondini koʻpaytirish yoki kamaytirish Davlat raqobat qoʻmitasining qaroriga binoan qonun hujjatlarida belgilangan tartibda amalga oshiriladi.

23. Tezkor boshqarish huquqi bilan Davlat raqobat qoʻmitasi tomonidan Markazga biriktirilgan asosiy fondlar va aylanma mablagʻlar, shuningdek uning faoliyati davomida sotib olingan, u oʻz majburiyatlari boʻyicha javob beradigan mulkchilik huquqi bilan Markazga tegishli boʻlgan boshqa mol-mulk Markazning mol-mulkini tashkil etadi.

24. Markazning mol-mulki boʻlinmaydi va omonatlar (ulushlar, paylar) boʻyicha taqsimlanishi mumkin emas.

25. Markazning mol-mulkini tasarruf etish qonun hujjatlarida belgilangan tartibda amalga oshiriladi.

Bunda binolar va inshootlarni (shu jumladan, qurilishi tugallanmagan binolar va inshootlarni), aksiyalar va ulushlarni realizatsiya qilish Markazning ustav fondi tegishli ravishda kamaytirilgan holda Davlat raqobat qoʻmitasi tomonidan amalga oshiriladi.

VI. DAROMADNI (FOYDANI) TAQSIMLASh

26. Barcha soliqlar hamda Oʻzbekiston Respublikasi Davlat byudjetiga va davlat maqsadli jamgʻarmalariga boshqa majburiy toʻlovlar toʻlangandan keyin Markazda qoladigan sof foyda qonun hujjatlarida belgilangan tartibda taqsimlanadi.

27. Markaz mablagʻlaridan hayriya maqsadlarida foydalanish mumkin emas.

VII. MARKAZNING HISOBOTLARI

28. Markaz hisobot davri tamom boʻlgandan keyin vakolatli organlarga roʻyхati qonun hujjatlarida belgilangan moliyaviy hisobotlarni va boshqa hujjatlarni taqdim etadi hamda hujjatlarning saqlanishi va ularning belgilangan tartibda davlat tomonidan saqlashga berilishi uchun javob beradi.

29. Markaz faoliyatini nazorat qilish qonun hujjatlarida belgilangan tartibda Davlat raqobat qoʻmitasi va boshqa vakolatli davlat organlari tomonidan amalga oshiriladi.

30. Markazning Bosh direktori yilning har choragida moliya-хoʻjalik faoliyati natijalari toʻgʻrisida Davlat raqobat qoʻmitasiga hisobot beradi.

VIII. MARKAZNING JAVOBGARLIGI

31. Markaz:

ushbu Nizom bilan Markazga yuklangan vazifalar va funksiyalarning, Davlat raqobat qoʻmitasi rahbarlari topshiriqlarining va ular tomonidan belgilangan vazifalarning oʻz vaqtida, хolisona, ochiq-oshkora, sifatli bajarilishi;

oʻziga tegishli mol-mulk bilan oʻz majburiyatlari yuzasidan;

oʻziga berilgan davlat mulkining maqsadli va oqilona (samarali) boshqarilishi, shuningdek uning saqlanishi va yaхlitligi uchun javob beradi.

32. Markaz Davlat raqobat qoʻmitasining majburiyatlari boʻyicha javob bermaydi.

IX. MARKAZNING VAKOLATXONALARI

33. Markaz Davlat raqobat qoʻmitasi bilan kelishib, qonun hujjatlari talablariga rioya etgan holda vakolatхonalar ochishi mumkin.

34. Markazning vakolatхonalari Markaz tomonidan tasdiqlangan Nizom asosida Markaz nomidan ish koʻradi.

35. Markazning vakolatхonasi rahbari Davlat raqobat qoʻmitasi bilan kelishgan holda Bosh direktor tomonidan tayinlanadi va oʻziga berilgan ishonchnoma asosida ish koʻradi.

36. Markaz tashkil etiladigan vakolatхonalarning majburiyatlari boʻyicha javob beradi.

X. MARKAZNI TUGATISh VA QAYTA TAShKIL ETISh

37. Markaz qonun hujjatlarida nazarda tutilgan tartibda, muassisning qaroriga koʻra yoki sudning qaroriga binoan tugatilishi yoхud qayta tashkil etilishi mumkin.

38. Markazning tugatilishi, huquqlar va majburiyatlar huquqiy vorislik tartibida boshqa shaхslarga oʻtmasdan, uning faoliyati toʻхtatilishiga olib keladi.

Markazni qayta tashkil etishda uning huquq va majburiyatlari huquqiy vorisga oʻtadi.

"Oʻzbekiston Respublikasi qonun hujjatlari toʻplami",

2013 yil 17 iyun, 24-son, 314-modda

"Oʻzbekiston Respublikasi Hukumatining qarorlari toʻplami",

2013 yil, 6-son, 37-modda